19.12.2012 နေ့ဖတ်ရန်သတင်းများ

by Myanmar Journal on Tuesday, December 18, 2012 at 5:18pm ·

ရဟန်းပျိုအဖွဲ့ ဆန္ဒပြပွဲ ရပ်ဆိုင်းကြောင်းကြညာ

လက်ပံတောင်းတောင်အရေး ရန်ကုန်သံဃာတော်များဆန္ဒပြပွဲ

လက်ပံတောင်းတောင် သပိတ်စခန်းတွေကို အင်အားသုံး ဖြိုခွင်းခဲ့တဲ့အပေါ် ဆန္ဒပြ တောင်းဆိုခဲ့ကြတဲ့ သံဃာတော်တွေက ဆန္ဒပြပွဲတွေကို ခေတ္တရပ်ဆိုင်းထားမယ်လို့ ပြောလိုက်ပါတယ်။ ဒါပေမဲ့လည်း စီမံကိန်းအနီးမှာ သပိတ်စခန်းတခု ပြန်ဖွင့်ပြီးတော့ ဆန္ဒပြနေကြတဲ့ သံဃာတော်တွေနဲ့ ဒေသခံတွေ ကတော့ သပိတ်စခန်းကို ဖျက်သိမ်းအုံးမှာ မဟုတ်ဘဲ ဆက်ပြီးတော့ ဆန္ဒပြသွားမယ်လို့ ပြောပါတယ်။

ဒီအခြေအနေတွေ အပြည့်အစုံကိုတော့ ရန်ကုန်အခြေစိုက် ဗီအိုအေ သတင်းထောက် ကိုအောင်ရဲမောင်မောင်က တင်ပြပေးထားပါတယ်။

စစ်ကိုင်းတိုင်းဒေသကြီး၊ မုံရွာခရိုင်၊ ဆားလင်းကြီးဒေသ လက်ပံတောင်တောင်သပိတ်စခန်းက စီမံ ကိန်း ရပ်ဆိုင်းပေးရေး ဆန္ဒဖော်ထုတ်နေတဲ့ သဃာတော်တွေကို အာဏာပိုင်တွေက အင်အားသုံး အကြမ်းဖက် ဖြိုခွင်းခဲ့တဲ့အတွက် ဆန္ဒထုတ်ဖော်မှုတွေ ပြုလုပ်နေတဲ့ ဗုဒ္ဓသာဝက ရဟန်းပျိုများ အဖွဲ့က သူတို့ရဲ့ ဆန္ဒ ထုတ်ဖော်မှုတွေကို ခေတ္တ ရပ်ဆိုင်းထားမှာဖြစ်တယ်လို့ ဒီကနေ့ သတင်းစာရှင်းလင်းပွဲ မှာ ပြောလိုက်တာပါ။

ပြည်ထောင်စု အစိုးရ အာဏာပိုင်တွေက ဒဏ်ရာရ သံဃာတွေကို ၀င်ချတောင်းပန်ခဲ့လို့ သံဃာထု အနေနဲ့ ကျေနပ်မှု တစ်စုံတစ်ရာရခဲ့ပြီး ဆန္ဒထုတ်ဖော်နေတာတွေကို ခေတ္တ ရပ်ဆိုင်းထားမယ်လို့ ဗုဒ္ဓ္ဓသာဝက ရဟန်းပျိုများအဖွဲ့က ဦးဆောင်ဆရာတော် ဦးအဂ္ဂသီရိက အခုလို မိန့်ပါတယ်။

“အခြေအနေပေါ်မူတည်ပြီးတော့ ခေတ္တနားထားမှာပေါ့လေ။ အကြမ်းဖက်မှုနဲ့ ပတ်သက်တဲ့ ပုဂ္ဂိုလ်တွေ ကို ဖော်ထုတ် အရေးယူပေးရေးပေါ့လေ၊ နံပါတ်နှစ်အချက်ကတော့ လက်ပံတောင်းတောင် အကြမ်း ဖက်မှုနဲ့ ပတ်သက်၍ သံဃာ့ဆန္ဒဖော်ထုတ်ရာတွင် ဝိုင်းရံကူညီမှုကြောင့် ဖမ်းဆီးခံထားရသော ပုဂ္ဂိုလ် များကို အမြန်ဆုံး ချွင်းချက်မရှိ ပြန်လွှတ်ပေးရေး-ပေါ့။ နံပါတ်သုံးအချက်ကတော့ ဒေါ်အောင်ဆန်း စုကြည်တို့ ဖွဲ့စည်းထားတဲ့ စုံစမ်းစစ်ဆေးရေး ကော်မတီ ကို စောင့်ကြည့် သွားမယ်ဆိုတာ သတင်းစာ ရှင်းလင်းပွဲ ပြုလုပ်ခြင်းဖြင့် ကြေညာချက် ထုတ်ပြန်ခဲ့တာပါ။”

သပိတ်စခန်းတွေ ဖြိုခွင်းမှုအတွင်း သံဃာတော်တွေကို အင်အားသုံး ဦးဆောင်ခဲ့တဲ့ ပုဂ္ဂိုလ်တွေ ကို ဖော်ထုတ် အရေးယူပေးရေးနဲ့ ဒဏ်ရာရခဲ့တဲ့ သံဃာတော်တွေကို နိုင်ငံတော်အဆင့်က ပြန် လည်တောင်းပန်ပေးရေးတွေကို ဗုဒ္ဓသာဝကရဟန်းပျိုများ အဖွဲ့က ဒီဇင်ဘာ ၈ ရက်နဲ့ ၁၂ ရက်နေ့တွေမှာ ရန်ကုန်မြို့မှာ ဆန္ဒထုတ်ဖော် တောင်းဆိုခဲ့ကြတာ ဖြစ်ပါတယ်။လောလောဆယ် ရန်ကုန်မှာ ဆန္ဒဖော်ထုတ်မှုတွေ ခေတ္တ ရပ်ဆိုင်းထားမှာဖြစ်ပေမဲ့ သံဃာတော်တွေ ကို အကြမ်းဖက်နှိမ်နှင်းစဉ်မှာ ကျူးလွန်ခဲ့တဲ့ တရားခံကိုတော့ ဖော်ထုတ်ပေးဖို့ ဒီကနေ့ ပြု လုပ်တဲ့ သတင်းစာရှင်းလင်းပွဲ သဘောထားထုတ်ပြန်ချက်မှာ ထည့်သွင်း တောင်း ဆိုထားပါတယ်။

ဒါ့အပြင် လက်ပံတောင်းတောင် စုံစမ်းစစ်ဆေးရေးကော်မရှင် ဥက္ကဋ္ဌ ဒေါ်အောင်ဆန်းစုကြည်တို့ အနေနဲ့လည်း လက်ပံတောင်းတောင်ကိစ္စမှာ ဘယ်လောက် ဆောင်ရွက်ပေးနိုင်မလဲ ဆိုတာကိုလည်း စောင့်ကြည့်နေမှာ ဖြစ်တယ်လို့ ဦးဆောင်ဆရာတော် ဦးအဂ္ဂသီရိက အခုလို မိန့်ပါတယ်။

“အခုလုပ်ဆောင်နေကြတဲ့ ဥပဒေတွေကို ကြည့်မယ်ဆိုရင် တည်ငြိမ်အေးချမ်းရေးနဲ့ တရားဥပဒေ စိုးမိုးရေးလို့ ကြွေးကြော်ထားတဲ့အတိုင်း တကယ်ပဲ စုံစမ်းစစ်ဆေးရေး ကော်မတီအနေနဲ့ တည်ငြိမ်အေးချမ်းရေးနဲ့ တရားဥပဒေ စိုးမိုးရေးကို အထူး အရင်ဆုံးပြုလုပ်ရင် ပိုကောင်းလိမ့်မယ်လို့ ဦးဇင်းတို့က အကြံပေးချင်ပါတယ်။”

