12.05.2012 နေ့ဖတ်ရန်သတင်းများ

by Myanmar Journal on Friday, May 11, 2012 at 4:43pm ·

အခုနှစ်ဝက်ကနေ ရှေ့နှစ် အချိန်အထိ တဖြည်းဖြည်း ပြန်လည် ဦးမော့လာမယ်ယူရိုဇုန်စီးပွားရေး ဆုတ်ယုတ်

ဥရောပမှာ အခုနှစ် စီးပွားရေး ဆုတ်ယုတ် လာ နေတဲ့ အပေါ် အီးယူ ဥရောပ သမဂ္ဂက ခန့်မှန်းချက် ထုတ်ပြန်ရာမှာ၊ ယူရိုဇုန် စီးပွားရေးဟာ ဒီနှစ်အတွက် သုည ဒဿမ ၃ ရာခိုင်နှုန်း ဆုတ်ယုတ် သွားလိမ့်မယ်လို့ အီးယူ စီးပွားရေး ကော်မရှင်နာ မင်းကြီး အိုလီရိန်းက ပြောပါတယ်။

ဥရောပစီးပွားရေး ဆုတ်ယုတ်မှုဟာ အလယ် အလတ် အဆင့်လောက်မှာ ရှိနေပြီး ဒီနှစ်ဝက်ကနေ ရှေ့နှစ်အထိ အချိန်အတွင်း တဖြည်းဖြည်းခြင်း ပြန်လည် ဦးမော့လာမယ် ဆိုတာ ယုံကြည်ရပါတယ်လို့ သူက ပြောကြားပါတယ်။

စီးပွားရေး ကသောင်းကနင်း အဓိက ဖြစ်နေတဲ့ နိုင်ငံတခု ဖြစ်တဲ့ စပိန်နိုင်ငံ ကတော့ ဘဏ္ဍာရေး လုပ်ငန်းပိုင်းတွေ နဲ့ ပတ်သက်ပြီး စိုးရိမ်မှုတွေ လျော့ကျဖို့ ကြိုးပမ်းနေပါတယ်။

စပိန်အစိုးရကနေ သူတို့ရဲ့ ပြုပြင်ပြောင်းလဲမှု အစီအစဉ်တွေကို ထုတ်ဖေါ်ပြောကြားရာမှာ အရှုံးပေါ်နေမှုတွေ အထူးသဖြင့်တော့ အိမ်ယာဈေးကွက်မှာ အရှုံး ပေါ်နေတာတွေကို ကာကွယ် နိုင်ဖို့ အတွက် ဘဏ်တွေ အနေနဲ့ အရန်ငွေ ပိုမိုထားရှိဖို့ တာဝန်ရှိလာမှာ ဖြစ်တယ်လို့ ဆိုပါတယ်။

မစ္စတာ အိုလီရိန်းက စပိန်နိုင်ငံဟာ စီးပွားရေး ဆုတ်ယုတ်မှု အခြေအနေထဲမှာ ဆက်လက် ရှိနေပေမယ့်လည်း၂၀၁၃ ခုနှစ်မှာ ပြန်လည် ဦးမော့်လာနိုင် တယ်လို့ သူက ခန့်မှန်းထား ပါတယ်။ ဒါပေမယ့်လည်း ခိုင်ခိုင်မာမာ ရှိမယ့် ပုံစံမျိုးတော့ မဟုတ်ဘူးလို့ သူက ဆိုပါတယ်။

နိုင်ငံ ဖွံ့ဖြိုး တိုးတက်အောင် လုပ်ဖို့ သမ္မတ ပြော

မြန်မာ နိုင်ငံ ဖွံ့ဖြိုး တိုးတက်ရေးနဲ့ ပတ်သက်ပြီး ပြုပြင် ပြောင်းလဲမှုတွေ ကို ထိထိ ရောက်ရောက် ကြိုးပမ်း ဆောင်ရွက် သွားကြဖို့ သမ္မတ ဦးသိန်းစိန်က တိုက်တွန်း ပြောဆို လိုက်ပါတယ်။

သမ္မတက လွှတ်တော် အဖွင့် မိန့်ခွန်းမှာ ပြောခဲ့တဲ့ အတိုင်း လက်တွေ့ လုပ်ဖို့ ထပ် သတိပေး

သောကြာနေ့က နေပြည်တော်မှာ ပြုလုပ်တဲ့ တိုင်းနဲ့ ပြည်နယ် အသီးသီးက ဝန်ကြီးချုပ်တွေ၊ ကိုယ်ပိုင် အုပ်ချုပ်ခွင့်ရ တိုင်းဒေသ တွေက ဥက္ကဌတွေ တက်ရောက်တဲ့ အထူး အစည်း အဝေးမှာ သမ္မတက အခုလို ပြောခဲ့တာပါ။

ဒီလို ပြောဆိုမှုဟာ ဦးသိန်းစိန် အနေနဲ့ သမ္မတ ရာထူးလက်ခံ ရယူခဲ့စဉ် လွှတ်တော်မှာ ပြောခဲ့တဲ့ မိန့်ခွန်း အတိုင်း သန့်ရှင်းတဲ့ အစိုးရ၊ ပွင့်လင်း မြင်သာတဲ့ အစိုးရ ဖြစ်ရေး အတွက် လက်တွေ့ လုပ်ဆောင်ကြဖို့ ထပ်မံ သတိ ပေးလိုက်တဲ့ သဘောပဲလို့ မြန်မာ့ ဓန စီးပွားရေး မဂ္ဂဇင်းနဲ့ Open News ဂျာနယ် တို့ရဲ့ အယ်တီတာချုပ် ဖြစ်တဲ့ ဦးသီဟစောက ပြောပါတယ်။

လောလောဆယ်မှာ သမ္မတ ကသာ သန့်ရှင်းတဲ့ အစိုးရ ဖြစ်ဖို့ အဂတိ လိုက်စားမှု ကင်းတဲ့ အစိုးရ ဖြစ်ဖို့ ပြောနေ ပေမဲ့ အောက်ခြေ မှာတော့ လိုက်နာ ဆောင်ရွက်တာ မရှိသေးတဲ့ အတွက် ပြည်နယ်နဲ့ တိုင်း ဒေသကြီး အစိုးရတွေကို ဖိဖိစီးစီး လုပ်ကြဖို့ ခေါ်ယူ သတိပေးတာ ဖြစ်တယ်လို့ ထင်မြင် ယူဆကြောင်း လည်း ဦးသီဟစောက ဘီဘီစီကို ပြောပါတယ်။

နိုင်ငံ့ စီးပွားရေး ဖွံ့ဖြိုး တိုးတက်အောင် လုပ်တဲ့ နေရာမှာ လူတစ်စု မျက်နှာကို မကြည့်ဘဲ ပြည်သူအများ ပူးပေါင်း ဆောင်ရွက် လာနိုင်ဖို့ ရင်းနှီး မြှုပ်နှံမှု တွေကို အဂတိ တရား ကင်းအောင် လုပ်ဆောင်မှ နိုင်ငံတကာနဲ့ ယှဉ်နိုင် မယ်လို့ လည်း သမ္မတက သူ့ မိန့်ခွန်းထဲမှာ ပြောသွားပါတယ်။

ဒါဟာ အခွင့်ထူးခံ လူတစ်စုထဲရဲ့ မျက်နှာကို သာ မကြည့်ဘဲ ပြည်သူ အများရဲ့ ဆန္ဒ တွေကိုလည်း ထည့်သွင်း စဉ်းစားဖို့ လိုတယ်လို့ မှာကြားလိုတဲ့ သဘော ဖြစ်တယ်လို့ ဦးသီဟစောက သုံးသပ် ပါတယ်။

