01.12.2012 နေ့ဖတ်ရန်သတင်းများ

by Myanmar Journal on Friday, November 30, 2012 at 3:01pm ·

ပါလက်စတိုင်းကို လေ့လာသူအဖြစ် ကုလလက်ခံ

ပါလက်စတိုင်းကို လေ့လာသူ အဖြစ် ကုလ သမဂ္ဂ မဲခွဲ အတည်ပြု

ပါလက်စတိုင်း သမ္မတ မာမွတ် အာဘတ်စ် အထွေထွေ ညီလာခံမှာ မိန့်ခွန်း ပြောရာမှာ လွန်ခဲ့တဲ့ ၆၅နှစ်တုန်းက ဒီနေ့နဲ့ တရက်ထဲ တိုက်ဆိုင်ပြီး ကုလသမဂ္ဂက ဆုံးဖြတ်ချက် ၁၈၁ နဲ့ သမိုင်းဝင် ပါလက်စ်တိုင်း နယ်မြေကို ခွဲပြီး အစ္စရေး နိုင်ငံကို မွေးထုတ်နိုင်ခဲ့တယ်။

ဒီကနေ့တော့ ပါလက်စတိုင်း ဒေသရဲ့ စစ်မှန်တဲ့ မွေးစာရင်း ထုတ်ပေးဖို့ နှစ်ပြည်ထောင် ဖြစ်နေတဲ့ ပြဿနာကို နောက်ဆုံး ဖြေရှင်းဖို့ မိန့်ခွန်း ပြောသွားပါတယ်။

ကုလသမဂ္ဂဆိုင်ရာ အစ္စရေး သံအမတ်ကြီး Ron Prosor ကတော့ နှစ်ဖက်ကြား သဘောတူညီချက်ရမှ ငြိမ်းချမ်းရေးရနိုင်မယ် ကုလသမဂ္ဂမှာ ပြောနေရုံနဲ့ မရနိုင်ဘူးလို့ တုံ့ပြန်ပါတယ်။

အစ္စရေး ပြည်သူနဲ့ အစ္စရေး နယ်မြေ အကြား နှစ်ပေါင်း ၄ဝဝဝ ရှိတဲ့ ခိုင်မြဲတဲ့ အနှောင်အဖွဲ့ကို ကုလသမဂ္ဂ ဆုံးဖြတ်ချက်က ဖြိုခွဲနိုင်မှာ မဟုတ်ဘူးလို့လည်း ဆိုပါတယ်။

၁၉၆၇ ခုနှစ်တုန်းက အစ္စရေး သိမ်းပိုက်ထားတဲ့ အနောက်ဘက်ကမ်း ဒေသ ဂါဇာနဲ့ အရှေ့ဂျေရုဆလမ် တို့ကို ပါလက်စတိုင်း ပြည်နယ်အဖြစ် ကုလသမဂ္ဂ အသိအမှတ် ပြုဖို့ ပါလက်စတိုင်းတို့ဘက်က တောင်းဆိုတာ ဖြစ်ပါတယ်။

ကုလသမဂ္ဂမှာ အဖွဲ့ဝင်မဟုတ်တဲ့ လေ့လာသူအဖြစ် အသိအမှတ်ပြုဖို့ အဖွဲ့ဝင် ၁၃၈နိုင်ငံက ထောက်ခံကြပြီး ကန့်ကွက်သူ ၉ နိုင်ငံနဲ့ ကြားနေ ၄၁နိုင်ငံရှိပါတယ်။

အခုလို ပါလက်စတိုင်း နိုင်ငံအဖြစ် တောင်းဆိုတာဟာ မှတ်တိုင်တခုလို့ ပြောလို့ ရနိုင်ပေမယ့် ထောက်ခံမဲ အများအပြားရတာကို ကြည့်ရင် သံတမန်ရေး အရ လက်တွေ့ အကျိုးသက်ရောက်မှုတွေ ရှိမယ်လို့ ဘီဘီစီ ကုလသမဂ္ဂ ဆိုင်ရာ သတင်းထောက် ဘာဘရာပလက်က ပြောသွားပါတယ်။

အခုအခါ ပါလက်စတိုင်းဟာ ကုလသမဂ္ဂ ဆွေးနွေးပွဲတွေ ပါဝင်နိုင်မှာဖြစ်ပြီး အိုင်စီစီ နိုင်ငံတကာ ရာဇဝတ်တရားရုံးတို့လို ကုလသမဂ္ဂ အေဂျင်စီတွေမှာ ပါဝင်ဖို့ အခွင့်အလမ်းတွေလည်း ပိုများလာမှာ ဖြစ်ပါတယ်။

ပါလက်စတိုင်း တို့ အောင်ပွဲလား

ပါလက်စတိုင်း တို့အောင်ပွဲခံ ပျော်ရွှင် နေကြပုံ

ကုလသမဂ္ဂ အဖွဲ့ဝင် ၁၃၈ နိုင်ငံရဲ့ ထောက်ခံမှု နဲ့ ပါလက်စတိုင်းဟာ ကုလသမဂ္ဂမှာ တင်းပြည့် အဖွဲ့ဝင် မဟုတ်တဲ့ လေ့လာသူ အဖြစ် ဖြစ်လာပါပြီ။

ပါလက်စတိုင်းတို့အတွက် ဒါဟာ ကြီးမားတဲ့ အောင်ပွဲတခု ဖြစ်ပေမယ့် လက်တွေ့ အခြေအနေ ကနေ သိပ်အများကြီး မပြောင်းလဲ သွားနိုင်ပါဘူး။

ကာလရှည်ကြာ ဖြစ်ပွားနေတဲ့ အရှေ့အလယ်ပိုင်း ပြဿနာ ပြေလည်ဖို့ ဒီဖြစ်ရပ်က အကူအညီပေးနိုင်မလား ဒါမှမဟုတ် ပိုဆိုးသွားစေ မလားဆိုတာ က လည်း မေးခွန်းထုတ် စရာ ဖြစ်ပါတယ်။

ဒီမေးခွန်းရဲ့ အဖြေ ကတော့ အဓိက ဇာတ်ကောင် ၃ ဦး ပေါ်မှာ မူတည် နေပါတယ်။

သူတို့တွေ ကတော့ ပါလက်စတိုင်း၊ အစ္စရေးနဲ့ အမေရိကန် တို့ ပဲ ဖြစ်ပါတယ်။

ပါလက်စတိုင်း သမ္မတ မာမွတ်အာဘတ်စ က ပါလက်စတိုင်း တို့ အခု ရလိုက်တဲ့ အခွင့်အရေးကို အသုံးချပြီး အစ္စရေး တို့နဲ့ ငြိမ်းချမ်းရေး ဆွေးနွေးမယ် ဆိုတဲ့ လမ်းကို ရွေးချယ် နိုင်သလို ICC အိုင်စီစီ လို နိုင်ငံတကာ ရာဇဝတ် တရားရုံးတို့လို ကုလသမဂ္ဂ အေဂျင်စီတွေ လို နိုင်ငံတကာ အသိုင်းအဝိုင်း ကို သူ့ ဘက် ပါလာအောင် စည်းရုံးဖို့ ဆိုတဲ့ လမ်းကိုလည်း ရွေးချယ် နိုင်ပါတယ်။

