08.12.2012 နေ့ဖတ်ရန်သတင်းများ

by Myanmar Journal on Friday, December 7, 2012 at 5:01pm ·

အယ်လ်ဂျာဇီးရား သတင်းကို မြန်မာ ကန့်ကွက်

အယ်လ်ဂျာဇီးရား ရုပ်မြင်သံကြား သတင်း ဌာနဟာ ကာတာ နိုင်ငံ အခြေစိုက် ဖြစ်ပါတယ်

အယ်လ်ဂျာဇီးရား သတင်း ဌာန ကနေ မကြာခင် ထုတ်လွှင့် ပြသဖို့ ရှိတဲ့ ရခိုင် ပြည်နယ် ပဋိပက္ခ ဆိုင်ရာ ရုပ်မြင်သံကြား သတင်း မှတ်တမ်း တစ်ခုကို မြန်မာ အစိုးရက ပြင်းပြင်း ထန်ထန် ကန့်ကွက် လိုက် ပါတယ်။

အယ်လ်ဂျာဇီးရားက သူတို့ အဆို ရိုဟင်ဂျာ ဆိုတဲ့ ရခိုင် ဒေသက မွတ်ဆလင် တွေကို လူမျိုးတုံး သတ်ဖြတ်မှုတွေ ရှိနေတယ်လို့ သူတို့ ထုတ်လွှင့်ချက်မှာ ထည့်သွင်း ဖေါ်ပြမှာ ဖြစ်တဲ့ အတွက် အခုလို ကန့်ကွက် ရတာ ဖြစ်ကြောင်း မြန်မာ နိုင်ငံခြားရေး ဝန်ကြီး ဌာန ကနေ ဒီဇင်ဘာလ ၆ ရက် သောကြာနေ့ ရက်စွဲနဲ့ ထုတ်ပြန်တဲ့ ကြေညာချက် ထဲမှာ ဖော်ပြထား ပါတယ်။

အယ်လ်ဂျာဇီးရား ရုပ်မြင် သံကြား သတင်း ဌာနဟာ ကာတာ နိုင်ငံ အခြေစိုက် သတင်း ဌာန တခု ဖြစ်ပြီး၊ ရခိုင် ပြည်နယ် မှတ်တမ်း သတင်းကို ဒီဇင်ဘာလ ၈ ရက်နေ့ ကနေ ၁၂ ရက်နေ့ အထိ အာရပ် ဘာသာနဲ့ ထုတ်လွှင့်မှာ ဖြစ်ပါတယ်။

ဒီအစီအစဉ် ကိုပဲ အင်္ဂလိပ် ဘာသာနဲ့ ဒီဇင်ဘာ ၉ ရက်နေ့ ကနေ ၁၃ ရက်နေ့ အထိ ထုတ်လွှင့် ပြသ သွားမှာ ဖြစ်ကြောင်း အဲလ်ဂျာဇီးရား သတင်း ဌာနက ကြော်ငြာ နေပါတယ်။

ရခိုင် ပြည်နယ် ပဋိပက္ခကို မဟုတ် မမှန် လုပ်ကြံ ပုံကြီးချဲ့ပြီး သတင်း မှတ်တမ်း အဖြစ် ထုတ်လွှင့် ပြသဖို့ အယ်လ်ဂျားဇီးရားက စီစဉ် နေတယ်လို့ မြန်မာ နိုင်ငံခြားရေး ဝန်ကြီးဌာနရဲ့ ကြေညာချက် ထဲမှာ ဖေါ်ပြ ထားပါတယ်။

ဒါဟာ နိုင်ငံခြား သတင်းဌာန တခုကို မြန်မာ အစိုးရက ပထမဦးဆုံး ကန့်ကွက်မှုလည်း ဖြစ်ပါတယ်။

ရခိုင်ပြည်နယ် အတွင်း ဖြစ်ခဲ့တဲ့ ပဋိ ပက္ခတွေနဲ့ ပတ်သက်ပြီး ဖြစ်ရပ်မှန်ကို လေ့လာ စုံစမ်းဖို့ သမ္မတက ဖွဲ့စည်း ပေးထားတဲ့ စုံစမ်းရေး အဖွဲ့ဝင် ကိုဇာဂနာခေါ် ဦးသူရကတော့ မြန်မာ အစိုးရ ဘက်က ကန့်ကွက် တာဟာ လောလောဆယ် တည်ငြိမ် နေတဲ့ အခြေ အနေမှာ အယ်လ်ဂျာဇီးရားက ထုတ်လွှင့်မယ့် အစီ အစဉ်ကြောင့် ဆူပူ အုံကြွမှုတွေ ထပ်ဖြစ် လာမှာကို စိုးရိမ်ပြီး ကန့်ကွက်တာ လို့ယူဆ မိကြောင်း ပြောပါတယ်။

