30.04.2012 နေ့ဖတ်ရန်သတင်းများ

by Myanmar Journal on Sunday, April 29, 2012 at 3:05pm ·

ကုလအတွင်းရေးမှူးချုပ် မြန်မာနိုင်ငံကို ရောက်ရှိ

မြန်မာအစိုးရ အရာရှိတွေနဲ့ တွေ့ဆုံမှာ ဖြစ်သလို NLD ဥက္ကဌ နဲ့လည်း တွေ့ဆုံမယ်

ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်းဟာ မြန်မာနိုင်ငံက ဒီမိုကရေစီရေး ပြုပြင်ပြောင်းလဲမှုတွေ ရှေ့တိုးဆောင်ရွက် နိုင်ရေး တွန်းအားပေးဖို့ အတွက် မြန်မာ နိုင်ငံကို ဒီကနေ့ ရောက်ရှိလာပြီ ဖြစ်ပါတယ်။

မစ္စတာ ဘန်ဟာ မြန်မာအစိုးရ အရာရှိတွေနဲ့ တွေ့ဆုံဆွေးနွေးမှာ ဖြစ်သလို အမျိုးသား ဒီမိုကရေစီအဖွဲ့ချုပ် NLD ဥက္ကဌ ဒေါ်အောင်ဆန်းစုကြည်နဲ့လည်း တွေ့ဆုံမှာ ဖြစ်ပါတယ်။

သူဟာ နေပြည်တော်က လွှတ်တော်မှာ မိန့်ခွန်းပြောဖို့ ရှိပြီး အဲဒီနောက်မှာတော့ ရှမ်းပြည်နယ်ကို သွားပြီး ဘိန်းစိုက် တောင်သူတွေ အခြား အသက်မွေးဝမ်းကြောင်း လုပ်ငန်းတွေ အစားထိုး လုပ်ကိုင်နိုင်မယ့် အစီအစဉ်ကိုလည်း သွားပြီး ကြည့်ရှုဖို့ ရှိပါတယ်။

နှစ်ပေါင်းများစွာ စစ်အုပ်ချုပ်မှုအောက်မှာ ရှိနေခဲ့တဲ့ မြန်မာနိုင်ငံဟာ ၂၀၁၀ ရွေးကောက်ပွဲ အပြီး၊ ဦးသိန်းစိန်အစိုးရ တက်လာပြီးတဲ့နောက် ပြင်ပ ကမ္ဘာနဲ့ ဆက်ဆံမှုတွေ သိသိသာသာ တိုးတက်လာခဲ့ပါတယ်။

ဂျာမဏီ နိုင်ငံခြားရေးဝန်ကြီးဟာလည်း မြန်မာနိုင်ငံကို ရောက်ရှိနေပြီး ဒီကနေ့မှာ ဒေါ်အောင်ဆန်းစုကြည် နဲ့တွေ့ဆုံခဲ့အပြီး သတင်းစာ ရှင်းလင်းပွဲ ပြုလုပ်ခဲ့ပါတယ်။

ဥရောပသမဂ္ဂ အီးယူ နိုင်ငံခြားရေး မူဝါဒ ဆိုင်ရာ အကြီးအကဲ ကက်သရင်းအက်ရ်ှတန် ဟာလည်း အခုမြန်မာနိုင်ငံမှာ ရောက်ရှိနေပြီး မနေ့က အီးယူ ရုံးသစ်တခုကို ရန်ကုန်မြို့မှာ ဖွင့်လှစ်ခဲ့ ပါတယ်။

မူဆယ်မှာ ဗုံးကွဲ၊ မိုးညှင်းမှာ မိုင်းကွဲ

၁ လ အတွင်း ဗုံးပေါက်ကွဲမှု ၄ ကြိမ် ဖြစ်ပွားခဲ့

မူဆယ်မြို့ ပြည်ထောင်စု လမ်းမကြီးပေါ်မှာ ဧပြီလ ၂၈ ရက်နေ့ စနေနေ့ည ၉ နာရီခွဲ ကျော်လောက်မှာ ဗုံးပေါက်ကွဲမှု ဖြစ်ပွားခဲ့ပြီး လူတစ်ဦး သေဆုံးသွားခဲ့ပါတယ်။

သေဆုံးသွားတဲ့သူ ကတော့ ဗုံးဖောက်ခွဲဖို့ ကြိုးစားသူကိုယ်တိုင် ဖြစ်တယ်လို့ ဒေသခံတွေ အပြောအရ သိရပါတယ်။ အဲဒီသူဟာ လုံခြုံရေးလှည့်နေတဲ့ ရဲကားနောက်ကို ဆိုင်ကယ်တစီးနဲ့လိုက်ပြီး ဗုံးနဲ့ ပစ်ပေါက်ဖို့ ကြိုးစားခဲ့တာလို့ သိရပါတယ်။

အဲဒီလို နောက်ကနေ ကပ်ရပ်လိုက်ပြီး ဗုံးနဲ့ ပစ်ပေါက်ဖို့ ကြိုးစားတဲ့ အချိန်မှာ ဗုံးက လွင့်မသွားပဲ သူ့ဆီမှာပဲ ပြန်ပေါက်ကွဲသွားတာလို့ မျက်မြင်သက်သေ တဦးက ပြောပြပါတယ်။ အဲဒီ ဖောက်ခွဲသူကိုယ်မှာ M20 ပစ်စတို တစ်လက်ကိုလည်း တွေ့ရှိရတယ်လို့ သိရပါတယ်။

ပြီးခဲ့တဲ့ ဧပြီလ ၂၀ ရက်နေ့တုန်း ကလဲ မူဆယ် ၁၀၅ မိုင် စစ်ဆေးရေးဂိတ်မှာ အခုလို ဗုံးပေါက်ကွဲမှု ဖြစ်ပွားခဲ့ပြီး လူဝင်မှု ကြီးကြပ်ရေး အရာရှိတဦး သေဆုံးသွားခဲ့ပါတယ်။

မူဆယ်မြို့မှာ မတ်လကုန်ကစပြီး အခုအချိန်ထိ ၁ လ အတွင်း အခုလိုမျိုးဗုံးပေါက်ကွဲမှု ၄ ကြိမ် ဖြစ်ပွားခဲ့ပြီလို့ ဒေသခံတွေက ပြောပါတယ်။

မိုးညှင်းမှာ မိုင်းကွဲ

ဧပြီလ ၂၉ရက် မနက် ၁နာရီ ကျော်လောက်က မိုးညင်းမြို့နယ် မော်ဟန်ဘူတာအလွန် စင့်ကြည်ရွာနားမှာ မန္တလေး မြစ်ကြီးနား အဆန်ရထားဟာ မိုင်းမိပြီး တွဲချော်သွားတာ ကြောင့် သံဃာ ၂ပါးနဲ့ လူတဦး ဒဏ်ရာရရှိ သွားပါတယ်။

ဒီအဆန်ရထား အမှတ် ၃၃ ဟာ မိုးညှင်းမြို့ကို မရောက်ခင် ၁၆ မိုင်လောက် ဝေးတဲ့ စင့်ကြည်ရွာနား အရောက်မှာ မိုင်းထိလို့ အိပ်စင်တွဲ ၈တွဲ လမ်းချော်ကျသွားတာ ဖြစ်ပါတယ်။

