26.11.2012 နေ့ဖတ်ရန်သတင်းများ

by Myanmar Journal on Sunday, November 25, 2012 at 6:03pm ·

ပရီးမီးယားလိဂ်နဲ့ Sky Net စာချုပ် ချုပ်ဆို

Sky Net ဟာ ၂၀၁၃ ခုနှစ်က စပြီး ၃ နှစ် စာချုပ် ချုပ်ဆို လိုက်တာ ဖြစ်

မြန်မာ နိုင်ငံရဲ့ ပုဂ္ဂလိကပိုင် ထိပ်တန်း ရုပ်မြင် သံကြား ဌာန တခု ဖြစ်တဲ့ Sky Net ရုပ်မြင် သံကြား ဌာနက အင်္ဂလန် ပရီးမီးယားလိဂ် ဘောလုံး ပွဲစဉ်တွေ တိုက်ရိုက် ပြသခွင့် ကန်ထရိုက် စာချုပ်ကို ပရီးမီးယားလိဂ်နဲ့ ချုပ်ဆို လိုက်နိုင်ခဲ့ ပြီလို့ စနေနေ့က ထုတ်ဖေါ် ကြေညာလိုက် ပါတယ်။

အရင်တုန်းက ဆိုရင် ပရီးမီးယားလိဂ် ပွဲစဉ်တွေ အတွက် မြန်မာ နိုင်ငံဟာ တခြား နိုင်ငံတွေနဲ့ တွဲဖက်ပြီး ဝယ်ယူ ရတာ ဖြစ်ပြီး၊ အခုတော့ ပရီးမီးယားလိဂ် ကနေ မြန်မာ နိုင်ငံကို သီးသန့် နယ်မြေ တခု အနေနဲ့ ပွဲစဉ်တွေကို ရောင်းချ ပေးတာ ဖြစ်ကြောင်း Sky Net ရုပ်မြင် သံကြားဌာန ရဲ့ အထွေထွေ မန်နေဂျာ ဦးဝင်းနိုင်က ဘီဘီစီကို ပြောပါတယ်။

ဒါပေမယ့်လို့ ငွေပမာဏ ဘယ်လောက်နဲ့ စာချုပ် ချုပ်ဆို ခဲ့သလဲ ဆိုတာကို တော့ သူက ထုတ်ဖေါ် ပြောဆို ခြင်းမရှိပါ။

မြန်မာနိုင်ငံ အတွက် ကန်ထရိုက်ကို လေလံ တင်ခဲ့တာ ဖြစ်ပြီး Sky Net က ဝင်ရောက် ယှဉ်ပြိုင်ခဲ့ ရတာ ဖြစ်တယ်လို့ ဆိုပါတယ်။

အခု ဆိုရင် Sky Net ဟာ ၂၀၁၃ ခုနှစ်က စပြီး ၃ နှစ် စာချုပ် ချုပ်ဆို လိုက်တာ ဖြစ်ပါတယ်။

အခုလို မြန်မာကို သီးခြား နယ်မြေ တခု အနေနဲ့ ရောင်းလိုက်တာ ဖြစ်တဲ့ အတွက် ပရီးမီယားလိဂ် ပွဲတွေ အားလုံးကို Sky Net ကနေ ထုတ်လွှင့် ပြသလို့ ရပြီ ဖြစ်ပါတယ်။

ဒါပေမယ့်လည်း ပွဲစဉ်တွေကို ရုပ်သံကနေ ကြည့်မယ့် ပရိသတ်တွေ အနေနဲ့ ဘယ်လောက် ပေးရမယ် ဆိုတာ ကတော့ ပြောလို့ မရသေးဘူးလို့ ဦးဝင်းနိုင်က ပြောပါတယ်။

ပါကစ္စတန်မှာ ရှီယာတွေကို ဗုံးခွဲတိုက်ခိုက်

ရှီယာတွေဟာ မွတ်ဆလင်တွေ မဟုတ်ဘူး လို့ တာလီဘန် တွေက ယူဆ ထားကြ

ပါကစ္စတန် နိုင်ငံ အနောက်မြောက် ဘက်ပိုင်းက ရှီယာ မွတ်ဆလင်တို့ ရဲ့ ဘာသာရေး ပွဲ ကျင်းပ နေတဲ့ အနီးမှာ အင်အားပြင်း ဗုံးတလုံး ပေါက်ကွဲ ခဲ့တဲ့ အတွက် လူငါးဦး သေဆုံး သွားပြီး အနည်းဆုံး ၈ ဦးလောက် တော့ ဒဏ်ရာ ရရှိသွား ပါတယ်။

