25.11.2012 နေ့ဖတ်ရန်သတင်းများ

by Myanmar Journal on Saturday, November 24, 2012 at 4:24pm ·

အငြိမ်းစား ပုဂ္ဂိုလ်ကြီးတွေရဲ့ အိမ်အကူစရိတ် တိုင်းပြည်က ပေးဆောင်ရ

ရာထူးကနေ အနားယူသွားပေမယ့် ဗိုလ်ချုပ် မှူးကြီး သန်းရွှေနဲ့ ပင်စင်စား ပုဂ္ဂိုလ်ကြီးတွေ အကျိုးခံစားခွင့်တွေ ဆက်ရနေဆဲ

နိုင်ငံတာဝန် ထမ်းဆောင်ခဲ့တဲ့ အငြိမ်းစား ဗိုလ်ချုပ်ကြီးတွေနဲ့ လက်ရှိ ပြည်ထောင်စု အဆင့် တာဝန် ထမ်းဆောင်နေကြသူတွေရဲ့ နေအိမ်ခ၊ နေအိမ် အလုပ်သမားခ၊ တယ်လီ ဖုန်းခတို့ ပေးဖို့ ကုန်ကျငွေ ကျပ်သန်းပေါင်း ၅၀၀ကျော်အတွက် မြို့ရွာနဲ့ အိုးအိမ် ဖွံ့ဖြိုးရေး ဦးစီးဌာနက သာမန် အသုံးစရိတ် ဖြည့်စွက် ခွင့်ပြုဖို့ တောင်းခံတာကို ပြည်ထောင်စု လွှတ်တော်က အတည်ပြုပေးခဲ့တယ်လို့ သိရပါတယ်။

အဲဒီထဲမှာ နိုင်ငံတော် အေးချမ်းသာယာရေးနဲ့ ဖွံ့ဖြိုးရေး ကောင်စီ ဥက္ကဌ ဗိုလ်ချုပ်မှူးကြီး သန်းရွှေ၊ ဒုတိယ သမ္မတ ဦးတင်အောင်မြင့်ဦးတို့ အပါအဝင် အငြိမ်းစား အရာရှိ ၆၉ယောက်နဲ့ လက်ရှိ ပြည်ထောင်စုအဆင့် အရာရှိ ၁၀၄ယောက်၊ နေပြည်တော် ကောင်စီဝင် ၁၀ယောက်တို့အတွက် အသုံးစရိတ်တွေ ပါဝင်တယ်လို့ ဖေါ်ပြထားပါတယ်။

ဘဏ္ဍာရေးနဲ့ အခွန် ဝန်ကြီးဌာန ရဲ့ ၂၀၁၂ခုနှစ် မေလ ၁၀ရက်နေ့ ရက်စွဲပါ စာအမှတ် ဘခ ၁ / ၃၁၀( ၁၇၂၂ / ၂၀၁၂ ) အရ နိုင်ငံတော် တာဝန် ထမ်းဆောင်လျက် ရှိတဲ့ ပုဂ္ဂိုလ်ကြီးများနဲ့ အငြိမ်းစား ပုဂ္ဂိုလ်ကြီးများရဲ့ အိမ်အကူ၊ ထမင်းချက်၊ ဥယျာဉ် လုပ်သားများအတွက် အပို ထောက်ပံ့ကြေးအဖြစ် တဦးလျင် တလ ကျပ် ၃သောင်း ခံစားခွင့် ရှိတယ်လို့လည်း ဆိုပါတယ်။

အမျိုးသားဒီမိုကရေစီ ပါတီသစ်ရဲ့ ရန်ကုန်တိုင်း အမျိုးသား လွှတ်တော်အမတ် ဦးဖုန်းမြင့်အောင်ကတော့ ဒီကိစ္စနဲ့ ပတ်သက်လို့ လွှတ်တော်မှာ ထောက်ပြ ပြောဆိုတာမျိုး မရှိပဲ အတည်ပြုလိုက်တာဟာ လွှတ်တော်အမတ်တွေရဲ့ လစ်ဟာမှုလို့ ဝန်ခံ ပြောသွားပါတယ်။

