Friday, November 13, 2015

တွေ့ဆုံဆွေးနွေးခြင်းဟာ ၊ကြီးကျယ်မြင့်မြတ်ခြင်းပါပဲ (မင်းဒင်)

U Kyi Nyunt

(၁)
ကျွန်တော်တို့လူမျိုးအများစုတွင် အလွန်ကြီးမားသော
အားနည်းပျော့ညံချက်ကြီးတစ်ခုရှိသည်။ ယင်းမှာမိမိကိုအနိုင်ရ
သွားသူနှင့် လုံးဝထပ်မံမျက်နှာချင်းမဆိုင်၊ ရင်မဆိုင်လိုသော
အကျင့်ဖြစ်ပြီး ထိုသို့ရှောင်လွှဲနိုင်ခြင်းမှာ သူတို့၏ ရဲရင့်ပြတ်သား
မှုကို ဖော်ပြရာရောက်သည်ဟု တလွဲအယူရှိခြင်းပေတည်း။

ယင်းကောက်ချက်ကိုမြင်သာထင်ရှားရန်အလို့ငှာကျွန်တော့်
ကိုယ်တွေ့ဖြစ်ရပ်တစ်ခုကို၊ပမာပြုဥဒါဟရုဏ်ဆောင်လိုပါသည်။
လွန်ခဲ့သောအနှစ်လေးဆယ်ကျော်၊ကျွန်တော်အသက်(၁၃)နှစ်
အရွယ်ခုနှစ်တန်းကျောင်းသားဘဝကဖြစ်၏။
ကျွန်တော်တို့နေထိုင်ရာလမ်းထဲရှိလူပျိုပေါက်ကာလသားခေါင်း
များ၏ကောင်းမှုဖြင့်၊ကျွန်တော်နှင့်သက်တူရွယ်တူ တစ်လမ်းတည်းသားရဲထွတ်နှင့်ကျွန်တော်၊လမ်းဘေးတစ်နေရာမှာ၊
သူနိုင်ကိုယ်နိုင်တယောက်ချင်းထိုးသတ်ခဲ့ကြဖူးသည်။
ကျွန်တော်ကကလန်ကလား၊ငါးဖောင်ရိုးခြောက်၊ရဲထွတ်က
ပုပြတ်ပြတ်ခပ်ညိုညိုနှင့်ကြံ့ခိုင်သန်စွမ်းသူဖြစ်၍၊ပွဲစီစဉ်သူများက၊ လက်ရည်တူသည်ဟုယူဆကြဟန်ရှိပါသည်။
လောကကြီးကိုစူးစမ်းလေ့လာနေသည့်အရွယ်ဖြစ်၍
အဆိုပါလမ်းဘေးစိန်ခေါ်ပွဲကိုကျွန်တော်ရဲရဲကြီးလက်ခံလျက်၊
ရဲထွတ်နှင့်ထိုးသတ်ခဲ့ရာ၊လွှတ်ဟေ့ဆိုကတည်းကပင်၊
အုန်း၊အုန်း၊ဘုန်း၊ဘုန်းဟူသောအသံတို့ကိုသာကြားလိုက်ရသည်။
ကျွန်တော့်မျက်လုံးများမီးပွင့်သွားခဲ့ပြီး၊ကြယ်လစုံသောည
ဖြစ်သွားခဲ့လေသည်။အညာသွေးပီပီ၊မလျှော့သော်ဇွဲဖြင့်
သုံးချီသုံးလား၊ရင်ဆိုင်ခဲ့ပါသော်ငြား၊ကျွန်တော့်လက်၊လုံးဝ
မလှုပ်ရသေးမီမှာပင်၊ရဲထွတ်၏လက်သီးတံတောင်ဒဏ်ချက်
များကြောင့်၊လက်ဘေးကအုန်းပင်တုံးများကြားတွင်
ကားကနဲကားကနဲ၊လဲကျခဲ့သည်ချည်းသာဖြစ်၏။
ပွဲပြီးသည့်အခါကာလသားခေါင်းများကရဲထွတ်နှင့်
