"ပြတိုက်ထဲက ပြဇာတ်" (မင်းလူ)

မင်းလူ၏ ၀တ္တုတိုများ

၂ဝဝ၂ ကမ္ဘာ့ဖလားပွဲတွင် ဘရာဇီးအသင်း၏ အခြေအနေမှာ မရေမရာဖြစ်နေသည်။ ခြေစစ်ပွဲတွေတုန်းကလည်း ရှုံးပွဲတွေများခဲ့သည်။ ဘရာဇီး ဘောလုံးသမိုင်းမှာ တစ်ခါမှမကြုံဖူးအောင် အခြေအနေဆိုးခဲ့သည်။ ခြေစစ်ပွဲတောင်အောင်ပါ့မလားဟု စိုးရိမ်ခဲ့ကြရသည်။ အသေအလဲကြိုးစားပြီးမှ အောက်ဆုံးအဆင့်ကနေကပ်ပြီး ခြေစစ်ပွဲအောင်ခဲ့ရသည်။
တစ်ကမ္ဘာလုံးရှိ ဘောလုံးပရိသတ်တွေလည်း ရင်တမမ မောခဲ့ကြရသည်။
ဘရာဇီးအသင်းသည် ခြေစစ်ပွဲအောင်ခဲ့သော်လည်း စိတ်မအေးရပေ။ ကမ္ဘာ့ဘောလုံးအဆင့်အတန်းသတ်မှတ်ရာတွင် နံပါတ်တစ်နေရာမှာသာ အမြဲရှိနေခဲ့သော ဘရာဇီးအသင်းသည် ၂ဝဝ၁မှာတော့ အဆင့်လျှောကျသွားရလေသည်။
ဒီတော့ ၂ဝဝ၂ကမ္ဘာ့ဖလားပွဲမှာ အောင်မြင်မှုရဖို့တော်တော်အခက်ကြုံနေကြရသည်။ ဗိုလ်စွဲနိုင်ခြေရှိသော အသင်းတွေ သတ်မှတ်ရာမှာလည်း အရင်က ရွှေထီးဆောင်းခဲ့သော မျက်နှာကိုထောက်၍ အားနာပါးနာ စာရင်းသွင်းပေးခဲ့ကြသည်။ သိပ်ဟက်ဟက်ပက်ပက်မရှိ။ တချို့က ဘရာဇီးခေတ်ကုန်ပြီလို့တောင် အမနာပ ပြောချင်လာကြသည်။
ဘရာဇီးဘောလုံးအသင်းမှာ အထည်ကြီးပျက်လိုဖြစ်နေ၏။ တစ်ယောက်နှင့်တစ်ယောက် အတွဲမမိဘဲဖြစ်နေရ၏။ ဖာလူဒါရယ်၊ စတုမဓူရယ် ရောစားသလို အီလည်လည်ကြီးဖြစ်နေရ၏။ အသင်းအောင်မြင်မှုပြန်ရဖို့ အမျိုးမျိုး စဉ်းစားရာမှာ ထူးခြားသော အကြံအစည်တစ်ခုကို စိတ်ကူးမိကြ၏။ နှစ်ဆယ်ရာစု၏အကောင်းဆုံး ဂန္ထဝင်ဘောလုံးသမားကြီး ပီလီကို ဘရာဇီးအသင်းမှာ ပြန်လည်ပါဝင်ကစားခိုင်းဖို့ပင်ဖြစ်လေ၏။

