07.12.2012 နေ့ဖတ်ရန်သတင်းများ
by Myanmar Journal on Thursday, December 6, 2012 at 8:18pm ·
ဆန္ဒပြ သမားတွေကို ဖြိုခွင်း ခဲ့တာ မှန်ကန် ကြောင်း အစိုးရ ရုပ်သံ ကနေ ပြောကြား ခဲ့ပြီးနောက် မီးရှို့ ခံရတာ ဖြစ်
အီဂျစ် ဆန္ဒပြ သမား တွေက မွတ်ဆလင် ညီနောင်များ အဖွဲ့ ရုံး ၂ ရုံးကို မီးတင်ရှို့ ခဲ့ကြ ပြီး ကိုင်ရို မြို့တော်က ဌာနချုပ် မီးရှို့ ခံခဲ့ရ ပါတယ်။
အီဂျစ် သမ္မတ မိုဟာမက် မော်ဆီက အစိုးရ ဆန့်ကျင်ရေး ဆန္ဒပြ သမား တွေကို အင်အားသုံး ဖြိုခွင်းခဲ့ မှုကို မှန်ကန်ကြောင်း အစိုးရ ရုပ်သံ ကနေ ထုချေ ပြောကြား ခဲ့ပြီးနောက် ဒီလို မီးရှို့ ခံရတာ ဖြစ် ပါတယ်။
မစ္စတာ မော်ဆီကလူတိုင်းမှာ ငြိမ်းချမ်းစွာ ဖော်ထုတ်ခွင့် ရှိတာကို လေးစားပေမယ့် အပြစ် မရှိသူတွေကို သတ်ဖြတ် ခြောက်ခြားအောင် လုပ်တာ ကို ခွင့်ပြုမှာ မဟုတ်ဘူးလို့ ပြောကြားလိုက်ပါတယ်။
နောက်ပြီး ပြည်သူပိုင် ပစ္စည်းကို ဖျက်ဆီးတာ၊ အီဂျစ် ပြည်သူ အများစုက ဆုံးဖြတ် ရမယ့် အာဏာ ပိုင်ဆိုင်မှု ကို ခြိမ်းခြောက် စွက်ဖက်ဖို့ လှုံ့ဆော် တာတွေကိုလည်း လက်ခံမှာ မဟုတ်ဘူးလို့ သူက ဆိုပါတယ်။
တဘက်မှာလဲ အမိန့် ထုတ်ပြန်ပြီး အာဏာ တိုးချဲ့ ယူခဲ့တဲ့ မစ္စတာ မော်စီကို ပြင်းပြင်း ထန်ထန် ဝေဖန် နေကြပြီး ပြဿနာ အကျပ် အတည်း ကို ကျော်လွှား နိုင်ဖို့ တွေ့ဆုံ ဆွေးနွေးရေး လိုအပ်ကြောင်း ပြောကြား နေကြ ပါတယ်။
ဘယ်လို ရှေ့ဆက် သွားကြမလဲ ညှိနှိုင်းရေး အတွက် နိုင်ငံရေး ပါတီ အားလုံး စနေနေ့ အစည်းအဝေး တက်ကြဖို့ သမ္မတ မော်ဆီက ဖိတ်ခေါ် ခဲ့ပါတယ်။
ထိုင်းဝန်ကြီးချုပ်ဟောင်း အဘီစစ်
လွန်ခဲ့တဲ့နှစ်နှစ်ကျော်က ဘန်ကောက်မြို့မှာ ဆန္ဒပြပွဲတွေဖြစ်ပြီးတဲ့နောက် လူ၆၀၀ကျော်ကို ရာဇဝတ်မှုတွေနဲ့အာဏာပိုင်တွေက တရားစွဲဆိုခဲ့ပါတယ်။ အများစုကတော့ အစိုးရကို ဖြုတ်ချဖို့ကြိုးစားတဲ့ အတိုက်အခံရှပ်နီ အုပ်စုတွေကလူတွေကို စွဲဆိုတာ ဖြစ်ပါတယ်။
လူအခွင့်အရေးအဖွဲ့တွေကတော့ ကျည်ဆံအစစ်တွေ သုံးပြီးပစ်ခတ်နှိမ်နင်းလို့လူပေါင်း၉၀ကျော်သေတဲ့အပေါ်တာဝန်ရှိသူတွေကို ဖေါ်ထုတ်အရေးယူဖို့ အစဉ်တစိုက်တောင်းဆိုခဲ့ပါတယ်။ အခုတော့ ထိုင်းအစိုးရ အထူးစုံစမ်းစစ်ဆေးရေးဌာနက ဝန်ကြီးချုပ်ဟောင်းအဘီစစ်နဲ့သူ့ရဲ့လက်ထောက် ဆူသက်တို့ကို ၂၀၁၀ မေလအတွင်း တက်စီ မောင်းသမားတယောက် ပစ်သတ်ခံရတာနဲ့ပါတ်သက်လို့ အမှုရင်ဆိုင်ရမယ်လို့ ဆင့်ဆိုပြောကြားခဲ့ပါတယ်။ သူတို့နှစ်ယောက်က စစ်သားတွေကို ပစ်မိန့်ပေးတဲ့နေရာမှာ တာဝန်ရှိတယ်လို့ စွပ်စွဲထားပါတယ်။ အပစ်ရှိကြောင်းစုံစမ်းတွေ့ရှိရင် ထိုင်းဥပဒေအရ သေဒဏ်ချမှတ်နိုင်ပါတယ်။ ဒါပေမယ့် အဲဒီလိုပေးမယ့်ပုံ ဖြစ်နိုင်ချေသိပ်မရှိပါဘူး။
အကြမ်းဖက်မှုတွေအတွက် ဘယ်သူ့မှာ တာဝန်ရှိသလဲဆိုတာ နိုင်ငံရေးအရ စွပ်စွဲတာဖြစ်လို့ တဖက်နဲ့တဖက် အလှမ်းကွာဟနေတဲ့ ထိုင်းနိုင်ငံရေးလောကမှာ အငြင်းပွားပြီး အဖြေထုတ်ရခက်နေပါတယ်။ သေဆုံးမှုတွေအတွက် ဘယ်ပါတီမှာ အပစ်ရှိတယ်ဆိုတာကို အမှန်တရားဖေါ်ထုတ်ရေးနဲ့ ရင်ကြားစေ့ရေးကော်မရှင်က အတိအကျမပြောနိုင်ဘဲ နှစ်ဘက်စလုံးကိုတော့အပစ်တင်ထားတာတွေ့ရတယ်လို့ ဘန်ကောက်ရှိဘီဘီစီသတင်းထောက် ဂျွန်နသန်ဟက်က သတင်းပေးပို့ထားပါတယ်။
ကုလသမဂ္ဂ အရာရှိ မစ္စ ဗယ်လာရီ အေးမို့စ်
