လွတ်လပ်စွာ သဘောထားကွဲလွဲခွင့်

by ယဉ်ကျေးသော လူ့အဖွဲ့အစည်း တစ်ရပ်ဆီသို့ on Friday, May 11, 2012 at 9:43am ·

လွတ်လပ်စွာသဘောထားကွဲလွဲခွင့်သည် လူသားတိုင်း၏ အခွင့်အရေးဖြစ်သည်။ "လွတ်လပ်စွာ" ဟူသော ဝေါဟာရကြောင့်လည်းကောင်း၊ "သဘောထားကွဲလွဲခွင့်" ဟူသော ဝေါဟာရကြောင့်လည်းကောင်း အထိတ်တလန့်တော့ မဖြစ်စေလိုပါ။ မြန်မာ့ဝေါဟာရနယ်ပယ်တွင် "လူတစ်ကိုယ် အကြိုက်တစ်မျိုး" ဟူသော စကားရှိသည်။ ယင်းစကားသည် လွတ်လပ်စွာသဘောထားကွဲလွဲခွင့်ကို အခြေခံသောစကားသာ ဖြစ်ပါသည်။

"လွတ်လပ်မှု"။ လွတ်လပ်မှုကို အထင်မလွဲပါနှင့်။ လွတ်လပ်မှုဆိုသည်နှင့် စည်းမဲ့၊ ကမ်းမဲ့၊ ပရမ်းပတာ၊ ဗရုတ်သုတ်ခ၊ ကသောင်းကနင်း ဖြစ်လိမ့်မည်ဟု အဓိပ္ပါယ်လွဲမှား၍ မဖွင့်ဆိုပါနှင့်။ လွတ်လပ်မှုတွင် တာဝန်နှင့် စည်းကမ်းတို့၏ အဓိပ္ပါယ်ပါပြီးသားဖြစ်သည်။ လွတ်လပ်မှုသည် ပွင့်လင်းမှုဖြစ်သည်။ အချုပ်အချယ် ကင်းလွတ်မှုဖြစ်သည်။ အမှီခိုကင်းမဲ့မှုဖြစ်သည်။ လူသည် ပတ်ဝန်းကျင်နှင့် ညှိနှိုင်းနေထိုင်ရသည်ဖြစ်ပေရာ အသိဉာဏ်ရှိသော လူသားတိုင်းသည် မိမိထင်သလိုနေ၍မရ။ ပတ်ဝန်းကျင်နှင့် လိုက်လျောညီထွေစွာ နေရမည်ကိုသိပါသည်။ အသိတရားမဲ့သော စုန်းပြူးပုဂ္ဂိုလ်တွေ ရှိနိုင်ပါသည်။ တစ်ဦးစနှစ်ဦးစ ဟူသော အသိဉာဏ်ကင်းမဲ့သူကြောင့် တန်ဖိုးရှိလှသည့် လွတ်လပ်မှုအား အဓိပ္ပါယ်အကောက် မလွဲစေလိုပါ။

"သဘောထားကွဲလွဲခွင့်"။ ပြောခဲ့ပြီးပါပြီ။ လူတစ်ကိုယ် အကြိုက်တစ်မျိုးဖြစ်သည်။ လူနှစ်ယောက်ရှိလျှင် သဘောထားတစ်မျိုးတည်းလည်း ဖြစ်နိုင်သည်။ သဘောထားနှစ်မျိုးလည်း ဖြစ်နိုင်သည်။ လူသုံးယောက်ရှိလျှင် သဘောထားတစ်မျိုးလည်း ဖြစ်နိုင်သည်။ နှစ်ယောက်ကတူ၍ ကျန်တစ်ယောက်က တစ်မျိုးနှင့် သဘောထားနှစ်မျိုးလည်း ဖြစ်နိုင်သည်။ တစ်ယောက်လျှင် သဘောထားတစ်မျိုးစီနှင့် သဘောထားသုံးမျိုးလည်း ဖြစ်နိုင်သည်။ လူလေးယောက်ရှိလျှင်၊ လူငါးယောက်ရှိလျှင်၊ လူခြောက်ယောက်ရှိလျှင် အလားတူစွာ။ အလားတူစွာပါပဲ။

