11.11.2012 နေ့ဖတ်ရန်သတင်းများ

by Myanmar Journal on Saturday, November 10, 2012 at 6:01pm ·

ဘီဘီစီ ညွှန်ချုပ် ရာထူးက နုတ်ထွက်

ရာထူးကနေ နုတ်ထွက်သွားခဲ့တဲ့ ဘီဘီစီ ညွှန်ချုပ် Geroge Entwistle (လက်ဝဲဘက်)

ဘီဘီစီရဲ့ ညွှန်ကြားရေးမှူးချုပ် George Entwistle ဟာ ရာထူးကနေ နုတ်ထွက် သွားပါတယ်။

ဘီဘီစီရဲ့ ပြည်တွင်းရုပ်မြင်သံကြား အစီအစဉ် တခု ဖြစ်တဲ့ သတင်းနဲ့ မျက်မှောက်ရေးရာ တွေကို ထုတ်လွှင့်ပြသတဲ့ Newsnight အစီအစဉ်က ဗြိတိသျှ နိုင်ငံရေး သမားဟောင်း တဦးကို ကလေးသူငယ် တွေကို မဖွယ်မရာ ပြုကျင့် ခဲ့တယ် လို့ မှားယွင်းစွာ စွပ်စွဲ ထားတဲ့ ရုပ်မြင်သံကြား သတင်းကို ထုတ်လွှင့် ပြသခဲ့ တာနဲ့ ပတ်သက်လို့ တာဝန်ရှိသူ တဦး အဖြစ်နဲ့ ရာထူးကနေ နုတ်ထွက် သွားခဲ့တာ ဖြစ်ပါတယ်။

အဲဒီ Newsnight မှာ ပြသသွားတဲ့ သတင်းထဲမှာ ဝေလနယ်ထဲ မှာရှိတဲ့ ကလေးသူငယ် တွေကို စောင့်ရှောက် ထားတဲ့ ဂေဟာမှာ ကလေးသူငယ် တွေကို မဖွယ်မရာ ပြုကျင့် တာတွေ ဖြစ်ခဲ့ကြောင်း အဲဒီတုန်းက ပြုကျင့် ခံခဲ့ရတဲ့ သူက ပြောကြားခဲ့တာ ဖြစ်ပါတယ်။ ဆက်လက်ပြီး သူ့ကို ပြုကျင့် ခဲ့သူ တဦးဟာ ကွန်ဆာဗေးတစ် ပါတီက နိုင်ငံရေး သမား တဦး ဖြစ်တယ်လို့ စွပ်စွဲ ပြောဆို ထားတာ ဖြစ်ပါတယ်။

ဘယ်သူဘယ်ဝါ ဆိုတာကို နာမည်နဲ့ တကွ ပြောကြားခဲ့ခြင်း မရှိပေမယ့် အဲဒီလူဟာ Lord McAlpine ဆိုပြီး အင်တာနက်ပေါ်မှာ ခန့်မှန်း ပြောဆိုမှုတွေ ဖြစ်ခဲ့ပါတယ်။

ဒါပေမယ့် မကြာခင်မှာပဲ အဲဒီ ပြုကျင့် ခံခဲ့ ရသူက သူ့ကို ပြုကျင့်ခဲ့တာ အဲဒီ Lord McAlpine မဟုတ်ဘူး ဆိုပြီး ပြောကြား တောင်းပန် ခဲ့ပါတယ်။

အဲဒီလို မှားယွင်းစွာ စွပ်စွဲထားတဲ့ ရုပ်မြင်သံကြား သတင်းကို ထုတ်လွှင့် ပြသခဲ့မှုနဲ့ ပတ်သက်ပြီး ဘီဘီစီဟာ ပြင်းထန်စွာ ဝေဖန်ပြစ်တင် ခံနေရတာ ဖြစ်ပါတယ်။

ရာထူးက နုတ်ထွက်သွား ခဲ့တဲ့ ဘီဘီစီ ညွှန်ကြားရေးမှူးချုပ်က ဒီအစီအစဉ်ကို ထုတ်လွှင့် ပြသခဲ့ဖို့ မသင့်ဘူးလို့ ဆိုခဲ့ပြီး ဒါကြောင့် ဘီဘီစီ အပေါ် ထားရှိတဲ့ လူထုရဲ့ ယုံကြည်မှုတွေကို လျော့နည်း စေကုန်မှာ ဖြစ်တယ်လို့ ဆိုခဲ့ပါတယ်။

အခုတော့ အဲဒီ အစီအစဉ် ထုတ်လွှင့်ခဲ့ တာနဲ့ ပတ်သက်ပြီး ဘီဘီစီရဲ့ ညွှန်ကြားရေးမှူးချုပ်က တဘက်မှာလည်း သူဟာ ဘီဘီစီရဲ့ အယ်ဒီတာချုပ် ဖြစ်တဲ့ အတွက် သူ့မှာ တာဝန်ရှိတယ် ဆိုပြီး ရာထူးကနေ နုတ်ထွက် သွားခဲ့တာ ဖြစ်ပါတယ်။ သူဟာ ပြီးခဲ့တဲ့ စက်တင်ဘာလ ကမှ ဘီဘီစီရဲ့ ညွှန်ကြားရေးမှူးချုပ် တာဝန်ကို ထမ်းဆောင် ခဲ့တာ ဖြစ်ပါတယ်။