ကချင်နဲ့ အစိုးရ စစ်တပ်တို့ရဲ့ တိုက်ပွဲ တွေကြောင့် ဒုက္ခရောက်ပြီး ထွက်ပြေး တိမ်းရှောင် နေရတဲ့ စစ်ပြေး ဒုက္ခသည်ပေါင်း ၄၀၀၀၀ နီးပါးအတွက် အကူအညီ ပေးခွင့်ပြုဖို့ ကုလသမဂ္ဂရဲ့ လူသားချင်း စာနာ ထောက်ထားမှု ဆိုင်ရာ ဒုတိယ အထွေထွေ အတွင်းရေးမှူးချုပ် မစ္စ ဗယ်လာရီ အေးမို့စ်က တောင်းဆိုလိုက် ပါတယ်။
မြန်မာ နိုင်ငံမှာ ထူးခြားတဲ့ နိုင်ငံရေး ပြုပြင်ပြောင်းလဲမှုတွေ လုပ်နေပြီ ဖြစ်ပေမယ့် ကချင်ပြည်နယ် မှာတော့ ဆိုးဆိုးဝါးဝါး ဒုက္ခ ရောက်နေကြပါတယ်။ စစ်ဘေးကြောင့် ပြေးခဲ့ရတဲ့ သူစုစုပေါင်း ၇၅၀၀၀ ရှိပြီး အဲဒီ အထဲက ၄၀၀၀၀ လောက်ဆီကို လုံးဝ အကူအညီ အထောက်အပံ့ ပေးပို့လို့ မရဘဲ အခက်အခဲ ရင်ဆိုင် ကြုံတွေ့ နေရတယ်လို့ ကုလသမဂ္ဂရဲ့ လူသားချင်းစာနာ ထောက်ထားမှု ဆိုင်ရာ ဒုတိယ အထွေထွေ အတွင်းရေးမှူးချုပ် က ပြောလိုက်တာ ဖြစ်ပါတယ်။
ဘာ့ကြောင့် အကူအညီတွေ ပေးခွင့် မပြုဘဲ ပိတ်ထားရတာလဲ လို့ အဲဒီ ခရီးစဉ်မှာ လိုက်ပါ သတင်းယူနေတဲ့ ဘီဘီစီ သတင်းထောက် က နယ်စပ်ရေးရာ ဝန်ကြီး ဒုတိယ ဗိုလ်ချုပ်ကြီး သိန်းဌေးကို မေးမြန်း ရာမှာတော့ သူက အဲဒီ နေရာတွေဟာ အန္တရာယ်ရှိတဲ့ နေရာ တွေဖြစ်ကြောင်းနဲ့ အဲဒီ ဒေသတွေကို အထောက်အကူ ပစ္စည်းတွေ ခွင့်ပြုဖို့ အခွင့်အာဏာလည်း သူ့မှာ မရှိတဲ့ အကြောင်း ပြောပါတယ်။
ဒါဆိုရင် ခွင့်မပြုဘဲ ပိတ်ပင်ထားသူက သမ္မတ ဦးသိန်းစိန်လားလို့ မေးတဲ့ အခါမှာတော့ ဒုတိယ ဗိုလ်ချုပ်ကြီး သိန်းဌေးက သူတို့ကို ကားသုံးစီးစာ အကူအညီတွေ ပေးခဲ့ပြီး ဖြစ်တယ်လို့ ဖြေပါတယ်။
ဒါဟာ ကုလသမဂ္ဂ ဘက်က ကြည့်ရင် နည်းလွန်းတယ် မလုံလောက် နိုင်ဘူး၊ သူတို့ကို အကူအညီတွေ ပုံမှန် ပေးဖို့ လိုနေတယ်။ ဘာ့ကြောင့် ဒုက္ခသည်တွေကို အကူအညီ ပေးမယ့် ကိစ္စကို ခွင့်မပြု နိုင်ရတာလဲ လို့ မေးရာမှာတော့ လုံခြုံရေး ပေါ်မှာ မူတည်နေကြောင်းနဲ့ ကုလသမဂ္ဂ က ကူညီထောက်ပံ့ သူတွေကို အန္တရာယ် ဖြစ်မှာကို သူတို့ မလိုလားပါဘူးလို့ ဖြေခဲ့ပါတယ်။
ဒါပေမယ့် ဒီဖြေကြားချက်ဟာ လက်ခံနိုင်ဖွယ် အကြောင်းပြချက် ပါသလား ဆိုတာကို ဘီဘီစီ သတင်းထောက်က မစ္စ ဗယ်လာရီ အေးမို့စ်ကို မေးပြန်တော့ သူတို့မှာ အန္တရာယ် ရှိတဲ့ ဒေသတွေကို သွားရောက်ပြီး အကူအညီ ပေးခဲ့ဖူးတဲ့ အတွေ့အကြုံ အများအပြား ရှိတဲ့အကြောင်းပြောပါတယ်။
ဆက်လက်ပြီး ကုလသမဂ္ဂ ဘက်က အလုပ်လုပ်တဲ့အခါမှာ အန္တရာယ် အတိုင်းအတာ ပမာဏကို ကိုယ့် အဖွဲ့အစည်းရဲ့ ကိုယ်ပိုင် အကဲဖြတ်မှုနဲ့ တွက်ချက်ပြီး တိုင်းတာ ဆောင်ရွက်လေ့ ရှိတဲ့ အကြောင်း၊ တခါတလေမှာ သိပ်ကို အန္တရာယ် ကြီးတဲ့ အခြေအနေတွေနဲ့ ရင်ဆိုင် ရလေ့ ရှိပြီး ပျက်ဆီး ဆုံးရှုံး ရတာ မျိုးတွေလည်း ရှိတဲ့ အကြောင်းနဲ့ အဲဒီ အခါမှာတော့ တော်တော် စိတ်ထိခိုက် ရတဲ့ အကြောင်း ပြောပါတယ်။
ဒါပေမယ့် အခု အခြေအနေတွေက အဲဒီလိုမျိုး မဟုတ်တဲ့အကြောင်း ၊ အစိုးရဘက်က ပြောနေသလို အန္တရာယ် ကြီးတဲ့ အခြေအနေမျိုး မဟုတ်တဲ့ အကြောင်း ပြောပါတယ်။
ဒုတိယ ဗိုလ်ချုပ်ကြီး သိန်းဌေးကတော့ အကူအညီတွေကို ပိတ်ဆို့ ဟန့်တား ထားရတာ သမ္မတရဲ့ ခွင့်ပြုချက် မရလို့ပါလို့ ဖြေပါတယ်။ ဒီတော့ သမ္မတက ပြုပြင် ပြောင်းလဲရေး တွေ လုပ်နေတယ် လို့ တဘက်က တွင်တွင် ပြောနေပြီး အခုလို ဒုက္ခသည်တွေ အတွက် အကူအညီတွေကို ပိတ်ဆို့ တားဆီးနေတာ ဘာကြောင့်ပါလဲ လို့ မေးရာမှာတော့ လုံခြုံရေးနဲ့ အကူအညီ တွေကို ချိန်ထိုး စဉ်းစား နေရတဲ့ အကြောင်းနဲ့ ဒီပြဿနာက ဒီလောက် ရိုးရှင်း လွယ်ကူတဲ့ ကိစ္စ မဟုတ်ကြောင်း ဒုတိယ ဗိုလ်ချုပ်ကြီး သိန်းဌေးက ဖြေကြား သွားခဲ့ပါတယ်။
ဘရူနိုင်း နိုင်ငံ ကနေ ချစ်ကြည်ရေး ခရီး ပြန်လာ အပြီး၊ အခုလို ကြေညာလိုက်တာ ဖြစ်