အရင် တုန်းကလည်း အလားတူ ဖြစ်ခဲ့ဖူးတဲ့ သာဓကတွေ ရှိခဲ့တယ်လို့ သူက ပြောပါတယ်။

အယ်လ်ဂျာဇီးရား သတင်း ဌာနက ပြောဆိုချက် တွေဟာ မှန်ကန်မှု မရှိတာကိုလည်း သူ့ အတွေ့ အကြုံအရ သိခဲ့ရတယ်၊ ဒုတိယ အကျော့ ပြဿနာတွေ ဖြစ်ခဲ့လို့ မီးတွေ လောင်နေ ခဲ့ချိန်က စုံစမ်းရေး အဖွဲ့ဝင်တွေ ဒေသတွင်းမှာ ရှိနေပြီး အဲဒီလို နေရာ တွေကို အယ်လ်ဂျာဇီးရားက မရောက်ရှိ ခဲ့ဘူးလို့ ကိုဇာဂနာက ပြောပါတယ်။

ရခိုင်ပြည်နယ် အတွင်းမှာ လူမျိုးတုံး သတ်ဖြတ်မှု ရှိနေတယ် ဆိုပြီး ပြသမယ့် အယ်လ်ဂျာဇီးရားရဲ့ သတင်း မှတ်တမ်း ထဲက စွပ်စွဲချက် ဟာလည်း အဓိပ္ပါယ် မရှိဘူးလို့ ဦးသူရက ပြောပါတယ်။

အယ်လ်ဂျာဇီးရား အနေနဲ့ သက်သေ ပြနိုင်ရင် ပြဖို့နဲ့ စုံစမ်းရေး အဖွဲ့ရဲ့ လေ့လာ စုံစမ်းမှု အရတော့ ဒီလက္ခဏာ ရှိတာ မတွေ့ ခဲ့ရဘူးလို့ ဆိုပါတယ်။

လက်ပံတောင်း ကိစ္စ တရုတ်သံအမတ် ရှင်းလင်း

မြန်မာ နိုင်ငံမှာ နိုင်ငံခြား ရင်းနှီး မြှုပ်နှံမှု အတွက် တရုတ် နိုင်ငံဟာ အရေးကြီးတဲ့ မိတ်ဖက် နိုင်ငံ တခု လို့ ပြောကြား

လက်ပံတောင်း တောင် ကြေးနီ စီမံကိန်းနဲ့ ပတ်သက်ပြီး မြန်မာ နိုင်ငံ ဆိုင်ရာ တရုတ် သံအမတ်ကြီး ကနေ ရန်ကုန်မြို့မှာ သတင်းစာ ရှင်းလင်းပွဲ ပြုလုပ်ခဲ့ ပါတယ်။

တရုတ်သံ အမတ် လီဂျင်ဟွာက ဒီစီမံကိန်း အတွက် ဝမ်ပေါင် ကုမ္ပဏီ ကနေ မြေဧက ၆၀၀၀ စာ လျော်ကြေး ပေးထားပြီ ဖြစ်ကြောင်းနဲ့ စီမံကိန်းကို ဥပဒေနဲ့ အညီ ဆောင်ရွက် ခဲ့တာ ဖြစ်ကြောင်း ပြောကြားသွား ပါတယ်။

မြစ်ဆုံပဲ ဖြစ်ဖြစ် လက်ပံတောင်းပဲ ဖြစ်ဖြစ် ဒီစီမံကိန်းတွေဟာ နှစ်နိုင်ငံ စလုံး အတွက် တကယ့်ကို အကျိုး ရှိစေမယ့် စီမံကိန်းတွေ ဖြစ်ကြောင်း သံအမတ်က ပြောကြား ပါတယ်။

မြန်မာ နိုင်ငံမှာ လွှတ်တော် ကနေ နိုင်ငံခြား ရင်းနှီးမြှုပ်နှံမှု ဥပေဒကို မကြာသေးခင် က အတည်ပြု ပြီးသား ဖြစ်ကြောင်း နဲ့ အဲဒီလို ရင်းနှီး မြှုပ်နှံတဲ့ နေရာမှာ တရုတ် နိုင်ငံဟာ အရေးကြီးတဲ့ မိတ်ဖက် နိုင်ငံ တခု ဖြစ်တယ်လို့ ပြောကြား သွားပါတယ်။