အခုလို ဆန္ဒထုတ်ဖော်မှုတွေကို ခေတ္တရပ်ဆိုင်းလိုက်တာဟာ သီတဂူ ဆရာတော်တို့လို ဆရာတော်ကြီးတွေက သံဃာတော်တွေ ဆန္ဒပြတာ ခေတ္တရပ်ဆိုင်းထားဖို့ လိုနေပြီဆိုတဲ့ မိန့်ကြားချက်တွေကို လိုက်နာတဲ့ အနေနဲ့ ခေတ္တ ရပ်ဆိုင်းထားတာလည်း ဖြစ်တယ်လို့ ဦးဆောင် သံဃာအချို့က ပြောပါတယ်။

အာဏာပိုင်တွေဘက်က မကြာခဏဆိုသလို ဆန္ဒပြမှုတွေမှာ နောက်ကွယ်က ကြိုးကိုင်မှုတွေ ရှိနေတယ်ဆိုပြီး ပြောဆိုချက်တွေအပေါ် သံဃာတော်တွေအနေနဲ့ ဘယ်လို တုံ့ပြန်ချင်ပါသလဲဆိုတဲ့ ဗွီအိုအေ မြန်မာပိုင်းရဲ့ မေးမြန်းချက်ကို သတင်းစာရှင်းလင်းပွဲမှာ တက်ရောက်လာတဲ့ ဆရာတော် တစ်ပါးက အခုလို ပြန်လည် မိန့်ကြားခဲ့ပါတယ်။

“အသက် ၁၈ နှစ် မပြည့်သေးတဲ့ သံဃာက ရှားပါတယ်။ အများစုက အသက် ၁၈ နှစ်အထက်မှာပဲ ရှိပါတယ်။ ကလေးကလားမဟုတ်ဘူး။ အားလုံးက ဦးနှောက်ကိုယ်စီနဲ့၊ အဲဒီတော့ အဲဒီ- သွေးထိုးလှုံ့ဆော်မှု ဆိုတဲ့ စကားဟာ သူတို့ရဲ့ ပရိယာယ်သုံးတဲ့စကား၊ မတရားစွပ်စွဲတဲ့ စကားပဲဖြစ်တယ်၊ ဦးဇင်းကတော့ ဒီလိုပဲမြင်တယ်။”

လက်ပံတောင်းအနီးက ကံကုန်းကျေးရွာမှာ လက်ပံတောင်းစီမံကိန်း ရပ်ဆိုင်းထားပေးရေး သပိတ်စခန်း တစ်ခုကို ဒေသခံ ပြည်သူတွေနဲ့ အဲဒီ အနီးအနားက သံဃာတော်တွေ ဦးစီးပြီး ဖွင့်လှစ်ထားပါသေးတယ်။

အဲဒီ သပိတ်စခန်းကိုတော့ ရပ်ဆိုင်းထားဖို့ အစီအစဉ်မရှိဘဲ ဆက်လက် ဖွင့်ထားမှာဖြစ်ပြီး အခုလို သပိတ်စခန်း ပြန်ဖွင့်ရတာဟာ ကြေးစင်တောင်နဲ့ စံပယ်တောင်အနီးမှာ ကြေးနီတူးဖော်ရေး လုပ်ငန်းတွေကို ၀မ်ပေါင် ကုမ္ပဏီက ပြန်လုပ်နေတာကြောင့်လို့ သပိတ်စခန်းက ဆရာတော် ဦးအာလောက-က ဗွီအိုအေကို အခုလို မိန့်ကြားခဲ့ပါတယ်။

“ဦးဇင်းတို့ တောက်လျှောက်ဖွင့်ထားမှာလား ဆိုတာက- သူတို့ဘက်က ဦးပိုင်လူကြီး၊ ဝမ်ပေါင်ကုမ္ပဏီတွေက သူတို့ရဲ့ဆိုတ်အတွင်းတွေမှာ လုပ်ငန်းတွေဆက်ပြီးလုပ်နေတယ်၊ မိုင်းခွဲတာတွေလည်း စံပယ်တောင်၊ ကြေးစင်တောင်ဘက်မှာလည်း လုပ်နေတယ်၊ ယန္တရားကြီးတွေ လည်ပတ်မှုတွေ လုပ်နေတဲ့အတွက်ကြောင့် မို့လို့ ဦးဇင်းတို့ သပိတ်စခန်းကို ဆက်ဖွင့်ထားမယ်။”

အခုလို ဒေသခံ သံဃာတော်တွေနဲ့ ဒေသခံ ပြည်သူတွေက အခုလို သပိတ်စခန်းတွေ ပြန်ဖွင့်လှစ်ထား တာဟာ လိုအပ်ချက်ကြောင့် လုပ်ဆောင်တာလို့ ရှုမြင်ပြီးတော့ ထောက်ခံအားပေးပါတယ်လို့လည်း ဗုဒ္ဓသာဝက ရဟန်းပျိုများအဖွဲ့က ဦးဆောင်ဆရာတော် ဦးအဂ္ဂသီရိက မိန့်ပါတယ်။ လက်ပံတောင်းအရေးကြောင့် အဖမ်းခံနေရတဲ့ သူတွေ အမြန်ဆုံး ပြန်လွှတ်ပေးရေးကိုလည်း ဒီကနေ့ သတင်းစာရှင်းလင်းပွဲမှာ သံဃာတော်တွေက တောင်းဆိုခဲ့ပါသေးတယ်ခင်ဗျား။

အမေရိကန် ဘဏ္ဍာရေး ပြဿနာ သမ္မတနဲ့ အတိုက်အခံတွေ ဆွေးနွေး

သမ္မတအိုဘားမား အလုပ်အကိုင် ဥပဒေ အထက်လွှတ်တော်ပယ်ချ

အမေရိကန်နိုင်ငံမှာ ၂၀၁၂ ခုနှစ်အကုန် အပြီးသတ်ဆောင်ရွက်ရမယ့် အစိုးရရဲ့ အသုံးစရိတ်လျှော့ချဖို့နဲ့ အခွန်ငွေတိုးကောက်ဖို့ ကိစ္စတွေကို နိုင်ငံ့ခေါင်းဆောင်တွေ ညှိနှိုင်းကြရာမှာ သဘောတူညီမှုရဖို့ နီိးစပ်လာပြီလို့ သိရပါတယ်။

ညှိနှိုင်းဆွေးနွေးမှုတွေလုပ်ဖို့ အကြီးအကျယ်လိုအပ်နေသေးပေမဲ့ အခြေခံသဘောတူ ညှိနှိုင်းချက်တစ်ခု လာမယ့်သီတင်းပတ်ထဲမှာ ရနိုင်ခြေရှိနေပါတယ်။ တကယ်လို့ အမေရိကန်သမ္မတအိုဘားမားနဲ့ ရီပတ်ဘလီကင် အတိုက်အခံတွေအနေနဲ့ ကွန်ဂရက်စ် လွှတ်တော်မှာ အသေးစိတ်အချက်တွေ ဆက်ပြီးတော့ ဆွေးနွေး ဆောင်ရွက်ဖို့ ရှိနေမယ် ဆိုရင်တောင် သဘောတူညီချက် မူကြမ်းတစ်ရပ်ကို အင်္ဂါနေ့မှာ ချမှတ်နိုင်မယ်လို့ မျှော်လင့် ရပါတယ်။

အမေရိကန်သမ္မတ ဘာရတ်ခ်၊ အိုဘားမား ပြန်အရွေးခံရဖို့အတွက် ကျင်းပခဲ့တဲ့ မဲဆွယ်ပွဲ တလျှောက်မှာ တနှစ်ကို ဒေါ်လာ ဝင်ငွေ ၂ သိန်းခွဲအထိရှိတဲ့ ကြွယ်ဝတဲ့ အိမ်ထောင်စုတွေကို အခွန်တိုးကောက်ဖို့ အမေရိကန် သမ္မတက တောင်းဆိုနေခဲ့တာ ဖြစ်ပါတယ်။ ဒါပေမဲ့ အခုတော့ ဒီမိုကရက်ပါတီဝင် သမ္မတအိုဘားမားက တနှစ်ကို ဝင်ငွေ ၄ သိန်းအထိ ရှိတဲ့ အိမ်ထောင်စုတွေကိုပါ အခွန်တိုးမကောက်ဘဲနေဖို့ သဘောတူမယ်လို့ ပြောဆိုပါတယ်။