ဒီရာ အစ္စမေးလ် ခမ်း မြို့မှာ ဖြစ်ပွား ခဲ့တဲ့ ဒီပေါက်ကွဲမှုဟာ ဒုတိယ အကြိမ် ဖြစ်ပြီး၊ မနေ့ ကလည်း ဗုံးတလုံး ပေါက်ကွဲ ခဲ့တဲ့ အတွက် လူ ၈ ဦး သေဆုံး သွားရာ အများစုဟာ ကလေးတွေ ဖြစ်ကြ ပါတယ်။

ပါကစ္စတန် တာလီဘန်တွေက ရှီယာတွေကို မွတ်ဆလင်တွေကို ပစ်မှတ်ထား တိုက်ခိုက် ခဲ့တာ လို့ ပြောပါတယ်။ ရှီယာတွေဟာ မွတ်ဆလင်တွေ မဟုတ်ဘူးလို့လည်း တာလီဘန်တွေက ယူဆထား ကြတာ ဖြစ်ပါတယ်။

ရှီယာမွတ်ဆလင်တို့ အထွဋ်အမြတ်ထားတရာ မူဟာရမ် လ လို့ခေါ်တဲ့ အခုလ အတွင်း ဘာသာရေး ပွဲတော်တွေ ကျင်းပနေတာ ဖြစ်တဲ့ အတွက် ပါကစ္စတန် နိုင်ငံ တလွှား တိုက်ခိုက်မှု တွေကို တားဆီး နိုင်ဖို့ အတွက် အခု သီတင်းပတ်ကုန် အချိန် အတွင်း ရဲတပ်ဖွဲ့ဝင်နဲ့ အရံ စစ်သည် အင်အား ထောင်သောင်းချီ ချထားတာ ဖြစ်ပါတယ်။

ယိုင်သည်ရွာ တိုက်ခိုက်မှု စစ်ဆေး

အောက်တိုဘာ လမှာ အဓိကရုဏ်း ပြန်ဖြစ်

ရခိုင်ပြည်နယ် မြောက်ဦးမြို့နယ် ယိုင်သည်ရွာ တိုက်ခိုက်မှုနဲ့ ဆက်စပ်ပြီး ဖမ်းထားတဲ့ ရခိုင် အမျိုးသား (၆) ဦးကို စစ်တွေပို့ပြီး ရမန်ယူ စစ်ဆေး နေတယ်လို့ သိရပါတယ်။

အောက်တိုဘာ ၂၃ နဲ့ ၂၄ ရက်တွေက ယိုင်သည် မွတ်ဆလင် ရွာ မီးရှို့ တိုက်ခိုက်မှုနဲ့ ယိုင်သည် ရွာက ဦးဇော်မိုးနိုင်၊ ဦးဇော်မိုးထွန်း၊ လေးမြို့သား ရွာက ဦးတင်လှ၊ သံရွှင်ပြင်ရွာက ဦးပြေသိန်းအောင်၊ ဦးဦး မောင်ကျော်လှိုင်နဲ့ ဦးမောင်သိန်းတို့ ကို ဖမ်းထားတာပါ။

အခု ရမန် ယူထားဆဲ ကာလမို့ အမှုစွဲတင် တာတော့ မရှိသေးဘူးလို့ စစ်တွေက ရှေ့နေ တဦးက ပြောပါတယ်။

ပုဒ်မ ၄၃၂ ၊ ပုဒ်မ ၃ဝ၂ (၂) နဲ့ ရမန် ၆ ရက် ယူထားပြီး စစ်တွေ မြို့မ ရဲစခန်းမှာ စစ်ဆေးနေပါတယ်။

သူတို့ကို ရမန် ယူပြီးရင် နောက်လဆန်း လောက်မှာ စတရားစွဲ နိုင်တယ်လို့ သိရပါတယ်။

ယိုင်သည် ရွာ တိုက်ခိုက်မှုနဲ့ လူအများအပြား ဖမ်းဆီး ထားပြီး အဲဒီ အထဲက ၆ ဦးကို စစ်တွေ ခေါ်လာပြီး တရားစွဲဖို့ အာဏာပိုင် တွေက စီစဉ်နေတာ ဖြစ်ပါတယ်။

ယိုင်သည်ရွာ မီးရှို့ တိုက်ခိုက်မှုဟာ ရခိုင်ပြည်နယ် အောက်တိုဘာ လ တိုက်ခိုက်မှု တွေထဲမှာ အကြီးကျယ်ဆုံး ဖြစ်ပြီး လူ ၅ဝ နီးပါး သေဆုံးတယ်လို့ သိရပါတယ် ။

