ပြည်ထောင်စု တပ်မတော် နှင့်ပတ်သက်သော အမြင်ယူဆချက်တချို့

by Seaman Nayminthu on Friday, November 2, 2012 at 5:40am 

“ကျွန်တော်တို့ တပ်မတော်ဟာ တိုင်းရင်းသားလူမျိုးပေါင်းစုံ ပါဝင်ဖွဲ့စည်းထားတဲ့ ပြည်ထောင်စုတပ်မတော် ဖြစ်ပါတယ်။ ဒီနေ့တပ်မတော်မှာ ထိပ်ပိုင်းခေါင်းဆောင်တွေက စပြီးတော့ အရာရှိ၊ အရာခံ၊ အကြပ်၊ စစ်သည် တွေထဲမှာ တိုင်းရင်းသားလူမျိုးအားလုံး ပါဝင်ပြီးတော့ DSA များထဲမှာလည်း ရှိကြတာဖြစ်ပါတယ်”

လို့ မပခ တိုင်းမှူး ဗိုလ်မှူးချုပ် ထွန်းထွန်းနောင်ရဲ့ ပြောဆိုချက်အား တုံ့ပြန်ချေးပတဲ့အနေနဲ့

KIO ငြိမ်းချမ်းရေး ဆွေးနွေးရေး ကိုယ်စားလှယ်အဖွဲ့ဝင် ဦးဂျီးနောင်က “ပြည်ထောင်စုတပ်မတော်ဆိုတာ ရှမ်းတွေက တပ်ရင်း ဘယ်နှစ်ရင်းပို့ပါ။ ကချင်တွေက တပ်ရင်းဘယ်နှစ်ရင်း ပို့ပါ။ ကိုယ့်ပြည်နယ်မှာ ကိုယ့်တပ်ရှိမယ်။ အဲဒါက ပြည်နယ်ရဲ့ လုံခြုံရေးတပ်ဖြစ်မယ်။ ကျွန်တော်တို့လိုလားတဲ့ ပြည်ထောင်စုတပ်က အဲလိုပါပဲ။

  DSA မှာ ကချင်တစ်ယောက်တစ်မြီးမှ မပါပါဘူး။ ကရင် တစ်ကောင်တစ်မြီးမှ မပါပါဘူး။ ရှိရင်လည်း သုံးပွင့်အထက် မတက်နိုင်ပါဘူး”  ဆိုပြီး ပြောသွားတာကို နောက်ဆုံးထုတ် Bi Weekly ELEVEN ဂျာနယ်မှာ ဖတ်လိုက် ရပါတယ်။

ကျနော် ကြုံတွေ့မိသလောက်တော့ မြန်မာ့တပ်မတော်ထဲမှာ တိုင်းရင်းသားလူမျိုးစုတွေ အဆင့်အတန်းတိုင်း လိုလိုမှာ တွေ့ရပါတယ်။ အရေအတွက်နည်းတဲ့ ရေတပ်ထဲမှာကို ရှိနေတာပါ။ ကျွန်တော် တပ်ထဲရောက်ခါစ နှစ်မှာ သံအမတ်ဖြစ်သွားတဲ့ ဧရခ ဌာနချုပ်မှူး ဗိုလ်မှူးချုပ် စိန်လွင် ( ခရစ်ယာန်ဘာသာဝင်၊ ကချင်လူမျိုးလို့ သိရ ပါတယ်) နဲ့ နောက် ရခစ (၃၈) စခန်းမှူးအဖြစ်ကနေ အနားယူသွားတဲ့ ဒုတိယဗိုလ်မှူးကြီး လောစောကြိုင် (ခရစ်ယာန်ဘာသာဝင်၊ ကရင်လူမျိုး) တို့ဟာ အရည်အချင်းပြည့်ဝပြီး လက်အောက်ငယ်သားတွေ များစွာ ချစ်ခင်လေးစားမှုရှိတဲ့ ခေါင်းဆောင်တွေလို့ လူသိများပါတယ်။ ဒါ ကျနော်သိသလောက်ပဲ ပြောတာပါ။ အလားတူ တခြားသူတွေ များစွာရှိနိုင်ပါသေးတယ်။

