13.02.2013 နေ့ဖတ်ရန်သတင်းများ

by Myanmar Journal on Wednesday, February 13, 2013 at 8:50pm ·

Heart စကားလုံးဆိုင်ရာ အီဒီယံအသုံးအနှုန်းများ

Romantic boy and girl
ဒီတပတ် English Learning: America Idioms and Expressions ကဏ္ဍမှာ ဖေဖေါ်ဝါရီလ (၁၄) ရက်နေ့မှာ ကျရောက်မယ့် Valentine's Day ချစ်သူများနေ့ကို ရည်းစူးပြီး ဒီသတင်းတပတ် English Learning: America Idioms and Expressions ကဏ္ဍမှာ Heart - အသဲနှလုံး စကားလုံးဝေါဟာရကို အခြေခံတဲ့ heart throb, pull your heart strings, heart to heart နဲ့ to wear your heart on your sleeve အီဒီယံအသုံးအနှုန်းများကို တင်ပြပေးထားပါတယ်။

ပထမဦးဆုံး တင်ပြပေးမယ့် အီဒီယံအသုံးအနှုန်းမှာ heart throb ဖြစ်ပါတယ်။ စာလုံးပေါင်းက Heart = အသဲနှလုံး၊ Throb = (ကြိယာ) ခုန်သည်။ တနည်းတော့ ရင်ခုန်သည်။ ဒီနေရာမှာ heart နဲ့ တွဲသုံးထားတဲ့ throb ကတော့ ရင်ခုန်စေတဲ့လူကို ဆိုလိုပါတယ်။ ရင်ခုန်တယ်ဆိုတော့ ကိုယ်ကမေတ္တာရှိလို့ အမျိုးသမီး သို့မဟုတ် အမျိုးသားကို တွေ့မြင်လိုက်ရင် ရင်ခုန်တယ်၊ စိတ်လှုပ်ရှားတယ်၊ ဖီလင် (feeling) တက်လာခြင်း သဘောဖြစ်ပါတယ်။ ဒါကြောင့် ကိုယ့်ကိုရင်ခုန်စေတဲ့ ကိုယ့်ချစ်သူ သို့မဟုတ် ကိုယ့်ကနှစ်သက်သဘောကျနေတဲ့ ရုပ်ရှင်မင်းသမီး၊ မင်းသား၊ အဆိုတော် စသဖြင့်တို့ကို ကိုယ့်ရဲ့  heart throb တနည်း အသဲစွဲလို့ ဘန်းစကားအရ ပြောဆိုကြပါတယ်။

ဒီအသုံးနဲ့ ပတ်သက်လို့ George Crows ပေးတဲ့ ဥပမာကို လေ့လာကြည့်ရအောင်ပါ။

During my mother's day, Elvis Presley was the heart throb of most teenage girls. They would scream every time he appeared on stage.

ကျနော့်အမေတို့ ခေတ်တုန်းက ဆယ်ကျော်သက် အမျိုးသမီးလေးတွေရဲ့  အသဲစွဲက Elvis Presley ဖြစ်တယ်။ သူ စတိတ်စင်ပေါ်တက်လာတိုင်း အမျိုးသမီးတွေက အသံကုန်အော်ဟစ် အားပေးကြတယ်။

ဒုတိယတင်ပြပေးမယ့် အီဒီယံအသုံးအနှုန်းမှာ pull your heart strings ဖြစ်ပါတယ်။ စာလုံးပေါင်းက Pull = ဆွဲသည်၊ Your = သင်၏၊ Heart = အသဲနှလုံး၊ Strings = ကြိုးစများတို့ ဖြစ်ကြပါတယ်။ အသဲနှလုံးရဲ့  ကြိုးများကို ဆွဲယူသည် ဖြစ်ပါသည်။ ကျမတို့ မြန်မာမှာလည်း သံယောဇဉ်နှောင်ကြိုးတွေလိုမျိုး ဖြစ်ပါတယ်။ ဒီနေရာမှာ အီဒီယံအဓိပ္ပါယ်ကတော့ အသဲနှလုံးမှာ ခံစားချက် ပြင်းထန်ကြီးမားတာမျိုးကို ဆိုလိုပါတယ်။ တနည်းတော့ ရင်ထဲမှာ၊ အသဲထဲမှာ ခိုက်စေတဲ့ သဘောမျိုး ဖြစ်ပါတယ်။ မေတ္တာကြီးလို့ပဲဖြစ်ဖြစ်၊ အကြင်နာတရား ကြီးမားလို့ပဲဖြစ်ဖြစ်၊ သနားစိတ်ကြောင့်ဖြစ်ဖြစ် ရှိတဲ့ခံစားမှုမျိုးကို ဆိုလိုပါတယ်။

ဒီအသုံးနဲ့ ပတ်သက်လို့ George Crows ပေးတဲ့ ဥပမာကို လေ့လာကြည့်ရအောင်ပါ။

The story we saw on TV about the victims of the Haiti earthquake last year pulled our heart strings.

မနှစ်တုန်းက ဟေတီမြေငလျင်သင့်တဲ့ လူတွေအကြောင်း တီဗွီပေါ်မှာ မြင်လိုက်ရတော့ ကျနော်တို့ တော်တော်လေး ရင်ထဲအသဲထဲမှာ စိတ်မကောင်းဖြစ် ခံစားကြရတယ်။

ဆက်လက်တင်ပြပေးမယ့် အီဒီယံအသုံးအနှုန်းမှာ heart to heart ဖြစ်ပါတယ်။ စာလုံးပေါင်းက Heart = အသဲနှလုံး၊ to = သို့၊ Heart = အသဲနှလုံး တို့ ဖြစ်ကြပြီး heart to heart က အသဲနှလုံးတခုမှ နောက်တခုသို့။ တနည်းအားဖြင့် အသဲနှလုံးအချင်းချင်းလို့ တိုက်ရိုက်အဓိပ္ပါယ် ပြန်ဆိုနိုင်ပါတယ်။ အီဒီယံသွယ်ဝိုက်အဓိပ္ပါယ်ကတော့ အရှိကိုအရှိအတိုင်း သူ့စိတ်ထဲမှာရှိတာ၊ ကိုယ်စိတ်ထဲမှာရှိတာကို ပွင့်ပွင့်လင်းလင်း ပြောဆိုကြတာကို ဆိုလိုပါတယ်။

ဒီအသုံးနဲ့ ပတ်သက်လို့ George Crows ပေးတဲ့ ဥပမာကို လေ့လာကြည့်ရအောင်ပါ။

After having a good heart to heart talk with my friend, we understood each other much better and managed to be on better term.

