ရာဟုလာကို ရုပ်ရှင်ရိုက်ပြတဲ့ ရှင်ဒေ၀ီ ........ မောင်ကိုကို (အမရပူရ)

by Heinn FiveStrings on Thursday, August 2, 2012 at 3:13am 

- ၁ -

ဒေ၀ီ၏ ဖခင်မှာ တရုတ်လူမျိုးဖြစ်သည်။ ဒေ၀ီ၏ မိခင်မှာ မန္တလေးသူ စစ်စစ်ဖြစ်၏ ။ ဒေ၀ီ၏ ဖခင်ဘက်က တရုတ်ဆန်လွန်းသည်။ မြန်မာဆန်သော မန္တလေးသူကြီးက တရုတ်တွေကြားမှာ မနေနိုင်။ မန္တလေးသို့ ပြန်ပြေး၏ ။ ဒေ၀ီက ငယ်ကတည်းကပင် အမေနှင့်ဝေးကွာသွားသည်။ အမေကလည်း မန္တလေးမှာ နောက်အိမ်ထောင်ပြုကာ သားသမီးတွေပွားစီးခဲ့၏ ။

ဒေ၀ီ၏ ဖခင်က သူ့ညီမအရင်းနှင့် စီးပွားအတူလုပ်ကိုင်သည်။ ဒေ၀ီ၏ အဒေါ်ကိုပဲ ဒေ၀ီက အမေဟု သဘောထားကာ ဆက်ဆံသည်။ အဖေတို့ မောင်နှမက ဒေ၀ီကို တရုတ်စာသင်ပေးသည်။ ဒေ၀ီက တရုတ်စာ၊ တရုတ်စကားကို မကြိုက်၊ မြန်မာကဗျာ၊ မြန်မာဝတ္ထုကို ကြိုက်သည်။

- ကျွန်မ တက္ကသိုလ်ဝင်တန်းမှာ စတင်ဖတ်ဖူးတဲ့ ကဗျာအမည်က *ဆူပူလှုံ့ဆော်ရေးသမားရဲ့ ဈာပန* တဲ့။ ကျွန်မ သိပ်ကြိုက်တာပဲ - ဒေ၀ီက ပြောသည်။

တင်မောင်အေး ဘာသာပြန်သော ဗားတော့ဗရက်၏ ကဗျာစာအုပ်ပါးပါးလေးကို သူမ အလွန်ကြိုက်ခဲ့၏ ။

လူတိုင်း နေစရာ အိမ်ရရေး

လူတိုင်း သားသမီးတွေကို

ကျကျနန ကျွေးမွေးရေး

လူတိုင်း လုပ်အားခ အပြည့်ရရေး

ပြီးတော့ မင်းလိုငါလို လူဆင်းရဲချင်း

အုပ်သင်းမကွဲ စည်းရုံးရေးနဲ့

ဝေဖန်တွေးခေါ်ရေး လိုချင်တယ် တဲ့။ ဂျာမန်ကဗျာဆရာ ဗားကော့ဗရက် ၏ ကဗျာသည် တက္ကသိုလ်ဝင်တန်းကျောင်းသူ ဒေ၀ီ၏ ရင်ကို ထိသွားပြီ။ ဒေ၀ီက ပြောသည်။ ဗားကော့ဗရက် ကို မှတ်မှတ်ရရ ရှိခဲ့သော ဒေ၀ီသည် မောင်သစ်တည်(မြသန်းတင့်)ဘာသာပြန်သော ဥရောပခေတ်ပေါ်ကဗျာများ စာအုပ်ကို အရသာတွေ့သွားပြန်၏ ။

- ၂ -

တက္ကသိုလ်ရောက်တော့ ဒေ၀ီကဗျာရေးသည်။ ခေတ်ကြီးအပေါ် မကျေနပ်မှုရှိနေလျှင် ကဗျာထဲမှာ ဖောက်ခွဲချလိုက်၏ ။ သို့မဟုတ် ကဗျာနှင့် ဖောက်ခွဲပစ်သည်။ တော်တော်အရသာရှိ၏ ။ ဒေ၀ီတို့ခေတ်က တက္ကသိုလ်ကျောင်းတံခါးဝသည် ပိတ်လိုက်ဖွင့်လိုက် ပြန်ပိတ်လိုက်။

