"၀န်ကြီးကား"
|
12:34 AM |
No မှတ်ချက် |
by Ter Tee on Thursday, April 5, 2012 at 4:55pm
ကိုအောင်ဆန်း ၊ ကိုကြီးနု တို့ တို့ဗမာအစည်းအရုံး မ၀င်မီကပင် သာဓု "သခင်" ဖြစ်နေခဲ့သည်မှာ နယ်ချဲ့သမားများကိုတိုက်ရခြင်းသည်၎င်း ၊ ငို့ဘ နိုင်ငံရေးသမားကြီးများကို ကလော်ရခြင်းသည်၎င်း
ပျော်လည်းပျော်၏ ။ စိတ်ဇွဲလည်းထက်သန်၏ ။
ဂျပန်ခေတ် ကိုရွှေသခင်များ ရာထူးအမယ်မယ် ရကြသောအခါ
လုပ်ဖော်ကိုင်ဘက်ချင်းပင် မျက်နှာထားတင်းလာကြသောကြောင့် သာဓုစိတ်ပျက်စပြုလာ၏ ။ နိုင်ငံရေးကိုစိတ်ပျက်ခြင်းမဟုတ် ။ စိန်နားကပ် မပန်ဖူးသူ ဗြုန်းကနဲ ပန်လိုက်ရသော်
နားတခါခါရှိတတ်သကဲ့သို့ "ရာထူးနှင့် အာဏာ" ခေါင်းပေါင်းကလေး ပေါင်းလိုက်ရသောအခါ
သခင်အချို့ ခေါင်းတခါခါ ဖြစ်လာသောကြောင့် "မူ" ကိုမဟုတ် "လူ" ကိုစိတ်ပျက်သဖြင့်
သာဓုလည်း နိုင်ငံရေးမှထွက်ကာ ပူတူတူး ပေါင်ဒါ လုပ်ရောင်းရင်းခပ်အေးအေးနေခဲ့၏ ။
ဂျပန်ပြေးရပြီး အင်္ဂလိပ်များ ပြန်ဝင်လာသည် ။ ထို့နောက် ဖ-ဆ-ပ-လ အစိုးရဖွဲ့သည် ။
တနေ့သော် သာဓုသည် ပူတူတူး ပေါင်ဒါကြော်ငြာကားကို မြေနီကုန်းဘက်မှ မောင်းလာစဉ်
ဦးဝိစာရအ၀ိုင်းသို့ အရောက် ရွှေတိဂုံဘုရားဘက်မှ အရှိန်ပြင်းစွာ ၀င်လာသော မာစီဒီးကား တစ်စီးနှင့်
တိုက်မိလုလု ဖြစ်သွားသည် ။ ကားလမ်းစည်းကမ်း အရဆိုလျှင် သာဓုက အ၀ိုင်းဆီရောက်နှင့်နေပြီ ။
ထိုကားက အရှိန်သတ်ရပ်စောင့်ရမည်ဖြစ်သော်လည်း တဇွတ်ထိုးမောင်းဝင်လာသည် ။
ထိုကားကမှားနေသည် ။ သို့တိုင်အောင် ယင်းမာစီဒီးကားသည် နောက်ဆုတ်ရှောင်မပေး ။ မောင်းသူကပင် သာဓုကိုဘုကြည့်ကြည့်ကာ တစ်စုံတစ်ခုရေရွတ်သည် ။ သာဓုမကြားရ ။
မကြာမီ ဘေးမှထိုင်လိုက်လာသူ ဆင်းလာသည် ။ သို့မှပင် ဆင်းလာသူသည်သက်တော်စောင့် ၊
နောက်မှထိုင်လိုက်လာသူသည် ၀န်ကြီးဖြစ်သည်ကိုသတိထားမိ၏ ။ ဆင်းလာသူသက်တော်စောင့်က
စတင်းဂန်းလော ၊ တော်မီလော မမှတ်မိ ။ သေနတ်ကိုင်ထားးသည် ။
"ခင်ဗျားဘယ်လိုမောင်းတာလဲ"
"သူလိုငါလိုပဲမောင်းတာပေါ့" ... သို့သာဓုဖြေသည်ကို သူမကျေနပ် ။
မှားနေသူအဖို့မေးခွန်းရှားပါးနေဟန်ဖြင့်ကြောင်နေသည် ။ ၀န်ကြီးလုပ်သူကလှမ်းခေါ်သည် ။
သူမကြား၍လော ၊ အာဏာပြလို၍လော မသိ ။ သက်တော်စောင့်မင်းက မဖြစ်သေးသောကိစ္စ ၊
အကြောင်းရင်းမဟုတ်သော စကားဖြင့် မေးခွန်းထုတ်နေပြန်၏ ။
"ခုမတိုက်မိသေးဘူး ၊ ကဲ တိုက်မိပြီဆိုပါတော့ ဘယ်သူလမ်းမှားသလဲ" ဟု သာဓုက လိုရင်းကိုကိုင်လိုက်သောအခါ သူဘာပြောရမှန်းမသိ ဖြစ်သွားရာမှ ...