နိုင်ငံအကြီးအကဲ ပုဂ္ဂိုလ်ကြီးတွေအတွက် လုံခြုံရေး ကိစ္စမျိုးတွေမှာ အသုံးစရိတ် ချပေးတာမျိုး လုပ်ကောင်း လုပ်သင့်ပေမယ့် ပင်စင်စား ပုဂ္ဂိုလ်ကြီးမျိုးတွေအတွက် အိမ်အကူဝန်ထမ်း စရိတ် ပေးတာမျိုးနဲ့ ပတ်သက်လို့တော့ ဘယ်အဆင့်ကို ဘယ်လောက်အထိ ပေးသင့်သလဲ ဆိုတာကို လွှတ်တော်မှာ ဆွေးနွေးသင့်ကြောင်းနဲ့ ၂၀၁၅ ခုနှစ် အစိုးရ ပြောင်းသွားရင် နောက်ထပ် ပင်စင်စားတွေ ပေါ်လာအုံးမှာမို့ တိုင်းပြည်အတွက် ကြည့်သင့်ကြောင်း အမျိုးသား လွှတ်တော်အမတ် ဦးဖုန်းမြင့်အောင်က ဘီဘီစီကို ပြောပါတယ်။

ဆန္ဒပြခေါင်းဆောင် ၄ဦးအဖမ်းခံရ

ခေါင်းဆောင်တွေ အဖမ်းခံခဲ့ရပေမယ့် ကျန်သူတွေကတော့ ဆက်လက်ဆန္ဒပြသွားမယ်လို့ ဆိုပါတယ်။

မန္တလေးတိုင်း ရမည်းသင်း မြို့နယ် မိုးထိ မိုးမိ တောင်ပေါ် ရွှေတွင်း လုပ်ကွက်က တနိုင် တပိုင်ရွှေတူးတဲ့ လုပ်ငန်းရှင် တွေဟာ ရန်ကုန်ကနေ နေပြည်တော် မှာရှိတဲ့ သမ္မတ အိမ်တော်ဆီကို ချီတက် တောင်းဆို လမ်းလျှောက်ပြီး ပြန်အလာ သောကြာနေ့ မနက် ၉နာရီခွဲလောက်က သူတို့ထဲက ခေါင်းဆောင် ၄ယောက်ဖြစ်တဲ့ ကိုရဲရင့်ထွန်း၊ ကိုနိုင်ဝင်း၊ ကိုစောနောင်နဲ့ ကိုနေအောင်ထက် တို့ကို မြို့လှနဲ့ ရေနီအကြား လမ်းခုလပ်မှာ အာဏာပိုင် တွေက ရိုက်နှက်ဖမ်းဆီးခဲ့တယ်လို့ သိရပါတယ်။

ဆန္ဒပြ ခေါင်းဆောင်တွေကို အကြမ်းဖက် ဖမ်းဆီး ခေါ်ဆောင်သွားခဲ့ပေမယ့် အခုဆိုရင် ဆန္ဒပြတဲ့ လူ ၆၀ ကျော်လောက်ဟာ ရေနီမြို့က ဓမ္မာရုံကျောင်းကို ရောက်နေပြီလို့ ကိုရဲရင့်ထွန်းရဲ့ဇနီးဖြစ်တဲ့ မအိမွန်ကျော်က ဘီဘီစီကို ပြောပါတယ်။

မိုးထိမိုးမိ တောင်ပေါ်ရွှေတွင်း လုပ်ကွက်မှာ သတ္တုတွင်း ၀န်ကြီးဌာန ဆီကနေ တရားဝင်လုပ်ပိုင်ခွင့်ရထားတဲ့ အမျိုးသား ကြီးပွား တိုးတက်ရေး ကုမ္ပဏီနဲ့ ဒေသခံ တနိုင်တပိုင် ရွှေတူးဖေါ်တဲ့ သူတွေဟာ အစက အကျိုးတူ ပူးပေါင်းလုပ်ခဲ့ ကြတာပါ။