ဒါပေမဲ့ လောလောဆယ်မှာ အဂတိ လိုက်စားမှုတွေ မတရားမှု တွေကို ကိုင်တွယ် ဖြေရှင်းနေတဲ့ လက္ခဏာတွေ တော့ မတွေ့ရသေးဘူး အဲဒီလို ကိစ္စတွေ လုပ်တာ တွေ့ရတယ် ဆိုရင် လည်း ဘယ်လို အရေးယူမယ်၊ ဘယ်ကို တိုင်ကြားရမယ် စသဖြင့် လုပ်ဆောင်ဖို့ သတိပေးတာ ဖြစ်တယ်လို့ လည်း သူက ပြောပါတယ်။

သမ္မတရုံး သတင်းပြန်ကြားရေးဌာန ဝက်ဘ်ဆိုဒ်ဖွင့်လှစ်

သမ္မတ လမ်းညွှန်ချက်အတိုင်း သတင်း ချက်ခြင်း ထုတ်ပြန်နိုင်ရေး အတွက်ရည်ရွယ်

မြန်မာနိုင်ငံမှာ နိုင်ငံတော် သမ္မတရုံး သတင်း ပြန်ကြားရေးဌာန အင်တာနက် ဝက်ဘ်ဆိုဒ် ကို သောကြာနေ့မှာ တရားဝင် ဖွင့်လှစ် လိုက်ပြီ ဖြစ်ပါတယ်။

ပွင့်လင်းမြင်သာမှုရှိတဲ့ အစိုးရ ဖြစ်ရေး ဆိုတဲ့ သမ္မတရဲ့ လမ်းညွှန်ချက်အတိုင်း ချက်ခြင်း သတင်းထုတ်ပြန်နိုင်ရေး အတွက် ဒီအင်တာနက် စာမျက်နှာကို ရည်ရွယ် ဖွင့်လှစ်တာ ဖြစ်ကြောင်း သမ္မတရုံး ညွှန်ကြားရေးမှူး ဦးဇော်ဌေးက ဘီဘီစီကို ပြောပါတယ်။

အင်္ဂလိပ် မြန်မာ နှစ်ဘာသာနဲ့ ရေးသားထားတဲ့ ဒီဝက်ဘ်ဆိုဒ်မှာ အချိန်နဲ့ တပြေးညီ သတင်းတွေကို မြန်မာနဲ့ နိုင်ငံတကာက ချက်ခြင်း သိရှိစေမှာ ဖြစ်ပြီး၊ ကောလဟာလ သတင်းမှားတွေရှိခဲ့ရင်လည်း ဒီကနေ သတင်းမှန်တွေကို ထုတ်ပြန်ပေးမှာ ဖြစ်တယ်လို့ ဦးဇော်ဌေးက ပြောပါတယ်။

သမ္မတရုံးအတွက် ပြောရေးဆိုခွင့်ရှိသူကိုလည်း တရားဝင်ခန့်အပ်ထားမှာ ဖြစ်ပြီး၊ သတင်း မီဒီယာတွေအနေနဲ့ သိချင်တာရှိရင် အဲဒီသူနဲ့ ဆက်သွယ်မေးမြန်းနိုင်တယ်လို့ ဆိုပါတယ်။

အများပြည်သူတွေအနေနဲ့ ဒီစာမျက်နှာကနေတဆင့် အမြင်သဘောထားတွေ ပေးနိုင်အောင် လည်း စီစဉ်ထားမှာ ဖြစ်တယ်လို့ သိရပါတယ်။

ပြီးခဲ့တဲ့ သင်္ကြန်မတိုင်ခင်ကတည်း ဒီဝက်ဘ်ဆိုဒ်ကို ပြင်ဆင်ခဲ့တာ ဖြစ်ပြီး၊ မေလ ၉ ရက်နေ့ ကြမှ စတင် စမ်းသပ် ဖွင့်ခဲ့တာ ဖြစ်ကြောင်းနဲ့ အခုမှ တရားဝင် ဖွင့်လှစ်ခဲ့တာ ဖြစ်တယ်လို့ သူက ပြောပါတယ်။

ဒီကနေ့ သောကြာနေ့မှာ ပြုလုပ်တဲ့ သမ္မတရဲ့ လုပ်ငန်းညှိနှိုင်းအစည်းအဝေး အကြောင်းကို အခု ဝက်ဘ်ဆိုဒ် အသစ်မှာ ချက်ခြင်းဆိုသလို တင်ခဲ့တာကြောင့် တချို့ မီဒီယာတွေကတောင် ဒီဝက်ဘ်ဆိုဒ် သတင်းကို ကိုးကားပြီး ရေးသား ဖေါ်ပြကြပါတယ်။

Truvada ကာကွယ်ဆေးHIVကာကွယ်ဆေးတွေ့

 Truvada ဆေးဝါးကို အမေရိကန် ဆေးဝါးနဲ့ အစားအသောက်ဆိုင်ရာ စီမံခန့်ခွဲမှု ဘုတ်အဖွဲ့ FDA ကို အသိအမှတ်ပြုဖို့ ထောက်ခံတင်ပြ လိုက်သူကတော့ အမေရိကန် ကျန်းမာရေးဆိုင်ရာ ကျွမ်းကျင်သူအုပ်စုတခု ဖြစ်ပါတယ်။တခါ တခြားတဘက်မှာတော့ အိတ်ခ်ျအိုင်ဗီ၊ အေအိုင်ဒီအက်စ် ဖြစ်နေသူတွေကို ကျန်းမာရေးစောင့်ရှောက်မှု ပေးနေတဲ့ နယ်ပယ်ထဲက ကျွမ်းကျင်သူတချို့နဲ့ အဖွဲ့အစည်းတချို့ကတော့ ဒီဆေးကို အသိအမှတ်မပြုဖို့အတွက် ကန့်ကွက်နေကြ ပါတယ်။

ဒါပေမယ့်လို့ သတင်းထောက်တွေရဲ့အဆိုအရတော့ အိတ်ခ်ျအိုင်ဗီ၊ အေအိုင်ဒီအက်စ် တိုက်ဖျက်ရေးအတွက် သမိုင်းမှတ်တိုင်သစ်တခုတော့ ဖြစ်တော့မယ်လို့ သိရပါတယ်။ ဂလက်စတုန်း အင်စတီကျူ့က ဒေါက်တာ ရောဘတ် ဂရန့်ကလည်း အိတ်ခ်ျအိုင်ဗီ၊ အေအိုင်ဒီအက်စ်ကို အမြစ်ဖြုတ် ချေမှုန်းနိုင်တော့မယ့် ခေတ်ထဲ ရောက်တော့မယ်ဆိုတာ မြင်နေရပါပြီ။ ဒါဟာ ပထမဆုံးအကြိမ်လည်း ဖြစ်၊ ကြီးမားတဲ့ သမိုင်းဝင် မှတ်တိုင်ကြီးလည်း ဖြစ်ပါတယ်လို့ ပြောသွားပါတယ်။၂၀၁၀ ပြည့်နှစ်က လေ့လာမှုတွေ အရတော့ ကယ်လီဖိုးနီးယားပြည်နယ်အခြေစိုက် ဂျီလတ် ဆိုင်းယင့်စ်က ထုတ်လုပ်ခဲ့တဲ့ Truvada ဆေးဝါးဟာ ကျန်းမာသန်စွမ်းတဲ့ လိင်တူအမျိုးသားတွေ သုံးတဲ့အခါ အိတ်ခ်ျအိုင်ဗီ ဖြစ်ပွားမှုနှုန်း ၄၄ ရာခိုင်နှုန်း လျော့ကျသွားပြီး၊ အိတ်ခ်ျအိုင်ဗီပိုး ရှိနေတဲ့ လိင်ဆက်ဆံနေဆဲဖြစ်တဲ့ ပိုးမရှိသေးတဲ့ သူတွေမှာတော့ ၇၃ ရာခိုင်နှုန်း လျော့ကျသွားတာကို တွေ့ရတယ်လို့ ဆိုပါတယ်။