ဒုတိယလမ်းကို သွားရင်တော့ အစ္စရေး နဲ့ အမေရိကန်တို့ကို ထိပ်တိုက် ရင်ဆိုင်ရမှာ ဖြစ်ပါတယ်။

ပါလက်စတိုင်း ဘယ်အကွက် ရွှေ့မယ်ဆိုတာကို အစ္စရေးကတော့ သတိထား စောင့်ကြည့် နေပါတယ်။

ပါလက်စတိုင်းသမ္မတ မာမွတ်အာဘတ်စ ရဲ့ လုပ်ပိုင်ခွင့် ကို ချိနဲ့အောင် အစ္စရေးတို့ ဘက်က လုပ်နိုင်တာတွေ ရှိနေပါတယ်။

ဒေသတွင်း မှာ ပါလက်စတိုင်းတွေ ကိုယ်စား ကောက်ပေးနေတဲ့ အခွန်ကိစ္စ တွေကို အစ္စရေး က မကောက်ပေးတော့ပဲ ဆိုင်းငံတာမျိုး လုပ်နိုင်ပါတယ်။

အဲဒီလို ပြင်းပြင်းထန်ထန် တုံ့ပြန်သွားမယ်ဆိုရင်တော့ နှစ်ဘက် အခြေအနေ ပိုပြီး တင်းမာလာဖို့ပဲ ရှိပါတယ်။

ပါလက်စတိုင်း နဲ့ အစ္စရေး အရေးမှာ တတိယ အရေးကြီးတဲ့ ဇာတ်ကောင်ကတော့ အမေရိကန်ပဲ ဖြစ်ပါတယ်။

အမေရိကန်ရဲ့ အခန်းကဏ္ဍမှာ အမေရိကန် သမ္မတနဲ့ အမေရိကန် ကွန်ကရက် လွှတ်တော် ဆိုပြီး ဇာတ်ကောင် ၂ ဦး ထပ်ခွဲလို့ ရပါတယ်။

အမေရိကန် ကွန်ကရက် ကတော့ ပါလက်စတိုင်းကို ဆန့်ကျင်ပြီး လုပ်တဲ့ အစ္စရေးရဲ့ လုပ်ရပ် မှန်သမျှကို ထောက်ခံသွားမယ့် အလားအလာ အများကြီးရှိပါတယ်။

ဒါဆိုရင် ရင်ကြားစေ့ရေး ကို လိုလားတဲ့ အမေရိကန် သမ္မတ အိုဘာမား ဘာဆက်လုပ်မလဲ ဆိုတာက အဓိက ပြောစရာ ဖြစ်လာပါတယ်။

အရှေ့အလယ်ပိုင်းမှာ ငြိမ်းချမ်းရေး ဖော်ဆောင်ဖို့ ဗြိတိသျှ နိုင်ငံခြားရေးဝန်ကြီး William Hague မကြာခင် က တိုက်တွန်းခဲ့သလိုပဲ သမ္မတ အိုဘားမားက ရင်ကြားစေ့ရေးကို တိုက်တွန်းဖို့ အခုအချိန်ကို အသုံးချ သွားမလား ဆိုတာ မေးစရာ ရှိနေသေး ကြောင်းပါ။ 

လက်ပံတောင်းကိစ္စ တရုတ်သံရုံး ကြေညာချက်ထုတ်

အသေအချာ ပြောင်းရွှေ့ လျော်ကြေးပေး တာနဲ့ ပတ်ဝန်းကျင် ကာကွယ်မှုတွေ လုပ်ခဲ့ကြောင်း တရုတ်သံရုံးပြော

လက်ပံတောင်း တောင် ကြေးနီ စီမံကိန်းဟာ တရုတ် မြန်မာ နှစ်နိုင်ငံ စီးပွားရေး အသိုင်း အဝိုင်းတွေ ကနေ ပူးတွဲ လုပ်တဲ့ လုပ်ငန်း ဖြစ်ပြီး နှစ်ဘက် စလုံး အတွက် အကျိုး စီးပွား ရှိမယ့် စီမံချက် ဖြစ်ကြောင်း ရန်ကုန်မှာ ရှိတဲ့ တရုတ် သံရုံးက ကနေ ထုတ်ပြန် ကြေညာလိုက် ပါတယ်။

တရုတ် သံရုံးရဲ့ ပြောခွင့်ရ ပုဂ္ဂိုလ် ဂေါင်မင်ဘိုက စီမံကိန်းကြောင့် ထိခိုက်မယ့် လူတွေကို အသေ အချာ နေရာ ပြောင်းရွှေ့ ပေးတာ ၊ လျော်ကြေးငွေ ပေးတာနဲ့ သဘာဝ ပတ်ဝန်းကျင် ကာကွယ် မှုတွေ လုပ်ခဲ့ကြောင်း ဘီဘီစီ မြန်မာပိုင်း ဌာန ကို ပြောပါတယ်။

ဒါပေမယ့်လည်း ဒေသခံတွေ ကတော့ သူတို့ လယ်ယာမြေ အတွက် လျော်ကြေး မရကြ ဘူးလို့ ပြောဆိုမှုတွေ ရှိနေတာ ဖြစ်ပါတယ်။

အဲဒီလို ပြောဆိုမှုတွေ အပေါ်ကိုတော့ မစ္စတာ ဂေါင်မင်ဘိုက အခုလို လျော်ကြေး ပေးတဲ့ ကိစ္စတွေက ရှုပ်ထွေး တတ်တဲ့ သဘာဝ ရှိကြောင်းနဲ့၊ ဒါပေမယ့် သူ့ အထင် အရတော့ လက်ရှိ ဥပဒေတွေ စည်းမျဉ်းတွေ နဲ့ အညီ လျော်ကြေး ပေးခဲ့တယ်လို့ နားလည် ထားကြောင်း ပြောပါတယ်။

နေရာသစ်ကို ပြောင်းရွှေ့ ခဲ့ရတဲ့ ရွာသားတွေ အနေနဲ့ အိမ်တွေ ဆောက်ပေးတယ် ဆိုပေမယ့်လည်း နေရာသစ်မှာ စိုက်ပျိုး စရာ မြေမရှိတဲ့ အတွက် သူတို့ စားဝတ် နေရေး အတွက် စိုးရိမ် ရတယ်လို့ ဒေသခံတွေက ပြောတဲ့ သတင်းတွေလည်း အရင်က ထွက်ပေါ်ခဲ့ ပါတယ်။

သံဃာ ၇ပါး မုံရွာထောင်ကနေ ပြန်လွတ်

သံဃာ အပါး ၆၀ကျော် ဆေးရုံတင် ကုသ

ကြာသပတေး နေ့ မနက် က လက်ပန်းတောင်း တောင် ကြေးနီ စီမံကိန်း ရပ်ဆိုင်းရေး ဆန္ဒပြ နေတဲ့ သံဃာ တွေရဲ့ သပိတ် စခန်းကို အာဏာပိုင် တွေက အကြမ်းဖက် နှိမ်နင်း ခဲ့လို့ သံဃာ အပါး ၆၀ကျော် ဆေးရုံတင် ကုသရပြီး ၇ပါး အဖမ်းခံခဲ့ရပါတယ်။

ညပိုင်း မိုးချုပ်ချိန်မှာတော့ ဖမ်းထားတဲ့ သံဃာ ၇ပါးကို မုံရွာထောင်ကနေ ပြန်လွှတ် ပေးခဲ့ပါတယ်။