ကျနော့်သူငယ်ချင်းနဲ့ ကျနော့်ကြား သူကလည်း သူ့စိတ်ထဲရှိတဲ့အတိုင်းပြော ကျနော်ကလည်း ကျနော့်စိတ်ထဲရှိတဲ့အတိုင်းပြောကြတော့ တဦးနဲ့တဦး ပိုမိုနားလည်းလာကြတယ်။ ခင်မင်မှုလည်း ပိုခိုင်မြဲလာတယ်။

နောက်ဆုံးတင်ပြပေးမယ့် အသုံးအနှုန်းမှာ to wear your heart on your sleeve ဖြစ်ပါတယ်။ စာလုံးပေါင်းက To wear = ဝတ်ဆင်သည်၊ Your heart = သင်၏ အသဲနှလုံး On = အပေါ်မှာ၊ Sleeve = အင်္ကျီလက် တို့ ဖြစ်ပါတယ်။ စကားစုတခုလုံးရဲ့  လုံးကောက်အဓိပ္ပါယ်က အင်္ကျီလက်ပေါ်မှာ သင့်ရဲ့  အသဲနှလုံးကို တပ်ထား၊ တင်ထားတဲ့သဘော ဖြစ်ပါတယ်။ ကိုယ့်ရဲ့  လက်ပေါ်မှာ အသဲနှလုံးကို တင်ထားတပ်ထားတဲ့ တင်စားပြောတဲ့ သဘောကတော့ ကိုယ့်စိတ်ထဲ၊ ခံစားချက်ကို လူတွေက ကိုယ့်ကိုမြင်တာနဲ့ သဘောပေါက်ကြတဲ့ အဓိပ္ပါယ်ဖြစ်ပါတယ်။ အထူးသဖြင့် လူတဦးတယောက်အပေါ် မေတ္တာရှိနေပြီဆိုရင် အဲဒီလူကို ဘယ်လောက်ကြိုက်တယ်၊ ချစ်တယ်၊ မြတ်နိုးတယ်ဆိုတာကို ပေါ်လွှင်နေတဲ့သဘော ဖြစ်ပါတယ်။ အလားတူပဲ မုန်းတယ်ဆိုရင်လည်း ဘယ်လောက်မုန်းတယ်ဆိုတာကို သူရဲ့  အပြုအမှု၊ သူ့ပုံစံအရ သိသာနိုင်တာကို ဆိုလိုပါတယ်။

မေတ္တာနဲ့ ပတ်သက်လို့ George Crows ပေးထားတဲ့ ဥပမာကို လေ့လာကြည့်ရအောင်ပါ။

All his friends know John is in love with Nancy. He wears his heart on his sleeve.

John တယောက် Nancy အပေါ် မေတ္တာရှိနေတယ်ဆိုတာကို သူ့ သူငယ်ချင်းတွေအားလုံး သိကြတယ်။ သူကလည်း သူဘယ်လို ခံစားချစ်မြတ်နိုးတယ်ဆိုတာကို လူတွေသိအောင် နေထိုင်ပြတယ်။

လက်ပံတောင်းတောင်အရေး ကင်တားနား အထူးစိတ်ဝင်စား

လူ့အခွင့်အရေး အထူးကိုယ်စားလှယ် ကင်တားနား
၅ ရက်ကြာ ခရီးစဉ်နဲ့ တနင်္ဂနွေနေ့က မြန်မာနိုင်ငံဆီ ရောက်လာတဲ့ ကုလသမဂ္ဂ လူ့အခွင့်အရေး အထူး စုံစမ်းစစ်ဆေးရေးမှူး တောမတ်စ် အိုဟေး ကင်တားနား (Tomás Ojea Quintana) ဟာ ဒီကနေ့  နေပြည်တော်ကို သွားရောက်မှာဖြစ်ပြီး၊ ဒီ့နောက် ကချင်ပြည်နယ်ကို ဆက်သွားဖို့ ရှိပါတယ်။

ဖေဖော်ဝါရီလ ၁၃ ရက်နေ့တုန်းကတော့ မစ္စတာ ကင်တားနားဟာ အင်းစိန်ထောင်ကို သွားရောက်ခဲ့တဲ့အပြင် မြန်မာ လူ့အခွင့်အရေးကော်မရှင်၊ ၈၈ မျိုးဆက်ကျောင်းသားများအဖွဲ့ ခေါင်းဆောင်တွေနဲ့ လည်း တွေ့ဆုံပြီး၊ မြန်မာနိုင်ငံရဲ့လူ့အခွင့်အရေး အခြေအနေ ဖြစ်ထွန်း တိုးတက်မှုတွေနဲ့ ပြုပြင် ပြောင်းလဲရေး အခြေအနေတွေကို ဆွေးနွေးခဲ့ တယ်လို့ သိရပါတယ်။