ကျွန်တော့်ကိုလက်ဆွဲနှုတ်ဆက်ကြရန်ဆိုလာသောအခါ ရဲ ထွတ်၏လက်ကိုကျွန်တော်ပုတ်ချရင်း၊ထိုနေရာမှကျောခိုင်းခဲ့သည်။
ထိုစဉ်ကမူကျွန်တော့်လုပ်ရပ်သည်အမှန်ဟုသာကျွန်တော်မြင်ခဲ့သည်။
လက်ဆွဲ၍နှုတ်မဆက်ခဲ့ခြင်းသည်၊ကျွန်တော်၏သတ္တိကို
တနည်းတဖုံပြသရာရောက်သည်ဟုလည်းကျွန်တော်တွေးထင်ခဲ့ဖူးသည်။
(၂)
သို့နှင့်တဖြည်းဖြည်းကျွန်တော်အသက်ကြီးလာသည်နှင့်အမျှ၊
ကျွန်တော်လက်လှမ်းမိသမျှဖတ်ရှုမိသောစာအုပ် စာပေ များတွင်၊ဘုရင်မင်းခေါင်နှင့်ရာဇာဓိရာဇ်၊မင်းရဲကျော်စွာနှင့်
အဲမွန်ဒယာ၊မင်းရဲကျော်စွာနှင့်လဂွန်းအိမ်တို့ ၏သမိုင်း၊ ဂရိရောမခေတ်မှသည်ယနေ့အချိန်အထိဖြစ်ပွားခဲ့သော
ကမ္ဘာကျော်စစ်ပွဲကြီးများမှစစ်ခေါင်းဆောင်များမှတ်တမ်းများ
၊ဒီမိုကရေစီနိုင်ငံများမှနိုင်ငံရေးခေါင်းဆောင်များ၏
အမူအကျင့်တို့ကိုလေ့လာဖတ်ရှုမိသောအခါ၊လက်ဝှေ့အစရှိသော
နာကျင်စွာခံစားရသည့်အားကစားပွဲများကြည့်ရှုဖန်များ၍
ရင့်ကျက်တည်ငြိမ်သည့် အားကစားများကိုမြင်တွေ့လာရသောအခါ၊
ကျွန်တော်၏ တလွဲဆံပင်ကောင်းခဲ့သော အတွေးအမြင်ကိုပြန်လည်ဆင်ခြင်မိလာသည်။
စင်စစ်ကျွန်တော်သည် သူရဲဘောနည်းခဲ့သူသာဖြစ်၏။
ဘဝဟူသည်ပြေးလမ်းရှည်ကြီးဟု သဘောမပေါက်ခဲ့သူသာဖြစ်၏။
အရှုံးကိုကျေကျေနပ်နပ် ရင်ဆိုင်လက်မခံဝံ့သူဖြစ်၏။ အလွဲမာနရှိခဲ့သူ၊
မရင့်ကျက်သူဖြစ်၏နောင်ငါးနှစ်မျှကြာ၍ ကျွန်တော်ဆရာ
အတတ်သင်သို့ရောက်သည့်အခါ၊ ယှဉ်ပြိုင်ခြင်း၏
အနှစ်သာရ၊ပြိုင်ဆိုင်ခြင်းအနုပညာ၊အရှုံးအနိုင်နှင့်အောင်ပွဲတို့
သဘောကိုတစတစစောကြောမိလာသည့်အခါ၊ကျွန်တော့်ငယ်
သူငယ်ချင်းရဲထွတ်ကိုလက်ဆွဲနှုတ်ဆက်ခွင့် ရသော်ကောင်းလေစွဟု၊နှလုံးပိုက်တွေးတောမိခဲ့လေသည်။
ယခုရက်ပိုင်းများတွင်ရဲထွတ်နှင့်ကျွန်တော်လက်ရည်စမ်းခဲ့သည့်
လမ်းဘေးစိန်ခေါ်ပွဲကိုကျွန်တော်ပို၍သတိရမိ သည်။ထိုသတိရခြင်းသည်၊လွန်ခဲ့သောရက်ပိုင်းအတွင်းကမြန်မာပြည်တွင်ကျင်းပပြီးစီးခဲ့သော (၂၀၁၅) အထွေထွေရွေးကောက်ပွဲကြီး၏နောက်ဆက်တွဲသတင်းများကြောင့်ဖြစ်၏။