ဦးဝင်းတင်ဝင်း ၏ အေဗွီမီဒီယာအုပ်စုမှာ ဒေ၀ီသည် ၀င်ရောက်လုပ်ကိုင်၏ ။ မြင်းခြံဘက်က လူတွေ ရှမ်းပြည်နယ်တက်ပြီး လက်ဖက်ခူးသည်ကို မှတ်တမ်းတင်ရိုက်ရ၏။ ထို့နောက် တောင်တွင်းကြီးက နွားပွဲကို ရိုက်ရပြန်သည်။ တောင်သူလယ်သမား ဘ၀၊ နွားများ၏ ရုပ်လက္ခဏာသွင်ပြင်၊ နွားများကို မည်သို့ရောင်းကြ၀ယ်ကြပုံ။ ကင်မရာသမားနှင့် ဒေ၀ီသည် ဦးဝင်းတင်ဝင်း စေလွှတ်သောဒေသဆီသို့ ပြေးကြရ၏ ။

ဇာတ်ညွှန်းတော့ မရေးရ။ အင်တာဗျူး လုပ်ရသည်။ အရုပ်ရိုက်ရသည်။ မော်လမြိုင် သွားရပြန်သည်။ ရော်ဘာစေး ခြစ်တာကို ရိုက်ရပြန်သည်။ ဘီလူးကျွန်း သွားရပြန်သည်။ ရွာလွတ် ။

- ဘယ်နေရာသွားသွား ဒေသခံ စာရေးဆရာကို အရင်ရှာရတယ်။ သူ့ အကူအညီယူရတယ်။ နောက်တော့ အေဗွီမီဒီယာ အုပ်စုမှာ ကိုဦးနဲ့ ဆုံရတယ်။ အဲ့ဒီက တစ်ဖွဲ့လုံးထွက်ခဲ့ကြပြန်တော့ ကိုဦးက လှိုင်သာယာမှာ ဓာတ်ပုံဆိုင်လေး ဖွင့်ဖြစ်တယ်။ - ဒေ၀ီက ပြောသည်။

- ၃ -

၂၀၀၀ မှာ မွေးစားအမေ(အဒေါ်) ဆုံးသည်။ မွေးစားအမေ(အဒေါ်)မှာ အတွင်းပစ္စည်းရှိသည်။ ဒေ၀ီက သော့ကိုင်ရသည်။ အမေမရှိတော့ ဒေ၀ီက အတွင်းပစ္စည်းတွေ ရလိုက်၏ ။ ဒေ၀ီက အလုပ်လုပ်ချင်သည်။

ကင်မရာဝယ်မယ်ဆိုလျှင်လည်း သိန်းလေးဆယ်ကျော်၏ ။ အတွင်းပစ္စည်းက ကင်မရာမ၀ယ်နိုင်။ ဒေ၀ီစာအုပ်ထုတ်သည်။ - အလှအပနှင့် ဖက်ရှင် - မဂ္ဂဇင်းစာအုပ်ကို ဒေ၀ီ၏ ပိုက်ဆံနှင့် ထုတ်သည်။ အလှပြင်လေ့ မရှိသော ဒေ၀ီ ၊ အလှအပ ပစ္စည်း သုံးစွဲလေ့မရှိသော ဒေ၀ီ ။ အလှအပနှင့်ဖက်ရှင် မဂ္ဂဇင်းကို ကိုယ်တိုင်လစဉ်ထုတ်ဝေပြီး၊ ကိုယ်တိုင်နာမည်မျိုးစုံနှင့်ရေးသည်။ အလှပြင်နည်းမျိုးစုံ ။ ကြော်ငြာလည်း ကိုယ်တိုင်လိုက်သည်။ ကြော်ငြာတွေ ရသည်။ ပိုက်ဆံတွေ ရသည်။ ရန်ကုန်လမ်းညွှန်ဆန်ဆန် စာအုပ်ကို ထုတ်ပြန်သည်။ အောင်မြင်သည်။

- ကျွန်မ မပျော်ဘူးဖြစ်နေတယ်။ စာအုပ်အောင်မြင်တယ်။ ကြော်ငြာရတယ်။ ပိုက်ဆံရတယ်။ မပျော်ရွှင်ဘူး။ ဘာလို့လဲ ။ လုပ်ရတာ အရသာ မတွေ့ဘူး - ဒေ၀ီကပြောသည်။

၂၀၀၅ မှာ အဖေဆုံးသွားပြန်သည်။ သမီးတစ်ယောက်တည်းဆိုတော့ မိဘ၏ ပစ္စည်းကို ဒေ၀ီ ပိုင်ပိုင်ရလိုက်ပြီ။

လက်ထဲမှာ ပိုက်ဆံရှိပြီ။ ဘာလုပ်မလဲ........

