ဝေဖန်ချင်သူများသို့

by Myo Set on Friday, December 28, 2012 at 5:26pm 

ကချင်ပြည်နယ်စစ်ပွဲတွင် ယခု ဓါးစားခံအသစ်များပေါ်ထွက်လာသည်။ ထိုသူတို့မှာ

(၁) ဒေါ်အောင်ဆန်းစုကြည်

(၂) ၈၈ မျိုးဆက်ကျောင်းသားများ

  ဖြစ်ကြသည်။ ဓါးစာခံများဟု ယူဆရသည်မှာ အချို့သော နိုင်ငံရေးသမားများနှင့် ကချင်လူမျိုးများဟု ယူဆရသော ဖေ့စ်ဘုတ်ယူဆာများက လက်ညိုးတွင်တွင်ထိုးကြ၍ ဖြစ်သည်။

ထိုသူတို့၏ စွပ်စွဲချက်များကို အကျဉ်းချုပ်ကြည့်လျှင်

(၁) ဒေါ်အောင်ဆန်းစုကြည်သည် ပြည်တွင်းစစ်ပွဲကို လက်ပိုက်ကြည့်နေသည်။

(၂) ၈၈ တို့သည်လဲ ထိုနည်းလည်းကောင်း

(၃)မယောင်ရာဆီလူး ပွဲတော်များကိုသာ ခင်းကျင်းပြသနေကြသည်ဟူ၍ ဖြစ်သည်။

ထိုကိစ္စအပေါ်ပြန်လည်ဆန်းစစ်ကြည့်ချင်မိသည်။

ကချင်စစ်ပွဲ၏ အဓိက ဖြစ်ရသော အကြောင်းရင်းမှာ BGF ခေါ် နယ်ခြားစောင့်တပ်အဖြစ်အတင်းပြောင်းလဲခိုင်းခြင်း ကနေ စပါသည်။ BGF ဖြစ်လျှင် Military Power ကို အဆင့်နှိမ့်ရမည်။ လိုအပ်လျှင် ကချင်စစ်သားများကို အသုံးချခြင်းခံရမည် စသည့် စိုး၇ိမ်မှုများလဲ ရှိနိုင်ပါသည်။ ထိုသို့ဖြစ်ရာ ထိုကိစ္စအတွက် စစ်ရေးတင်းမာပြီး ကျန် ကိုယ်ကျိုးစီးပွားအဝေမတည့်ဖြစ်မှုကြောင့် စစ်မီးတောက်လာသည်ဟု ဆိုနိုင်ပါမည်။

ကချင်စစ်တပ်၏ ရပ်တည်မှုတွင် ကချင်လူထုက အဓိကဟုပြောကြပါသည်။ ဟုတ်ပါလိမ့်မည်။ သို့သော်လဲ ၁၉၉၄ အပစ်ရပ်ကာလအပြီးတွင် အစိုးရပိုင်းနှင့် ကချင်အာဏာပိုင်အသိုင်းအဝိုင်းမှ တရုတ်နှင့် အကြီးအကျယ် ကုန်သွယ်ကာ ငွေကြေးစုဆောင်းခဲ့ခြင်းကလဲ အဓိက အချက်တစ်ချက်အနေဖြင့် ပါနေပါလိမ့်မည်။ တရုတ်အနေဖြင့် မြန်မာအစိုးရဖက်မှ သိသိသာသာရပ်ချင်လျှင် ကချင်နှင့် ကုန်သွယ်မှုကို ပိတ်ဆို့လိုက်ရုံဖြင့် ယခုစစ်ပွဲအဖြေထွက်သွားနိုင်ပါသည်။ ထိုသို့ဖြစ်ရာ ကချင်-တရုတ်ပတ်သက်မှုမှာ အတိုင်းအတာတစ်ခုလောက်အထိ မြင်သာလောက်ပါပြီ။

မြန်မာအစိုးရနှင့် တရုတ်ပတ်သက်မှုမှာ လူသိလွန်စွာများနေပြီဖြစ်၍ အထူးဆို၇န်မလိုပါ။ ထိုသုိ့ဖြစ်ရာ တရုတ်အနေဖြင့် နှစ်ဖက်ကို လက်နက်ရောင်းနေသော ကြားနေကုန်သည်ကြီးပုံစံချိုးနေသည်ကို တွေ့မြင်ရပါလိမ့်မည်။ သူ၏ ဆောင်ပုဒ်မှာ သူတစ်ပါးပြည်တွင်းရေးဝင်မစွက်ဟူ၍ ဖြစ်ပါလိမ့်မည်။