ဘီဘီစီ Newsnight အစီအစဉ် ဟာ မကြာသေးခင် ကလည်း အရင် ဘီဘီစီရဲ့ နာမည်ကျော် ဖျော်ဖြေ တင်ဆက်သူ Jimmy Savile က ကလေးသူငယ်တွေကို မဖွယ်မရာ ပြုကျင့် ခဲ့တာတွေကို စုံစမ်း ထားခဲ့တဲ့ အစီအစဉ်ကို မထုတ်လွှင့်ခဲ့တဲ့ အတွက် ဝေဖန်ပြစ်တင် ခံနေခဲ့ ရတာ ဖြစ်ပါတယ်။

နိုင်ငံခြားရေးဝန်ကြီး ကလင်တန် သမ္မတနဲ့အတူ အာရှသွားမည်

 

အမေရိကန် နိုင်ငံခြားရေးဝန်ကြီး ဟီလာရီကလင်တန်။

အမေရိကန် နိုင်ငံခြားရေးဝန်ကြီး ဟီလာရီ ကလင်တန်ဟာ စီးပွားရေးနဲ့ လုံခြုံရေးကိစ္စတွေကို ဆွေးနွေးဖို့ အတွက် အာရှပစိဖိတ်ဒေသကို နောက်လာမယ့် သီတင်းပတ်မှာ သွားရောက်ဖို့ စီစဉ်ထားပါတယ်။ 

ဝန်ကြီးကလင်တန်ဟာ ထိုင်းနိုင်ငံမှာ သမ္မတ ဘရက်အိုဘားမားနဲ့ အတူမဆုံခင် သြစတေးလျနဲ့ စင်္ကာပူနိုင်ငံတွေကို အရင်သွားမှာ ဖြစ်တဲ့အကြောင်း သောကြာနေ့မှာ အမေရိကန် နိုင်ငံခြားရေး ၀န်ကြီးဌာနက ထုတ်ပြန် ကြေညာပါတယ်။ အဲဒီနောက် သမ္မတ ဘရက်အိုဘားမားနဲ့ အတူ မြန်မာနိုင်ငံနဲ့ ကမ္ဘောဒီးယားနိုင်ငံတွေကို သွားရောက်မှာ ဖြစ်ပါတယ်။

သြစတေးလျနိုင်ငံမှာ မစ္စကလင်တန်ဟာ အမေရိကန် ကာကွယ်ရေးဝန်ကြီး လီယွန်ပန်နက်တ နဲ့ အတူ ဒေသတွင်း လုံခြုံရေးနဲ့ ကမ္ဘာတ၀ှမ်းက အခြေအနေတွေကို သြစတေးလျ တာဝန်ရှိသူတွေနဲ့ ဆွေးနွေးမှာ ဖြစ်ပါတယ်။

အာရှပစိဖိတ်ဒေသအတွင်း အမေရိကန်ရဲ့ တပ်ဖွဲ့တွေ တိုးချဲ့တပ်စွဲရေး အစီအစဉ်အရ ပထမဦးဆုံး အမေရိကန် မရိန်းတပ်ဖွဲ့တွေဟာ သြစတေးလျ နိုင်ငံကို လာမယ့် ဧပြီလမှာ ရောက်ရှိလာတော့မှာပါ။ ဒီလိုတပ်စွဲဖို့အတွက် အမေရိကန်သမ္မတ ဘရက်အိုဘားမားနဲ့ သြစတေးလျ ၀န်ကြီးချုပ် ဂျူလီယာ ဂေးလတ်တို့ ၂၀၁၁ ခုနှစ်အတွင်း သဘောတူညီခဲ့တာ ဖြစ်ပါတယ်။

သမ္မတ အိုဘားမား ဖလော်ရီဒါမှာလည်းနိုင်

ဒုတိယသက်တမ်း တာဝန်ထမ်းဆောင်မယ့် သမ္မတ အိုဘားမား

ပြီးခဲ့တဲ့ သတင်းပတ် အင်္ဂါနေ့က ပြုလုပ်ခဲ့တဲ့ အမေရိကန် သမ္မတ ရွေးကောက်ပွဲမှာ သမ္မတ အိုဘားမားဟာ ဖလော်ရီဒါပြည်နယ် မှာလည်း အနိုင်ရရှိ ခဲ့တယ်လို့ ရွေးကောက်ပွဲ အာဏာပိုင် တွေက အတည်ပြု ပြောကြား လိုက်ပါတယ်။

သမ္မတ အိုဘားမားက ပြိုင်ဘက် ရီပတ်ပလစ်ကန် ပါတီက မစ်ရွန်မနီကို ၁ ရာခိုင်နှုန်း အောက်သာ မဲအသာရပြီး နိုင်ခဲ့ ပေမယ့် ဒီလို နိုင်လိုက်တာက သူ့ရဲ့ ရွေးကောက်ပွဲ အနိုင်အရှုံး ကွာခြားချက်ကိုတော့ ပိုပြီး ကြီးသွား စေခဲ့ပါတယ်။

ဒီပြည်နယ်ကိုပါ ထည့်ပေါင်းရင် သမ္မတ အိုဘားမားဟာ မဲယိုင် တတ်တဲ့ ပြည်နယ် စုစုပေါင်း ၉ ခုထဲက ၈ ခုမှာ အနိုင်ရ ခဲ့တာ ဖြစ်ပြီး ပြည်နယ် အလိုက် ရတဲ့မဲ အရေ အတွက်အားဖြင့် ၃၃၂ မဲ ရရှိ သွား ခဲ့ပါတယ်။