* * * * *

အမေရိကန်နှင့် မဟာမိတ်များသည် အာဖဂန်စစ်ပွဲမှာအနိုင်ရပြီး အောင်ပွဲခံခဲ့ကြသည်။ သို့ရာတွင် လွတ်လွတ်ကျွတ်ကျွတ် ဝမ်းမသာနိုင်။ ထီပေါက်ပြီး လက်မှတ်အသိမ်းလွန်နေတဲ့လူလို မချင့်မရဲဖြစ်နေရသည်။ အကြမ်းဖက်သမားခေါင်းဆောင်တွေကို ဖမ်းလို့မမိသေး။ ဘယ်ဆီရောက်နေမှန်းလည်းမသိ။ သူတို့ကိုဖမ်းမိတဲ့တိုင်အောင် အကြမ်းဖက်ဝါဒကို အမြစ်ပြတ်အောင်ချေမှုန်းနိုင်ပြီဟု ကြွေးကြော်နိုင်မည် မဟုတ်သေး။
သူတို့သည် စစ်ပွဲများကိုဆင်နွှဲရာမှာ ခေတ်အမီဆုံး၊ အဆန်းသစ်ဆုံး၊ နောက်ဆုံးပေါ်လက်နက်တွေကို ထုတ်သုံးခဲ့ကြသည်။ ကြဲချခဲ့သည့်ဗုံးတန်ချိန်ပေါင်းကလည်း မနည်းမနောပဲ။ ရန်သူစစ်သားအားလုံးတို့၏ ကိုယ်အလေးချိန်စုစုပေါင်းထက်တောင် ပိုများနေမလားမသိ။သို့ရာတွင် မှန်းချက်မကိုက်သေး။
သူတို့သုံးစွဲခဲ့သည့် ဆက်သွယ်ရေးစနစ်တွေကလည်း အံ့မခန်းပါပဲ။ စစ်မြေပြင်မှာ ရောက်နေသည့် စစ်သားတစ်ယောက်က အမေရိကန်မှာကျန်ခဲ့တဲ့ ရည်းစားဆီ ဂြိုဟ်တုကတစ်ဆင့် ဖုန်းလှမ်းဆက်လို့ ရလောက်တဲ့အထိအဆင့်မြင့်သည်။ သို့ရာတွင် သူတို့ အလိုရှိသော ရန်သူခေါင်းဆောင်တွေကိုတော့ ခြေရာတောင်မိအောင်မရှာနိုင်။
သူတို့၏ လက်ရွေးစင် ကွန်မန်ဒိုတပ်သားများမှာလူစွမ်းကောင်းများဖြစ်၏။ ခေတ်မီဆက်သွယ်ရေးကိရိယာများ၊ အစွမ်းထက်ဆုံး လက်နက်များ ကိုင်ဆောင်ထားကြသည်။ အထူးလေ့ကျင့်ထားသူများလည်း ဖြစ်သည်။ သူတို့၏ တိုက်ခိုက်ရေးစွမ်းရည်ကလည်း သူတို့ဘက်က တစ်ယောက်ကျလျှင် ရန်သူဘက်က အယောက်နှစ်ရာကျအောင်ချေမှုန်းနိုင်သည်။
အဲ တစ်ခုရှိတာက သင်္ချာသဘောအရ အချိုးချကြည့်လျှင် ရန်သူဘက်က လူနှစ်ရာသေတဲ့အခါတိုင်း ကိုယ့်ဘက်ကလည်း တစ်ယောက်သေပေးရမည့် အနေအထားဖြစ်သည်။ ထိုအခါ ရိန်းဂျားတပ်သားတို့သည် ရန်သူနှစ်ရာပြည့်အောင် မသတ်ကြတော့။ တစ်ရာ့ကိုးဆယ့်ကိုးယောက်လောက်သတ်ပြီးတာနဲ့ ဆက်မတိုက်တော့ဘဲပြန်လှည့်လာကြတော့သည်။
ဒီလိုနဲ့ပဲအကြမ်းဖက်သမားတွေကို အပြီးအပြတ်ချေမှုန်းပစ်ဖို့အခက်အခဲတွေ့နေရသည်။ တကယ်တမ်းအရေးကြီးသည့် တိုက်ပွဲကလည်း တောထဲတောင်ထဲမှာ သူသေကိုယ်သေတိုက်ရဲတဲ့လူမျိုးမှ ဖြစ်မည်။ ထို့ကြောင့် အထူးတပ်ဖွဲ့တစ်ဖွဲ့ကို စုစည်းရသည်။ ထိုတပ်ဖွဲ့ထဲတွင် မွန်ဂိုလေးသည်တော်များ၊ ဂျပန်ဆာမူရိုင်းများ၊ ထရိုဂျင်စစ်သည်တော်များပါဝင်ပြီး စစ်သူကြီး ဟန်နီဘောက ကွပ်ကဲအုပ်ချုပ်သည်။