ကင်မရာတစ်လုံးဝယ်သည်။ ၂၀၀၆ မှာ ကိုဦးနှင့်လက်ထပ်လိုက်သည်။ မှတ်မှတ်ရရ ၊ မတ်လ(၂၇) ရက်၊ တော်လှန်ရေးနေ့ ၊ ကိုဦးမှာလည်း ဗီဒီယိုကင်မရာတစ်လုံးရှိသည်။ ဒေ၀ီမှာလည်း ဗီဒီယိုကင်မရာတစ်လုံးရှိသည်။ ကိုဦးကတော့ အလှူတွေ ၊ မင်္ဂလာဆောင်တွေ ရိုက်ကူးပြီး ပိုက်ဆံရှာနေပြီ။

- ၄ -

၂၀၀၆ မှာ Yangon Film School ရှိနေတာကို ဒေ၀ီသိရပြီ။ Filmmaker သင်တန်းကျောင်းရှိသည်။ တစ်နှစ်မှာ ကျောင်းသားကျောင်းသူဆယ့်နှစ်ယောက် ရွေးချယ်ပြီး ဟိုတယ်တစ်ခုမှာ အခမဲ့ သင်ကြားပေး၏ ။ ကင်မရာများကို စိတ်ကြိုက်သုံးစွဲခွင့်ရသည်။ ဂျာမန်ဆရာမ လင်ဆီးမယ်ရီဆင်(Linsey Merrison) က ရုပ်ရှင်ပညာကို သင်ကြားပေးသည်။ How To Make The Documentary ဘာသာရပ် ။

Documentary(မှတ်တမ်းရုပ်ရှင်) ကို ဘယ်လောက်ရူးသွပ်သလဲ။ အရေးကြီးဆုံးက ရူးသွပ်ဖို့။ မှတ်တမ်းရုပ်ရှင် ရူးသွပ်သူများကို ဂျာမန်ရုပ်ရှင်ဆရာမ လင်ဆီးမယ်ရီဆင် က အလိုရှိသည်။

ဒေ၀ီသည် ၀င်ဒါမီယာထဲက ဟိုတယ်တစ်ခုမှာဖွင့်လှစ်သော Yangon Film School သို့တက်ခွင့်ရသွားပြီ။

- ကျွန်မ ကဗျာတွေ ၊ ၀တ္ထုတွေ ရေးခဲ့ဖူးတယ်။ ဒါပေမဲ့ ဒီလောက်ကြီးမရူးသွပ်ဘူး။ ကျွန်မရူးသွပ်တာ အရုပ်ပဲ။ ရုပ်ရှင်ပဲ ။ အဲဒါကို ကျွန်မ တွေ့ရှိသွားတယ်။ ရုပ်ရှင်မှာလည်း ကျွန်မက မှတ်တမ်းရုပ်ရှင်ကို ရိုက်ချင်တာ။ -

ဒေ၀ီသည် လှုပ်နေသော အရုပ်များကို ဖန်တီးချင်သည်။ ကျောင်းက မြန်မာသင်တန်းသူ သင်တန်းသားများကို စရိတ်ငြိမ်း မှတ်တမ်းရုပ်ရှင်ပညာ သင်ကြားပေးမည်။ မှတ်တမ်းရုပ်ရှင်ကို ဆက်လက်ရူးသွပ်နေရမည်။ ဆက်လက်ဖန်တီးနေရမည်။

အရေးအကြီးဆုံးက မြန်မာသင်တန်းသားများသည် ကိုယ့်မြန်မာပြည်ကို စွန့်ခွာသွားသူ ၊ စွန့်ခွာလိုသူ မဖြစ်ရ ၊ မြန်မာပြည်ကို ချစ်သူ၊ မြန်မာ့အရေးကို ချစ်သူ။ မြန်မာ ပြည်တွင်းမှာ နေရမည်။ ထိုသို့ ဂျာမန်ဆရာမကို ကတိပေးရ၏ ။

- ၅ -

- ကျွန်မတို့ကို ဂျာမန်ဆရာမ လင်ဆီးမယ်ရီဆင်က ရဲရဲရိုက်ခိုင်းတယ်။ ကင်မရာပစ္စည်း၊စက်ပစ္စည်းတွေကို ရဲရဲတင်းတင်း ကိုင်တွယ် အသုံးပြုခိုင်းတယ်၊ ကိုယ်ကိုင်လို့ ပျက်သွားလည်း ပြဿနာမရှိဘူး - ဒေ၀ီက ပြောသည်။

ဆရာမကပင် NGO များသို့သွားပြီး သူမ၏ ရုပ်ရှင်သင်တန်းသူသင်တန်းသားများအတွက် အလုပ်များရှာပေးသည်။

-ကျွန်မတို့ဆရာမက မျက်နှာဖြူဆိုတော့ ပြည်တွင်းပြည်ပ NGO တွေက ယုံကြည်မှုရှိတယ်။ ဆရာမကလည်း သူ့အရှိန်အ၀ါနဲ့ ရဲရဲတင်းတင်း ၀င်တယ်။ ကျွန်မတို့ အတွက် တာဝန်ယူပေးတယ်။ပိုက်ဆံရလာရင် ကိုယ်က တစ်ဝက်ရတယ်။ Yangon Film School ကို တစ်ဝက်ခွဲဝေလှူရတယ် -