မြန်မာ သမ္မတ ဦးသိန်းစိန်ရဲ့ သြစတြေးလျ နိုင်ငံနဲ့ နယူးဇီလန် နိုင်ငံတို့ကို ချစ်ကြည်ရေး သွားရောက်မယ့် ခရီးစဉ်ကို ရွှေ့ဆိုင်းလိုက်တယ် လို့ သမ္မတရုံး အင်တာနက် စာမျက်နှာမှာ ဖေါ်ပြထားပါတယ်။
အကြောင်း မညီညွတ်တဲ့အတွက် ခရီးစဉ် ရွှေ့ဆိုင်း လိုက်တာ ဖြစ်ပြီး အဆင်ပြေမယ့် အချိန်ကို သက်ဆိုင်ရာ နိုင်ငံများနဲ့ ပြန်လည် ညှိနှိုင်း စီစဉ်သွားမယ်လို့ အဲဒီ အင်တာနက် ကြေညာချက် ထဲမှာ ဖေါ်ပြထားပါတယ်။
သြစတြေးလျနိုင်ငံက မြန်မာ့ ရေးရာရုံး ညွှန်ကြားရေးမှူး ဒေါက်တာ မြင့်ချို ကတော့ ပြည်တွင်း လူထုရဲ့ မကျေနပ်မှု ဆန္ဒပြမှုတွေ အများကြီး ဖြစ်လာမှာ စိုးတဲ့အတွက် ပြည်တွင်းကို အာရုံစိုက်ဖို့ ခရီးစဉ် ရွှေ့ဆိုင်းလိုက်တာ ဖြစ်နိုင်ကြောင်း ပြောပါတယ်။
ပထမ အစီအစဉ် အရ သမ္မတ ဦးသိန်းစိန်ဟာ ရှေ့သီတင်းပတ်ထဲ သြစတြေးလျကို သွားရောက်ဖို့ စီစဉ် ထားတာ ဖြစ်တယ်လို့ တရုတ်သတင်း ရှင်ဝှာက ပြောပါတယ်။
ဇွန်လတုန်း ကတော့ သြစတြေးလျ နိုင်ငံခြားရေး ဝန်ကြီး Bob Carr ဟာ မြန်မာနိုင်ငံကို အလည်အပတ် ရောက်ရှိလာပြီး၊ တိုင်းပြည်ရဲ့ ပြုပြင် ပြောင်းလဲရေး ကြိုးပမ်းချက်တွေကို လာရောက် ကြည့်ရှုခဲ့ပါတယ်။
နယူးဇီလန် ဝန်ကြီးချုပ် ဂျွန်ကီးလည်း ပြီးခဲ့တဲ့ အပတ်က မြန်မာ နိုင်ငံကို ရောက်လာခဲ့ပြီး ဦးသိန်းစိန် လာရောက်ဖို့ တရားဝင် ဖိတ်ကြားခဲ့ပါတယ်။
ထိုင်းထောင်တွေထဲမှာ မြန်မာ အကျဉ်းသား အကြမ်းဖျဉ်း ၁၀၀၀၀ လောက် ရှိ
ထိုင်းနိုင်ငံ အကျဉ်းထောင်တွေ ထဲမှာ ရှိတဲ့ မြန်မာ အကျဉ်းသားတွေကို လွတ်ငြိမ်း ချမ်းသာခွင့် ပေးဖို့ အတွက် ဘန်ကောက်မှာ ရှိတဲ့ မြန်မာသံ အမတ်ကြီး ဦးတင်ဝင်းက ထိုင်း နိုင်ငံခြားရေး ဝန်ကြီး စူရဖုန်း တိုးဝိကျတ် ချိုင်းကွန်း နဲ့ ကြာသပတေးနေ့က တွေ့ဆုံ စဉ်မှာ မေတ္တာ ရပ်ခံ လိုက်ပါတယ်။
ထိုင်းထောင်တွေထဲမှာ မြန်မာ အကျဉ်းသား အကြမ်းဖျဉ်း ၁၀၀၀၀ လောက် ရှိတယ်လို့ သံအမတ်ကြီး ဦးတင်ဝင်းက ပြောပါတယ်။
အများစု ကတော့ မူးယစ် ဆေးဝါး အမှုနဲ့ အကျဉ်းကျ ခံနေရတာ ဖြစ်တယ်လို့ ဆိုပါတယ်။
အခုလို မြန်မာ သံအမတ်ကြီးက မေတ္တာရပ်ခံ တဲ့အပေါ် ထိုင်းနိုင်ငံခြားရေး ဝန်ကြီးက သက်ဆိုင်ရာ ဌာနတွေကို ဆက်ပြီး မေတ္တာရပ် ခံပေးမယ်လို့ ပြောကြောင်း သံအမတ်ကြီးက ပြောပါတယ်။
မြန်မာ အကျဉ်းထောင်တွေက ထိုင်း အကျဉ်းသား ၁ဝဝ လောက်ကို မကြာခင် ကပဲ သမ္မတ ဦးသိန်စိန်က လွတ်ငြိမ်း ချမ်းသာခွင့် ပေးခဲ့ပြီး ဖြစ်ပါတယ်။
တိဘက် မီးရှို့အဆုံးစီရင်မှု အမေရိကန်စိုးရိမ်
တိဘက်ဒေသမှာ မကြာခင်က ဖြစ်ခဲ့တဲ့ ကိုယ့်ကိုယ်ကို မီးရှို့ အဆုံးစီရင်မှုတွေနဲ့ ပတ်သက်လို့ အလွန်အမင်း စိုးရိမ်ပြီး စိတ်မကောင်း ဖြစ်ရတယ်လို့ ဆိုပြီး တရုတ်အစိုးရရဲ့ တင်းကျပ်တဲ့ မူဝါဒတွေက တိဘက်မှာ တင်းမာမှုတွေ ပိုဆိုးအောင် လုပ်နေတယ်လို့ အမေရိကန် နိုင်ငံခြားရေးဌာန က ပြောလိုက်ပါ တယ်။ ၂၀၀၉ ခုနှစ်ကစလို့ တရုတ်နိုင်ငံ အနောက်ပိုင်းမှာ ကိုယ့်ကိုယ်ကို မီးရှို့ အဆုံးစီရင်သူ တိဘက်လူမျိုး ၉၂ ယောက် ရှိပြီး နိုဝင်ဘာ တလတည်းမှာ တင် ၂၈ ယောက် ရှိခဲ့တာဖြစ်ပါတယ်။
ဒီလိုဖြစ်ရပ်တွေဟာ တရုတ်အစိုးရ ဆန့်ကျင် ဆန္ဒပြ စုရုံးမှုတွေနဲ့ လုံခြုံရေးအဖွဲ့တွေရဲ့ နှိမ်နင်းမှုတွေ ရှိနေချိန်မှာ ခုလို ကိုယ့်ကိုယ်ကို အဆုံးစီရင် ဆန္ဒပြမှုတွေ တိုးလာနေတာ ဖြစ်ပါတယ်။ ဘာသာရေး လွတ်လပ်ခွင့်၊ လွတ်လပ်စွာ ထုတ်ဖော် ပြောဆိုခွင့်၊ စုဝေးခွင့်နဲ့ ဖွဲ့စည်းခွင့်တွေ အပေါ်မှာ အစကတည်းက တင်းကျပ်ထားပြီးသား ဥပဒေတွေနဲ့ တိဘက် ဆန္ဒပြသူတွေကို တရုတ်အစိုးရက ဖိနှိပ်နေတယ်လို့ အမေရိကန် လက်ထောက် နိုင်ငံခြားရေးဝန်ကြီး Maria Otero က ဗုဒ္ဓဟူးနေ့ နှောင်းပိုင်းက ကြေညာချက် ထုတ်ပြန် ပြောဆိုခဲ့တာပါ။