* * * * *

အကြမ်းဖက်သမားတွေဆိုတာက တောကြိုအုံကြားမှာသာရှိနိုင်တာမဟုတ်။ မြို့ကြီးပြကြီးတွေမှာလည်း ခိုအောင်းနေတတ်သည်။ ဒါတင်မက တခြား ဒုစရိုက်သမားတွေလည်း ရှိသေးသည်။ သူခိုး၊ ဓားပြတွေ၊ လူသတ်သမားတွေ၊ မူးယစ်ဆေးဝါးမှောင်ခိုမှုတွေ၊ လူလိမ်လူကောက်တွေ။
ခုချိန်မှာခေတ်မီ ထောက်လှမ်းရေးကိရိယာတွေသုံးနေပြီးဖြစ်သောကြောင့် သူတို့ကို လွယ်လွယ်ဖမ်းနိုင်မည်ထင်ကြသည်။ သို့ရာတွင် ဒီလိုမဟုတ်။ သူတို့ကလည်း ခေတ်မီကိရိယာတွေသုံးပြီး ကိုယ်ယောင်ဖျောက်နိုင်နေကြပြန်သည်။ ပြီးတော့ လူဆိုးတွေဆိုတာကလည်း ဟိုအရင်ကလို အရုပ်ဆိုးဆိုး၊ လူမိုက်ဂိုက်မျိုးမဟုတ်တော့။ သာမန် သူလိုငါလိုမျိုးပင်ဖြစ်၏။ လူကောင်းတွေကြားထဲရောနှောနေလိုက်လျှင် အလွယ်တကူရှာမတွေ့နိုင်တော့။ ပြီးတော့ သူတို့တွေက အရင်ကထက် ဉာဏ်ရည်ဉာဏ်သွေးလည်း ပိုမြင့်လာသည်။
ဒီကြားထဲမှာ လူတွေက အက်ဖ်ဘီအိုင်တို့၊ စီအိုင်အေတို့ကို သိပ်အထင်မကြီးကြတော့။ စက်တင်ဘာအကြမ်းဖက်မှုကို ကြိုတင်မတားဆီးနိုင်ရကောင်းလားဟု အပြစ်တင်ချင်သလိုရှိ၏။ ဒါကို အခွင့်ကောင်းယူပြီး ဒုစရိုက်သမားတွေက ခေါင်းထောင်ချင်လာသည်။ ခုခေတ်စုံထောက်တွေက ခေတ်မီ ပစ္စည်းကိရိယာတွေ အားကိုးလွန်းသည်။ ကိုယ်ပိုင်ဦးနှောက်ကို သိပ်အသုံးမချချင်ကြတော့။ လက်ရှိအခြေအနေမှာ လူဆိုးတွေနှင့် ယှဉ်ပြိုင်နိုင်ဖို့ဆိုတာ အထောက်အကူကိရိယာတွေနှင့် မလုံလောက်တော့။ သူတင်ကိုယ်တင် ဉာဏ်ကစားနိုင်မှ ဖြစ်တော့မည်။
ထို့ကြောင့် ဦးနှောက်စွမ်းအားကြီးသော ပုဂ္ဂိုလ်တစ်ယောက်ကို ရှာရတော့မည်။ ထိုတာဝန်မှာ ဗြိတိသျှဝန်ကြီးချုပ် တိုနီဘလဲ၏ခေါင်းပေါ်ပုံကျလာသည်။ သူသည် လန်ဒန်မြို့၊ ဘေကာလမ်း၊ အမှတ်၂၂၀-ဘီ သို့သွားသည်။ အခန်းရှေ့မှာရပ်သည်။ အခန်းတံခါးက ပိတ်ထား၏။ တခြားအိမ်ခန်းတွေလို လူခေါ်ခေါင်းလောင်းတို့ အင်တာကွန်းတို့ တပ်မထား။ ထို့ကြောင့် တံခါးကို လက်နှင့်ပင် ခေါက်လိုက်ရသည်။ ထိုအခါ အခန်းထဲမှ လှမ်းအော်ပြောလိုက်သော အသံကိုကြားရ၏။
'တိုနီဘလဲလားဟေ့ ဝင်ခဲ့လေကွယ်'
တိုနီဘလဲသည် အလွန်အံ့ဩသွားရ၏။ အခန်းထဲရောက်သောအခါ ဆေးတံကြီးခဲလျက် ထိုင်နေသော ပုဂ္ဂိုလ်ကြီးကို သူကမေးလိုက်သည်။
'ကြိုတင်အကြောင်းကြားထားတာလည်း မဟုတ်ဘဲနဲ့ တံခါးခေါက်တာ ကျွန်တော်မှန်းဘယ်လိုသိတာလဲ'
'လွယ်ပါတယ်၊ တံခါးကိုခေါက်တဲ့အခါ သူများလိုရိုးရိုးမခေါက်ဘဲ မြင်းခွာသံလို အပြွတ်လိုက် ခေါက်တတ်တာ မင်းရယ်၊ အမေရိကန်သမ္မတဘုရ်ှရယ် နှစ်ယောက်ပဲရှိတယ်၊ အခု သမ္မတဘုရ်ှက တရုတ်ပြည်သွားနေတယ်ဆိုတော့ တံခါးလာခေါက်တဲ့သူဟာ မင်းပဲဖြစ်ရမယ်ဆိုတာ တပ်အပ်သိတာပေါ့ကွယ်'
တိုနီဘလဲမှာ ထိုပုဂ္ဂိုလ်ကြီးကို တလေးတစားလက်ဆွဲနှုတ်ဆက်လိုက်ပြီးနောက်
'တော်ပါပေရဲ့ခင်ဗျား၊ တော်ပါပေရဲ့၊ ဒါကြောင့်လည်း စုံထောက်ကြီး ရှားလော့ဟုမ်းရယ်လို့ ကျော်ကြားပေတာကိုး' ဟုပြောလိုက်လေ၏။