ထောင်ထဲမှာ စစ်မေးတာက မရိုင်းစိုင်းပေမယ့် ဝမ်ပေါင် ကုမ္ပဏီ ရှေ့က ရဲတွေကတော့ သံဃာ တွေကို ရိုက်နှက်တာ တွေရှိတယ် ပြန်လွတ်လာတဲ့ မန္တလေး မဟာကိုးဆူတိုက်က ဦးဝိမလက မိန့်ပါတယ်။

၁၂ နာရီမှာ လူစု ခွဲမယ် ကြေညာ ပေမယ့် သံဃာတွေ နှစ်နှစ် ခြိုက်ခြိုက် ကျိန်းစက် နေတဲ့ ၂ နာရီ ကျော်မှ မီးသတ်ပိုက်နဲ့ ထိုး၊ မီးစုန်းပါတဲ့ လက်နက်နဲ့ ပစ်လို့ သံဃာ တွေ အသားအရေတွေနဲ့ သင်္ကန်းတွေ ပျက်စီး ဒဏ်ရာ ရကုန်တယ်လို့လဲ မိန့်ပါတယ်။

ဆီးရီးယားမှာ အင်တာနက် လိုင်းတွေပြတ်

ဆီးရီးယား အရေး တက်ကြွသူတွေဟာ သတင်းတွေ တင်ဖို့ အတွက် အင်တာနက်ကို အဓိက အားထားပါတယ်

ဆီးရီးယား နိုင်ငံ ဒေသ အတော် များများမှာ တယ်လီဖုန်းနဲ့ အင်တာနက် လိုင်းတွေ ပြတ်တောက် နေတာ အခု ဆိုရင် ၂ ရက် ရှိလာ နေပြီ ဖြစ်ပါတယ်။

မြို့တော် ဒမားစကပ်စ် တောင်ဘက်ပိုင်းမှာ လည်း အစိုးရ တပ်တွေနဲ့ သူပုန်တွေ အကြား တိုက်ခိုက် မှုတွေ ဆက်ရှိ နေတယ် ဆိုတဲ့ သတင်းတွေ ရရှိ ပါတယ်။

လမ်းတွေ ပိတ်သွားတဲ့ အတွက် မြို့တော် လေဆိပ်ကို ကြာသပတေးနေ့က သွား မရတော့ ပေမယ့် သောကြာနေ့ မှာတော့ လမ်း ပြန်ပွင့် သွားပုံ ပေါ်တယ်လို့ ဆီးရီးယား လူ့အခွင့် အရေး စောင့်ကြည့် လေ့လာ နေတဲ့ အဖွဲ့က ပြောပါတယ်။

တခြား သတင်း တပုဒ် အရ ဆိုရင်တော့ လေယာဉ် ခရီးစဉ်တွေ ရှိနေ ပေမယ့် လေယာဉ် တက်တာ ဆင်းတာ ကိုတော့ မတွေ့ရဘူးလို့ ဆိုပါတယ်။

လေယာဉ်ကွင်း အလုပ်သမားတွေ တင်ဆောင် လာတဲ့ ဘတ်စကား တစီး လက်နက်ကြီးကျည် ထိမှန်တဲ့ အတွက် လူ ၂ ဦး သေးဆုံး သွားတယ်လို့ လည်း သိရပါ တယ်။

လေဆိပ် အနီး ဆင်ခြေဖုံး နေရာ တချို့မှာ အမြောက်တွေနဲ့ ညလုံးပေါက် အကြီးအကျယ် ပစ်ခတ် နေတယ် ဆိုတဲ့ သတင်းတွေလည်း ရရှိပါတယ်။

သပိတ် စခန်းကို ဖြိုခွဲတာ လက်နက်ကိုင် စခန်းကို ဝင်စီး သလို ဖြစ်နေ

အဓိ ကရုဏ်း နှိမ်နင်းရေး ရဲတွေ ဖြိုခွဲ ရာမှာ မီးလောင် သွားတဲ့ မြင်ကွင်း

လက်ပံတောင်းတောင် ကြေးနီ စီမံကိန်း ရပ်တန့်ဖို့ ဆန္ဒပြ နေကြတဲ့ သံဃာတော် တွေနဲ့ ရွာသားတွေကို အာဏာပိုင်တွေ ဘက်က အကြမ်း နည်းနဲ့ နှိမ်နင်း ခဲ့မှု အပေါ် မကျေနပ်တဲ့ ဆန္ဒ ပြမှုတွေ ဆက်လက် ဖြစ်ပွားခဲ့ ပါတယ်။သံဃာတော်တွေ အိပ်မောကျ နေတဲ့ ဝေလီဝေလင်း အချိန်မှာ သပိတ် စခန်းကို အာဏာပိုင်တွေ ဘက်က ဖြိုခွင်း ပုံဟာ လက်နက်ကိုင်တွေရဲ့ စခန်းကို ဝင်စီး ပုံမျိုး ဖြစ်နေတယ်လို့ အဲဒီ နေရာကို ကိုယ်တိုင် သွားပြီး အခြေ အနေ တွေကို လေ့လာ ခဲ့တဲ့ မြန်မာ့ လူမှု ဘဝ ဖွံ့ဖြိုး တိုးတက်ရေး ကွန်ယက်က ဗိုလ်ကြီးဟောင်း ဦးနေမျိုးဇင်က ပြောပါတယ်။

မီးလောင်ဗုံးလို့ ယူဆရတဲ့ ဗုံးတွေနဲ့ သပိတ်မှောက်သူတွေရဲ့ တဲတွေကို ပစ်ခတ်ခဲ့တာဟာ အကြမ်းဖက် ဖမ်းဆီးခံထားရတဲ့ ဓါးစာခံ တွေကို ကယ်ထုတ်ဖို့ ဒါမှ မဟုတ် နိုင်ငံရဲ့ အဓိက ပုဂ္ဂိုလ်မျိုး ထိန်းသိမ်း ခံထားရတဲ့ အခြေ အနေကို ကြုံရတဲ့ အခါမှာ ညဘက် စစ်ဆင်ရေး လုပ်ရတဲ့ ပုံစံမျိုးလို့ ဦးနေမျိုးဇင်က ပြောပါတယ်။

ဖြိုခွင်းခံရတဲ့ လက်ပံတောင်းကို ကိုယ်တိုင် သွားရောက်ပြီး သပိတ် မှောက် သံဃာတွေ နဲ့ လူ တချို့ကို အတွေ့အကြုံတွေ မေးမြန်းပြီး ကျည်ခွံ တွေ၊ မီးလောင် လို့ ကျန်ခဲ့တဲ့ သင်္ကန်း အပိုင်း အစတွေကို သက်သေ အဖြစ် သိမ်းယူ ခဲ့တယ်လို့ လည်း သူက ပြောပါတယ်။

လူတွေ အိပ်မောကျ နေချိန်မှာ လူတွေထဲကို ဗုံးသီး ပစ်ထည့်တဲ့ ဖြိုခွင်းပုံဟာ အဓိကရုဏ်း နှိမ်နင်းရေး ရဲတွေရဲ့ လုပ်ပိုင်ခွင့်ထက် ကျော်လွန် နေပြီလို့ ဦးနေမျိုးဇင်က ပြောပါတယ်။

