10.11.2012 နေ့ဖတ်ရန်သတင်းများ

by Myanmar Journal on Friday, November 9, 2012 at 11:58pm ·

စီအိုင်အေ ညွှန်မှူး ရာထူးက နှုတ်ထွက်

စီအိုင်အေ ညွှန်ကြားရေးမှူး David Petraeus

စီအိုင်အေ အမေရိကန် ဗဟိုထောက်လှမ်းရေး အဖွဲ့ရဲ့ ညွှန်ကြားရေးမှူး ဗိုလ်ချုပ်ကြီး David Petraeus ရာထူးကနေ နှုတ်ထွက်သွားခဲ့ပါပြီ။

ဗိုလ်ချုပ်ကြီး ပီးထရီးယပ်ဟာ အီရတ်နဲ့ အာဖဂန်က နိုင်ငံတကာ တပ်ဖွဲ့တွေကို ဦးဆောင်ခဲ့ပြီးတဲ့နောက် ၂၀၁၁ ခု စက်တင်ဘာလမှာ စီအိုင်အေ အကြီးအကဲ ဖြစ်လာခဲ့တာပါ။

သူဟာ အိုဘားမား သမ္မတအဖြစ် ပြန်အရွေးခံရပြီး ၃ ရက် အကြာ ကြာသပတေးနေ့က သူရဲ့ နှုတ်ထွက်လွှာကို တင်သွင်းခဲ့တာဖြစ်ပါတယ်။

သူရဲ့ နှုတ်ထွက်လွှာထဲမှာ သူရဲ့ ပုဂ္ဂိုလ်ရေးကိစ္စကြောင့် အခုလိုနှုတ်ထွက်တာပါလို့ ဖေါ်ပြထားပါတယ်။ အိမ်ထောင်သက် ၃၇ နှစ် ကြာခဲ့ပြီးတဲ့နောက် အိမ်ထောင် ပြင်ပ အရှုပ်တော်ပုံ ဇာတ်လမ်းတခု ဖြစ်ခဲ့တာကြောင့် သူရဲ့ အပြုအမူဟာ ခင်ပွန်းသည် တယောက်၊ စီအိုင်အေလို အဖွဲ့အစည်းကို ဦးဆောင်သူ အနေနဲ့ ဆက်လက် ထမ်းဆောင်ဖို့ မသင့်တော့ဘူးလို့ ဆိုပါတယ်။

သမ္မတ အိုဘားမားက သောကြာနေ့မှာ သူရဲ့နှုတ်ထွက်လွှာကို လက်ခံကြောင်း ကြေညာချက် ထုတ်ပြန်ခဲ့ပါတယ်။

ဒေးဗစ် ပီးထရီးယပ် ဟာ အမေရိကန် ပြည်ထောင်စု အတွက် ၁၀ စုနှစ် များစွာ ထူးထူးခြားခြား တာဝန် ထမ်းဆောင်ခဲ့သူ၊ အမေရိကန် စစ်တပ်ကို စိန်ခေါ်မှုတွေနဲ့ ရင်ဆိုင်နိုင်အောင် ကူညီခဲ့သူ၊ အီရတ်နဲ့ အာဖဂန်က စစ်ပွဲတွေ အတွင်း အမေရိကန် တပ်ဖွဲ့တွေကို ရွတ်ရွတ်ချွံချွံ ဦးဆောင်ခဲ့သူလို့ သမ္မတ အိုဘားမားရဲ့ ထုတ်ပြန်ချက်မှာ ဖေါ်ပြပါတယ်။

စီအိုင်အေ ညွန်ကြားရေးမှူးအဖြစ် တာဝန် ဆက်ထမ်းရာမှာလည်း မျိုးချစ်စိတ်နဲ့ တာဝန်ကို အလေးထား အာရုံစိုက် ဆောင်ရွက်ခဲ့သူ လို့ ဆိုပါတယ်။

အခုလို ခက်ခဲတဲ့အချိန်မှာ ဒေးဗစ် ပီးထရီးယပ်နဲ့ ဇနီးသည်တို့ အကောင်းဆုံး အဆင်ပြေအောင် ညှိနှိုင်း ဆောင်ရွက် နိုင်ပါစေလို့ သမ္မတ အိုဘားမားက ဆန္ဒပြုခဲ့ပါတယ်။

ဆီးနိတ် လွှတ်တော်အမတ် ဂျွန်မက်ကိန်းကလည်း မစ္စတာ ပီးထရီးယပ်ကို အကြီးကျယ်ဆုံး စစ်သူရဲကောင်း တန်းဝင်သူလို့ ခေါ်ဝေါ် ချီးကျူးခဲ့ပါတယ်။

အခု လောလောဆယ်မှာ စီအိုင်အေ ဒုတိယ ညွှန်ကြားရေးမှူး မိုင်ကယ် မိုရဲလ် က ယာယီ ညွှန်ကြားရေးမှူး တာဝန်ယူမယ်လို့ အိမ်ဖြူတော်က ကြေညာခဲ့ပါတယ်။

ဒါပေမယ့် သမ္မတ အိုဘားမားက စီအိုင်အေ ညွှန်ကြားရေးမှူး အသစ် အမည်စာရင်း တင်သွင်းပြီး ဆီးနိတ် လွှတ်တော် အတည်ပြုချက်နဲ့ ခန့်အပ်ရမှာဖြစ်ပါတယ်။

အိုဘားမားခရီးစဉ် အမေရိကန် လက်ထောက် ဝန်ကြီးဟောင်းရဲ့ အမြင်

ဒီအပြုံးမျိုးနဲ့ ဆင်းလာတာ မြန်မာ့မြေပေါ်မှာ မြင်ရဦးမယ်

အမေရိကန် သမ္မတ အိုဘားမားဟာ ဒုတိယ သမ္မတ သက်တမ်း ပြန်အရွေးခံခဲ့ရအပြီး မကြာခင်မှာပဲ မြန်မာနိုင်ငံကို သွားရောက်ဖို့ ရှိပါတယ်။