အထူးသဖြင့် တိဘက် ဗုဒ္ဓဘာသာ ကိုးကွယ်မှု အပေါ် ထိန်းချုပ်မှုတွေ၊ ဘုန်းတော်ကြီးကျောင်း တွေကို အနီးကပ် စောင့်ကြည့်တာ၊ တရားမ၀င် ဖမ်းဆီးမှုတွေနဲ့ လူပျောက်ဆုံး မှုတွေ၊ နောက်… တိဘက်အရေး လှုပ်ရှားသူတွေကို အင်အားသုံး နှိမ်နင်းမှုတွေ လုပ်နေတဲ့ တရုတ်အစိုးရရဲ့ မူဝါဒတွေနဲ့ ပတ်သက်ပြီး ဆွေးနွေး အဖြေရှာဖို့ တရုတ်အစိုးရ အရာရှိတွေကို အမေရိကန် အရာရှိတွေက တိုက်တွန်းနေတဲ့အကြောင်းလည်း သူက ပြောပါတယ်။
တရုတ်အစိုးရအနေနဲ့ သတင်း အချက်အလက် ထုတ်ပြန်မှုတွေကို တင်းတင်းကျပ်ကျပ် ထိန်းချုပ်ထားတဲ့ တိဘက်ဒေသကို သတင်းထောက်တွေ၊ သံတမန်တွေနဲ့ တခြား လေ့လာစောင့်ကြည့်သူတွေ ၀င်ရောက်ခွင့်ပြုဖို့လည်း Otero က တောင်းဆိုလိုက်ပါတယ်။ တိဘက် ဘုန်းတော်ကြီး ဒလိုင်းလားမား၊ ဒါမှမဟုတ် သူ့ရဲ့ ကိုယ်စားလှယ်အဖွဲ့တွေနဲ့ ချွင်းချက်မရှိ တွေ့ဆုံ ဆွေးနွေးမှုတွေ လုပ်သွားဖို့လည်း တရုတ် အစိုးရကို မစ္စ Otero က တောင်းဆိုထားပါတယ်။
VOA အစီအစဉ်တချို့ Sky Net က ထပ်ဆင့်ထုတ်လွှင့်မည်
VOA အမေရိကန်အသံ ဒါရိုက်တာ David Ensor၊ အမေရိကန်အစိုးရက ခန့်အပ်ထားတဲ့ အသံလွှင့်ဌာနတွေ အတွက် အုပ်ချုပ်ရေးဆိုင်ရာ BBG Broadcasting Board of Governer အဖွဲ့ဝင်တွေ၊ Sky Net ရုပ်သံ က တာဝန်ရှိသူတွေ သဘောတူ စာချွန်လွှာ လက်မှတ်ထိုးတဲ့ အခမ်းအနားကို တက်ရောက်ခဲ့ပါတယ်။
VOA အမေရိကန်အသံ မြန်မာပိုင်း အစီအစဉ်က ထုတ်လွှင့်နေတဲ့ ရုပ်မြင်သံကြား အစီအစဉ်တွေ အပါအ၀င် VOA ရဲ့ ရုပ်သံ အစီအစဉ်တွေကို မြန်မာနိုင်ငံအတွင်းမှာ ပြန်လည် ထုတ်လွှင့်နိုင်ဖို့အတွက် VOA နဲ့ မြန်မာနိုင်ငံအတွင်းက အဓိက ရုပ်သံဌာန ဖြစ်တဲ့ SkyNet ရုပ်သံတို့ ဒီနေ့ သဘောတူလက်မှတ် ရေးထိုးကြပါတယ်။ ရန်ကုန်မြို့ Park Royal Hotel မှာ ဒီနေ့ မွန်းလွဲပိုင်းက ကျင်းပတဲ့ လက်မှတ်ရေးထိုးပွဲအကြောင်း VOAဝိုင်းတော်သား ကိုသိန်းထိုက်ဦးက အခုလို သတင်းပေးပို့ထားပါတယ်။
ဒီနေ့ Park Royal ဟိုတယ်မှာ ကျင်းပတဲ့ အခမ်းအနားမှာ VOA အမေရိကန်အသံ ဒါရိုက်တာ David Ensor၊ အမေရိကန်အစိုးရက ခန့်အပ်ထားတဲ့ အသံလွှင့်ဌာနတွေအတွက် အုပ်ချုပ်ရေးဆိုင်ရာ BBG Broadcasting Board of Governers အဖွဲ့ဝင်တွေ၊ နောက် Sky Net ရုပ်သံ က တာဝန်ရှိသူတွေ အပြင်၊ မြန်မာနိုင်ငံဆိုင်ရာ အမေရိကန်သံအမတ်ကြီး Derek Mitchell လည်း အခမ်းအနားကို တက်ရောက်ပါတယ်။
လွန်ခဲ့တဲ့နှစ်ပိုင်း မြန်မာ့အလင်းသတင်းစာရဲ့ ကျောဖုံးမှာ အမြဲတစေ ဝေဖန်တိုက်ခိုက်ခံခဲ့ရတဲ့ VOA လို သတင်းဌာနရဲ့ ထုတ်လွှင့်ချက်တွေ၊ အခု Sky Net က ပြန်ပြီးထုတ်လွှင့်ဖို့ သဘောတူညီချက် ရလိုက်တာကို သူက ထူးခြားတဲ့ မှတ်တိုင်တခုအဖြစ် ထည့်သွင်း ပြောဆိုသွားပါတယ်။
“ကျနော်မြင်တာက ဒါဟာ ထူးခြားပြီး အသိအမှတ်ပြုရမယ့် အခါသမယတခုလို့ ပြောရမှာပါ။ သတင်းလွတ်လပ်ခွင့်တွေ ပြည့်ဝတဲ့ ယဉ်ကျေးမှုတခေတ်ဆီ ဦးတည်တဲ့ တိုးတက်မှုတွေလို့ ပြောရမှာပါ။ ဒီလိုအခမ်းအနားမျိုးကို တက်ရောက်ခွင့်ရတဲ့အတွက်လည်း ကျနော့အနေနဲ့ အထူးပဲ ၀မ်းသာ ဂုဏ်ယူမိပါတယ်”လို့ ပြောသွားခဲ့တာပါ။