မီးလောင်ဗုံး ဆိုတာဟာ ဗုံးသီး ထဲကနေ အရည် ပန်းထွက်ပြီး ကျတဲ့ နေရာ၊ ထိတဲ့ နေရာမှာ မီးစုန်းဓါတ်နဲ့ တောက်လောင်တယ် ဆိုတာကို စစ်သား တစ်ယောက် အနေနဲ့ သင်ယူ ခဲ့ဖူး တယ်လို့ သူက ပြောပါတယ်။

အခင်း ဖြစ်တဲ့ နေရာတွေက သူရရှိ ထားတဲ့ ကျည်ခွံ တွေကို ကြည့်ရင် ကျည်ခွံ အောက်ခြေကနေ စပရင်နဲ့ တွန်းလိုက်တဲ့ အခါ အပေါက် သေးလေးတွေ ကနေ အရည်တွေ ပန်းထွက် လာအောင် လုပ်ထားတဲ့ အတွက် အသေချာ မပြောနိုင်ပေမဲ့ ဒါတွေဟာ မီးလောင်ဗုံး ဖြစ်နိုင်တယ်လို့ ဦးနေမျိုးဇင်က သုံးသပ် ပါတယ်။

နျူကလီးယားအရေး ဦးသိန်းစိန်ဖြေရှင်းဖို့ အထက်လွှတ်တော်အမတ် Lugar တောင်းဆို

အမေရိကန် အထက်လွှတ်တော်အမတ် Richard Lugar

နျူကလီယားဆိုင်ရာ ကုန်ကြမ်းတွေဖြစ်ဖွယ်ရှိတဲ့ ကုန်ပစ္စည်းတွေ တင်ဆောင်ပြီး မြန်မာနိုင်ငံကို ဦးတည်ခုတ်မောင်းခဲ့ တယ်ဆိုတဲ့ ကုန်တင်ပင်လယ်ကူးသင်္ဘောကိစ္စနဲ့ပတ်သက်ပြီး သမ္မတဦးသိန်းစိန်အနေနဲ့ ဖြေရှင်းချက်ပေးပါရန် Republican အထက်လွှတ်တော်အမတ်တဦးက တောင်းဆိုလိုက်ပါတယ်။

မြောက်ကိုရီးယားကနေ ယူရေနီယံသန့်စင်ဖို့ ဒါမှမဟုတ် Missileဒုံးလက်နက်ထုတ်လုပ်ရာမှာ အသုံးပြုတဲ့ ကုန်ကြမ်းတွေ ကို တရုတ်ပြည်ကတဆင့် မြန်မာနိုင်ငံကိုတင်ပို့ဖို့ကြိုးစားခဲ့တယ်လို့ ဂျပန် Ashi Shimbun သတင်းစာမှာ ဖေါ်ပြခဲ့ပါတယ်။

အမေရိကန်ပြည်ထောင်စုရဲ့ မေတ္တာရပ်ခံချက်အရ ပြီးခဲ့တဲ့ သြဂုတ်လအတွင်း အဲဒီသင်္ဘော ဂျပန်နိုင်ငံ တိုကျိုမြို့မှာ ခရီးတထောက်ရပ်နားစဉ် ဂျပန်တာဝန်ရှိသူတွေက တက်ရောက်စစ်ဆေးစဉ် သတ္တုပိုက်တွေနဲ့ အဆင့်မြင့် Aluminium Alloy အခွေ တွေကိုသိမ်းဆည်းခဲ့ကြပါတယ်။ 

အမေရိကန်လွှတ်တော်မှာ နျူကလီယားလက်နက်မပြန့်ပွားရေး ဦးဆောင်ဆော်သြနေတဲ့ အထက်လွှတ်တော်အမတ် Richard Lugar က သမ္မတဦးသိန်းစိန်အနေနဲ့ အဲဒီ သင်္ဘောပါ ကုန်ပစ္စည်းကိစ္စနဲ့ပတ်သက်ပြီး ပွင့်ပွင့်လင်းလင်း ထုတ်ဖေါ်ပြောဆိုပါရန်တိုက်တွန်းတဲ့စာတစောင် အင်္ဂါနေ့ကပေးပို့လိုက်တယ်လို့ AP သတင်းမှာဖေါ်ပြထားပါတယ်။

ဒီသင်္ဘောမှာတင်လာတဲ့ ကုန်ပစ္စည်းတွေကို ဘယ်လိုရည်ရွယ်ချက်နဲ့ အသုံးပြုမှာလဲဆိုတဲ့ အကျိုးသက်ရောက်မှုဟာ အာယံဒေသတခုလုံးရဲ့ ငြိမ်းချမ်းရေးနဲ့ တည်ငြိမ်ရေးကို ရိုက်ခတ်တယ်ဆိုတာကိုလည်း အထက်လွှတ်တော်အမတ် Richard Lugar ရဲ့ စာထဲမှာဖေါ်ပြထားပါတယ်။

တရုတ်ရင်းနှီးမြုတ်နှံမှု ဥပဒေအရ ကာကွယ်ပေးဖို့ တရုတ်သံရုံးတောင်းဆို

Chinese copper mine company Wan Bao Co. Ltd တံဆိပ်ပါ ဆိုင်းဘုတ်။

မုံရွာဒေသက ကြေးနီစီမံကိန်းနဲ့ ပါတ်သက်တဲ့သဘောထားကို မြန်မာနိုင်ငံဆိုင်ရာ တရုတ်သံရုံးက ထုတ်ပြန်လိုက်ပါတယ်၊ ဒီစီမံကိန်းနဲ့ ပါတ်သက်လို့ စိုးရိမ်မှုတွေရှိနေတဲ့အတွက် ခုလို သဘောထား ထုတ်ပြန်ရတာဖြစ်တယ်လို့ သံရုံးပြောခွင့်ရသူက VOA မြန်မာပိုင်း ကိုပြောပါတယ်။ ကြေးနီ တူးဖော်ရေး စီမံကိန်းကြီးဟာ ကြီးမားတဲ့စီမံကိန်းကြီးတခုဖြစ်တာမို့ အားလုံးအဆင်ပြေအောင် ညှိုဖို့ခက်ပေမဲ့ သက်ဆိုင်သူတွေအားလုံး လက်တွေ့ကျတဲ့ အဖြေရအောင် ဆွေးနွေး သွားကြဖို့ မြန်မာနိုင်ငံဆိုင်ရာ တရုတ်သံရုံးက တိုက်တွန်းလိုက်ပါတယ်၊ အပြည့်အစုံကို သံရုံးပြောခွင့်ရသူနဲ့ ဆက်သွယ်မေးမြန်းထားတဲ့ ဘန်ကောက်ရုံးက မစုမြတ်မွန်က တင်ပြပါတယ်။