ဒီတခါမှာတော့ ဖလော်ရီဒါ ပြည်နယ်ရဲ့ အနိုင်အရှုံး ရလဒ်တွေဟာ ပြီးခဲ့တဲ့ ၂၀၀၀ ခုနှစ် ရွေးကောက်ပွဲတုန်း ကလို အနိုင်အရှုံး အတွက် အငြင်းပွား စရာ မရှိအောင် ရှောင်လွှဲ နိုင်ခဲ့ပါတယ်။

အဲဒီ ၂၀၀၀ ပြည့်နှစ် ရွေးကောက်ပွဲ တုန်းကတော့ ဂျော့(ချ)ဘုရ်ှနဲ့ အဲလ်ဂိုး တို့ယှဉ်ပြိုင် ခဲ့ကြတာ ဖြစ်ပြီး အဲဒီ ဖလော်ရီဒါ အနိုင် အရှုံး ကနေ သမ္မတ ရွေးကောက်ပွဲ အနိုင်အရှုံးကို အဆုံး အဖြတ် ပေးသွား ခဲ့တာ ဖြစ်ပါတယ်။

အစ္စရေးနဲ့ ပါလက်စတိုင်းကြား တိုက်ခိုက်မှုတွေ တခါထပ်ဖြစ်ပြန်

ဂါဇာမှာ တိုက်ခိုက်မှုတွေ ထပ်ဖြစ်နေ

အစ္စရေးနဲ့ ပါလက်စတိုင်းကြား တိုက်ခိုက်မှုတွေ တခါထပ်ဖြစ်လာပြန်ပါပြီ။ အစ္စရေးတို့က ဂါဇာ ကမ်းမြှောင်ဒေသကို စနေနေ့က အမြောက်တွေနဲ့ ပစ်ခတ်ခဲ့လို့ ပါလက်စတိုင်း ၄ ဦးသေ ၂၀ ဒဏ်ရာရသွားခဲ့ပါတယ်။

စောစောပိုင်းက အစ္စရေးစစ်သား ၄ ဦး ဒဏ်ရာရသွားခဲ့တဲ့ အစ္စရေး ကင်းလှည့် စစ်ဂျစ်ကားတစီးတိုက်ခိုက်ခံခဲ့ရပြီးနောက်ပိုင်း အခုလို အစ္စရေးတို့က တိုက်ခိုက်ခဲ့တာ ဖြစ်ပါတယ်။

Hamas ပါလက်စတိုင်းအရာရှိတွေရဲ့ အပြောအရ သေဆုံး ဒဏ်ရာရသူအားလုံးဟာ အရပ်သားတွေ ဖြစ်ပြီး ဂါဇာမြို့အနီးက Shijaia ဒေသက ဈာပနတခုကို တိုက်ခိုက်ခဲ့တာလို့ ဆိုပါတယ်။

အစ္စရေးစစ်တပ်ကတော့ သူတို့ရဲ့ စစ်ဂျစ်ကားကို တင့်ကားဖျက် ဒုံးလက်နက်ထိမှန်ခဲ့ပြီးတဲ့နောက် နေရာ အတော်တော်များများကို ပစ်မှတ်ထားတိုက်ခိုက်ခဲ့တာလို့ ပြောပါတယ်။

ဒါဟာ အစ္စရေးနဲ့ ဂါဇာက စစ်သွေးကြွတွေကြားတို့ကြား နောက်ဆုံးဖြစ်တဲ့ အကြမ်းဖက်မှုတခုပါ။

ပြီးခဲ့တဲ့ ကြာသပတေးနေ့ကလည်း ဂါဇာမှာ အစ္စရေးစစ်သားတွေနဲ့ စစ်သွေးကြွတွေကြား တိုက်ခိုက်မှုတွေမှာ ၁၃ နှစ်အရွယ် ပါလက်စတိုင်း အမျိုးသားလေးတဦး သေဆုံးခဲ့ရပါတယ်။

ဒီနောက် ဂါဇာနယ်စပ် စည်းရိုးနားမှာရှိတဲ့ မြေအောက် လှိုဏ်ခေါင်းတခု ပေါက်ကွဲလို့ အစ္စရေးစစ်သားတဦး ဒဏ်ရာရသွားခဲ့တယ်လို့ အစ္စရေးစစ်တပ်က ပြောပါတယ်။

ပြီးခဲ့တဲ့ သီတင်းပတ်ကလည်း ဗုံးပေါက်ကွဲလို့ နယ်စပ် စည်းရိုးနား တလျှောက် ကင်းလှည့်နေတဲ့ အစ္စရေးစစ်သား ၃ ဦး ဒဏ်ရာရခဲ့ပါသေးတယ်။

အဲဒီ မြေအောက်လှိုဏ်ခေါင်းဟာ လောလောဆယ် နှစ်တွေအတွင်း တွေ့ရှိခဲ့ရတဲ့ လှိုဏ်ခေါင်းတွေအနက် အကြီးဆုံးဖြစ်ပြီး အစ္စရေးစစ်သားတွေကို ပြန်ပေးဆွဲဖို့ ဒါမှမဟုတ် သတ်ဖြတ်ဖို့ စီစဉ်ကြံစည်နေတာ ဖြစ်နိုင်တယ်လို့ အစ္စရေးစစ်တပ် ပြောခွင့်ရသူက ပြောပါတယ်။