ဒါပေမယ့် ဒီနှစ် မေလဆန်း ကစပြီး ကုမ္ပဏီဘက်က ရွှေတူး ဖေါ်ရေးစနစ် ပြောင်းလိုက်တာကြောင့် သူတို့ပြောင်းလိုက်တဲ့ စနစ်အတိုင်း လိုက်မလုပ်နိုင်တဲ့ တနိုင်တပိုင် လုပ်ငန်းရှင်တွေကို လုပ်ငန်းရပ်ခိုင်းခဲ့ရာက ဆန္ဒပြမှုတွေ ရမည်းသင်းဒေသမှာ စခဲ့တာဖြစ်ပါတယ်။

ဇွန်လ ၁ရက်နေ့ကတော့ ဆန္ဒပြသူတွေနဲ့ ကုမ္ပဏီ ညှိနိုင်းပြီး ၂ဖက် သဘောတူ စာချုပ်တွေ ချုပ်ချုပ်ဆိုခဲ့ရာက ဆန္ဒပြမှုတွေ ရပ်ခဲ့ပေမယ့် တချို့ လုပ်ငန်းရှင် တွေဘဲ နစ်နာကြေးရပြီး မရတဲ့ သူမရ ဖြစ်နေသေးတာမို့ ခုလိုအခြေအနေ ထိရောက်လာတာ ဖြစ်ပါတယ်။

ဒီလုပ်ကွက်ကို လုပ်ပိုင်ခွင့်ရထားတဲ့ အမျိုးသား ကြီးပွားရေး တိုးတက်ရေး ကုမ္ပဏီ ရုံးချုပ် ရှိတဲ့ ရန်ကုန်ကို ဆင်းပြီး သူတို့ တောင်းဆို ချက်တွေကို ၃ကြိမ် ဆန္ဒပြတောင်းဆို ခဲ့ကြပါတယ်။

ဒါပေမယ့် မအောင်မြင် တဲ့အတွက် ခုလိုနေပြည်တော်ကို ချီတက် တောင်းဆိုဖို့ အလာမှာ အဖမ်းခံ လိုက်ရတာဖြစ်ပါတယ်။

အီးယူ ဘဏ္ဍာရေး ဆွေးနွေးပွဲ ပြန်စ

ပြင်သစ်နဲ့ ဂျာမနီ တို့ကတော့ သဘောတူညီချက် ရနိုင်ဖို့ကို သံသယရှိနေကြပါတယ်။

အကြပ်အတည်း ဖြစ်နေတဲ့ ဥရောပ ဘဏ္ဍာရေး ညှိနှိုင်းမှုတွေ အတွက် ဘရက်ဆဲလ်မှာ အီးယူ ခေါင်းဆောင်တွေ ပြန်လည်ဆွေးနွေး နေကြ ပါပြီ။

အီးယူ ဘဏ္ဍာရေး ဆွေးနွေပွဲနဲ့ ပတ်သက်ပြီး သဘော တူညီမှု ရနိုင်ပါမလား ဆိုပြီး ပြင်သစ်နဲ့ ဂျာမနီ ခေါင်းဆောင် တွေဘက်ကတော့ သံသယရှိ နေကြပါတယ်။

၂၀၁၄ ကနေ ၂၀၂၀ အထိ အကြုံးဝင်မယ့် အသုံးစားရိတ် ဘတ်ဂျက် တိုးမြှင့်ဖို့ အီးယူ နိုင်ငံအတော်များများက ထောက်ခံကြပေမယ့် အခုလို ခြိုးခြံ ချွေတာရေး လုပ်နေရတဲ့ ကာလမှာ ဒါဟာ လက်ခံ နိုင်စရာမရှိဘူးလို့ နိုင်ငံတချို့ကလည်း ကန့်ကွက် ပြောဆိုနေပါတယ်။

ဘဏ္ဍာရေး ဆုံးဖြတ်ချက်ကို နောက်နှစ်အထိ အချိန်မဆွဲ ထားကြဖို့ အီးယူ အရာရှိတွေက အီးယူနိုင်ငံ ခေါင်းဆောင်တွေကို တိုက်တွန်း ပြောဆိုနေပါတယ်။

