ရေးသူ့ဈေးကွက်

by မင်းလူ၏ ၀တ္တုတိုများ on Tuesday, December 25, 2012 at 5:47am ·

    စီးပွားရေးလောကမှာ ရောင်းလိုအားနှင့် ဝယ်လိုအားဆိုတာရှိ၏။ ထုတ်လုပ်မှုနှင့် လိုအပ်မှု၊ ဒီမန်းနှင့် ဆပ်ပလိုင်း စသည်ဖြင့်လည်း ဆိုကြသည်။ ထုတ်လုပ်မှုက များပြီး လိုအပ်မှု(ဝယ်လိုအား)ကနည်းနေလျှင် ဝယ်သူကို ရောင်းသူက အောက်ကျို့ရသည်။ ဝယ်သူ့အလိုကို လိုက်လျောရသည်။ ဒါကို ဝယ်သူ့ဈေးကွက် ဟု ခေါ်သည်။

တကယ်လို့ ထုတ်လုပ်မှုကနည်းပြီး လိုအပ်မှု(ဝယ်လိုအား)ကများနေလျှင် ရောင်းသူက အပေါ်စီးရသွားသည်။ ဝယ်သူက ပြန်အောက်ကျို့ရသည်။ ဒါကိုရောင်းသူ့ဈေးကွက်ဟုခေါ်သည်။ (ဟိုအရင်က ပြည်သူ့ဆိုင်တွေလိုပေါ့။)

    ခုချိန်မှာ မဂ္ဂဇင်း၊ ဂျာနယ်တွေ  အမြောက်အမြားထွက်နေသည်။ ရိုက်နှိပ်သမျှ စောင်ရေတွေ အားလုံးပေါင်းလိုက်လျှင် စာဖတ်ပရိသတ်ဦးရေထက်တော် ပိုများနေမလားမသိ။ စာနယ်ဇင်းတွေ များလာသလို စာရေးဆရာတွေ ပိုများလာတာလည်း မှန်သည်။ ကလောင်ငယ် ကလောင်သစ်တွေ နေရာပိုရလာတာလည်း မှန်သည်။ သို့တိုင်အောင် မဂ္ဂဇင်း၊ ဂျာနယ်တွေအဖို့ ဝါရင့်ကလောင်၊ နာမည်ကြီး၊ နာမည်ရ စာရေးဆရာတို့၏ စာမူမပါလို့မဖြစ်။ ရောင်းအားအတွက်ပဲဖြစ်ဖြစ် ဒီဆရာတွေက မရှိမဖြစ်လိုအပ်နေသည်။

    ခက်နေတာကတော့ တကယ်ရေးအားကောင်းသော စာရေးဆရာရှားပါးနေခြင်းပင်ဖြစ်၏။ တချို့အစပိုင်းမှာ အားသွန်ခွန်စိုက် ရေးနိုင်သော်လည်း ကြာတော့ လက်ပန်းကျလာသည်။ တချို့ နဂိုကပင် စာရေးနှေးသူတွေ ရှိသည်။ ဒီလိုလူတွေအတွက်တော့ ဂျာနယ်မဂ္ဂဇင်းတွေ လိုအပ်သမျှ အလျင်မီအောင်ရေးနိုင်ဖို့မလွယ်။ ဒီမန်းက များပြီး ဆပ်ပလိုင်းက နည်းနေသည့်သဘောဖြစ်၏။ ထိုအခါ "ရေးသူဈေးကွက်"ဖြစ်လာ၏။ (စီးပွားရေးလောကမှာ ဝယ်လိုအားများလာလျှင် ဈေးတင်သလိုမျိုး စာမူခကို ပိုတောင်းလို့မရတာကတော့ ခြွင်းချက်ပေါ့။

    သူသည် နာမည်ရ စာရေးဆရာတစ်ဦးဖြစ်၏။ ထို့ကြောင့် စားအုန်းဆီ ကိုယ်စားလှယ်ရထားသူ တစ်ယောက်လို မျက်နှာပွင့်လှသည်။

    အစပိုင်းမှာတော့ သူကလည်း တယ်ဟုတ်တဲ့ငါပါလား၊ စာမူလိုချင်တဲ့လူတွေ ဝိုင်းဝိုင်းကိုလည်နေတာပဲဆိုပြီး ကျေနပ်နေခဲ့သေးသည်။ တောင်းသမျှကို မညည်းမညူရေးသည်။ ကြာတော့ ဦးနှောက်က ခန်းလာသည်။ ရေးစရာအကြောင်းအရာ ရှားပါးလာသည်။ သူက ရသစာပေဘက် အားသန်သူဖြစ်သောကြောင့် စိတ်မပါဘဲ တာဝန်အရရေးလျှင် အရည်အသွေးကျလာတတ်သည်။ စာမူတောင်းတဲ့သူတွေကတော့ ခရီးသည်နှင့်ဘတ်စ်ကားစင်းရေလို မမျှမတဖြစ်နေဆဲ။