စစ်ကိုင်းတိုင်းအတွင်း ဒေသခံပြည်သူတွေအတွက် နစ်နာမှုတွေ၊ သဘာဝပါတ်ဝန်းကျင်ဆိုင်ရာ ထိခိုက်မှုတွေရှိနေတဲ့အတွက် လက်ပံတောင်းတောင် ကြေးနီတူးဖော်ရေးစီမံကိန်းကို ရပ်ဆိုင်းလိုက်ဖို့ တောင်းဆိုမှုတွေ ရှိနေချိန်မှာ မုံရွာကြေးနီ စီမံကိန်းဟာ တရုတ် မြန်မာ ၂ ဖက် စီးပွားရေး အသိုင်းအဝိုင်းတွေအတွက် အကျိုးရှိမဲ့ စီမံကိန်းဖြစ်တယ်လို့ မြန်မာနိုင်ငံဆိုင်ရာ တရုတ်သံရုံးက ကြေညာချက် ထုတ်ပြန်လိုက်ပါတယ်။ မြန်မာ့စီးပွားရေး ဦးပိုင် လီမိတက်နဲ့ တရုတ်နိုင်ငံက မြန်မာဝမ်ပေါင်ကုမ္ပဏီတို့ အကျိုးတူလုပ်နေကြတဲ့ ကြေးနီစီမံကိန်းကို ရည်ရွယ်တဲ့ သဘောထား သုံးသပ်ချက်ထဲမှာ မြန်မာလူမှုအလွှာအသီးသီးအနေနဲ့ စီမံကိန်း အဆင်ပြေချောမွေ့အောင် ဥပဒေနဲ့အညီ အနေအထားကောင်းတွေ ဖန်တီးနိုင်မယ်လို့ မျှော်လင့်တယ်လို့ ဖော်ပြထားပါတယ်။ ဒီကြေညာချက်နဲ့ပါတ်သက်လို့ တရုတ်သံရုံးပြောခွင့်ရသူ Mr. Gao Mingbo ကိုဆက်သွယ်ခဲ့ပါတယ်၊ လက်ရှိလက်ပံတောင်းမှာ ဖြစ်တဲ့အခြေအနေတွေကြောင့် စီမံကိန်း ထိခိုက်မှာကို တရုတ်ဖက်က ဘယ်လောက်စိုးရိမ်နေပါသလဲလို့ စပြီးမေးကြည့်ပါတယ်။

"တရုတ်ဖက်က စိတ်ဝင်စားတာကတော့ အခြေအနေတခုမှာ တရုတ်ရင်းနှီးမြှုပ်နှံသူတွေရဲ့ ဥပဒေကြောင်းအရ ရပိုင်ခွင့်တွေ အခိုင်အမာ အကာအကွယ်ရအောင် ဘယ်လိုလုပ်မှာလဲ ဆိုတဲ့ ကိစ္စပါ၊ စိုးရိမ်မှုတချို့ကို တုံ့ပြန်တဲ့အနေနဲ့ ကျွန်တော်တို့က ကြေညာချက် ထုတ်ပြန်ရတာဖြစ်ပါတယ်" လို့ တရုတ်သံရုံးပြောခွင့်ရသူ က ပြောသွားပါတယ်။ 

ကြေညာချက်ထဲမှာ ကြေးနီစီမံကိန်းနဲ့ ပါတ်သက်လို့ နေရာရွှေ့ပြောင်းရေး၊ လျှော်ကြေးပေးရေး၊ သဘာဝပါတ်ဝန်းကျင်ကို ကာကွယ်ရေးနဲ့ အမြတ်ခွဲဝေရေးကိစ္စတွေကို မြန်မာနိုင်ငံ ဥပဒေနဲ့အညီ ဖက်စပ်လုပ်ငန်းလုပ်ကြတဲ့ ၂ ဖက်ညှိုနှိုင်းပြီး သဘောတူထားကြပြီးဖြစ်တယ်လို့ ပြောထားပါတယ်။ ဒါပေမဲ့ လယ်မြေတွေ အသိမ်းခံထားရတဲ့ ဒေသခံတွေက ထိုက်တန်တဲ့ လျှော်ကြေးမရတဲ့ကိစ္စ၊ လူမှု စီးပွားရေး ထိခိုက်တဲ့ကိစ္စ၊ သဘာဝပါတ်ဝန်းကျင်ထိခိုက်နိုင်တဲ့ကိစ္စတွေနဲ့ပါတ်သက်လို့ ထွက်ပေါ်နေတဲ့ စိုးရိမ်မှုတွေကိုရော တရုတ်လုပ်ငန်းတွေဖက်က ထပ်ပြီး စဉ်းစားသင့်တယ်လို့ မထင်ဘူးလားလို့ တရုတ်သံရုံးပြောခွင့်ရသူ Mr. Gao ကိုမေးပါတယ်။

"ကျွန်တော့်အထင်တော့ ဒီစိုးရိမ်မှုတွေနဲ့ ပါတ်သက်လို့ ဆွေးနွေးခဲ့ကြပြီးပါပြီ၊ ဒီစီမံကိန်းစတဲ့ လွန်ခဲ့တဲ့ ၁ နှစ် ၂ လောက်ထဲက ဆွေးနွေးမှုတွေ ညှိုနှိုင်းမှုတွေ အကြိမ်ကြိမ်လုပ်ခဲ့ကြတော့ တချို့စိုးရိမ်မှုတွေနဲ့ ပါတ်သက်လို့ ဖြေရှင်းခဲ့ကြပြီးပြီလို့ထင်ပါတယ်၊ ကျွန်တော် နားလည်သလောက်တော့ အကျိုးတူပူးပေါင်းလုပ်နေကြတဲ့ တရုတ် မြန်မာလုပ်ငန်းတွေက ဒေသခံ လူမှုအသိုင်းအဝိုင်းတွေနဲ့ ထိတွေ့မှုတွေလဲ ရှိနေတော့ အဖွဲ့တချို့ရဲ့ စိုးရိမ်မှုတွေ၊ သဘောထားတွေကို သူတို့သိတယ်လို့ ကျွန်တော်ထင်ပါတယ်၊ မျှော်လင့်ချက်တွေအတိုင်း လက်တွေ့ကျတဲ့ အဖြေရနိုင်ဖို့ လွယ်လွယ်လုပ်လို့ ရမယ်လို့တော့ မထင်ပါဘူး၊ ဒါကြောင့် ပြည်သူလူထုတွေ၊ စီမံကိန်းလုပ်တဲ့ Company တွေအပြင် တခြား အရေးပါတဲ့ သက်ဆိုင်သူတွေ ဆက်ပြီး ဆွေးနွေးသွားကြဖို့ ကျွန်တော်တို့က တိုက်တွန်းပါတယ်၊ အပြန်အလှန် နားလည်မှု လေးစားမှု အပြင် တရားဥပဒေစိုးမိုးရေးကိုလဲ လေးစားပြီး အပေးအယူလုပ် နည်းလမ်းရှာ နိုင်မယ်" လို့ ထင်တဲ့အကြောင်း တရုတ်သံရုံးပြောခွင့်ရသူက ဖြေသွားတာဖြစ်ပါတယ်။

ဒါဆိုရင် အားလုံးအတွက် သင့်တော်မဲ့ အချက်တွေပါတဲ့ သဘောတူမှုအတွက် တရုတ်နဲ့ မြန်မာလုပ်ငန်းတွေ ပြန်ပြီး ညှိုနှိုင်းသင့်တယ်လို့ ရော ထင်ပါသလားလို့ မေးရာမှာတော့၊