အီဂျစ်သမ္မတကို ဆန့်ကျင်သပိတ်မှောက်မှု စတင်

သမ္မတ မိုဟာမက် မော်စီ

အီဂျစ်နိုင်ငံမှာ သမ္မတ မော်စီရဲ့ ရှိပြီးသား သမ္မတအာဏာထက် ပိုယူတဲ့ ဆုံးဖြတ်ချက်ကို မကျေနပ်တဲ့ လူတွေက ဒေါ်သတကြီး တုံ့ပြန် ဆန္ဒပြ နေကြပါတယ်။

သမ္မတရဲ့ ဆုံးဖြတ်ချက်တွေကို တရားရုံးတွေက မေးခွန်းပြန်ထုတ်လို့ မရဘူးဆိုတဲ့အချက်ကို သမ္မတက ကြာသပတေးနေ့က အတည်ပြု ကြေငြာခဲ့တာ ဖြစ်ပါတယ်။

ဒါကြောင့် သမ္မတကို မကျေနပ်တဲ့ သူတွေက အာဏာရ မွတ်ဆလင် ညီနောင်များ အဖွဲ့ရဲ့ ရုံးခန်းတချို့လည်း ဖျက်ဆီးခဲ့သလို တချို့က လမ်းပေါ်ထွက် ဆန္ဒပြကြပါတယ်။

အလက်ဇန်းဒရီးယားမှာဆိုရင်လည်း မွတ်ဆလင် ညီနောင်များ အဖွဲ့ရဲ့ ရုံးခန်းတွေ ဖျက်ဆီး ခံခဲ့ရပါတယ်။

အရင် သမ္မတဟောင်း ဟော့စနီ မူဘာရက်ကို ဆန္ဒပြ ဖြတ်ချခဲ့မှုရဲ့ ပင်မအခြေစိုက် နေရာဖြစ်တဲ့ ကိုင်ရိုမြို့လယ်က တဟီရာ ရင်ပြင်မှာလည်း ထောင်နဲ့ချီတဲ့ လူတွေ စုဝေးခဲ့ကြပါတယ်။

သူတို့ရဲ့ ကြွေးကြော်သံတွေမှာလည်း မောစီနဲ့ မူဘာရက် အတူတူပဲလို့ ကြွေးကြော် ကြပါတယ်။

ဆန္ဒပြသူတွေနဲ့ အတိုက်အခံ အုပ်စုတွေဟာ မနေ့ကစပြီး တပတ်တာ ထိုင်သပိတ်မှောက်ဖို့ ဆုံးဖြတ်ခဲ့ ကြပါတယ်။

သူတို့ရဲ့အဓိက တောင်းဆိုချက် ကတော့ သမ္မတရဲ့ အခြေခံဥပဒေဆိုင်ရာ အမိန့်ကို ပြန်ရုပ်သိမ်းဖို့ နဲ့ အီဂျစ်ရဲ့ အခြေခံ ဥပဒေသစ်ကို ရေးဆွဲနေတဲ့ တိုင်းပြုပြည်ပြု လွှတ်တော်ကို ဖျက်သိမ်းပေးဖို့ တောင်းဆိုတာ ဖြစ်ပါတယ်။

သမ္မတ မော်စီကတော့ မူဘာရက် ပြုတ်ကျခဲ့တဲ့ အီဂျစ် တော်လှန်ရေးကို အကာအကွယ်ပေးဖို့ လုပ်တာသာ ဖြစ်တယ်လို့ ပြောပါတယ်။ တည်ငြိမ်မှု ရဖို့နဲ့ အီဂျစ်နိုင်ငံ လွတ်လပ်မှုနဲ့ ဒီမိုကရေစီ လမ်းကြောင်းမှာ ဦးဆောင်နေတာသာ ဖြစ်တယ်လို့ သူ့ကို ထောက်ခံတဲ့ သူတွေကို ပြောခဲ့ပါတယ်။

သမ္မတကို ထောက်ခံသူတွေလည်း လမ်းပေါ်ထွက် ဆန္ဒကြလို့ မထောက်ခံသူတွေနဲ့ ထိပ်တိုက် ရင်ဆိုင်မှုတွေ ရှိနေပါတယ်။