အိတ်ခ်ျအိုင်ဗီ၊ အေအိုင်ဒီအက်စ်ဆိုရာ အကြံပေးကော်မတီက FDA ကို ၁၉ မဲ သုံးမဲနဲ့ ထောက်ခံတင်ပြခဲ့တာမှာတော့ ကူးစက်နိုင်ချေများတဲ့ လူကွဲတွေနဲ့ လိင်တူချင်း ဆက်ဆံမှုများတဲ့ ပိုးမရှိသေးတဲ့ အမျိုးသားတွေကို ဒီဆေးကို သုံးကြဖို့ အကြံပေး တင်ပြခဲ့ကြတယ်လို့ သိရပါတယ်။ဒီအဖွဲ့ကပဲ လိင်မှုလွန်ကျူးသူတွေနဲ့ ပိုးရှိသူတွေနဲ့ အတူနေကြတဲ့သူတွေကိုလည်း ပိုး မကူးအောင် ကာကွယ်ဖို့အနေနဲ့ ဒီဆေးကို သုံးကြဖို့ ထောက်ခံမဲ အတော်များများနဲ့ ထောက်ခံထားတယ်လို့ သိရပါတယ်။ အမေရိကန် ဆေးဝါးနဲ့ အစားအသောက် စီမံခန့်ခွဲရေးဘုတ်အဖွဲ့ FDA ကတော့ ဒီဆေးနဲ့ ပတ်သက်ပြီး သုံးစွဲဖို့ သင့်တယ်၊ မသင့်ဘူးဆိုတဲ့ ဆုံးဖြတ်ချက်ကို လာမယ့် ဇွန်လ ၁၅ ရက်နေ့မှာ ချမှတ်သွားမယ်လို့ သိရပါတယ်။                      

မနီလာမြို့ တရုတ်ကောင်စစ်ဝန်ရုံးရှေ့မှာ ဆန္ဒပြ

လူသိပ်မများပေမယ့် ဆန္ဒပြသူတွေက အကြီး အကျယ် အော်ဟစ် ခဲ့ကြပါတယ်

တရုတ်နဲ့ ဖိလစ်ပိုင်နိုင်ငံအကြား ရေပိုင်နက် အငြင်းပွားမှုတွေကြောင့် တင်းမာမှုတွေ တိုပွားလာနေတဲ့ အချိန်မှာပဲ ဖိလစ်ပိုင်နိုင်ငံ မနီလာမြို့မှာ ရှိတဲ့ တရုတ်ကောင်စစ်ဝန်ရုံး ရှေ့မှာ လူပေါင်း ၂၀၀ လောက် တရုတ်နိုင်ငံ ကို ကန့်ကွက် ဆန္ဒပြခဲ့ ကြပါတယ်။

ဒီဆန္ဒပြပွဲဟာ လူသိပ်မများပေမယ့် ဆန္ဒပြသူ တွေက အကြီးအကျယ် အော်ဟစ် ဆန္ဒပြခဲ့ ကြပါတယ်။

တောင်တရုတ်ပင်လယ်က ကျွန်းစုတွေကို သူပိုင်ငါပိုင် အငြင်းပွားနေတဲ့ အတွက် ထိပ်တိုက် ရင်ဆိုင်မှုတွေ တလကြာ ဖြစ်ပွားခဲ့စဉ် အတွင်း တရုတ်တို့ဘက်က ကလိန်ကျမှုတွေ လုပ်ခဲ့ တယ်လို့ ရေးသားထားတဲ့ ဆိုင်းဘုတ်တွေကို ဆန္ဒပြသူ တချို့က ကိုင်ဆောင် ထားကြပါတယ်။

နှစ်နိုင်ငံ ဆက်ဆံရေးတွေ ပိုမို ဆိုးဝါးလာနေတာကြောင့် တရုတ်ခရီးသွား အေဂျင်စီတွေဟာ ဖိလစ်ပိုင် ခရီးသွား လုပ်ငန်းတွေကို ရပ်ဆိုင်းထားခဲ့တာ ဖြစ်ပါတယ်။

အငြင်းပွားမှု ဖြစ်နေတဲ့ ကျွန်းစုတွေကို ဖိလစ်ပိုင်နိုင်ငံက သူတို့ ပိုင်တယ်လို့ ဆက်လက် ပြောဆိုနေမယ် ဆိုရင်တော့ တိုက်ခိုက်မှုတွေ ဖြစ်လာနိုင်ချေရှိတယ်လို့ တရုတ် နိုင်ငံပိုင် မီဒီယာကနေ သတိပေး ပြောဆိုထားပါတယ်။

ရခိုင်မှာ ယဉ်ကျေးမှုက ထိန်းသိမ်းမယ်

လမ်းဖောက်လို့ ရှေးဟောင်း စေတီတွေ ဖျက်ဆီးခံရ

မြန်မာ အစိုးရ ယဉ်ကျေးမှု ဌာနက ရခိုင် ပြည်နယ်က ရှေးမြို့တော်ဟောင်း ၂ မြို့ကို ကာကွယ် ထိန်းသိမ်းတဲ့ နေရာများ အဖြစ် စာရင်းသွင်း သတ်မှတ် လိုက်ပါတယ်။

ဓညဝတီ ခေါ် မြောက်ဦး မြို့ဟောင်းနဲ့ ပိုရှေးကျတဲ့ ဝေသာလီ မြို့ဟောင်းတွေကို ဓရာဝတီ တိုင်းက မြောင်းမြ မြို့ဟောင်း၊ ထားဝယ်နားက သာဂရ မြို့ဟောင်း၊ စစ်ကိုင်းတိုင်း မုံရွာနားက အမြင့် အနိမ့် မြို့ဟောင်းတွေနဲ့ အတူ ထိန်းသိမ်း စောင့်ရှောက်မယ့် မြို့များ စာရင်းမှာ ထည့်သွင်း ခဲ့ပါတယ်။

မူလက စာရင်းမှာ မပါဝင် ခဲ့တဲ့ အတွက် ကျောက်တော် ရထားလမ်း ဖောက်တာလို ရှေးဟောင်း စေတီ မြို့ရိုးတွေ ဖျက်ဆီးခံ ရတာတွေ ရှိခဲ့တာမို့ ဒီလို တာဝန်ယူ လိုက်တာကို ဒေသခံ စာပေ သမိုင်း ပညာရှင်တွေက ကြို ဆို ခဲ့ကြပါတယ်။ 

လုပ်ခလစာ ပြေလည်မှ လူနေမှု တိုးတက်ကိုရီးယား အထည်စက်ရုံ ဆန္ဒပြပြန်

ရန်ကုန် စက်မှု ဇုန်တွေမှာ အလုပ်သမား အခွင့်အရေးနဲ့ လစာ တိုးတောင်း တာတွေ နေ့စဉ်ရက်ဆက် လိုလို ပေါ်ပေါက် နေပါတယ်။