ဘင်္ဂလားဒေ့ရှ် အထည်ချုပ်စက်ရုံ မီးလောင်

၅ နာရီကြာလောက် မီးငြိမ်းသတ်ရ

ဘင်္ဂလားဒေ့ရ်ှနိုင်ငံ မြို့တော် ဒက္ကား အထည်ချုပ် စက်ရုံ တခု မီးလောင်လို့ လူ အနည်းဆုံး ၁၁၂ ဦး သေဆုံးသွားပါတယ်။

အခု မီးလောင်တဲ့ ရပ်ကွက်ဟာ ဒက္ကားမြို့တော်ရဲ့ ဆင်ခြေဖုံးမှာ ရှိတဲ့ Ashulia ရပ်ကွက်မှာ ဖြစ်တာပါ။ Tazreen Fashion ဆိုတဲ့ အထည်ချုပ် စက်ရုံမှာ စနေနေ့ ညနက်ပိုင်းက မီးလောင်တာ ဖြစ်ပါတယ်။

မီးကိုလည်း နာရီ အတော်ကြာ ငြိမ်းသတ်ခဲ့ ရပြီး တနင်္ဂနွေနေ့ မနက်မှာတော့ အပျက်အစီး ပုံတွေ ထဲကနေ အလောင်းတွေကို ထပ်မံ တွေ့ရတယ်လို့ မီးသတ် ဌာနက ဘီဘီစီကို ပြောပါ တယ်။

လူတွေ ကလည်း ထောင်နဲ့ချီပြီး မီးလောင်ပြင် အနီးမှာ သူတို့ရဲ့ ဆွေးမျိုးတွေကို လိုက်ရှာ နေကြပါတယ်။

ဘာကြောင့် မီးလောင်တယ် ဆိုတာ ကိုတော့ မသိရသေးပါဘူး။ ဒါပေမယ့် ဝါယာရှော့ ကနေ မီးလောင် တယ်လို့ မီးသတ် ဌာန ကတော့ သံသယ ရှိနေပါတယ်။ ဘင်္ဂလားဒေ့ရ်ှမှာ လျပ်စစ်မီး တပ်ဆင်မှု အဆင့် မမီတာ ကလည်း နှစ်စဉ် မီးလောင်မှု ဖြစ်စေတဲ့ အကြောင်း အရင်း တစ်ခု ဖြစ်ကြောင်း ဒက္ကားက ဘီဘီစီ တင်းထောက်က ပြောပါတယ်။

မီးဟာ မြေညီထပ် ပစ္စည်း သိုလောင်ရုံ ကနေ စတင် လောင်ပြီး အပေါ်ထပ် တွေကို ကူးသွားတာ ဖြစ်ပါတယ်။ လူအများ အပြားက စက်ရုံထဲမှာ ပိတ်ပိပြီး သေဆုံးရ သလို တချို့က ထွက်ပြေး လွတ်မြောက်ဖို့ စက်ရုံ အဆောက် အအုံ ပေါ်ကနေ ခုန်ချရင်း သေဆုံးရတာ ဖြစ်ပါတယ်။ လူအမြောက်အများလည်း ဒဏ်ရာရကြပါတယ်။

ဘင်္ဂလားဒေ့ရ်ှမှာ အထည်ချုပ် စက်ရုံပေါင်း ၄၅၀၀ လောက်ရှိပြီး လူ ၂ သန်း လောက်ကို အလုပ်ပေး ထားနိုင်တဲ့ လုပ်ငန်း ဖြစ်ပါတယ်။ ဒေါ်လာ ဘီလျံနဲ့ချီပြီး ရတဲ့ အထည်ချုပ် လုပ်ငန်းဟာ နိုင်ငံရဲ့ စုစုပေါင်း တင်ပို့မှုရဲ့ ၈၀ ရာခိုင်နှုန်း ရှိပါတယ်။

မီးလောင်တဲ့ စက်ရုံ ကလည်း လမ်းကျဉ်းလေးထဲမှာ ဖြစ်လို့ မီးသတ်ကားတွေလည်း အလွယ်တကူ ဝင်ဖို့လည်း အခက်အခဲ ရှိခဲ့ပါတယ်။ ဘင်္ဂလားဒေ့ရှ် စက်ရုံတွေမှာ အခုလို မီးလောင် တာ သိပ်မဆန်း ပေမယ့် အခုလို လူရာကျော် အထိ သေကျေ ရတဲ့ ဖြစ်ရပ် ကတော့ ဒီရပ်ကွက် ထဲမှာ တခြား ရာနဲ့ ချီတဲ့ စက်ရုံတွေ အတွက်လည်း အလွန် သတိ ထားစရာ ဖြစ်ပါတယ်။