အဲ့ဒီနေ့ညနေမှာပဲ  မစ္စတာ ကင်တားနား ဟာ ရှေ့နေများ ကွန်ရက် မြန်မာနိုင်ငံနဲ့ တွေ့ဆုံခဲ့ပြီး၊ ဖေဖော်ဝါရီလ ၁၄ ရက်နေ့မှာ ဖြန့်ဝေမယ့် လက်ပံတောင်းတောင် အစီရင်ခံစာနဲ့ ပတ်သက်လို့ သူ့ကို တင်ပြနိုင်ခဲ့တယ်လို့ ရှေ့နေများကွန်ရက် မြန်မာနိုင်ငံ က ပြောပါတယ်။ ဒီအကြောင်း အပြည့်အစုံကို ဗွီအိုအေသတင်းထောက် မအေးအေးမာ က တင်ပြထားပါတယ်။ ကုလသမဂ္ဂ လူ့အခွင့်အရေး အထူးကိုယ်စားလှယ်ရဲ့ ခရီးစဉ်အတွင်း ဖေဖော်ဝါရီလ ၁၃ ရက်နေ့ ညပိုင်းမှာတော့ ရှေ့နေများကွန်ရက်ကို ကိုယ်စားပြုတဲ့ ရှေ့နေ ဦးလှထွန်းနဲ့ တွေ့ဆုံခဲ့တာပါ။ လက်ပံတောင်းတောင် ကိစ္စနဲ့ပတ်သက်ပြီး သတင်းစာ ရှင်းလင်းပွဲလုပ်မယ့် အစီရင်ခံစာတခု ကို ပေးခဲ့တဲ့အကြောင်း ရှေ့နေများကွန်ရက်ရဲ့ အထက်မြန်မာပြည် တာဝန်ခံ ကိုသိန်းသန်းဦး က ပြောပါတယ်။ “လက်ပံတောင်းတောင်အရေးနဲ့ပတ်သက်ပြီးတော့ ပြည်သူကို ရှင်းလင်းတင်ပြချက်ပေါ့နော် ကျနော်တို့ရဲ့ စုံစမ်းစစ်ဆေးမှု အစီရင်ခံစာ ထုတ်ပြန်မယ်။ အဲ့ဒီကိစ္စနဲ့ပတ်သက်ပြီးတော့ သတင်းစာရှင်းလင်းပွဲ လုပ်မှာပေါ့နော်။ အဲ့ဒီမှာ ဖြန့်မယ့် ကျနော်တို့ရဲ့ အစီရင်ခံစာကို မစ္စတာ ကင်တားနား လက်ကို ကျနော်တို့ ပေးလိုက်ပြီးတော့ အဲ့ဒီဟာနဲ့ပတ်သက်တဲ့ သက်သေခံ အထောက်အထားတွေကိုလည်း ကျနော်တို့ ပြပြီးတော့ ရှင်းပြခဲ့တယ်။ ဒီကိစ္စ အရေးယူဆောင်ရွက် ဖို့လို့ ပြောတယ်။ ဒုတိယတချက်ကတော့ မြစ်ကြီးနားထောင်မှာရှိနေတဲ့ အရှင်ဥာဏ အမှုနဲ့ပတ်သက်ပြီးတော့ တရားမျှတမှု ရအောင် ဆောင်ရွက်ပေးဖို့၊ အသက်အရွယ်ကို ငဲ့ညှာထောက်ထားပြီးတော့ ကြားဝင် ဆောင်ရွက်ပေးဖို့ဆိုပြီး ဦးလှထွန်း က တင်ပြခဲ့ပါတယ်။” “အရှင်ဥာဏ အမှုကတော့ ကျနော်တို့ ငယ်ရွယ်စဉ် ရှေ့နေဖြစ်ခါစ ဘ၀ကတည်းက သူက အကြိမ်ကြိမ် ထောင်ကျခဲ့တာ၊ အဓိကကတော့ သူက ထေရ၀ါဒ ဗုဒ္ဓဘာသာနဲ့ အယူအဆနဲ့ ကွဲလွဲတဲ့ အယူအဆ ရှိတာပေါ့နော်။ ဒါကြောင့် သူက သူ့အယူအဆအတိုင်း လွတ်လွတ်လပ်လပ် သင်္ကန်းကို အပြာ ၀တ်တယ်။ သတ္ထုသပိတ် ကိုင်တယ်ပေါ့နော် ပုံကတော့ ဘုန်းကြီးအတိုင်းပါပဲ အကုန်လုံး ကတော့၊ အကြမ်းဖျဉ်း ပြောရရင်တော့ သူတို့ မူက သာမည သဘောတရားကြမ်းဆိုတဲ့ သူတို့ ထုတ်တဲ့ထဲမှာ ပါတယ်။ အဲ့ဒီမူအတိုင်း သီးခြား ဗုဒ္ဓဘာသာတရပ် ကွဲလွဲတဲ့ ဗုဒ္ဓဘာသာတရပ် ထူထောင်တာ၊ အဲ့ဒီအတွက် အပြစ်ပေး အရေးယူထားတာပေါ့ဗျာ။ ယုံကြည်ချက်ကြောင့် အပြစ်ပေး ခံရတာပါပဲ။ ကျန်တာ ဘာမှ မပါပါဘူး။ အခုက ဦးဥာဏ က အသက်အရွယ် အတော်လဲ ကြီးနေပါပြီ။ ၇၀ ကျော်ပြီနဲ့တူပါတယ်။ ကျတဲ့ အပြစ်ဒဏ်ကလည်း များတယ်။ ရဲဘက်စခန်းတွေ ကိုလည်း သူ့ခမျာ ရောက်ခဲ့ရရှာတယ်။ ဒီကိစ္စအတွက် လူမှုရေးအရ ကြားဝင်ပြီးတော့ ဆောင်ရွက်ပေးဖို့အတွက် တောင်းဆိုတာပါ။” လက်ပံတောင်းတောင်နဲ့ပတ်သက်တဲ့ အစီရင်ခံစာကို ဖေဖော်ဝါရီလ ၁၄ ရက်နေ့မှာ ရှေ့နေများ ကွန်ရက် မြန်မာနိုင်ငံ ကနေ တော်ဝင်နှင်းဆီခန်းမမှာ သတင်းစာရှင်းလင်းပွဲ လုပ်ဖို့အတွက် အစီအစဉ်ရှိတဲ့အကြောင်း၊ ဒီအစီရင်ခံစာရဲ့ အဓိကကျတဲ့ အချက်အလက်တွေကိုလည်း ဆက်ပြောသွားပါတယ်။ “၃ ပိုင်းပေါ့နော် လက်ပံတောင်းတောင် ကျနော်တို့ရဲ့ အစီရင်ခံစာမှာက ရှေ့နေများကွန်ရက်မြန်မာနိုင်ငံ နဲ့ Justice Trust ဆိုတာ အမေရိကန်ပြည်ထောင်စုက ဖွဲ့တဲ့ တရားဥပဒေ စိုးမိုးရေးအဖွဲ့ ဘန်ကောက်မှာ အခြေစိုက်ပါတယ်။ ကျနော်တို့ ရှေ့နေ နှစ်ဖွဲ့ပေါင်းပြီးတော့ စုံစမ်းစစ်ဆေးမှု လုပ်ပြီးတော့ တင်ပြတာပါ။ အဓိကအားဖြင့် ၃ ချက် ပြောရမှာပေါ့။ နံပါတ်တစ်အချက်ကတော့ ကျနော်တို့ တွေ့ရှိတာက လက်ပံတောင်းတောင်ကိစ္စနဲ့ပတ်သက်ပြီးတော့ ၀မ်ဘောင်ကုမ္ပဏီ နဲ့ ပြည်သူတွေကြားမှာ ချုပ်ဆိုခဲ့တဲ့ ပဋိဉာဉ်စာချုပ်တွေဟာ ဥပဒေနဲ့ ကိုက်ညီမှု မရှိဘူး။ လွတ်လပ်တဲ့ သဘောဆန္ဒ မပါဘူး။ အတင်းအကြပ် ချုပ်ဆိုထားတဲ့ စာချုပ်တွေ ဖြစ်တယ်ဆိုတဲ့ အချက်၊ နောက် ဒုတိယအချက်ကတော့ လက်ပံတောင်းတောင် ပြည်သူတွေကနေ ဖွဲ့စည်းပုံ အခြေခံဥပဒေအရ ငြိမ်းချမ်းစွာ ဆန္ဒဖော်ထုတ်ခွင့် တောင်းတာကို အကြိမ်ကြိမ် ငြင်းပယ်ခြင်း အားဖြင့် ဖွဲ့စည်းပုံ အခြေခံဥပဒေကို သက်ဆိုင်ရာ တာဝန်ရှိသူတွေက ဖောက်ဖျက်ခဲ့တယ်။ ဖွဲ့စည်းပုံ အခြေခံဥပဒေပါ အခွင့်အရေးတွေကို ငြင်းပယ်ခဲ့တယ်။ နောက် တတိယအချက်ကတော့ ငြိမ်းချမ်းစွာ စုဝေး ဆန္ဒပြနေတဲ့ သံဃာတော်တွေနဲ့ ပြည်သူတွေကို လုံခြုံရေးတပ်ဖွဲ့ဝင်တွေက ၂၉ ရက် ၁၁ လက ချေမှုန်းရာမှာ စစ်တပ်မှာပဲ သုံးစွဲခွင့်ရှိတဲ့၊ အရပ်ဘက်မှာ သုံးစွဲခွင့် မရှိတဲ့ WP ပေါ့ဗျာ White Phosphorus မီးစုန်းတွေ၊ လက်ပစ်ဗုံးတွေနဲ့ ပစ်ပြီးတော့ ကျနော်တို့ မတရား အကြမ်းဖက်ခဲ့တယ်ဆိုတဲ့အချက်ကို ဖော်ပြတာပါ။ အဓိကကျတဲ့ အချက်တွေကို မီးမောင်းထိုးပြ တာပါ။”

မစ္စတာ ကင်တားနား ဟာ လက်ပံတောင်းတောင် အစီရင်ခံစာနဲ့ပတ်သက်ပြီး သက်သေပြချက်တွေ ကို အတော် စိတ်ဝင်စားခဲ့ပြီး စုံစမ်းစစ်ဆေးမှုတွေ လုပ်ဖို့ရှိတယ်ဆိုပြီး ပြောသွားခဲ့တယ်လို့ ဆိုပါ တယ်။ “လက်ပံတောင်းကိစ္စကိုတော့ သူ အလွန် စိတ်ဝင်စားတယ်။ နောက်ပြီးတော့ သူ သေသေချာချာ စုံစမ်းမယ်လို့လည်း ပြောပါတယ်ခင်ဗျ။” မစ္စတာ ကင်တားနား ဟာ သူ့ရဲ့ ခရီးစဉ်အတွင်းမှာ မြန်မာနိုင်ငံက လူ့အခွင့်အရေး ကော်မရှင်ကို လည်း တွေ့ဆုံမှုတွေ ရှိခဲ့သလို၊ အင်းစိန်အကျဉ်းထောင်ကိုလည်း သွားရောက်ခဲ့ပါတယ်။ ဒါ့အပြင် နိုင်ငံရေး တက်ကြွလှုပ်ရှားသူတွေနဲ့လည်း တွေ့ဆုံခဲ့ပြီး ရခိုင်ပြည်နယ်ကိုလည်း သွားရောက် လေ့လာခဲ့ပါတယ်။ မကြာခင်မှာလည်း ကချင်ပြည်နယ်ကို သွားရောက်ဖို့ ရှိနေပြီး သူ့ခရီးစဉ်အပြီး မပြန်ခင်မှာတော့ သတင်းစာရှင်းလင်းပွဲ လုပ်ဖို့ ရှိပါတယ်။