ဒီအတွက် အတွက် သံဃာ ၂ပါးနဲ့ လူတယောက် ဒဏ်ရာ ပြင်းထန်တာမို့ သူတို့ကို မိုးညှင်း ဆေးရုံမှာ တင်ထားရပါတယ်။

လတ်တလော အခြေအနေမှာတော့ မိုးညှင်းက ရထားတွဲမတဲ့ ကရိန်းတွေသွားသလို မြစ်ကြီးနားဘက်ကနေ ရထားတစင်း အမြန်လွှတ်ပြီး ခရီးသည်တွေကို သွားခေါ်နေတယ်လို့ ဒေသခံတွေက ပြောပါတယ်။

ဒီကိစ္စကို ဘယ်သူလုပ်တယ်ဆိုတဲ့ အဓိက လက်သည်ကိုတော့ တာဝန်ရှိသူတွေဘက်က စုံစမ်းဆဲလို့ ပြောပါတယ်။ မိုးညှင်းဘူတာနဲ့ အုပ်ချုပ်ရေးမှူးရုံးတွေကို ဆက်သွယ် ကြည့်တော့လည်း အသေးစိတ် စုံစမ်းဆဲ ဖြစ်တယ်လို့ဘဲ ဖြေကြားပါတယ်။

နိုက်ဂျီးရီးယား တက္ကသိုလ်တခု တိုက်ခိုက်ခံရ

အစ္စလာမ် စစ်သွေးကြွတွေကြောင့် ကန်နိုမှာ ထိခိုက် သေဆုံးမှုတွေ များလှပါတယ်

နိုက်ဂျီရီးယားနိုင်ငံက အကြီးဆုံးမြို့ဖြစ်တဲ့ ကန်နိုမြို့မှာ သေနတ်သမားတွေက တက္ကသိုလ် တခုကို တိုက်ခိုက်ခဲ့လို့ လူပေါင်းအနည်းဆုံး ၁၅ ဦးလောက် သေဆုံးသွားပါတယ်။

တိုက်ခိုက်သူအတော်များများက ဘေယီရို တက္ကသိုလ် ဝန်းအတွင်းက ဘုရားကျောင်း နှစ်ခုမှာ ဝတ်ပြုဆုတောင်းနေကြတဲ့ ခရစ်ယာန် ဘာသာဝင်တွေကို သေနတ်နဲ့ ပစ်ခတ်ခဲ့တာ ဖြစ်တယ်လို့ မျက်မြင် တွေ့ရှိသူတွေက ပြောပါ တယ်။

ပေါက်ကွဲမှု အများအပြား ဖြစ်ပွားခဲ့တာကို ကြားခဲ့ရတယ်လို့လည်း မျက်မြင်တွေက ပြောသလို၊ လူအတော်များများလည်း ဒဏ်ရာရသွားကြတယ်လို့ ရဲတပ်ဖွဲ့ ပြောခွင့်ရသူက ပြောပါတယ်။

လဲကျနေတဲ့ အလောင်းတွေကို ဘေယီရို တက္ကသိုလ်ဝန်းထဲမှာ တွေ့နေရပြီး၊ စစ်တပ်ဖွဲ့တခု ကတော့ အဲဒီသေနတ်သမားတွေကို ရှာဖွေနေပါတယ်။

ဒီတိုက်ခိုက်မှုကို ဘယ်သူတွေက လုပ်ဆောင်တယ်ဆိုတာကိုတော့ မသိရသေးပါ။ ဒါပေမယ့်လည်း အစ္စလာမ်စစ်သွေးကြွ ဘိုကို ဟာရမ်းအဖွဲ့ဟာ ကန်နိုမှာ အကြမ်းဖက် လှုပ်ရှားနေကြတာ ဖြစ်ပါတယ်။

ပြီးခဲ့တဲ့ ဇန်နဝါရီလကလည်း ကန်နိုပြည်နယ်မှာ ဖြစ်ပွားခဲ့တဲ့ ဘိုကို ဟာရမ်းအဖွဲ့ရဲ့ တိုက်ခိုက်မှုတွေကြောင့် လူပေါင်း အနည်းဆုံး ၁၈၅ ဦးသေဆုံးသွားခဲ့ပါတယ်။

ပြည်ထောင်စု မီးရထားဝန်ကြီး ဉီးအောင်မင်းပြည်ထောင်စုအဆင့်ငြိမ်းချမ်းရေးအဖွဲ့ ပြင်ဆင်ဖွဲ့စည်း

 လက်ရှိပြည်တွင်းငြိမ်းချမ်းရေးဆွေးနွေးနေတဲ့ အဖွဲ့နှစ်ခုကိုပူးပေါင်းပြီး ပြည်ထောင်စုအဆင့် ငြိမ်းချမ်းရေးတဖွဲ့ထဲပြန်ပြင်ဆင်ဖွဲ့စည်းမယ်လို့ ပြည်ထောင်စု မီးရထားဝန်ကြီး ဉီးအောင်မင်းက နေပြည်တော်မှာ သတင်းထောက်တွေကို ပြောကြားခဲ့ပါတယ်။

စက်မှုဝန်ကြီးဌာနက ပြုလုပ်တဲ့သတင်း စာရှင်းပွဲမှာ သတင်းထောက်တွေက ငြိမ်းချမ်းရေးဖေါ်ဆောင်ရေး အဖွဲ့ပြန်ပြင်မယ်ဆိုတဲ့ သတင်းနဲ့ပတ်သက်လို့ မေးမြန်းရာမှာ အခုလို ဖြေကြားတာ ဖြစ်ပါတယ်။

ဒီလိုပြန်ဖွဲ့ရင် အဆင့်မြင့်ပုဂ္ဂိုလ်တွေဖြစ်တဲ့ ဒုတိယသမ္မတက ခေါင်းဆောင်နိုင်တယ်လို့လည်း သိရပါတယ်။ ဒါ့အပြင် တပ်မတော်အရာရှိကြီးများ တိုင်းရင်းသား ရေးရာ ကော်မီတီမှလွှတ်တော်အမတ်များနဲ့ အင်အားဖြည့်ဖွဲ့စည်းသွားမှာ ဖြစ်ပါတယ်။

လက်ရှိငြိမ်းချမ်းရေး ကမ်းလှမ်းမှုမှာ တိုင်းရင်းသား၁၀ဖွဲ့နဲ့ပဏာမ အဆင့်သဘောတူညီမှုတွေ ရထားပေမယ့် ကေအိုင်အေ ကချင်လွတ်လပ်ရေးအဖွဲ့နဲ့တော့ အခုအချိန်ထိ အပစ်မရပ်သေးဘဲ တိုက်ပွဲတွေဆက် ဖြစ်ပွားနေပါတယ်။