ဒီစက်ရုံတွေ ကနေ ကမ္ဘာကျော် တံဆိပ်တွေနဲ့ ကုမ္ပဏီတွေ ဖြစ်တဲ့ Walmart, Gap, Tesco Sainsburys စတဲ့ သူတွေ အတွက် ထုတ်လုပ်ပေး နေတာ ဖြစ်ပါတယ်။

ဒါကြောင့် ဘင်္ဂလားဒေ့ရ်ှက လုံခြုံဘေးကင်းမှု အနေအထား တွေက မကြာခင် နှစ်ပိုင်းတွေ အတွင်း အဆင့်မြှင့် လာတယ်လို့ ပြောလို့ရ ပေမယ့် စိတ်မချရ သေးဘူး ဆိုတာ ဖော်ပြနေ ကြောင်း ဒက္ကားက ဘီဘီစီသတင်းထောက် Ethirajan Anbarasan က ပြောပါတယ်။

အမျိုးသမီးများအပေါ် အကြမ်းဖက်မှု ပပျောက်ရေးနေ့

အိမ်တွင်း အကြမ်းဖက်မှု ကျူးလွန်သူ အမျိုးသားတွေကိုလည်း ထိထိရောက်ရောက် ပညာပေး ပြောဆိုဖို့ လိုအပ်နေ

နိုဝင်ဘာလ ၂၅ ရက်နေ့မှာ ကျရောက်တဲ့ အမျိုးသမီးများအပေါ် အကြမ်းဖက်မှု ပပျောက်ရေး နိုင်ငံတကာ အထိမ်းအမှတ်နေ့ ကို ကမ္ဘာ တဝှမ်းမှာ ဆင်နွဲ ကျင်းပခဲ့ကြသလို မြန်မာနိုင်ငံမှာလည်း လမ်းလျှောက် ချီတက် ပွဲတွေ၊ ပညာပေး ဆွေးနွေးပွဲတွေ ပထမဆုံး အကြိမ်အဖြစ် ကျင်းပခဲ့ပါတယ်။

ရန်ကုန်မြို့ မြို့တော် ခန်းမရှေ့ကနေ ကန်တော်ကြီး ပန်းခြံအထိ လမ်းလျှောက် ချီတက်တဲ့ အဲဒီပွဲမှာ လူနှစ်ရာလောက် ပါဝင် လမ်းလျှောက်ခဲ့ကြ ပါတယ်။

အိမ်တွင်း ငြိမ်းချမ်းရေးမှသည် ငြိမ်းချမ်းသော ကမ္ဘာဆီသို့ ၊ အမျိုးသမီးများအပေါ် အကြမ်းဖက်မှု ရပ်တန့်ဖို့ အမျိုးသားများ ပါဝင်စို့ ဆိုတဲ့ ဆောင်ပုဒ်အတိုင်း ဒီလမ်းလျှောက်ချီတက်ပွဲမှာ အမျိုးသားတွေလည်း ပါဝင် လမ်းလျှောက် ခဲ့ကြတယ်လို့ သိရပါတယ်။

မြန်မာနိုင်ငံမှာ အမျိုးသမီးတွေ အပေါ် အကြမ်းဖက်မှုတွေ နေရာ အနှံ့အပြား ဖြစ်နေကြောင်း၊ အိမ်ထောင်ရေးအတွင်း၊ လူမှု အသိုင်းအဝိုင်းအတွင်း အမျိုးသမီးတွေအပေါ် အကြမ်းဖက်တာမျိုး စော်ကားတာမျိုးတွေ ရှိနေပြီး အဆိုးဆုံးကတော့ လက်နက်ကိုင် တိုက်ပွဲတွေ ဖြစ်နေရာ ဒေသတွေမှာ အမျိုးသမီးတွေအပေါ် အကြမ်းဖက်မှုတွေ၊ လိင်ပိုင်းဆိုင်ရာ မဖွယ်မရာ စော်ကားမှုမျိုးတွေ ရှိနေတာကြောင့် ဘဝ မလုံခြုံမှုမျိုးတွေ တွေ့ရတယ်လို့ လူ့အခွင့်အရေး ပညာပေးဌာန မြန်မာနိုင်ငံရဲ့ ဒါရိုက်တာ ဦးအောင်မျိုးမင်းက ပြောပါတယ်။