* * * * *

မိုက်ကရိုဆော့ဖ် ကုမ္မဏီသူဌေး ဘီလ်ဂိတ်သည် ကွန်ပျုတာဆော့ဖ်ဝဲတွေ တစ်ခုပြီးတစ်ခု တီထွင်ထုတ်လုပ်နေသည်။ အရင်ထုတ်လုပ်ခဲ့သော ဝင်းဒိုးစီးရီးတင်မကတော့ဘဲ စီလင်စီးရီး၊ ပေါ်တီကိုစီးရီး၊ တွိုင်းလက်စီးရီးတွေပါထပ်ထွင်သည်။
ကွန်ပျူတာမှာ တီဗီတို့၊ ဗီဒီဒီတို့တွဲပါသည်။ တီဗီဂိမ်းကစားနိုင်သည်။ ဒါတွေက အသေးအဖွဲ။ ဟိုအရင်ကတည်းက အဆင့်မြင့်စက်တွေမှာ ပါပြီးသား။ ကွန်ပျူတာနှင့် တယ်လီဖုန်းတွဲပေးထားသည်။ မော်နီတာပေါ်မှာ တစ်ဖက်လူရဲ့မျက်နှာကိုပါ မြင်ရသည်။ ဒါလည်းသိပ်အထူးအဆန်းတော့မဟုတ်။ ကီးဘုတ်မပါဘဲ အသံနှင့်စေခိုင်းလို့ရသော ကွန်ပျူတာ၊ ကမ္ဘာပေါ်ရှိ ရုပ်ရှင်ရုံ အားလုံးနှင့် ဆက်သွယ်ထားပြီး ပြနေတဲ့ဇာတ်ကားတွေထဲက ကြိုက်ရာကို အိမ်ကကြည့်နိုင်သော ကွန်ပျူတာ စသည်ဖြင့်ထပ်ထွင်သည်။
ဒါတွေက သိပ်ပြဿနာမဟုတ်သေး။ သူထွင်ကိုယ်ထွင် ပြိုင်ကြတာ ဓမ္မတာပဲ။ ဒီနေရာမှာ ဘီလ်ဂိတ်က ကွန်ပျူတာနယ်ပယ်မှာသာမကဘဲ တခြားလုပ်ငန်းတွေကိုပါ နယ်ချဲ့လာသည်။ မိုက်ကရိုဆော့ဖ် ကက်ဆက်၊ မိုက်ကရိုဆော့ဖ် ကင်မရာ၊ မိုက်ကရိုဆော့ဖ် ရေခဲသေတ္တာ၊ မိုက်ကရိုဆော့ဖ် လေအေးပေးစက်စသည်ဖြင့်။
ထို့နောက် တစ်စင်းလုံးကို ကွန်ပျူတာနှင့်ထိန်းချုပ်မောင်းနှင်သော မိုက်ကရိုဆော့ဖ်ဇိမ်ခံမော်တော်ကားကို ထုတ်လိုက်ပြန်သောအခါ ကမ္ဘာကျော် ကားကုမ္ပဏီကြီးတွေ မျက်လုံးပြူးကုန်သည်။