ကြာသပတေးနေ့က လှိုင်သာယာ စက်မှုဇုန် ၄ က ကိုရီးယားပိုင် YES အထည်ချုပ် စက်ရုံမှာ အလုပ်သမား တထောင် ဆန္ဒပြ ခဲ့ကြပါတယ်။

လစာ ကျပ်တသောင်း ငါးထောင့် ငါးရာက ရှားပါးစရိတ် နှစ်သောင်းထိ တိုးပေးဖို့ ၊ နေ့လုပ်ခ ကျပ်တရာ တိုးပေးဖို့နဲ့ အလုပ်ချိန်ကို မနက် ၈ နာရီက ည ၈ နာရီထိ သတ်မှတ်ပေးဖို့ တောင်းဆို ခဲ့ကြပါတယ်။

ကြာသပတေးနေ့ ညနေမှာပဲ အလုပ်ရှင်က ၁၂,၅ဝဝ ထိ တိုးပေးလိုက်ကာ တခြား လိုက်လျောမှုတွေ လုပ်ခဲ့လို့ ပြေလည်မှု ရသွားတယ် သိရပါတယ်။

အလားတူပဲ ဗုဒ္ဓဟူးနေ့ ကတည်းက လုပ်ခ အတွက် သပိတ်မှောက်နေတဲ့ ဟိုင်မို ဆံပင်တု စက်ရုံ လုပ်သား တွေလည်း အလုပ်ရှင်က လိုက်လျော ပေးလိုက်တယ်လို့ သိရပါတယ်။

ဒီတိုက်ခိုက်မှုဟာ အသေအပျောက် အများဆုံး တိုက်ခိုက်မှုဖြစ်ဆီးရီးယားမြို့တော်မှာ ဗုံးဖေါက်ခွဲ တိုက်ခိုက်မှုတွေဖြစ်

 ဆီးရီးယားနိုင်ငံ ဒမာ့စကပ်စ်မြို့တော်မှာ ဗုံးဖေါက်ခွဲ တိုက်ခိုက်မှုနှစ်ခု ဖြစ်ပွားခဲ့ရာမှာ လူ၅၀ကျော် သေဆုံးပြီး လေးရာနီးပါး ဒဏ်ရာရသွားပါတယ်။

မနက်ဖက် ကျောင်းတက် ရုံးတက်ချိန် ဒမာ့စကပ်စ်မြို့ တောင်ဘက်ပိုင်း ထောက်လှမ်းရေးရုံး အဆောက်အအုံတခုနားက ယာဉ်အသွားအလာ ရှုပ်ထွေးတဲ့ လမ်းမကြီး ပေါ်မှာ ဒီပေါက်ကွဲမှုတွေ ဖြစ်ပွားခဲ့တာ ဖြစ်ပြီး အစိုးရ ဆန့်ကျင် ဆန္ဒပြမှုတွေ စဖြစ်ခဲ့တဲ့ လွန်ခဲ့တဲ့ တနှစ်ကျော်အတွင်း ဒမာ့စကပ်စ်မြို့မှာ လူအသေအပျောက် အများဆုံး တိုက်ခိုက်မှုတွေလို့ ဆိုနိုင်ပါတယ်။

ထိခိုက်သေဆုံးခဲ့သူ အများစုဟာ ရုံးတက် ကျောင်းတက်ဖို့ သွားနေသူတွေ ဖြစ်ပါတယ်။

လမ်းမကြီးပေါ်မှာ တွန့်လိမ် ပျက်စီးနေတဲ့ မော်တော်ယာဉ် အတော်များများ ပြန့်ကျဲနေတာ တွေ့ရပါတယ်။

ဒမာ့စကပ်စ်မြို့ ဆေးရုံက ဆရာဝန်တဦးကတော့ ဆေးရုံကို ရောက်လာတဲ့ လူနာတွေရဲ့ ဒဏ်ရာတွေဟာ အတော့်ကို ပြင်းထန်ပြီး သူမြင်ဘူးသမျှ အရေးပေါ် ကယ်ဆယ် ကုသမှုတွေ ထဲမှာ အဆိုးဝါးဆုံး ဖြစ်တယ်လို့ ပြောပါတယ်။

ရေခဲတိုက်ကို ရောက်လာတဲ့ အလောင်းတွေအားလုံး ခြေပြတ်လက်ပြတ် ဖြစ်နေပြီး မီးကျွမ်း နေတာ တွေ့ရပါတယ်။

ရုပ်မြင်သံကြားမှာ ဖေါ်ပြတဲ့ သတင်းတွေအရ ဒါဟာ အကြမ်းဖက်သမားတွေရဲ့ တိုက်ခိုက်မှုလို့ ပြောပါတယ်။

အတိုက်အခံဘက် ဖြစ်တဲ့ ဆီးရီးယား အမျိုးသား ကောင်စီကတော့ ဒီတိုက်ခိုက်မှုကို အစိုးရက နောက်ကွယ်ကနေ လုပ်ခဲ့တာ ဖြစ်ပြီး ကုလသမဂ္ဂ ရဲ့ ငြိမ်းချမ်းရေး အစီအစဉ် မအောင်မြင်ဘူး ဆိုတာကို သက်သေပြချင်တဲ့ သဘောနဲ့ လုပ်တာလို့ ဆိုပါတယ်။

ဆီးရီးယားနိုင်ငံမှာ ဒီလို တိုက်ခိုက်မှုတွေ ဖြစ်ပွားတိုင်းမှာ အမြဲလိုလို လေသံ နှစ်မျိုး ထွက်လေ့ ရှိပါတယ်။

ဒါပေမယ့် ဒီတိုက်ခိုက်မှုတွေကို ဘယ်သူပဲ လုပ်ခဲ့၊ လုပ်ခဲ့ အခုလို မနက်ပိုင်း ကျောင်းတက် ရုံးတက်ချိန်မှာ လုပ်ခဲ့တာကိုကြည့်ခြင်းအားဖြင့် ထိခိုက်သေဆုံးမှု များနိုင်သမျှ များအောင် တမင် ရည်ရွယ် လုပ်ခဲ့တာကို တွေ့ရပါတယ်။

အခင်း ဖြစ်ပွားခဲ့တဲ့ နေရာကို ကုလသမဂ္ဂ စစ်ဘက်ဆိုင်ရာ လေ့လာ စောင့်ကြည့်ရေးအဖွဲ့ အကြီးအကဲ ဗိုလ်ချုပ် Robert Mood ကိုယ်တိုင် လာရောက် ကြည့်ရှုသွားပါတယ်။

ဒီတိုက်ခိုက်မှုတွေဟာ မနှစ်မြို့စရာကောင်းတဲ့ အကြမ်းဖက်မှု လုပ်ရပ်တခု ဖြစ်ပြီး ဒီလို အကြမ်းဖက် တိုက်ခိုက်မှုတွေ လုပ်ခြင်းအားဖြင့် အမျိုးသမီးတွေ၊ ကလေးငယ်တွေအပါအဝင် ဆီးရီးယား ပြည်သူတွေကို ပိုဒုက္ခရောက်အောင် လုပ်သလိုပဲ ဖြစ်နေတယ် ဆိုတာကို ဆီးရီးယား ပြည်တွင်း ပြည်ပက လူအားလုံး သဘောပေါက်ဖို့ လိုတယ်လို့ သူက ပြောသွားပါ တယ်။

ဆီးရီးယား ဖောက်ခွဲမှု လက်သည် ဘယ်သူလဲ

 ဆီးရီးယား ဗုံးခွဲ တိုက်ခိုက်မှု ငါးဆယ်ကျော်သေ

မနေ့က ကြာသပတေးနေ့ မနက်က ဒမတ်စကတ် မြို့မှာ အသေခံ ဗုံးခွဲ တိုက်ခိုက်မှု နှစ်ခု ဖြစ်ပွား ခဲ့ပြီး ဆီးရီးယားမှာ မငြိမ်မသက်မှုတွေ စတင်တဲ့ မနှစ်ကစပြီး ကနေ့ထိ အပျက်အစီး အများဆုံး ပေါက်ကွဲမှု ဖြစ်ပါတယ်။

ဆီးရီးယား အစိုးရ ရုပ်သံက ဒဏ်ရာ အပြင်း အထန် ရသွားသူတွေရဲ့ သွေးသံရဲရဲ ပုံတွေကို ပြသခဲ့ပြီး လူငါးဆယ့်ငါးယောက် သေဆုံး တယ်လို့ ပြောပါတယ်။

တချိန်က ငြိမ်းငြိမ်းချမ်းချမ်း ရှိခဲ့တဲ့ မြို့တော် ဒမတ်စကာဒ် အတိုက်ခိုက် ခံရတာ ခုဆိုရင် ငါးကြိမ် ရှိသွားပြီ ဖြစ်ပြီး နောက်ဆုံး ဖြစ်ပွားတဲ့ တိုက်ခိုက်မှုဟာ မတ်လ ၁၇ ရက်နေ့က ဖြစ်ပြီး အဲဒိတုန်းက လူ ၁၇ ယောက် သေဆုံး ခဲ့ပါတယ်။

လက်လုပ် ဖောက်ခွဲရေး ပစ္စည်းတွေနဲ့ ပတ်သက်ပြီး ကောင်းကောင်း နားလည်တဲ့ စစ်ရေး အကဲခပ် တယောက်က ခုတိုက်ခိုက်မှုဟာ အစိုးရ ထောက်လှမ်းရေးတွေကို အထိနာဆုံး ဖြစ်အောင် သေချာ စီစဉ် အကွက်ချထားတဲ့ တိုက်ခိုက်မှုလို့ ပြောပြပါတယ်။

ဒါ့အပြင် အရပ်သားတွေ သေကြေ ထိခိုက် ဒဏ်ရာ ရမှာကို လုံးဝ ထည့်စဉ်းစားပုံ မရတဲ့ တိုက်ခိုက်မှုမျိုး ဖြစ်တယ်လို့ ဘီဘီစီကို ပြောပြပါတယ်။

မနေ့က ဗုံးခွဲ တိုက်ခိုက်မှု နှစ်ခုမှာ ပထမ တခုက အပျော့စား ဖြစ်ပြီး နောက်လူတွေ ထပ်ရောက်လာအောင် မြှားထားတဲ့ တည်ဗုံး ဖြစ်တယ်လို့ ပြောပါတယ်။

ပထမ ပေါက်ကွဲမှု ဖြစ်ပြီး လုံခြုံရေး တာဝန်ရှိသူတွေ တနေရာထဲကို စုရောက်လာတော့မှ ဒုတိယ ဖေါက်ခွဲမှုနဲ့ လူအသေ အပျောက် များနိုင်သမျှ များအောင် ဒုတိယ ဖောက်ခွဲမှုကို ပြုလုပ်ခဲ့တာ ဖြစ်တယ်လို့ စစ်ရေး အကဲခပ်က ပြောပါတယ်။

ဆီးရီးယား အစိုးရကတော့ ဒီဖောက်ခွဲမှုကို အကြမ်းဖက် ခြောက်လှန့် သတ်ဖြတ်ရေးသမား တွေက လက်ချက်လို့ ပြောလိုက်ပြီး သူတို့ကို အတိုက်အခံ လုပ်နေတဲ့ သူပုန်တွေက ကုလသမဂ္ဂရဲ့ အပစ်အခတ် ရပ်စဲရေး ပျက်အောင် တမင်သက်သက် လုပ်တာလို့ စွပ်စွဲပါတယ်။

ဒါပေမယ့် ဆီးရီးယား အတိုက်အခံတွေကတော့ ဒီဖေါက်ခွဲမှုဟာ သူတို့ လုပ်တာ မဟုတ်ဘူးလို့ ပြောလိုက်ပြီး အစိုးရက နိုင်ငံတကာက သူတို့ကို ဂရုဏာ သက်လာအောင် ကိုယ့်တိုင်းသူ ပြည်သားတွေကို ကိုယ်ပြန်သတ်ပြီး အတိုက်အခံကို လက်ညှိုးထိုးနေတာ ဖြစ်တယ်လို့ ပြောပါတယ်။

ဆီးရီးယား အစိုးရ အဆက်ဆက်ဟာ ဝါဒ ဖြန့်ချီရေး ရည်ရွယ်ချက် သက်သက် အတွက် ကိုယ့်တိုင်းသူ ပြည်သား ကိုယ်ပြန်သတ်တာ အရင်က ဥပမာ လက်ဘနွန်မှာတုန်းက ရှိခဲ့ဘူးတယ်လို့ စစ်ရေး အကဲခပ်က ဘီဘီစီကို ပြောပါတယ်။

တဆက်ထဲ အရပ်သားတွေကို နေ့စဉ်နဲ့ အမျှ ဗုံးကြဲနေတာကို နိုင်ငံတကာက ဝေဖန် နေမှုတွေကိုလည်း အာရုံ လွဲသွားအောင် လုပ်တာ ဖြစ်နိုင်တယ်လို့ ပြောပါတယ်။

တဘက်မှာ တတိယ အင်အားစုလို့ သိကြတဲ့ အဓိက အတိုက်အခံ မဟုတ်တဲ့ အဖွဲ့တဖွဲ့က အရင်က အလားတူ တိုက်ခိုက်မှုတွေဟာ သူတို့ လက်ချက်ဆိုပြီး ထုတ်ပြောဘူးပါတယ်။

ဒီအဖွဲ့ဟာ ဇန်နဝါရီလလောက်က စ ပေါ်လာတာ ဖြစ်ပြီး အရင် မော်တော်ကား ဗုံးခွဲ တိုက်ခိုက်မှုတွေ၊ လေတပ် ထောက်လှမ်းရေး ဌာနနဲ့ ရဲတပ် ဌာနချုပ်တို့ကို ပစ်မှတ်ထား တိုက်ခိုက်ခဲ့ပါတယ်။

ဒီအဖွဲ့ဟာ ဂျီဟာဒ် ဘာသာရေး စစ်ပွဲ ဆင်နွှဲဖို့ လှုံ့ဆော်နေတဲ့ အဖွဲ့ ဖြစ်ပြီး သူတို့ဟာ အယ်ခိုင်ဒါနဲ့ ဆက်စပ်ကောင်း ဆက်စပ်နေနိုင်တယ်လို့ သံသယ ရှိကြပါတယ်။

ဒီနှစ် အစောပိုင်းက ဘင်လာဒင် နေရာကို ဆက်ခံတဲ့ ဒေါက်တာ အိုင်မင် အယ် ဇဝါဟီရီက ဆီးရီးယား တော်လှန်ရေးကို ထောက်ခံဖို့ ကမ္ဘာ တဝှမ်းက မွတ်စလင်တွေကို တိုက်တွန်း ခဲ့ပါတယ်။

