မြန်မာပြည်သူများအကျိုးအတွက် ကျွန်တော် အမြင်ချင်ဆုံးသော အပြောင်းအလဲ ၁၂ ချက် ။

June 14, 2014 at 6:58am

 

မြန်မာပြည်သူများအကျိုးအတွက် ကျွန်တော် အမြင်ချင်ဆုံးသော အပြောင်းအလဲ ၁၂ ချက် ။ 
နိုင်ငံရေး၊ စစ်ရေး၊ တိုင်းရင်းသားရေးနှင့် တရားရေး 
၁။ မြန်မာအပါအဝင် တိုင်းရင်းသားအားလုံးပါဝင်သော ညီလာခံကြီးခေါ်ယူပြီး စစ်မှန်သော ဖက်ဒရယ်အခြေခံဥပဒေကြီးကို ရေးဆွဲအတည်ပြုခြင်း။
၂။ ယင်းအခြေခံဥပဒေအောက်တွင် တိုင်းရင်းသားအားလုံးပါဝင်သော တခုတည်းသောတပ်မတော်ကို ဖွဲ့စည်းခြင်း။
၃။ ယင်းတပ်မတော်သည် မြန်မာနိုင်ငံတော်ကြီးကို ကာကွယ်ပေးမည့် Professional တိုက်ခိုက်စွမ်းရည်မြင့်မားသော တိုင်းပြည်၏ ကာကွယ်ရေးသက်သက်ကိုသာ တာဝန်ယူသည့် တပ်မတော်ဖြစ်ခြင်း။
၎။ တပ်မတော် ကြည်း၊ ရေ၊ လေ ဦးစီးချုပ်များကို သုံးပွင့်ဆိုင် ချိန်ခွင်လျှာပြု၍ တန်းတူအာဏာရရှိစေပြီး ကြည်းတပ်ကသာ ကာကွယ်ရေး ဦးစီးချုပ်ရာထူးကို လက်ဝါးကြီးအုပ်ထားမှုကို ပယ်ဖျက်လိုက်ခြင်း။
၅။ နိုင်ငံတော်သမ္မတသည် ကာကွယ်ရေးဦးစီးချုပ်ဖြစ်သည်ဟု သတ်မှတ်ခြင်းနှင့်စစ်ရေးကိစ္စများကို သမတကသာ ဆုံးဖြတ် ပေးခြင်း။

၆။ တိုင်းနှင့်ပြည်နယ်စနစ်ကိုပယ်ဖျက်၍ ပြည်နယ်များအဖြစ် ၁၄ ပြည်နယ်သတ်မှတ်ရန်နှင့် နိုင်ငံသား အချင်းချင်း သွေးကွဲစေသည့် လူမျိုးစွဲပြည်နယ်အမည်များကို ဒေသအမည်များပြောင်းလဲ၍ လူမျိုးတမျိုးကသာ ယင်းပြည်နယ်ကို ပိုင်ဆိုင်လွှမ်းမိုးသည်ဆိုသည့် အယူအဆကိုပယ်၍ ထိုပြည်နယ်တွင်းရှိ လူမျိုးတိုင်းကို ကိုယ်စားပြုသည့် ပြည်နယ်နှင့် ယင်းပြည်နယ်တွင်းနေထိုင်သူအားလုံးပိုင်ဆိုင်သည့်ပြည်နယ်သဘောတရား သက်ဝင်လာရေးကို ပြောင်းလဲခြင်း။