မြန်မာနိုင်ငံမှာ အမျိုးသမီးတွေ အိမ်တွင်း အကြမ်းဖက် ခံရမှုရဲ့ အကြောင်းရင်းခံကို ဆန်းစစ်ကြည့်မယ် ဆိုရင် လင်ယောက်ျားတွေအပေါ် အသားပေးတဲ့ အရိုးစွဲနေတဲ့ ယဉ်ကျေးမှု အဆိုအမိန့်တွေကြောင့် တကြောင်း၊ အိမ်ထောင်ရေး ပြဿနာတွေကို သူတပါးကို ဖွင့်ဟ ထုတ်ဖေါ်ပြောလေ့ မရှိတာတွေကြောင့် တကြောင်း ဖြစ်တယ်လို့ ဆိုပါတယ်။

ဒီအချက်တွေကို ပြင်ဆင်နိုင်ဖို့ ပညာပေးမှုတွေ လိုအပ်နေကြောင်း၊ ဒါပေမယ့် အမျိုးသမီးတွေကိုပဲ ပညာပေး ပြောဆိုတာမျိုးမလုပ်ပဲ အကြမ်းဖက်မှု ကျူးလွန်သူ အမျိုးသားတွေကိုလည်း ထိထိရောက်ရောက် ပညာပေးတာမျိုးတွေ လုပ်ဖို့ အများကြီး လိုနေသေးတယ်လို့ ဦးအောင်မျိုးမင်းက ဘီဘီစီကို ပြောပါတယ်။

အီဂျစ်သမ္မတဆန့်ကျင် ဆန္ဒပြပွဲတွေ ဆက်လက်ဖြစ်ပွား

တနင်္ဂနွေနေ့ အစောပိုင်းက ၂၀၁၁ ခုနှစ်က အီဂျစ်သမ္မတ မူဘာရတ်ကို ဖြုတ်ချခဲ့တဲ့ လူထု အုံကြွမှု အစပျိုးခဲ့ရာ မြို့တော်ကိုင်ရိုက Tahrir ရင်ပြင်မှာ ဆန္ဒပြသူတွေ စုရုံးပြီး ရဲတပ်ဖွဲ့ဝင်တွေကို ကျောက်တုံးတွေနဲ့ ပစ်ပေါက်ခဲ့ကြပါတယ်။ လက်ရှိသမ္မတ မော်စီရဲ့ လုပ်ပိုင်ခွင့် အာဏာ တိုးမြှင့် လိုက်တာကို ဆန္ဒပြခဲ့တဲ့ ၃ ရက်မြောက်နေ့မှာ ရဲတပ်ဖွဲ့ဝင်တွေကလည်း ဆန္ဒပြသူတွေကို မျက်ရည်ယိုဗုံးတွေ သုံးပြီး ပစ်ခတ်နှိမ်နင်းခဲ့ကြပါတယ်။

တရားဥပဒေ လုပ်ပိုင်ခွင့်ကို ကျော်လွန်တိုးမြှင့်လိုက်တဲ့ သမ္မတမော်စီရဲ့ လုပ်ပိုင်ခွင့် အာဏာသစ်နဲ့အတူ အထက်လွှတ်တော် စုရုံးခွင့်နဲ့ အခြေခံဥပဒေအသစ် ရေးသားခွင့်တွေကို လွှမ်းမိုးချုပ်ကိုင်ထားတဲ့ အစ္စလာမ် အဖွဲ့တွေကို အကာအကွယ်ပေးတဲ့ အာဏာကိုလည်း တိုးချဲ့လိုက်တာ ဖြစ်ပါတယ်။ တရားရေးဆိုင်ရာ စဉ်းစားဆုံးဖြတ်ခွင့်ကို ကျော်လွန် လုပ်ပိုင်ခွင့်ပေးထားတဲ့ လုပ်ပိုင်ခွင့် အာဏာအသစ်ကိစ္စ ဆွေးနွေးဖို့အတွက် သမ္မတ မိုဟာမက်မော်စီ ဟာ ဒီကနေ့ တနင်္လာနေ့မှာ နိုင်ငံရဲ့ အမြင့်ဆုံး တရားရေးအာဏာပိုင်တွေနဲ့ တွေ့ဆုံမယ်လို့ အီဂျစ် နိုင်ငံပိုင်သတင်းတွေက ဖော်ပြကြပါတယ်။