အခုလိုပြန်ပြင်ဆင်ဖွဲ့စည်းမယ့်ကိစ္စဟာ ကေအိုင်အေနဲ့အဓိက ပတ်သက်နေသလားလို့ သတင်းစာရှင်းပွဲကိုတက်ရောက်တဲ့ ကိုကို စက်မှုကိုမေးရာမှာ သူ့အနေနဲ့ အဲဒီလိုမယူဆဘဲ ပိုမိုကျယ်ပြန့်တဲ့ တိုင်းရင်းသားတွေတက်မယ့် ညီလာခံမျိုးကို နေပြည်တော်မှာကျင်းပမယ်လို့ ဝန်ကြီးဉီးအောင်မင်းကပြောကြောင်း ဒီညီလာခံမှာ အခြေခံဥပဒေနဲ့မညီတဲ့ တောင်းဆိုချက်တွေကို လွှတ်တော်မှာ တင်ပြဖြေရှင်းသွားမှာဖြစ်ကြောင်း သိရတယ်လို့ ဘီဘီစီကိုဖြေကြားသွားပါတယ်။

လက်နက်တွေ တင်ဆောင်လာတဲ့ သင်္ဘောဆီးရီးယားကို လက်နက်ပို့မယ့် သင်္ဘောကို လက်ဘနွန် ရေတပ်တားဆီး

ဆီးရီးယား နိုင်ငံက အတိုက်အခံ သူပုန်တွေ ဆီကို ပို့ပေးတာ လို့ ယူဆရတဲ့ ကွန်တိန်နာ ၃ လုံးမှာ လက်နက်တွေ အပြည့်ထည့် သယ်ယူလာ ခဲ့တဲ့ သင်္ဘော တစင်းကို လက်ဘနွန် ရေတပ်က ကြားက ဖြတ်ပြီးတား နိုင်ခဲ့ပါတယ်။

ဒီလွတ်ဖာလာ၂ လို့ခေါ်တဲ့ သင်္ဘောဟာ လစ်ဗျား နိုင်ငံကနေ ခရီးစတင် လာခဲ့တာ ဖြစ်ပြီး အီဂျစ် နိုင်ငံမှာ တထောက်နား၊ နောက်ပြီး လက်ဘနွန် နိုင်ငံက ထရစ်ပိုလီ ဆိပ်ကမ်းကို သွား ခဲ့တာ ဖြစ်ပါတယ်။ ဆီးရီးယား နိုင်ငံ အတွင်းကို လက်နက်တွေ ခိုးသွင်း နေတာ နဲ့ ပတ်သက်လို့ ဆီးရီးယား အစိုးရက မကျေမနပ် နဲ့ ပြောနေခဲ့တာ မကြာခဏ ဖြစ်ပါတယ်။

လက်ဘနွန်ထဲက ဘီဘီစီ သတင်းထောက်ကတော့ ဒီထရစ်ပိုလီ မြို့ဟာ လစ်ဗျား အစိုးရက အလွန် စာနာ စိတ်ထား တဲ့ ဆီးရီးယား အတိုက်အခံတွေ အတွက် အထောက်အကူ တွေ အများကြီး ပေးနေတဲ့ နေရာ ဖြစ်တယ်လို့ ဆိုပါတယ်။

အခြေခံ အဆောက်အအုံတွေ တည်ဆောက် သွားမယ့် တောင်ဆူဒန်တရုတ်က တောင်ဆူဒန်ကို ငွေချေးဖို့ ကမ်းလှမ်း

တရုတ်နိုင်ငံက တောင်ဆူဒန်မှာ လာမယ့် ၂ နှစ် အတွင်းမှာ အခြေခံ အဆောက်အအုံ တွေကို တည်ဆောက် သွားဖို့ အတွက် သုံးစွဲဖို့ ဒေါ်လာ သန်း ၈၀၀၀ ကို ချေးမယ်လို့ ကမ်းလှမ်း လာတဲ့ အကြောင်း တောင်ဆူဒန်က ပြောပါတယ်။

တကယ်လို့သာ ချေးဌား ဖြစ်သွားခဲ့ရင် ဒီ ပမာဏဟာ တောင်ဆူဒန်ရဲ့ နှစ်စဉ် အသုံး စားရိတ်ထက် ၂ ဆမက ပိုများသွား လိမ့်မှာ ဖြစ်ပါတယ်။

ဂျူဘား မြို့က အစိုးရ ပြောခွင့်ရသူ ရဲ့ အဆိုအရ ဒီငွေတွေကို လမ်းတံတား နဲ့ ဆက်သွယ်ရေး ကွန်ယက်တွေ၊ နောက်ပြီး စိုက်ပျိုးရေး ပိုင်းနဲ့ ရေအား လျှပ်စစ် စက်ရုံတွေ တည်ဆောက်ရာမှာ သုံးစွဲ သွားမှာ ဖြစ်တယ်လို့ ဆိုပါတယ်။ ဒါပေမယ့် အိန္ဒိယ သမုဒ္ဒရာ ဆီကို သွယ်တန်းသွားမဲ့ ရေနံ ပိုက်လိုင်း တွေနဲ့ ပတ်သက်တဲ့ အစီအစဉ်တွေကို တော့ ပြောကြား သွားခြင်းမရှိ ပါဘူး။

တရုတ်နိုင်ငံဟာ ဆူဒန်ဘက်က ထွက်တဲ့ ရေနံတွေကို အမြောက်အများ တင်သွင်းတဲ့ နိုင်ငံ ဖြစ်ပြီး ဆူဒန်နိုင်ငံနဲ့ ရော မနှစ်က လွတ်လပ်ရေး ရလာခဲ့တဲ့ တောင်ဆူဒန်နဲ့ပါ ဆက်ဆံရေး ကောင်းမွန်မှုကို ထိန်းသိမ်းသွား ဖို့ကို လိုလား နေတာ ဖြစ်ပါတယ်။

မြောက်အိုင်ယာလန်မှာ စွန့်ပစ်ကားပေါ်က ဗုံးအကြီးစား တွေ့ရှိ

ဗုံးတွေ့တဲ့ အနားမှာ ရဲက ကားလမ်းပိတ်ထား ခဲ့ရပါတယ်။

မြောက်အိုင်ယာလန် နဲ့ အိုင်ယာလန် နိုင်ငံ နယ်စပ် အနီးမှာ ဗဲန်ကား တစင်းထဲမှာ ဗုံး အကြီးစား တလုံးကို တွေ့ရှိခဲ့ တယ်လို့ မြောက်အိုင်ယာလန် ရဲတပ်ဖွဲ့က ပြောပါတယ်။

ဒီ ဗုံးဟာ ဖြင့် ကီလို ၃၀၀လောက် လေးပြီး လူနေ ထူထပ်တဲ့ နေရာမှာသာ ပေါက်ကွဲလို့ ကတော့ အပျက်အဆီး အလွန်များ ဖွယ်ရာ ရှိတယ်လို့လဲ ပြောပါတယ်။

သောကြာ နေ့ညကလည်း ဘဲလ်ဖတ်စ် မြို့မှာ ဗုံး အသေးစား တလုံးနဲ့ လက်နက်တွေကို တွေ့ရှိခဲ့တယ်လို့ ဆိုပါတယ်။

ဒီဗုံးတွေကို ငြိမ်းချမ်းရေး ဆွေးနွေးမှုတွေကို ဆန့်ကျင်ကြတဲ့ ရီပတ်ပလစ်ကန်တွေက ထောင်တာ ဖြစ်နိုင်တယ်လို့ သံသယ တွေဝင်နေ ကြပါတယ်။