မြန်မာနိုင်ငံအပေါ် ချဉ်းကပ်မှု အမေရိကန် အချိန်ယူသင့်
 
လက်ရှိ မြန်မာနိုင်ငံထဲမှာ အပြောင်းအလဲတွေရှိပြီး စိန်ခေါ် အကဲစမ်းချက်တွေလည်း ရှိနေတာမို့၊ အမေရိကန်ပြည်ထောင်စုအနေနဲ့ ချည်းကပ်တဲ့ နေရာမှာ အလောတကြီး မူဝါဒ ပြောင်းလဲတာ မျိုးတွေ မလုပ်သင့်ဘူးလို့ လူ့အခွင့်အရေး လှုပ်ရှားသူတွေက ပြောလိုက်ပါတယ်။ ၀ါရှင်တန်ဒီစီက Heritage Foundation မှာ ဗုဒ္ဓဟူးနေ့က လုပ်တဲ့ မြန်မာ့အရေး ဆွေးနွေးပွဲမှာ ပြောသွားတာပါ။ မြန်မာနိုင်ငံတွင်းက ပြုပြင်ပြောင်းလဲမှုနဲ့ပတ်သက်လို့ အကဲဖြတ် သုံးသပ်တဲ့ မနေ့က ဆွေးနွေးပွဲ ကိုတော့ Amnesty International နိုင်ငံတကာ လူ့အခွင့်အရေးအဖွဲ့က လက်ထောက် အမှုဆောင် ညွှန်ကြားရေးမှူးတဦးဖြစ်တဲ့ ဖရန့် ဂျာနူဇီ (Frank Jannuzi) HRW လူ့အခွင့်အရေးစောင့်ကြည့်မှု အဖွဲ့က တွန် မလီနောစကီး (Tom Malinowski) နဲ့ လူ့အခွင့်အရေး ရှေ့နေဖြစ်တဲ့ ဂျရတ် ဂန်ဆာ (Jared Genser) တို့ အဓိက ဆွေးနွေးခဲ့ကြပါတယ်။ မြန်မာနိုင်ငံတွင်း အပြောင်းအလဲတွေ ရှိလာပေမဲ့ တရားဥပဒေစိုမိုးရေး လွတ်လပ်တဲ့ တရားစီရင်ရေး နယ်ပယ်တွေမှာ လိုအပ်ချက်တွေ ရှိနေသလို၊ ပြုပြင်ပြောင်းလဲရေးမှာလည်း capacity လုပ်နိုင်ချေ စွမ်းအား အားနည်းသေးတယ်လို့ သုံးသပ်ကြပါတယ်။ အထူးသဖြင့်တော့ မြန်မာနိုင်ငံ မြောက်ပိုင်း ကချင်ပြည်နယ်နဲ့ အနောက်ခြမ်း ရခိုင်ပြည်နယ်တွင်းက အခြေအနေတွေကို သုံးသပ်ဆွေးနွေးကြပြီး၊ ဒီအချက်တွေကိုကြည့်ရင် လူ့နည်းစုအခွင့်အရေးနဲ့ ကိုယ်ပိုင်ပြဌာန်းခွင့် အားနည်းမှုတွေကို ထောက်ပြပါတယ်။ အတိုက်အခံ ဒီမိုကရေစီဘက်က အခြေအနေကိုလည်း သုံးသပ်ခဲ့ပြီး၊ ဒေါ်အောင်ဆန်းစုကြည်အနေနဲ့ စစ်တပ်ဟာ သူ့ရန်ဘက် မဟုတ်ပါဘူးဆိုတာ ပြသဖို့အတွက် ကိစ္စရပ် အတော်များများမှာ မှတ်ချက်ပေး ပြောဖို့ ရှောင်နေခဲ့ တယ်လို့ ဝေဖန်သွားပါတယ်။ ဖွဲ့စည်းပုံ ပြင်ဆင်ရေးအတွက် အတိုက်အခံတွေဘက်က လှုပ်ရှားဆောင်ရွက်ခဲ့ပေမယ့်၊ ဖွဲ့စည်းပုံ ပြင်ဆင်ဖို့တော့ အချိန်ယူရနိုင်တယ်လို့ သုံးသပ်ပါတယ်။