ဒေါ်အောင်ဆန်းစုကြည် ဦးဆောင်နေတဲ့ စုံစမ်း စစ်ဆေးရေး ကော်မရှင်ရဲ့ ဆုံးဖြတ်ချက်တွေဟာ တရား မျှတမှု ရှိမယ် ဆိုရင် သူတို့ အနေနဲ့ လက်ခံသွားမှာ ဖြစ်တယ် လို့လည်း သံအမတ်ကြီးက ပြောပါတယ်။

တရုတ် သံအမတ်ကြီးဟာ မြန်မာ ပြည်တွင်း သတင်း ဂျာနယ် ၁၀ ခု ကျော်နဲ့ တရုတ် သတင်းဌာန တချို့ကို သောကြာနေ့က တွေ့ဆုံ ပြောကြားခဲ့တာ ဖြစ်ပါတယ်။

အဝေးရောက် ဟားမတ်စ်ခေါင်းဆောင် ဂါဇာ ရောက်ရှိ

မစ္စတာ မာရှဲလ်က ဂါဇာဟာ သူ့နှလုံးသား ထဲမှာ အမြဲတမ်း ရှိနေတာ ပါလို့ ပြောကြား

အဝေးရောက် ပါလက်စတိုင်း ဟားမတ်စ်အဖွဲ့ ခေါင်းဆောင် ခါလိဒ် မာရှဲလ် ဟာ နှစ်ပေါင်း ၄၀ နီးပါး အတွင်း ပထမဦးဆုံး အကြိမ်အဖြစ် ဂါဇာ ကမ်းမြောင် ဒေသကို အလည်အပတ် ရောက်ရှိ လာပါတယ်။

မစ္စတာ မာရှဲလ်က ဂါဇာဟာ သူ့နှလုံးသား ထဲမှာ အမြဲတမ်း ရှိနေတာ ပါလို့ ပြောကြားပြီး၊ ဂါဇာ ကမ်းမြောင် ဒေသက ဟားမတ်စ် အဖွဲ့ ခေါင်းဆောင် အစ္စမေးလ် ဟားနီးယား ကလည်း ခါလိဒ် မာရှဲလ်ရဲ့ ခရီးစဉ်ကို ကြိုဆို လိုက်ပါတယ်။

မစ္စတာ မာရှဲလ်ဟာ ဂါဇာကို အုပ်ချုပ် နေတဲ့ ဟားမတ်စ် အဖွဲ့ ၂၅ နှစ် ပြည့် အခမ်း အနား ကို ကျင်းပမှာ ဖြစ်ပါတယ်။

ဟားမတ်စ် အဖွဲ့ရဲ့ သြဇာနဲ့ အင်အား တိုးမြင့် လာမှုနဲ့ အတူ မစ္စတာ မာရှဲလ်ရဲ့ အခု ခရီးစဉ်ဟာ အလွန် တရာမှ အ ရေးပါကြောင်း သတင်းထောက် တွေက ပြောပါ တယ်။

ဟားမတ်စ်ရဲ့ အဓိက ပြိုင်ဖက် အဖွဲ့ ဖြစ်တဲ့ ဖက်တား အဖွဲ့က အရာရှိတွေ ဟာလည်း ဟားမတ်စ် ၂၅ နှစ်ပြည့် အတွက် ဂါဇာမှာ ရောက်ရှိ နေကြပါတယ်။

ဂျပန် အရှေ့မြောက်ဘက် ကမ်းလွန်မှာ ငလျင်လှုပ်

ဂျပန် နိုင်ငံ အရှေ့မြောက်ဘက် ကမ်းလွန်နေရာ တခုမှာ ပြင်းအား ၇.၃ ရှိတဲ့ မြေငလျင် တခု လှုပ်ခါသွားခဲ့ရာ ကမ်းခြေ နေရာတချို့ကို ၁ မီတာလောက် အမြင့်ရှိတဲ့ ဆူနာမီ ရေလှိုင်းတွေ ရိုက်ခတ်ခဲ့ ပါတယ်။

ဒီအတွက် အကြီး အကျယ် ထိခိုက်မှုတွေ ရှိခဲ့တယ် ဆိုတဲ့ သတင်း ထွက်လာတာတော့ မရှိသေးပါ။

ပြီးခဲတဲ့နှစ်ကတော့ အဲဒီဒေသမှာ အခုထက် ပိုမို အင်အားပြင် တဲ့ မြေငလျင်နဲ့ ဆူနာမီလှိုင်းတွေ ကြောင့် အကြီးအကျယ် ထိခိုက်ပျက်ဆီးမှုတွေ ရှိခဲ့တာ ဖြစ်ပါတယ်။