NGO သည် Project တစ်ခုကို ရိုက်ကူးကာ အလှူရှင်ထံဆီမှ ငွေကြေးဖော်ဆောင်ရ၏ ။ ဒေ၀ီတို့မှာ သီအိုရီအရ Research ရှိသည်။ Film Making ရှိသည်။ သုတေသနက ရက်သတ္တတစ်ပတ်။ ရိုက်ကူးရေးက တစ်ပတ်။ သုတေသန နှင့် ရိုက်ကူးရေးအကြားမှာ Treatment ဆိုတာရှိသည်။ ဇာတ်ညွှန်းပြုစုမှုသဘောဖြစ်သည်။

- ကျွန်မတို့ သင်ခဲ့ရတဲ့ သီအိုရီအရ သုတေသနမှာ ဇာတ်ကောင်နဲ့ စကားပြောရတယ်။ Conversation လုပ်တယ်ပေါ့။ အဲ့ဒီ Research မှာ မေးခွန်းကို ကုန်အောင် မမေးရဘူး။ Big Question ကို keep လုပ်ထားရတယ် -

အချက်အချာအကျဆုံး ၊ အထိမိဆုံး၊ အရေးကြီးဆုံး မေးခွန်းသည် လက်နက်ကြီးဖြစ်သည်။ လက်နက်ကြီးက တကယ့်ရိုက်ကွင်းထဲမှာ ကင်မရာထောင်ပြီးထိအောင်ပစ်ရသည်။

- ဆူနာမီဖြစ်တယ်။ ဆူနာမီအလွန်မှာ ရေလုပ်သားဟာ ကုန်းကောက်စရာမရှိအောင် မွဲသွားတယ်။ NGO က ကူညီပံ့ပိုးတယ်၊ ဟာ.. Thank you very much ပေါ့။ NGO ကို အရမ်းကျေးဇူးတင်တယ်ပေါ့။ အဲ့ဒါကို ရိုက်ပြရတယ်။ NGO က ဒါကို ပြပြီး Donar (အလှူရှင်) ဆီက ငွေကြေးထွက်လာအောင်လုပ်မယ်၊ အဲဒီလို -

ဒေ၀ီက ငယ်ရွယ်သူ ၊ ဒေ၀ီက အမှန်တရားကို လိုလားသူ ၊ ဂျာမန်ဆရာမ၏ သီအိုရီကလည်း ခေါင်းထဲမှာ အပြည့် ။

- တစ်ခါက ပြဿနာတက်တာပေါ့၊ ရိုက်ကွင်းမှာ တံငါသည်က Complain တက်ရော။ ကျွန်မက အဆင်ပြေတယ် မဟုတ်လား မေးတယ်။ အဆင်မပြေပါဘူး ဆရာမရယ်တဲ့၊ သူတို့ပေးတဲ့ လှေက ကောင်းလည်း မကောင်းဘူး၊ နောက်ပြီး ရာသီဥတုက ဖောက်ပြန်နေတယ်၊ လှေက အလကားပေးထားတာ မဟုတ်ဘူး။ အရစ်ကျ ပြန်ဆပ်ရမှာ ၊ ကျွန်တော်တို့ ဘယ်လိုဆပ်နိုင်မလဲတဲ့ -

ဒေ၀ီသည် Research မှာ မေးခွန်းအကုန်မမေးခဲ့ ။ (သီအိုရီအရ)

အခုတော့ ရိုက်ကွင်းမှာ ပြဿနာတက်ပြီ။ အဖုအထစ်ဖြစ်ရပြီ။ ဒေ၀ီမျက်လုံးပြူးရသည်။ ကင်မရာက ရိုက်ပြီ။ ထိုအဖြစ်အပျက်သည် လပွတ္တာမှာ ဖြစ်ခဲ့သည်။ အခွေကြမ်းကို ဆရာမထံပြကြည့်သည်။

- ဒီလို Conflict မျိုးက ရှိကိုရှိရမယ်။ ဒါဟာ အမှန်ပဲ။အားလုံးကောင်းပါတယ်ဆိုတာ မဖြစ်နိုင်ဘူး။ဒေ၀ီ မင်းမှန်တယ်၊ ကောင်းတယ် -

ဆရာမက ဒေ၀ီဘက်က ရပ်တည်သည်။သို့သော် အလုပ်အပ်သော NGO တာဝန်ခံ မြန်မာအမျိုးသမီးကြီးက မကြိုက်ပေ။ သို့သော် နိုင်ငံခြားသို့ အခွေပို့လိုက်သောအခါ နိုင်ငံခြားက လက်ခံသည်။ ပြဿနာမတက်ပါ။