(၃)
အဆိုပါရွေးကောက်ပွဲတွင်အတိုက်အခံပါတီကြီးသည်၊
လက်ရှိပါတီအား၊တကမ္ဘာလုံးအံ့အားသင့်ရသည်အထိ၊
အ ပြတ်အသတ်အနိုင်ရှိခဲ့သည်။တဆက်တည်းမှာပင်
ရွေးကောက်ပွဲအနိုင်ရပါတီခေါင်းဆောင်မှ၊လက်ရှိအာဏာရပါတီမှ
သမ္မတကြီး၊လွှတ်တော်ဥက္ကဋ္ဌနှင့်ကာကွယ်ရေးဦးစီးချုပ်တို့အား
၊နိုင်ငံတော်၏ဂုဏ်သိက္ခာနှင့်ပြည်သူပြည်သားများ၏နှလုံးစိတ်ဝမ်း
အေးချမ်းစေရန်အလို့ငှာ၊အမျိုးသားပြန်လည်သင့်မြတ်ရေး
သဘောထားကိုအခြေခံလျက်တွေ့ဆုံဆွေးနွေးပါရန်တောင်းဆို
သည့်မေတ္တာရပ်ခံစာထုတ်ပြန်ခဲ့ပါသည်။
ယင်းစာအပေါ်လွှတ်တော်ဥက္ကဋ္ဌကြီးမှတပတ်အတွင်းတွေ့ဆုံဆွေးနွေး
မည်ဖြစ်ကြောင်းချက်ချင်းဆိုသလိုတုန့်ပြန်ခဲ့၏။သို့သော်နိုင်ငံတော်
သမ္မတကြီးနှင့်ကာကွယ်ရေးဦးစီးချုပ်တို့ကမူ၊အနိုင်ပါတီ၏
အနိုင်ရရှိနေမှုအခြေအနေကို ဝမ်းမြောက်ဂုဏ်ယူကြောင်းနှင့် ၊ရွေးကောက်ပွဲကော်မရှင်၏ရွေးကောက်ပွဲဆိုင်ရာ
လုပ်ငန်းများ၊ပြီးဆုံးချိန်တွင်တွေ့ ဆုံဆွေးနွေးမည်ဟု အသီးသီးပြန်ကြားခဲ့ပါသည်။
ထို့ပြင်ထိုပြန်ကြားချက်များမှာလည်းကာယကံရှင်များမှ
တိုက်ရိုက်ပြန်ကြားခြင်းမဟုတ်ပဲ၊သမ္မတ၏ပြောရေးဆိုခွင့်ရှိသူမှ
တဆင့်၊တပ်မတော်သတင်းထုတ်ပြန်ရေးအဖွဲ့မှတဆင့် ထုတ်ပြန်ခဲ့ကြောင်းကျွန်တော်အလေးအနက်ဂရုပြုမိရာ၊
ကျွန်တော်(၁၃)နှစ်သားအရွယ်ကအပြုအမူကိုသာပြေး ၍သတိရမိတော့သည်။
သမ္မတကြီးသည်လည်းကောင်း၊ကာကွယ်ရေးဦးစီးချုပ်သည်လည်းကောင်း၊
အရှုံးအနိုင်နှင့်အောင်ပွဲ၏ရင်းမြစ်သဘော၊ဒီမိုကရေစီ၏အနှစ်သာရ
၊လေးစားအပ်သောနိုင်ငံခေါင်းဆောင်များထားရှိအပ်သည့်
အမူအကျင့်စသည်တို့ ကိုသတိမပြုမိလေယောင်တကား။ ရှက်နိုးလှသည်ဖြစ်၍ရင်ဆိုင်ရန်မဝံ့လေယောင်တကား။
ကျွန်တော်အထူးဂရုပြုသတိထားမိသည့်အချက်မှာ
၊ရွေးကောက်ပွဲကော်မရှင်၏ရွေးကောက်ပွဲလုပ်ငန်းစဉ်များပြီးဆုံးချိန်
ဟူသောစကားလုံးအသုံးအနှုံးဖြစ်၏။အဆိုပါစကားရပ်ကို