ရီပတ်ဘလီကင်ပါတီဝင် အများစု လွှမ်းမိုးထားတဲ့ အောက်လွှတ်တော်ဥက္ကဋ္ဌ ဂျွန်ဘိန်နာ (John Boehner) ကတော့ တစ်နှစ် ဝင်ငွေတစ်သန်းရှိတဲ့ အမေရိကန်အိမ်ထောင်စုတွေကိုပါ အခွန်တိုးမကောက်ဘဲ ကင်းလွတ်ခွင့် ပေးချင်တယ်လို့ တောင်းဆို ညှိနှိုင်းနေတာ ဖြစ်ပါ တယ်။ အောက်လွှတ်တော် ဥက္ကဋ္ဌ ဂျွန်ဘိန်နာရဲ့တောင်းဆိုမှုနဲ့ ပတ်သက်လို့ အောက် လွှတ်တော်က အတည်ပြုခဲ့ရင်တောင်မှ အထက်လွှတ်တော်က ပယ်ချမှာဖြစ်တယ်လို့ ဒီမိုကရက်တစ်ပါတီဝင်တွေ သြဇာလွှမ်းမိုးတဲ့ အထက်လွှတ်တော်ရဲ့ခေါင်းဆောင် ဟယ်ရီ ရိဒ် (Harry Reid) က တုံ့ပြန်ပြောဆိုပါတယ်။

ရီပတ်ဘလီကင်ပါတီဝင်တွေ တောင်းဆိုတဲ့ အငြိမ်းစား အစိုးရဝန်ထမ်းတွေရဲ့ ပင်စင် စရိတ် ဖြတ်တောက် လျှော့ချဖို့အတွက် လစာနှစ်တိုး တွက်ချက်တဲ့နေရာမှာ ပြင်ဆင်မှု လုပ်ပေးတဲ့နည်းနဲ့ ဆောင်ရွက်ဖို့ သမ္မတက သဘောတူတယ်လို့ သိရပါတယ်။ လာမယ့် ဆယ်စုနှစ်ထဲမှာ အခွန်တိုးကောက်မယ့် ပမာဏကိုလည်း ၁.၄ တြီလီယံအစား ၁.၂ တြီလီယံ အထိ လျှော့ပေးပြီးတော့ သမ္မတက ညှိနှိုင်းခဲ့ပါတယ်။

မီးလောင်ဒဏ်ရာရ သံဃာတော် ဘန်ကောက်မှာ ဆေးကုသမှုခံယူနေ

 

လက်ပံတောင်းတောင် သပိတ် ဖြိုခွဲခံရမှုမှာ အဆိုးဆုံး မီးလောင်ဒဏ်ရာရခဲ့တဲ့ ဆရာတော် ဦးတိက္ခ ဉာဏရဲ့ မီးလောင်ဒဏ်ရာတွေဟာ ပြင်းထန်ပြီး တချို့နေရာတွေမှာ အရေပြားအစားထိုး ကုသမှု လိုအပ်နေ ပါတယ်။ ထိုင်းနိုင်ငံ၊ ဘန်ကောက်ဆေးရုံမှာ ဆေးကုသဖို့ မြန်မာနိုင်ငံကနေ ရောက် လာချိန်မှာ ကူးစက်ပိုး ပါလာတဲ့အတွက် လောလောဆယ် ပိုးသတ်ကုသမှုကို နေ့စဉ်ခံယူနေရတယ်လို့ မိသားစုက ပြောပါတယ်။ ဆရာတော် ဦးတိက္ခဉာဏ ဘန်ကောက်ဆေးရုံမှာ ကုသမှုယူနေတဲ့ အခြေအနေကို စုံစမ်းထားတဲ့ ဘန်ကောက်ရုံးက မစုမြတ်မွန်က တင်ပြပါမယ်။

ဆရာတော် ဦးတိက္ခဉာဏရဲ့ မီးလောင်ဒဏ်ရာရထားတဲ့ တချို့နေရာတွေဟာ အရေပြား အပေါ်အလွှာ နဲ့ အောက်က ကပ်လျှက်အလွှာတခုလုံး ပျက်စီးသွားတဲ့ Third Degree Burn အဆင့် (၃) အထိ ပြင်း ထန်တဲ့ အတွက် အရေပြား အစားထိုးကုသမှုခံရမဲ့ အခြေအနေဖြစ်တယ်လို့ သားဖြစ်သူ ဒေါက်တာနေ သူရိန်က ဗွီအိုအေ မြန်မာပိုင်းကို ပြောပါတယ်။

"သူ့မှာက ဆီးချိုရောဂါလည်း ရှိနေတယ်။ မီးလောင်တဲ့ ရာခိုင်နှုန်းကလည်း ၄၀ % ကနေ ၅၀ % ကြားထဲမှာ လောင်သွားတယ်လို့ ပြောတယ်။ မီးလောင်တဲ့အဆင့်ကလည်း အဆင့် (၂)၊ အဆင့် (၃) တွေ ပေါ့နော်- ရောနေတယ်ပါတယ်။ အဆင့်သုံးမှာ လောင်ထားတဲ့နေရာတွေကတော့ နည်းနည်း စိုးရိမ်စရာ အနေအထားမှာ ရှိပါတယ်။ အဲဒီအခြေအနေက အရေပြား အစားမထိုးလို့ မရဘူးလို့ ပြောပါတယ်။ အဆင့်သုံး ထိထားတဲ့ နေရာတွေ ကျတော့"

ပြီးခဲ့တဲ့ ကြာသာပတေးနေ့၊ ဒီဇင်ဘာလ ၁၃ ရက်နေ့မှာ ဆရာတော် ထိုင်းနိုင်ငံကို ရောက်လာပြီး ဘန်ကောက် ဆေးရုံကြီးမှာ တက်ရောက် ကုသမှုခံယူနေတာဖြစ်ပါတယ်။

"ဘုန်းဘုန်းကြီးက ဗမာနိုင်ငံကနေ ရောက်ကာစမှာက infection ဝင်နေတော့ သူ့အနာတွေ အကုန်လုံးကိုလေ ပြန်ပြီးတော့ ခြစ်ချပစ်ရတာပေါ့။ ပထမဆုံးရက်က ခွဲခန်းထဲမှာ နေ့စဉ် နေ့စဉ်ပေါ့ -မေ့ဆေးပေးပြီးတော့ ခြစ်ချရတယ်။ မနေ့ကတော့ နားတယ်၊ ဒီနေ့မနက်မှာ တခါပြန်ခြစ်တယ်။ တကိုယ်လုံးက ရှိတဲ့အနာတွေအားလုံးကို ပြန်ခြစ်ပစ်ရတာ။ အဲဒီအတိုင်းကို ဆယ်ရက်၊ နှစ်ပတ်လောက် စောင့်ကြည့်မှာပေါ့နော်။ စောင့်ကြည့်ပြီးမှ အရေပြားကို အစားထိုးမယ်လို့ ပြောပါတယ်။ အစားထိုးပြီးတော့မှ ပြန်စောင့်ကြည့်ရမှာပေါ့။ နှစ်လပတ်ဝန်းကျင် - နှစ်လနဲ့ နှစ်လအထက် ကြာမယ်လို့ သူတို့က ခန့်မှန်းထားတယ် ခင်ဗျ။"