ဒါတွင်မကသေး။ အရသာမျိုးစုံကို ခံစားစေနိုင်သော ဆော့ဖ်ဝဲတစ်ခုကို ထပ်မံတီထွင်လိုက်ပြန်သည်။ ကွန်ပျူတာနှင့်ဆက်ထားသော မောက်စ်အသေးစားလေးကို ပါးစပ်ထဲငုံထားလိုက်ရုံပင်ဖြစ်၏။
ဆေးလိပ်သောက်ချင်သလား၊ ခလုတ်နှိပ်လိုက်ရုံဖြင့် ပါးစပ်ထဲက မောက်စ်ကလေးက လျှာပေါ်ကို ဆေးလိပ်၏ခံစားမှုကိုရအောင် လှုံ့ဆော်ပေးလိမ့်မည်။ ထို့အတူ လက်ဖက်ရည်၊ ကော်ဖီ၊ ရေခဲမုန့်၊ သစ်သီးစသော အရသာမျိုးစုံကိုလည်း တကယ်စားရသောက်ရသလို ခံစားရသည်။
ရှေ့ဆက်ပြီး သုတေသန လုပ်နေတာကတော့ ကွန်ပျူတာနှင့်လူသားကို လက်ထပ်နိုင်သည့် နည်းပညာပင်ဖြစ်၏။ ထိုကိစ္စကို လူပျိုကြီး၊ အပျိုကြီးတွေက အလွန်စိတ်ဝင်စားစွာ စောင့်မျှော်နေကြသည်။
ဒီအတိုင်းဆိုလျှင် သိပ်မလွယ်။ နည်းပညာလောကတစ်ခုလုံး သူ့လက်သူ့ခြေဖြစ်တော့မည်။ နေရာတကာမှာ သူချည်း လွှမ်းမိုးလာတော့မည်။ ထို့ကြောင့် ပြိုင်ဘက်အုပ်စုတွေ ပေါင်းစည်းပြီး ဘီလ်ဂိတ်နှင့် မိုက်ကရိုဆော့ဖ်ကို အန်တုဖက်ပြိုင်ဖို့စဉ်းစားရတော့သည်။ ဘီလ်ဂိတ်ကလည်း နှယ်နှယ်ရရမဟုတ်။ တော်ရုံတန်ရုံလူက သူ့ကိုမယှဉ်နိုင်။ နောက်ဆုံးတော့ ဘီလ်ဂိတ်ကို နိုင်အောင်တိုက်ခိုက်နိုင်မည့်လူတစ်ယောက်ကို ရှာတွေ့ကြသည်။ ထိုပုဂ္ဂိုလ်ကြီးကို ပြိုင်ဘက်ကုမ္ပဏီအုပ်စု၏ ဥက္ကဌအဖြစ် ထင်မြှောက်လိုက်ကြသည်။
ထိုသူကား ပိုက်သာဂိုးရပ်စ်ပင်ဖြစ်လေ၏။