ဗုံးဖေါက်ခွဲမှုဟာ သူတို့ လက်ချက်ဖြစ်ပြီး ပါလက်စတိုင်းလူငယ်လေး သေဆုံးခဲ့ရတာအတွက် တုံပြန်တာလို့ ဟာမာ့စ်ရဲ့ စစ်ရေးဆိုင်ရာအဖွဲ့ Izz al-Din Qassam တပ်မ ကပြောခဲ့ပါတယ်။

ဂါဇာဒေသမှာ အကြမ်းဖက်မှုတွေ မကြာခဏ ပြန်ဖြစ်လေ့ရှိပြီး အေးဆေးတည်ငြိမ်တဲ့ကာလဟာ သိပ်ကြာကြာခံလေ့မရှိဘူးလို့ ဂျော်ဒန်မြစ် အနောက်ဘက် ကမ်းခြေ ရမ်မလာမှာရှိတဲ့ ဘီဘီစီ သတင်းထောက် Jon Donnison က ပြောပါတယ်။

အခုလည်း စနေနေ့ အမြောက်နဲ့ ပစ်ခတ်တိုက်ခိုက်မှုတွေကို လက်တုံပြန်မယ်လို့ ဟာမာ့စ် စစ်သွေးကြွတို့ရဲ့ ပြောခွင့်ရပုဂ္ဂိုလ်က ပြောပါတယ်။

အရပ်သားတွေကို ပစ်မှတ်ထား တိုက်ခိုက်လာနေတာတွေဟာ အန္တရာယ်ပိုများလာနေပြီး၊ သည်းမခံနိုင်တော့ဘူး၊ အစ္စရေးတို့ရဲ့ ရာဇဝတ်မှုတွေကို သူတို့အနေနဲ့ တုံပြန်ပိုင်ခွင့် အပြည့်အဝရှိတယ်လို့ ဆိုပါတယ်။

အစ္စရေး ကာကွယ်ရေးတပ်ဖွဲ့ကလည်း အစ္စရေးအရပ်သားတွေကို အန္တရာယ်ပြုဖို့ ကြိုးစားသူ ဘယ်သူ့ကိုမဆို ညည်းမခံဘူး၊ အစ္စရေးနိုင်ငံကို ဆန့်ကျင်တဲ့ အကြမ်းဖက်မှုမှန်သမျှ ဆန့်ကျင်တိုက်ခိုက်သွားမယ်လို့ ကြေညာချက် ထုတ်ပြန်ခဲ့ပါတယ်။

ဂါဇာက အကြမ်းဖက်မှုမှန်သမျှအတွက် ဟာမာ့စ် အကြမ်းဖက်အဖွဲ့မှာ တာဝန်ရှိတယ်လို့ အဲဒီကြေညာချက်မှာ ဖေါ်ပြထားပါတယ်။

နိုင်ငံရေးဆွေးနွေးမှုနဲ့ ဖက်ဒရယ်ကိစ္စ သဘောညီ

ပြည်တွင်းငြိမ်းချမ်းရေးအတွက် ကြိုးကုတ်ဆောင်ရွက်နေသူ

ပြည်တွင်းငြိမ်းချမ်းရေးအတွက် ကြိုးကုတ်ဆောင်ရွက်နေတဲ့ သမ္မတရုံးဝန်ကြီး ဦးအောင်မင်းဟာ တိုင်းရင်းသား လက်နက်ကိုင်၊ လက်နက်မဲ့ အဖွဲ့တွေနဲ့ ထိုင်းနိုင်ငံ မှာ ဆွေးနွေးပွဲတွေ ဆက်ပြန်ပါတယ်။

ဒီတခေါက်မှာ ထူးခြားမှုအဖြစ် လက်နက်ကိုင်၊ လက်နက်မဲ့ တိုင်းရင်းသားအဖွဲ့တွေ ပေါင်းစုထားတဲ့ ညီညွတ်သော တိုင်းရင်းသား လူမျိုးများ ဖက်ဒရက်ကောင်စီ UNFC နဲ့ ဝန်ကြီး ဦးအောင်မင်းတို့ ပထမအကြိမ် အလွတ်သဘော ရင်းရင်းနှီးနှီး ပြောဆို ဆွေးနွေးလို့ သဘောတူညီမှု တွေလည်း ရှိခဲ့တယ်လို့ သိရပါတယ်။

ဆွေးနွေးမှုတွေနဲ့ ပတ်သက်လို့ UNFC တွဲဖက် အတွင်းရေးမှူး ဦးခွန်ဥက္ကာက အလွတ်သဘော ဆွေးနွေးပွဲ ဖြစ်ပေမယ့်လို့ နိုင်ငံရေး ပြဿနာကို နိုင်ငံရေးနည်းနဲ့ ဖြေရှင်းဖို့ အခြေခံ သဘောညီမှု ရခဲ့တယ်လို့ ဘီဘီစီကို ပြောပါတယ်။ ဒါဟာ UNFC ရဲ့ ကာလရှည်ကြာ လိုလားချက် ဖြစ်သလို အစိုးရရဲ့ ငြိမ်းချမ်းရေးနဲ့ ပတ်သက်ပြီး မူပြောင်းချက် ဖြစ်တယ်လို့ သူက သုံးသပ်ပါတယ်။