သဘောထားကွဲလွဲသည်က အကြောင်းမဟုတ်ပါ။ ထိပ်တိုက်ရင်ဆိုင်မှုမဖြစ်ရေးသာ အဓိကဖြစ်သည်။ ထိပ်တိုက်ရင်ဆိုင်မှုဖြစ်သည်နှင့် ပဋိပက္ခဖြစ်တော့မည်။ ပဋိပက္ခဖြစ်သည်နှင့် လူ့ဘောင်ငြိမ်းချမ်းရေးပျက်ပြားမည်။ ငြိမ်းချမ်းရေးပျက်ပြားသည်နှင့် ဖွံ့ဖြိုးတိုးတက်မှုရှိတော့မည် မဟုတ်ပါ။

လွတ်လပ်စွာ သဘောထားကွဲလွဲခွင့်၏အဖြေသည် ညှိနှိုင်းဆွေးနွေးအဖြေရှာမှုဖြစ်သည်။ လူ့ဘောင်လောက၏ ပြဿနာများသည် ညှိနှိုင်းဆွေးနွေးအဖြေရှာခြင်းသာ ပြေလည်နိုင်သည်။ ငါတကော ကောလိုသူ၊ နိုင့်ထက်စီးနင်းပြုကျင့်လိုသူ၊ ခြောက်စားဟောက်စားပြု၍ ကိုယ်ကျိုးစီးပွားရှာလိုသူတို့ကမူ ညှိနှိုင်းဆွေးနွေး အဖြေရှာမှုကို လက်မခံ၊ မိမိတို့ တစ်ဖက်သတ်အနိုင်ရရေး၊ အမြဲ အပေါ်စီးရနေရေးကိုသာ ရှေ့တန်းတင်သည်။ မှားခဲ့သော အမှားများအတွက် ပြန်လည်ဒဏ်ခတ်ခံရမည်စိုး၍ ဤသို့ပြုလုပ်ရသည်။ ထိုသူတို့သည် လုပ်ရဲသော်လည်း ခံရမည့်အလှည့်တွင် ခံရဲသူများမဟုတ်ပေ။ ဤသို့ဖြင့် ပြဿနာတို့သည် ပိုမို၍ နက်ရှိုင်းသွားတော့သည်။ ပိုမို၍ ကြီးထွားသွားတော့သည်။ မီးခိုးမဆုံး မိုးမဆုံးဖြစ်သွားတော့သည်။

အများအကျိုးကို လိုလားသူ၊ စိတ်ရင်းကောင်း စေတနာကောင်းထားသူ၊ ပြဿနာကို အမှန်တကယ် ပြေလည်စေလိုသူတို့ကမူ လွတ်လပ်စွာ သဘောထားကွဲလွဲခွင့်ကို လက်ခံသည်။ ပြီးတော့ ညှိနှိုင်းဆွေးနွေး၍ အဖြေရှာသည်။

ဘာကြောင့် လွတ်လပ်စွာ သဘောထားကွဲလွဲခွင့်ကို ဤမျှရှေ့တန်းတင် ပြောဆိုနေရပါသလဲ။ လူ့ဘောင်လူ့လောကကို လူတစ်ဦးချင်းစီဖြင့် ဖွဲ့စည်းထားသည်။ ဤလူတစ်ဦးချင်းစီ၏ လွတ်လပ်စွာတွေးခေါ်မြော်မြင်မှုသည် အရေးကြီးသည်။ လွတ်လပ်စွာတွေးခေါ်မြော်မြင်မှ ဉာဏ်ရည်ဉာဏ်သွေး ထက်မြက်သည်။ ရှင်သန်သည်။ အစစအရာရာ ချုပ်ချယ်ထားသော သားသမီးက မိဘကွယ်ရာတွင် ထင်သလိုကြဲသည်။ မိဘက မျက်နှာလွှဲ၍မရ၊ အရွယ်နှင့်အလားတူ လွတ်လပ်မှုဖြင့် ကြီးထွားလာသောကလေးက မိဘကွယ်ရာမှာလည်း ထင်သလိုမလုပ်၊ အမှားအမှန်ကို ခွဲခြားသိသည်။ မိဘက မျက်နှာလွှဲ၍ရသည်။ ဤပုံစံကို ကမ္ဘာပေါ်ရှိ မည်သည့်မိသားစု၌မဆို တွေ့ရှိနိုင်သည်။