အလားအလာကောင်းတုန်းအချိန်မှာ တချို့တိုင်းရင်းသားလူမျိုးအရာရှိတွေ အငြိမ်းစားပေးခံရတာကို ထောက်ဆကြည့်တဲ့အခါ စဉ်းစားစရာ အချက်တချို့ တွေ့နိုင်ပါတယ်။ ကျနော့်အမြင်ပြောရရင်တော့ အဲဒီလို အငြိမ်းစားပေးခံရသူ အများစုဟာ တိုင်းရင်းသား လူမျိုးဖြစ်လို့ ဆိုတာထက် ယုံကြည်ကိုးကွယ်တဲ့ ဘာသာတရားကြောင့် ဖြစ်နိုင်ခြေပိုရှိတယ်လို့ ယူဆပါတယ်။

မြန်မာ့တပ်မတော်မှာ ဥပဒေ၊စည်းကမ်း တရားဝင်ထုတ်ပြန်ကြေငြာထားခြင်းမရှိဘဲ မသိမသာ နောက်ကောက်ချ လစ်လျူရှုခံနေရတဲ့ ဖြစ်ရပ်တွေ ရှိပါတယ်။ Catch 22 အခြေအနေမျိုး ဖန်တီးထားတယ်လို့ ပြောရင်ရနိုင်မှာပါ။ ၁၉၈၈ နောက်ပိုင်းမှာ ပိုသိသာလာတယ်လို့ ထင်ပါတယ်။

ဗုဒ္ဓဘာသာဝင်မဟုတ်သော အရာရှိတွေ ထိပ်ပိုင်းရာထူးအထိ မရောက်တော့တာတွေ ၊ အင်္ဂလိပ်ဆန်ဆန် မှည့်ခေါ်တဲ့ နာမည်တွေကို မြန်မာနာမည်ပြန်ပြောင်းခိုင်းတာတွေ ( ဥပမာ- စောဗစ်တာ အမည်ကို စောအောင်နိုင်သူ ဆိုပြီး အတင်းအကျပ် ပြန်ပြင်ခေါ်တွင်စေတာ)၊ အိမ်ထောင်မပြုသော လူပျိုအရာရှိများကို ဗိုလ်မှူးကြီး အထက် အဆင့်တိုးမြှင့်မပေးတာတွေဟာ မသင့်လျော်တဲ့ လုပ်ရပ်တွေ လို့မြင်မိပါတယ်။ ရလဒ်ကတော့ အရည်အချင်းရှိတဲ့ ခေါင်းဆောင်တွေ မဆုံးရှုံးသင့်ပဲ လက်လွတ်ဆုံးရှုံးခံရတာပါ။

စစ်ရေးစစ်ရာနဲ့ ခေါင်းဆောင်မှုအရည်အသွေးကို မထိခိုက်စေသော ကိုယ်ရေးကိုယ်တာ ပုဂ္ဂိုလ်ရေးကိစ္စတွေကို ရာထူးတိုးမြှင့်ပေးရေးမှာ ဘေးဖယ်စဉ်းစားသင့်ပါတယ်။

လူတိုင်း လွတ်လပ်စွာ ဘာသာကိုးကွယ်ခွင့် ရှိပါတယ်။ အမည်သညာဆိုတာ သက်ဆိုင်သူ ကာယကံရှင်ရဲ့ လွတ်လပ်တဲ့ ရွေးချယ်မှုပဲဖြစ်သင့်ပါတယ်။ အိမ်ထောင်ပြုခြင်းမပြုခြင်းဟာလည်း လူတဦးချင်းစီရဲ့ ကိုယ်ရေး ကိုယ်တာကိစ္စ ပါပဲ။ တပ်မတော်သားတွေဟာ လူသားတွေဖြစ်လို့ လူ့အခွင့်အရေး၊ နိုင်ငံသားတွေ ဖြစ်တာမို့ နိုင်ငံသားတဦးရဲ့ ရပိုင်ခွင့်တွေ တန်းတူရည်တူ ရရှိခံစားသင့်ပါတယ်။

ပြည်ထောင်စုတပ်မတော်၊ ခေတ်မီဖွံ့ဖြိုးသောတပ်မတော်လို့ ခံယူထားတယ်ဆိုရင် အထက်ကလို မသိမသာ လျစ်လျူရှု နှိမ့်ချတဲ့ လုပ်ရပ်တွေကို ရှောင်ရှားပြီး  ခေါင်းဆောင်သစ်တွေကို တန်းတူရည်တူအခွင့်အလမ်း ပေါ်မှာ အရည်အသွေးအလျောက် ထိုက်ထိုက်တန်တန် ရွေးချယ်ခန့်အပ်သင့်ပါကြောင်း… အကြံပြုလိုပါတယ်။

နေမင်းသူ

၂-၁၁-၂၀၁၂