သာဓကအားဖြင့် ရှမ်းပြည်နယ်ဆိုခြင်းကြောင့် ရှမ်းများက လူမျိုးကြီးဖြစ်သည် ရှမ်းများကသာ ပိုင်သည်ဟု ရှမ်းလူမျိုးတို့က ယူဆသည်။ ထို့ကြောင့် ပအို့ဝ်၊ ပလောင်၊ လားဟူ၊ အင်းသား၊ ဝတို့က သူတို့ကိုယ်စားပြု ပြည်နယ်များလိုချင်လာကြသည်၊ တောင်းဆိုလာကြသည်။ လူမျိုးရေးစိတ်ဓါတ်များ ကိန်းဝပ်လာခဲ့သည်။ ကချင်ပြည်နယ်ဟု ဆိုသဖြင့် ကချင်ပြည်နယ်ရှိ ရှမ်းနီများက သူတို့နှင့်မဆိုင်သလိုခံစားရသည့် မကျေလည်မှုများဖြစ်လာသည်။ ထို့ကြောင့် လူမျိုးစွဲအမည်များသည် ခေတ်သစ်မြန်မာနိုင်ငံတွင် မရှိသင့်တော့ပေ။ ဤနေရာတွင် မြန်မာသည် ဗမာလူမျိုး ကိုသာ ကိုယ်စားပြုနေပါသည် ဆိုလျှင်လည်း နိုင်ငံအမည်ကို ပြည်တွင်းရှိ တိုင်းရင်းသားအားလုံးကို ကိုယ်စားပြုသည့် အမည်ကို ရွေးနိုင်သည်။
၇။ တရားစီရင်ရေးဌာနကြီးရှိ တရားသူကြီးချုပ်နှင့် ဗဟိုတရားသူကြီးများကို သမ္မတက ရွေးချယ်နာမည် တင်သွင်းပေးပြီး ယင်းအမည်တင်သွင်းခံရသော တရားသူကြီးများ၏ အရည်အချင်း၊ လုပ်သက်၊ အဂတိကင်းရှင်း ကြောင်းကို လွှတ်တော်မှ ကြားနာစစ်ဆေးပြီး ပြည်သူတို့ကို ထိုကြားနာမှုများကို ပွင့်လင်းစွာ ဖွင့်ချပြီး အတည်ပြု ပေးခြင်း၊ ကန့်ကွက်ခြင်းတို့ကိုပြုပြီး အများသဘောနှင့် အတည်ပြုရွေးချယ်ရမည်။ ဗဟိုတရားသူကြီးများသည် ခန့်အပ်ခံရပြီးချိန်မှစ၍ အစိုးရ၏ သြဇာအာဏာစက်အောက်မှ ကင်းလွတ်သည်။ ဗဟိုတရားသူကြီးအဖွဲ့သည် လွတ်လပ်စွာ တရားစီရင်ခွင့် ရှိရမည်။ ဗဟိုတရားသူကြီးများ၏ ဆုံးဖြတ်မှုကို အစိုးရမှ ဝင်ရောက်စွက်ဖက် လွှမ်းမိုးခြင်းမရှိစေရ။ ဗဟိုတရားသူကြီးများ၏ ဆုံးဖြတ်ချက်ကို အစိုးရမှ နာခံရမည်။

ကျောင်းသားရေး၊ အလုပ်သမားရေး၊ လယ်သမားရေး။ 
၈။ ကျောင်းသားရေးသည် ပညာရေးစံနစ်ကောင်းမွန်မှုကို အခြေခံသည်။ ပညာကောင်းစွာသင်ကြားနိုင်ရေး၊ သင်ကြားနိုင်ခွင့်၊ မိမိသင်ကြားလိုသည့် ဘာသာရပ်ကို လွတ်လပ်စွာ ရွေးချယ်ပိုင်ခွင့်၊ ကျောင်းအုပ်ချုပ်ရေးတွင် ကျောင်းသားကိုယ်စားလှယ်များပါဝင်၍ ပညာရေးလိုအပ်ချက်များကို ဝင်ရောက်ဆွေးနွေးပိုင်ခွင့်တို့ရှိဖို့လိုသလို ပညာရေး သင်ကြားမှု အထောက်အကူပစ္စည်းများ လုံလောက်စွာရှိမှု ဦးစားပေးလုပ်ဆောင်ခြင်း