NLD လွှတ်တော်ကို အမြန်ရောက်ဖို့ အမတ်တွေ ကြိုးပမ်း

By နန္ဒာချမ်း

• မြန်မာနိုင်ငံရဲ့ ဖွဲ့စည်းပုံအခြေခံဥပဒေမှာ ပြင်ဆင်စရာရှိတာတွေကို လွှတ်တော်ထဲမှာ အတူလက် တွဲပြင်ဆင်သွားကြဖို့နဲ့ NLD အမျိုးသားဒီမိုကရေစီအဖွဲ့ချုပ် ကိုယ်စားလှယ်တွေ လွှတ်တော် အမြန် တက်နိုင်ဖို့အတွက် - ရွေးကောက်ခံ တိုင်းရင်းသားနိုင်ငံရေးပါတီတွေနဲ့ တသီးပုဂ္ဂလ အမတ်တွေကနေ သဘောထား တင်ပြလွှာ တစောင်ကို မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် ကို ဒီကနေ့ ပေးအပ်ခဲ့ကြပါတယ်။ ရခိုင်တိုင်းရင်းသားတိုးတက်ရေးပါတီ RNDP ခေါင်းဆောင် အမျိုးသား လွှတ်တော်အမတ် ဒေါက်တာအေးမောင်နဲ့ ဒေါ်အောင်ဆန်းစုကြည်တို့ တွေ့ဆုံချိန်မှာ ပေးအပ်ခဲ့တာ ဖြစ်ပါတယ်။ ဒေါ်အောင်ဆန်းစုကြည်ကတော့ - လွှတ်တော်ရဲ့ ရေရှည်ထိရောက်မှုနဲ့ တိုင်းပြည်အကျိုးကို ကြည့်ပြီး ဆက်လက်လုပ်ဆောင်သွားဖို့ လိုအပ်တယ်လို့ တုန့်ပြန်ခဲ့ပါတယ်။ အပြည့်အစုံကို မနန္ဒာချမ်း က တင်ပြထားပါတယ်။

တိုင်းရင်းသားလွှတ်တော်အမတ်တွေနဲ့ တသီးပုဂ္ဂလ လွှတ်တော် အမတ်တွေကိုယ်စား ရခိုင်တိုင်းရင်းသား တိုးတက်ရေးပါတီရဲ့ အမျိုးသား လွှတ်တော်အမတ် ဒေါက်တာအေးမောင်ကနေ တနင်္ဂနွေနေ့ မနက် ၁၀ နာရီလောက်က NLD ဥက္ကဌ ဒေါ်အောင်ဆန်းစုကြည်ရဲ့ နေအိမ်မှာ နာရီဝက်နီးပါးကြာ တွေ့ဆုံခဲ့တာပါ။ အဲ့လို တွေ့ဆုံချိန်မှာ NLD ဘက်က တောင်းဆိုထားတဲ့ ကျမ်းသစ္စာ ဆိုရာမှာ ပါဝင်တဲ့ စကားရပ် ပြင်ဆင်ရေး ကိစ္စနဲ့ပတ်သက်ပြီး တိုင်းရင်းသားနဲ့ တသီးပုဂ္ဂလ လွှတ်တော်အမတ်တွေကနေ အချက် ၅ ချက်ပါ သဘောထားတွေကို တင်ပြခဲ့တာဖြစ်တယ်လို့ ဒေါက်တာ အေးမောင်က ပြောပါတယ်။ အဓိကကတော့ NLD ပါတီ အနေနဲ့ လွှတ်တော် အမြန်တက်နိုင်ရေး ကြိုးပမ်းလုပ်ဆောင်ဖို့ကို တိုက်တွန်းခဲ့ကြတာ ဖြစ်တဲ့အကြောင်း ဒေါက်တာ အေးမောင် က အခုလို ပြောပြပါတယ်။

“၂၀၀၈ ခုနှစ်က ပြဌာန်းအတည်ပြုခဲ့တဲ့ ပြည်ထောင်စုသမ္မတ မြန်မာနိုင်ငံတော် ဖွဲ့စည်းအုပ်ချုပ်ပုံပါ အခြေခံဥပဒေမှာ ပြင်ဆင်စရာ အများကြီးရှိတယ်ဆိုတာကို ကျနော်တို့ကလည်း လက်ခံ သဘောတူပါတယ်။ နောက် ပြည်ထောင်စုလွှတ်တော်မှာ ဥက္ကဌကြီး ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီ အဖွဲ့ချုပ်မှ လွှတ်တော်ကိုယ်စားလှယ်များနဲ့ လက်တွဲပြီးကာမှ ပြင်ဆင်သွားနိုင်ရေးကိုလည်း အလွန့်အလွန်မှ လိုလားကြပါကြောင်းကိုလည်း သိစေလိုပါတယ်ဆိုတာ တချက်ပါ။ နောက် ဥက္ကဌကြီး ဒေါ်အောင်ဆန်းစုကြည် ဦးဆောင်မှုဖြင့် အမျိုးသား ဒီမိုကရေစီအဖွဲ့ချုပ်မှ လွှတ်တော် ကိုယ်စားလှယ်များသည် ပြည်သူတို့ရဲ့ဆန္ဒနဲ့ နိုင်ငံတော် အကျိုးကို ရှေ့ရှုပြီး အငြင်းပွားဖွယ်ရာ ကိစ္စတချို့ကို သဘောထား ကြီးမြင့်စွာ မေတ္တာရှေ့ထား ဖြေရှင်းဆောင်ရွက်ပေးပြီး လွှတ်တော်များသို့ အမြန်ဆုံး တက်ရောက်နိုင်ပါရန် ကျနိုပ်တို့ ရွေးကောက်ခံ နိုင်ငံရေးပါတီများနဲ့ တသီးပုဂ္ဂလ လွှတ်တော် ကိုယ်စားလှယ်များက ပန်ကြား မေတ္တာ ရပ်ခံပါတယ် ဆိုပြီးကာမှ လွှတ်တော် ထဲက ၁၄ ပါတီ နောက် တသီးပုဂ္ဂလ ၂ ဦးက လက်မှတ်ရေးထိုးပြီး ပေးအပ်ခဲ့တာဖြစ်ပါတယ်။”

ဒီသဘောတင်ပြချက်အပေါ် ဒေါ်အောင်ဆန်းစုကြည်ကတော့ အခုလို တုံ့ပြန်ခဲ့တယ်လို့ ဒေါက်တာအေးမောင် က ပြောပြပါတယ်။

“ဒေါ်အောင်ဆန်းစုကြည်ကတော့ သတင်း မီဒီယာသမားတွေ မေးခဲ့လို့ရှိရင်လေ ကျနော့်ကို ဖြေကြားနိုင်အောင် ဆိုပြီး ဒီအချက် ၃ ချက်ကို သူ သဘောတူပါတယ်ဆိုပြီး ထောက်ပြပါတယ်။ တစ် ကတော့ - လွှတ်တော်ရဲ့ ရေရှည်ထိရောက်မှုနဲ့ နိုင်ငံ ကောင်းကျိုးကို ကြည့်ပြီး ဆက်လုပ်သွားကြပါမယ် ဆိုတာ တခုပါ။ နှစ် ကတော့ - တိုင်းရင်းသား ပါတီများ စတဲ့ မိတ်ဖက်ပါတီများနဲ့ တသီးပုဂ္ဂလ လွှတ်တော် ကိုယ်စားလှယ်များက လိုလိုလားလားနဲ့ လွှတ်တော်သို့ ပါဝင်လာစေလိုခြင်းကို ကျေးဇူး အထူးတင်ပါတယ်။ သုံး ကတော့ - ဒီကိစ္စကို အမြန်ဆုံး ပြေလည်အောင် ဆောင်ရွက်ရန် နှစ်ဖက်စလုံးက သဘောတူကြပါတယ် ဆိုတာလေးကို မီဒီယာတွေက မေးမြန်းခဲ့ရင် ဒီ သုံးချက်ကို ဆွေးနွေးဖော်ပြနိုင်ပါတယ်ဆိုပြီး ကျနော့်ကို သူက သဘောထား မှတ်ချက်ပေးပါတယ်။”