ဝန်ကြီး ဦးအောင်မင်းဟာ နိုဝင်ဘာ ၉၊ ၁၀ နှစ်ရက် အတွင်းမှာ ကျောင်းသား တပ်မတော် ABSDF၊ ညီညွတ်သော တိုင်းရင်းသား လူမျိုးများ ဖက်ဒရက်ကောင်စီ UNFC၊ ကရင်နီ အမျိုးသား တိုးတက်ရေး ပါတီ KNPP၊ လူ့ဘောင်သစ် ဒီမိုကရက်တစ် ပါတီ DPNS၊ အမျိုးသမီးများ အဖွဲ့ချုပ် မြန်မာနိုင်ငံ WLB၊ ရခိုင် လွတ်မြောက်ရေး ပါတီ ALP စတဲ့ အဖွဲ့တွေနဲ့ တွေ့ဆုံ ဆွေးနွေးခဲ့ပါတယ်။

သမ္မတရဲ့ ဦးဆောင်မှုနဲ့ ဝန်ကြီး ဦးအောင်မင်းရဲ့ ကြိုးပမ်း ဆောင်ရွက်ချက်တွေကို တွေ့ရတယ်၊ ကချင် လွတ်လပ်ရေး အဖွဲ့ KIO ရဲ့ လိုလားချက် အတိုင်း အပစ် မရပ်ပေမယ့် နိုင်ငံရေး ဆွေးနွေးမယ်လို့ ပြောဆို လုပ်ကိုင် လာတာဟာ ဦးအောင်မင်းရဲ့ ရဲတင်းတဲ့ ဆောင်ရွက်ချက်လို့လည်း ဦးခွန်ဥက္ကာ ပြောပါတယ်။

ဝန်ကြီးဦးအောင်မင်းရဲ့ ထိုင်းနိုင်ငံ ငြိမ်းချမ်းရေး ခရီးစဉ်မှာ လိုက်ပါလာတဲ့ ငြိမ်းချမ်းရေး အကျိုးဆောင်လူကြီး ဦးလှမောင်ရွှေကတော့ ဒီ ငြိမ်းချမ်းရေး ကိစ္စတွေဟာ နှစ်ပေါင်းများစွာ ကြာမှ တကြိမ် ပြန်လုပ်လာတာ ဖြစ်တယ်၊ အပစ်ရပ်ရုံ မဟုတ်ဘဲ ခိုင်မာတဲ့ ငြိမ်းချမ်းရေး အတွက် ရှေးရှု လုပ်ဆောင် နေတာမို့ သတိကြီးကြီးထား ကြိုးပမ်း ဆောင်ရွက်နေတဲ့ အကြောင်း ပြောပါတယ်။

ငြိမ်းချမ်းရေးအတွက် အချိန်ယူရတာ၊ အခက်အခဲ တွေ့တာတွေ ရှိတယ်၊ အဆင့်လိုက် သွားရတာတွေ ရှိလို့ ဆန္ဒစောရင် မှားမယ်၊ တခါ နောက်ကျပြန်ရင်လည်း ပြဿနာ တက်နိုင်တာမို့ အတတ်နိုင်ဆုံး ကြိုးပမ်း ဆောင်ရွက် နေတယ်လို့ ဦးလှမောင်ရွှေက ဘီဘီစီကို ပြောပါတယ်။

မကြာခင် ရက်ပိုင်းကပဲ ပြည်သူ့လွှတ်တော် ဥက္ကဌ သူရ ဦးရွှေမန်းကလည်း လွှတ်တော်အမတ် ဦးတီခွန်မြတ်နဲ့ ဒေါ်နန်းဝါနုတို့ နှစ်ဦးကို တိုင်းရင်းသားတွေ လိုလားနေတဲ့ ဖက်ဒရယ်ကိစ္စကို လေ့လာပြီး စာတမ်းရေးဖို့ ညွှန်ကြားတာ ရှိခဲ့ပါတယ်၊ ဝန်ကြီး ဦးအောင်မင်းက ဒါဟာ သူတိုက်တွန်းခဲ့တာလို့ ပြောခဲ့ကြောင်း ဦးခွန်ဥက္ကာက ဘီဘီစီကို ပြောပါတယ်။

သီရိလင်္ကာ ထောင်တခုမှာ ဆူပူမှု ဖြစ်ပွား

ရဲတပ်ဖွဲ့ဝင်တွေ ထောင်ကို လာရောက် ပြီး၊ ရှာဖွေရေး လုပ်ချိန်မှာ ထောင်သားတွေက လက်နက် လုပြီး ပစ်ခတ်

သီရိလင်္ကာနိုင်ငံ မြို့တော် ကိုလံဘိုက ထောင်တခုမှာ လုံခြုံရေး တပ်ဖွဲ့တွေနဲ့ ထောင်သားတွေ အကြား အဓိကရုဏ်း ဖြစ်ပွားခဲ့ ပြီးနောက် ထွက်ပြေး လွတ်မြောက် သွားတဲ့ အကျဉ်းသား တွေကို သိရိလင်္ကာ ရဲတပ်ဖွဲ့ ကနေ လိုက်လံ ရှာဖွေ နေပါတယ်။

ဝီလီကားဒါ ထောင်မှာ ဖြစ်ပွားခဲ့တဲ့ ဒီ အဓိကရုဏ်း အတွင်း လူပေါင်း ၂၇ ဦး သေဆုံး သွားပြီး အများစုဟာ သေနတ် ဒဏ်ရာနဲ့ သေဆုံး သွားကြတဲ့ ထောင်သား တွေ ဖြစ်ပါ တယ်။