ဥပမာ။ စာအုပ်စာတမ်းများ၊ ဓါတ်ခွဲခန်းများ၊ အင်တာနက်ချိတ်ဆက်ထားသော ကွန်ပျူတာခန်းများ၊ စာကြည့်တိုက်များ ပြည့်စုံစွာရှိရန် လုပ်ဆောင်ပေးမှု တို့လည်း ပါဝင်သည်။ အရေးကြီးဆုံးမှာ အမှန်တကယ် တတ်ကျွမ်းသည့် ဆရာများခန့်အပ်ပေးခြင်းနှင့် ကျောင်းသား အဖွဲ့အစည်းများ၊ ကျောင်းဆရာအဖွဲ့အစည်းများ လွတ်လပ်စွာ ဖွဲ့စည်းလှုပ်ရှားခွင့်၊ ကြက်တူရွေးနုတ်တိုက် ပညာသင်ကြားရေးမှ တွေးခေါ်စဉ်းစားမှုအခြေခံ ပညာရေးစနစ်သို့ ပြုပြင်ပြောင်းလဲသွားရေးတို့ ဖြစ်သည်။ အတောင့်တဆုံးမှာ စစ်အာဏာရှင် ဦးနေဝင်းက ဖေါက်ခွဲဖျက်စီးခဲ့သည့် ကျောင်းသားသမဂ္ဂအဆောက်အဦကြီးကို အများပြည်သူ ရန်ပုံငွေဖြင့် ပြန်လည်တည်ဆောက်မှုကို မြင်လိုခြင်းဖြစ်သည်။ တက္ကသိုလ်ကျောင်းသားများ နွေရာသီ ကျောင်းပ်ိတ်ချိန်များတွင် လွှတ်တော်အမတ်များထံတွင် Intern လေ့လာသူများအဖြစ် ဝင်ရောက်အလုပ်လုပ်ခွင့် ရှိခြင်းသည်လည်း အလွန်အရေးကြီးသည်။ လွှတ်တော်လည်ပတ်ပုံ၊ လွှတ်တော်အမတ်များ မည်သို့အလုပ်လုပ်ပုံ၊ လွှတ်တော် အမတ်များ၏ ရုံးအဖွဲ့အလုပ်များတွင် ကူညီဝင်ရောက်လုပ်ကိုင်ကြခြင်းဖြင့် ကျောင်းပြီးသည့်အခါတွင် အရည်အချင်းရှိသူများသည် လွှတ်တော်အမတ်များက စင်တော်ကောက်ယူခြင်းဖြင့် အရည်အချင်းပြည့်မီသည့် အနာဂတ်နိုင်ငံခေါင်းဆောင်များကို ပြုစုပျိုးထောင်နိုင်ပေမည်။
၉။ အလုပ်သမားအရေးသည်  အချိန်ပြည့် အလုပ်သမားများနှင့် အချိန်ပိုင်း အလုပ်သမားများအပါအဝင် အခြေခံအနိမ့်ဆုံး လစာကို အစိုးရက ဒေသဆိုင်ရာ ကော်မရှင်များ၊ ပြည်နယ်ဆိုင်ရာ ကော်မရှင်များနှင့် ညှိနှိုင်း၍ ဗဟိုအနိမ်ဆုံးလစာ ကော်မရှင်မှ လူသားဘဝ လူ့ဂုဏ်သိက္ခာနှင့် နေနိုင်သော အနိမ့်ဆုံးလုပ်ခလစာကို သတ်မှတ်ပေးရေး ဖြစ်သည်။ ထိုလစာသတ်မှတ်မှုကို နှစ်စဉ်သော်လည်းကောင်း နှစ်နှစ်တခါသော်လည်းကောင်း သုံးသပ်စီစစ်ပြီး ကုန်ဈေးနှုန်း တိုးလာသည့်အလျောက် ပြောင်းလဲသတ်မှတ်ပေးသည့်စနစ်နှင့် အနိမ့်ဆုံး