သမ္မတအိုဘားမား မြန်မာ့အရေး မျက်ခြေမပြတ်ကြာင်း ပြော

သမ္မတအိုဘားမား နိုင်ငံတော်အခြေပြမိန့်ခွန်း ပြောကြားနေစဉ် (၁၂-၂-၂၀၁၃)
အမေရိကန်သမ္မတ ဘရက်ခ် အိုဘားမား (Barack Obama) က သူ့ရဲ့ နိုင်ငံတော် အခြေပြမိန့်ခွန်းထဲမှာ မြန်မာပြည်ခရီးစဉ်ရဲ့ အတွေ့အကြုံကို အလေးအနက်ထား ထည့်သွင်းပြောဆိုသွားတဲ့အပေါ် အမျိုးသားဒီမိုကရေစီအဖွဲ့ချုပ်ကလည်း ကြိုဆိုလိုက်ပါတယ်။ အထီးကျန်ဖြစ်ခဲ့တဲ့ မြန်မာနိုင်ငံကို ပြုပြင်ပြောင်းလဲရေး ဖော်ဆောင်အောင် အမေရိကန်ပြည်ထောင်စု က ဦးဆောင်ဦးရွက် ပြုပြီးတော့ တွန်းအားပေးခဲ့တာ ဖြစ်တယ်လို့ ဆိုပါတယ်။ အိုဘားမားရဲ့ မြန်မာ့ အရေး မှတ်ချက်အပေါ်မှာ တုံ့ပြန်ချက်တချို့ကို ဒေါ်ခင်စိုးဝင်း က စုစည်းတင်ပြထားပါတယ်။ သမ္မတ အိုဘားမား က အမေရိကန်ပြည်ထောင်စုဟာ ကမ္ဘာတ၀ှမ်း စီးပွားရေးနဲ့ အမျိုးသမီး စွမ်းရည်မြင့်မားရေးအတွက် ထိတွေ့ ဆက်ဆံမှုတွေ ကျယ်ကျယ်ပြန့်ပြန့် လုပ်ပြီးတော့ ကူညီအားပေးနေ တယ်လို့ နိုင်ငံတော် အခြေပြမိန့်ခွန်းမှာ ပြောဆိုရင်းနဲ့ မနှစ်တုန်းက သူ့ရဲ့ မြန်မာနိုင်ငံ ခရီးစဉ်အတွင်း သူကိုယ်တိုင် မြင်တွေ့ခဲ့ရတဲ့ သမိုင်းတွင်တဲ့ အပြောင်းအလဲကို လည်း ထည့်သွင်းပြောဆိုသွားပါတယ်။ သမ္မတ အိုဘားမား က သမိုင်းတွင်တဲ့ အပြောင်းအလဲ အခါသမယမှာ အမေရိကန်ပြည်ထောင်စုဟာ လွတ်မြောက်မှုကို တောင့်တနေကြသူတွေ အားလုံးရဲ့ မီးရှုးတန်ဆောင်အဖြစ် ရပ်တည်နေဆဲဖြစ်တယ်လို့ အခုလို ပြောဆိုသွားပါတယ်။ “မနှစ်က ရန်ကုန်ကို ရောက်တုန်းက မျှော်လင့်ခြင်းရဲ့ ခွန်အားတွေကို ကျနော် တွေ့ခဲ့ရပါ တယ်။ ဒေါ်အောင်ဆန်းစုကြည် က သူ နှစ်ပေါင်းများစွာ အကျဉ်းကျခဲ့တဲ့ သူ့ရဲ့ နေအိမ်ကို အမေရိကန်သမ္မတတဦး လာရောက်ခဲ့တဲ့အတွက် ခရီးဦးကြိုဆိုခဲ့သလို၊ ထောင်နဲ့ချီ တဲ့ မြန်မာပြည်သူတွေကလည်း လမ်းဘေး ၀ဲယာကနေ အမေရိကန် အလံတွေကို ဝှေ့ယမ်းပြီး ကြိုဆိုခဲ့ကြပါတယ်။ အမေရိကန်ပြည်ထောင်စုမှာ တရားမျှတမှုနဲ့ ဥပဒေစိုးမိုးမှု ရှိသလို၊ မြန်မာပြည်မှာလည်း တရားမျှတမှုနဲ့ ဥပဒေ စိုးမိုးရေး ရှိစေချင်ပါတယ်လို့ ပြောတဲ့သူ တယောက်လည်း ကျနော့်ကို ကြိုဆိုတဲ့ လူထုထဲမှာ ပါဝင်တာ တွေ့ခဲ့ရပါတယ်။” သမ္မတ အိုဘားမားရဲ့ ဒီမှတ်ချက်ကို NLD အမျိုးသားဒီမိုကရေစီအဖွဲ့ချုပ် က ကြိုဆိုတယ်လို့ NLD အတွင်းရေးမှူး ဦးဥာဏ်ဝင်း ကို ဗွီအိုအေ ကို အခုလို ပြောပြပါတယ်။ “ကျနော်တို့ အခု မြန်မာနိုင်ငံမှာ ဖြစ်နေတဲ့ အပြောင်းအလဲတွေက အနောက်နိုင်ငံကြီးများရဲ့ ပါဝင် ပံ့ပိုးမှုတွေ အများကြီး ပါတယ်လို့ ကျနော်တို့ ဒီလိုပဲ မြင်ပါတယ်။ ဒါကြောင့် အခု ဒီဟာလည်း တသမတ်တည်း သဘောထားမျိုး ထုတ်ဖော် ပြောဆိုတာ ကြိုဆိုပါတယ်။” လွတ်မြောက်မှုကို အကာအကွယ်ပေးတဲ့နေရာမှာ အမေရိကန်ပြည်ထောင်စုဟာ အမေရိကတိုက် ကနေ အာဖရိကတိုက်အဆုံး၊ ဥရောပတိုက်ကနေ အာရှတိုက်အဆုံး ခိုင်မာတဲ့ မဟာမိတ်အဖြစ်နဲ့ ရပ်တည်နေတဲ့အကြောင်းလည်း ပြောဆိုသွားပါတယ်။ ရှေ့နေများကွန်ရက်ရဲ့ ကိုယ်စား ရှေ့နေကြီး ဦးလှထွန်းကတော့ သမ္မတ အိုဘားမာရဲ့ ဒီမှတ်ချက်ကို ထောက်ခံတယ်လို့ အခုလို ပြောဆိုပါတယ်။

“တရားမျှတမှု၊ ဥပဒေစိုးမိုးမှုက နှစ်ပေါင်းများစွာပေါ့နော် ကျနော်တို့ လွတ်လပ်ပွင့်လင်းမှု ဆုံးရှုံးခဲ့တာနဲ့အမျှပဲ ကျနော်တို့ ဆုံးရှုံးခဲ့တာဖြစ်ပါတယ်။ အခုအခါမှာတော့ ကျနော်တို့ ဥပဒေစိုးမိုးမှုနဲ့ တရားမျှတမှု ရရှိရေးကို ပြောမယ်ဆိုလို့ရှိရင် ကျနော်တို့ ဥပဒေပညာရှင်ရော၊ တက်ကြွလှုပ်ရှားသူတွေရော၊ နောက်တခါ နိုင်ငံတကာ ရှေ့နေအဖွဲ့တွေ ဥပဒေအသိုင်းအ၀ိုင်း ကနေပြီးတော့လည်း ပူးပေါင်းဆောင်ရွက်နေတာကို အားရဖွယ်ရာ ကျနော်တို့ တွေ့ရပါတယ်။ ကျနော်ကိုယ်တိုင်ကလည်း ဒီဟာကို ကျနော်တို့ ကြိုးစားအားထုတ်နေတာ ဖြစ်တဲ့အတွက် သမ္မတကြီးရဲ့ ပြောစကားက အားလုံးအတွက် အင်မတန်မှကို အားကောင်းတဲ့ ထောက်ခံပေးမှုဖြစ်ပါတယ်။” ရန်ကုန်မြို့ကို ခေတ္တအလည်ရောက်နေတဲ့ အမေရိကန်ပြည်ထောင်စုမှာ အခြေချနေထိုင်သူ ရုပ်ရှင်မင်းသမီး အဆိုတော် မေဆွိ ကလည်း သမ္မတ အိုဘားမားရဲ့ မိန့်ခွန်းပါ မှတ်ချက်နဲ့ပတ်သက်လို့ သူ့ရဲ့ သဘောထားကို ဗွီအိုအေကို အခုလို ပြောပြပါ တယ်။ “ကျမကတော့ သူပြောတဲ့ဟာက မြန်မာပြည်အတွက်ကို ကောင်းစေတဲ့ ရည်ရွယ်ချက်နဲ့ ပြောတဲ့အတွက်ကြောင့်မို့ ဖြစ်လဲဖြစ်နိုင်လိမ့်မယ်လို့ မျှော်လင့်တယ်။ ဒီလိုလဲဖြစ်လာလိမ့်မယ်လို့ ကျမ စိတ်ထဲမှာပေါ့နော် အဲ့လိုလေး ထင်ပါတယ်။ ကောင်းပါတယ် အဲ့ဥစ္စာကတော့။ နောက်တခုကလည်း ဘာပဲဖြစ်ဖြစ် သူ မြန်မာပြည်ကိုလည်း ရောက်ဖူးသွား တယ်။ မြန်မာပြည်ကိုလည်း စိတ်ဝင်တစားနဲ့ ဒီလိုလေး တစေ့တစောင်းပေါ့နော် သူ့ရဲ့မိန့်ခွန်းတွေ ထဲမှာ ဒီလိုလေး ထုတ်ထုတ်ပြီး ပြောလာတဲ့အတွက်ကြောင့်မို့ ကျမတို့ မြန်မာပြည်ဟာ အရင်ကလို အထီးကျန် ဖြစ်မနေတော့ဘဲနဲ့ တဖြည်းဖြည်းချင်းနဲ့ မျက်စိကျယ်ပြီးတော့ သာယာဝပြောတဲ့ နိုင်ငံကြီးတခု ဖြစ်လိမ့်မယ်လို့ ကျမကတော့ မျှော်လင့်ပါ တယ်။ အဲ့လိုလဲထင်ပါတယ်။” အမေရိကန်ပြည်ထောင်စုဟာ ကမ္ဘာတ၀ှမ်း မွေးရာပါ အခွင့်အရေး တောင်းဆိုနေကြသူတွေနဲ့အတူ ရပ်တည်နေပြီးတော့ တည်ငြိမ်တဲ့ ဒီမိုကရေစီအသွင်ကူးပြောင်းရေးအတွက် ထောက်ခံနေတဲ့ အကြောင်း သမ္မတ အိုဘားမား က နိုင်ငံတော် အခြေပြမိန့်ခွန်းမှာ အလေးအနက် ထည့်သွင်းပြောဆိုသွားခဲ့ပါတယ်။