တနင်္ဂနွေနေ့ ကတော့ အီဂျစ်နိုင်ငံမှာ နိုင်ငံရေး ပဋိပက္ခတွေကို ရှောင်ရှားနိုင်ဖို့ ညှိနှိုင်းဆွေးနွေးကြမှာ ဖြစ်တယ်လို့ နှစ်ဘက်စလုံးက ပြောဆိုပါတယ်။ သမ္မတရဲ့ လုပ်ပိုင်ခွင့် အာဏာသစ်ဟာ နိုင်ငံအချုပ်အခြာအာဏာနဲ့ ပတ်သက်တဲ့ ကိစ္စတွေအတွက်သာ သုံးသင့်တယ်လို့ ဗဟိုတရားရေးကောင်စီက ပြောဆိုပါတယ်။ ဒီအဖွဲ့ရဲ့ ကြေညာချက်ကို ရုပ်မြင်သံကြား ကနေ ဖော်ပြရာမှာတော့ အတိအကျ တင်ပြတာမျိုး မရှိပေမဲ့ လုပ်ပိုင်ခွင့်နဲ့ပတ်သက်လို့ တိုက်ရိုက်ပယ်ချတာမျိုး မရှိပါဘူး။ တရားသူကြီးတွေနဲ့ အစိုးရရှေ့နေတွေ အပါအ၀င် သပိတ်မှောက် ဆန္ဒပြသူတွေ အလုပ်ခွင် ပြန်ဝင်ကြဖို့ကိုလည်း ဒီကြေညာချက်က တိုက်တွန်းလိုက်ပါတယ်။သမ္မတမော်စီကတော့ ဒါဟာ ယာယီသာဖြစ်ပြီး သူ့အနေနဲ့ နိုင်ငံရေး အဖွဲ့အစည်းတွေနဲ့ ဆွေးနွေးပြောဆိုမှုတွေ လုပ်မှာပါလို့ ထပ်တလဲလဲ ကတိပြု ပြောဆိုခဲ့ပါတယ်။

အီဂျစ်နိုင်ငံရဲ့ အစုရှယ်ယာ ဈေးကွက်မှာတော့ လမ်းမပေါ်ဆန္ဒပြမှုတွေ ဖြစ်ချိန်ကစလို့ စနေနေ့ ဈေးဖွင့်ချိန်မှာ ဈေးမငြိမ်ဘဲ ၁၀ ရာခိုင်နှုန်းလောက် အတက်အကျ ဖြစ်သွားခဲ့ပါတယ်။ မနှစ်က သမ္မတဟောင်း မူဘာရက် ရာထူးက ဖြုတ်ချခံရပြီးကတည်းက ဖြစ်ခဲ့တဲ့ မတည်ငြိမ်မှုတွေထဲမှာ အကြီးမားဆုံးလို့ဆိုရမယ့် ငွေလဲနှုန်း ဆုံးရှုံးမှုလည်း ဖြစ်ပေါ်ခဲ့ပါတယ်။

ဝန်ကြီးဦးအောင်မင်း လက်ပန်းတောင်းတောင် သပိတ်စခန်းကို သွားရောက်

လက်ပန်းတောင်းတောင် ကြေးနီစီမံကိန်း ရပ်တန့်ရေးအတွက် ဒေသခံတွေက သပိတ်စခန်းတွေ ဖွင့်ပြီး တောင်းဆိုမူတွေ လုပ်ဆောင်နေတာကို ပြည်ထောင်စုဝန်ကြီး ဦအောင်မင်းနဲ့အဖွဲ့  သောကြာနေ့ကပဲ လာရောက် တွေ့ဆုံသွားခဲ့ပါတယ်။ ဒီလို လာရောက်မှုဟာ အခြေအနေကို လာရောက်စုံစမ်းတာပဲ ဖြစ်တယ်လို့ ပြောပြီး မြန်မာနိုင်ငံအပေါ် တင်ရှိနေတဲ့ တရုတ်ရဲ့ ကျေးဇူးကို ထောက်ထားဖို့လည်း ဝန်ကြီးက ပန်ကြားသွားပါတယ်။ ဒီအကြောင်း ဆက်သွယ်စုံစမ်းထားတဲ့ ထိုင်းက မအေးအေးမာ တင်ပြထားပါတယ်။ မြန်မာ့စီးပွားရေး ဦးပိုင်ကုမ္ပဏီ လိမိတက်နဲ့ တရုတ်နိုင်ငံက မြန်မာဝမ်ပေါင် ကုမ္ပဏီတို့ ပူးပေါင်း လုပ်ဆောင်နေတဲ့ လက်ပန်းတောင်း တောင် ကြေးနီ စီမံကိန်း ရပ်တန့်ရေးအတွက် သပိတ်စခန်း ဖွင့်ထားတဲ့ သံဃာတော်တွေနဲ့ ကျောင်းသားတွေ၊ ဒေသခံတွေ ရှိတဲ့နေရာကို နိုဝင်ဘာလ ၂၃ ရက်နေ့ ညနေပိုင်းက သမ္မတရုံးဝန်ကြီး ဦးအောင်မင်း လာရောက်ခဲ့ပါတယ်။ သံဃာတော်တွေနဲ့ ဒေသခံတွေကို သူ ပြောသွားခဲ့တာကတော့ -