"ဒါ ဘယ်သူ့ကားလဲ ၊ မသိဘူးလား"
သာဓုက မသိဟန်ဆောင်ကာခေါင်းခါ ပြလိုက်သည်နှင့် ...
"ဒါ ၀န်ကြီးကား ၊ ကြည့်ရှောင်မှပေါ့"
သာဓုတွင် ပူကနဲသွေးဆူသွား၏ ။ ဥပဒေဆိုသည်မှာ ပြည်သူအတွက်သပ်သပ် ၊
ဝန်ကြီးများအတွက် တစ်မျိုးဟူ၍ မရှိ ။ ကမ္ဘာတွင်လည်းမရှိ ။ ၀န်ကြီးကား လမ်းမှားလျှင် အပြစ်မရှိ ၊
မှန်သူပင် အလျော်ပေးရမလိုဖြစ်နေသည် ။ သူတို့ရာဇ၀တ်မှုကျူးလွန်လျှင် မည်သို့နည်း ။
သို့သော် သာဓု တိုတိုပင်ပြောလိုက်သည် ။
"ဘယ်သိမလဲ ၊ ကောင်းပြီ ၊ နောက်ကိုကျုပ်ကြည့်ရှောင်မယ် ၊
ဝန်ကြီးကားမှန်း သိအောင်လည်း ခေါင်းလောင်းလေး တပ်ထား ၊ ကလောင်ကလင်ဆို ဘေးကပ်ပေးမယ်" ... သို့ပြောလိုက်သည်နှင့် သူ့မျက်နှာတွင် ရဲကနဲ နီသွားသည် ။
တစုံတရာ ပြောဆိုမည်အပြုတွင် ကားထဲပါလာသူဝန်ကြီးက ...
"ဟေ့ လာ လာ ပြောမနေနဲ့တော့ ၊ သွားမယ် လာ" ဟုလှမ်းခေါ်လိုက်သဖြင့် သက်တော်စောင့်လည်း
ခပ်ဆောင့်ဆောင့် ထွက်သွားရင်းက သိပ်လူဝါးဝတဲ့ကောင် ဟူသော အကြည့်မျိုးဖြင့် ဘုကြည့်ကြည့်သွားသေး၏ ။
ခြောက်လခန့် ကြာသောအခါ ဆွေးနွေးပွဲတခု၌ ၀န်ကြီး သခင်လွင် ၊ ၀န်ကြီး သခင်ချစ်မောင် ၊
ဝန်ကြီး ဦးရာရှစ် တို့နှင့် အမှတ်မထင် တွေ့ဆုံမိကြခိုက် ၁၃၀၀ ပြည့် အရေးတော်ပုံ ၊ ရေနံသပိတ် ၊
လွတ်လပ်ရေးတိုက်ပွဲ ... စသည်တို့ဖြင့် စကားစပ်မိသည်တွင် သခင်လွင်က ...
ပူတူတူး ပေါင်ဒါ အသံချဲ့စက်ကို ဟောပြောပွဲတိုင်း ကူညီခဲ့သည့်အကြောင်း ရောက်သွားသည်နှင့် ဦးရာရှစ်လည်း သာဓုကိုလှည့်ကြည့်၏ ။ အားနာပြုံး ပြုံးပြ၏ ။
သာဓု
( သာဓု လူဝါးဝတယ် စာအုပ်မှ )
0 comments:
Post a Comment