သက်တော် ၆၄ နှစ်ရှိပြီဖြစ်တဲ့ ဆရာတော်အနေနဲ့ မေ့ဆေးနဲ့ ကုသမှုယူနေရတဲ့အတွက် ပင်ပန်း နာကျင်နေပေမဲ့ အစားအသောက် ဘုန်းပေးနိုင်တဲ့ အခြေအနေရှိပါတယ်လို့ သမီးဖြစ်သူ မနေသန္တာခိုင်ကလည်း ပြောပါတယ်။

"အခုကတော့ ဘုန်းဘုန်းကြီးက operation တောက်လျှောက်ဖြစ်နေတဲ့အနေအထားမှာ သူ့ရဲ့ side effect (ဆေးကုသစဉ် ဆေးဒဏ်ကို တုံ့ပြန်ခံစားမှုဝေဒနာ) က ခန္ဓာကိုယ်မှာ အရမ်းပူတယ် ပြော တယ်။ ခန္ဓာကိုယ် အရမ်းပူတယ်၊ သူ နာတယ်ပေါ့နော်။ ဘုန်းဘုန်းကြီးကတော့ အစားလည်း အတတ်နိုင်ဆုံး သူ ဝင်အောင် စားတယ်။ ဆေးရုံက ကျွေးတဲ့အစားအစာတွေကလည်း ကောင်း ပါတယ်။ သေသေချာချာကို စီမံပြီးတော့မှ ကျွေးတာပေါ့နော်။ အဲဒါတွေလည်း သူစားနိုင်ပါတယ်။"

သားနေသူရိန်၊ "ပင်ပန်းတာပေါ့။ နေ့တိုင်း ဒီအနာတွေ အားလုံးကို ခြစ်ချတယ်ဆိုတဲ့ ဒဏ်ကလေ- တော်တော်ကြီးကို ပင်ပန်းပါတယ်။ ဘုန်းဘုန်းကြီးဆိုရင် တော်တော် စိတ်ဓာတ်မာတဲ့သူကို စကားကို ကောင်းကောင်း မပြောနိုင်တော့ဘူး။"

လောလောဆယ် အနာကတဆင့် ဝင်တဲ့ပိုးကိုသတ်နေတဲ့အတွက် ဆရာတော် ဦးတိက္ခဉာဏကို ICU အထူး စောင့်ရှောက်ခန်းမှာထားပြီး အပြင်ဧည့်သည်အလာ ကန့်သတ်ထားတယ်လို့ မိသားစုက ပြော ပါတယ်။ မိသားစုရဲ့ ပြောပြချက်အရ ထိုင်းနိုင်ငံဆိုင်ရာ မြန်မာသံအမတ်ကြီး ဦးတင်ဝင်းအပြင် သံရုံး တာဝန်ရှိသူတွေ လည်း လာရောက် သတင်းမေးကြပါတယ်။ ဆရာတော်ကို ဘန်ကောက်ဆေးရုံ မှာ ဆေးကုသစရိတ်အတွက်တော့ လက်ပံတောင်းကြေးနီ စုံစမ်းရေးကော်မရှင်က လက်ရှိ တာဝန် ယူပေးထားပေမဲ့ ရေရှည်ကုသမယ့် ကုန်ကျစရိတ်အတွက်ကိုတော့ အတိအကျ မပြောနိုင်သေးဘူးလို့ ကိုနေသူရိန်က ပြောပါတယ်။

"ဆေးရုံကုသစရိတ်တွေနဲ့ ပတ်သက်ပြီး စုံစမ်းရေးကော်မရှင်က အားလုံးတာဝန်ယူပေးပါမယ် လို့ ပြောထားပါတယ်။ တာဝန်ယူပေးထားမယ့်အတွက် သူတို့က ဆေးရုံကြီးကို ဘတ် တစ်သန်း အရင် စရန် သွင်းပေးထားပါတယ်။ ဒါပေမဲ့ နှစ်လကျော် ရေရှည်ကျတော့ စုံစမ်းရေးကော်မရှင်အနေနဲ့ တာဝန်ယူပေးမလားဆိုတာလဲ... တာဝန်ယူပေးရင်တော့ ကောင်းတာပေါ့ဗျာ။ အဲလိုကိစ္စကိုလည်း မျှော်လင့်နေပါတယ်။

လေယာဉ်စရိတ်အတွက် ဒေါ်လာ ၃ ထောင့် ၅ ရာကိုလည်း စုံစမ်းရေးကော်မရှင်က ကူညီတယ်လို့ ဆိုပါတယ်။ မုံရွာခရိုင်ထဲက လက်ပံတောင်း ကြေးနီစီမံကိန်းရပ်ဖို့ တောင်းဆို သပိတ်မှောက်နေတဲ့ သပိတ်စခန်းတွေကို နိုဝင်ဘာလ ၂၉ ရက်နေ့၊ မနက်လင်းအားကြီးအချိန်မှာ ရဲတပ်ဖွဲ့က အင်အားသုံး ဖြိုခွင်းခဲ့လို့ သံဃာအပါး ၁၀၀ ကျော်နဲ့ လူတချို့ မီးလောင်ဒဏ်ရာတွေ ရရှိခဲ့ကြပါတယ်။ အဲဒီထဲမှာ ဆရာတော် ဦးတိက္ခဉာဏရဲ့ မီးလောင် ဒဏ်ရာတွေဟာ အင်မတန်ပြင်းထန်တဲ့အတွက် မိသားစုက ထိုင်းနိုင်ငံမှာ ဆေးကုသဖို့ ဆုံးဖြတ်ခဲ့တာ ဖြစ်ပါတယ်ရှင်။

သေနတ်ပစ်မှုဖြစ်တဲ့ မြို့မှာ ကျောင်းတွေပြန်ဖွင့်

ပစ်ခတ်မှုအတွင်း သေဆုံးခဲ့တဲ့ ၆ နှစ်ကနေ ၁၀ နှစ်အတွင်း ကလေးငယ်တွေအတွက် လွမ်းသူ့ပန်းခွေနှင့် ပန်းခြင်းများ အမှတ်တရ ပို့ဆောင်ထားပုံ။

အမေရိကန်နိုင်ငံမှာ မူလတန်းကျောင်းတကျောင်းအတွင်း ပစ်ခတ်မှုဖြစ်ပွားပြီး ကလေးငယ် ၂၀ နဲ့ လူကြီး ၆ ဦး သေဆုံးခဲ့ရပြီးတဲ့နောက် အမေရိကန်ပြည်ထောင်စု ကော်နက်တိကက်ပြည်နယ် နယူးတောင်းမြို့မှာ ပိတ်ထားခဲ့တဲ့ စာသင်ကျောင်းတွေကို ဒေသစံတော်ချိန် အင်္ဂါနေ့မှာ ပြန်လည်ဖွင့်လှစ်မှာ ဖြစ်ပါတယ်။

အဲဒီ သောကြာနေ့ကဖြစ်ခဲ့တဲ့ ပစ်ခတ်မှုဟာ အမေရိကန်နိုင်ငံသမိုင်းမှာ စာသင်ကျောင်း တကျောင်းအတွင်း ဖြစ်ပွားခဲ့တဲ့ အဆိုးရွားဆုံးပစ်ခတ်မှုဖြစ်ပါတယ်။ အခင်းဖြစ်ခဲ့တဲ့ Sandy Hook မူလတန်းကျောင်းမှအပ New Town မြို့မှာရှိတဲ့ ကျန်တဲ့ ကျောင်းတွေအားလုံး ပြန်ဖွင့် အင်္ဂါနေ့မှာ ပြန်ဖွင့်တော့မှာပါ။

ကျောင်းတွေပြန်တက်ကြမဲ့ ကျောင်းသူကျောင်းသားတွေ၊ ဆရာဆရာမတွေ၊ ကျောင်းအုပ်ချုပ်ရေး ၀န်ထမ်းတွေကို ရဲတပ်ဖွဲ့နဲ့ မြို့အုပ်ချုပ်ရေးအဖွဲ့အရာရှိတွေက ၀ိုင်းဝန်းစောင့်ရှောက်ပေးမှာ ဖြစ်တယ်လို့ မြို့အုပ်ချုပ်ရေး တာဝန်ရှိသူတွေက ပြောပါတယ်။