"ဒီစီမံကိန်းဟာ သေးသေးဖွဲဖွဲ စီမံကိန်းလေး မဟုတ်ဘူးဆိုတာကို မမေ့ပါနဲ့၊ ၂ ဖက်လုံးအတွက် အကျိုးရှိစေတဲ့ စီမံကိန်းလို့ ကျွန်တော်တို့ နားလည်ထားပါတယ်၊ ၂ ဖက်လုံးအတွက်လဲ အကျိုးအမြတ်တွေ ဖန်တီးပေးနေပါပြီ၊ ဒေသခံအလုပ်သမား ၂ ထောင်ကျော်လောက်ကိုလဲ အလုပ်ခန့်ထားတာပါ၊ တကယ်လို့ တခုခုများဖြစ်ခဲ့ရင် လူတွေအများကြီး အလုပ်ပြုတ်ကုန်မှာပါ၊ Company တွေဖက်ကရော၊ ဒေသခံပြည်သူတွေဖက်ကရော မြန်မာနိုင်ငံကနိုင်ငံရေးသမားတွေကြားမှာ ပြဿနာပြေလည်အောင် ဆွေးနွေးကြဖို့ ဆန္ဒပြင်းပြနေကြပါတယ်၊ အခြေအနေတွေကို ထိန်းထိန်းသိမ်းသိမ်း လုပ်ကြဖို့၊ ဆွေးနွေး အဖြေရှာကြဖို့ တောင်းဆိုမှုတွေလဲ ကြီးထွားနေပါတယ်၊ ဒါကို ကျွန်တော်တို့ ကြိုဆိုသင့်ပါတယ်၊ အခြေအနေကို ဆွပေးတဲ့ လုပ်ရပ်မျိုးကိုတော့ ကျွန်တော်တို့ အားမပေးသင့်ပါဘူး၊ သက်ဆိုင်သူတွေအားလုံး ဆွေးနွေးညှိုနှိုင်းဖို့ကိုတော့ ကျွန်တော်တို့ လိုလား ကြိုဆိုတယ်"လို့ ပြောသွားတာဖြစ်ပါတယ်။

မြန်မာနိုင်ငံမှာ စီမံကိန်းတွေ လာရောက်လုပ်ကိုင်နေကြတဲ့ တရုတ်လုပ်ငန်းတွေရဲ့ ပွင့်လင်းမြင်သာမှုရှိဖို့ ကိစ္စကိုလဲ မြန်မာနိုင်ငံဆိုင်ရာ တရုတ်သံရုံး ပြောခွင့်ရသူ Mr. Gao Mingbo ကိုမေးပါတယ်၊ စီမံကိန်းဆောင်ရွက်မှုနဲ့ဆိုင်တဲ့ သဘောတူညီချက်တွေမှာ ပွင့်လင်းမှု မရှိလို့ ခုလိုဖြစ်နေရတယ်ဆိုတဲ့ ပြောဆိုမှုတွေရှိနေပါတယ်။ ဒါကြောင့် အခုထက် ပိုမို ပွင့်လင်းမှုရှိဖို့ တရုတ်အစိုးရအနေနဲ့ရော ထင်ပါသလားလို့ ဆိုတော့

"ကျွန်တော် မှန်းဆကြည့်ရသလောက်တော့ Company တွေ ပိုပိုပြီး ပွင့်လင်းမြင်သာမှုရှိဖို့ ခုနောက်ပိုင်း ကြိုးစားလာကြပါပြီ၊ ပြီးခဲ့တဲ့လတွေကပဲ သတင်းထုတ်ပြန်ရေး တာဝန်ရှိသူတွေ သတင်းမီဒီယာတွေနဲ့ တွေ့ဆုံခဲ့တာမျိုးရှိပါတယ်။ ရှေ့ဆက်ပြီးတော့လဲ ဒီလိုလုပ်ဖို့ ကျွန်တော်တို့ ကြိုဆိုပါတယ်၊ မီဒီယာတွေဖက်ကလဲ အခြေအနေအပြည့်အစုံကိုသိနိုင်အောင် မျှတတဲ့ သတင်းတွေရေးသား ထုတ်ပြန်ဖို့ လိုအပ်ပါတယ်" လို့ ရန်ကုန် တရုတ်သံရုံးက  ပြောခွင့်ရသူ Mr. Gao Mingbo က VOA မြန်မာပိုင်းကို ပြောသွားတာဖြစ်ပါတယ်။

လက်ရှိမြန်မာနိုင်ငံမှာ ပြဿနာဖြစ်နေလို့ လောလောဆယ် ရပ်ဆိုင်းနေတဲ့ လက်ပံတောင်းတောင် ကြေးနီတူးဖော်ရေးစီမံကိန်း၊ ကျောက်ဖြူရေနက်ဆိပ်ကမ်းစီမံကိန်းနဲ့ ဓါတ်ငွေ့ပိုက်လိုင်း သွယ်တန်းတဲ့ စီမံကိန်းတွေအပါအဝင် တရုတ် နိုင်ငံက လုပ်ငန်းတွေရဲ့ ရင်းနှီးမြှုပ်နှံမှု ပမာဏဟာ မြန်မာနိုင်ငံမှာ အများဆုံးဖြစ်ပါတယ်။

ရန်ကုန် မန္တလေး သံဃာဆန္ဒပြမှု ဖြစ်ပွား

မန္တလေးမြို့ အိမ်တော်ယာကျောင်းမှာ သံဃာတော်တွေ ထိုင်သပိတ် ဆင်နွှဲနေကြစဉ်။ (နိုဝင်ဘာလ ၃၀၊ ၂၀၁၂။)

ကြာသပတေးနေ့ မနက်ပိုင်းက ဖြစ်ပွားခဲ့တဲ့ ဆန္ဒပြသံဃာတော်တွေနဲ့  ဒေသခံပြည်သူတွေကို အကြမ်းဖက်နှိမ်နှင်းမှုတွေကို မကျေနပ်ကြတဲ့ မန္တလေးမြို့က သံဃာတော်တွေကလည်း ဒီကနေ့ ထိုင်သပိတ်ဆင်နွှဲခဲ့ကြပါတယ်။ မန္တလေးမြို့ အိမ်တော်ယာကျောင်းမှာ သံဃာတော်အပါး ၁၀၀ကျော်ကနေ ထိုင်သပိတ် ဆင်နွှဲခဲ့တာဖြစ်ပြီးတော့ လက်ပန်းတောင်းတောင် နှိမ်နင်းမှုကိစ္စ ကို တောင်းဆိုခဲ့ကြပါတယ်။ အပြည့်အစုံကိုတော့ ထိုင်သပိတ်ဆင်နွှဲတဲ့နေရာကို သတင်းယူဖို့ရောက်နေတဲ့ ဗွီအိုအေဝိုင်းတော်သား ကိုသိန်းထိုက်ဦးကို ဘန်ကောက်ရုံးကနေ မစုမြတ်မွန်က ဆက်သွယ်မေးမြန်းခဲ့ပါတယ်။

ကိုသိန်းထိုက်ဦး- “ ဟုတ်ကဲ့ခင်ဗျ။ ပထမတော့ သံဃာအပါး ၁၅၀လောက် ထိုင်သပိတ် နောက်ပိုင်းတော့ ၂၀၀ကျော်လောက်ဖြစ်လာပါတယ်။ သူတို့နေ့ခင်း ၁နာရီလောက်က စပြီးတော့ ၃နာရီအထိ နှစ်နာရီ သူတို့ထိုင်သပိတ်ဆင်နွှဲကြတာပါ။