သဘောရိုးနှင့်သုံးစွဲခဲ့သည်ဆိုပါမူ၊သမ္မတကြီးနှင့် ကာကွယ်ရေး ဦးစီးချုပ်တို့သည်၊တိုင်းရေးပြည်ရာနှင့်အဆက်ပြတ်ကင်းကွာနေသည်
မှာသေချာသည်။ပြည်သူလူထု၏ဆန္ဒ၏သဘောထားအမှန်ကိုဂရုမမူမိသေးသည်မှာထင်ရှားသည်။
သိသိကြီးနှင့်အဆိုပါစကားရပ်ကိုသုံးစွဲခဲ့ သည်ဆိုပါလျှင်၊ သမ္မတကြီးနှင့်ကာကွယ်ရေးဦးစီးချုပ်တို့သည်၊နည်းလမ်းမကျစွာ
ပေါ်ထွက်လာမည့်တစ်စုံတစ်ခု သောမရိုးဖြောင့်သော
နောက်ဆက်တွဲကြေညာချက်ကို၊မရိုးဖြေင့်သောစောင့်မျှော်နေသည်ဟု
သာဆိုရပေတော့ မည်။
တိကျစွာဆိုရပါလျှင်မင်းနားတစ်ထောင်ဟူသောမြန်မာဆိုရိုး
စကားရှိသည်။ရွေးကောက်ပွဲ၏ရလာဒ်အမှန်ကို ကျွန်တော်ကဲ့သို့သာမန်ပြည်သူအညတြပင်ကောင်းစွာ
သိရှိနားလည်ပြီးဖြစ်ရာ၊ဆိုခဲ့သောပုဂ္ဂိလ်ကြီးတို့အနေဖြင့် ပို၍ရှင်းလင်း ခိုင်မာစွာကြိုတင်နားလည်သဘောပေါက်ပြီးဖြစ်နေရပေမည်။
ယခုထုတ်ပြန်နေဆဲရွေးကောက်ပွဲရလာဒ်များသည်အောက်ခြေ
ရွေးကောက်ပွဲကော်မရှင်အဆင့်ဆင့်အနေဖြင့်၊ပြိုင်ဘက်ပါတီ
အသီးသီး၏ကိုယ်စားလှယ်များ၊ရပ်မိရပ်မဖသက်သေများ
၊ပြည်တွင်းပြည်လေ့လာစောင့်ကြည်သူများအထပ်ထပ်စိစစ်
အတည်ပြုပြီး၊ရောက်ရှိလာသောရလာဒ်များကို ဖတ်ပြကြေညာနေခြင်းသာဖြစ်ပါ၏။ထွေထူး၍ကွဲပြားပြောင်းလဲ
လာရန်အကြောင်းလုံးလုံးမရှိချေ။
(၄)
ရွေးကောက်ပွဲကြီးအေးချမ်းအောင်မြင်စွာပြီးဆုံးခဲ့သည်ကားမှန်ပါ၏။
သို့သော်တိုင်းပြည်ကြီးရှေ့ဆက်ရမည့်ခရီးကား အများကြီး လိုသေးသည်။လွန်စွာကြမ်းတမ်းခက်ခဲသောတမျှော်တခေါ်
ခရီးရှည်ကြီးဖြစ်၏။
ပြည်တွင်းငြိမ်း ချမ်းရေး၊အမျိုးသားပြန်လည်သင့်မြတ်ရေး၊ ဆင်းရဲမွဲတေမှုတိုက်ဖျက်ရေး၊နိုင်ငံပြန်လည်ထူထောင်ရး၊
တရားဥပဒေစိုးမိုးရေးအစရှိသည့်သေရေးရှင်ရေးတမျှ
အရေးကြီးလှသောများမြောင်လှသည့်လုပ်ငန်းစဉ်တို့များစွာ
ကျန်ရှိနေပါသေးသည်။အထူးဂရုပြုသင့်သည့်အချက်မှာ၊
အစိုးရအပြောင်းအလဲပြုလုပ်နေစဉ်ကာလအတွင်း၊မသမာသော ဝန်ထမ်းအချို့အနေဖြင့်၊ရုံးလုပ်ငန်းဆိုင်ရာစာရွက်စာတမ်း