တကယ်လည်း ဆီးရီးယားမှာ ဒီလောက် ကြီးမားတဲ့ ဖောက်ခွဲမှုကြီးကို လုပ်နိုင်စွမ်းရှိတာ အစိုးရနဲ့ အယ်ခိုင်ဒါ နှစ်ခုပဲ ရှိတယ်လို့ ဘီဘီစီ လုံခြုံရေး သတင်းထောက်က သတင်း ပေးပို့ထားပါတယ်။

ကန်စစ်ကျောင်း သင်ရိုး ဘာသာရေး ပုတ်ခတ်

အမေရိကန် စစ်ကျောင်းတွေမှာ အစ္စလာမ် ဘာသာ အကြောင်း သင်ကြားတဲ့ ဘာသာရပ်နဲ့ ပတ်သက်ပြီး အဆင့်မြင့်ဆုံး အမေရိကန် စစ်အရာရှိကြီး တယောက်က ဝေဖန် ရှုတ်ချ လိုက်ပါတယ်။

အမေရိကန်ရဲ့ ဘာသာရေး လွတ်လပ်ခွင့်နဲ့ ယဉ်ကျေးမှု အလေးထား မှုတွေကို ဆန့်ကျင် နေတဲ့ ဒီသင်တန်းကို လုံးဝ လက်ခံလို့ မရဘူးလို့ ပူးတွဲ စစ်ဦးစီးချုပ် အဖွဲ့ အကြီးအကဲ ဗိုလ်ချုပ်ကြီး မာတင် ဒမ်ဆီက ဆိုပါတယ်။

အရင်လက ရပ်ဆိုင်းလိုက်တဲ့ ဒီသင်တန်းမှာ အမေရိကနဲ့ အစ္စလာမ် ဘာသာဝင်တွေ စစ်ဖြစ်နေကြတယ်၊ မက္ကာလို အစ္စလာမ် ဘာသာရေး အရ အထွတ်အမြတ် မြို့တော်တွေကို လိုအပ်ရင် အဏုမြူဗုံးချ ပစ်ရမယ်ဆိုတဲ့ အပြော အသုံးတွေ ပါခဲ့ပါတယ်။

သမ္မတရုံးအင်တာနက်စာမျက်နှာ စတင်ဖွင့်လှစ်

By ဗွီအိုအေ (မြန်မာဌာန)

မြန်မာနိုင်ငံမှာ နိုင်ငံတော်သမ္မတရုံးရဲ့ သတင်းပြန်ကြားရေးရုံးကနေ ပထမဆုံး Website ကို ဒီကနေ့ စတင်လိုက်ပါတယ်။

မြန်မာဘာသာနဲ့ ရေးသားထားတဲ့ Website မှာ သမ္မတရုံးနဲ့ ပတ်သက်တဲ့သတင်းတွေ၊ အုပ်ချုပ်ရေး၊ အစိုးရအဖွဲ့၊ လွှတ်တော်စသဖြင့် ကဏ္ဍတွေ ခွဲပြီးတော့ တင်ဆက်ထားတာကိုတွေ့ရပါတယ်။ ဒီကနေ့ တင်ထားတဲ့ သတင်းကတော့ သမ္မတနဲ့ တာဝန်ရှိသူတွေ လုပ်ငန်းညှိနှိုင်းရေးအစည်းအဝေး ပြုလုပ်နေတဲ့ပုံဖြစ်ပါတယ်။

ထူးခြားတာက ဒီသတင်းနဲ့ အတူ ဖော်ပြထားတဲ့ ဓာတ်ပုံထဲမှာ သမ္မတရဲ့ ညာဘက်ထိပ်မှာ ထိုင်ခုံတနေရာ လစ်လပ်နေတာကို တွေ့ရပါတယ်။ သတင်းထဲမှာလဲ တက်ရောက်သူများစာရင်းမှာ ဒုတယသမ္မတ ဦးတင်အောင်မြင့်ဦးရဲ့ နာမည်ဖော်ပြထားခြင်းလည်း မရှိပါဘူး။

ဒါဟာ ဦးတင်အောင်မြင့်ဦး ဒုတိယသမ္မတရာထူးကနေ နုတ်ထွက်တယ်ဆိုတဲ့သတင်းကို သွယ်ဝိုက်ပြီး ဖော်ပြ လိုက်သလားလို့ သုံးသပ်မှုတွေလည်း ရှိနေပါတယ်ရှင်။

HIV ကာကွယ်ဆေးသစ် အမေရိကန်အတည်ပြုမည်

By ဗွီအိုအေ (မြန်မာဌာန)

AIDS ရောဂါဖြစ်စေတဲ့ HIV ပိုးကို ကာကွယ်နိုင်ဖို့ ဆေးဝါးသစ်တမျိုးကို ပထဆုံးအနေနဲ့ ဗဟိုအစိုးရ အတည်ပြုချက်ပေးဖို့ အမေရိကန် ကျွမ်းကျင် ဆေးပညာရှင်အဖွဲ့ တဖွဲ့က ထောက်ခံချက် ပေးလိုက်ပါတယ်။

လောလောဆယ် ကျန်းမာနေပေမဲ့ AIDS ရောဂါရနိုင်တဲ့ အလားအလာရှိနေသူတွေကို Truvada ဆေးဝါး သုံးဖို့ ထောက်ခံသင့်မသင့် ကြာသာပတေးနေ့က အစားအသောက်နဲ့ ဆေးဝါးအုပ်ချုပ်ရေး FDA ရဲ့ အကြံပေးအဖွဲ့က မဲနှစ်ကြိမ်ပေးပြီး ဆုံးဖြတ်ခဲ့ကြတာပါ။

လိင်ဆက်ဆံဖော်တဦးမှာ HIV ပိုး ရှိနေတဲ့ လိင်ကွဲဆက်ဆံသူနဲ့ လိင်တူဆက်ဆံသူ ပုံစံနှစ်မျိုး အတွက် မဲပေးဆုံးဖြတ်ကြတာပါ။ တနေ့တလုံးသောက်ရတဲ့ ဒီဆေးဝါးကို အရင်က HIV ပိုးရှိသူတွေ သုံးစွဲခဲ့ကြပြီး သားဖြစ်ပါတယ်။

ဒါပေမဲ့ Truvada ဆေးကို HIV ကာကွယ်ကုသဆေးအဖြစ် အတည်ပြု ပေးဖို့အတွက် FDA အဖွဲ့က အခု ဆုံးဖြတ်ရမှာဖြစ်ပါတယ်။ ဆရာဝန် တချို့က ဒီဆေးဟာ AIDS ကူးစက်ရောဂါကို အဆုံးသတ်ဖို့ ပထမ အဆင့်အဖြစ် ကြိုဆိုကြပါတယ်။ ဒါပေမဲ့ တချို့ကတော့ ဒီဆေးဟာ လူတွေကို လွဲမှားတဲ့ ယုံကြည်မှုဖြစ်စေပြီး HIV ပိုးကို ကာကွယ်ရာမှာ အထိရောက်ဆုံးဖြစ်တဲ့ လိင်တံစွပ် Condom အသုံးပြုမှု နည်းသွားစေ နိုင်မယ်လို့ ယူဆကြပါတယ်။