မစုမြတ်မွန်-“အဲ့သလိုထိုင်သပိတ်ဆင်နွှဲဆန္ဒပြမှုမှာ တောင်းဆိုမှုတွေ ဘယ်လိုမျိုးရှိပါသလဲ”

ကိုသိန်းထိုက်ဦး- “ဟုတ်ကဲ့။ အဓိက တောင်းဆိုတာကတော့ အကြမ်းဖက်ဖြိုခွင်းမှုမှာ အဓိက တာဝန်ရှိတဲ့ ပြည်ထောင်စုအစိုးရအနေနဲ့ သံဃာတော်တွေနဲ့ ပြည်သူတွေ ကျေနပ်လက်ခံတဲ့အထိ ပွင့်လင်းမြင်သာမှုရှိရှိနဲ့ တာဝန်ယူဖြေရှင်းပေးဖို့ သူတို့က တောင်းဆိုပါတယ်။ နောက် ထိခိုက်ဒဏ်ရာရတဲ့သံဃာတော်တွေကို ကျမ်းမာရေး စောင့်ရှောက်မှုတွေပေးဖို့ တာဝန်ယူဖို့လည်း သူတို့ကတောင်းဆိုပါတယ်။ အဓိကကတော့ လုံခြုံရေးတပ်ဖွဲ့ဝင်တွေက လူတွေကို မီးလောင်ကျွမ်းစေတဲ့ လက်နက်တွေ သုံးပြီးတော့ သံဃာတော်တွေကို အကြမ်းဖက် တိုက်ခိုက်ခဲ့တယ်ဆိုပြီးတော့ သူတို့က တာဝန်ယူပေးဖို့ပြောတာပါ။ဆန္ဒပြပွဲမှာ သံဃာတော်တစ်ပါးက အခုလိုမိန့်ကြားသွားပါတယ်။

ဆန္ဒပြသံဃာတော်- “လောင်ကျွမ်းတဲ့အထဲ တချို့ကိုယ်တော်များ မျက်စိ ထိခိုက်ပါတယ်ဘုရား၊ တချို့ မျက်နှာတော်တခုလုံး ရုပ်လုံးမလှဖြစ်သွားပါတယ်ဘုရား၊ ပျံလွန်တော်မူ ရတာမှ အဓိပ္ပါယ်ရှိပါသေးတယ်။ မျက်နှာကို တပည့်တော်တို့ သွားရောက်ကြည့်ရှု့ခဲ့ပါတယ်ဘုရား၊ ဒါ့အပြင် တချို့ဆရာတော်တွေဆို ခါးအစပ်ကနေ အောက်ကို ဖွာစာကျဲနေတာပဲ ဘုရား၊ တပည့်တော်များ မုသာဝါဒ မပြောပါဘူး ဘုရား၊ ဓတ်ပုံတွေနဲ့ ပြထားပါတယ်ဘုရား၊ သတင်းစာရှင်းလင်းပွဲမှာ ဘယ်လိုလိမ်သလဲဆိုရင် ကျနော်တို့ မျက်ရည်ယိုဗုံးပဲ ခွဲပါတယ်လို့ ဒီလိုမီးလောင်ဗုန်းတွေ မသုံးပါဘူးလို့ အခုနက ရှင်းလင်းသွားတာ  ကြားရပါတယ်။ အဲ့သလို မျက်ရည်ယိုဗုံးခွဲရင် ဒီလိုမျိုး ဘာကြောင့် ဒဏ်ရာတွေရ ရသလဲ၊ ယခုလို မင်းမဲ့စရိုက်ဆန်ဆန်စွာ၊ လူမဆန်စွာနဲ့ ရက်ရက်စက်စက် တိုင်းတပါးကောင်းစားဖို့အတွက် ကိုယ်လူကိုယ် သတ်ဖြတ်တဲ့လုပ်ငန်းတွေ ရပ်တန်းက ရပ်အောင်ဆိုပြီး တပည့်တော်တို့ ထိုင်သပိတ်များ ထိုင်ပြီးတော့ အခုလိုမျိုး ရှုံ့ချရခြင်းဖြစ်ပါတယ်ဘုရား။”

ကိုသိန်းထိုက်ဦး- “ ဒါကတော့ ထိုင်သပိတ်ဆန္ဒပြပွဲမှာ သံဃာတော်တစ်ပါး မိန့်ကြားတာပါခင်ဗျာ။”

မစုမြတ်မွန်- “ မန္တလေးအိမ်တော်ယာဘုရားမှာ ပြုလုပ်တဲ့ ဆန္ဒပြပွဲမှာ သံဃာတော်တွေပဲလားရှင့်။ တခြားရော ပြည်သူတွေ ပါဝင်ပြီး ဆန္ဒပြတာမျိုးရော ရှိပါသလားရှင့်။”

ကိုသိန်းထိုက်ဦး- “ပြည်သူတွေကတော့ ကျနော်နောက်ပိုင်း သတိထားမိတာကတော့ ၂၀၀၊ ၃၀၀လောက် ရောက်လာကြပြီးတော့ သံဃာတော်တွေနဲ့အတူ လိုက်ပြီးတော့ ထိုင်ကြပါတယ်ခင်ဗျာ။ ဒီရှေ့မှာလည်း သံဃာတော်တွေ ထိခိုက်ဒဏ်ရာရတဲ့ ဓာတ်ပုံတွေ၊ တော်တော်များများ ကို ထောင်ထားတော့ ဒီပုံတွေကို ကြည့်ပြီးတော့ ဒါတွေကို ကြည့်ပြီးတော့ လာပူးပေါင်းကြတာပါ ခင်ဗျာ။ နောက် မြန်မာနိုင်ငံလုံးဆိုင်ရာ ကျောင်းသားများသမဂ္ဂအဖွဲ့ချုပ်  အထက်မြန်မာပြည်က ကျောင်းသား ၂၀လောက်လည်း သူတို့ ကျောင်းသားသမဂ္ဂအလံ ထောင်ပြီးတော့ သံဃာတော်တွေနဲ့ အတူ ထိုင်သပိတ်မှာ ပါဝင်လာတာကို တွေ့ရပါတယ်ခင်ဗျာ။

မစုမြတ်မွန်-“ အခုလိုမျိုးဖြစ်နေတဲ့အခြေအနေ လူပ်ရှားမှုတွေကို ကြည့်ခြင်းအားဖြင့် ၂၀၀၇ခုနှစ်တုန်းက ဖြစ်တဲ့ ရွှေဝါရောင်သံဃာလူပ်ရှားမှု အခြေအနေမျိုး ရောက်သွားနိုင်တဲ့ အနေအထားမျိုးရော ကိုသိန်းထိုက်ဦး သုံးသပ်မိပါလားရှင့်။”

ကိုသိန်းထိုက်ဦး-“ကျနော်လည်း ဒီမေးခွန်းကို လှုပ်ရှားတဲ့ သံဃာတော်တွေကို မေးကြည့်ပါတယ် ခင်ဗျာ။ အဲ့ဒီ့မှာ မဟာဂန္ဓာရုံ ကျောင်းတိုက်က ဆရာတော် ဦးသောဘိတကတော့ အခုလိုဖြေကြား သွားပါတယ်ခင်ဗျ။”

