ကိုယ်ကျင့်သိက္ခာကောင်းမွန်ဖို့က ပိုအရေးကြီးပါတယ်..။

By Ko Navana

ပါးနပ်တဲ့မိဖုရားငယ်ကို ဘုရင်ကအချစ်ပိုပြီး '' လိုရာဆုတောင်းစေ '' လို့ စကားကျွံမိတယ်..။ မိဖုရားငယ်က အခုမတောင်းသေးဘူး.. နောင် အခွင့်သင့်မှတောင်းပါရစေဆိုပြီး.. ဆုကို သိမ်းထားတယ်..။

မိဖုရားကြီးရဲ့  သားကို အိမ်ရှေ့အရာအပ်နှင်းတော့မယ်ဆိုမှ မိဖုရားငယ်က.. သိမ်းထားတဲ့ဆုကို ထုတ်ပြီး '' သူ့သားငယ်ကို အိမ်ရှေ့အရာပေးပါ '' လို့ တောင်းဆိုတယ်..။

အဲ့ဒီမှာ ဘုရင်လည်း ဒုက္ခရောက်ပြီး နန်းတွင်းမှာ ပြဿ နာတွေ တက်ကုန်တယ်..။ နောက်ဆုံး.. သားတော်နှစ်ပါး အခြင်းခြင်း စီးချင်းထိုးတဲ့ အထိဖြစ်ကုန်တယ်..။


စီးချင်းထိုးပွဲမှာ သားတော်အကြီးက နိုင်ပေမယ့် သူ့ညီတော်ကို မသတ်ရက်လို့ ရှောင်ထွက်သွားတယ်..။

အဲ့ဒါကို ညီတော်လုပ်တဲ့သူက.. ရဲမက်ဗိုလ်ပါနဲ့ သူ့နောင်တော်နောက်ကို လုပ်ကြံဖို့ လိုက်တော့.. မနုစာရီနေတဲ့တောထဲ ရောက်လာတယ်..။

သူတို့ လာတဲ့အချိန် မနုစာရီက ရေချိုးနေတယ်..။ ဒုန်းစိုင်းလာတဲ့ မြင်းခွါသံတွေကြားတော့ ရေချိုးရာကနေ မနုစာရီက ၀တ်လစ်စလစ်နဲ့ တက်လာပြီး မင်းသားငယ်ကို တွေ့တယ်..။

အ၀တ်မပါ ကိုယ်ဗလာနဲ့ မိမွေးတိုင်း ဖမွေးတိုင်း လှနေတဲ့ မနုစာရီကို တွေ့တော့ မင်းသားငယ်က.. '' မရှက်ဘူးလား.. လုံလုံခြုံခြုံ ၀တ်စားဆင်ယင်ပါ '' လို့ တိုက်တွန်းပြောဆိုတယ်..။

ကိုယ်လုံးတီးနဲ့ မနုစာရီက..

'' ရှက်သင့်တာက ကျွန်မမဟုတ်.. လောဘဒေါသအမှောင်ဖုံးပြီး ကိုယ့်အပေါ် ခွင့်လွှတ်ညှာတာထောက်ထားတဲ့ အကိုတော်ကို လိုက်လံသတ်ဖြတ်နေတဲ့ မင်းသားငယ်သာ ရှက်သင့်တာပါ '' လို့ ခွန်းတုံ့စကား ချက်ကျလက်ကျဆိုတယ်..။

အဲ့ဒီမှာ မင်းသားငယ် အကျွတ်တရားရပြီး ညီအကိုနှစ်ယောက်သင့်မြတ်စွာနဲ့ ပြန်တော်ပြန်ကြတယ်..။

-----------------------------------------------------------------------------------

စစ်ကိုင်းဦးဘိုးသင်းရဲ့  -မနုစာရီ- စာအုပ်ထဲက.. အကြောင်းအရာကို မှတ်မိသလို ပြန်ရေးလိုက်တာပါ..။

တကယ့်အရှက်တရားဆိုတာ.. ၀တ်စားဆင်ယင်မှုဆိုင်ရာ အရှက်တရားမဟုတ်ဘဲ.. ကိုယ်ကျင့်တရားဆိုင်ရာအရှက်တရားသာလျှင် ဖြစ်တယ် လို့.. အလင်းပြပေးတဲ့ စာတပုဒ်ပါ..။

အရှက်လုံအောင် ၀တ်စားဆင်ယင်ဖို့ထက်.. အရှက်လုံအောင် ကိုယ်ကျင့်သိက္ခာကောင်းမွန်ဖို့က ပိုအရေးကြီးပါတယ်..။