မြန်မာနိုင်ငံ ဒီမိုကရေစီရေးအတွက် သတင်းလွတ်လပ်ခွင့်တွေ မရှိမဖြစ် လိုအပ်ပြီး VOA အမေရိကန်အသံနဲ့ SkyNet ရုပ်သံတို့ သဘောတူညီထားတဲ့ ထုတ်လွှင့်ချက်တွေ ဟာ မြန်မာပြည်သူတွေ အတွက် အကျိုးရှိမယ့်၊ ဒီမိုကရေစီရေးဖြစ်ထွန်းမှုတွေ အတွက် အရေးပါမယ့် သတင်းတွေ ဖြစ်မယ်လို့ မျှော်လင့်တဲ့အကြောင်း ပြောဆိုသွားခဲ့တာပါ။
အမေရိကန်အစိုးရက ခန့်အပ်ထားတဲ့ အသံလွှင့်ဌာနတွေအတွက် အုပ်ချုပ်ရေးဆိုင်ရာ BBG Broadcasting Board of Governor အဖွဲ့ဝင်တဦးဖြစ်တဲ့ မစ္စတာ Victor Ashe ကလည်း
“ဒီလို SkyNet ရုပ်သံနဲ့ VOA အမေရိကန်အသံအကြား ပူးပေါင်းဆောင်ရွက်ဖို့ သဘောတူညီချက် ရခဲ့တဲ့ အခမ်းအနားမှာ အခုလို ရန်ကုန်မြို့ကို ကိုယ်တိုင် လာရောက်ပြီး အခမ်းအနား တက်ရောက်ခွင့်ရတာကို အထူးပဲ ၀မ်းမြောက်မိတဲ့အကြောင်း" VOA အမေရိကန်အသံ ဗွီအိုအေမြန်မာပိုင်း အစီအစဉ်ကို ပြောဆိုသွားခဲ့တာပါ။
VOA ညွန်ကြားရေးမှူးချုပ် David Ensor ကတော့ ဒါဟာ ပထမအဆင့် ခြေလှမ်း သဘောဆောင်ပေမယ့်လည်း VOA နဲ့ Sky Net အကြား ကြီးမားတဲ့ ဆက်ဆံရေးတရပ်အဖြစ် ထူထောင်လာနိုင်မယ်လို့ မျှော်လင့်တဲ့အကြောင်း ပြောဆိုသွားပါတယ်။
“ဒီတိုင်းပြည်ကို ပြုပြင်ပြောင်းလဲပြီး သတင်းလွတ်လပ်ခွင့် တွေ ပေါ်ပေါက်လာဖို့ ကျနော်တို့ဘက်က တစိုက်မတ်မတ် ဆောင်ရွက်ရေး သန္ဒိဌာန်ခိုင်မာမှုကို အဓိက ပြလိုက်တာလို့ ကျနော်ထင်ပါတယ်။ ဒီနိုင်ငံပြုပြင်ပြောင်းရေး ဖြစ်စဉ် အတွင်းမှာ Sky Net ရုပ်သံကလည်း ပြုပြင်ပြောင်းလဲရေးတွေလုပ်ဖို့ သန္ဒိဌာန်ခိုင်ခိုင်မာမာ ချထားတာကို တွေ့ရပါတယ်။ ကျနော်တို့ရဲ့ ထုတ်လွှင့်ချက်တွေ ဟာ မြန်မာပြည်သူတွေအတွက် ဖျော်ဖြေရေး အစီအစဉ်တွေ ပါဝင်သလို၊ သတင်းအချက်အလက်တွေနဲ့ စိတ်ဝင်စားစရာတွေကို တင်ပြပေးနိုင်မယ်လို့လည်း ကျနော်မျှော်လင့်ပါတယ်။”
VOA ညွန်ကြားရေးမှူးချုပ် David Ensorကပြောဆိုသွားခဲ့တာပါ။
Sky Net ရုပ်သံက စီစဉ်ညွန်ကြားရေးမှူး ဦးဝင်းနိုင်ကလည်း VOA နဲ့ သဘောတူညီချက်အပေါ် အခုလို ပြောဆိုပါတယ်။
“ကျနော်တို့တိုင်းပြည်အတွက်ပေါ့လေ၊ ကျနော်တို့ အများကြီး အကျိုးရှိမယ်လို့ ယူဆပါတယ်။ ကျနော်တို့ Sky Net သည် ပြည်သူတွေအတွက် Sky Net ဆိုတဲ့အတိုင်း ကျနော်တို့ မြန်မာပြည်သူတွေအတွက် ကောင်းကျိုးပေါ့လေ။ VOA ပရိုဂရမ်ထဲမှာဆိုရင် အင်္ဂလိပ်စာသင်ကြားတဲ့ အစီအစဉ်တွေပါတယ်။ အမေရိကန်မှာရှိတဲ့ လူနေမှုစရိုက်တွေရော၊ လူနေမှုယဉ်ကျေးမှုတွေရော၊ သင်ကြားတာရှိတယ်။ သူတို့ရဲ့ ဂီတနဲ့ပတ်သက်တဲ့ အစီအစဉ်တွေ၊ ဟောလိဝုဒ်က မင်းသားမင်းသမီးတွေရဲ့အကြောင်းတွေ၊ အများကြီးပါပါတယ်ခင်ဗျာ။ ဒါတွေကို ကြည့်ခြင်းအားဖြင့် ကျနော်တို့ မြန်မာပြည်သူလူထု အကျိုးရှိမယ်လို့ ယူဆပါတယ်ခင်ဗျာ။”
ဒီလိုသဘောတူ တူညီချက် ချမှတ်နိုင်ခဲ့တဲ့အတွက် သတင်းထောက်တစ်ယောက်အနေနဲ့ ဘဝမှာ အပျော်ဆုံးနေ့တနေ့ပါ ဆိုပြီး ပြောခဲ့သူ ကတော့ VOA မြန်မာပိုင်းအစီအစဉ်ရဲ့ ဌာနမှူး ဦးသန်းလွင်ထွန်းပါ။
“သဘောတူညီချက်က လွယ်လွယ်တော့ ဖြစ်တာမဟုတ်ဘူးပေါ့။ ကျနော်တို့ကြိုးစားခဲ့ ရတာ တော်တော်ကြာပါတယ်။ ဒါပေမယ့်လည်း အခုလိုအောင်မြင်သွားတယ် ဆိုတော့ ကျနော်အနေနဲ့ အတော်လေး ဝမ်းသာပါတယ်။ ကျနော်အနေနဲ့ ဒီမှာ သတင်းထောက်တစ်ယောက်နဲ့ အလုပ်လုပ်ခဲ့တာ နှစ်ပေါင်း၂၀ကျော် ရှိပါတယ်။ ဒါ ကျနော်အနေနဲ့ ဝမ်းအသာရဆုံးနေ့လို့ပြောရမှာပါပဲ။ ဘာကြောင့်လည်းဆိုတော့ တချိန်တုန်းက မြန်မာနိုင်ငံကို သတင်းလွှင့်တယ်ဆိုရင် မြန်မာနိုင်ငံပြင်ပကပဲ သတင်းတွေကို နည်းမျိုးစုံနဲ့ ရောက်အောင် လွှင့်ပေးနေခဲ့ရတဲ့ အခြေအနေကနေပြီးတော့ အခု မြန်မာပြည်မှာ ရှိတဲ့ အခြေစိုက်တဲ့ သတင်းဌာနတစ်ခုက ကျနော် သတင်းတွေကို ပြည်တွင်းကနေ ပြန်လွှင့်ပေးနိုင်တဲ့ အနေအထားမျိုးရောက်အောင် ကျနော်တို့ ကြိုးပမ်းဆောင်ရွက်ခဲ့ရတယ်။ အဲ့တော့ ဒီအခြေအနေအထိ ရောက်လာတာကိုတော့ ဒီနေ့ကတော့ တော်တော်လေး ဝမ်းသာရမယ့်နေ့လို့ ပြောရမှာပေါ့။