လစာထက်နိမ့်နေ သေးသည့် အလုပ်သမားများအတွက် ရှားပါးစရိတ်ကို ပေးရန်နှုန်းထား သတ်မှတ်ပေးသည့် ဥပဒေတရပ်လည်း လိုသည်။ အလုပ်ချိန် တနေ့ ၈ နာရီနှင့် အချိန်ပိုကြေးကို မူလနှုန်းထားထက် တဆခွဲ သို့မဟုတ် နှစ်ဆပေးရန် သတ်မှတ်ခြင်းအပြင်၊ အလုပ်သမား သမဂ္ဂများဖွဲစည်းခြင်းကို အလုပ်ရှင်များ သို့မဟုတ် စက်ရုံအုပ်ချုပ်ရေးပိုင်းမှ ခွင့်ပြုရမည်ဟု အမိန့်ဥပဒေ ထုတ်ပြန်ခြင်းနှင့် မလိုက်နာပါက ဒဏ်ငွေသတ်မှတ်ခြင်း၊ အလုပ်သမားများအတွက် အလုပ်ခွင် အန္တရာယ်ကင်းရှင်းရေး၊ ကျန်းမာရေး အာမခံစနစ်၊ သက်ကြီးပင်စင်၊ ဆေးပင်စင်၊ အလုပ်ခွင်ထိခိုက်မှု လျှော်ကြေးစသည်တို့ကို ကြီးကြပ်ကွပ်ကဲရေး ဘုတ်အဖွဲ့များတွင် အလုပ်သမားသမဂ္ဂ ကိုယ်စားလှယ်၊ စက်မှုလုပ်ငန်း (အုပ်ချုပ်မှု) ကိုယ်စားလှယ်နှင့် အရပ်သား ပြည်သူအဖွဲ့တို့ အပြန်အလှန် ညှိနှိုင်းဆောင်ရွက်သည့် သုံးပွင့်ဆိုင်ကော်မတီများ ဖွဲ့စည်း၍ ပဋိပက္ခများကို ဆွေးနွေးညှိုနှိုင်းဖြေရှင်းသည့်စနစ် ကိုဖန်တီးခြင်း စသည်တို့ကို ဘက်စုံမှလုပ်ပေးသည့် အခြေအနေ ပေါ်ပေါက်လာစေရန် ပြုလုပ်ခြင်းတို့ဖြစ်သည်။ တိုင်းရင်းသားပိုင်စက်ရုံဖြစ်စေ၊ နိုင်ငံခြားသားပိုင်စက်ရုံဖြစ်စေ Corporate social responsibility (CSR) စီးပွါးရေးကော်ပိုရေးရှင်းများ၏ လူမှုရေးတာဝန်ခံမှုကို corporate conscience  corporate citizenship, social performance, သို့မဟုတ် sustainable responsible business စီးပွားရေး အတွက် အလုပ်ဖြစ်နိုင်သော တာဝန်ခံမှု/ Responsible Business တာဝန်ယူမှုတာဝန်ခံမှုရှိသော စီးပွားရေးဟုလည်း ခေါ်သည်။ CSR ကို ဥပဒေအဖြစ် အလုပ်သမားများ အကျိုးအတွက် ပြဋ္ဌာန်းပေးသည်ကိုလည်း မြင်လိုသည်။ ထိုသို့ ပြဋ္ဌာန်းထားမှု မရှိသဖြင့် လက်ပံတောင်းတောင်တွင် လူမှုရေးတိုက်ပွဲများ ဆင့်ကဲဆင့်ကဲ ဖြစ်လာခြင်းဖြစ်သည်။ စစ်အစိုးရလက်ထက် ကော်ပိုရေးရှင်းများမှ လူမှုတာဝန်ခံမှုဥပဒေမရှိသဖြင့် တရုတ်ပိုင်ကုမ္ပဏီနှင့် စစ်တပ်ပိုင် ဦးပိုင်စီးပွါးရေးကော်ပိုရေးရှင်းတို့မှ ဒေသခံများ၏ မြေယာများ၊ သောက်သုံးရေများ အဆိပ်သင့်စေခြင်းတို့ကို ဂရုစိုက်စရာ မလိုဘဲ ထင်သလို နှစ်ပေါင်းမြောက်များစွာ လုပ်ကိုင်ခဲ့သဖြင့် လက်ပံတောင်းတောင်ဒေသရှိ ပြည်သူများ အတိဒုက္ခရောက်နေရခြင်းသည် မျက်ဝါးထင်ထင် လက်တွေ့သင်္ခန်းစာ ယူသင့်သည့် သာဓကတစ်ခု ဖြစ်သည်။ စီးပွါးရေးလုပ်ငန်းတခုကို ထူထောင်ရာတွင် အလုပ်သမားများကို မျှတစွာ ဆက်ဆံမှုရှိဖို့ လိုသလို၊ ယင်းစီးပွားရေး အဆောက်အအုံတည်ရှိရာ ဒေသဝန်းကျင်ရှိ ပြည်သူများ၏ ကျန်းမာရေး၊ လူမှုရေးများကို မထိခိုက်စေရန်လည်း လိုအပ်ပေသည်၊
၁၀။ လယ်သမားအရေးသည် အရေးကြီးဆုံးဖြစ်သည်။ မြန်မာနိုင်ငံရှိ လူဦးရေ၏ ၇၀% သည် လယ်ယာ၊ ကိုင်းကျွန်းများကို မှီခိုလုပ်ကိုင်နေကြသူများ ဖြစ်ကြသည်။ လယ်လုပ်သူလယ်ပိုင်ရေးဟု မဆလ လက်ထက်မှ ကြွေးကြော်ခဲ့ပြီး ပုဂ္ဂလိက လယ်ဧကများစွာကို သိမ်းယူ၍ သီးစားခနှင့် လုပ်နေသော လယ်သမားများကို ချပေးခဲ့ဖူးသည်။ ၁၉၈၈ ခုနှစ်နောက်ပိုင်း လယ်သမားများ ပိုင်လယ်မြေများကို စစ်တပ်က ဥပဒေမဲ့ တိုင်းနှင့် ပြည်နယ်အလိုက် လယ်မြေဧကပေါင်း သိန်းသောင်းချီ၍ မတရားသိမ်းထားခဲ့ခြင်းကို ပြန်လည်ပေးအပ်သည်ကို မြင်လိုသည်။ လယ်သမားများတောင်သူများ မိမိသဘောနှင့် မိမိတို့ နှစ်သက်သည့် လယ်ယာသီးနှံများကို စိုက်ပျိုးခွင့်၊ ရောင်းချခွင့်ရှိပြီး တိုင်းပြည်၏ မြေကိုအစိုးရက ပိုင်သည်ဆိုသည့် ထင်သလို လုပ်နိုင်ခွင့် ဥပဒေကို ဖျက်သိမ်းပြီး ပြည်သူများ မိမိပိုင်သောမြေကို ကာကွယ်ခွင့်၊ တည်ငြိမ်သော အိုးအိမ်ပိုင်ဆိုင်ခွင့်ရှိသည်ကို မြင်လို သည်။
၁၁။ သဘာဝပတ်ဝန်းကျင်ထိမ်းသိမ်းရေး  