တချို့ မြေနိမ့်ပိုင်း ရပ်ကွက်တွေက လူတွေကိုတော့ ကုန်းမြင့်ရာကို သွားနေကြဖို့ သတိပေးချက် ထုတ်ပြန်ထားပါတယ်။

နောက်ဆက်တွဲ မြေငလျင်တွေ လှုပ်တဲ့ အခါမှာတော့ တိုကျိုမြို့က အဆောက် အဦးတွေပါ ခတ်ကြမ်းကြမ်း တုန်ခါသွားတယ်လို့ သိရပါတယ်။

ကုလအကြီးအကဲ ရန်ကုန်မှာ ရှင်းလင်းပွဲလုပ်

ရခိုင် တိုင်းရင်းသားတွေကို မကူညီဘူး ဆိုတာ မဟုတ် မှန်ကြောင်း သူက ပြောပါတယ်

မြန်မာနိုင်ငံ ကိုရောက်ရှိ နေတဲ့ ကုလသမဂ္ဂ လူသားချင်း စာနာမှု ဆိုင်ရာ ဒုတိယ အထွေထွေ အတွင်းရေးမှူးချုပ် ဗယ်လာရီ အေးမို့စ်က ရန်ကုန်မှာ သတင်းစာ ရှင်းလင်းပွဲ တခု ပြုလုပ်ခဲ့ ပါတယ်။

ဒီရှင်းလင်းပွဲမှာ မစ်အေးမို့စ်က ရခိုင် ပြည်နယ်မှာ ရိုဟင်ဂျာတွေဟာ အကူညီ အလိုအပ်ဆုံး လူတွေ ဖြစ်နေတာ ကြောင့် သူတို့ကို ဦးစားပေး ကူညီ ရတာ ဖြစ်ကြောင်း ပြောကြား သွားပါတယ်။

ရခိုင် တိုင်းရင်းသားတွေကို မကူညီဘူး ဆိုတာ မဟုတ် မှန်ကြောင်းနဲ့ ဒါဟာ နားလည်မှု လွဲမှား တာသာ ဖြစ်တယ်လို့ သူက ပြောပါတယ်။

ကုလ သမဂ္ဂဟာ လူသားချင်း စာနာမှု ဆိုင်ရာ စည်းမျဉ်းများ အတိုင်း ကူညီ နေတာ ဖြစ်တယ်လို့လည်း သူက ပြောကြားပါတယ်။

ကချင် ပြည်နယ်ဘက် မှာတော့ လူ ၄ သောင်း လောက်ဟာ ကေအိုင်အေ နယ်မြေမှာ ရှိနေ တာကြောင့် အကူအညီ မပေးနိုင်ခဲ့ဘူး ဆိုတာကို ပြောသွားခဲ့ ပါတယ်။

မစ်အေးမို့စ်ဟာ မြန်မာနိုင်ငံ ရခိုင် ပြည်နယ်နဲ့ ကချင် ပြည်နယ် တွေကို ခရီးလှည့်လည် အပြီးမှာ သတင်းထောက်တွေနဲ့ တွေ့ဆုံပြီး ပြောသွားတာ ဖြစ်ပါတယ်။

လူထုပညာပေးရေး မီဒီယာအကူအညီ လိုအပ်ဟု သမ္မတဦးသိန်းစိန်ပြော

( ဝဲမှ ယာ) အမေရိကန်အသံ VOA ညွှန်ကြားရေးမှူး David Ensor ၊ မြန်မာသမ္မတ ဦးသိန်းစိန်၊ ဗွီအိုအေမြန်မာပိုင်းဌာနမှူး ဦးသန်းလွင်ထွန်း တို့ နေပြည်တော် သမ္မတရုံးတွင် တွေ့ဆုံစဉ်။