အလားတူပဲ ဒီနိုင်ငံရေးပါတီ ၁၄ ဖွဲ့နဲ့ တသီးပုဂ္ဂလ လွှတ်တော်အမတ် ၂ ဦး ကနေပြီးတော့ ဧပြီလ ၂၅ ရက် ဗုဒ္ဓဟူးနေ့ကပဲ နိုင်ငံရေးပါတီ မှတ်ပုံတင်ခြင်း ဥပဒေမှာလည်း ပြင်ဆင်ထားပြီးဖြစ်တဲ့ ဒီစကားရပ်ကို အခု ကျမ်းသစ္စာဆိုရာမှာလည်း ကြံ့ခိုင်ဖွံ့ဖြိုးရေးပါတီအမတ်တွေဘက်က သဘောထားကြီးပြီး ဥပဒေနဲ့အညီ ပြင်ဆင်ပေးဖို့ကို တောင်းဆိုထားတဲ့ မေတ္တာရပ်ခံစာကို ကြံ့ခိုင်ဖွံ့ဖြိုးရေးပါတီ အကြီးအကဲ လက်ရှိ ပြည်သူ့လွှတ်တော်ဥက္ကဌ သူရဦးရွှေမန်းဆီ ပေးအပ်ခဲ့ကြပါသေးတယ်။

တကယ်တော့ NLD ဘက်က တောင်းဆိုနေတဲ့ ဒီစကားရပ် ပြင်ဆင်ပေးဖို့ကိစ္စဟာ ပုဒ်မ ၄၃၅ အရ ၂၀ ရာခိုင်နှုန်းထောက်ခံမှုကို ရရှိနိုင်ပေမဲ့ ၇၅ ရာခိုင်နှုန်းကျော်တဲ့ ဥပဒေဆိုရင်တော့ အောင်မြင်မှုမရှိတဲ့အတွက် လွှတ်တော်အမတ်တွေကနေ ဒီပြဿနာကို ဖြေရှင်းနိုင်မယ့် အကောင်းဆုံး နည်းလမ်းကို ရှာဖွေနေကြ တာလည်းဖြစ်ပါတယ်။

လွှတ်တော်ထဲမှာ အများစုနေရာရရှိထားတဲ့ ကြံ့ခိုင်ဖွံ့ဖြိုးရေးပါတီရဲ့ ထောက်ခံမှု သဘောထားကြီးမှုကို မရရှိဘဲနဲ့တော့ ဒီပြဿနာ ပြေလည်သွားမှာမဟုတ်ဘူးလို့ ကျန်လူနည်းစုလွှတ်တော်အမတ်တွေက ယူဆထားကြတာပါ။ ဒါကြောင့်လည်း ကြံ့ခိုင်ဖွံ့ဖြိုးရေးပါတီရဲ့ ထောက်ခံမှုရှိလာအောင် သူရဦးရွှေမန်းကို မေတ္တာရပ်ခံခဲ့တာဖြစ်ပြီး ဒီမေတ္တာရပ်ခံချက်အပေါ် သူရဦးရွှေမန်းက အခုလို တုံ့ပြန်ခဲ့တဲ့အကြောင်း ဒေါက်တာအေးမောင် က ဆက်ပြောပြပါတယ်။

“သူရဦးရွှေမန်းရဲ့ တုန့်ပြန်ချက်ကတော့ ခုနလို အခြေအနေ အရပ်ရပ်က ပါတီဝင်ထုရဲ့ သဘောထားနော် အထူးသဖြင့် စီအီးစီ တွေရဲ့ သဘောထား လွှတ်တော်ထဲမှာရှိတဲ့ လွှတ်တော်အမတ်တွေရဲ့  သဘောထား တွေနဲ့လည်း သက်ဆိုင်တဲ့အနေအထား ဖြစ်လာတာကြောင့် လွှတ်တော်တွင်းမှာ နိုင်ငံသူ နိုင်ငံသားအားလုံး အတူ လက်တွဲဖို့အတွက်လေ ပါဝင်ဖို့ကိုပဲ သူက ဒေါ်အောင်ဆန်းစုကြည်ကို ဖိတ်ခေါ်တဲ့ သဘောပဲ ညွှန်းပါတယ်။ နောက်ပြီးတော့ လွှတ်တော် လာရောက်ရေး အတားအဆီး ဖြစ်နေတဲ့ကိစ္စ အတားအဆီး မဖြစ်ဘဲနဲ့ လွှတ်တော်ထဲကို လာရောက်ပြီးမှ ပိုပြီး ပူးပေါင်းဆောင်ရွက်ကြရအောင် ဆိုပြီးကာမှ ဖိတ်ခေါ်တာရှိပါတယ်။”

သူရဦးရွှေမန်းရဲ့ အခုလို တုံ့ပြန်ချက်ကိုလည်း ဒေါ်အောင်ဆန်းစုကြည်နဲ့ တွေ့ဆုံချိန် ဒေါက်တာအေးမောင်က တင်ပြခဲ့တယ်လို့ ဆိုပါတယ်။ ၂၀၁၂ ခုနှစ် ဧပြီလ ၁ ရက်နေ့က ကျင်းပခဲ့တဲ့ ကြားဖြတ်ရွေးကောက်ပွဲမှာ NLD အမျိုးသားဒီမိုကရေစီ အဖွဲ့ချုပ်ကနေ ၄၅ နေရာအနက် ၄၃ နေရာကို အနိုင်ရရှိခဲ့တာဖြစ်ပါတယ်။

ဒါပေမဲ့လည်း လွှတ်တော်စည်းဝေးပွဲတွေ ပြန်စတဲ့အချိန် လွှတ်တော်တက်နိုင်ဖို့ NLD ကိုယ်စားလှယ်တွေ ကျမ်းကျိမ်ဆိုရမယ့်အထဲမှာပါဝင်တဲ့ “ဖွဲ့စည်းပုံအခြေခံဥပဒေပါ အချက်တွေကို ကာကွယ်စောင့်ရှောက်ပါမည်” ဆိုတဲ့ စကားရပ်အစား “လေးစားလိုက်နာပါမည်” ဆိုတဲ့ စကားရပ်ကို ပြင်ဆင်ပေးဖို့ NLD ဘက်က တောင်းဆိုခဲ့ တာဖြစ်ပါတယ်။ ဒါကြောင့် NLD ကိုယ်စားလှယ်တွေအနေနဲ့ ဒီတခေါက် ကျင်းပတဲ့ လွှတ်တော် ရွေးကောက်ပွဲကို တက်ရောက်နိုင်ခြင်း မရှိခဲ့ပါဘူး။