- ကျွန်မက နောက်တော့ Client ရဲ့ need ကို နားလည်သွားတယ်၊ ဒေသခံ၊ သဘာဝဘေးအန္တရယ် ခံစားရသူရဲ့ ခံစားချက်ကိုလည်း နားလည်ပေးရတယ်၊ ရိုက်ကူးရေးမှာ Client လိုချင်တာလုပ်ပေးမယ်၊ ဒေသခံရဲ့ ခံစားချက်ကိုလည်း လျစ်လျူမပြုချင်ဘူး၊ ကျွန်မ ဆရာမကြီးဆီ တင်ပြပေးပါ့မယ်။ ခံစားချက်ကို သီးသန့်ပြောပါ၊ ရိုက်ကွင်းမှာ မပြောပါနဲ့၊ ဟိုကျ သူတို့ Feeling ကိုလည်း သီးသန့်တကယ်တင်ပြပေးပါတယ်။ အလုပ်ကို အဲလိုလုပ်တော့ ကျွန်မ project တွေ အများကြီး ရလာတယ်။ ကင်မရာကောင်းတာ ကိုယ်တိုင်ဝယ်နိုင်လာတယ်။ ကိုဦးကလည်း တစ်ဖက်က ကင်မရာတစ်လုံးနဲ့ ငွေရှာတယ်၊ အဲ့လို ကျွန်မ ငွေရှာတတ်လာတယ် -

ဒေ၀ီတို့ ဇနီးမောင်နှံသည် ကင်မရာကိုယ်စီနှင့် အရုပ်တွေ ဖန်တီးရတာကို ကျေနပ်ပျော်ရွှင်သည်။ ကင်မရာနှင့် ကိုယ့်တိုင်းပြည်ထဲက အဖြစ်အပျက်များကို မှတ်တမ်းတင်ရတာကိုလည်း ၀ါသနာထုံသည်။

(အခု ဒေ၀ီက ကိုရဲလွင်ကို Documentary ရိုက်နေသည် )

- ၆ -

ဒေ၀ီသည် မင်းကွန်းသို့ရောက်စဉ်မှာ ပုထိုးတော်ကြီးဘုရားအနီးက လက်ဖက်ရည်ဆိုင်မှာ ထိုင်သည်။ တစ်ဖက်စားပွဲမှာ လူနှစ်ယောက် ထိုင်နေသည်။ တစ်ဦးကို မြင်ဖူးသည်။ ဇော်ဝင်းထွဋ် က ဆီဒိုးနားဟိုတယ်မှာ ပန်းချီပြပွဲလုပ်ပေးခဲ့ဖူးသော ပန်းချီ ဆရာ ရာဟုလာ ။

ဒေ၀ီက သွားနှုတ်ဆက်သည်။

- ကျွန်မက ရန်ကုန်က ရှင်ဒေ၀ီပါ။ ဆရာက ပန်းချီဆရာ ရာဟုလာ မဟုတ်လား -

- ဟား ဟား ဟား ဟား -

ရာဟုလာကရယ်သည်။

ဒေ၀ီနှင့် ရာဟုလာ စကားတွေ ပြောကြသည်။ ရာဟုလာက သူ့အိမ်ကလေးသို့ ဒေ၀ီကို ခေါ်သွားသည်။ သူ့ ပန်းချီကားတွေကို ပြသည်။

- ရာဟုလာက ပန်းချီဆရာထဲမှာ နာမည်ကြီးလှတဲ့သူတော့ မဟုတ်ဘူး ဒါပေမဲ့ သူ့မျက်နှာ၊ သူ့အမူအရာ၊ သူ့ဖော်ပြချက်၊ သူ့စကားပြောဟန်တွေက ကျွန်မကို ညှို့ ခဲ့ပြီ၊ ရန်ကုန်ရောက်တော့လည်း ကျွန်မသူ့ကို သတိရနေတယ်။ ကျွန်မ ရာဟုလာကို Documentary ရိုက်ချင်တယ် -

ဒေ၀ီနှင့် ကိုဦးမှာ ကိုယ်ပိုင်စုဆောင်းငွေတချို့ ရှိသည်။ ငွေကို စုစည်းသည်။ ကျောင်းက ကင်မရာတွေ ၊ အသံပိုင်းဆိုင်ရာပစ္စည်းတွေ ငှားရမ်းသည်။ ကင်မရာသမားက တေးရေးမောင်သစ်မင်းရဲ့သား သိဒ္ဓိ ။ အသံပိုင်းဆိုင်ရာကိုလည်း Yangon Film School မှ သူငယ်ချင်းကိုပဲ အကူအညီတောင်းရသည်။