အထူး ကိုမန်ဒို ရဲတပ်ဖွဲ့ဝင်တွေ ထောင်ကို ရောက်ရှိ လာပြီး၊ တရား မဝင် ပစ္စည်းတွေကို ရှာဖွေ နေချိန်မှာ ထောင်သား တချို့ဟာ လက်နက်တွေ လုယုပြီး ပြန်လည် ပစ်ခတ်ခဲ့ ကြတာ ဖြစ်ပါတယ်။

ထောင်သားတွေဟာ လက်နက် တိုက်ကို ချိုးဖေါက် ဝင်ရောက် ပြီးနောက် လက်နက်တွေကို ယူ၊ အရာရှိ တချို့ကို ဓါးစာခံတွေ အဖြစ် ဖမ်းဆီး ထားခဲ့တာ ဖြစ်ပြီး၊ ကိုမန်ဒို ရဲတွေက မျက်ရည်ယို ဗုံးတွေနဲ့ ပြန်လည် ပစ်ခတ်ခဲ့ ပါတယ်။

အခု ဖြစ်ပွားခဲ့တဲ့ ထောင်တွင်း အကြမ်းဖက်မှုဟာ သီရိလင်္ကာမှာ နှစ်ပေါင်းများစွာ အတွင်း အဆုံးဝါးဆုံး ဖြစ်ရပ်ပါ။

အခုတော့ ထောင်ကို ပြန်လည် ထိန်းချုပ် နိုင်ခဲ့ပြီလို့ အာဏာပိုင်တွေက ပြောပါတယ်။

ဆီတင်ရထား တိမ်းမှောက်မှု အာဏာပိုင်တွေ စုံစမ်းနေဆဲ

မန္တလေး - မြစ်ကြီးနား ကုန်တင် ဆီတွဲရထား စစ်ကိုင်းတိုင်း ကန့်ဘလူမြို့နယ်အနီး လမ်းချော် တိမ်းမှောက်ခဲ့စဉ်။ (နိုဝင်ဘာလ ၉ ရက်၊ ၂၀၁၂)။

မန္တလေးကနေ မြစ်ကြီးနားကိုသွားတဲ့ ကုန်တင် ဆီတွဲရထားတစီး သောကြာနေ့က စစ်ကိုင်းတိုင်း ကန့်ဘလူမြို့နယ်အနီး လမ်းချော် တိမ်းမှောက်ခဲ့တာမှာ သေဆုံးသူဦးရေ ၂၅ ဦးအထိ ရှိနေပြီး ဒဏ်ရာရသူပေါင်း ၁၀၀ နီးပါး ရှိတယ်လို့ မြန်မာအစိုးရ အရာရှိတွေက စနေနေ့က ပြောပါတယ်။

ရထားက ထွက်ကျလာတဲ့ ဆီတွေကို ယူဖို့ အပြေးအလွှား ကြိုးစားကြတဲ့ ရွာသားတွေ ဆီတိုင်ကီတွေ ပေါက်ကွဲတဲ့အခါမှာ ထိခိုက် ဒဏ်ရာရခဲ့ကြတယ်လို့ အာဏာပိုင်တွေ က ပြောပါတယ်။ ပေါက်ကွဲမှုကြောင့် လူ ၆၄ ဦး ဒဏ်ရာ ရခဲ့တဲ့အကြောင်း မြန်မာအစိုးရ ရုပ်မြင်သံကြားမှာ သောကြာနေ့က ကြေညာပါတယ်။ လောလောဆယ် ရထားတွဲ အပျက်အစီးတွေကို ရှင်းလင်းနေပြီး ရထားလမ်း ပြန်လည် အသုံးပြုနိုင်ဖို့ အင်ဂျင်နီးယာတွေက ကြိုးစားနေတဲ့အကြောင်း မြန်မာ့မီးရထား ဌာနက အရာရှိတဦးက မနေ့က ပြောပါတယ်။

ဘာကြောင့် ခုလို ရထားလမ်းချော် တိန်းမှောက်ခဲ့တာလဲ ဆိုတာကို စုံစမ်းစစ်ဆေးသူတွေက မနေ့က စစ်ဆေးမှုတွေ လုပ်ခဲ့ပါတယ်။ အကြောင်းရင်းကိုတော့ သေချာ မသိရသေးပါဘူး။ မန္တလေး မြစ်ကြီးနား မီးရထားလမ်းဟာ လွန်ခဲ့တဲ့ နှစ်တွေအတွင်းကလည်း အခုလို လမ်းချော်တာမျိုးတွေ မကြာခဏ ဖြစ်ပွားတတ်ပါတယ်။ ဒီနှစ် ဧပြီလအတွင်းကတော့ ကချင်ပြည်နယ် မော်ဟန် အနီးမှာ မိုင်းပေါက်ကွဲတာကြောင့် ရထားတွဲ ၈ တွဲ လမ်းချော်ကျခဲ့ရဖူးပါတယ်။

မာလာလာ နေ့ ကုလသမဂ္ဂ သတ်မှတ်

မာလာလာ ပြန်လည် ကျန်းမာလာဖို့ ဆုတောင်းနေတဲ့ ပါကစ္စတန်နိုင်ငံ Peshawar မြို့က အမျိုးသမီးတဦး။ (နိုဝင်ဘာလ ၁၀ ရက်၊ ၂၀၁၂)။