မဟာဂန္ဓာရုံ ကျောင်းတိုက် ဆရာတော် ဦးသောဘိတ-“တာဝန်ရှိသူအစိုးရအနေနဲ့ ဒီကိစ္စကို ပြေပြေလည်လည်ဖြေရှင်းမယ်ဆိုလို့ရှိရင် ဒီနေ့ဖြေရှင်းရင် မနက်ဖြန်ခါ ပြေငြိမ်းသွားမှာပဲ။ အဲ့လိုမှ မဟုတ်ဘူး ဆိုလို့ရှိရင် ဒီကိစ္စကို ဦးဇင်းတို့က တဖြေးဖြေးနဲ့ ပိုအင်အားကောင်းလာအောင် လုပ်သွားမယ်။ အခု ဒီနေ့ ဘာကြောင့် မလုပ်နိုင်သလဲဆိုရင် ပခုက္ကူက သံဃာတော် အတော်များများ လက်ပန်းတောင်းတောင် ရောက်နေတယ်။ ဘာဖြစ်လို့ဆိုရင် ဆေးရုံမှာ အများကြီးရောက်နေကြတယ်။ အဲ့အခါကျတော့ ပခုက္ကူမှာ ရုတ်တရက်ထလုပ်ဖို့ ခက်ခဲသွားတယ်။ အဲ့တာကြောင့်မို့လို့ တုန့်ပြန်မှုတွေ မကောင်းခဲ့ဘူးဆိုရင် လိုချင်တဲ့အဖြေမထွက်ဘူးဆိုရင် အဲ့လို ရွှေဝါရောင်ပုံစံမျိုး ထိအောင် သွားဖို့စိတ်ကူးတယ်။”

ကိုသိန်းထိုက်ဦး-“ဒါကတော့ ထိုင်သပိတ်ဆန္ဒပြပွဲမှာပါဝင်တဲ့ မဟာဂန္ဓာရုံ ကျောင်းတိုက်က ဆရာတော် ဦးသောဘိတ မိန့်ကြားသွားတာပါခင်ဗျ။ ဒီနေ့ပွဲက မန္တလေးမှာ ဒါပထမဆုံး လက်ပန်းတောင်းတောင် ကြေးနီစီမံကိန်းကိစ္စနဲ့ ပတ်သက်ပြီးတော့ ပထမဆုံး သံဃာတော်တွေရဲ့ ထိုင်သပိတ်ဆန္ဒပြပွဲပါ။ ဒီလိုဆန္ဒပြပွဲတွေ မကြာ မကြာ ဆက်လုပ်သွားမယ်။ သူတို့တောင်းဆိုတာ မလိုက်လျောဘူးဆိုရင် မကြာ မကြာ ဆက်ပြီးတော့ လုပ်သွားမယ်လို့လည်း သံဃာတော်တွေက မိန့်ကြားပါတယ်။”

မန္တလေးမှာ သံဃာတော်တွေ ထိုင်သပိတ်ဆင်နွှဲခဲ့ကြတဲ့ အခြေအနေနဲ့ ပတ်သက်ပြီးတော့ သတင်းရယူဖို့ရောက်နေတဲ့ VOA ဝိုင်းတော်သား ကိုသိန်းထိုက်ဦးကို ဘန်ကောက်ရုံးကနေ မစုမြတ်မွန်က ဆက်သွယ်မေးမြန်းခဲ့တာပါ။

တဆက်တည်းမှာပဲ လက်ပန်းတောင်းတောင် စီမံကိန်းကို ဆန့်ကျင်ကန့်ကွက်တဲ့ သပိတ်စခန်းတွေကို အာဏာပိုင်တွေက အကြမ်းဖက်နှိမ်နင်းခဲ့တာနဲ့ ပတ်သက်ပြီး ကန့်ကွက်ရှုံ့ချတဲ့ ဆန္ဒဖော်ထုတ်မှုကို ရန်ကုန်မှာလည်း သံဃာတော်တွေ စုဝေးပြုလုပ်ခဲ့ပါတယ်။ ညနေ ၄နာရီလောက်မှာ သံဃာအင်အား ၂၀လောက်နဲ့ ပြည်သူ့အင်အား ၂၀ ခန့်မှန်းခြေ စုစုပေါင်း အင်အား ၄၀လောက်ဟာ ဆူးလေဘုရားမှာ စတင် စုဝေး ဆန္ဒပြခဲ့ကြတာပါ။

ဆန္ဒပြသံဃာတော်တွေဟာ မနေ့မနက်ပိုင်းက လက်ပန်းတောင်းတောင် စီမံကိန်း ကန့်ကွက်ဆန္ဒပြပွဲမှာ အာဏာပိုင်တွေ အကြမ်းဖက်မှုကြောင့် မီးလောင်ထိခိုက်ဒဏ်ရာရခဲ့ကြတဲ့ သံဃာတော်တွေရဲ့ ဓာတ်ပုံတွေကို ကိုင်ဆောင်ထားကြပါတယ်။ ဆူးလေရင်ပြင်တော်မှာ တစ်ပတ်ပတ်ပြီးတော့ မဟာဗန္ဓုလလမ်းအတိုင်း လမ်းလျောက်၊ နောက် လမ်း ၅၀ထိပ်မှာ ရှိတဲ့ မြန်မာစီးပွားရေးဦးပိုင်လီမိတက်ရုံးရှေ့ကန့်ကွက်ဆန္ဒပြပြီး လူစုခွဲခဲ့ကြတယ်လို့ မျက်မြင်သက်သေတဦးက ဗွီအိုအေကို ပြောပါတယ်။

“ဆူးလေကနေပြီးတော့ စီးပွားရေးဦးပိုင်လီမိတက်အထိ ချီတက်လာတယ်။ ပြီးတော့ စီးပွားရေးဦးပိုင်လီမိတက်ရှေ့မှာ ကြွေးကြော်သံကိုအော်တယ်။ အော်နေရင်း အခု၊ ခနနေ ပြီးတော့မယ်ခင်ဗျ။ အခုပြန်ထွက်ကြတော့မယ်။ ပထမတော့ စီးပွားရေးဦးပိုင်လီမိတက် အလိုမရှိဆိုတဲ့ ကြွေးကြော်သံ အော်ကြတယ်။ ပြီးတော့ ဆရာတော်တွေ တရားစာရွတ်ကြလား မသိဘူးဗျ။ ကျနော်အခုပြောနေချိန်မှာပဲ တစ်ပါးချင်းစီ ပြန်ကြွနေပြီခင်ဗျ။ အခု အားလုံးပြန်ကြွကုန်ပြီ။ အခုတော့ ဦးပိုင်လီမိတက်ရှေ့မှာ လူတော့ရှင်းသွားပြီခင်ဗျ။ ဆရာတော်တွေက အခု ကားနဲ့ပြန်ကြွနေတယ်ခင်ဗျ။ ဆရာတော်တွေ ကားတစ်စီးပေါ်ကို စုတက်ပြီးတော့ ပြန်ကြွနေတယ်။”

နာရီဝက်လောက်ကြာတဲ့ ဒီဆန္ဒပြပွဲကိုတော့ အာဏာပိုင်တွေဘက်က စောင့်ကြည့်မှုတွေရှိခဲ့ပေမဲ့၊ ထင်ထင်ရှားရှား လုံခြုံရေးတပ်တွေ ထားရှိတာ၊ အနှောင့်အယှက်ပေးတာမျိုးတော့ မရှိဘူးလို့သိရပါတယ်။