- နင်တို့အလကားရိုက်ပေး၊ အသံဖမ်းပေးရမယ်၊ ငါက စရိတ်ခံမယ်။ ထမင်းကျွေးမယ်။ -

သိဒ္ဓိတို့က ကူညီကြသည်။ အိုကေနော်အိုကေ ။

- အဲ့ဒီလိုနဲ့ မင်းကွန်းက ရာဟုလာဆီ ကျွန်မတို့ အကြိမ်က်ြမ်ရောက်ဖြစ်တယ်။ ရာဟုလာကို ရိုက်ဖြစ်တယ်။ ကိုဦးနဲ့လည်း ရောက်တာပဲ။ ရာဟုလာက ကင်မရာရဲ့သဘောကို နားလည်တော့ ရိုက်ရတာ အရမ်းအဆင်ပြေပါတယ်။ မင်းကွန်းရဲ့ Atmosphere ကိုလည်းကျွန်မက ပါအောင်ထည့်တယ်။ Location and Composition ကလည်း သဘာဝကျကျကောင်းနေတာ - ဒေ၀ီက ပြောသည်။ ရာဟုလာကို ရိုက်ရာမှာ Portrait အနုပညာအပြင် Observation အနုပညာပါ ရောမွှေထား၏ ။ ရှင်ဒေ၀ီ သည် ရာဟုလာ ၏ Portrait ကို An Untitle Life အမည်ဖြင့် အောင်မြင်စွာ ရိုက်ကူးလိုက်နိုင်သည်။ ရာဟုလာ၏ ဘ၀နှင့် အတူ မင်းကွန်းကိုပါ ကျွန်တော်တို့ ခံစားခွင့်ရ၏။

မြန်မာပြည်သို့ အစိုးရမဟုတ်သော ပြည်ပအဖွဲ့အစည်းတခုက ကိုယ်စားပြုရောက်ရှိ်နေသော ဂျာမန်တစ်ဦးဖြစ်သူ မစ္စတာ ပေါလ် က ရှင်ဒေ၀ီ ၏ ရာဟုလာ Documentary ကိုကြည့်ရ၏ ။ ပေါလ်က အရမ်းကြိုက်သွားသည်။

ရှင်ဒေ၀ီက ကိုယ့်ပိုက်ဆံနှင့်ကိုယ် ရိုက်မှန်း ပေါလ်က သိသွား၏ ။ ပေါလ်က ကူညီအားပေးချင်သည်။

- ဒါ ငါတို့ အဖွဲ့ထဲက ငွေကြေးနဲ့နိုင်သမျှ ကူညီမယ်၊ အကုန်တော့မပေးနိုင်ဘူး - ပေါလ်က တောင်းတောင်းပန်ပန်ပြောသည်။ ဒေ၀ီကလည်း ဘာမှ မတောင်းဆိုပါ။ ပေါလ်က တောင်းတောင်းပန်ပန်ပြောနေ၏ ။ သူ့ရုံးခန်းဆီသို့ ပြန်သွားပြီး ဆယ်မိနစ်အကြာမှာ ပေါလ်က ဖုန်းဆက်၏ ။

- ဒေ၀ီ အဲ့ဒီ မှတ်တမ်းအတွက် ငါတို့က ဒေါ်လာ ၇၅၀ ကူညီမယ်၊ ကုန်ကျစရိတ်အပြည့်မပေးနိုင်တာ ခွင့်လွှတ်ပါ -

ဒေ၀ီ ပျော်သွားသည်။ - ဟေ့...ပိုက်ဆံရပြီကွ -

ဒေ၀ီက ဖုန်းနားထောင်အပြီးမှာ လက်နှစ်ဖက် ဆန့်တန်းပြီး အော်ဟစ်လိုက်၏ ။ - ဒေ၀ီနင်ရူးသွားပြီလား -

- ဟုတ်တယ် ၊ ငါရူးသွားပြီ ၊ ငါလုပ်ချင်တာ လုပ်တဲ့ အလုပ်က ပိုက်ဆံရပြီ၊ ကင်မရာသမားရော၊ အသံသမားရော ဒီပိုက်ဆံထဲက ငါခွဲဝေပေးမယ် ၊ ပိုက်ဆံကို ချန်ထားပြီး နောက်တစ်ကားရိုက်ဦးမယ် -

Camera-Man နဲ့ Sound-mixer ကလည်း ၀မ်းသာသွားကြသည်။ ဒေ၀ီက မုန့်တွေလည်း ကျွေးသည်။

ဒေ၀ီသည် ရာဟုလာ Documentary ကို နိုင်ငံတကာရုပ်ရှင်ပွဲတော်များစွာသို့ တင်သွင်းခွင့်ရသည်။ ၂၀၀၇ မှာ ဂျာမနီ ၊ ၂၀၀၉ မှာ ကိုရီးယား၊ ၂၀၁၀ မှာ ထိုင်းနိုင်ငံ ... ။ ရုပ်ရှင်ပွဲတော်များသို့ ဒေ၀ီကိုယ်တိုင်တက်ရောက်ခွင့်ရခဲ့သည်။ ဂျာမန်ကြီးပေါလ်ကလည်း နိုင်ငံတကာရုပ်ရှင်ပွဲတော်များနှင့် ဒေ၀ီ့ကို ချိတ်ဆက်ပေးသည်။ International Documentary Festival များမှာ ရှင်ဒေ၀ီ၏ ရာဟုလာ က လှပနေသည်။