အထောက်အထားတို့ကိုမြေလှန်စနစ်ဖြင့်ဖျက်ဆီးထား ရစ်ခဲ့မည့်အရေးဖြစ်ပါသည်။
သမ္မတကြီးနှင့်ကာကွယ်ရေးဦးစီးချုပ်တို့အနေဖြင့်အကြောင်း
အမျိုးမျိုးပြ၍အချိန်ဆွဲရမည့်၊ဆွေးနွေးပွဲစားပွဲကိုလှည့်ပတ်
တိမ်းရှောင်နေခြင်းသည်၊တပ်မတော်မှကြိုတင်မဲအားလုံးလိုလို
အာဏာရပါတီကြီး၏မဲပုံးများအတွင်းသို့ အတင်း အဓမ္မရောက်စေခဲ့သည့်၊မလိုလားအပ်သောဖြစ်ရပ်များကိုပြန်လည်
အမှတ်ရအောင်တူးဆွနေသကဲ့သို့ဖြစ်နေပါသည်။
တပ်မတော်နှင့်ပြည်သူကြည်ဖြူစွာလက်တွဲရမည့်အချိန်တွင်၊
ပို၍ဝေးကွာအောင်တမင်ဖန်တီးနေသကဲ့သို့ရှိပါသည်။
သမ္မတကြီးနှင့်ကာကွယ်ရေးဦးစီးချုပ်တို့ခင်ဗျာ။ကျွန်တော်တို့ပြည်သူများ
၏လက်တွေ့ဘဝခံစားနေရမှုများကို ကိုယ်ချင်းစာစေလို ပါသည်။မိမိနှစ်သက်ရာပါတီကိုလွတ်လပ်စွာဆန္ဒမဲပေးပြီးပါလျက်၊
ထင်ရှားမြင်သာသော ရလာဒ်များပေါ်ထွက်ပြီးပါလျက် ၊ရွေးကောက်ပွဲရလာဒ်ကိုပြောင်းပြန်လှန်ပစ်လေမည်လား။
။ပြည်တွင်းလက်နက်ကိုင်အဖွဲ့အစည်းမျာကိုရန်မီးမွှေး၍
တိုက်ပွဲများအရှိန်မြှင့်ကာ၊မအေးချမ်းမတည်ငြိမ်အောင်တမင်
ဖန်တီးလေမည်လား၊ဘာသာရေးလူမျိုးအကြောင်းပြ၍
မလိုလားအပ်သောအဓိကရုဏ်းများကိုကြိုးကိုင်စီစဉ်လေမည်လား၊
အခြေခံစားသောက်ကုန်ဈေးနှုန်းတွေတက်ကုန်လေမည်လား၊
စသည့်လားပေါင်းများစွာဖြင့်၊နှလုံးစိတ်ဝမ်းမချမ်းမသာဖြစ်ရ
လျက်ရှိကြောင်း၊အလေးအနက်ဂရုပြုစေလိုပါသည်။
အဆိုပါပြည်သူလူထု၏စိုးရိမ်ကြောင့်ကျဗျာပါဒတို့ကိုအေးငြိမ်းစေနိုင်
မည့်သူများတွင်သမ္မတကြီးနှင့်ကာကွယ်ရေး ဦးစီးချုပ်တို့သည် အထူးအခရာကျလှပါသည်။ထိုသို့ဖော်ဆောင်နိုင်ရန်လည်း
ခက်ခဲရှုပ်ထွေးလှသည်မဟုတ်ပါ။
တည်ငြိမ်ရင့်ကျက်သူများပီပီအရှုံးကိုရဲဝံ့စွာရင်ဆိုင်လိုက်ခြင်းပင်ဖြစ်ပါသည်။
၊ရွေးကောက်ပွဲအနိုင်ရပါတီခေါင်းဆောင်နှင့်တစ်စားပွဲတည်းတွင်၊
လက်ရေတပြင်တည်းအတူထိုင်ကာ၊အများပြည်သူအကျိုးစီးပွားအလို့ငှာ