Sandy Hook မူလတန်းကျောင်းက ကျောင်းသူကျောင်းသားတွေကို မြို့ရဲ့အနီးမှာရှိတဲ့ အသုံးမပြုဘဲထားတဲ့ ကျောင်းတကျောင်းကို ပြောင်းပြီးဖွင့်လှစ်ပေးထားဖို့ စီစဉ်နေတယ်လို့ ဆိုပါတယ်။

ပစ်ခတ်မှုကျုးလွန်ခဲ့သူ အသက် ၂၀ အရွယ် သေနတ်သမား Adam Lanza ဟာ သူ့ရဲ့မိခင်ဖြစ်သူကို နေအိမ်မှာ ပစ်သတ်ခဲ့ပြီးနောက် မိခင်ရဲ့သေနတ်တွေကိုယူပြီး ကျောင်းကိုရောက်လာတာဖြစ်ပါတယ်။ ရဲတပ်ဖွဲ့က ၀ိုင်းထားချိန်မှာ သူ့ကိုယ်သူ ပစ်သတ်ပြီး အဆုံးစီရင်လိုက်ပါတယ်။ ခုချိန်ထိ ဘာကြောင့် အခုလို ပစ်ခတ်ရတယ် ဆိုတဲ့ အကြောင်းရင်းကို မသိရသေးဘူးလို့ ရဲအရာရှိတွေက ပြောပါတယ်။

အမေရိကန်သံအမတ်ကြီး ကချင်ပြည်နယ် အခြေအနေသွားလေ့လာ

 

ကချင်စစ်ပြေးဒုက္ခသည်တွေကို ထိရောက်တဲ့ အကူအညီတွေ ပေးအပ်နိုင်ဖို့နဲ့ ငြိမ်းချမ်းရေးမရနိုင်တဲ့ ကချင်ပြည်နယ်တွင်း အခြေအနေတွေကို လေ့လာဖို့ မြန်မာနိုင်ငံဆိုင်ရာ အမေရိကန်သံအမတ်ကြီး ဒဲရက်ခ်မစ်ချဲနဲ့အဖွဲ့ဟာ ပထမဆုံးအကြိမ် ကချင်ပြည်နယ်ကို သွားရောက်ခဲ့ပါတယ်။ နှစ်ရက်ကြာ သွားရောက်တဲ့ သူ့ရဲ့ ကချင်ပြည်နယ်ခရီးစဉ်အတွင်း ဒေသခံအစိုးရအဖွဲ့တာဝန်ရှိသူတွေ၊ စစ်ဘက် ဆိုင်ရာ တာရှိသူတွေအပြင် လူမှုသင်းဖွဲ့တွေနဲ့လည်း တွေ့ဆုံခဲ့သလို စစ်ပြေးဒုက္ခသည် စခန်းတချို့ ကိုလည်း သွားရောက်ခဲ့တာပါ။ ဒီလို သံအမတ်ကြီးနဲ့အဖွဲ့ ကချင်ပြည်နယ်ကို ရောက်နေချိန်မှာပဲ ကချင်ပြည်နယ်တွင်းမှာလည်း တိုက်ပွဲတွေဖြစ်ပွားနေပြီး ဖားကန့်မြို့နယ်တွင်းမှာရှိတဲ့ ရဲစခန်းတခု လည်း တိုက်ခိုက်ခံခဲ့ရတာကြောင့် သေဆုံးမှုတွေ ရှိခဲ့ပါတယ်။ အသေးစိတ်ကိုတော့ ဆက်သွယ်မေးမြန်းထားတဲ့ မနန္ဒာချမ်းက တင်ပြပေးထားပါတယ်။

ပထမဆုံးအကြိမ် ကချင်ပြည်နယ်ကို သွားရောက်တဲ့ မြန်မာနိုင်ငံဆိုင်ရာ အမေရိကန်သံအမတ်ကြီး ဒဲရက်ခ် မစ်ချဲနဲ့အဖွဲ့ဟာ နှစ်ရက်ကြာ ခရီးစဉ်အဖြစ်နဲ့ ဒီဇင်ဘာလ ၁၇ ရက် တနင်္လာနေ့က မြစ်ကြီး နားမြို့ကို ရောက်ရှိခဲ့ပြီး၊ အဲ့ဒီမှာရှိတဲ့ ကချင်ပြည်နယ် အစိုးရအဖွဲ့၊ ကချင် ပြည်နယ်တိုင်းမှူးအပါအ၀င် ကချင်ငြိမ်းချမ်းရေးအကျိုးဆောင်အဖွဲ့နဲ့ ဒုက္ခသည်အရေး ဆောင်ရွက်ပေးနေတဲ့ အဖွဲ့တွေကို သီးခြား စီ တွေ့ဆုံခဲ့ပြီးတော့ လက်ရှိ ကချင်ပြည်နယ်တွင်းက အခြေအနေတွေ၊ မအောင်မမြင်ဖြစ်နေတဲ့ ငြိမ်းချမ်းရေး ဆွေးနွေးပွဲကိစ္စတွေနဲ့ ဒုက္ခသည်အရေး ကိစ္စတွေကို မေးမြန်းဆွေးနွေးခဲ့တာဖြစ်ပါတယ်။ ကချင်ပြည်နယ်အစိုးရအဖွဲ့နဲ့တွေ့ဆုံချိန် မစ္စတာမစ်ချဲအနေနဲ့ ဘာတွေ ပြောဆိုခဲ့သလဲလို့ ကချင်ပြည် နယ်ဝန်ကြီးချုပ် ဦးလဂျွန်ငန်ဆိုင်းကို ဆက်သွယ်မေးမြန်းတဲ့အခါမှာ -

"မစ္စတာမစ်ချဲလ်ဟာ သူ့အနေနဲ့လာတဲ့ ပထမဦးဆုံး ခရီးစဉ်ဖြစ်တယ်၊ လာရောက် လေ့လာတာဖြစ်ပါ တယ်ဆိုပြီးတော့ ဝိုင်းမော်နဲ့ မြစ်ကြီနားစခန်း သုံးလေခုပဲ သူ ကြည့်ပြီးမှ ပြန်သွားပါတယ်။"

အင်္ဂါနေ့ကတော့ မြစ်ကြီးနားနဲ့ ၀ိုင်းမော်မှာရှိတဲ့ ကချင်ဒုက္ခသည်စခန်းတွေက ဒုက္ခသည်တွေ ရဲ့ အခြေ အနေတွေကို ကိုယ်တိုင် သွားရောက် ကြည့်ရှုခဲ့ပြီး သူ့အနေနဲ့ အခုလို လာရောက်တာ ဟာ နယ်စွန် နယ်ဖျားက ဒုက္ခသည်တွေကို ထိရောက်တဲ့ အကူအညီတွေ ပေးနိုင်ဖို့အတွက်ဖြစ်တယ်လို့ ပြော တဲ့အကြောင်း မစ္စတာမစ်ချဲနဲ့ တွေ့ဆုံခဲ့တဲ့ PCG ကချင်ငြိမ်းချမ်းရေး အကျိုးဆောင် အဖွဲ့ဝင် ဦးယပ်ဇောင်ခေါန်းက ပြောပါတယ်။

"အဓိက ကတော့ ဒီ ဒုက္ခသည်စခန်းက တောထဲတောင်ထဲ နယ်စွန်နယ်ဖျား အရပ်ဒေသ မှာ ဖြစ်တဲ့အခါကျတော့ ကားလမ်းလည်း မပေါက်ဘူးဆိုတဲ့အခါကျတော့ ဘယ်လို ဘယ်ပုံ နည်းနဲ့ ရောက်အောင် ပို့ပေးလို့ဖြစ်မလဲ၊ PCG အနေနဲ့ ဘယ်လို ပူးပေါင်းဆောင်ရွက်ပေးနိုင် မလဲ အဲဒါ စစ်ဘေးဒုက္ခသည်က ဘယ်လောက် ရှိသလဲ၊ ထပ်တိုးတာရှိသလားဆိုတော့ ကျနော်တို့လည်း လောလောဆယ် တိုက်ပွဲအခြေအနေအရ တိုးလာတာရှိပါတယ်လို့ ပြောလိုက်ပါတယ်။"