မြန်မာနိုင်ငံမှာ တိုးတက် ပြောင်းလဲမှု တချို့ ရှိနေပေမယ့် အခုလို ထိပ်တန်း ပုဂ္ဂိုလ် တဦး မြန်မာနိုင်ငံကို သွားရောက်တာဟာ အချိန် စောလွန်းတယ်လို့ လူ့အခွင့်အရေး လှုပ်ရှား တောင်းဆိုတဲ့ အဖွဲ့တချို့က ယူဆနေကြပါတယ်။ ဒါနဲ့ ပတ်သက်လို့ အရှေ့အာရှရေးရာ အမေရိကန် အငယ်တန်း နိုင်ငံခြားရေး ဝန်ကြီး Christopher Hills ကို ဘီဘီစီက ဆက်သွယ် မေးကြည့် ခဲ့ရာမှာ-

သမ္မတ အိုဘားမား မြန်မာနိုင်ငံကို လာမယ်ဆိုတဲ့သတင်းအပေါ် မြန်မာပြည်သူတွေတင်မက မြန်မာအစိုးရအပေါ် သိပ်အကောင်း မမြင် ကြသူ တွေတောင်မှ အတော်လေး စိတ်လှုပ်ရှား ဝမ်းသာ နေကြမယ်လို့ ထင်တယ်လို့ ဆိုပါတယ်။

ဒါပေမယ့် မြန်မာ့အရေးအတွက် နှစ်ပေါင်းများစွာ တိုက်ပွဲဝင် ခဲ့ကြတဲ့ လူ့အခွင့်အရေး အဖွဲ့တွေ အတွက် ကတော့ သမ္မတ အိုဘားမား မြန်မာပြည် သွားမယ် ဆိုတဲ့ သတင်း အပေါ် အံ့အားတသင့် ဖြစ်သွား ကြမှာ ဖြစ်ကြောင်း၊ တဖက်က ကြည့်မယ် ဆိုရင်လည်း မြန်မာ နိုင်ငံ မှာက ပဋိပက္ခ စစ်ပွဲတွေ ဖြစ်နေဆဲ၊ အကျဉ်းထောင်တွေ ထဲမှာ နိုင်ငံရေး အကျဉ်းသားတွေ ရှိနေဆဲမို့ သမ္မတ အိုဘားမားရဲ့ ခရီးစဉ်ဟာ အချိန် စောလွန်း သေးတယ်လို့ ယူဆကြမှာ ဖြစ်တဲ့ အကြောင်း ပြောပါတယ်။

ဒီတော့ ခုန ပြောခဲ့တဲ့ ပြဿနာ ကိစ္စရပ်တွေ ရှိနေချိန်မျိုးမှာ သမ္မတ အိုဘားမား အနေနဲ့ မြန်မာနိုင်ငံကို သွားပြီး သမ္မတ ဦးသိန်းစိန် အစိုးရနဲ့ တိုက်ရိုက် တွေ့ဆုံ တာမျိုး လုပ်တာဟာ နိုင်ငံရေးအရ အလောင်းအစား လုပ်တဲ့ သဘောမျိုး အရဲစွန့် လုပ်တာလို့ ပြောလို့ ရပါသလား ဆိုတဲ့ အမေးကိုတော့-

အမေရိကန်နိုင်ငံနဲ့ တခြားအနောက်နိုင်ငံမှာ နေနေကြသူတွေ အတွက်ကတော့ မြန်မာနိုင်ငံမှာ ကြီးမားတဲ့ လူ့အခွင့်အရေး ပြဿနာတွေ ရှိနေတယ်လို့ ယူဆကြမှာ ဖြစ်ကြောင်း၊ ဒါပေမယ့် တကယ်တမ်း မြန်မာနိုင်ငံထဲမှာ နေထိုင်နေကြတဲ့ မြန်မာပြည်သူတွေ အတွက်ကတော့ ဒီလူ့အခွင့်အရေး ပြဿနာတွေ တင်မက တခြားကိစ္စရပ်တွေဖြစ်တဲ့ လက်နက်ကိုင် ပဋိပက္ခတွေ၊ တိုင်းရင်းသား အရေးကိစ္စတွေကိုလည်း ဖြေရှင်းဖို့လိုတယ် ဆိုတာကို သဘောပေါက်ထားကြ တဲ့ အကြောင်း၊ ဒါ့ကြောင့် မြန်မာနိုင်ငံ လမ်းကြောင်းမှန်ပေါ် ရောက်ရေး အတွက် သမ္မတ အိုဘားမားအနေနဲ့ ဖိအားပေး ဆောင်ရွက်ဖို့ မြန်မာနိုင်ငံကို အခုလို သွားတာ ဖြစ်ပြီး ၊ဒါ့ကြောင့် ဒီခရီးစဉ်ဟာ အရဲစွန့် လုပ်ရတဲ့ အလောင်းအစား ခရီးစဉ်လို့ ပြောမယ်ဆို ပြောနိုင်တယ်လို့ ဆိုပါတယ်။

ဒီတော့ကာ သမ္မတ အိုဘားမားအနေနဲ့ မြန်မာနိုင်ငံကို လမ်းကြောင်းမှန်ပေါ် ရောက်အောင် တကယ်ပဲ ဖိအားပေး ဆောင်ရွက်နိုင်မယ်လို့ရော ယူဆပါသလား။ အမေရိကန်အစိုးရအနေနဲ့ မြန်မာနိုင်ငံအပေါ် စီးပွားရေး ပိတ်ဆို့မှုတွေ အပါအဝင် ဒဏ်ခတ် ပိတ်ဆို့မှု အတော်များများကို ဆိုင်းငံ့ထားခဲ့ပြီး ဖြစ်တာမို့ အခုအခါ လမ်းကြောင်းမှန်ပေါ် ရောက်နေပြီလို့ ပြောလို့ ရပါသလား ဆိုပြီး မေးခဲ့ရာမှာ-