နျူကလီးယားအရေး ဆွေးနွေးဖို့ ကုလသမဂ္ဂ အီရန်ရောက်

အီရန်သမ္မတ Natanz ယူရေနီယံသန့်စင်မှု စက်ရုံကို သွားရောက်ကြည့်ရှုစဉ် (၀၄၊ ၂၀၀၈)
အီရန် နျူကလီးယား အစီအစဉ်နဲ့ ပတ်သက်လို့ ကုလသမဂ္ဂရဲ့ စစ်ဆေးသူတွေနဲ့ တချို့ ကိစ္စတွေမှာ သဘောတူညီမှု ရရှိခဲ့တယ်လို့ အီရန်က ပြောလိုက်ပါတယ်။ သဘောထား ကွဲမှုတချို့ကို ဖြေရှင်းနိုင် ခဲ့ပြီး နောက်တခါ တွေ့ဆုံပွဲကျရင် အခု တင်ပြ အဆိုပြုလာတဲ့ အချက်တွေကို ပြန်ပြီး ဆွေးနွေး မှာ ဖြစ်တယ်လို့ အီရန်အစိုးရပိုင် သတင်းအေဂျင်စီက ဗုဒ္ဓဟူးနေ့မှာ ပြောကြားခဲ့ပါတယ်။ တဟီရန်မှာ လုပ်ခဲ့တဲ့ ဆွေးနွေးပွဲနဲ့ ပတ်သက်လို့ အီရန်ဘက်က အသေးစိတ် မပြောသလို၊ နိုင်ငံတကာ အနုမြူ စွမ်းအင်အေဂျင်စီ IAEA ကလည်း တစုံတရာ ထုတ်ဖော် ပြောဆိုခြင်း မရှိသေးပါဘူး။ အီရန်ရဲ့ နျူကလီးယား စက်ရုံတွေရှိရာကို ကုလသမဂ္ဂ စစ်ဆေးရေးမှူးတွေကို ပြန်လည် သွားရောက်ခွင့် ပေးဖို့အတွက် IAEA ကိုယ်စားလှယ်တွေ တဟီရန်မှာ ရောက်ရှိ ဆွေးနွေးနေကြ တာ ဖြစ်ပါတယ်။ ပြီးခဲ့တဲ့လ ဆွေးနွေးပွဲတုန်းကတော့ ဘာသဘောတူညီမှုမှ မရရှိခဲ့ပါဘူး။ ဒါပေမဲ့ Parchin စစ်စခန်းဆီ စစ်ဆေးသူတွေကို သွားခွင့် ပေးကောင်း ပေးမယ်လို့ အီရန်က အရိပ်အမြွက် ပြောကြားခဲ့ပါတယ်။ အီရန်က အဓိက ယူရေနီယံ သန့်စင်တဲ့ စက်ရုံက အဓိက ပစ္စည်း ကိရိယာတချို့ကို အဆင့်မြှင့် မယ်လို့လည်း အီရန်က ဗုဒ္ဓဟူးနေ့က ပြောကြားခဲ့ပါတယ်။ Natanz စက်ရုံက ဗဟို ခွာစက်တွေကို အသစ်တွေ စတင်ပြောင်းလဲ တပ်ဆင်နေပြီလို့ အီရန် နျူကလီးယား စွမ်းအင် အဖွဲ့အစည်း အကြီးအကဲ က ပြောကြားခဲ့တာ ဖြစ်ပါတယ်။

ထိုင်းတောင်ပိုင်း စစ်စခန်း သူပုန်တွေ ၀င်စီး

တိုက်ခိုက်မှုဖြစ်ပြီးနောက် အာဏာပိုင်တွေ စုံစမ်းစစ်ဆေးနေစဉ် (၁၃၊ ၂၊၂၀၁၃)
ထိုင်းနိုင်ငံတောင်ပိုင်းက စစ်တပ် အခြေစိုက်စခန်းကို ဗုဒ္ဓဟူးနေ့ အစောပိုင်းက ဝင်တိုက်တဲ့ လက်နက်ကိုင် ၁၇ ယောက်ကို သုတ်သင်နိုင်ခဲ့တယ်လို့ ထိုင်းစစ်တပ်က ပြောပါတယ်။ စစ်တပ်သုံး လက်နက်တွေကို ကိုင်ဆောင်ထားသူ ၆၀ ထက်မနည်းက အခြေစိုက်စခန်းကို ဝင်ရောက် စီးနင်း တိုက်ခိုက်ခဲ့ပေမဲ့ ပြန်လည် တွန်းလှန် တိုက်နိုင်ခဲ့တယ်လို့ ထိုင်းနိုင်ငံ ပြည်တွင်း လုံခြုံရေးတပ်များ ကွပ်ကဲမှုဌာန ပြောခွင့်ရသူ ပရာမုတ် ပရိုမင်း (Pramote Promin) က ပြောပါတယ်။ မလေးရှားနိုင်ငံနဲ့ ကပ်နေတဲ့ နရာသီဝပ်ခရိုင်မှာ အာရုဏ်မတက်ခင် တိုက်ခိုက်ခံခဲ့ရ တာ ဖြစ်ပါတယ်။ နှစ်ဘက် အပြင်းအထန် ပစ်ခတ်မှုအတွင်း ထိုင်းစစ်သားတချို့လည်း ထိခိုက် ဒဏ်ရာရသွားကြတယ်လို့ ပြောခွင့်ရသူ ပရိုမင်း က ပြောပါတယ်။ စစ်စခန်းအပေါ် တိုက်ခိုက်တာ ဘယ်အဖွဲ့အစည်းကလဲ ဘာကြောင့် တိုက်ခိုက်သလဲ ဆိုတာ ခုချိန်ထိ အတိအကျ မသိရသေးပါဘူး။ ထိုင်းနိုင်ငံတောင်ပိုင်း မူဆလင် အများစု နေထိုင်တဲ့ ခရိုင် ၃ ခုမှာ မူဆလင် ခွဲထွက်ရေးသမားတွေက အကြမ်းဖက် တိုက်ခိုက်မှု တွေကို အခုနောက်ပိုင်း နှစ်တွေမှာ ပိုပြီး လုပ်လာနေပါတယ်။