“နံပတ်တစ်အချက်က ဘာလဲဆိုတော့ ၁၉၈၈ ခုနှစ် တိုင်းပြည်ပျက်တဲ့အခါမှာ စားစရာမရှိဘူး။ စားစရာမရှိတဲ့အခါမှာ တရုတ်ဆီကနေ မူဆယ်လမ်းကြောင်းကနေ သွင်းရတယ်။ မူဆယ်လမ်းကြောင်းကနေ သွင်းလို့ တပည့်တော်တို့ အသက်ဆက်လို့ ရတာ။ အဲဒီကျေးဇူးတွေ သူ့ကို ပြန်ပြီးတော့ ကြည့်ရမယ်။ တပည့်တော်တို့ နယ်စပ်မှာ ထကြွသောင်းကျန်းတဲ့ ဗကပ တွေကို တရုတ်ပြည်ကနေ ထောက်ပံ့ထားတာ၊ ဆန်တွေ ပိုက်ဆံတွေ အကုန်လုံး ထောက်ပံ့တာ။ အဲဒီတော့ ဒီအဖွဲ့တွေ အားလုံးကို တပည့်တော်တို့က လိုက်တိုက်နေရတဲ့ အခါမှာ တိုင်းပြည်ရဲ့ စီးပွားရေး ဖွံ့ဖြိုးတိုးတက်မှုကို ဘာမှ မလုပ်နိုင်ဘူး။ အဲဒီတော့ ဒီ တရုတ်အစိုးရက နောက်က ထောက်ပံ့ထားလို့။ အကယ်၍ တရုတ်နဲ့ စိတ်ဆိုးသွားရင်၊ အကယ်၍ နယ်စပ်ဒေသတွေမှာ အဲဒီလို ပြန်ပြီးတော့ ဟိုကနေ ထောက်ပံ့ ဒီကနေ့ ထောက်ပံ့တွေ လုပ်လိုက်ရင် တပည့်တော်တို့က စီးပွားရေး လုပ်ဖို့အတွက်ကို နောက်ကို ပြန်လှည့်ကြည့်နေရမယ်။ အရင်တုန်းက လုပ်ခဲ့တဲ့ မြစ်ဆုံ စီမံကိန်းတောင် တပည့်တော်တို့ကို တရုတ်အစိုးရက အတော် စိတ်ဆိုးနေပြီ။”

ဒေသခံတွေကတော့ လယ်မြေဧကပေါင်း ၇,၈၀၀ ကျော်နဲ့ ရွာ ၄ ရွာ ဆုံးရှုံးမှုအပြင် မြန်မာနိုင်ငံရဲ့ သယံဇာတတွေကို တရုတ်နိုင်ငံကိုပဲ ပေးနေရတဲ့အတွက် ကျေးဇူးမဆပ်နိုင် တော့တဲ့အကြောင်း လက်ပန်းတောင်းတောင် ဒေသခံတဦးက အခုလို ပြောပါတယ်။

“အခု လက်ပန်းတောင်းတောင် ကြေးနီ စီမံကိန်းဟာ ရွာ ၄ ရွာပဲ ဦးတည်ထားပေမဲ့ ရွှေ့ရမယ့် ရွာတွေက တွက်ကြည့်တော့ ရွာပေါင်း ၄၀ မကဘူး ရွှေ့ရမယ်။ အဲဒီတော့ ဒီဒေသမှာ ဒီစီမံကိန်း လုံးဝ မရှိသင့်ဘူး။ ဘာဖြစ်လို့လဲ ဆိုတော့ တရုတ်ကို ကြောက်စရာ မလိုဘူး။ ကိုယ်ထူကိုယ်စနစ်နဲ့ တရုတ်ကို ကျေးဇူးဆပ်လိုက်တာ များလွန်းလို့ ပဲခူးရိုးမကြီးလည်း ကျမတို့ ကုန်ခဲ့ပြီးပြီ။ မြန်မာနိုင်ငံရဲ့ သယံဇာတ ပစ္စည်းတွေလည်း ကုန်ခဲ့ပြီးပြီ။ ကျမတို့ တရုတ်ကို လုံးဝ ကျေးဇူး မဆပ်နိုင်တော့ဘူး။”