* * * * *

ယူရီဂလင်းသည် အာကာသယာဉ်မှူးတစ်ဦးဖြစ်၏။ သူသည် မကြာခင် ရက်ပိုင်းအတွင်းမှာပင် လပေါ်သို့အာကာသယာဉ်ဖြင့် ခရီးတစ်ခေါက်ထွက်စရာရှိနေသည်။ သူ့တာဝန်ကတော့ လပေါ်မှာ နေရောင်ခြည်စွမ်းအင်သုံးအလိုအလျောက်ဓာတ်ခွဲခန်းငယ်တစ်ခုကို သွားရောက်တည်ဆောက်ပေးရမည်ဖြစ်၏။
ထိုခရီးစဉ်အတွက် လေ့ကျင့်မှုတွေအပြည့်အဝပြုလုပ်ခဲ့ပြီး ဆောင်ရွက်ရမည့် ကိစ္စတွေအတွက်လည်း အသေးစိတ်လေ့လာပြင်ဆင်ခဲ့ပြီးပြီ။ ကျန်းမာရေး စစ်ဆေးခဲ့ရာမှာလည်း ကြံ့ခိုင်သန်စွမ်းမှု အပြည့်အဝရှိကြောင်း သိရပြီးပြီ။ အာကာသယာဉ်ကို သယ်ဆောင်သွားမည့် ဒုံးပျံနှင့်လဆင်းယာဉ်တို့သည်လည်း အပြစ်အနာအဆာမရှိ၊ အားလုံးပုံမှန် အလုပ်လုပ်နိုင်ကြောင်း စစ်ဆေးပြီးပြီ။ သူနှင့်အတူတကွ လိုက်ပါကြသည့် တခြားအာကာသယာဉ်မှူးတို့သည် အစစအရာရာအဆင်သင့်ဖြစ်နေကြပြီ။ ဒီခရီးစဉ်သည် ရာနှုန်းပြည့်အောင်မြင်လိမ့်မည်ဟု သက်ဆိုင်ရာ ပညာရှင်များက ယုံကြည်နေကြသည်။
သို့ရာတွင် ဒီခရီးစဉ်အပေါ် သံသယမကင်းဖြစ်နေသူက ယူရီဂလင်း၏ဇနီးပင်ဖြစ်၏။ ခုတလော အိပ်မက်တွေသိပ်မကောင်းလှ။ မနေ့ညက အိပ်မက်ထဲမှာ လငပုပ်ဖမ်းပုံကို မြင်မက်ခဲ့သည်။ အတိတ်နိမိတ်တွေကလည်း ပြပြနေသည်။ အိမ်မှပစ္စည်း အကျိုးအပဲ့ အကွဲအရှများသည်။ မော်တော်ကားပျက်သည်။ ဒီရက်ပိုင်းမှာ စိတ်လက်မကြည်လင်ဘဲ လေးလံထိုင်းမှိုင်းနေသည်။ ဒီတစ်ခေါက် သူ့ယောက်ျား ခရီးထွက်ရမည့်ကိစ္စနှင့်ပတ်သက်ပြီး စိုးရိမ်မကင်းဖြစ်နေမိ၏။
ထို့ကြောင့် နက္ခတ္တဗေဒဆရာကြီး နော်စထရာဒေးမတ်စ်ထံသွားပြီး သူ့ယောက်ျား၏ ဇာတာကို စစ်ဆေးခိုင်းသည်။ ဆရာကြီးက သူ၏လက်စွဲ ဝေဒကျမ်းနှင့်တိုက်ဆိုင်ညှိနှိုင်းပြီးနောက်။
'အိမ်း ဇာတာရှင်ရဲ့ မွေးနံဂြိုဟ်က ဗျာရအိမ်ထဲကျတဲ့အပြင် ရာဟုကလည်း မြင်နေသေးတယ်ဆိုတော့ အညံ့ပိုင်းထဲရောက်နေတယ်ကွယ့်၊ ပြီးတော့ ခရီးထွက်ရမယ့်ရက်ကလည်း ပြဿဒါးရက်ကြီးဖြစ်နေတယ်၊ ဒါကြောင့် ဒီခရီးမှာ ဥပါဒ်အန္တရာယ်ဖြစ်မယ့်ကိန်း မြင်နေရတယ်'
အမျိုးသမီးမှာ အတော်စိုးရိမ်သွားဟန်ဖြင့်
'ဒုက္ခပါပဲဆရာကြီးရယ်၊ ယတြာလေး ဘာလေးချေလို့မရဘူးလား'
'အင်း လုပ်ပေးမယ်လေ၊ တစ်ခုတော့ ရှိတယ်၊ ယတြာချေရမယ့်ပစ္စည်းက အတော်ရှားပါးတယ်၊ လွယ်လွယ်ကူကူရှာလို့ရမှာမဟုတ်ဘူး၊ အဲဒီလိုခဲခဲယဉ်းယဉ်းရှာရတဲ့ပစ္စည်းဖြစ်မှလည်း အစွမ်းထက်မှာကိုး'
'ဘာပစ္စည်းလဲဆိုတာသာပြောပါ၊ ဘယ်လောက်ခက်ခက်ရအောင် ရှာပေးပါ့မယ်'
'တခြားတော့ မဟုတ်ဘူးကွယ့်၊ အာဖဂန်နစ္စတန်စစ်ပွဲသတင်းအကြောင်း လုံးဝမပါတဲ့ဂျာနယ်တစ်စောင်ကိုရအောင်ရှာရမှာကွယ့်'
အမျိုးသမီး၏မျက်နှာပေါ်မှာ စိတ်ဓာတ်ကျသွားပုံကို အထင်းသားမြင်လိုက်ရသည်။