သယံဇာတ ချုပ်ကိုင်ရေးစစ်ပွဲ နဲ့ ကချင်တိုင်းရင်းသားအရေး
 
အစိုးရကိုယ်စားလှယ်အဖွဲ့နဲ့ KIO/KIA ကိုယ်စားလှယ်အဖွဲ့တို့ဟာ ဖေဖေါ်ဝါရီလ (၄) ရက်နေ့က ရွှေလီမြို့ မှာ ဆွေးနွေးပွဲ ကျင်းပခဲ့ကြပေမယ့် စစ်ပွဲရပ်စဲတဲ့အဆင့်ကို မရောက်သေးတာ တွေ့ရပါတယ်။ စစ်ပွဲစောင့်ကြည့်ဖို့၊ စစ်အရှိန်ကျဆင်းဖို့နဲ့ ဆက်လက်ဆွေးနွေးဖို့အတွက် ဂတိပြုကြတဲ့ အစည်းအဝေး ဖြစ်ပါတယ်။ အစိုးရက ဆွေးနွေးဖြေရှင်းဖို့ ကြိုးပမ်းနေပေမယ့် အာဏာရပြည်ခိုင်ဖြိုးပါတီနဲ့ စစ်တပ်ရဲ့  လွှတ်တော်ကိုယ်စားလှယ်အချို့ ကတော့ စစ်အင်အားသုံးပြီး နှိမ်နင်းဖို့သာ လိုလားကြပါတယ်။ ကချင်ပြည်နယ်မှာ သယံဇာတ ထုတ်ယူနေတဲ့ အခွင့်ထူးခံ အရင်းရှင် ဦးတေဇကလည်း ထိုးစစ်ဆင်နေတဲ့ အစိုးရတပ်အတွက် နှစ်ဆန်းပိုင်းက ကျပ်သန်း (၇၀) လှူဒါန်းသွားပါတယ်။ ကချင်ပြည်နယ်စစ်ပွဲဟာ နယ်မြေလုပွဲလို ဖြစ်နေပါတယ်။

KIO/KIA မပေါ်ခင်ကတည်းက မြစ်ကြီးနား၊ ဗန်းမော်နဲ့ မီးရထားလမ်းတလျှောက်က မြို့ လေးတွေကို ဗမာအစိုးရအုပ်စိုးတာမို့ KIO/KIA ဟာ ကျေးလက်ဒေသနဲ့ တရုတ်-မြန်မာနယ်စပ်ကိုသာ ချုပ်ကိုင်နိုင်ပါတယ်။ ဒါကြောင့် KIA ချုပ်ကိုင်တဲ့ နယ်မြေဟာ ကျယ်ဝန်းပေမယ့် ဟိုတကွက်ဒီတကွက် ဖြစ်နေပါတယ်။ စတုရမ်းကိလိုမီတာ (၉၀, ၀၀၀) နီးပါးကျယ်ဝန်တဲ့ ပြည်နယ်မှာ KIO/KIA ဟာ စတုရမ်းကီလိုမီတာ (၄၀, ၀၀၀) လောက်အထိသာ သူ့နည်းသူ့ဟန်နဲ့ ကြီးစိုးနိုင်ခဲ့တယ်လို့ ခန့်မှန်းကြပါတယ်။

ဒါပေမဲ့ ၁၉၉၄ အပစ်အခတ်ရပ်စဲလိုက်တဲ့နောက်ပိုင်း အစိုးရတပ်တွေများလာပြီး အခြေအနေ ပြောင်းလဲသွားပါတယ်။ ဖားကန့်ကျောက်စိမ်းဒေသမှာ စစ်အုပ်စုနဲ့ အခွင့်ထူးခံ အရင်းရှင်တစု ကြီးစိုးလာပါတယ်။ ဟူးကောင်းချိုင့်ဝှမ်းဒေသ ရွှေရှာဖွေရေးမှာ KIO နဲ့ ဗမာစစ်အုပ်စု ပြိုင်ဆိုင်ကြပါတယ်။ အခွင့်ထူးခံ ယုဇနကုမ္မဏီရဲ့  စိုက်ပျိုးရေးစီမံကိန်းကြောင့် ဟူးကောင်ဒေသ ကျားထိန်းသိမ်းရေး ဘေးမဲ့တောမှာ ကျားသတ္တဝါဟာ မရှိသလောက် ဖြစ်နေပါတယ်။ KIO/KIA နဲ့ အပစ်အခတ် ရပ်စဲတဲ့ (၁၇) နှစ်ကာလမှာ စစ်အုပ်စု၊ အခွင့်ထူးခံ အရင်းရှင်တစု နဲ့ တရုတ်ကုမ္မဏီတွေ ကချင်ပြည်နယ် စီးပွားရေးမှာ အဓိက ပါဝင်လာပါတယ်။ အပစ်အခတ်ရပ်စဲတဲ့အတွက် အများဆုံးအကျိုးခံစားရသူတွေ ဖြစ်လာပါတယ်။ ရွှေ၊ ကျောက်မျက်၊ သစ်၊ သတ္တုတွင်းနဲ့ ရေအားလျှပ်စစ်လုပ်ငန်းတွေမှာ အကြီးအကျယ် ရင်းနှီးမြှပ်နှံကြပါတယ်။

စစ်အုပ်စုကို ကိုယ်စားပြုတဲ့ကုမ္မဏီတွေ အကြီးဆုံး ကန်ထရိုက်ကို ရပါတယ်။ ၂၀၀၂ မှာ စစ်အစိုးရ သတ်မှတ်တဲ့ ရွှေလုပ်ကွက် (၄၀) ကျော်မှာ (၂၀) ကျော်ဟာ ကချင်ပြည်နယ်မှာပါ။ အင်မိုင်ခ၊ မလိခမြစ်ဆုံ၊ စွန်ပရာဘွန်၊ ပူတာအို၊ ဟူးကောင်း၊ ဖားကန့် နဲ့ ချင်းတွင်းမှာ ရွှေရှာခွင့် ပေးပါတယ်။ စစ်အုပ်စုပိုင် Northern Star ကုမ္မဏီက တရုတ်လုပ်ငန်းရှင် (ရင်ဟိုင်း) ကို ကျပ်ငွေ (၈၀) တန် ရွှေလုပ်ကွက်တခု ရောင်းချခဲ့ပါတယ်။ ဦးတေဇ စစ်တပ်ကို လှူတဲ့ငွေက ကျပ်သန်း (၇၀) သာ ရှိပါတယ်။ စစ်အစိုးရနဲ့ ဖက်စပ်လုပ်တဲ့ကုမ္မဏီတွေဟာ သူတို့ရထားတဲ့ ရွှေတူးဖော်ခွင့်လိုင်စင်တွေကို တရုတ်ကို ရောင်းစားကြတာများပါတယ်။ ဒါကြောင့် ကချင်ပြည်နယ်မှာ အများဆုံးရင်းနှီးမြုပ်နှံသူဟာ တရုတ် ဖြစ်ပါတယ်။ KIO ကလည်း အထိုက်အလျှောက် အကျိုးအမြတ် ခံစားရပေမယ့် ချုပ်ကိုင်နိုင်တဲ့နယ်မြေ ကျဉ်းမြောင်းသွားပါတယ်။

သဘာဝပတ်ဝန်းကျင် ပျက်စီးမှန်းပေမယ့် ရန်ပုံငွေရရှိရေးအတွက် သယံဇာတလုပ်ငန်းမှာ KIO ပါဝင်လုပ်ကိုင်လာရပါတယ်။ ကချင်ပြည်နယ်က စီးပွားရေးလုပ်ငန်းတွေဟာ ပွင့်လင်းမြင်သာမှုကင်းတဲ့ ကျိတ်ဝိုင်းတွေဖြစ်တာမို့ အဂတိလိုက်စားမှုများပါတယ်။ စစ်အုပ်စုနဲ့ တရုတ်ဟာ ကချင်ပြည်နယ်ကို အမဲဖျက်သလို ခုတ်ပိုင်းလှီးဖြတ်နေတယ်လို့ ဆိုနိုင်ပါတယ်။ အစိုးရတပ်ရင်း (၁၂၀) ကျော်ဟာ KIA ထိန်းချုပ်တဲ့ နယ်မြေမှာနေရာယူပြီး တိုက်ခိုက်နေတာဟာ နိုင်ငံအချင်းချင်းဖြစ်ပွားတဲ့ စစ်ပွဲလိုဖြစ်နေတယ်လို့ KIA ဒု-စစ်ဦးချုပ် ဗိုလ်ချုပ်ဂွမ်မော် (၂၀၁၁) ဒီဇင်ဘာလမှာ ပြောသွားပါတယ်။ တကယ်တော့ ဗမာအစိုးရတပ်ဟာ သဘာဝသယံဇာတကို အများဆုံး ချုပ်ကိုင်နိုင်အောင် ထိုးစစ်ဆင်နေတာ ဖြစ်ပါတယ်။