သူ့ အမြင်ကတော့ သမ္မတ အိုဘားမားရဲ့ ခရီးစဉ်ဟာ အရဲစွန့်ပြီး လုပ်ရမယ့် အားတက် စရာခရီးစဉ် ဖြစ်သလို လုပ်သင့် လုပ်ထိုက်တဲ့ ခရီးစဉ် ဖြစ်တယ်လို့ ယူဆကြောင်း၊ မြန်မာ နိုင်ငံဟာ နှစ်နဲ့ချီပြီး အတိဒုက္ခ ရောက်နေခဲ့တဲ့ နိုင်ငံဖြစ်တာမို့ သမ္မတ အိုဘားမားအနေနဲ့ အခုလို အရဲစွန့်ပြီး တာဝန်ယူ လုပ်လိုက်တာဟာ အထင်ကြီး လေးစားစရာကောင်းလှ တဲ့အကြောင်း ပြောပါတယ်။

နောက်တခုက မြန်မာနိုင်ငံ အပေါ် အကြီးအကျယ် စိတ်ဝင်စားနေတဲ့ တရုတ်လို နိုင်ငံမျိုး ရှိနေသလို သမ္မတ အိုဘားမားကလည်း အာရှဒေသတွေ အပေါ် ပိုအလေးထား အာရုံစိုက် လာတဲ့ နိုင်ငံခြားရေး မူဝါဒကို ပြောင်းလဲ သတ်မှတ် လာတာဟာ မြန်မာနိုင်ငံရဲ့ အနာဂတ်ရေး အပေါ် သြဇာလွှမ်းဖို့ အာဏာ ပြိုင်မှုလို့ ပြောလို့ ရပါသလား ဆိုတာကိုတော့ အခုလို ဖြေကြားခဲ့ပါတယ်။

အာရှ ဒေသတွေနဲ့ ပို ထိတွေ့ ဆက်ဆံရေး ဆိုတဲ့ နိုင်ငံခြားရေး မူဝါဒ ကို ပြောင်းလဲ ချမှတ်ခဲ့တာဟာ တရုတ်ကို ထိပ်တိုက်ရင်ဆိုင်ဖို့ ဒါမှ မဟုတ် တရုတ်ကို ချောင်ပိတ် အလဲထိုးဖို့ လုပ်တာဆိုတဲ့ အမြင်မျိုး ထင်စရာ ရှိပေမယ့် တကယ့်ရည်ရွယ်ချက်က သမ္မတ အိုဘားမားအနေနဲ့ အမေရိကန်နဲ့ ကာလတာရှည် ပဋိပက္ခတွေ ဖြစ်နေခဲ့တဲ့ နိုင်ငံမျိုးတွေနဲ့ ပဋိပက္ခတွေ ဆက်မဖြစ်လို တော့ပဲ ရေရှည် ဆက်ဆံရေးတွေ ထားရှိ နိုင်အောင် အခုလို နိုင်ငံခြားရေး မူဝါဒ ပြောင်းလဲ ချမှတ်ခဲ့တာ ဖြစ်ကြောင်း၊ အထူးသဖြင့် တရုတ်နိုင်ငံနဲ့ ရေရှည် ဆက်ဆံရေး ထားကိုထားမှာ ဖြစ်သလို တရုတ်နဲ့ ထိပ်တိုက် ရင်ဆိုင်ဖို့ သမ္မတ အိုဘားမားက မလိုလား တဲ့ အကြောင်း၊ ဒါပေမယ့် တချို့ အခြေအနေမျိုးမှာ အာရှနိုင်ငံတွေ အနေနဲ့ကတော့ တရုတ်နဲ့ အမေရိကန်ကြားမှာ တနိုင်ငံကို ရွေးရတာမျိုးတွေ လည်း ရှိတဲ့ အကြောင်းနဲ့ အမေရိကန် နိုင်ငံထဲက လူတွေ အတွက် ဒါဟာ တရုတ်ကို ထိပ်တိုက် ရင်ဆိုင်ဖို့ လုပ်တဲ့ မဟာ ဗျူဟာ တခုလို့ ယူဆနေ ကြတာမျိုးလည်း ရှိတဲ့ အကြောင်း ဖြေကြား သွားခဲ့ပါတယ်။ 

ရခိုင် လူနေမှု စိစစ်ရေး အခက်အခဲ

ဒုက္ခသည် စခန်းတွေမှာ ဖြစ်သလို နေရ

ရခိုင် ပြည်နယ်မှာ တရားမဝင် ဝင်နေသူတွေကို ခွဲခြား ဖို့ စိစစ် စုံစမ်းရာမှာ ပြဿနာ နဲ့ အဆင်မပြေမှုတွေ ရှိတယ်လို့ သိရပါတယ်။

ဦးနုခေတ်က ထုတ်ပေးခဲ့တဲ့ ဒေသခံ မွတ်ဆလင် တွေရဲ့ မှတ်ပုံတင်မှာ ရခိုင် မြန်မာ မဟာမေဒင်လို့ ရေးထားတာကို သူတို့ သားမြေးတွေ လက်ထက် နိုင်ငံသား စိစစ်ရေး ကတ်အသစ်တွေ ထုတ်ပေးမှ ဘင်္ဂါလီ မွတ်ဆလင်လို့ ပြင်ခံနေရတယ်လို့ သံတွဲက မွတ်ဆလင် တယောက်က ပြောပါတယ်။