BGF ဖွဲ့ရေး၊ မဖွဲ့ရေးအတွက် ချက်ခြင်းအဖြေမထွက်လျှင်လဲ အပစ်ရပ်ထား၍ နှစ်စလုံးမှ ဖြစ်နိုင်ပါသည်။ အပစ်မရပ်နိုင်ကြခြင်းမှာ နယ်မြေပိုင်ဆိုင်မှုနှင့် သယံဇာတ ခွဲဝေမှု အတွက် ပိုမို ဖြစ်နိုင်ပါသည်။ ထိုအခါ သယံဇာတခွဲဝေမှု၊ အာဏာခွဲဝေမှုတုိ့နှင့်ပတ်သက်လာသောအခါ အလွယ်တကူ အဖြေရှာရန်ခက်ခဲလာနိုင်ပါသည်။ အဘယ်ကြောင့်ဆိုသော် ထိုအဝေမတည့်မှုများအားလုံးကို ဖြေရှင်းကြသည့်နည်းမှာ နိုင်သူအားလုံးစားကြေး ဖြစ်သောကြောင့်ဖြစ်သည်။ တရုတ်နှင့် နယ်စပ်ကုန်သွယ်ရေးလိုင်းများ၊ ကေအိုင်အေ ထိန်းချုပ်နယ်မြေများကို ရယူရန်နီးစပ်နေပြီဖြစ်သော မြန်မာစစ်တပ်အနေဖြင့် အလွယ်တကူ လက်လျှော့ရန် သိပ်တော့မမြင်မိပါ။ အဘယ်ကြောင့်ဆိုသော် မြေပုံတွင်ထောက်ကြည့်ပါက လိုင်ဇာနောက်တွင် တရုတ်စည်းရိုးသာ ကျန်ပါတော့သည်။

ကေအိုင်အေဖက်မှလဲ သူ့ရပ်တည်ရေး၏ အသက်သွေးကြောစီးပွားရေးလမ်းကြောင်းများကို မြန်မာစစ်တပ်လက်ထဲသို့အပါခံရန်မဖြစ်နိုင်ပါ။ ထိုသို့ အပါခံလိုက်ရလျှင် ကေအိုင်အေအဖွဲ့ နှစ်များမကြာမှီလုံးပါးပါးရန်သာ ရှိပေမည်။ ထိုအတွက် ကြံ့ကြံ့ခံတိုက်နေခြင်းဟု ယူဆပါသည်။

အထက်ပါ အချက်များကို သုံးသပ်ကြည့်လျှင် အဝေမတည့်သည့် အကျိုးစီးပွားစစ်ပွဲဟု ကောက်ကြောင်းပေါ်လွင်လာပါမည်။

ထိုအကျိုးစီးပွားအဝေမတည့်မှု စစ်ပွဲအတွက် ဒေါ်အောင်ဆန်းစုကြည်ကို ကြားဝင်စေလိုခြင်းကို မည်သို့မြင်ပါသနည်း။ ဒေါ်အောင်ဆန်းစုကြည်မည်ကဲ့သို့ ကြားဝင်ဖြန်ဖြေသင့်ပါနည်း။ ပျက်ပြယ်ခဲ့သော ယခင် တွေ့ဆုံပွဲများအတွင်း အစိုးရနှင့်ကေအိုင်အေ မည်ကဲ့သို့ တောင်းဆိုမှု၊ ညှိနှိုင်းမှုများလုပ်ခဲ့ကြကြောင်း တရားဝင် ထုတ်ဖော်ကာ ဒေါ်အောင်ဆန်းစုကြည်ထံ အကြောင်းကြားပြီးပါပြီလား။ ဒေါ်အောင်ဆန်းစုကြည်နှင့် ၈၈ ကျောင်းသားများကို ဖြန်ဖြေရေးကိုယ်စားလှယ်များအဖြစ် အစိုးရနှင့် ကေအိုင်အေမှ ဗိုလ်ချုပ်များက ကမ်းလှမ်းခဲ့ဖူးပါသလား။