တိုင်းပြည်ရှိသစ်တောများပြုန်းတီးနေမှုကို လုံးဝရပ်တန့်ပြစ်ရန် လိုလားသည်။ ထုတ်လုပ်ပြီးသားသစ်များ အားလုံးကို ခွဲသားအဖြစ် တင်ပို့ရန်နှင့် အထူးတင်းကြပ်သော ဥပဒေများချမှတ်ပေးခြင်း၊ နယ်စပ်ဒေသကုန်သွယ်ရေးလမ်းမတို့ဖြစ်သည့် တရုတ်နယ်စပ်နှင့် ယိုးဒယားနယ်စပ်များသို့ သစ်ကားများ သယ်ဆောင်ဖြတ်သန်းမှုကို လုံးဝရပ်တန့်ရန် တင်းကြပ်သည့် ဥပဒေ ချမှတ်လုပ်ဆောင်ခြင်း။ စည်းမဲ့ကမ်းမဲ့ ရွှေတူးယူမှုများ၊ မိုးကုတ်နယ်တွင် စက်ကြီးများဖြင့် တူးယူနေမှုများကို ရပ်တန့်ပြစ်ရန်။ သဘာဝရင်းမြစ်များကို ကုန်ကြမ်းထုတ်လုပ်ရောင်းချခြင်းထက် ကုန်ချောထုတ်လုပ်ရောင်းချခြင်းကို ဦးစားပေးသည့် ပေါ်လစီတရပ်ချမှတ်ပြီး လက်တွေ့ အကောင်အထည်ဖေါ်သည်ကို မြင်လိုသည်။ 
၁၂။ စွမ်းအင်နှင့်လောင်စာ
စွမ်းအင်ထုတ်လုပ်မှုကို သဘာဝဓါတ်ငွေ့ပေါကြွယ်ဝသောမြန်မာနိုင်ငံအနေနှင့် ဓါတ်ငွေ့သုံးတာဘိုင် လျှပ်စစ်ဓါတ်အားပေး စက်ရုံကြီးနှစ်ခု ပေါ်ပေါက်လာသည်ကို မြင်လိုသည်။ တခုကို ရေး ဘိတ်ဖက် ရတနာဓါတ်ငွေ့ထွက်ရာ နေရာတွင် တည်ထောင်၍ တနင်္သာရီတိုင်း၊ မွန်ပြည်နယ်နှင့် ကရင်ပြည်နယ် ကယားပြည်နယ် များ မီးထိန်ထိန်လင်းသည်ကို မြင်လိုသည်။ ဒုတိယ ဓါတ်ငွေ့သုံးတာဘိုင်လျှပ်စစ်စက်ရုံကြီးကို ကျောက်ဖြူတွင် တည်ထောင်၍ ရခိုင်ပြည်နယ်၊ ချင်းပြည်နယ်၊ စစ် ကိုင်းတိုင်း၊ အောက်မြန်မာပြည်တခြမ်း မီးလင်းစေမည်ကို မြင်လိုသည်။ မြစ်ဆုံအထက်တွင် တည်ဆောက်နေသည့် ရေကာတာများမှ ထွက်သည့်လျှပ်စစ်မီးကို ကချင်ပြည်နယ်နှင့် ရှမ်းပြည်နယ်တို့အတွက် ဖြစ်စေရမည်။
ဤ ၁၂ ချက်သည် ကျွန်တော် မြင်လိုသော ဆန္ဒများသာ ဖြစ်သည်။ ဖြစ်လာသည်မလာသည်မှာမူ ပြည်သူတို့အပေါ် စေတနာထားသောသူများ အုပ်ချုပ်သောအစိုးရပေါ်ပေါက်လာ၍ ပြည်သူများ၏ တက်ညီလက်ညီ ပူးပေါင်းပါဝင်မှုပေါ်တွင် တည်မှီနေပါသည်။

အားလုံးကိုလေးစားလျက်။

ထွန်းအောင်ကျော် (၇၄ မျိုးဆက်)

ယနေ့ ၂၀၁၄ ခုနှစ်၊ ဇွန်လ ၁၄ ရက်နေ့ထုတ် ဒီမိုကရေစီတူဒေးသတင်းစာပါ ကျွန်တော့်ဆောင်းပါးကို အားလုံးဖတ်ရအောင် မျှဝေပေးလိုက်ပါတယ်။