တနှစ်ကျော်ကြာဖြစ်ပွားနေတဲ့ ဒီတိုက်ပွဲတွေကြောင့် ထွက်ပြေးကြရတဲ့ စစ်ပြေးဒုက္ခသည် ဦးရေဟာ အခုဆိုရင် ၁ သိန်းကျော်သွားပြီလို့ ကချင် ဒုက္ခသည်အရေး ဆောင်ရွက်နေတဲ့ အဖွဲ့တွေနဲ့ လူ့အခွင့် အရေးအဖွဲ့တွေက ပြောဆိုကြပါတယ်။ ပြီးခဲ့တဲ့တပတ်ကလည်း KIO ဌာနချုပ်ရှိရာ လိုင်ဇာဘက်မှာ တိုက်ပွဲတွေ အပြင်းအထန် ဖြစ်ပွားခဲ့တာကြောင့် အဲ့ဒီနား ရွာတွေက ဒေသခံတွေ ထပ်မံထွက်ပြေးခဲ့ကြ ရပါတယ်။ ဒီလို ဒေသခံ ပြည်သူတွေ ဒုက္ခရောက်ကြ၊ လူ့အခွင့်အရေး ချိုးဖောက်မှုတွေ ဖြစ်ပေါ်ရတာကြောင့် နှစ်ဘက် အပစ်အခတ်ရပ်စဲရေး အကြိမ်ကြိမ် ဆွေးနွေးနေတဲ့ ငြိမ်းချမ်းရေး ဆွေးနွေး ပွဲတွေကလည်း အခုထိ မအောင်မြင်သေးပါဘူး။ ဒီလို ငြိမ်းချမ်းရေးဆွေးနွေး ပွဲတွေ မအောင်မြင်ရတာ ဘာကြောင့်လဲလို့ မစ္စတာ မစ်ချဲက PCG ကချင် ငြိမ်းချမ်းရေးအကျိုးဆောင်အဖွဲ့ ကို မေးခဲ့သေးတယ်လို့ ဦးယပ်ဇောင်ခေါန်း က ဆက်ပြောပြပါ တယ်။

"ဆွေးနွေးတဲ့နေရာမှာ ဒီလို အကြောင်းတွေကြောင့်မို့လို့ မအောင်မြင်တဲ့အပိုင်းက ဘာလို့ မအောင်မြင်သလဲ၊ ဘယ်လိုဖြစ်သလဲဆိုတဲ့ ကျနော်တို့ရဲ့ သုံးသပ်ချက်တွေကို မေးတာပါ။ ထိုးစစ်ဆင်မှုက နည်းနည်း ပြင်းပြင်းထန်ထန်ဖြစ်တဲ့အခါကျတော့ အခက်အခဲ ဖြစ်နေတယ်။ မကြာခင်တော့ အမြန်ဆုံးတွေ့ဆုံဖို့တော့ ကျနော်တို့လည်း ကြိုးစားပေးနေတာပေါ့လေ။ ထိုးစစ်ဆင်မှုကြောင့် ထိခိုက်တဲ့သဘောပဲလေ-"

ဝန်ကြီးဦးအောင်မင်းကတော့ ရှမ်းပြည်နယ်၊ မူဆယ်မြို့မှာ ဒါမှမဟုတ် ကချင်ပြည်နယ် ဗန်းမော်မြို့မှာ ထပ်မံ တွေ့ဆုံဆွေးနွေးကြဖို့ ပြီးခဲ့တဲ့ ကြာသာပတေးနေ့က KIO ကို ကမ်းလှမ်းထားပေမဲ့ အခုထိတော့ တုံ့ပြန်မှု မရှိသေးပါဘူး။ အခုလို အမေရိကန်သံအမတ်ကြီး ဒဲရက်မစ်ချဲနဲ့အဖွဲ့ ကချင်ပြည် နယ်ကို ရောက်ရှိနေချိန်မှာပဲ ကချင်ပြည်နယ်တွင်းမှာ တိုက်ပွဲတွေကလည်း ဆက်လက်ဖြစ်ပွားနေ ဆဲ ဖြစ်ပြီး အင်္ဂါနေ့ မနက်ပိုင်းကဆိုရင် ဖားကန့်မြို့အနီးက ကာမိုင်းရဲစခန်းကို လက်နက်ကိုင် အဖွဲ့တဖွဲ့က ၀င်ရောက်ပစ်ခတ်ခဲ့ လို့ သေဆုံးမှုရှိခဲ့တယ်လို့ မျက်မြင်သက်သေတဦးဖြစ်တဲ့ NLD အမျိုသားဒီမိုကရေစီအဖွဲ့ချုပ် ဖားကန့်ခရိုင်အဖွဲ့ဝင် ဦးဟန်မြင့် က ဗွီအိုအေကို ပြောပြပါတယ်။

" နှစ်ယောက်သေပါတယ်။ သုံးယောက်ဒဏ်ရာရပါတယ်။ တပ်ကြပ် စိုးမင်းသူ အသက် (၃၀) ခန့်နဲ့ သူနာပြု ဒေါ်တင်မေအောင် အသက် (၂၈) နှစ်ပါ။ အဲဒါက သေစာရင်းပါ။ တပ်ကြပ်ထွန်းအေး၊ ဒေါ်မေမွှေးစိန်ရယ်၊ နောက် ဒေါ်လှစိန်နုရယ်၊ အဲဒါက သားအမိပါ။ အဲဒါတွေက ဒဏ်ရာရပါတယ်။ အဲဒီသုံးယောက်ရဲ့ အခြေအနေကလည်း မကောင်းပါဘူး။ ဆီးခုံမှာတွေတို့၊ တင်ပါးကနေ ဗိုက်ဖောက်ထွက်တာတို့၊ ဗိုက်ကနေ နောက်ဖောက် ထွက်တာတို့၊ လက်ကျိုးတာတို့ အဲဒီ အနေအထားတွေမှာ ရှိပါတယ်။ အဲဒီအချိန်က ကျနော်လည်း ကားမိုင်းမှာ ညီလာခံကိစ္စနဲ့ ရောက်နေတဲ့အတွက် ကျနော်တို့ကို အဲဒီစခန်းနဲ့ နီးနေလို့ကို အတော်ကို အထိတ်အလန့် ဖြစ်သွားပါတယ်။ မြို့ထဲကလည်း အားလုံး ထိတ်လန့်နေကြတာပေါ့ဗျာ။ မနက်က ကျနော်သွားပြီး ပံ့ပိုးကူညီမှု လုပ်တဲ့အချိန်မှာတော့ အာာဏာပိုင်ဘက်က ဘာမှ လုပ်ဆောင်မှုကို မရှိသေးပါဘူး။ သူတို့ကိုယ်နှိုက်ကိုက အားလုံး ကြောက်နေကြပါတယ်။ အပျက်အစီးတွေဆိုတာကတော့ ဆိုင်ကယ်တွေ- ဒါမျိုးတွေပါ။ တခြားပျက်စီးစရာ အကြီးအကျယ်ကတော့ မရှိပါဘူး။"

ဒါ့အပြင် ဖားကန့်ဘက်မှာလည်း လက်နက်ကြီးပစ်ခတ်သံတွေကြောင့် ဒေသခံတွေ အထိတ်ထိတ် အလန့်လန့်ဖြစ်နေကြပြီး မိုးကောင်းဘက်က ကုန်တင်ယာဉ်တွေ မလာတဲ့ အတွက်လည်း ဖားကန့်မြို့မှာ ကုန်ဈေးနှုန်းတက်မယ့် အခြေအနေတွေ ဖြစ်ပေါ်နေတယ်လို့ ဖားကန့်မြို့ခံတွေက ပြောဆိုခဲ့ပါတယ် ရှင်။