NLD ကိုယ်စားလှယ်တွေအနေနဲ့ လွှတ်တော် တက်ရောက်နိုင်ရေးကိစ္စဟာ နိုင်ငံရေး အကျပ်အတည်း တခုအဖြစ် မချဲ့ကားလိုဘဲ နည်းစနစ်ပိုင်း အခက်အခဲတခုသာ ဖြစ်တာကြောင့် မကြာခင် ပြေလည် သွားလိမ့်မယ်လို့ မျှော်လင့်တဲ့အကြောင်းလည်း ဒေါ်အောင်ဆန်းစုကြည်က မကြာသေးခင်က ပြောဆိုခဲ့ပါတယ်။

ဒါ့အပြင် ဒေါက်တာအေးမောင် ကလည်း - NLD ကိုယ်စားလှယ်တွေအနေနဲ့ ရှေ့လာမယ့် တပတ်ထဲ ပြီးဆုံးတော့မယ့် လွှတ်တော် အစည်းအဝေးတွေကို မတက်ရောက်နိုင်ခဲ့ရင်တောင် လာမယ့် ဂျူလိုင်လမှာ ပြန်လည်ကျင်းပမယ့် လွှတ်တော် အစည်းအဝေးတွေကိုတော့ NLD ဘက်က တက်ရောက်နိုင်လိမ့်မယ်လို့ မျှော်လင့်တဲ့အကြောင်းလည်း ဗွီအိုအေကို ပြောသွားခဲ့ပါတယ်ရှင်။

တရုတ်မျက်မမြင်ရှေ့နေ အမေရိကန်က ကာကွယ်စောင့်ရှောက်ထား

ဗွီအိုအေ  

တရုတ်နိုင်ငံက လူ့အခွင့်အရေးလှုပ်ရှားသူ မျက်မမြင်ရှေ့နေ ချန်ဂွမ်ချန်(Chen Guangcheng)ဟာ အမေရိကန်ပြည်ထောင်စုရဲ့ ကာကွယ်စောင့်ရှောက် မှုအောက်မှာ ရှိနေပြီးတော့၊ ဒီကိစ္စအတွက် တရုတ်နဲ့ အမေရိကန်အရာရှိတွေ ဆွေးနွေးပွဲတွေ စတင်တော့မယ်လို့၊ အမေရိကန်အခြေစိုက် လူ့အခွင့်အရေး လှုပ်ရှား တဲ့ China Aid အဖွဲ့ခေါင်းဆောင် ဘော့ဘ်ဖူး (Bob Fu) က ဧပြီ (၂၈) ရက်နေ့က ပြောဆိုလိုက် ပါတယ်။

China Aid အဖွဲ့က စနေနေ့က ထုတ်ပြန်တဲ့ ကြေညာချက်မှာ အသေးစိတ်အချက်အလက် အနည်းငယ်သာ ဖေါ်ပြထားပေမယ့်၊ ဒီအချက်တွေက ချန်ဂွမ်ချန်နဲ့ နီးစပ်တဲ့သူတွေကို ကိုးကားထားပါတယ်။ ဘေဂျင်းမြို့တော်က ၁၉၈၉ တိယန်နမင်ရင်ပြင် အရေးအခင်းမှာ တက်ကြွလှုပ်ရှားသူတစ်ဦး ဖြစ်တဲ့ ဘော့ဘ်ဖူးက၊ ချန်ဂွမ်ချန်ရဲ့ အရေးကိစ္စဟာ၊ အမေရိကန် ပြည်ထောင်စုရဲ့ လူ့အခွင့်အရေးဆိုင်ရာ သံခင်း တမန်ခင်းအတွက် အချက်အချာကျတဲ့ အချိန်ကာလတစ်ရပ် ဖြစ်နေတယ်လို့ ပြောဆိုခဲ့ပါတယ်။

ချန်ဂွမ်ချန် ဟာ နိုင်ငံအရှေ့ပိုင်း၊ ရှန်ဒေါင်း (Shandong) ပြည်နယ်၊ ဒေါင်ရှီဂူ (Dongshigu) ဆိုတဲ့ ရွာကလေး က အစောင့်အကြပ်ထူထပ်စွာချထားတဲ့ သူ့ရဲ့ နေအိမ်ကနေ ထွက်ပြေးလွတ်မြောက်သွားခဲ့ပြီးတော့၊ ပြီးခဲ့တဲ့ ကြာသာပတေးနေ့ညအထိ၊ သူပျောက်ဆုံးသွားတာကို အာဏာပိုင်တွေက မသိခဲ့ကြပါဘူး။ ချန်ဂွမ်ချန်ဟာ ဘေဂျင်းမြို့တော်က အမေရိကန်သံရုံးမှာ ခိုလှုံနေတယ်ဆိုတဲ့ သတင်းတွေ ထွက်ပေါ်နေချိန်မှာပဲ ဒီသတင်းနဲ့ ပတ်သက်လို့ မှတ်ချက်ပေးဖို့ အမေရိကန်နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ ဗစ်တိုရီးယားနျူလန် (Victoria Nuland)က ဧပြီ (၂၇) ရက်နေ့က ငြင်းဆိုခဲ့ပါတယ်။

ဒါပေမဲ့ ချန်ကွမ်ချင်ရဲ့ကံကြမ္မာနဲ့ပတ်သက်ပြီး အမေရိကန်ပြည်ထောင်စုက စိုးရိမ်ပူပန်နေတယ်လို့ ပြောကြားခဲ့ ပါတယ်။ တရုတ်အစိုးရရဲ့ မိသားစုတစု၊ ကလေးတ ယောက် ပေါ်လစီကြောင့် ကိုယ်ဝန်ဖျက်ချရခြင်းတွေကိုပါ ဖြစ်ပေါ်စေတဲ့၊ နိုင်ငံတ၀န်းအာဏာပိုင်တွေရဲ့ အနိုင်ကျင့်တရား လက်လွတ်လုပ်ခဲ့တာ တွေကို ချင်ကွမ်ချင်ဟာ မှတ်တမ်းပြုစုခဲ့တာကြောင့် ထောင်ဒဏ်လေးနှစ် ကျခံခဲ့ရပြီး၊ ၂၀၁၀၊ စက်တင်ဘာမှာ ပြန်လွတ်ခဲ့ပါတယ်။ အဲဒီနောက် ဆက်ပြီး နေအိမ်မှာအကျယ်ချုပ်နဲ့ အကျဉ်းချခံနေရတာဖြစ်ပါတယ်။

နော်ဝေးဗိုလ်ချုပ် ဦးဆောင်တဲ့ ကုလအကဲခတ်အဖွဲ့ ဆီးရီးယားကိုရောက်ရှိ

ဗွီအိုအေ  

ကုလသမဂ္ဂအတွင်းရေးမှူးချုပ်ဟောင်း ကိုဖီအာနန် ကြားဝင်စေ့စပ်ပေးထားတဲ့ ဆီးရီးယားအစိုးရနဲ့ အတိုက်အခံတွေကြား အပစ်အခတ်ရပ်စဲရေး သဘောတူညီချက် ကျိုးပေါက်သွားပြီးတဲ့နောက်၊ ဖြစ်ပေါ်လာတဲ့ နောက်ထပ် အကြမ်းဖက်မှုတွေအပေါ် နှစ်ဘက်လုံးက အပြန်အလှန် စွပ်စွဲနေချိန်မှာ၊ နော်ဝေနိုင်ငံသား ဗိုလ်ချုပ်ရောဘတ်မုဒ် (Robert Modd) ခေါင်းဆောင်တဲ့ ကုလသမဂ္ဂစောင့်ကြည့်လေ့လာရေးအဖွဲ့တစ်ဖွဲ့ဟာ၊ ဧပြီ (၂၈)ရက်နေ့က မြို့တော် ဒမတ်စကပ် (Damascus) ကို ရောက်ရှိသွားပါပြီ။