ဒီကနေ့ ဒီဇင်ဘာလ ၇ရက်မှာ မြန်မာနိုင်ငံကို ရောက်ရှိနေကြတဲ့ အမေရိကန်ပြည်ထောင်စုရဲ့ ရုပ်သံလွှင့်လုပ်ငန်း အုပ်ချုပ်သူများအဖွဲ့ BBG ရဲ့ အုပ်ချုပ်သူ Governor တစ်ဦးဖြစ်တဲ့ Victor Ashe ဦးဆောင်ပြီး BBG လက်အောက်ခံ အမေရိကန်အသံ VOA ညွှန်ကြားရေးမှူး David Ensor ၊ ဗွီအိုအေမြန်မာပိုင်းဌာနမှူး ဦးသန်းလွင်ထွန်း ၊ လွတ်လပ်တဲ့အာရှအသံ RFA ရဲ့ ဥက္ကဌ Libby Liu တို့ဟာ မြန်မာသမ္မတဦးသိန်းစိန်ကို သွားရောက် တွေ့ဆုံခဲ့ကြပါတယ်။ ဒီမိုကရေစီရေးပြုပြင်ပြောင်းလဲမှုတွေ လုပ်ဆောင်နေ တဲ့ မြန်မာနိုင်ငံမှာ ပြည်ပကနေ မြန်မာဘာသာ နဲ့ ရေဒီယို၊ ရုပ်မြင်သံကြား ထုတ်လွှင့်နေတဲ့ မီဒီယာတွေရဲ့ပံ့ပိုးကူညီမှုဟာ အရေးကြီးပါကြောင်း နဲ့ အခုအခါ မြန်မာအစိုးရရဲ့ မိတ်ဆွေတွေဖြစ်လာကြတဲ့ VOA ၊ RFA သတင်းဌာနတွေနဲ့ မိတ်ဆွေအဆင့်ကနေ ဆွေမျိုးသားချင်းအဆင့်ကို တက်လှမ်းလိုပါကြောင်း သမ္မတဦးသိန်းစိန်က ရင်းနှီးနွေးထွေးစွာ ပြောကြားသွားခဲ့ပါတယ်။ ဒီတွေ့ဆုံပွဲကို ကိုယ်တိုင်တက်ရောက်သတင်းယူခဲ့တဲ့ ဗွီအိုအေ ဝိုင်းတော်သား ဦးရော်နီငြိမ်းက အပြည့်အစုံ သတင်းပေးပို့ထားပါတယ်။

ဒီကနေ့ BBG ၊ RFA ၊ VOA အဖွဲ့ရဲ့ အကြီးအကဲတွေနဲ့ မြန်မာသမ္မတဦးသိန်းစိန်တို့ နေပြည်တော်၊ သမ္မတရုံးမှာ တွေ့ဆုံကြစဉ်မှာ အခုလို ပြည်ပက မြန်မာဘာသာနဲ့ အသံလွှင့်ဌာနတွေ ကို မြန်မာအစိုးရရဲ့ လုပ်ဖော်ကိုင်ဖက်တွေ၊ ဒီမိုကရေစီရေးပြုပြင်ပြောင်းလဲမှု လုပ်ဆောင်နေတာမှာ ပံ့ပိုးကူညီနေသူတွေအဖြစ် ရှု့မြင်ထားပါတယ်လို့ သမ္မတဦးသိန်းစိန်က စတင်ပြောကြားခဲ့ပါတယ်။

“ ပြုပြင်ပြောင်းလဲမှုတွေ လုပ်ဆောင်နေတဲ့နေရာမှာ အဆွေတော်တို့ကို သိပြီးဖြစ်ပါတယ်။ နိုင်ငံရေးအရပြုပြင်ပြောင်းလဲမှုတွေ၊ လူမှု စီးပွားရေးအရ ပြုပြင်ပြောင်းလဲမှုတွေ ဒါတွေ ကျနော်တို့လုပ်နေတယ်ဆိုတာ အဆွေတော်တို့သိပြီးဖြစ်မှာပါ”

သမ္မတဦးသိန်းစိန်ရဲ့ ပြုပြင်ပြောင်းလဲရေး လုပ်ဆောင်နေမှုတွေကို အမေရိကန်ပြည်ထောင်စုမှာတင် ကြားသိနေရပြီးတော့ အခုမြန်မာနိုင်ငံကို ရောက်ရှိလာတဲ့အခါ သမ္မတကြီးရဲ့ ရိုးသားမှု နဲ့ ပြုပြင်ပြောင်းလဲရေး စိတ်အားထက်သန်မှုတွေကို ကိုယ်တိုင် ထပ်ပြီး ကြား၊ မြင်၊ တွေ့၊ သိ နေရတယ် လို့ BBG ရဲ့ Governor တစ်ဦးဖြစ်တဲ့ Victor Ashe ကလည်း ပြန်လည်ပြောကြားခဲ့ပါတယ်။

မြန်မာနိုင်ငံထဲက သတင်းတွေကို ရယူရမှာ RFA ၊ VOAတို့ရဲ့ သတင်းထောက်တွေကို သတင်းဖြစ်ပွားနေတဲ့ နေရာတွေကို လွတ်လပ်စွာ သွားရောက်ခွင့်ပြုစေလိုကြောင်းလည်း မစ္စတာ Victor Ashe က သမ္မတကို တိုက်တွန်းပြောကြားခဲ့ပါတယ်။