စစ်သားသည် စစ်သားချင်းသာ စကားပြောလိုသည့် သဘာဝရှိတတ်သည်။ ကေအိုင်အေမှ ဦးလနန်နှင့် ဗိုလ်ချုပ်ဂွမ်မော်တို့စကားထဲတွင် ဗိုလ်ချုပ်မင်းအောင်လှိုင်၏ အမည်သည် ဒေါ်အောင်ဆန်းစုကြည်၏ အမည်ထက် အကြိမ်အရေအတွက် ပိုများထင်သည်။ သူတို့ ဆွေးနွေးလိုသည်မှာ ဦးသိန်းစိန်ထက် တစ်ကယ့် Military Power ကို ထိန်းချုပ်ထားသော ကာကွယ်ရေးဦးစီးချုပ် မင်းအောင်လှိုင်သာ ဖြစ်သည်။

မင်းအောင်လှိုင်နှင့်ညှိ၍ ပြီးမှသာ ကိစ္စပြတ်မည်ဟု ယုံကြည်ကြပုံပေါ်သည်။ တစ်ကယ်လဲ ထိုသို့ဖြစ်နိုင်ပါသည်။ ထိုအခါ ဒေါ်အောင်ဆန်းစုကြည်နှင့် ၈၈ တို့ ကို မည်သို့ ပါစေချင်ပါသနည်း။ ဒေါ်အောင်ဆန်းစုကြည် ကမ်းလှမ်းမှုကို မင်းအောင်လှိုင် ဘယ်နှကြိမ်လက်ခံထားပါသနည်း။ တွေးကြည့်ကြစေချင်သည်။

ယခု အနေအထားသည် ဒေါ်စုနှင့် ၈၈ တို့အနေဖြင့် မြေစမ်းခရမ်းပျိုးကာလဖြစ်သည်။ တိုက်ပွဲတစ်ပွဲကို တိုက်ရာတွင် ဗဟိုကို "ဒဲ့"တိုက်ရသည်လဲ ရှိသည်။ အင်အားမတောင့်သေးစဉ် ဗဟိုကို ဒဲ့ မသိမ်းနိုင်သေးပါက မင်းစန္ဒဂုတ်တိုင်းပြည်သိမ်းသကဲ့သို့ တစ်စ၊ တစ်စ နယ်မြေအသေးများကို လိုက်သိမ်းရသည့် ဗျူဟာလဲရှိပါသေးသည်။

ကိစ္စတစ်ခုကို လှေနံဒါးထစ်အမြင်ဖြင့်ချဉ်းကပ်ခြင်းသည် အကျအဆုံးများကိုဖြစ်စေတတ်သည်။ တိုက်ပွဲအပေါ် အရှင်သဘောဖြင့်ချဉ်းကပ်ကာ အချိန်ကိုက် ဆုံးဖြတ်ချက်ကောင်းများ ချမှတ်နိုင်ခြင်းသည် ခေါင်းဆောင်ကောင်းဖြစ်သည်။ ဆုံးဖြတ်ချက်ပြောင်းလဲကာ ချဉ်းကပ်မှုပြောင်းလဲခြင်းသည် မူဝါဒပြောင်းလဲခြင်းမဟုတ်။ ယခု ဒေါ်အောင်ဆန်းစုကြည်နှင့် ထို ၈၈ တို့၏ မူဝါဒများပြောင်းလဲသွားပြီဟု တစ်ကယ်ထင်သလား။ ရင်းမြစ်ကို ထွင်းဖောက်ကြည့်မြင်တတ်ဖို့တော့လိုမည်။

တစ်ချိန်တုန်းက လက်တွဲခဲ့သော ရဲဘော်ဟောင်းများဖြစ်ကြပြီး ယခုအချိန်အထိ ထိုသူတို့၏ ရင်တွင်းမှ ယုံကြည်ချက်နှင့် ကိုင်စွဲသော မူဝါဒများကို မမြင်နိုင်သေးသည်ဟု ဆိုလျှင်တော့ စိတ်မကောင်းဖွယ်ရာပင်ဖြစ်ပေမည်။

Share