ပေါက်တော ဘက်က မွတ်ဆလင် တချို့ ကလဲ သူတို့ကို ရိုဟင်ဂျာလို့ မသတ်မှတ် မခေါ်ဝေါ်ရင် လာတွေ့ဖို့ ၊ အိမ်ထောင်စု စာရင်းမှာ လက်မှတ်ထိုးဖို့ ငြင်းဆန် တာတွေ ရှိတယ်လို့ RNDP ပါတီ ပြည်နယ် လွှတ်တော် ကိုယ်စားလှယ် ဦးသက်ထွန်းအောင်က ပြောပါတယ်။

လူဝင်မှု ကြီးကြပ်ရေး၊ နယ်စပ်ဒေသ လုံခြုံရေး၊ မွတ်ဆလင်နဲ့ ရခိုင် ရပ်ရွာ လူကြီးတွေနဲ့ ပါတီ ကိုယ်စားလှယ်တွေ လိုက်ပါ စစ်ဆေး နေကြတယ်လို့ သိရပါတယ်။

ကန့်ဘလူ နားမှာ ဆီတွဲ ရထား တိမ်းမှောက်

စစ်ကိုင်းတိုင်း ကန့်ဘလူ အနီး ဆီတွဲရထား တိမ်းမှောက်ပြီး မီးလောင်ခဲ့(ဓါတ်ပုံ ပြန်ကြားရေး ဝန်ကြီးဌာန ဝက်ဘ်ဆိုဒ်)

နိုဝင်ဘာလ ၉ ရက် သောကြာနေ့ မနက် ၁၀နာရီကျော်က မန္တလေး ကနေ မြစ်ကြီးနားကို ပို့တဲ့ ဆီတွဲ ရထား တစီး တိမ်းမှောက် သွားခဲ့ ပါတယ်။

စစ်ကိုင်းတိုင်း ကန့်ဘလူနဲ့ ၂၅ မိုင်အကွာက ချက်ကြီး ဘူတာနားမှာ လမ်းချော် တိမ်းမှောက်ခဲ့ တာ ဖြစ်ပြီး ရထားပေါ်မှာ သယ်ယူလာတဲ့ ဆီတွေ ဖိတ်ကုန်ခဲ့ ပါတယ်။

အဲဒီ ဖိတ်နေတဲ့ ဆီတွေကို ဒေသခံ ရွာသားတွေက သွားရောက် ခပ်ယူ စဉ်မှာ မီးလောင်မှု ဖြစ်ပွားခဲ့တဲ့ အတွက် လူ ၂၇ ယောက် သေဆုံးခဲ့ ပြီး ၈၃ ယောက် ဒဏ်ရာ ရခဲ့တယ်လို့ ကန့်ဘလူနဲ့ ကျွန်းလှ မီးသတ်တပ်ဖွဲ့က ဘီဘီစီကို ပြောပါတယ်။

မီးလောင် ဒဏ်ရာနဲ့ လူနာတွေကို ကျွန်းလှနဲ့ ကန်ဘလူဆေးရုံး တို့မှာ ဆေးကုသ ပေးနေ တယ်လို့ ဆိုပါတယ်။

ရထားတွဲ လမ်းချော် သွားတဲ့ အတွက် သံလမ်းနဲ့ ရထားဘီး ပွတ်တိုက် မိရာက ပူလာပြီး မီးလောင်တာ ဖြစ်နိုင်တယ်လို့ ကျွန်းလှ ရဲစခန်းက သုံးသပ် ပြောဆို ပါတယ်။

ဝန်ကြီး ဦးအောင်မင်း ကျောင်းသား တပ်မတော်နဲ့ ထပ်တွေ့

နိုင်ငံရေး အာမခံချက် ရှိမှ ABSDF မြန်မာပြည် ပြန်နိုင်မယ်

နိုဝင်ဘာလ ၉ ရက်နေ့က ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်း ကော်မတီ ဒုတိယ ဥက္ကဌ ပြည်တောင်စု ဝန်ကြီး ဦးအောင်မင်းနဲ့ အဖွဲ့ ထိုင်းနိုင်ငံ ချင်းမိုင်မြို့ကို ရောက်လာပြီး မြန်မာ နိုင်ငံလုံး ဆိုင်ရာ ကျောင်းသားများ ဒီမိုကရက်တစ် တပ်ဦး ABSDF နဲ့တွေ့ဆုံ ခဲ့ပါတယ်။

ဒီတစ်ကြိမ်ဟာ ကျောင်းသား တပ်မတော်နဲ့ အစိုးရ ငြိမ်းချမ်းရေး ကော်မီတီတို့ ဒုတိယ အကြိမ် တွေ့ဆုံတာ ဖြစ်ပါတယ်။

ဒီတွေ့ဆုံပွဲမှာ ABSDF ဘက်က ပြည်တွင်း ငြိမ်းချမ်းရေးနဲ့ အမျိုးသား ပြန်လည် သင့်မြတ်ရေး အတွက် အတတ်နိုင်ဆုံး ကြိုးပမ်း သွားဖို့၊ အင်အားစုတွေ အားလုံး ပါဝင်တဲ့ အမျိုးသား နိုင်ငံရေး ဆွေးနွေးပွဲတွေ ပေါ်ပေါက် လာဖို့နဲ့ ဒီမို ကရေစီရေး၊ လူ့ အခွင့် အရေး၊ တန်းတူ ညီမျှရေး နဲ့ အမျိုးသား ကိုယ်ပိုင် ပြဌာန်းခွင့် တို့ အတွက် အာမခံ နိုင်တဲ့ ဖွဲ့စည်းပုံ အခြေခံ ဥပဒေ တစ်ရပ် ပေါ်ပေါက် လာရေးမှာ အသွင် ကူးပြောင်းရေး လုပ်ငန်းစဉ် တစ်ရပ် ဖြစ်ပေါ် လာစေဖို့ ဆိုတဲ့ အချက် သုံးချက်ကို တင်ပြ ခဲ့တယ်လို့ ကိုယ်တိုင် ဆွေးနွေးပွဲ တက်ရောက် ခဲ့သူ ABSDF အဖွဲ့ ဥက္ကဌ ကိုသံခဲက ပြောပါတယ်။