VOA ညွှန်ကြားရေးမှူး ဖြစ်တဲ့ David Ensor ကလည်း ၁၉၄၂ခုနှစ်က စပြီး မြန်မာနိုင်ငံကို ရေဒီယို အသံလွှင့်ခဲ့တဲ့ ဗွီအိုအေ နဲ့ မြန်မာနိုင်ငံရဲ့ သမိုင်းကြောင်း နှစ် ၇၀ ရှိလာခဲ့မှုကို စတင်ပြောကြား ခဲ့ပြီးတဲ့နောက် အခုအခါ VOA ရဲ့ အဓိကရည်မှန်းချက်ဟာ မြန်မာအစိုးရနဲ့ အစိုးရအဖွဲ့ ဝန်ကြီးဌာနတွေ နဲ့ ပူးပေါင်းဆောင်ရွက်ရေးဖြစ်တယ်လို့ သမ္မတဦးသိန်းစိန် ကို ပြောကြားခဲ့ပါတယ်။

မြန်မာအစိုးရ ပြန်ကြားရေးဝန်ကြီးဌာနလက်အောက်ခံ၊ MRTV ရုပ်သံလွှင့်ဌာနနဲ့ နားလည်မှု စာချွန်လွှာကို ရေးထိုးနိုင်ခဲ့ပြီးတော့ ဗွီအိုအေက သင်တန်းနည်းပြလာရောက်ပြီး ရက်တိုသင်တန်း MRTV မှာ ပေးနိုင်ခဲ့ကြောင်း၊ အခုအခါ ဗွီအိုအေဟာ မြန်မာနိုင်ငံက ပုဂ္ဂလိက မီဒီယာလုပ်ငန်း တစ်ခုဖြစ်တဲ့ Sky Net ရုပ်သံလွှင့်ဌာနနဲ့ ဗွီအိုအေရဲ့ အစီအစဉ်တွေကို မြန်မာနိုင်ငံမှာ Sky Net ကတဆင့် ထပ်ဆင့်ရုပ်သံလွှင့်ရေး သဘောတူစာချုပ်ကို အောင်မြင်စွာ ချုပ်ဆိုနိုင်ခဲ့ပြီဖြစ်ကြောင်း သမ္မတဦးသိန်းစိန်ကို တင်ပြပြောဆိုခဲ့ပါတယ်။

RFA အသံလွှင့်ဌာနရဲ့ ဥက္ကဌ Mrs. Libby Liu ကလည်း ပြည်ပက ရင်းနှီးမြုတ်နှံမှုတွေ မြန်မာနိုင်ငံ ကို ရောက်ရှိလာတဲ့အခါ အင်တာနက်လုံခြုံရေးဟာ အရေးကြီးတာကြောင့် နည်းပညာအရ RFA က အင်တာနက် လုံခြုံရေးကို အကူအညီပေးအပ်လိုတယ်လို့ သမ္မတဦးသိန်းစိန်ကို ပြောကြားခဲ့ပါတယ်။

သမ္မတဦးသိန်းစိန်ကလည်း BBG၊ RFA ၊ VOA တို့ရဲ့ ဝိုင်းဝန်းကူညီလုပ်ဆောင်ပေးလိုတဲ့ ကမ်းလှမ်းမှုတွေကို ကြိုဆိုပါကြောင်းနဲ့ ဒီမိုကရေစီရေးပြုပြင်ပြောင်းလဲမှု လုပ်ဆောင်ရာမှာ သူ့အနေနဲ့ အဓိက တွေ့ကြုံနေရတဲ့ အခက်အခဲတစ်ခုကတော့ "ဒီမိုကရေစီဆိုတာ မိမိရဲ့လွတ်လပ်ခွင့်လို့သာ သိမြင်ပြီးတော့ လိုက်နာစောင့်ထိန်းရမယ့် တာဝန်ရှိနေမှုတွေကိုတော့ မသိနားမလည်သူ အများစုဖြစ်နေတာကြောင့် ဒီမိုကရေစီရဲ့ တကယ့်အနှစ်သာရကို  ပြည်ပသတင်းဌာနတွေကပါ ကူညီညာ ဖြန့်ဖြူးပေးစေလိုကြောင်း၊ လူအုပ်စု များများရအောင်စုပြီး တောင်းချင်တာ ကို တောင်းဆိုတယ်ဆိုတာဟာ ဒီမိုကရေစီလို့ ယူဆနေကြတဲ့ အတွေးအခေါ်ကို ပြောင်းလဲပေးနိုင်ဖို့ အတွက် ပြည်ပမီဒီယာတွေရဲ့ အခန်းကဏ္ဍဟာ ဒီနေရာမှာ အရေးပါနေပြီးတော့ ဒီလို စိတ်ဓာတ်ပြုပြင်ပြောင်းလဲရေး အတွက် ဝိုင်းဝန်းကူညီ ဆောင်ရွက်ပေးစေလိုကြောင်း" တို့ကို သမ္မတဦးသိန်းစိန်က ပြောကြားသွားခဲ့ပါတယ်။