နောက်တစ်ဖွဲ့က နိုင်ငံအလယ်ပိုင်းက အတိုက်အခံတွေ အားကောင်းရာ ဟုမ်းစ် (Homs) မြို့ကို သွား ရောက် ခဲ့ကြပါတယ်။ ကုလသမဂ္ဂ လုံခြုံရေးကောင်စီက၊ ဆီးရီးယားကို တောင့်တင်းတဲ့ စောင့်ကြည့်လေ့လာရေးအဖွဲ့ဝင် (၃၀၀) စေလွှတ်ဖို့၊ အတည်ပြုထား ပေမယ့်၊ အခုအချိန်အထိတော့ ဆီးရီးယားကို စောင့်ကြည့်လေ့လာသူ တစ်ဒါဇင် လောက်ပဲ ရောက်ရှိနေပါသေးတယ်။

ဆီးရီးယားစစ်တပ်ကနေ အတိုက်အခံ တပ်တွေဘက်ကို ထွက်ပြေးကူးပြောင်းနေသူတွေ ရှိနေတယ်ဆိုတဲ့ သတင်းတွေကြားမှာပဲ၊ မနေ့က စနေနေ့က ဒမတ်စကပ်မြို့ပြင်နေရာတွေနဲ့ လာတာကီး ယား (Latakia) ဒေသတွေမှာ၊ အစိုးရတပ်တွေနဲ့ အတိုက်အခံတပ်တွေ ဆက်ပြီးတိုက်ခိုက်နေကြပြီးတော့၊ အနည်းဆုံး သေဆုံးသူ (၁၀) ယောက်ရှိခဲ့တယ် လို့၊ သတင်းတွေမှာ ဖေါ်ပြကြပါတယ်။

ကုလအတွင်းရေးမှူးချုပ် မြန်မာနိုင်ငံရောက်

By ဇော်ဝင်းလှိုင်

ဓာတ်ပုံ AP

ကုလသမဂ္ဂအတွင်းရေးမှူးချုပ် ဘန်ကီမွန်း ရန်ကုန်မြို့ကို ရောက်ရှိစဉ်။

မြန်မာနိုင်ငံကို သုံးရက်ကြာခရီးစဉ်အဖြစ် မနေ့ကစပြီး ရောက်ရှိနေတဲ့ ကုလသမဂ္ဂအတွင်းရေးမှူးချုပ် ဘန်ကီမွန်းဟာ ဒီကနေ့ တနင်္လာနေ့ နေပြည်တော်မှာ နိုင်ငံတော်သမ္မတနဲ့ တွေဖို့ရှိသလို ပြည်ထောင်စု လွှတ်တော်မှာ မိန့်ခွန်းပြောကြားဖို့လည်း ရှိနေပါတယ်။ မြန်မာနိုင်ငံမှာ လက်ရှိတွေ့နေရတဲ့ အပြောင်းအလဲ တွေဟာ အစကနဦးအဆင့်ပဲရှိသေးပြီး ရှေ့ဆက်လုပ်စရာတွေ ကျန်သေးတယ်လို့ မစ္စတာဘန်က ပြောပါ တယ်။ မစ္စတာဘန်ရဲ့ ခရီးစဉ်အကြောင်း ကိုသားညွန့်ဦးက စုစည်းတင်ပြပေးမှာပါ။

ပြီးခဲ့တဲ့ တနှစ်အတွင်းက ဆောင်ရွက်လာတဲ့ မြန်မာနိုင်ငံတွင်း နိုင်ငံရေးနဲ့ စီးပွားရေးပြုပြင်ပြောင်းလဲမှုတွေ အရှိန်နည်းနည်းပြန်ကျနေတဲ့အချိန် အရေးကြီးကာလမှာ အတွင်းရေးမှူးချုပ် ဘန်ကီမွန်း မြန်မာနိုင်ငံကို ရောက်ရှိလာတာဖြစ်ပါတယ်။ အထူးသဖြင့် အမျိုးသားဒီမိုကရေစီအဖွဲ့ချုပ်နဲ့ အာဏာပိုင်တွေအကြား လွှတ်တော်ဝင်ရေးကိစ္စ အတန်ငယ်တင်းမာနေတဲ့အချိန်၊ ကချင်ပြည်နယ်ဘက်မှာ မြန်မာစစ်တပ်နဲ့ ကချင် လက်နက်ကိုင်တပ်တွေအကြား တိုက်ပွဲတွေ ပြန်တွေ့နေရတဲ့အချိန်မှာ ကုလသမဂ္ဂအတွင်းရေးမှူးချုပ် ရောက် ရှိလာတာမို့ လူ့အခွင့်အရေးအဖွဲ့တွေကတော့ မစ္စတာဘန်အနေနဲ့ မြန်မာအာဏာပိုင်တွေကို ပြုပြင်ပြောင်း လဲရေးကိစ္စ ဖိအားပေးဖို့ လိုလားနေကြပါတယ်။ အတွင်းရေးမှူးချုပ် ဘန်ကီမွန်းဟာ ဒီကနေ့ နေပြည်တော် သွားပြီး သမ္မတဦးသိန်းစိန်အပါအ၀င် အာဏာပိုင်တွေနဲ့တွေဆုံဖို့ရှိပါတယ်။ လက်ရှိ မြန်မာနိုင်ငံ အခြေအနေ ဟာ မသေချာမရေရာသေးဘဲ စိန်ခေါ်အကဲစမ်းမှုတွေ ရှိနေတယ်လို့ မစ္စတာဘန်က ပြောပါတယ်။

“မြန်မာနိုင်ငံရဲ့ အသွင်ကူးပြောင်းမှုဟာ အခုမှ အစပဲ ရှိပါသေးတယ်။ ရှေ့ဆက် စိန်ခေါ်အကဲစမ်းချက်တွေ အများကြီးရှိပါတယ်။ စိုးရိမ်ပူပင်စရာ အခြေအနေ အတော်များများကိုလည်း ဖြေရှင်းရဦးမှာပါ။ မြန်မာနိုင်ငံ အနာဂတ် ပိုပြီးကောင်းမွန်လာဖို့ ကူညီရေးအတွက် မကြုံစဖူး အခွင့်အလမ်းကောင်း ရှိနေပြီလို့တော့ ကျနော် ယူဆထားပါတယ်။”

မစ္စတာဘန်ရဲ့ ဒီနေ့ ခရီးစဉ်နဲ့ပတ်သက်လို့တော့ ရန်ကုန်က သတင်းထောက်တဦးက အခုလို ပြောပါတယ်။