အစိုးရ ဘက်ကတော့ တစ်နိုင်ငံလုံး အပစ် အခတ် ရပ်စဲရေးနဲ့ ငြိမ်းချမ်းရေး အတွက် အတတ်နိုင်ဆုံး ကြိုးပမ်း နေပြီး နိုင်ငံရေး ဆွေးနွေးပွဲ တွေပြုလုပ်ဖို့ လိုအပ်တယ် ဆိုတာကိုလည်း သူတို့ လက်ခံတဲ့ အကြောင်း ပြောခဲ့ တယ်လို့ သိရပါတယ်။

နောက်ထပ် ဆွေးနွေးမှုတွေ ထပ်လုပ်ဖို့ သဘောတူ ခဲ့တဲ့ အပြင် အကျဉ်းထောင် အသီးသီးမှာ အကျဉ်း ကျခံ နေကြရတဲ့ ABSDF ကျောင်းသား တပ်မတော် အဖွဲ့ဝင်တွေ လွတ်မြောက်ရေး၊ နှစ်ဘက် ယုံကြည်မှု ရရှိရေး အတွက် အဆင့်ဆင့် ဆက်လက် ဆွေးနွေးသွားဖို့ သဘောတူ ထားတယ်လို့ ကိုသံခဲက ပြောပါတယ်။

ဒါ့အပြင် နိုင်ငံရေး ဆွေးနွေးပွဲတွေမှာ ABSDF ပါဝင် လိုတယ်လို့လည်း ပြောခဲ့ကြောင်း သူက ပြောပါတယ်။

ABSDF ကျောင်းသား တပ်မတော် အနေနဲ့ လောလောဆယ် အသွင်ပြောင်းဖို့ မရှိသေး သလို လက်နက် ချဖို့လည်း မရှိ ပေမဲ့ လက်နက်ကိုင် တိုက်ပွဲဝင် ရုံနဲ့ ပြဿနာကို ဖြေရှင်းနိုင်မှာ မဟုတ်ဘူး ဆိုတာကိုတော့ လက်ခံ ထားတယ်လို့ ကိုသံခဲက ပြော ပါတယ်။

၈၈ လူထု အရေးတော်ပုံကြီး ကနေ ပေါက်ဖွား လာတဲ့ ABSDF အနေနဲ့ ပြည်သူလူထု လိုလားတဲ့ ဒီမိုကရေစီ အခွင့် အရေးတွေ ရပြီ ဆိုရင် လက်နက်ကိုင် တိုက်ပွဲဝင်စရာ လိုတော့မှာ မဟုတ်ဘူး၊ တခြား လက်နက်ကိုင် အဖွဲ့တွေလည်း အလားတူပဲ ဖြစ်လိမ့်မယ်လို့ သူက ဆိုပါတယ်။

နိုင်ငံရေး အရ အသေ အချာ အာမခံနိုင် တော့မှ ABSDF အနေနဲ့ မြန်မာ နိုင်ငံကို ပြန်နိုင်မယ်လို့ ကိုသံခဲက ပြောပါတယ်။

ဘက်ဂျက် အရေး အိုဘားမား သတိပေး

လက်ရှိ အမေရိကန် ဘက်ဂျက် အကျပ်အတည်းကို ပြောင်းလဲ ပစ်နိုင်ဖို့ ချမ်းသာ သူတွေ အခွန်ပိုပေးရမယ် လို့ သမ္မတ အိုဘားမားက ပြောကြား လိုက်ပါတယ်။

ကွန်ဂရက် ခေါင်းဆောင် တွေနဲ့ ဆွေးနွေးဖို့ ပြင်ဆင်နေတဲ့ မစ္စတာ အိုဘားမားက သူဟာ ရီပတ်ဘလစ်ကန် ပါတီဝင် တွေနဲ့ ညှိနှိုင်း ပူးပေါင်း ဆောင်ရွက်ဖို့ လိုလားတယ်လို့ ဆိုပါတယ်။

အိုဘားမားက သူဟာ ဘာတခုကိုမှ အသေးစိတ် ဆုပ်ကိုင် ထားသူ မဟုတ်ဘူး၊ အမြင်သစ်ကို ကြိုဆိုတဲ့သူပါ၊ ဒါပေမဲ့ ဘက်ဂျက် လိုငွေ ပြမှု လျှော့ချဖို့ အချမ်းသာဆုံး သူတွေဆီက အခွန် တိုးကောက်တာနဲ့ အသုံးစရိတ် ဖြတ်တောက်တာ ၂ မျိုးလုံး ညီညီမျှမျှ မရှိတဲ့ အစီအစဉ်မျိုးကို သူလက်ခံမှာ မဟုတ်ဘူးလို့ ဆိုပါတယ်။

ကျောင်းသားတွေ သက်ကြီးရွယ်အိုတွေ နဲ့ အလယ်အလတ်တန်းစား မိသားစုတွေ ဆီက ဘက်ဂျက် လိုငွေ ကို ဖြည့်ဖို့ တောင်းခံမှာ မဟုတ်ဘူး လို့ အိုဘားမားက ပြောကြား ခဲ့ပါတယ်။

ကွန်ဂရက်မှာ အများစု အသာရထားတဲ့ ရီပတ်ဘလစ်ကန် တွေက အခွန်တိုးကောက်မှာ အပြင်းအထန် ဆန့်ကျင် နေကြတာပါ။

သူ အင်္ဂါနေ့ ရွေးကောက်ပွဲမှာ ပြန်အနိုင်ရ လိုက်တာဟာ အမေရိကန် နိုင်ငံသား အများစုက သူ့လမ်းစဉ် ကို လိုလားကြောင်း ပြသ လိုက်တာလို့လဲ အိုဘားမားက ဆိုပါတယ်။

