*** သဘာဝ နှင့် ဆန္ဒ ***
Author: lubo601 |
5:58 PM |
No မှတ်ချက် |
ကိုယ်စိတ်နွမ်း၍
အိပ်တန်းပြန်ဝင် ၊ နားလိုက်ချင်၏။
မြေပြင်ပေါ် ရပ် ၊ ခြေစုံ မတ်ဖို့
နတ်တို့ မကူ ၊ လူက မစွမ်း
လောကီဝန်းကျင် ၊ လူရာဝင်ဖို့
နေစဉ်လှုပ်ရှား ၊ လူ မနားလည်း
နေစား ခက်ဆဲ ၊ လိုအပ်မြဲပင်။
သဲထဲ ရေလောင်း ၊ နေ့ပေါင်းများစွာ
နောက်မှာကျန်ရစ် ၊ ပြန် မဖြစ်လည်း
ထစ်ကနဲဆို ၊ ပြန်လိုချင်မိ။
လူ၏သဘော ၊ ရှေ့သို့လော၍
နောက်ကျော မလုံ ၊ မနော တုန်လျက်
အစုန်တွင် မျှော ၊ မျော၏ မြောမိ။
ဇောခုနှစ်တန် ၊ သေမိန့်ပြန်မှ
အဆန်ကို ခင် ၊ ဆန်ဖို့ ပြင်၏။
သံစဉ် မပီ ၊ ကြိုး မညီ၍
ဂီတ မချို ၊ ကံနေ ညိုမှ
ဟိုတ သည်တ ၊ ကယ်ကြပါနဲ့
လာခဲ့တဲ့လမ်း ၊ ကိုယ့်အိပ်တန်းသို့
ဝမ်းနည်း နောင်တ ၊ မျက်ရည်ကျလျက်
ပြန်ကြ ပြန်ရ ၊ ထွက်ခွာကြ၏။
ဘဝက တို ၊ လူက အိုပြီ
လိုချင်သရွေ့ ၊ ရှာဖွေဖြည့်လည်း
မပြည့် လိုမြဲ ၊ ဒုက္ခထဲ၌
ဝဲလည်နစ်မြုပ် ၊ အကျွန်ုပ်သည်
ရုပ်ကလည်း နွမ်း ၊ စိတ်ပင်ပန်းလို့
အိပ်တန်းပြန်ဝင် ၊ နားလိုက်ချင်၏။
မြေပြင်ပေါ်ရပ် ၊ ခြေစုံ မတ်ဖို့
နတ်က မကူ ၊ ကံ မထူနဲ့
လူရဲ့ဒုက္ခ ကြီးပေစွ။ ။
ကျော်မိုး ( စကားဝါမြေ )
၂၀၊၇၊၂၀၁၃(စနေနေ့)
Artist-Sam Origine
- ပြန်လည်မျှဝေပါ
- Facebookသို့
- Twitterသို့
- Google+သို့
- Stumbleသို့
- Diggသို့
0 comments:
Post a Comment