“မနက်ဖြန်ကျရင်တော့ မနက် ၉ နာရီမှာ သမ္မတကြီးနဲ့ တွေ့မယ်။ ၁၀ နာရီမှာ ပြည်သူ့ လွှတ်တော်ဥက္ကဋ္ဌသူရ ဦးရွှေမန်းနဲ့ တွေ့မယ်။ ၁၀ နာရီ ၄၀ မှာ အမျိုးသားလွှတ်တော် ဥက္ကဋ္ဌ ဦးခင်အောင်မြင့်နဲ့ တွေ့မယ်။ ၁၁ နာရီ ၂၀ မှာ ပြည်ထောင်စုလွှတ်တော်မှာ မိန့်ခွန်းပြောမယ်။ ဒေါ်စုနဲ့တွေ့မယ့် အချိန်ကျတော့ ရေးမထားဘူး။ သူတို့ UN ကနေ ဘယ်အချိန်ပေးမလဲ မသိဘူး။ မေလ ၁ ရက်နေ့တော့ တွေ့မယ်ထင်တယ်။ တစ်ရက်နေ့မှာတော့ သူတို့ UN အဖွဲ့တွေနဲ့တွေ့ပြီး ဒေါ်စုနဲ့ တွေ့မှာပါ။ ဒီကနေ့ကတော့ မတွေ့ဘူး။"”

မြန်မာ့ဒိမိုကရေစီခေါင်းဆောင် ဒေါ်အောင်ဆန်းစုကြည်နဲ့ကတော့ အင်္ဂါနေ့မှာ တွေ့မယ်လို့ မျှော်လင့်ရပါ တယ်။ လတ်တလောအခြေအနေမှာ ကြားဖြတ်မှာ အနိုင်ရခဲ့တဲ့ အဖွဲ့ချုပ် ကိုယ်စားလှယ်တွေ လွှတ်တော် တက်ရေး အာဏာပိုင်တွေနဲ့ တင်းမာနေတဲ့ကိစ္စရပ်နဲ့ ပတ်သက်လို့တော့ ဒါဟာ မကြာခင် အလျှင်အမြန် ဖြေရှင်းနိုင်မယ်လို့ မျှော်လင့်တဲ့အကြောင်း မစ္စတာဘန်က ပြောပါတယ်။

ကချင်နဲ့ဖြစ်နေတဲ့ကိစ္စကိုလည်း အတွင်းရေးမှူးချုပ်အနေနဲ့ ၀င်ရောက်ဖြေရှင်းဖို့ လူ့အခွင့်အရေးအဖွဲ့အချို့က လိုလားပါတယ်။ ဒေသတွင်းက Altsean-Burma လူ့အခွင့်အရေးအဖွဲ့ရဲ့ ပြောခွင့်ရသူ Debbie Stothard ကတော့ မြန်မာပြည်မှာ ဥပဒေ ပြုရေးပိုင်းရော မူဝါဒဆိုင်ရာကိစ္စတွေမှာပါ ပြုပြင်ပြောင်းလဲစရာတွေ အတော်ကျန်နေတာကို အတွင်းရေးမှူးချုပ် အနေနဲ့ထောက်ပြဖို့လိုမယ်လို့ ပြောပါတယ်။

“မစ္စတာဘန်ကီမွန်းအနေနဲ့ စိတ်ကူးယဉ်စရာကမ္ဘာထဲပဲ နေနေမယ့်အစား၊ တကယ့်လက်တွေ့ အခြေအနေကို ကြည့်ဖို့ အလွန်အရေးကြီးပါတယ်။  မြန်မာနိုင်ငံထဲမှာ ပြုပြင်ပြောင်းလဲမှုတွေ တကယ်ဖြစ်နေပြီလား၊ ဘာတွေ လုပ်ဆောင်ဖို့ လိုအပ်နေသလဲ ဆိုတာတွေကို မှန်မှန်ကန်ကုန်နဲ့ အတော်လေး ချင့်ချိန်သုံးသပ် ရှုမြင်ဖို့ လိုပါ တယ်။ မြန်မာအာဏာပိုင်တွေအနေနဲ့ အစတော့ ကောင်းနေပြီ၊ ဒါပေမယ့် အလျှင်အမြန်လုပ်ဆောင်စရာတွေ အတော်လေး ကျန်နေသေးတယ်လို့ ပြောဖို့ လိုပါတယ်။”

မစ္စတာဘန်ကီမွန်းဟာ မနေ့တုန်းကတော့ ရန်ကုန်မှာရှိတဲ့ ကုလသမဂ္ဂ အတွင်းရေးမှူးချုပ်ဟောင်း ဦးသန့် အုတ်ဂူကို သွားရောက်ဂါရ၀ပြုခဲ့ပါတယ်။ ဦးသန့်ဟာ အာရှကနေ ပထမဆုံးဖြစ်တဲ့ ကုလသမဂ္ဂ အတွင်းရေးမှူး ချုပ်ဖြစ်ပါတယ်။

“ကျနော်ရှေ့ အတွင်းရေးမှူးချုပ်တာဝန်တွေ ယူခဲ့သူတွေဆီက စိတ်ခွန်အားတွေရဖို့အတွက် အမြဲကြိုးစားနေ ပါတယ်။ ဒီအထဲမှာတော့ အတွင်းရေးမှူးချုပ်ဟောင်းဦးသန့်ဟာ ကျနော့်အတွက် တကယ့် အထူးပုဂ္ဂိုလ်ကြီးပါ။”

အထူးသဖြင့် စစ်အေးကာလက အတွင်းရေးမှုးချုပ် ဦးသန့်ရဲ့ အတွေးအမြင်တွေဟာ အခုအချိန်အထိ ခေတ်မီ နေဆဲလို့ မစ္စတာဘန်က ပြောသွားပါတယ်။

“စစ်အေးကာလ အရှိန်မြင့်နေတုန်းက One World အားလုံးဟာ တကမ္ဘာတည်းပါဆိုတဲ့ သူ့ရဲ့ အယူအဆဟာ အခု ကျနော်တို့ ကြိုးပမ်းနေကြတဲ့ အခြေအနေ အတိအကျပါပဲ။ ကမ္ဘာကြီးဟာ တခုနဲ့တခု အပြန်အလှန် အမှီသဟဲ ပြုနေရပါပြီ။ ”

မစ္စတာဘန် မြန်မာနိုင်ငံကိုရောက်နေတဲ့အချိန်မှာပဲ ဥရောပသမဂ္ဂ နိုင်ငံခြားရေး မူဝါဒဆိုင်ရာ အကြီးအကဲ ကတ်သရင်း အက်ရ်ှသွန်လည်း မြန်မာနိုင်ငံရောက်နေတာမို့ သူတို့နှစ်ဦးလည်း မြန်မာနိုင်ငံမှာ သီးခြား တွေ့ဆုံဖို့ စီစဉ်ထားပါတယ်။ မစ္စတာဘန်ကီမွန်းဟာ ရှမ်းပြည်နယ်ဘက်ကိုသွားရောက်ဖို့ အစီအစဉ်ရှိပြီး အဲဒီမှာတော့ ကုလသမဂ္ဂရဲ့ ဘိန်းစိုက်ပျိုးမှုပပျောက်ရေးအစီအစဉ်တွေကို လေ့လာဖို့ရှိပါတယ်။