ပြီးခဲ့တဲ့ တလလောက်က တာလီဘန်တွေရဲ့ ပစ်ခတ်တာ ခံရပြီး ဒဏ်ရာ အပြင်းအထန် ရခဲ့တဲ့ ၁၅ နှစ်အရွယ် ပါကစ္စတန် မိန်းကလေး မာလာလာ ယူဆပ်ဇိုင် (Malala Yusafzai) ကို ပါကစ္စတန် ကျောင်းသားတွေနဲ့ လူ့အခွင့်အရေး တက်ကြွ လှုပ်ရှားသူတွေက စနေနေ့က ဂုဏ်ပြုခဲ့ကြပါတယ်။ မိန်းကလေးငယ်တွေ ပညာသင်ကြားခွင့်ရရေး ရှေ့ထွက်ပြောဆိုခဲ့တဲ့ မာလာလာ ကို ဂုဏ်ပြုတဲ့အနေနဲ့ နိုဝင်ဘာလ ၁၀ ရက်၊ စနေနေ့ကို မာလာလာ နေ့ အဖြစ် ကုလသမဂ္ဂကလည်း သတ်မှတ်လိုက်ပါတယ်။ အပြည့်စုံ သိရအောင် မခင်ဖြူထွေးက တင်ပြထားပါတယ်။ တာလီဘန်အဖွဲ့တွေရဲ့ ရက်စက် ကြမ်းကြုတ်မှုတွေကို မှတ်တမ်းယူခဲ့တဲ့အတွက်ရော၊ မိန်းကလေး ငယ်တွေ ပညာသင်ကြားခွင့် ရရှိရေး အလေးပေး ထုတ်ဖော် ပြောဆိုခဲ့တာ တွေအတွက် တာလီဘန် လက်နက်ကိုင်တွေရဲ့ ပစ်မှတ်ထား တိုက်ခိုက်ခံခဲ့ရတဲ့ မာလာလာ ယူဆပ်ဇိုင် ကို တကမ္ဘာလုံးက ချီးကျူး ဂုဏ်ပြုတဲ့အနေနဲ့ နိုဝင်ဘာလ ၁၀ ရက် စနေနေ့ကို မာလာလာ နေ့အဖြစ် ကုလသမဂ္ဂက သတ်မှတ်လိုက်တာ ဖြစ်ပါတယ်။ မာလာလာကို ဂုဏ်ပြုတဲ့အနေနဲ့ ကရာချီးမြို့က ကျောင်းသား ကလေးငယ်တွေနဲ့ ကျောင်း ဆရာ ဆရာမတွေ ကလည်း ချီတက် ဆန္ဒပြခဲ့ကြတာပါ။ ကျောင်းသား ကလေးငယ်တွေက မာလာလာ ရဲ့ ပုံနဲ့ ပိုစတာတွေကို ကိုင်ဆောင်ပြီး “ငါဟာ မာလာလာ ဖြစ်တယ်။” I am Malala ဆိုပြီး ကြွေးကြော် ချီတက်ခဲ့ကြတာပါ။

ဆန္ဒပြလူအုပ်ဟာ တောင်ပိုင်း Sindh ညီလာခံ အဆောက်အဦး ရှိရာကို ချီတက်ခဲ့ကြပြီး အဲဒီမှာ မာလာလာ ရဲ့ဘ၀ကို ဖော်ကျူးတဲ့ ပြဇာတ်တခုကိုလည်း ကပြခဲ့ကြပါတယ်။ အခု ချီတက်ဆန္ဒပြ ကြသူတွေထဲမှာ Sindh ခရိုင်မှာရှိတဲ့ တောင်အာရှ သတင်းမီဒီယာ လွတ်လပ်ရေးအဖွဲ့ရဲ့ ဥက္ကဋ္ဌ Khursheed Haider လည်း ပါဝင်ပါတယ်။ “မာလာလာဟာ ဆ၀ပ် ဒေသမှာ မိန်းကလေးငယ်တွေ ပညာသင်ကြားခွင့် ရဖို့ ပြောဆိုခဲ့တဲ့အတွက် ပစ်ခတ် ခံခဲ့ရတယ် ဆိုတာ လူတိုင်း သိကြတဲ့အတိုင်းပါပဲ။ မိန်းကလေးတွေ ပညာသင်ကြားခွင့်ကို ဆန့်ကျင်တဲ့သူ တချို့ ရှိပါတယ်။ ဒါပေမဲ့ ယုံကြည်မှုခိုင်မာတဲ့ ဒီမိန်ကလေး (မာလာလာ) ကတော့ ဒီကိစ္စကို ထုတ်ဖော် ပြောဆိုခဲ့လို့ ပစ်ခတ် ခံခဲ့ရပါတယ်။” 