အိုဘားမားခရီးစဉ်အပေါ် ဒီမိုအုပ်စုတွေ မျှော်လင့်ချက်ထား

 အမေရိကန်သမ္မတ Barack Obama

သမ္မတတာဝန်ထမ်းဆောင်စဉ် မြန်မာနိုင်ငံကို လာရောက်တဲ့ ပထမဆုံးသော အမေရိကန်သမ္မတ ဘားရက်အိုဘားမားရဲ့ ခရီးစဉ်နဲ့ပတ်သက်ပြီး  ပတ်သတ်ပြီး ပြည်တွင်းမြန်မာနိုင်ငံရေး အင်အားစုတွေကရော ဘယ်လို သဘောထားကြပါသလဲ။ သမ္မတအိုဘားမားရဲ့ ဒီခရီးစဉ် အပေါ် မြန်မာ့နိုင်ငံရေးလောကမှာ အများစုက ကြိုဆိုကြတာရှိသလို အခုလိုမျိုး လာရောက် တာဟာ မြန်မာနိုင်ငံအခြေအနေအရ စောနေသေးတယ်လို့ ယူဆကြပါတယ်။ ဒီလိုနိုင်ငံရေးခေါင်းဆောင် အသီးသီးရဲ့ အမြင်သဘောထားတွေကိုတော့ ဆက်သွယ်မေးမြန်းထားတဲ့ မဆုမွန်က တင်ပြပေးပါမယ်။

လာမယ့်နိုဝင်ဘာလ ၁၇ရက်နေ့ကနေ၂၀ရက်နေ့အထိ အမေရိကန်သမ္မတ ဘားရက်အိုဘားမားရဲ့ အာရှခရီးစဉ်အတွင်း မြန်မာနိုင်ငံကို သွားရောက်မယ်လို့ အိမ်ဖြူတော်က ကြာသပတေးနေ့က တရားဝင်ကြေညာချက် ထုတ်ပြန်လိုက်ပါတယ်။ အခုလိုမျိုး မြန်မာနိုင်ငံတွင်း အရပ်သားအစိုးရ လက်ထက် ပြုပြင်ပြောင်းလဲရေးတွေ လုပ်နေတဲ့အချိန်မှာ ပထမဆုံးအကြိမ် အမေရိကန်သမ္မတ တဦးရဲ့ သမိုင်းဝင်ခရီးစဉ်နဲ့ပတ်သက်ပြီး မြန်မာ့နိုင်ငံရေးလောကမှာ သုံးသပ်မှုအမျိုးမျိုးရှိသလို မတူကွဲပြားတဲ့ အမြင်တွေလည်းရှိနေပါတယ်။

အပြည့်အဝလွတ်လပ်မှုမရသေးတဲ့အခြေအနေမှာ မြန်မာနိုင်ငံရဲ့  လူ့အခွင့်အရေးနဲ့ ငြိမ်းချမ်းရေးကိစ္စတွေနဲ့ပတ်သက်ပြီး အမြဲတမ်း တောင်းဆိုဖိအားပေးခဲ့တဲ့ အမေရိကန်သမ္မတအနေနဲ့ အစိုးရကို ဆွေးနွေးဖြေရှင်းသွားမယ်လို့ မျော်လင့်ကြောင်း အမျိုးသားဒီမိုကရေစီအဖွဲ့ချုပ် ဗဟိုကော်မတီဝင် သတင်းစာဆရာကြီးဦးဝင်းတင်က ဗွီအိုအေမြန်မာပိုင်းကိုပြောပါတယ်။

“မစ္စတာအိုဘားမားဟာ တလျောက်လုံး မြန်မာပြည်ရဲ့ လူ့အခွင့်အရေးကိစ္စ၊ မြန်မာပြည်ရဲ့ ငြိမ်းချမ်းရေးကိစ္စ၊ ပြည်တွင်းပဋိပက္ခတွေ တည်ငြိမ်ရေးကိစ္စ၊ မြန်မာပြည်ရဲ့ စီးပွားရေးဖွံ့ဖြိုးတိုးတက်မှုကိစ္စတွေကို အမြဲတမ်းအာရုံထားတဲ့ ပုဂ္ဂိုလ်ပီပီ၊ မြန်မာပြည်ကို လာရောက်တဲ့အခါမှာလည်းပဲ၊ ဒီကိစ္စတွေကို ဆောင်ရွက်နိုင်ပါစေ။ ဆက်လက်ပြီးတော့ တွန်းအားပေးနိုင်ပါစေ။ ဆက်လက်ပြီးတော့ ဆွေးနွေးနိုင်ပါစေလို့ ကျနော်တို့ မျှော်လင့်ပါတယ်။ ဘာဖြစ်လို့လည်းဆိုတော့ မြန်မာပြည်မှာ အားလုံးသိကြတဲ့အတိုင်း၊ ဒီနေ့အထိတော့ လူ့အခွင့်အရေးပြဿနာနဲ့ပတ်သက်လာရင်၊နိုင်ငံရေးအကျဉ်းသားတွေဟာ ဒီကနေ့အထိ မြန်မာပြည်မှာ ထောင်ထဲမှာ အများကြီးကျန်ရှိနေပါသေးတယ်။