ပြည်ပရင်းနှီးမြုတ်နှံမှုတွေကို ဖိတ်ခေါ်ရာမှာ သံယံဇာတ ကျိမ်စာ Resources ကပ်သင့်နိုင်တယ် ဆိုတာကို အတွေ့အကြုံအရ သိမြင်လာရပြီဖြစ်တာကြောင့် သဘာဝပတ်ဝန်းကျင်ကို ကာကွယ်စောင့်ရှောက်မှုပေးရေး နဲ့မှ ပြည်ပရင်းနှီးမြုတ်နှံမှုတွေကို လုပ်ဆောင်တော့မှာဖြစ်ကြောင်းနဲ့ ဒီ့အတွက် သဘာဝ ပတ်ဝန်းကျင် ကာကွယ် စောင့်ရှောက်မှု အသိပညာပေးရေးမှာ VOA ၊ RFA အသံလွှင့်ဌာနတွေက ဝိုင်းဝန်း ကူညီဆောင်ရွက် ပေးစေလိုတယ်လို့ သမ္မတဦးသိန်းစိန် က ပြောကြားခဲ့ပါတယ်။

ဒီဇင်ဘာလ ၆ရက်နေ့က မြန်မာနိုင်ငံက ပုဂ္ဂလိက မီဒီယာလုပ်ငန်းတစ်ခုဖြစ်တဲ့ Sky Net ရုပ်သံလွှင့်ဌာနနဲ့ VOA တို့ရဲ့ ဗွီအိုအေ ထပ်ဆင့်ရုပ်သံလွှင့်ရေး သဘောတူစာချုပ် ချုပ်ဆိုနိုင်ခဲ့မှုအပေါ် သူ့အနေနဲ့ ဂုဏ်ယူဝမ်းမြောက်မိကြောင်း သမ္မတဦးသိန်းစိန်က ပြောဆိုသွားခဲ့ပါတယ်။

“ပုဂ္ဂလိက အသံလွှင့်ဌာနတစ်ခုဖြစ်တဲ့ Sky Netနဲ့ ပူးပေါင်းပြီးတော့ ဆောင်ရွက်မယ့်ကိစ္စအတွက် ကျနော်တို့အနေနဲ့ ကြိုဆိုပါတယ်။”

ဒါ့အပြင် အမေရိကန်ပြည်ထောင်စုဟာ လူမျိုးပေါင်းစုံနဲ့ ဘာသာပေါင်းစုံ ကိုးကွယ်ကြသူတွေ၊ ယဉ်ကျေးမှုမတူ ကွဲပြားခြားနားကြသူတွေ စုပေါင်းနေထိုင်ကြပြီးတော့ အားလုံးက ငါတို့ဟာ အမေရိကန် လူမျိုးတမျိုးတည်း ဖြစ်တယ်လို့ ခံယူထားကြတာကို သူ့အနေနဲ့ အားကျမိပါကြောင်း နဲ့ မြန်မာနိုင်ငံက တိုင်းရင်းသားစည်းလုံးညီညွတ်ရေး အတွက်လည်း မတူကွဲပြားခြားနားနေကြတဲ့ တိုင်းရင်းသားတွေ အားလုံးက ငါတို့ဟာ မြန်မာလူမျိုး တမျိုးတည်းဖြစ်တယ်ဆိုတဲ့ ရင့်ကျက်တဲ့ စိတ်ဓာတ်တွေ ပြောင်းလဲဝင်ရောက်လာဖို့ အများကြီး ကြိုးစားဖို့လိုအပ်နေပါကြောင်းလည်း သမ္မတဦးသိန်းစိန်က ပြောကြားသွားခဲ့ပါတယ်။

ဒါ့အပြင် သူငယ်စဉ် တပ်မတော်အရာရှိဘဝက ရှေ့တန်းစစ်မျက်နှာ နေရာတွေမှာ လိုင်းတိုအသံလွှင့်တဲ့ ဗွီအိုအေလို သတင်းတွေလို နိုင်ငံခြားက မီဒီယာတွေက လွှင့်ထုတ်တဲ့ သတင်းတွေကိုသာ အားကိုးနားထောင်ခဲ့ရတယ်လို့ ပြောဆိုသွားပါတယ်။ အခုအခါ မြန်မာအစိုးရရဲ့ မိတ်ဆွေတွေဖြစ်လာကြတဲ့ ဗွီအိုအေအသံလွှင့်ဌာနတွေ နဲ့ မိတ်ဆွေအဆင့်ကနေ ဆွေမျိုးသားချင်း အဆင့်ကို တက်လှမ်းလိုတယ်လို့ သမ္မတဦးသိန်းစိန်က BBG ၊ VOA ၊ RFA အကြီးအကဲတွေနဲ့ တွေ့ဆုံပွဲမှာ နိဂုံးချုပ်ပြောဆိုသွားခဲ့ပါတယ်။