နောက် အထူးသဖြင့် ကျနော်တို့ရဲ့ မြန်မာသတင်းဌာနကနေ ထုတ်လွှင့်ပေးမယ့် သတင်းတွေကို မတည်းမဖြတ်ပေါ့၊ အကုန်လုံး မြန်မာပြည်သူတွေဆီကို လွယ်လွယ်ရောက်အောင် လုပ်ပေးနိုင်မယ့် အနေအထားမျိုး ဖြစ်လာမယ်ဆိုရင်တော့ ကျနော်တို့အတွက် ဝမ်းသာရပါတယ်။ အဲ့တာအပြင်ကို နောက်ပိုင်းမှာ ပရိတ်သတ်ရဲ့ တောင်းဆိုချက်အရပေါ့နော်။ အစီအစဉ်တွေ လိုအပ်ရင် လိုအပ်သလို တိုးချဲ့သွားဖို့လည်း ကျနော်တို့ စီစဉ်နေပါတယ်။ အဲ့တာလေးကိုလည်း ကျနော်ပြောချင်ပါတယ်။”
အခုသဘောတူညီချက်မှာရော ကန့်သတ်ချက်တွေ ရှိပါသလားဆိုတဲ့ ကိုသိန်းထိုက်ဦးရဲ့မေးခွန်းကို ဌာနမှူး ဦးသန်းလွင်ထွန်းက အခုလိုဖြေပါတယ်။
“တစုံတရာ ကန့်သတ်ချက် မရှိပါဘူး။ လောလောဆယ်မှာတော့ ကျနော်တို့မှာ ရှိနေတဲ့ တစ်နေ့ကို နာရီဝက်စာ မြန်မာသတင်းအစီအစဉ်မှာ အဲ့တာအပြင်ကို တခြား VOA ကနေ အာရှကို ထုတ်လွှင့်နေတဲ့ အင်္ဂလိပ်စာပို့ချချက်နဲ့ တခြားစိတ်ဝင်စားစရာတွေနဲ့ ဆက်စပ်ပြီးတော့ ၂၄နာရီ ပတ်လုံး ထုတ်လွှင့်ပေးသွားမှာပါ။ အဲ့ဒီ့ထုတ်လွှင့်မှုတွေကို မိနစ်အနည်းငယ်လေးကို ဆိုင်းငံ့ပြီးတော့ လွှင့်ပေးတာကနေလွဲလို့ တခြားဘာအကန့်အသတ်မှ မရှိပါဘူး။”
VOA အမေရိကန်အသံ မြန်မာပိုင်း အစီအစဉ်က ထုတ်လွှင့်နေတဲ့ ရုပ်မြင်သံကြား အစီအစဉ်တွေ အပါအ၀င် VOA ရဲ့ ရုပ်သံ အစီအစဉ်တွေကို မြန်မာနိုင်ငံအတွင်းမှာ ဇန်န၀ါရီလ ၁ ရက်နေ့မှာ စတင်ပြီး ထုတ်လွှင့်ဖို့ Sky Net ရုပ်သံနဲ့ သဘောတူလိုက်တာနဲ့ ပတ်သက်ပြီး VOA မြန်မာပိုင်းအစီအစဉ် ဌာနမှူး ဦးသန်းလွင်ထွန်း ပြောပြသွားတာပါ။
တခါတုန်းက သတင်းစာနောက်ကျောမှာ နေ့စဉ်လိုလို ဝေဖန်ထိုးနှက်ခံခဲ့ရတဲ့ အသံလွှင့်ဌာနတခုက ထုတ်လွှင့်ချက်တွေ ပြည်တွင်းမှာ လွယ်လွယ်ကူကူ ဖမ်းယူကြည့်ရှု့နိုင်ဖို့ Sky Net ရုပ်သံက သဘောတူလိုက်ပါပြီ။ ဒါဟာ သတင်းလောကအကြား အရင်က ရှိခဲ့တဲ့ ပြည်တွင်းပြည်ပ ဆိုတဲ့ ခွဲခြားသတ်မှတ်ချက် စည်းတွေ အရောင်မှိန်လာတဲ့ လက္ခဏာ၊ သတင်းလွတ်လပ်ခွင့် အတွက် မြန်မာပြည်ရဲ့ ရွေ့လျားမှုတွေကြားက ထူးခြားတိုးတက်တဲ့ လက္ခဏာတရပ် အဖြစ်လည်း လေ့လာသုံးသပ်သူတွေက ပြောဆိုနေကြပါတယ်။
အငြင်းပွားဒေသ ရေနံမရှာဖို့ တရုတ်သတိပေး
တရုတ် ဗီယက်နမ် နှစ်နိုင်ငံ အငြင်းပွားနေတဲ့ ရေပိုင်နက်တွင် တရုတ်ငါးဖမ်းသင်္ဘောများကို တွေ့ရစဉ်။
တောင်တရုတ်ပင်လယ်ပြင်မှာ တဘက်သတ်ဆန်ဆန် ရေနံနဲ့သဘာဝဓာတ်ငွေ့ ရှာဖွေမှုကို ရပ်တန့်ဖို့ တရုတ်နိုင်ငံက ဗီယက်နမ်ကို သတိပေး လိုက်ပါတယ်။ ဒီဒေသအတွင်း တရုတ်-ဗီယက်နမ် နှစ်နိုင်ငံကြား ကာလရှည်ကြာ ရေပိုင်နက် အငြင်းပွားနေခဲ့ပြီး ပိုပြီးတင်းမာလာနေတာ ဖြစ်ပါတယ်။ပြီးခဲ့တဲ့ သီတင်းပတ်အတွင်း ဗီယက်နမ်နိုင်ငံပိုင် ရေနံနဲ့သဘာဝဓာတ်ငွေ့ ကုမ္ပဏီရဲ့သင်္ဘောတွေထဲက တစင်းရဲ့ ဆက်သွယ်ရေးကြိုးတွေကို တရုတ်သင်္ဘောတွေက ဖြတ်တောက်ခဲ့တယ်လို့ ဗီယက်နမ်က စွပ်စွဲပြောဆိုခဲ့ပြီးတဲ့နောက် နိုင်ငံခြားရေးဌာန ပြောခွင့်ရ ဟွန်းလီက ကြာသာပတေးနေ့မှာ အခုလိုပြောလိုက်တာပါ။ အဲဒီလိုလုပ်ရပ်ဟာ ဗီယက်နမ်ရဲ့ အချုပ်အခြာ အာဏာကို ပြင်းပြင်းထန်ထန် ချိုးဖောက်လိုက်တာ ဖြစ်တယ်လို့ ဗီယက်နမ် နိုင်ငံခြားရေးဝန်ကြီးဌာနက ပြောထားပါတယ်။မစ္စတာဟွန်းလီက - ဗီယက်နမ်တွေရဲ့ စွပ်စွဲချက်တွေဟာ ကြောင်းကျိုးဆက်စပ်မှုမရှိဘူး လို့ ငြင်းဆိုလိုက်ပြီး - တရုတ်သင်္ဘောတွေဟာ အငြင်းပွားနေတဲ့ တောင်တရုတ်ပင်လယ်အတွင်း ဟိုင်နန်ပြည်နယ်နားမှာ ငါးဖမ်းနေတာဟာ တရားဥပဒေနဲ့လုံးဝ ညီညွတ်တယ်လို့ ပြောခဲ့တာပါ။ဒေသတွင်း ရေပိုင်နက်ပြဿနာကြောင့် အခြေအနေ တင်းမာမှု မြင့်မားလာနေတဲ့ -တရုတ်ရေပိုင်နက်လို့ သတ်မှတ်ထားတဲ့ ဧရိယာအတွင်းကို ဝင်လာတဲ့ -ဘယ် သဘောင်္ကိုမဆို ဖမ်းဆီးဖို့ အတွက် ဟိုင်နန်ပြည်နယ်ရဲ့ ရဲတပ်ဖွဲ့ကိုလည်း မကြာခင်ကပဲ လုပ်ပိုင်ခွင့်အာဏာတွေ တိုးပေးထားပါတယ်။
တောင်းဆိုချက် မရရင် အထွေထွေ သပိတ် မှောက်မည်
လက်ပံတောင်းအရေး သံဃာတော်များ ဆန္ဒပြနေစဉ်။
လက်ပံတောင်းတောင် ကြေးနီစီမံကိန်းကို ဆန့်ကျင် ဆန္ဒပြတဲ့ သံဃာတော်တွေနဲ့ ပြည်သူတွေကို အကြမ်းဖက်နှိမ်နင်းခဲ့တာ နဲ့ပတ်သက်ပြီး နိုင်ငံတော်သမ္မတနဲ့ အစိုးရအဖွဲ့က တရားဝင်တောင်းပန်ဖို့နဲ့ အကြမ်းဖက်မှုမှာ တာဝန်ရှိသူတွေကို အရေးယူပေးဖို့အတွက် မန္တလေးနဲ့ တောင်ကြီးမြို့က သံဃာတော်တွေက ဒီကနေ့ တောင်းဆို ဆန္ဒပြခဲ့ကြပါတယ်။ ဒီတောင်းဆိုချက်တွေကို အမြန်ဆုံး အကောင်အထည်ဖော် မပေးရင် ဆက်လက် ဆန္ဒပြသွားမယ်လို့လည်း မန္တလေးက ဆန္ဒပြပွဲကို ဦးဆောင်တဲ့ သံဃာတော်က မိန့်ကြားပါတယ်။ သတင်းအပြည့်အစုံကို ထိုင်းအခြေစိုက် သတင်းထောက် ကိုမိုးဇော်က တင်ပြထားပါတယ်။
လက်ပံတောင်းတောင်မှာ အကြမ်းဖက်ဖြိုခွဲတာကို ဆန့်ကျင်တဲ့အနေနဲ့ ဒီကနေ့ မြန်မာပြည်က မြို့ကြီးတချို့မှာ သံဃာတော်တွေ ဆန္ဒပြဖို့ ပြင်ဆင်ခဲ့ကြတာဖြစ်ပြီး မန္တလေးနဲ့ တောင်ကြီးမြို့တွေ မှာတော့ ရာနဲ့ချီတဲ့ သံဃာတော်တွေဟာ ပူးပေါင်းပါဝင်ခဲ့ပါတယ်။ ဒီကနေ့ မန္တလေးမြို့မှာ ဆန္ဒပြတဲ့ အခြေအနေကိုတော့ ဦးဆောင်ပါဝင်ခဲ့တဲ့ အရှင် ဦးဥတ္တမသာရက အခုလို မိန့်ကြားပါတယ်။
“ ဦးဇင်းတို့ အားလုံးတန်းစီပြီးတော့ ထိုင်ပြီးတော့ မေတ္တာသုတ်ရွတ်ပါတယ်။ အိမ်တော်ရာဘုရားထဲမှာ။ ၁နာရီ မထိုးခင်က စလိုက်တာပေါ့။ နေလည်းတအားပူတာနဲ့ ၂နာရီခွဲ အခုပဲ သိမ်းလိုက်တယ်။ ၄၀၀ကျော်တော့ ရှိမယ် သံဃာတော်ပေါ့။ လူတွေလည်း မနည်းပါဘူး။ အများကြီးပဲ ။ လူတွေလည်း ဘေးကနေရော နောက်ကနေရော ထိုင်နေကြတာ။”
မန္တလေး သံဃာ့ဆန္ဒပြပွဲက အဓိက တောင်းဆိုတဲ့အချက်တွေကို အခုလို ဆက်ပြီး မိန့်ကြားပါတယ်။
“ တောင်းဆိုချက်ကတော့ ၅ချက်ပေါ့။ ဒါပေမဲ့ အမြန်ဆုံးရဖို့ တောင်းဆိုတာက ၃ချက်ပေါ့။ အဲဒီ၃ချက်က နိုင်ငံတော်သမ္မတနဲ့ အစိုးရအဖွဲ့က ထိခိုက်ဒဏ်ရာရရှိသွားသော သံဃာတော်များကို အမြန်ဆုံးလာရောက် ၀န်ချတောင်းပန်ရန်၊ အကြမ်းဖက်မှုမှာ တာဝန်ရှိတဲ့ပုဂ္ဂိုလ်တွေကို အရေးယူပေးရန်၊ ကြေးနီစီမံကိန်းနဲ့ ပတ်သက်လို့ ဆန္ဒထုတ်ဖော်ခဲ့လို့ ဖမ်းဆီးခံရတဲ့ပုဂ္ဂိုလ်တွေကို အမြန်ဆုံးပြန်လွှတ်ပေးဖို့ အဲဒီ၃ချက်က အခုချက်ချင်း လုပ်ပေးဖို့ပေါ့။”
ကျန်အချက်တွေမှာတော့ ကော်မရှင်က စုံစမ်း စစ်ဆေးပြီး ဒေသခံတွေ ကျေနပ်မှု ရအောင်ဆောင်ရွက်ပေးဖို့၊ စစ်မှန်တဲ့ ဒီမိုကရေစီစနစ်ပေါ်ပေါက်ဖို့နဲ့ နောက်ထပ်အကြမ်းဖက်မှုတွေ မဖြစ်စေရေး အတွက် လွှတ်တော်နဲ့ အစိုးရအဖွဲ့မှာ ပါဝင်တဲ့ တပ်မတော်သားတွေ နှုတ်ထွက်ပေးဖို့ ဆိုတာတွေ ပါဝင်ပါတယ်။