အလားတူပဲ ပြည်တွင်းငြိမ်းချမ်းရေးနဲ့ပတ်သက်လို့ရှိရင်လည်း ပြည်တွင်းမှာ လက်နက်ကိုင် ပဋိပက္ခတွေဟာ ဒီနေ့အထိ ပေါ်ပေါက်လျက်ရှိပါတယ်။ ဒါ့ထက်ပိုပြီးတော့ ပြောရရင် မြန်မာပြည်မှာ လွတ်လပ်ခွင့်တွေပေါ့ဗျာ။ စာနယ်ဇင်းလွတ်လပ်ခွင့်တို့၊ ပြည်သူများရဲ့လွတ်လပ်ခွင့်တို့၊ ဒီလိုဟာမျိုးတွေမှာ အများကြီး အခုထက်ထိ နည်းနည်းလျော့ပါြး့ပီးတော့ ရှိနေသေးတဲ့ အခြေအနေမှာ ရှိနေသေးတဲ့အတွက် ဒီကိစ္စနဲ့ပတ်သက်လို့လည်း မစ္စတာအိုဘားမားဟာ သက်ဆိုင်ရာ အစိုးရတာဝန်ရှိသူများနဲ့ ဆွေးနွေးဖြေရှင်း လမ်းစဖော်ပေးနိုင်မယ်လို့ ကျနော်တို့ မျှော်လင့်ပါတယ်လို့ ကျနော်ကတော့ အဲ့လိုပဲပြောချင်ပါတယ်။”

ဒါပေမယ့် အခုလိုမျိုး အမေရိကန်သမ္မတ တစ်ဦး မြန်မာနိုင်ငံကို လာတာဟာ စောလွန်းနေတယ်လို့လည်း တိုင်းရင်းသား ခေါင်းဆောင်တဦးဖြစ်တဲ့ ဦးအေးသာအောင်က သုံးသပ်ပါတယ်။ ပြည်တွင်းရေးငြိမ်းချမ်းရေးတွေ တည်ဆောက်ဆဲကာလဖြစ်တဲ့အတွက် စစ်အစိုးရလက်အောက်ကနေ အရပ်သားအစိုးရအပြောင်းအလဲကာလမှာ အပြောင်းအလဲတွေက အမှန်တကယ်ပဲ တိုးတက်ပြောင်းလဲ လာချိန်မှာမှ ရောက်လာသင့်တယ်လို့လည်း ဦးအေးသာအောင်က မြင်ပါတယ်။

“ကျနော်တို့ကတော့ လက်ရှိအခြေအနေမှာ မြန်မာနိုင်ငံရဲ့အခြေအနေက အပြောင်းအလဲဖြစ်ဖို့ ကြိုးစားဆဲကာလပဲဖြစ်တယ်။ အထူးသဖြင့် ပြည်တွင်းစစ်ရပ်စဲဖို့၊ ပြည်တွင်းငြိမ်းချမ်းရေးကို တည်ဆောက်ဖို့၊ ကြိုးစားနေဆဲကာလဖြစ်တယ်။ ဒီကာလမျိုးမှာ အမေရိကန်ရဲ့ သမ္မတ လာတာကို ကျနော်တို့ကတော့ စောတယ်လို့ သုံးသပ်တယ်။ တကယ်ဆိုရင် မြန်မာနိုင်ငံရဲ့ အပြောင်းအလဲအတွက် အတော်များများ ပြုပြင်ပြောင်းလဲပြီးပြီ၊ ပြည်တွင်းစစ်လည်း ရပ်စဲပြီးပြီ၊ ပြည်တွင်းငြိမ်းချမ်းရေးကိုလည်း တည်ဆောက်ပြီးပြီဆိုတဲ့၊ အချိန်မျိုးကျမှ အမေရိကန်သမ္မတအိုဘားမားလာတာ ပိုပြီးတော့ သင့်တော်လိမ့်မယ်လို့ ကျနော်က ဒီလိုသုံးသပ်ပါတယ်။”

၈၈မျိုးဆက်ကျောင်းသားခေါင်းဆောင် ကိုဂျင်မီကတော့ မြန်မာပြည်ဒီမိုကရေစီရရှိရေးအတွက် တစိုက်မတ်မတ် ထောက်ခံအားပေး ဆောင်ရွက်ခဲ့တဲ့ အမေရိကန်နိုင်ငံရဲ့ သမ္မတအိုဘားမား မြန်မာနိုင်ငံကို လာရောက်မယ့်ကိစ္စကို ကြိုဆိုကြောင်းနဲ့ အမေရိကန်နိုင်ငံရဲ့ ယခင်ဖိအားပေးဆက်ဆံမှုကနေ ထိတွေ့ဆက်ဆံမူ မူဝါဒကိုပြောင်းပြီး ကျင့်သုံးလာတဲ့အပေါ်ကို အခုလိုသုံးသပ်ပါတယ်။

“ကျနော်တို့ကတော့ ကြိုဆိုပါတယ်။ ဘာဖြစ်လို့လည်းဆိုတော့ အိုဘားမားရဲ့ လက်ထက်ကစပြီးတော့ မြန်မာပြည်ကို ထိတွေ့ဆက်ဆံတဲ့ပုံစံ ရယ်၊ ဖိအားပေးတဲ့ပုံစံရယ် ဒီနှစ်ခုပေါ့။ အဲ့နှစ်ခုကို ချမှတ်ပြီးတော့ မြန်မာပြည်ကို ဆက်ဆံတာပေါ့နော်။ အဲ့ဆက်ဆံမှုဟာ ဘာပဲဖြစ်ဖြစ် အောင်မြင်တယ်လို့ ပြောလို့ရပါတယ်။ နောက်တခုက အမေရိကန်သမ္မတက အစိုးရတာဝန်ထမ်းဆောင်တဲ့အခါမှာ နှစ်ဆက်တာဝန် ထမ်းဆောင်တဲ့အခါ ပိုမိုပြီး ပြီးပြည့်စုံအောင် လုပ်နိုင်တယ်လေ။ အဲ့တော့ ဆိုကြမယ်ဆိုရင် မြန်မာပြည်အရေးနဲ့ပတ်သက်လာရင် သမ္မတအိုဘားမားက ဖိအားပေးတဲ့ပုံစံရော၊ နောက်ပြီးတော့ ထိတွေ့ဆက်ဆံတဲ့ပုံစံရော၊ နှစ်ခုစလုံးကို စအကောင်အထည်ဖော်တာဖြစ်တယ်။ ပြီးတော့ ဒါကို သူက နောက်သက်တမ်းတခုမှာ အဆုံးသတ်နိုင်အောင် သူကြိုးစားလိမ့်မယ်။ အဲ့တော့ ဒါ ဘာပဲဖြစ်ဖြစ် ဒါ ကောင်းမွန်တဲ့ ဆက်ဆံရေးတခုတော့ ရလာမယ်လို့ ကျနော်တို့ ယုံကြည်ပါတယ်။”