မာလာလာ ကို ထောက်ခံသူတွေဟာ ပါကစ္စတန်နိုင်ငံ အနောက်မြောက်ပိုင်း ဆ၀ပ် တောင်ကြားဒေသမှာ ရှိတဲ့ မာလာလာ ရဲ့ မွေးရပ်ဇာတိ Mingora မြို့ အပါအ၀င် တခြား ပါကစ္စတန် မြို့ကြီးတွေမှာလည်း စနေနေ့က စုဝေးဆန္ဒပြမှုတွေ ပြုလုပ် ခဲ့ကြပါတယ်။ကုလသမဂ္ဂရဲ့ ကမ္ဘာ့ ပညာရေးဆိုင်ရာ အထူး ကိုယ်စားလှယ် အဖြစ် တာဝန် ထမ်းဆောင်နေတဲ့ ဗြိတိန်ဝန်ကြီးချုပ် ဟောင်း ဂေါ်ဒန်ဘရောင်း ကလည်း မာလာလာ ကို ထောက်ခံတဲ့ လက်မှတ်ပေါင်း ၁ သောင်းကျော်နဲ့ စာတစောင်ကို ပါကစ္စတန် သမ္မတဆီကို ပေးပို့ခဲ့ပါတယ်။ “ဒီနေ့ ကျနော်တို့ မာလာလာ နေ့ကို ဂုဏ်ပြု ဆင်နွှဲနေပါတယ်။ သူ့ရဲ့ သတ္တိရှိလှတဲ့ စွမ်းဆောင်ချက်အတွက် တကမ္ဘာလုံးရဲ့ အာရုံစိုက်မှု၊ သနားကြင်နာမှုနဲ့ စာနာနားလည်မှုတွေ ရခဲ့တဲ့ မိန်းကလေးငယ်လေး မာလာလာ ကို ဂုဏ်ပြုတာပါ။ ကမ္ဘာတ၀ှမ်းက နိုင်ငံပေါင်း ၁၀၀ ကျော်မှာလည်း မာလာလာ ကို ထောက်ခံတဲ့ လက်မှတ် ကောက်ယူ စုဆောင်းမှုတွေ အပါအ၀င် တခြား လှုပ်ရှားဆောင်ရွက်မှုတွေ လုပ်နေကြမယ် ဆိုတာကို ကျနော် ပြောနိုင်ပါတယ်။ တကမ္ဘာလုံးက မာလာလာ ကို အသိအမှတ်ပြု ဂုဏ်ပြုချင်ကြတာပါ။ တချို့နေရာတွေမှာ ငြိမ်းချမ်းရေးနဲ့ ပညာရေး အတွက် မာလာလာ ဆိုတဲ့ ကြွေးကြော်သံတွေ ကိုလည်း ကျနော် တွေ့ရပါတယ်။ လူတွေက ဒီ မိန်းကလေး ပညာသင်ကြားခွင့် ရရမယ်၊ မိန်းကလေးငယ်တိုင်း ပညာသင်ကြားခွင့်ရ ရမယ် ဆိုပြီး ထောက်ခံ ပြောဆိုနေကြသလို ဒီအတွက် ဆောင်ရွက်သွားမယ်၊ ကိုယ့်နိုင်ငံ ငြိမ်းချမ်းတာကို မြင်ချင်တဲ့အတွက် ဒါကို လုပ်သွားကြရမယ် ဆိုပြီး ပြောနေကြတာပါ။”  မာလာလာ ကို ဂုဏ်ပြုတဲ့ အနေနဲ့ အဖွဲ့အစည်းတခု ထူထောင်လိုက်တဲ့ အကြောင်းလည်း မစ္စတာ ဘရောင်း က ပြောခဲ့ပါတယ်။ ကမ္ဘာတ၀ှမ်း ကျောင်းနေခွင့်မရတဲ့ မိန်ကလေးငယ်ပေါင်း ၃၂ သန်း စာသင်ခွင့်ရရေး လှုပ်ရှား ဆောင်ရွက်ချင်တယ်လို့ သူ သေနတ်နဲ့ အပစ်မခံရခင် တပတ်အလိုမှာ မာလာလာ က သူ့သူငယ်ချင်းတွေကို ပြောခဲ့တဲ့အတိုင်း အခု ဖွဲ့စည်းလိုက်တဲ့ မာလာလာ ဖောင်ဒေးရှင်း က ဒီ အလုပ်တွေကို လုပ်သွားမှာ ဖြစ်တယ်လို့လည်း မစ္စတာ ဘရောင်းက ပြောပါတယ်။ ပြီးခဲ့တဲ့ အောက်တိုဘာလ ၉ ရက်နေ့က ဆ၀ပ် တောင်ကြားဒေသမှာ တာလီဘန် သေနတ်သမားတွေ ဟာ မာလာလာ ရဲ့ ဦးခေါင်းနဲ့ လည်ပင်း နေရာတွေကို ပစ်ခတ်ခဲ့တာပါ။ မာလာလာ ရဲ့ ဆောင်ရွက်ချက်တွေနဲ့ ပတ်သက်လို့ နိုင်ငံတကာ ကတော့ သူ့ကို ချီးကျူး ဂုဏ်ပြုခဲ့ကြပါတယ်။ မာလာလာ ကို နိုဘဲလ် ငြိမ်းချမ်းရေးဆု ပေးဖို့ လူပေါင်း ၉ သောင်းနီးပါး ကလည်း လက်မှတ် ရေးထိုး အဆိုပြုခဲ့ကြပါတယ်။

မာလာလာ ဟာ အခုဆိုရင် သေနတ်ဒဏ်ရာကနေ ပြန်လည် သက်သာ လာနေပြီဖြစ်ပြီး လောလောဆယ် ဗြိတိန်နိုင်ငံက ဆေးရုံတခုမှာ ဆေးကုသ ခံယူနေတာ ဖြစ်ပါတယ်။