FDA အနေနဲ့ အကြံပေးအဖွဲ့ရဲ့ ထောက်ခံချက်ကို အမြဲလိုက်နာဖို့ မလိုအပ်ပေမဲ့ များသောအားဖြင့်တော့ အကြံပေး အဖွဲ့ရဲ့ ဆုံးဖြတ်ချက်ကို လိုက်နာလေ့ ရှိပါတယ်။ဒီကိစ္စနဲ့ပတ်သက်လို့ ဂျွန်လ ၁၅ ရက်နေ့ မှာ နောက်ဆုံး ဆုံးဖြတ်ချက် ချရမှာဖြစ်ပါတယ်။

တိုင်းရင်းသားဒေသ ဖွံ့ဖြိုးရေးကိုပါ စဉ်းစားဖို့ ရင်းနှီး မြှုပ်နှံသူတွေကို ဒေါ်စု တိုက်တွန်း

By ကိုသားညွန့်ဦး

ဒေါ်အောင်ဆန်းစုကြည်နေအိမ်တွင် ပိုလန်နိုင်ငံခြားရေးဝန်ကြီး Radoslaw Sikorski နှင့် ပူးတွဲသတင်းစာရှင်းလင်းပွဲ။ (မေလ ၁၀ ရက်၊ ၂၀၁၂။)

မြန်မာနိုင်ငံတွင်း ရင်းနှီးမြုပ်နှံမှုတွေနဲ့ ဖွံဖြိုးရေးလုပ်ငန်းတွေ လုပ်ဆောင်ကြမယ် ဆိုရင် မြန်မာပြည်မကြီး တင်မဟုတ်ဘဲ မြန်မာတိုင်းရင်းသား လူနည်းစုဒေသတွေမှာပါ သွားရောက် လုပ်ဆောင်ကြဖို့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်က တိုက်တွန်းပါတယ်။ မြန်မာနိုင်ငံအပေါ် အနောက်နိုင်ငံတွေက အရေးယူပိတ်ဆို့မှုတွေ ရုပ်သိမ်းလာတဲ့ တချိန်တည်း မှာ နိုင်ငံတကာက မြန်မာနိုင်ငံတွင်း စီးပွားရေး ရင်းနှီးမြှုပ်နှံဖို့ ပိုပြီး စိတ်ဝင်စားမှု တိုးလာကြပါတယ်။ ဒီ အခြေအနေကိုတော့ ကိုသားညွန့်ဦးက တင်ပြပေး ထားပါတယ်။

မြန်မာနိုင်ငံတွင်း ပြုပြင်ပြောင်းလဲမှုတွေနဲ့အတူ အနောက်နိုင်ငံတွေဘက် စီးပွားရေးပိတ်ဆို့မှု အကန့်အသတ်တွေကို ဖယ်ရှားလိုက်တာကြောင့် မြန်မာနိုင်ငံတွင်း ရင်းနှီးမြှုပ်နှံမှုနဲ့ စီးပွားရေး လုပ်လိုတဲ့ကုမ္ပဏီတွေ၊ လုပ်ငန်းရှင်တွေအတွက် အခွင့်အလမ်းတွေ လုပ်ခွင့်သာခွင့်တွေ ပိုလာပါတယ်။ ဒီနှစ်အတွင်း မြန်မာနိုင်ငံတွင်း လာရောက်တဲ့ နိုင်ငံခြားခရီးသည်အများစုဟာလည်း စီးပွားရေးလုပ်ငန်းတွေ အခြေချ ရင်းနှီးမြှုပ်နှံဖို့ လာရောက်လေ့လာ ဆန်းစစ်သူတွေများပါတယ်။ ဒါကြောင့်လည်း ရင်းနှီးမြှုပ်နှံ မှုတွေနဲ့ ဖွံ့ဖြိုးရေးလုပ်ငန်းတွေ လုပ်ကိုင်ကြမယ်ဆိုရင် မြန်မာပြည်မကြီးမှာတင် မဟုတ်ဘဲ တိုင်းရင်းသား လူနည်း စုဒေသတွေမှာလည်း လုပ်ကိုင်နိုင်ရေး စဉ်းစားကြဖို့ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်က မနေ့တုန်းက တိုက်တွန်းသွားပါတယ်။

“မြန်မာနိုင်ငံထဲ ဖွံ့ဖြိုးရေးအကူအညီတွေ ပေးချင်သူတွေ ဒါမှမဟုတ် ရင်းနှီးမြှုပ်နှံမှုတွေ လုပ်ချင်တယ် ဆိုရင် မြန်မာလူမျိုး အများစုရှိတဲ့ ဒေသတွေမှာတင်မဟုတ်ဘဲနဲ့ တိုင်းရင်းသား လူနည်းစုဒေသတွေမှာ လုပ်မယ့် အစီအစဉ်တွေကိုလည်း စဉ်းစားသင့်ပါတယ်။ ပြည်မကြီး ဒေသက ကျမတို့ ပြည်သူတွေကလည်း ဆင်းရဲပါတယ်။ ဒါပေမယ့် တိုင်းရင်းသားလူနည်းစုဒေသ ပြည်သူတွေက ပိုပြီး ဆင်းရဲပါတယ်။ ပိုပြီးတော့ လည်း အကူအညီတွေ လိုအပ်နေပါတယ်။”

မနေ့တုန်းက ပိုလန်နိုင်ငံခြားရေးဝန်ကြီးနဲ့ တွေ့ဆုံအပြီး သတင်းထောက်တွေကို ဒေါ်အောင်ဆန်းစုကြည် က ပြောသွားတာပါ။ အရင်တုန်းကတော့ အနောက်နိုင်ငံတွေက ပ်ိတ်ဆို့အရေးယူမှုတွေ၊ ဘဏ္ဍာငွေကြေး ဆိုင်ရာ တင်းကြပ်မှုတွေကြောင့် မြန်မာနိုင်ငံထဲ ရင်းနှီးမြှုပ်နှံသူတွေ အခက်ကြုံခဲ့ကြရပါတယ်။ အထူး သဖြင့်တော့ ဘဏ်လုပ်ငန်းနဲ့ ငွေကြေး အလွှဲအပြောင်း ကိစ္စတွေမှာပါ။ ဒါ့အပြင် မြန်မာနိုင်ငံထဲ ဖွံ့ဖြိုးမှု နိမ့်ကျရတာ ဒီလို စီးပွားရေး ဒဏ်ခတ်မှုတွေကြောင့်လို့ အပြစ်တင်သူတွေလည်း ရှိပါတယ်။ ပိုလန်နိုင်ငံခြားရေး ၀န်ကြီး H.E Mr. Radoslaw Sikorski ကတော့ အနောက်နိုင်ငံတွေ အထူးသဖြင့် အီးယူဘက်က အရေးယူ ဒဏ်ခတ်မှုတွေကို ရပ်ဆိုင်းလိုက်တာကြောင့် အခုနက အကန့်အသတ်တွေ မရှိတော့ဘူးလို့ မနေ့က ဒေါ်စုနဲ့ အတူကျင်းပတဲ့ သတင်းစာရှင်းလင်းပွဲမှာ ပြောသွားပါတယ်။