“နိဂုံးချုပ်ပြောရရင် ကျနော်တို့တတွေဟာ အခုအစိုးရသစ်လက်ထက်မှာ မိတ်ဆွေဖြစ်သွား ပါပြီ။ ရှေ့ဆက်ပြီးတော့ မိတ်ဆွေအဆင့် ကနေ ဆွေမျိုးသားချင်းအဖြစ် တိုးမြှင့်နိုင်ဖို့အတွက် နောက်ထပ်ကြိုးစားသွားဖို့လိုအပ်ပါတယ်။”

ဒီနေ့ BBG ၊ VOA ၊ RFA အကြီးအကဲတွေ မြန်မာအစိုးရသမ္မတ ဦးသိန်းစိန်တို့ တွေ့ဆုံတဲ့ပွဲ မှာ ပြန်ကြားရေးဝန်ကြီး ဦးအောင်ကြည်၊ ဆက်သွယ်ရေးဝန်ကြီး ဦးသိန်းထွန်းနဲ့ သမ္မတရုံးညွှန်ကြားရေးမှူးချုပ် ဦးလှထွန်း၊ အစိုးရအဖွဲ့ရုံး ညွန်ကြားရေးမှူးချုပ် ဦးဇော်သိန်းသန်းတို့လည်း တက်ရောက်ခဲ့ကြပါတယ်။

မြောက်ကိုရီးယားဒုံး လွှတ်တင်မှု နှင်းကြောင့်နှောင့်နှေးနိုင်

မြောက်ကိုရီးယားဒုံးပစ်လွှတ်ရေးအတွက် ထူထပ်စွာကျနေတဲ့ နှင်းတွေကြားမှာ ဆန္ဒပြနေကြစဉ် (ဒီဇင်ဘာလ၅၊ ၂၀၁၂)

မြောက်ကိုရီးယားမှာ ဆီးနှင်းတွေ ပြင်းပြင်းထန်ထန် ကျနေတာကြောင့် မြောက်ကိုရီးယား အစိုးရ ပြင်ဆင်နေတဲ့ ဒုံးပျံ စမ်းသပ် ပစ်လွှတ်မယ့် အစီအစဉ် နှောင့်နှေးသွားနိုင်ဖွယ် ရှိတယ်လို့ အမေရိကန် လေ့လာရေးအဖွဲ့တခုက ပြောပါတယ်။ ဂြိုလ်တုကနေ ဖမ်းယူရိုက်ကူးထားတဲ့ နောက်ဆုံး ပုံရပ်သစ်တွေအရ Sohai ဂြိုလ်တု လွှတ်တင်ရေးစခန်းမှာ ဒုံးပျံပစ်လွှတ်ဖို့ ပြင်ဆင်နေတာတွေ အရင်ကထက်ပိုပြီး နှေးကွေးသွားတာ တွေ့ရတယ်လို့ John Hopkins တက္ကသိုလ် အမေရိကန် ကိုရီးယားဌာနက ပြောပါတယ်။

အမေရိကန်-ကိုရီးယားဌာနရဲ့ 38 North လို့ နံမည်ပေးထားတဲ့ ၀က်ဆိုက်မှာ စတလိုက်ပုံရိပ်တွေအရ ဂြိုလ်တုစခန်းနေရာမှာ ဆီးနှင်းတွေ ပြင်းပြင်းထန်ထန် ကျနေပြီး ယာဉ်အသွားအလာတွေ မရှိတော့တာ တွေ့ရတယ်လို့ ဂြိုလ်တုက ပုံရိပ်တွေကို လေ့လာသုံးသပ်တဲ့ ကျွမ်းကျင်ပညာရှင် Nick Hansen က ရေးထားတာပါ။ ဒါပေမဲ့ ခုလို ရာသီဥတု ဆိုးရွားတဲ့တိုင်အောင် မြောက်ကိုရီးယား အနေနဲ့ သူ့ရဲ့ ပြင်ဆင်ရေး လုပ်ငန်းတွေ ပြီးအောင် လုပ်သွားကောင်း လုပ်သွားနိုင်တယ်လို့လည်း Hensen က ပြောပါတယ်။