အခုလိုမျိုး အမေရိကန်နိုင်ငံမှာ ဒုတိယအကြိမ်သမ္မတသက်တမ်းပြန်အရွေးခံပြီးနောက် ပထမဆုံးအကြိမ် ထွက်မယ့် နိုင်ငံခြားခရီးစဉ်မှာ အာရှနိုင်ငံတွေဆီကို လာရောက်မယ့် သမ္မတအိုဘားမားဟာ အရှေ့အာရှထိပ်သီးညီလာခံကို တက်ရောက်ပြီး ဒေသတွင်း အာဆီယံခေါင်းဆောင်တွေနဲ့တွေ့ဆုံမှာဖြစ်သလို မြန်မာနိုင်ငံခရီးစဉ်အတွင်းမှာလည်း မြန်မာ သမ္မတ ဦးသိန်းစိန်၊ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်တို့အပြင် နိုင်ငံရေးပါတီက ခေါင်းဆောင်တွေ၊ နိုင်ငံရေးလူပ်ရှားသူတွေနဲ့ လူထု အခြေပြု အဖွဲ့အစည်တွေနဲ့ တွေ့ဆုံပြီးတော့ မြန်မာနိုင်ငံမှာ လက်ရှိဒီမိုကရေစီ ပြုပြင်ပြောင်းလဲရေး ကိစ္စတွေကို ဆွေးနွေး အားပေးတိုက်တွန်းမှာဖြစ်ပါတယ်။

ရခိုင်ဒေသအကူအညီများ သွားရောက်ခွင့် သံရုံးများ တောင်းဆို

 ရခိုင်ပြည်နယ် ပေါက်တောမြို့နယ်က မီးလောင်ပျက်စီးခဲ့ရတဲ့ အဆောက်အဦးတစ်ခု။

ပြီးခဲ့တဲ့ ဇွန်လကစလို့ အကြမ်းဖက် အဓိကရုဏ်းတွေ ဖြစ်ပွားခဲ့တဲ့ ခိုင်ပြည်နယ်ထဲက ပဋိပက္ခနေရာတွေကို သွားရောက်ပြီး အိုးမဲ့အိမ်မဲ့ ဒုက္ခရောက်နေသူတွေထံကို လူသားချင်း စာနာမှု အကူအညီတွေ လွတ်လွတ်လပ်လပ် သွားရောက် ကူညီခွင့် ပြုဖို့ အမေရိကန်၊ အင်္ဂလန်၊ ပြင်သစ်၊ ဂျာမဏီ၊ ဂျပန်၊ တူရကီ၊ သြစတြေးလျ၊ ဆော်ဒီအာရေဗျ နဲ့ အီဂျစ် သံရုံးတွေက ဒီကနေ့ ပူးတွဲ ကြေညာချက် ထုတ်ပြန် မြန်မာအစိုးရကို တောင်းဆိုလိုက်ပါတယ်။

ရခိုင်ပြည်နယ် အကြမ်းဖက်မှုတွေ အတွင်း လူတွေ အများအပြား သေဆုံးပြီး အပြစ်မဲ့ပြည်သူ သောင်းနဲ့ချီ အတိ ဒုက္ခရောက်ခဲ့ရတာမှာ ဒုက္ခရောက်နေသူတွေကို သူတို့ဘက်က လူသားချင်း စာနာတဲ့ အကူအညီတွေ ပေးဖို့ အဆင်သင့်ရှိနေတဲ့ အကြောင်းနဲ့ ဒီ အကူအညီတွေ ပေးနိုင်ဖို့ မြန်မာအစိုးရဘက်က ခွင့်ပြုပေးဖို့ တောင်းဆိုလိုက်တာ ဖြစ်ပါတယ်။

အကြမ်းဖက် ပဋိပက္ခတွေ ဖြစ်ခဲ့တဲ့ နေရာတွေကို အမေရိကန်၊ အင်္ဂလန်နဲ့ သြစတြေးလျ သံရုံးတွေက သံအရာရှိတွေ သွားရောက် လေ့လာမှုတွေ လုပ်ခဲ့ပြီးတဲ့နောက် ခုလို ကြေညာချက် ထွက်ပေါ်လာတာ ဖြစ်ပါတယ်။ အစောပိုင်းကတော့ သူတို့ရဲ့ လေ့လာ တွေ့ရှိချက်တွေနဲ့ ပတ်သက်ပြီး သတင်းစာရှင်းလင်းပွဲ တရပ် ပြုလုပ်မယ့်အကြောင်း ပြောဆိုခဲ့ပေမဲ့ မဖြစ်ခဲ့ပါဘူး။ ရခိုင်ဒေသ ပဋိပက္ခတွေနဲ့ပတ်သက်လို့ စုံစမ်းစစ်ဆေးရေး လုပ်ငန်းတွေကို ပွင့်လင်း မြင်သာမှု ရှိရှိနဲ့ ကိုင်တွယ် ဖြေရှင်းနိုင်အောင် အထူး စုံစမ်းစစ်ဆေးရေး ကော်မရှင်အဖွဲ့ကို လုပ်ပိုင်ခွင့်တွေ ပေးဖို့ ဒီ သံရုံး ၉ ရုံးက ထုတ်ပြန်တဲ့ ပူးတွဲ ကြေညာချက်မှာ တိုက်တွန်း ထားပါတယ်။