၊ဆွေးနွေးလိုက်ရုံသာဖြစ်ပါသည်။
(၅)
ရခဲလှသောလူ့ဘဝတွင်နောင်တများနှင့်နေထိုင်ရခြင်းသည်
အလွန်ပူလောင်တတ်ပါသည်။ရာထူးဂုဏ်သိမ်၊စည်းစိမ်အာဏာတို့သည်
အစဉ်အမြဲတည်မြဲသောသဘောလက္ခဏာမရှိပါ။ကျွန်တော်အပါအဝင်
၊ညွှန်းဆိုခဲ့သောလူကြီး မင်းများသည်မီးစာကုန်ဆီခန်းနေသည့် အရွယ်များဖြစ်၍နောင်လာမည့်မျုိုးဆက်အတွက်သာရည်မျှော်
လုပ်ဆောင်ခဲ့သင့်ကြပါ၏။
ဤဆောင်းပါးကို အဆိုပါလူကြီးမင်းများဖတ်ရှုမိပါက၊
သတိသမ္ပဇဉ်ကောင်းစွာဝင်လျက်အချိန်နာရီမဆိုင်းပဲ…၊
“ဟယ်လို၊ဒေါ်စုလားဗျာ။ကျွန်တော်သိန်းစိန်ပါ။ဒေါ်စုအောင်မြင်တာ
ဝမ်းသာတယ်ဗျာ။ကဲ၊ဘယ်နေ့တွေ့ကြမယ်ဆိုတာအမြန်စီစဉ်ပေတော့၊
အမြန်ဆုံးတွေ့ကြမယ်လေ”
“ဟယ်လို၊ အမကြီး၊ ကျွန်တော်မင်းအောင်လှိုင်ပါခင်ဗျ။မိဝေ၊
အမကြီးနိုင်တာအပြတ်အသတ်ပါကလား။ ဝမ်းသာလိုက်တာဗျာ။
ကျွန်တော်တို့တွေ့ကြမယ်လေ။ အမကြီးတို့ဖက်ကအဆင်ပြေမဲ့နေ့ရက်
ကိုသာပြောလိုက်ပါ။ အမကြီးရေ၊ ကျွန်တော်ကတပ်ကိုကိုင်ထားရတာ
ဆိုတော့တချို့ကိစ္စတွေမှာ၊ ကျွန်တော့်ကိုဇွတ်အတင်းနားပူနားဆာ
မလုပ်ရဘူးနော်”
ကဲ့သို့သောရင်တွင်းဖြစ်စကားတို့ဖြင့် ရဲဝံ့သည့်ခြေလှမ်းတစ်ရပ်ိကို
အမြန်ဆုံးအစပြုလျှောက်လှမ်းလိမ့်မည်ဟု၊ ကျွန်တော်ယုံကြည်လျက်ရှိပါ၏။
ထိုနည်းလမ်းဖြင့်ပင်၊ လူကြီးမင်းတို့၏ကြီးကျယ်မြင့်မြတ်မှုကို
အထင်အရှားပြစေလိုပါ၏။ တတိုင်းပြည်လုံး၊တကမ္ဘာလုံးသာမက၊
စကြဝဠာတိုက်တစ်သောင်းမှလူနတ်ဗြဟ္မာတို့ပါ
ဝမ်းမြောက်ဝမ်းသာသာဓုခေါ်ဆိုကြပါလိမ့်မည်။
မိဝေ=(ထားဝယ်စကား)၊ အံ့သြလွန်းသဖြင့်အမလေးတသံ

  (မင်းဒင်)
၂၀၁၅ နိုဝင်ဘာ(၁၃)ရက်နေ့ထုတ် သည်ဗွိုက်ဒေးလီးသတင်းစာမှ။

0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့ စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အက်ဒမင်

အခြားကဏ္ဍများကို လေ့လာရန်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...