အတ္တကို မြင်တွေ့ခြင်း...
Author: lubo601 |
8:59 AM |
No မှတ်ချက် |
ရုပ်ဝတ္ထုပစ္စည်းတိုင်းတွင် အရိပ်များ ရှိပါသည်... ကိုယ့်ကိုယ်တိုင်တွင်လည်း အရိပ်ရှိပါသည်။ အရိပ်ဆိုသည်မှာ ပုံသဏ္ဍာန်သာလျှင် ဖြစ်ပါသည်...။ ကောက်ကြောင်းများသာ ဖြစ်ပါသည်..။ ပီပီပြင်ပြင်ထင်ထင်ရှားရှား မဟုတ်ပါ...။ သို့သော် အရိပ်ဆိုသည်မှာ တကယ်ပင် ရှိပါသည်...။
လူသားတို့တွင် စိတ်၏ဦးဆောင်ရာသို့ ရုပ်သည်လိုက်ပါရသည်....၊ ရုပ်တွင် အရိပ်ရှိလျှင် ရုပ်ကို ဦးဆောင်သော စိတ်တွင်လည်း အရိပ်ရှိရပါမည်....။ ထို့ကြောင့် စိတ်တွင်လည်း အရိပ်ရှိပါသည်....။
ရုပ်၏အရိပ်ကို သာမန်မျက်စိဖြင့် မြင်နိုင်ပါသည်...။ စိတ်၏အရိပ်ကိုကား ပညာမျက်စိဖြင့် သာလျှင် မြင်နိုင်ပါမည်။
လူတို့သည် သာမန်အားဖြင့် ရုပ်ဝတ္ထုများ၏ အရိပ်ကိုပင် မမြင်မတွေ့မိသော... ဂရုမပြုမိသော အချိန်များ များစွာရှိနေခဲ့ရာ.. သတိနှင့်အသိတို့ဖြင့် ကြည့်ရှုရသော စိတ်၏ အရိပ်ကိုကား မြင်နိုင်ရန် လွန်စွာဝေးကွာ လွန်းလှပါသည်....။
စိတ်တွင် အရိပ်များ ရှိပါသည်....။ ထိုအရိပ်များကြောင့်ပင်လျှင် သတိရခြင်း....၊ တမ်းတခြင်း...၊ ကြည်နူးခြင်း..ကျေနပ်ခြင်း စသည့် စိတ်ခံစားမှုများကို ဖြစ်ပေါ်စေခဲ့ခြင်းဖြစ်ပါသည်....။ ထိုအရိပ်များကို ပြန်လည်ပြုပြင်၍ အကောင်းအဆိုးကို ဝေဖန်ပိုင်းခြားခဲ့ကြခြင်းဖြစ်ပါသည်...။
စိတ်၏ အရိပ်များသည်ပင် အတိတ်၊ ပစ္စုပ္ပန်နှင့် အနာဂတ်တည်းဟူသော ကာလ(၃)ပါးကို ဖြစ်ပေါ်စေပါသည်..။
ထိုအရိပ်များ၏ ရိုက်ခတ်မှုသည်ပင် နူးညံ့ခြင်းနှင့် ရက်စက်ခြင်းများကို ဖြစ်ပေါ်စေပါသည်။
အရိပ်များကို ကြည့်၍ပင် အကောင်း အဆိုး၊ လှပခြင်းနှင့် အကျည်းတန်ခြင်းများကို ဖန်တီးကြပါသည်......၊
စိတ်၏ အရိပ်များသည် ဘ၀၏ ရှေ့ဆောင်တရားများပင်ဖြစ်ပါသည်..။ ကိုယ်ပြုခဲ့သမျှ စိတ်၏အရိပ်များကို မှတ်မှတ်သားသားကြည့်ရှုခံစာနိုင်လျှင်.. အတိတ်က အကျည်းတန်ခဲ့သော အရိပ်များကို ပြန်လည်ပြုပြင်၍ လှပသည့် နှစ်သက်သည့် အရိပ်သစ်များကိုဖန်တီးကြပါသည်....။
စိတ်၏ အရိပ်များကို မည်သူဖန်တီးပြုပြင်နေပါသနည်း... ကိုယ် ကိုယ်တိုင်ပင် ဖြစ်ပါ သည်။ တစ်ခဏအတွင်းအဆောတလျင် ဆုံးဖြတ်ခဲ့ခြင်း... စိတ်ရှည်လက်ရှည် သေချာစွာတွေးတော၍ ဆောင်ရွက်ခဲ့ခြင်းစသည့် စိတ်၏စေစားရာဖြင့် ပြုလုပ်ဆောင်ရွက်ခဲ့ကြသမျှ အရိပ်များသည်... ပစ္စုပ္ပန်တွင် မည်သို့ ဖြစ်ပေါ်စေကာမူ... အနာဂတ်တွင် ကွာခြားသောသက်ရောက်မှုများ ကို စီမံပေးစွမ်းပါသည်....။ အရိပ်ဟောင်းလေးများကို တမ်းတချိန်နှင့် ရွံမုန်းချိန်များသည် လူသားတိုင်းတွင် ရှိနေကြပါသည်...။