KIA ကချင်တပ်မဟာ အချင်းချင်းဆက်သွယ်လို့ မရအောင်ကြိုးပမ်းတာဟာ အစိုးရထိုးစစ်ရဲ့  ရည်ရွယ်ချက်တခု ဖြစ်ပါတယ်။ KIA တပ်မဟာ (၅) ခုဟာ အရှေ့ အနောက်တောင်မြောက်နဲ့ ဗဟိုဆိုပြီး နယ်မြေ (၅) ခုခွဲပြီး နေရာယူထားပါတယ်။ ဗဟိုနယ်မြေကို တာဝန်ယူတဲ့ တပ်မဟာ (၅) ဟာ KIO/KIA ဌာနချုပ်ကို ခုခံကာကွယ်ပါတယ်။ ၁၉၈၇ မှာ တရုတ်-မြန်မာ နယ်စပ်က KIO/KIA ဌာနချုပ်တွေဖြစ်တဲ့ Na Hpaw နဲ့ Pa Jau ကို အစိုးရတပ်က သိမ်းပိုက်နိုင်ပါတယ်။ ဌာနချုပ်တွေ ကျဆုံးပျက်စီးသွားပေမယ့် KIO/KIA လက်နက်ကိုင်လှုပ်ရှားမှုဟာ မပျက်စီးဘဲ ဒီကနေ့အထိ ရှင်သန်နေပါတယ်။

ဒါပေမဲ့ ဝ ပြည်သွေးစည်ညီညွှတ်ရေးတပ်ဖွဲ့လို ပြည်နယ်တခုလုံးကို ချုပ်ကိုင်ဖို့ဆိုတာ KIA အတွက် မဖြစ်နိုင်သလောက်ပါ။ လွန်ခဲ့တဲ့ အနှစ်အစိတ်နဲ့ ကွာခြားတာကတော့ လိုင်ဇာ ခေတ်မှာ တရုတ်ရင်းနှီးမြှပ်နှံမှုတွေ များလာတာပဲ ဖြစ်ပါတယ်။ ဒါကြောင့် ဗမာနဲ့တရုတ်ကို အပေးအယူလုပ်ပြီး ကချင်အမျိုးသားရေးနဲ့ သယံဇာထိန်းချုပ်ရေးအတွက် မျှမျှတတဖြစ်အောင် ကြိုးပမ်းဖို့သာ ရှိပါတယ်။ ရွှေလီဆွေးနွေးပွဲမှာ တရုတ်အစိုးရ ကိုယ်စားလှယ်တွေ သက်သေအဖြစ် ပါဝင်လာကို အခွင့်ကောင်းယူပြီး ကချင်တိုင်ရင်းသားအရေးကို ငြိမ်းချမ်းစွာဖြေရှင်းနိုင်လိမ်မယ်လို့ မျှော်လင့်ရပါတယ်။

သမ္မတအိုဘားမား နိုင်ငံတော်မိန့်ခွန်း စီးပွားရေး အသားပေး

သမ္မတ အိုဘားမား နိုင်ငံတော်အခြေပြမိန့်ခွန်း ပြောကြားစဉ် (၁၂-၂-၂၀၁၃)
အမေရိကန်သမ္မတ ဘရက်ခ် အိုဘားမား (Barack Obama) က အမေရိကန် ဖွဲ့စည်းပုံအရ သမ္မတအနေနဲ့ လွှတ်တော်နှစ်ရပ် ရှေ့မှောက် ကနေ နိုင်ငံတ၀ှမ်းလုံးကို  အမေရိကန် ၀ါရှင်တန်စံတော်ချိန် အင်္ဂါနေ့ ညပို်င်း မှာ နိုင်ငံတော် အခြေပြ မိန့်ခွန်းကို ပြောသွားပါတယ်။ သမ္မတရဲ့ မိန့်ခွန်းမှာ အမေရိကန် ပြည်ထောင်စုရဲ့ စီးပွားရေးအခြေအနေ ပြန်လည် အားကောင်း လာဖို့ကိစ္စ၊ သန့်ရှင်းတဲ့ လောင်စာ စွမ်းအင်ထုတ်လုပ်ရေး၊ လူဝင်မှု ကြီးကြပ်ရေးနဲ့ လက်နက် ထိန်းချုပ်ရေးကိစ္စတွေကို အဓိကထား ပြောဆိုသွားပါတယ်။ သမ္မတက အမေရိကန်နိုင်ငံရဲ့ စီးပွားရေး ပြန်လည်ခိုင်မာဖို့အတွက် မိမိတို့ မျိုးဆက်ရဲ့ တာဝန်ဖြစ်ပြီး လူလတ်တန်းစားတွေရဲ့ စီးပွားရေးကို ရှင်သန်အောင် အားပေးဖို့  အခုအချိန်က စပြီး ဆောင်ရွက်ရမယ်လို့ ဆိုပါတယ်။ ကွန်ဂရက်လွှတ်တော်အနေနဲ့ နိုင်ငံရဲ့ အသုံးစရိတ် လျှော့ချရေး ဆွေးနွေးညှိနှိုင်းမှုမှာ သဘောတူညီချက် တစုံတရာ မရဘူးဆိုရင် အမေရိကန် စစ်တပ်ဟာ နိုင်ငံကာကွယ်ရေး၊ ပညာရေး၊ ဆေးသုတေသန၊ စွမ်းအင်ကဏ္ဍတွေအပြင် နိုင်ငံရဲ့ စီးပွားရေး ဖွံ့ဖြိုးမှုလဲ နှေးကွေး သွားလိမ့်မယ်လို့ သတိပေး နှိုးဆော်လိုက်ပါတယ်။ ရာသီဥတု ပြောင်းလဲမှု အန္တရာယ် ဖြေရှင်းရေးနဲ့ပတ်သက်ပြီး ကွန်ဂရက် လွှတ်တော်က တစုံတရာ သဘောတူညီချက် မရရင် မိမိအနေနဲ့ အမြင့်ဆုံး အမိန့်အာဏာနဲ့ ဆက်လက် လုပ်ဆောင်သွားမယ် လို့ ဆိုပါတယ်။ ဒါ့အပြင် ကွန်ဂရက် လွှတ်တော်တွင်း မှာ ဆက်လက် ဆွေးနွေးနေဆဲဖြစ်တဲ့ လက်နက် ထိန်းချုပ်ရေးနဲ့ လူဝင်မှုကြီးကြပ်ရေး ဆိုင်ရာ  ပြန်လည် ပြုပြင်ရေးကိစ္စတွေကို ဥပဒေသစ် ပြဌာန်းပေးဖို့ တိုက်တွန်းလိုက်ပါ တယ်။ နိုင်ငံခြားရေး မူဝါဒဆိုင်ရာ ကိစ္စွမှာတော့ အာဖဂန်နစ္စတန်နိုင်ငံမှာ ရှိနေတဲ့ အမေရိကန် လုံခြုံရေး တပ်တွေထဲက အနည်းဆုံး အင်အား ၃ သောင်း ၄ ထောင်ကို တနှစ်အတွင်း ပြန်လည် ရုပ်သိမ်းမယ်လို့ ကြေငြာခဲ့ပါတယ်။