    အင်း...မဖြစ်သေးပါဘူး။ တောင်းသမျှ ရေးနေလျှင် သိပ်လွယ်တယ်ထင်ကြမယ်။ ဒါကြောင့် ကိုယ့်စာမူတန်ဖိုးရှိအောင် လုပ်ရမည်။ အရင်လိုပါးစပ်နဲ့တောင်းတာမျိုးလက်မခံတော့။ စာမူတောင်းသူတွေ အတွက် စည်းကမ်းချက်တွေသတ်မှတ်ရမည်။ ဒါမှ လူစစ်ပြီးသားဖြစ်သွားမည်။

    စည်းကမ်းချက်တွေကတော့ . . .

    - စာမူတောင်းခံလိုသူသည် လျှောက်လွှာတင်ရမည်။

    - ဘားဖြူစက္ကူနှင့်ရိုက်နှိပ်ထားသော လျှောက်လွှာပုံစံတစ်စောင်လျှင် ငါးဆယ်ကျပ်ဖြင့်ဝယ်ယူရမည်။

    - လျှောက်လွှာနှင့်အတူ အကျင့်စာရိတ္တကောင်းမွန်ကြောင်းထောက်ခံစာကိုပါ ပူးတွဲတင်ပြရမည်။

    - အယ်ဒီတာလုပ်သက် အနည်းဆုံး သုံးနှစ်ရှိရမည်။

    - ရုပ်ရည်ပြေပြစ်ရမည်။

    - အင်္ဂလိပ်စကားပြော ကျွမ်းကျင်ရမည်။

    - စာလုံးပေါင်းသတ်ပုံနှင့် သဒ္ဒါမှန်ကန်အောင် ရေးသားနိုင်ရမည်။

    - လူတွေ့စစ်ဆေးခြင်းခံရမည်။

    - လျှောက်လွှာနှင့်အတူ စာမူခကိုပါ တစ်ပါတည်း ပေးသွင်းရမည်။

    မဂ္ဂဇင်းတစ်စောင်မှ အယ်ဒီတာတစ်ယောက်ရောက်လာ၏။

    "စာမူလိုချင်လို့ပါဆရာ"

    ဟု ပြောသည်။ စည်းကမ်းချက်များ ရိုက်နှိပ်ထားသော စာရွက်ကိုပေးလိုက်ပြီး-

    "စာမူလိုချင်ရင် ဒါကိုအရင်ဖတ်ကြည့်ဦး"

    ဟုပြောလိုက်၏။ လက်ထောက်အယ်ဒီတာက ဖတ်ကြည့်ပြီးပြုံးသည်။ ပြီးတော့-

    "သိပ်ကောင်းတာပဲ ဆရာ၊ ဒါမှလည်း စနစ်တကျဖြစ်တော့မှာပေါ့၊ ဩော်....ဒါနဲ့ ဆရာ ထမင်းစားပြီးပြီလား"

    "ဘယ်စားရဦးမလဲဗျ၊ အခုပဲစားမလို့ဟာ၊ ခင်ဗျားရောက်လာတာနဲ့"

    "ဒါဆိုအတော်ပဲ ဆရာ၊ ကျွန်တော်လည် မစားရသေးဘူး၊ တစ်ခုခုသွားစားရအောင်"

    ဆိုပြီး စားသောက်ဆိုင်ကိုခေါ်သွားသည်။ တိုက်ဂါးဘီယာနှင့် ငုံးကြွပ်ကြော်၊ ဂဏန်းအစာသွတ်၊ ပုစွန်အစိမ်းသုပ် စသော စားသောက်ဖွယ်ရာများမှာသည်။ စားရင်းသောက်ရင်း သရုပ်မှန်စာပေအကြောင်း ပြောကြသည်။ ဘီယာသုံးလုံးနှင့် ငါးသုံးလုံး စီးကရက်ဘူးတစ်ဝက် ကုန်သွားပြီး နောက်ထပ်ဘီယာနှစ်လုံးနှင့် ဘဲကင်တစ်စိပ်မှာလိုက်သော အချိန်မှာပင်-

    လူချင်း(ဒီနေ့ကျမှ)အရမ်းခင်မင်နေကြတာကို ထောက်ထားပြီး စာမူတစ်ပုဒ်ကို တစ်ပတ်အတွင်း ရေးပေးမည်ဟု ကတိပြုလိုက်သည်။

    "လျှောက်လွှာကရော ဆရာ"

    ဟု မေးတော့-

    "ကျွန်တော့်ဘာသာပဲ ကြည့်ဖြည့်လိုက်ပါ့မယ်"

    ဟု ပြန်ဖြေလေ၏။

--------------------------------------------------

မင်းလူ

အတွေးသစ်ဂျာနယ်။

၂၆.၈.၂၀၀၂။