တောင်အာဖရိက သမ္မတ ဇူးမား ပါတီ ဥက္ကဌ ပြန်ဖြစ်

 မစ္စတာ ဇူးမားဟာ မဲအရေ အတွက် သုံးထောင် နီးပါးနဲ့ အပြတ် အသတ် အနိုင်ရှိ ခဲ့ပါတယ်

တောင်အာဖရိက နိုင်ငံ သမ္မတ ဂျေကော့ ဇူးမားကို အာဏာရ အေအန်စီ ပါတီ ခေါင်းဆောင် အဖြစ် ပြန်လည် ရွေးကောက် တင်မြောက် လိုက်ကြပါတယ်။

ဒါဟာ မစ္စတာ ဇူးမား အတွက် နောက်ထပ် သမ္မတ သက်တမ်း ၅ နှစ် အတွက် အာမခံချက် ရှိစေ နိုင်မယ့် အောင်မြင်မှုလည်း ဖြစ်ပါတယ်။

အာဖရိက အမျိုးသား ကွန်ကရက် (African National Congress )အေအန်စီ ပါတီ ကိုယ်စားလှယ် တွေက ပါတီ ခေါင်းဆောင် အတွက် မဲပေးခဲ့ ကြရာမှာ၊ မစ္စတာ ဇူးမားက မဲ အရေ အတွက် သုံးထောင်နီးပါးနဲ့ ပါတီ ဒုဥက္ကဌ ခါလီမန် မို့လဲ့သီ ကို အပြတ် အသတ် အနိုင် ရရှိ သွားတာ ဖြစ်ပါတယ်။

အဂတိ လိုက်စားမှု တွေနဲ့ ပတ်သက်ပြီး မစ္စတာ ဇူးမားရဲ့ နေရာ အတွက် စိုးရိမ် စရာ ကောင်းလောက် အောင် စိန်ခေါ်မှုတွေ လုပ်ခဲ့တဲ့ မစ္စတာ မို့လဲ့သီ ကတော့ မဲ တထောင် နီးပါးသာ ရရှိခဲ့ ပါတယ်။

ပါတီရဲ့ ဒုတိယ ဥက္ကဌ နေရာ အတွက် သန်းကြွယ် သူဌေးကြီး ဖြစ်တဲ့ ဆီးရယ် ရာမာပို့ဆာ ကို ရွေးချယ်လိုက် ပါတယ်။

ပါကစ္စတန်မှာ ပိုလီယို ဝန်ထမ်းတွေ ပစ်သတ်ခံရ

ပိုလီယို ကာကွယ်ဆေး တိုက်ကျွေးစဉ်

ပိုလီယို ရောဂါ အကြီးအကျယ် ဖြစ်ပွားနေတဲ့ ပါကစ္စတန်နိုင်ငံမှာ ပိုလီယို ကာကွယ်ဆေး ပေးတဲ့ ကျန်းမာရေး ဝန်ထမ်း ၅ ဦး သေနတ်ပစ်သတ်ခံရပြီး သေဆုံးသွားပါတယ်။

အဲဒီကျန်းမာရေး ဝန်ထမ်းတွေဟာ ကုလသမဂ္ဂက အားပေးကူညီနေတဲ့ ပိုလီယို ရောဂါ တိုက်ဖျက်ရေး စီမံကိန်းတခုအတွက် လှုပ်ရှားဆောင်ရွက်နေသူတွေ ဖြစ်ပြီး အခု သေဆုံးသွားသူ ၅ ဦးထဲမှာ ၄ ဦးက အမျိုးသမီးတွေ ဖြစ်တယ်လို့ သိရပါတယ်။

အဲဒီ စီမံကိန်း အရ ပိုလီယို ကာကွယ်ဆေး ၅ သန်းခွဲ လောက်ကို နိုင်ငံတဝန်းမှာ အနည်းဆုံး ၃ ရက်ကြာ လိုက်လံ ထိုးပေးဖို့ စီစဉ်ထားတာ ဖြစ်ပါတယ်။

ပိုလီယို ရောဂါ တိုက်ဖျက်ရေး လှုပ်ရှားမှုတွေကို ဦးဆောင် လုပ်နေသူ တဦးဖြစ်တဲ့ ဂူလ်နက်ဇ် နီဂက်တ် က သူ့လုပ်ဖေါ် ကိုင်ဖက်တွေ တိုက်ခိုက်ခံခဲ့ရတာနဲ့ ပတ်သက်လို့ စိုးရိမ် ပူပန်နေကြောင်း အခုလို ပြောပြပါတယ်။

သေနတ် ပစ်သတ်ခံခဲ့ ရသူတွေဟာ သူ့နဲ့ အတူ အလုပ်လုပ် သူတွေလို့ သိရကြောင်း၊ တယောက်က မာဒီယာ၊ နောက် တယောက်ကတော့ ဖါမီဒါ လို့ ဆိုကြောင်းကျန်းမာရေး ဝန်ထမ်းတွေ ပစ်သတ်ခံရတယ် ဆိုတဲ့ သတင်းကို နေ့လည်က ကြားကြားချင်း လိုက်စုံစမ်း နေရာမှာ ခုချိန်ထိ ဆက်သွယ်လို့ မရသေးကြောင်း နဲ့ အတော့်ကို စိုးရိမ်ပူပန်နေကြောင်း ဘီဘီစီကို ပြောပါတယ်။

လောလောဆယ်မှာတော့ ဒီတိုက်ခိုက်မှုတွေနဲ့ ပတ်သက်လို့ ဘယ်အုပ်စု အဖွဲ့ကမှ ထုတ်ဖော် ဝန်ခံတာမျိုး မရှိသေးပါဘူး။ ဒါပေမယ့် ပါကစ္စတန်နိုင်ငံမှာ ပိုလီယို ရောဂါ တိုက်ဖျက်ရေး လှုပ်ရှားမှုတွေ မလုပ်ဖို့ တာလီဘန်အဖွဲ့က ခြိမ်းခြောက်စာတွေ ထုတ်ပြန် ထားတာ မျိုးတွေ ရှိနေပါတယ်။

အထူးသဖြင့် CIA အမေရိကန် ထောက်လှမ်းရေး အဖွဲ့က အသည်းရောင်ရောဂါ ကာကွယ်တိုက်ဖျက်ရေး လှုပ်ရှားမှုတခုကို ဗန်းပြပြီး ၂၀၁၁ခုနှစ်တုန်းက တာလီဘန် ခေါင်းဆောင် အိုဆမာ ဘင်လာဒင်ကို ခြေရာခံ ရှာဖွေနိုင်ခဲ့ တာကြောင့် ဖြစ်ပါတယ်။

ဒါ့ကြောင့် ဒီလို ရောဂါကာကွယ် တိုက်ဖျက်ရေး လှုပ်ရှား ဆောင်ရွက်မှု တွေဟာ လက်နက်ကိုင် ပုန်ကန်နေသူတွေကို ထောက်လှမ်းဖို့ အတွက် အယောင်ဆောင် လုပ်နေတာဆိုပြီး ဒီရောဂါ တိုက်ဖျက်ရေး လှုပ်ရှားမှုတွေကို တားဆီးတဲ့ အနေနဲ့ နိုင်ငံခြားသား NGO ဝန်ထမ်းတွေကို ပြန်ပေးဆွဲပြီး သတ်ပစ် တာမျိုးတွေ အရင်က ရှိခဲ့ပါတယ်။