ကိုရီးယား EBS အသံလွှင့်ဌာနက ရာဟုလာ ကို ကြိုက်သွားပြန်သည်။ ကိုရီးယားစာတန်းထိုး၍ သူတို့ အသံလွှင့်ဌာနက ပြသသည်။ ဒေ၀ီကို ဒေါ်လာ ၅၀၀ ပေးပြန်သည်။ ရာဟုလာ Documentary က ဒေ၀ီက ပိုက်ဆံရပြန်ပြီ။ ကိုရီးယား ၊ တရုတ် ၊ အီတလီ ၊ ပြင်သစ် ၊ ဂျာမနီ ရုပ်ရှင်ပွဲတော်များမှာ ရာဟုလာ လှပခဲ့သည်။

- အဘ ဦးရာဟုလာကိုလည်း ရိုးသား ဖြူစင်လို့ ဆိုပြီး ကျွန်မရဲ့ နိုင်ငံခြားသား မိတ်ဆွေတွေ၊ ကျွန်မရဲ့ နိုင်ငံခြားသူ ဆရာမတွေက ချစ်သွားတယ်။ ကျွန်မကတော့ အဲ့ဒီ Documentary ကို အရသာရှိအောင် ရိုက်ကူးနိုင်ခဲ့တယ် ပြောရမှာပေါ့ -

ရုပ်ဝတ္ထုမကြွယ်ဝသော်လည်း အနုပညာရှိပြီး စိတ်ချမ်းသာနေသူ ရာဟုလာကို ဒေ၀ီက အရုပ်တွေ လှုပ်နေအောင် ရိုက်ပြခဲ့ပြီ။ ရှင်ဒေ၀ီကြောင့် မင်းကွန်းက ပန်းချီဆရာ ရာဟုလာ ကို ကမ္ဘာက သိသွားသည်။ ဘ၀မှာ ဘာမှမရှိ။ ပန်းချီရှိပြီး ခမ်းနားနေသော ရာဟုလာ။ ရှင်ဒေ၀ီသည် ရာဟုလာကို ရုပ်ရှင်ပညာဖြင့် ကမ္ဘာသို့ ပို့နိုင်ခဲ့၏။

- ၇ -

ရှင်ဒေ၀ီ နောက်ထပ်ရိုက်ကူးသော မှတ်တမ်းရုပ်၇ှင်မှာ အာနန္ဒာဘုရားပွဲမြင်ကွင်းဖြစ်သည်။ - ဘုရားပွဲတော် သွားစို့နော် -( On Holiday ) ဟု အမည်ပေးထား၏ ။ ၂၀၀၉ မှာ အပြီးရိုက်သည်။ အရောင်နှင့် အသံပိုင်းကို ဂျာမနီမှာ အချောကိုင်၏ ။

မြန်မာများသည် ဘယ်လိုအခြေအနေမှာ ဖြစ်စေ၊ ပျော်ပျော်ရွှင်ရွှင်နေထိုင်တတ်သော လူ့သဘာဝကို ရှင်ဒေ၀ီက ရိုက်ပြထားသည်။ အပူရောင်များ၊ ဖုန်မှုန့်များ၊ လှည်းများ၊ နွားများ ၊ လူများ၊ တောင်တန်း၊ နေ၀န်းနီ၊ လပြည့်ဝန်း၊ ဧရာဝတီ၊ ၁၂-ပွဲဈေးသည်များ၊ ဆွမ်းလောင်းပွဲ၊ သဒ္ဓါတရားများ၊ ယုံကြည်ကိုးကွယ်မှု၊ ဗုဒ္ဓမြတ်စွာ၊ သံဃာတော်များ၊ ရှင်သာမဏေများ ။

ရှင်ဒေ၀ီသည် ကြည့်ရှုသူတိုင်း စိတ်လှုပ်ရှားရင်ခုန်အောင် အာနန္ဒာဘုရားပွဲတော်ကို ရိုက်ကူးပြခဲ့သည်။ ပုဂံဝန်းကျင်မှာ ကျေးရွာသူ၊ကျေးရွာသားများသည် သေရမှာကို မကြောက်၊ အာနန္ဒာ ဘုရားပွဲတော်ကို တစ်နှစ်တစ်ခေါက်မရောက်လိုက်ရမှာကို အရမ်းကြောက်ကြသည်။ ထိုအတွေးအခေါ်ကို ကျွန်တော်တို့တွေ့မြင်ကြရသည်။