ထို တမ်းတချိန်နှင့် ရွံမုန်းချိန်လေးများသည် မိမိကိုယ်တိုင်၏ ပြုမူဆောင်ရွက်မှုကြောင့် ဖြစ်လာခဲ့သလို ကိုယ်တိုင် မည်သို့မျှ ပြောင်းလဲရန် မတတ်နိုင်ခဲ့သော အခြေအနေများလည်း ရှိခဲ့ပါသည်။
ထို အရိပ်လေးများသည် ပြုပြင်နိုင်သော အခြေအနေတွင် ရှိသလို မပြုနိုင်သော အခြေအနေတွင်လည်း ရှိနေခဲ့ကြပါသည်...။
ထို့ကြောင့် အနာဂတ် လှပစေဖို့အတွက် စိတ်၏ အရိပ်ကလေးအား မပြတ်မလတ်သော အသိဖြင့် စောင့်ကြည့်နေနိုင်ရန် လိုအပ်မည် ဖြစ်သည်ဟု တွေးတောမိပါသည်...။
သက်ရှိသတ္တ၀ါဖြစ်သော.... အခြေအနေအရပ်ရပ်ကို ပြုပြင်ပြောင်းလဲနိုင်သော... အသိဥာဏ်ရှိသော လူသားဟူသမျှသည်... စိတ်၏ အရိပ်ကလေးများကို ပိုင်ဆိုင်သူများဖြစ်သည်နှင့် အညီ ရှေ့ဆက်၍ လှပသော အရိပ်ကလေးများကို ဖန်တီးနိုင်ကြသူများလည်း ဖြစ်ပါသည်....။
ဘ၀ကွာခြားချက်များအရ လှပသောအရိပ်ကလေးများကို အားလုံးဖန်တီးနိုင်ရမည်ဟု မဆိုလိုပါ...၊ တတ်နိုင်သမျှ... ခွင့်လွှတ်ခြင်း...၊ သည်းခံခြင်း...၊ ကိုယ်ချင်းစာခြင်း...၊ နားလည်ပေးခြင်းနှင့် ပြုပြင်ပေးခြင်း..၊ ပြုပြင်ပေးလိုခြင်း.. ဟူသောမွန်မြတ်သည့် သူတော်ကောင်းတရားတို့အား တတ်နိုင်သမျှ လက်ကိုင်ထား၍ လှပသော အရိပ်ကလေးများကို ဖန်တီးနိုင်ကြလျှင်အစက်ကလေးတစ်စက်မျှသော အရိပ်လှလှလေးများမှသည် ကြီးမားကျယ်ပြန့်သောအရိပ်လွင်ပြင်ကြီးအား ခိုလှုံနိုင်ကြမည် ဖြစ်ပါသည်...။
စိတ်၏ အရိပ်များအား ရုတ်တရက်ကြည့်လျှင် ပီပြင်ထင်ရှားမှုများ မှုံဝါးနေမည်ဖြစ်သော် လည်း သတိထား၍ ကြိမ်ဖန်များစွာ စောင့်ကြည့်လျှင် ကြည်လင်သော ရေအပြင်တွင် မြင်ရသကဲ့သို့ မိမိ၏ စိတ်သဏ္ဍာန်အား ထင်ရှားစွာ မြင်တွေ့ရမည်ဖြစ်ပါသည်...။
ထိုသို့ မြင်တွေ့ရခြင်းသည် အနာဂတ်အတွက် လှပသော ပုံရိပ်များထုဆစ် ဖန်တီးနိုင်ရန် ကုန်ကြမ်းပစ္စည်းရရှိခြင်းပင်ဖြစ်ပါသည်....။ တစ်နည်းအားဖြင့် အတ္တ (Ego) ကို ပြန်လည်မြင်တွေ့ခြင်းပင် ဖြစ်ပါသည်...။ အတ္တကို မြင်တွေ့လျှင်... စွန့်ပယ်ရမည့် စိတ်၏အရိပ်ကို သေချာစွာ မြင်တွေ့ပြီး ဖြစ်ပါသည်။
စိတ်၏ တည်ငြိမ်မှုနှင့် တည့်မတ်မှန်ကန်မှုဟူသာ.... သမာဓိတရားခိုင်မာလာပါက ကြည်လင်သန့်စင်သောစိတ်၏ အရိပ်ကလေးအား ထင်ရှားစွာ မြင်တွေ့၍ လှပသော အနာဂတ်များကို ပုံဖော် ဖန်တီးနိုင်ကြပါစေကြောင်းခင်ဗျား....
ကွန်ဆူးမား (၁၀-၁၁-၂၀၁၂)
- ပြန်လည်မျှဝေပါ
- Facebookသို့
- Twitterသို့
- Google+သို့
- Stumbleသို့
- Diggသို့
0 comments:
Post a Comment