လွတ်လပ်စွာ သဘောထားကွဲလွဲခွင့်။

လွတ်လပ်စွာ သဘောထားကွဲလွဲခွင့်ဟူသည် တစ်မျိုးတစ်စားတည်းသာရှိသည်။ ကာလဌာနလိုက်၍ ကွဲပြားခြင်းမရှိ။ အသားအရောင်လိုက်၍ လူမျိုးကိုလိုက်၍ ကွဲပြားခြင်းမရှိ၊ အရှေ့တိုင်းသဘောထားကွဲလွဲခွင့်၊ အနောက်တိုင်းသဘောထားကွဲလွဲခွင့်ဟူ၍ မရှိ။ ဤရေမြေသဘာဝ သဘောထားကွဲလွဲခွင့်၊ ဟိုရေမြေသဘာဝ သဘောထားကွဲလွဲခွင့်ဟူ၍ မရှိ။ ကမ္ဘာပေါ်တွင် လူသားဟူ၍ တစ်မျိုးတည်းရှိသလို၊ လူသားနှင့် ပတ်သက်သော စံနှုန်းနှင့် အခွင့်အရေးကလည်း တစ်မျိုးတည်းပဲရှိသည်။

သို့သော် တချို့တချို့က ခွဲခြားပြောဆိုလိုသည်။ ထိုပြောဆိုသူသည် "ဘယ်ကလာသလဲ၊ ဘယ်နယ်ကလဲ" ဆိုသည့် သူ၏မူလဘူတကို အရင်ကြည့်ရမည်။ ယင်းသို့ ပြောဆိုသူသည် ပြည်သူက ရွေးချယ်တာဝန်ပေးခံ ပုဂ္ဂိုလ် ဟုတ်၊မဟုတ် ကြည့်ဖို့လိုသည်။ ပြည်သူ၏ အရွေးချယ်ခံပုဂ္ဂိုလ်ဆိုလျှင်တော့ ပြောခွင့်ရှိသည်။ အမှား၊ အမှန်ကို ပြည်သူက ဆုံးဖြတ်လိမ့်မည်။ ပြည်သူ၏ အရွေးချယ်ခံမဟုတ်ဘဲ၊ ကိုယ့်ဘာသာ အတင်းအဓမ္မ စင်ပေါ်တက်နေသူဆိုက ဤသို့ပြောခွင့်မရှိ။ ထိုသူတို့က ကိုယ့်အသိစိတ်ဓာတ်နှင့်ကိုယ်၊ တာဝန်သိစွာ ဆောင်ရွက်တာပါဆိုပြီး ဆင်ခြေပေးလိမ့်မည်။ ကိုယ့်အသိနှင့်ကိုယ် တာဝန်သိစွာ ဆောင်ရွက်ပါက ကိုယ်ကျိုးစီးပွားမပါစေရ။ ကိုယ့်အသိနှင့်ကိုယ် အများသွားသည့်လမ်းပြင်လျှင် ကိုယ့်ထမင်းကိုယ်စားပြီးပြင်ပါ။ အလှူခံ၍ မပြင်ပါနှင့်။ အလှူခံဖို့လိုလျှင်လည်း ကိုယ်ကျိုးစီးပွားအတွက် တစ်ပြားတစ်ချပ်မှ မသုံးပါနှင့်။ အများအတွက် ကိုယ့်အသိနဲ့ကိုယ်လည်းဆိုသေး၊ ယင်းလုပ်ငန်းကနေ စီးပွားလည်းရှာသေးဆိုပါက ထိုသူတို့ကို "ရိုးသားဖြောင့်မတ်မှုမရှိသော"၊ "စိတ်နေစိတ်ထား မစင်ကြယ်သော" ဟု နာမ၀ိသေသနတပ်၍ရသည်။ သူတို့ မရိုးမဖြောင့်သလောက် ရူပကအလင်္ကာ၊ ၀င်္က၀ုတ္တိအလင်္ကာတောင်တပ်ပြီး ပြောလို့ရပါသေးသည်။

တခြားလူတစ်ယောက်မှာ ယုံကြည်ချက်ရှိသည်။ မိမိမှာ ယုံကြည်ချက်ရှိသည်။ ယုံကြည်ချက်မတူကာမျှနှင့် ရန်သူမဟုတ်ပါ။ သူနှင့်မိမိတို့ ယုံကြည်ချက်ခြင်း မတူစေကာမူ သူ၏ယုံကြည်ချက်ကို အလေးထားလေးစားပါ။ ယင်းသည် ယဉ်ကျေးသောလူ့အဖွဲ့အစည်း၏ မူလဘူတလက္ခဏာ ဖြစ်သည်။

ကိုဝမ်း

( 7Day News ဂျာနယ် အတွဲ ၈၊ အမှတ် ၃၃ မှ ပြန်လည်ကူးယူဖော်ပြပါသည် )