မန္တလေးသံဃာတော်တွေရဲ့ ဆန္ဒပြပွဲကိုတော့ အာဏာပိုင်တွေကဖက်က တားဆီးဟန့်တားတာ မရှိပါဘူး။ မန္တလေး သံဃာတော်တွေက လာမယ် ၈ရက်နေ့ အမျိုးသားနေ့မှာ တကြိမ် ထပ်မံဆန္ဒပြဖို့ရှိနေပြီး တောင်းဆိုချက်တွေ မရရင် ၁၂ရက်နေ့မှာ တနိုင်ငံလုံးပါဝင်တဲ့ အထွေထွေသပိတ်ကို ဆင်နွှဲသွားမယ်လို့လည်း မိန့်ကြားပါတယ်။
မန္တလေးမြို့မှာ သံဃာတော်တွေ ဆန္ဒပြနေတဲ့အချိန်မှာပဲ ရှမ်းပြည်နယ်တောင်ကြီးမြို့မှာလည်း သံဃာတော် အပါး ၂၀၀လောက်ဟာ မေတ္တာသုတ်ရွတ်ဆိုပြီး မြို့တွင်းကို လှည့်လည်ကြွချီ ဆန္ဒပြခဲ့တယ်လို့ တောင်ကြီးမြို့ အမျိုးသားဒီမိုကရေစီအဖွဲ့ချုပ်အဖွဲ့ဝင် ဒေါ်ခင်မိုးမိုးက ပြောပါတယ်။
“ စုရပ်က လောကမာန်အောင်ကျောင်းပါ။ လောကမာန်အောင်ကျောင်းကနေပြီးတော့ ထွက်ပါတယ်။ ထွက်ပြီးတော့ အနောက်မြို့ပတ်လမ်းအတိုင်းမြို့ထဲကို တက်ပါတယ်။ အနောက်မြို့ပတ်လမ်းကနေ ဗိုလ်ချုပ်ကြေးရုပ်နားအထိကို ဖြတ်ဆင်းတယ်။ ဗိုလ်ချုပ်ကြေးရုပ်နားကနေပြီးတော့မှ မင်းလမ်းအတိုင်း စူဠာမုနိလောက ချမ်းသာဘုရားကို စုရုံးပြီးတော့ ချီတက်နေပါတယ်။”
ရှမ်းပြည်နယ်သံဃာတော်တွေ တောင်းဆိုချက်တွေဟာ မန္တလေး သံဃာတော်တွေတောင်းဆိုချက်နဲ့ အများစု တူညီ ပါတယ်။ ဒါပေမဲ့ အစိုးရနဲ့ လွှတ်တော်မှာ ပါဝင်တဲ့ တပ်မတော်သား ကိုယ်စားလှယ်တွေ နှုတ်ထွက်ပေးဖို့ တောင်းဆိုတာမပါဝင်ဘဲ အကြမ်းဖက်ဖြိုခွဲတာကို စုံစမ်းစစ်ဆေးရေးကော်မရှင်က အမြန်ဆုံးဖော်ထုတ်ပေးဖို့ တောင်းဆိုထားပါတယ်။
ဒီနေ့ ညနေ ၃နာရီခွဲလောက်မှာတော့ ရန်ကုန်မြို့ဆူးလေဘုရားနဲ့ တာမွေဈေးမှာ သံဃာတော်နဲ့ ပြည်သူအချို့ ဆန္ဒထုတ်ဖော်ခဲ့ပါတယ်။ တချိန်တည်းမှာတော့ ကြေးနီစီမံကိန်းဆိုင်ရာ စုံစမ်းစစ်ဆေးရေးကော်မရှင်အဖွဲ့ဝင်တချို့က လက်ပံတောင်းတောင်ဒေသမှာ ဒေသခံတွေနဲ့ တွေ့ဆုံပြီး စုံစမ်းစစ်ဆေးတာတွေ စတင်နေပြီဖြစ်ပါတယ်။
“ သူတို့က စုံစမ်းစစ်ဆေးရေးကိစ္စကို အဖြစ်အပျက်တွေပေါ့နော်။ အဲဒါတွေကို လူထုတွေဆီက ထွက်ချက်ကို သူတို့က လာယူတာလို့ ပြောပါတယ်။ ကျနော်တို့ကတော့ လက်ပန်းတောင်းတောင် ကြေးနီစီမံကိန်းကြီးကို လုံးဝ ဖျက်သိမ်းရေးပဲ တင်ပြပါတယ်။ ပြည်သူလူထုဖက်က ရပ်တည်ပေးဖို့ရာရယ် မီးလောင်ဗုံးတွေ ပစ်တဲ့ ကိစ္စကိုလည်း စစ်ဆေးပြီးတော့ အရေးယူပေးဖို့ ကျနော်တို့ တောင်းဆိုထားပါတယ်။ သူတို့ဖက်ကတော့ အထက်ကို တင်ပြအုံးမယ်လို့ ကျနော်တို့ကို ပြောပါတယ်ခင်ဗျ။”
ဒေသခံတယောက် ပြောပြတာဖြစ်ပါတယ်။
စုံစမ်းစစ်ဆေးရေးကော်မရှင်က ပြည်သူ့လွှတ်တော်ကိုယ်စားလှယ် ဦးသန်းမြင့်၊ ဒေါ်ခင်စန်းလှိုင် နဲ့ ဒေသခံ ကော်မရှင်အဖွဲ့ဝင် ၂ဦးအပါအ၀င် ၈ယောက်လာရောက်ပြီး ရွာသူရွာသား ၂၀၀လောက် တက်ရောက်ခဲ့တာ ဖြစ်ပါတယ်။ ဒီဆွေးနွေးပွဲမှာ ကော်မရှင်အဖွဲ့ဝင်တွေဖက်က သဘာဝပတ်ဝန်းကျင် ထိခိုက်မှုအခြေအနေတွေ ကိုလည်း မေးမြန်းခဲ့ပါတယ်။
လက်ပံတောင်းတောင် ကြေးနီစီမံကိန်းအတွက် ကျေးရွာ ၂၆ရွာက စိုက်ပျိုးမြေဧက ၇၈၀၀လောက်ကို သိမ်းယူခဲ့တာ၊ စီမံကိန်းကထွက်တဲ့ စွန့်ပစ်ပစ္စည်းတွေကြောင့် သဘာဝပတ်ဝန်းကျင် ညစ်ညမ်းတာနဲ့ လယ်တီဆရာတော်ရဲ့ သာသနအဆောက်အဦးတွေကို ထိန်းသိမ်းဖို့အတွက် ဒေသခံတွေနဲ့ သံဃာတော်တွေက လနဲ့ချီပြီး ဆန့်ကျင်ဆန္ဒပြခဲ့ကြပါတယ်။
နိုဝင်ဘာလ ၂၉ရက်နေ့ကတော့ ဆန့်ကျင်ဆန္ဒပြတဲ့ သံဃာတော်တွေနဲ့ ဒေသခံတွေကို အကြမ်းဖက် နှိမ်နင်းခဲ့ တာကြောင့် မြန်မာပြည်တ၀ှမ်းမှာ ကန့်ကွက်ဆန္ဒပြတာတွေ ပိုမိုမြင့်တက်လာနေတာဖြစ်ပါတယ်။
0 comments:
Post a Comment