တနင်္လာနေ့တုန်းကလည်း ကရာချီမြို့မှာ ပိုလီယို ရောဂါ တိုက်ဖျက်ရေး ဝန်ထမ်းတဦး သေနတ်ပစ်သတ် ခံခဲ့ရတယ်လို့ ကုလသမဂ္ဂ အဖွဲ့က ပြောပါတယ်။

ကမ္ဘာပေါ်မှာ ပိုလီယို ရောဂါ လူအစုလိုက် အပြုံလိုက် ဖြစ်တဲ့ နိုင်ငံ ၃ နိုင်ငံပဲ ရှိရာမှာ အာဖဂန်နစ္စတန်၊ နိုင်ဂျီးရီးယား နိုင်ငံနဲ့အတူ ပါကစ္စတန် နိုင်ငံလည်း အပါအဝင် ဖြစ်ပါတယ်။

ကမ္ဘာ တဝန်းမှာ ပိုလီယို ရောဂါ တိုက်ဖျက်ရေး ဆောင်ရွက်နေရာမှာ ပါကစ္စတန်နိုင်ငံဟာ ပိုလီယို အဓိက တိုက်ဖျက်ရမယ့် နိုင်ငံအဖြစ် သတ်မှတ်ထားတာပါ။

အခုတော့ ဆင်းပြည်နယ်မှာ ပိုလီယို ရောဂါ ကာကွယ်ရေး လှုပ်ရှားမှုတွေ ဆိုင်းငံ့ထားဖို့ ကျန်းမာရေး ဝန်ထမ်း ၂ သောင်း ၄ ထောင်လောက်ကို အစိုးရက ညွှန်ကြား ထားလိုက်ပြီလို့ ပါကစ္စတန် ကျန်းမာရေးဝန်ကြီး ဆက်ဂီယာ အာမက်ဒ်က ပြောပါတယ်။ 

ABSDF ကိုယ်စားလှယ် အဖွဲ့ ရန်ကုန်ကို ထွက်ခွာ

အဖွဲ့ဝင် ၉ ဦး ပါတဲ့ ABSDF ကိုယ်စားလှယ် အဖွဲ့ကို၊ ဥက္ကဌ ကိုသံခဲက ဦးဆောင်မှာ ဖြစ်တယ်

မြန်မာ နိုင်ငံလုံး ဆိုင်ရာ ကျောင်းသားများ ဒီမိုကရက်တစ် တပ်ဦး ABSDF ဥက္ကဌ ဦးဆောင်တဲ့ ကိုယ်စားလှယ် အဖွဲ့ဟာ ငြိမ်းချမ်းရေး ဆွေးနွေးဖို့ ထိုင်းနိုင်ငံ နယ်စပ် မဲဆောက်မြို့ ကနေ ရန်ကုန်မြို့ ကို ထွက်ခွာ သွားပြီ ဖြစ်ပါတယ်။

အဖွဲ့ဝင် ၉ ဦး ပါတဲ့ ABSDF ကိုယ်စားလှယ် အဖွဲ့ကို၊ ဥက္ကဌ ကိုသံခဲက ဦးဆောင်မှာ ဖြစ်ပြီး၊ မြန်မာ နိုင်ငံ မှာ သီတင်းပတ် နှစ်ပတ် ကြာမြင့်မှာ ဖြစ်ပါတယ်။

ခရီးစဉ် အတွင်း နေပြည်တော်မှာ အစိုးရ တာဝန် ရှိသူ တွေနဲ့ တွေ့ဆုံမှာ ဖြစ်သလို၊ ရန်ကုန်မှာလည်း တခြား နိုင်ငံရေး အင်အား စုတွေ၊ အဖွဲ့ အစည်းတွေ၊ လူပုဂ္ဂိုလ် တွေနဲ့ တွေ့ဆုံဖို့ ရှိတယ်လို့ ABSDF ဒုဥက္ကဌ ကိုမျိုးဝင်းက ပြောပါတယ်။

ဒီကိုယ်စားလှယ် အဖွဲ့ဟာ လက်ရှိ ကချင် ပြည်နယ်မှာ ဖြစ်ပွား နေတဲ့ တိုက်ပွဲတွေ အတွက် ဆွေးနွေး ရအောင် ကတိုက် ကရိုက် သွားတာ မျိုး မဟုတ်ဘဲ၊ ဝန်ကြီး ဦးအောင်မင်းနဲ့ အရင်က သဘောတူ စီစဉ် ထားတဲ့ အတိုင်း သွားရောက်တာ ဖြစ်ပါတယ်။

ABSDF အဖွဲ့ဟာ ငြိမ်းချမ်းရေး ဆွေးနွေးပွဲ အတွက် အခုလို မြန်မာ နိုင်ငံကို သွားမယ့် အချိန်မှာပဲ၊ ကချင် ပြည်နယ် ထဲက ABSDF စခန်း တည်ရှိရာကို အစိုးရ တပ်တွေက ထိုးစစ်ဆင် တိုက်ခိုက် နေပါတယ်။

ဒါနဲ့ ပတ်သက်ပြီးလည်း ကိုမျိုးဝင်းက ရှင်းပြရာမှာ သူတို့ အခြေခံ ဒေသတွေကို ထိုးစစ် ဆင်လာ ရင်တော့ ကျောင်းသား တပ်မတော်ဟာ သက်ဆိုင်ရာ မဟာမိတ် အဖွဲ့ အစည်း တွေနဲ့ ပူးတွဲ ကာကွယ်ဖို့ တာဝန် ရှိကြောင်း ဘီဘီစီကို ပြောပါတယ်။

ဒါပေမဲ့လည်း ABSDF ဘက်ကတော့ ဒီခရီးစဉ် ကနေ အပြုသဘော ဆောင်တဲ့ တိုးတက်မှုတွေ ရလာ မယ်လို့ မျှော်လင့် နေပါတယ်။

ABSDF မြောက်ပိုင်းနဲ့ အစိုးရတပ်အကြား တိုက်ပွဲဖြစ်

ABSDF မြောက်ပိုင်းနဲ့ KIA တို့ စခန်းချရာ လဂျားယန်မှာ တိုက်ပွဲ ဖြစ်ခဲ့

မြန်မာနိုင်ငံ မြောက်ပိုင်း KIA ကချင် လွတ်လပ်ရေး တပ်မတော် ဌာနချုပ်နားက လဂျားယန် တောင်ကုန်းမှာ စခန်းချထားတဲ့ ABSDF မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး မြောက်ပိုင်း တပ်ဖွဲ့နဲ့ အစိုးရတပ်တွေ အကြား စနေနေ့ ညနေ ၅နာရီလောက်က တိုက်ပွဲတွေ ဖြစ်ပွားခဲ့ပါတယ်။

အစိုးရရဲ့ ခလရ ၄၀ တပ်တွေ ABSDF တပ်စခန်း ရှိရာနေရာဆီ ရှေ့တိုး တက်လာရာကနေ ရင်ဆိုင် တိုက်ခိုက်မှုတွေ ဖြစ်ခဲ့တာလို့ ABSDF မြောက်ပိုင်း ကျောင်းသားခေါင်းဆောင် တဦး ဖြစ်တဲ့ စိုင်းလ က ဘီဘီစီကို ပြောပါတယ်။

ကျောင်းသား တပ်ဖွဲ့တွေ ဘယ်နေရာမှာ နေရာယူမှု အားပျော့သလဲ ဆိုတာကို သိရဖို့ အစိုးရတပ်ဘက်က သွေးတိုးစမ်းတဲ့ အနေနဲ့ ရှေ့တိုးတက်လာတာလို့ ယူဆရကြောင်း ပြောပါတယ်။

ABSDF ကျောင်းသား ခေါင်းဆောင်တချို့နဲ့ သမ္မတ ဦးသိန်းစိန် အစိုးရအကြား တွေ့ဆုံမှုတွေ ရှိခဲ့အပြီးမှာပဲ အခုလို နှစ်ဘက်အကြား တိုက်ခိုက်မှုတွေ ဖြစ်ပွားခဲ့တာပါ။