* * * * *

မော်ဒန်စာပေသမားများကိုဆုံးမရန်ဆိုသော ရည်ရွယ်ချက်ဖြင့် ဂန္ထဝင်စာပေဝါဒီများသည် အင်္ဂလန်နိုင်ငံရှိ စထရက်ဖို့ဒ်အွန်-အဗွန်သို့ စုဝေးရောက်ရှိနေကြသည်။ ဒီနေရာကို ရွေးရတာက အကြောင်းရှိ၏။ စထရက်ဖို့ဒ်သည် ကမ္ဘာကျော် ဂန္ထဝင်စာရေးဆရာကြီး ရှိတ်စပီးယား၏ ဇာတိမြို့ဖြစ်နေလို့ပါပဲ။
ရှိတ်စပီးယားရှိလျှင်တော့ မော်ဒန်ကောင်တွေကို ကောင်းကောင်းပညာပေးနိုင်လိမ့်မည်ဟု ယူဆရသည်။ ထို့ကြောင့် သူ့ကိုလာရှာကြခြင်းဖြစ်၏။ သို့ရာတွင် ရှိတ်စပီးယားသည် ဂန္ထဝင်နှင့်မော်ဒန် နားလည်မှုစာချွန်လွှာ လက်မှတ်ရေးထိုးပွဲ တက်ရောက်ရန်ပြင်သစ်ပြည်ပါရီမြို့သို့ထွက်ခွာသွားပြီ ဖြစ်သောကြောင့်တွေ့ခွင့်မရကြတော့ပါ။


မင်းလူ
------------------
အိုင်ဒီယာမဂ္ဂဇင်း၊
ဇွန်၊ ၂၀၀၂။