လက်ပန်းတောင်းတောင် ကြေးနီ စီမံကိန်း ရပ်တန့်ရေး တောင်းဆိုနေတဲ့ ဒေသခံတွေကို အကူအညီပေးနေတဲ့ ကျောင်းသား ခေါင်းဆောင် ကိုဟန်ဝင်းအောင်ကတော့ ဦးအောင်မင်း လာရောက်တာဟာ လက်ပန်းတောင်းတောင်နဲ့ ပတ်သက်လို့ ဆုံးဖြတ်ချက် ပါလာတာမျိုးတွေ မရှိသေးဘူးလို့ ဆိုပါတယ်။ “ဒီဘက်က ဒေသခံတွေပြောတဲ့ ဒီ လက်ပန်းတောင်းတောင် ကြေးနီ စီမံကိန်း ရပ်ဆိုင်းရေး အဆိုကိုတော့ သူ နားထောင်ပါတယ်။ ဒါပေမဲ့ ဘာတွေ လုပ်ပေးမယ်၊ ညာတွေ လုပ်ပေးမယ်၊ နောက်ဆက်တွဲ ဘာဆိုတဲ့ဟာ ခုချိန်ထိ ဘာမှ ထူးခြားတာ မရှိသေးဘူး။”လက်ပန်းတောင်းတောင် ကြေးနီ စီမံကိန်းကတော့ ပြီးခဲ့တဲ့ သြဂုတ်လက စပြီး လယ်ယာမြေတွေကို သိမ်းယူမှုကို အကြောင်းပြုပြီး ဒေသခံတွေ စတင် ဆန္ဒပြခဲ့ကြတာပါ။ စီမံကိန်းက စွန့်ပစ်ခဲ့တဲ့ မြေဇာတွေကြောင့် ဒေသခံတွေရဲ့ လယ်မြေတွေ ပျက်စီးမှုကို အကြိမ်ကြိမ် တားဆီးခဲ့ပေမဲ့ ဒေသခံ အာဏာပိုင်တွေက လျစ်လျူရှုခဲ့ပြီး အဲဒီဒေသမှာ သွားလာလှုပ်ရှားခွင့်တွေကို ကန့်သတ်တဲ့အနေနဲ့ ပုဒ်မ (၁၄၄) ထုတ်ပြန်ခဲ့ပါတယ်။ နောက်ပိုင်းမှာတော့ လက်ပန်းတောင်းတောင် ကြေးနီ စီမံကိန်းရဲ့ ရှေ့ဘက်မှာ လုပ်နေတဲ့ စံပယ်တောင် ကြေးနီ စီမံကိန်းကြောင့် ဒေသခံတွေရဲ့ သဘာဝရေမြေ ပျက်စီးမှု၊ သောက်သုံးရေ သုံးစွဲလို့ မရတော့တာ တွေကြောင့် ဒေသခံတွေဟာ လက်ပန်းတောင်းတောင် ကြေးနီ စီမံကိန်း ရပ်ရေးကို တစိုက်မတ်မတ် တောင်းဆိုလာတာ ဖြစ်ပါတယ်။

လက်ပန်းတောင်းတောင်၊ စပယ်တောင် ကြေးနီ စီမံကိန်းတွေနဲ့ ပတ်သက်လို့ ပြည့်သူ့လွှတ်တော် မှာလည်း အဆိုတင်သွင်းမှုတွေကို နိုဝင်ဘာလ ၂၃ ရက်နေ့က လုပ်ခဲ့ပါတယ်။ သမ္မတရုံး ၀န်ကြီး ဦးအောင်မင်းကလည်း လက်ပန်းတောင်းတောင် ကြေးနီ စီမံကိန်းနဲ့ ပတ်သက်လို့ အချက်အလက် လာရောက် ယူတာသာ ဖြစ်တဲ့အတွက် နိုင်ငံတော်သမ္မတထံကို ဒေသခံတွေရဲ့ ပြောကြားချက်တွေကို တင်ပြပေးမယ်လို့ ပြောသွားခဲ့ပါတယ်။