- ၈ -

တရုတ်မလေးနှင့် တူသလိုလို၊ ကရင်မလေးနှင့်တူသလိုလို၊အင်းစိန်မှာ ကြီးပြင်းခဲ့သူ ရှင်ဒေ၀ီသည် လုပ်တာကိုင်တာ ဖျတ်လတ်တက်ကြွသည်။ ခေတ်ပြိုင်စာအုပ်စာပေတော်တော်များများကို ဒေ၀ီသိသည်။

- ကျွန်မက ပုဂံအာနန္ဒာဘုရားပွဲကို တက္ကသိုလ်ကျောင်းသူဘ၀ကတည်းက နှစ်တိုင်းသွားတာ၊ အညာဒေသကို ကျွန်မချစ်တယ်။ ဖုန်ထူနေပူလည်း ကျွန်မ ဂရုမစိုက်ဘူး၊ အညာသားတွေ အသားမည်း၊ ဖျင်အကျီင်္ညစ်ထပ်ထပ်ကို ၀တ်ထားတာလည်း ကျွန်မ ကျေကျေနပ်နပ်ကြည့်တတ်တယ်။ အညာသားတွေ အသံဗြဲကြီးတွေနဲ့ ဗြဲဗြဲဗြဲဗြဲ စကားပြောတတ်တာကိုလည်း ကျွန်မ နားထောင်ချင်တယ်။ အညာမှာ နာဂစ်မရှိဘူး။ အညာမှာ စစ်ပွဲတွေ မရှိဘူး။ ဒါပေမဲ့ အညာသူအညာသားတွေလည်း သူတို့ရဲ့ လူမှုဒုက္ခနဲ့ သူတို့ကျော်ဖြတ်နေရတာပဲ။ ကျွန်မကတော့ အညာဒေသကို ၊ အညာသူ အညာသားတွေကို ချန်လှပ်ပြီး ထားနိုင်မှာ မဟုတ်ဘူး၊ အညာသူအညာသားကို ဥပေက္ခာ မပြုနိုင်ဘူး -

- ကျွန်မ ပြီးခဲ့တဲ့ ၂၀၁၀ ရွေးကောက်ပွဲနဲ့ ပတ်သက်ပြီး Documentary ရိုက်ဖို့ ပြင်ဆင်နေပါတယ် -ရှင်ဒေ၀ီက ပြောသည်။

ဂျာမန်ကဗျာဆရာ ဗားတော့ဂရက် ၏ ကဗျာများကို ကြိုက်ခဲ့သော ရှင်ဒေ၀ီ၊

ဂျာမန်ကဗျာဆရာ Hans Magnus Enzensberger ၏ ခေတ်ပေါ်ကဗျာများကို အရူးအမူးနှစ်သက်ခဲ့သော ရှင်ဒေ၀ီ၊

ဂျာမန် ဆရာမ လင်ဆီးမယ်ရီဆင် ထံ တွင် မှတ်တမ်းရုပ်ရှင်ပညာကို သင်တန်းတက်ခွင့်ရခဲ့သည်။

ဂျာမန် လူမျိုး ပေါလ် ကလည်း ရှင်ဒေ၀ီကို ငွေးကြေးရအောင် ကူညီခဲ့သည်။

ဂျာမနီ နိုင်ငံမှ ရုပ်ရှင်ပွဲတော်လည်း တက်ခွင့်ရခဲ့သည်။

ဂျာမနီနှင့်အကျိုးပေးသော တရုတ်သွေးနှောသည့် ရှင်ဒေ၀ီသည် မြန်မာဆန်လွန်းသော အညာသူအညာသားများနှင့် အညာဒေသကို အလွန်ချစ်သည်။

- ကျွန်မ တကယ်ချစ်တာက အညာဒေသက အညာသူအညာသားတွေ၊ ကျွန်မ အင်းဝ ကိုရိုက်ချင်တယ်။ သပိတ်ထုတာတွေ ပါမယ်၊ ဗုဒ္ဓရုပ်ပွားတော်တွေထုတဲ့ စကျင်ရွာကိုလည်း ကျွန်မ ရိုက်ပြချင်တယ် -

ရှင်ဒေ၀ီရိုက်ပြမည့် အင်းဝ နှင့် စကျင်ရွာ ကို ကျွန်တော် ကြည့်ချင်သည်။

Ref: The Real Lives Real Stories

မောင်ကိုကို (အမရပူရ)

ဒါကတော့ အဲ့ဒီမှတ်တမ်းရုပ်ရှင်ပါ။

https://vimeo.com/27902659