“အရေးယူဒဏ်ခတ်မှုတွေကို ဆိုင်းငံလိုက်ခြင်းကြောင့် သက်ရောက်မှုတွေအားလုံးကို ကျနော်တို့ ဖယ်ရှား လိုက်ပါပြီ။ ဒါကြောင့် မြန်မာနိုင်ငံ စီးပွားရေးဟာ ဒီလို အရေးယူဒဏ်ခတ်မှုတွေကြောင့် ဖွံ့ဖြိုးမှု နောက် ကျနေတယ်လို့ ပြောလို့မရတော့ပါဘူး။ ဒဏ်ခတ်အရေးယူမှုတွေက အခု မရှိတော့ပါဘူး။ ဒါပေမယ့် တချိန်တည်းမှာပဲ ကျနော်တို့ သတိပေးနေတာက အခု ပြုပြင်ပြောင်းလဲမှုတွေ နောက်ကြောင်းပြန် လှည့်မသွားဖို့ပါ။ တနှစ်အတွင်းမှာ သေချာအောင် စောင့်ကြည့်သွားမှာပါ။ ဒါပြီးရင်တော့ မူဝါဒကို ပြန် လည် သုံးသပ်သွားမှာပါ။”

နိုင်ငံ့ခေါင်းဆောင်တွေအတော်များများ အခုရက်ပိုင်း မြန်မာနိုင်ငံကို လာရောက်တဲ့အခါ သက်ဆိုင် ရာနိုင်ငံက နိုင်ငံတကာ ဖွံ့ဖြိုးရေး လုပ်ငန်းလုပ်ဆောင်နေသူတွေ၊ စီးပွားရေးလုပ်ငန်းရှင်တွေပါ ပါဝင်လာ ကြပါတယ်။ အခု ပိုလန်နိုင်ငံခြားရေးဝန်ကြီးနဲ့အတူလည်း ပိုလန်နိုင်ငံ အကြီးစား စက်မှု လုပ်ငန်း နဲ့ ဆောက်လုပ်ရေးဆိုင်ရာ စီးပွားရေးလုပ်ငန်းရှင်အတော်များများ ပါလာတာကြောင့် မြန်မာနိုင်ငံထဲ စီးပွားရေး အခွင့်အလမ်းတွေကို လာရောက် ကြည့်ရှုတယ်လို့လည်း ယူဆနိုင်ပါ တယ်။

နှစ်နိုင်ငံအကြား သတ္ထုတွင်းလုပ်ငန်းနဲ့ ဘူမိဗေဒဆိုင်ရာ အပြန်အလှန် သဘောတူညီချက်တရပ်ကို လည်း မြန်မာအာဏာပိုင်တွေနဲ့ ချုပ်ဆိုခဲ့ပါတယ်။ ဒါဟာ နှစ်ဘက် အပြန်အလှန် အကျိုးရှိမယ့် ကိစ္စရပ်တွေ ဖြစ်စေရမယ်လို့ ပိုလန်နိုင်ငံခြားရေးဝန်ကြီးက ပြောခဲ့ပါတယ်။

“မြန်မာနိုင်ငံနဲ့ တကယ်ကို လက်တွဲဘက်နိုင်ငံ သဘောမျိုးဖြစ်ချင်တာပါ။ ဒါကြောင့် အပြန်အလှန် အကျိုး စီးပွားအတွက် နည်းပညာတွေ လွှဲပြောင်းကူညီဖို့ရှိသလို ရင်းနှီးမြှုပ်နှံဖို့လည်း ရှိပါတယ်။ ဒါကြောင့် ပထမ ဆုံးတော့ ပညာတော်သင် ခေါ်ယူတာတွေ လုပ်ပါမယ်။”

မြန်မာနိုင်ငံတွင်း အခုလို အနောက်နိုင်ငံတွေဘက်က စီးပွားရေးလုပ်ငန်းတွေ ကုမ္ပဏီတွေ ရင်းနှီးမြှုပ်နှံတာ ဟာ အရင် အာရှဘက် ဒေသတွင်း နိုင်ငံတွေက ရင်းနှီးမြှုပ်နှံမှုတွေထက် ပိုပြီး မြန်မာလူထုအတွက် အကျိုး ရှိစေမယ်လို့ ယူဆမှုတွေရှိပါတယ်။ စီးပွားရေးရင်းနှီးမြုပ်နှံမှုကြောင့် ဘေးထွက်ရင်ဆိုင်ရမယ့် ဆိုးကျိုးတွေ ကို အနောက်နိုင်ငံဘက်က ကုမ္ပဏီမျိုးတွေကပဲ ပြန်ပြီး ကုစားပေးနိုင်မယ်လို့ မြန်မာ့စီးပွားရေး လုပ်ငန်းရှင် တဦးဖြစ်တဲ့ ဦးမိုးမြင့်က သြစတေးလျ ABC ရုပ်/သံ ဌာနနဲ့ တွေ့ဆုံမေးမြန်းခန်းမှာ ပြောခဲ့ပါတယ်။

“ဒီလို ကုမ္ပဏီတွေ လာရောက်ရင်းနှီးလုပ်ကိုင်စေချင်ပါတယ်။ ဘာကြောင့်လဲဆိုတော့ နိုင်ငံရဲ့သဘာဝ ပတ်ဝန်းကျင်ဆိုင်ရာ လူတွေရဲ့ ပညာရေး၊ ကျန်းမာရေးဆိုင်ရာတွေအပေါ် ဒီကုမ္ပဏီတွေကပဲ အပြု သဘော ပြန်လည် ဆောင်ရွက်ပေးနိုင်တာကြောင့်ပါ။ ပြီးတော့ လူလတ်တန်းစား အရေအတွက်လည်း များလာနိုင်ပါတယ်။”

အနောက်နိုင်ငံတွေက ရင်းနှီးမြှုပ်နှံမှုတွေဟာ တဘက်က လူမှုအဖွဲ့အစည်းအပေါ် တာဝန်ယူမှု အစီ အစဉ်တွေ ဖွံ့ဖြိုးရေးလုပ်ငန်းတွေ ပြန်လည် လုပ်ဆောင်ပေးလိမ့်မယ်လို့ ယူဆကြပါတယ်။ လက်ရှိ အားဖြင့် မြန်မာနိုင်ငံ တွင်း ရင်းနှီးမြှုပ်နှံမှုအများစုဟာ အာရှက ဖြစ်ပါတယ်။ အထူးသဖြင့် တရုတ်နိုင်ငံ ကပါ။ အဲဒီ ရင်းနှီးမြုပ်နှံ မှုတွေ စီမံကိန်းတွေဟာ ဒေသခံတွေအပေါ် ရိုက်ခတ်မှုရှိပြီး သဘာဝ ပတ်ဝန်းကျင် ထိခိုက်တာ၊ လူ့အခွင့် အရေး ချိုးဖောက်တာတွေ ရှိတယ်လို့ လူ့အခွင့်အရေးအဖွဲ့တွေကတော့ ပြောနေပါ တယ်။

အခုတော့ နိုင်ငံရေးပြုပြင်ပြောင်းလဲမှုတွေနဲ့တဆက်တည်း အနောက်နိုင်ငံတွေရဲ့ မြန်မာအပေါ် စီးပွားရေး ပိတ်ဆို့မှုတွေ ရုပ်သိမ်း လာတာ ကြောင့် အနောက်နိုင်ငံက ရင်းနှီးမြှုပ်နှံမှုတွေ ၀င်လာမယ့် အလား အလာကောင်းတွေ ရှိလာပါတယ်။ တချိန်တည်းမှာလည်း အာဏာပိုင်တွေဘက်က နိုင်ငံခြား ရင်းနှီးမြှုပ်နှံမှု ဥပဒေတရပ်ကို ရေးဆွဲအတည်ပြုပြီး နိုင်ငံခြားရင်းနှီးမြှုပ်နှံမှုတွေ ၀င်ရောက်လာဖို့ ဖိတ်ခေါ် ကြိုးစားနေ တာ တွေ့ရပါတယ်။