ဒါကြောင့် အီဂျစ်နိုင်ငံဟာ ပိုနှစ်ခြမ်းကွဲလာတာကြောင့် မကြာခင် ကာလတွေမှာ ပိုပြီး မတည်မငြိမ် ဖြစ်လာစရာ ရှိတယ်လို့ ကိုင်ရိုက ဘီဘီစီ သတင်းထောက် ဂျွန်လိုင်းက ပြောပါတယ်။

လက်ပံတောင်းအရေး ဦးအောင်မင်းလာညှိနှိုင်း

လက်ပံတောင်းတောင်က ဆန္ဒပြ ပြည်သူများ

လက်ပံတောင်းတောင် ကြေးနီစီမံကိန်းရပ်ဆိုင်း ပေးဖို့ အတွက် တောင်းဆို ဆန္ဒပြနေ ကြသူ တွေဆီကို ပြည်ထောင်စု ဝန်ကြီး ဦးအောင်မင်း နဲ့ ဦးလှမောင်ရွှေ တို့ လာရောက် ညှိနှိုင်း ခဲ့ကြ ပါတယ်။

ဘာတွေ ညှိနှိုင်းခဲ့ သလဲ ဆိုတာကို အဲဒီက ဆန္ဒပြနေသူ ဝက်မှေးရွာသူ မသွဲ့သွဲ့ဝင်းကို ဆက်သွယ်မေးကြည့်တော့ အခုလာရောက် ကြရာမှာ အထက်ကို တင်ပြဖို့ သပိတ်စခန်း ရဲ့ ဆုံးဖြတ်ချက်ကို လာယူ ကြတာ ဖြစ်ကြောင်း၊ အစောပိုင်းက မြန်မာ နိုင်ငံ ထမင်းငတ်စဉ် တုန်းက တရုတ်က ကျွေးထား ခဲ့လို့ တရုတ်ကို ကျေးဇူး ဆပ်ရမယ်လို့ ပြောခဲ့ကြောင်း ပြောပါတယ်။

ဆန္ဒပြသူတွေက မြန်မာ နိုင်ငံက သယံဇာတတွေ၊ ပဲခူးရိုးမ လို သစ်တောကြီးတွေ၊ ရေနံ နဲ့ သဘာဝ ဓာတ်ငွေ့တွေ တရုတ် ကုပ်သွေးစုပ်တာ ခံနေရလို့ တရုတ်ကို ကျေးဇူး မဆပ်နိုင်ကြောင်း ပြန်လည် ပြောကြားခဲ့ရာမှာ ဝန်ကြီး တွေဘက်က သူတို့ ဆုံးဖြတ်လို့ မရတဲ့ ကိစ္စ ဖြစ်လို့ အထက်ကို တင်ပြပေးမှာ ဖြစ်တယ်လို့ ပြောကြောင်း ဆိုပါတယ်။

အခု ပုဒ်မ ၁၄၄ ထုတ်ပြန်ထားတဲ့ နယ်မြေထဲကို ဝင်ရတာကတော့ ဒီစီမံကိန်းကို ရပ်ပါလို့ တစာစာ အော်နေပေမယ့် လုံးဝ မရပ်တဲ့အတွက်ကြောင့် အခုလိုမှ ဝင်မတားရင် ရပ်မှာ မဟုတ်လို့ အခုလို ဝင်တားရတာ ဖြစ်တယ်လို့ ပြောပါတယ်။

အာဏာပိုင် တွေဘက်ကတော့ ခုထက်ထိ ကြမ်းကြမ်းတမ်းတမ်း မဆက်ဆံ သေးကြောင်း၊ ဒါပေမယ့်လည်း လက်နက်အင်အား အပြည့်၊ ရဲအင်အား အပြည့်နဲ့ လုံခြုံရေး တွေချထားတဲ့ အကြောင်းနဲ့ ဘယ်အချိန် ဘာလုပ်မလဲ မပြောတတ် ကြောင်းလဲ ပြောပါတယ်။

ရန်ကုန်နဲ့ မန္တလေး မြို့တွေ အပါအဝင် မြို့နယ် ၁၆ ခုလောက်မှာ ဆန္ဒပြပွဲ တွေလုပ်မှာ ကတော့ အခုလို နစ်နာ ဆုံးရှုံး နေမှု တွေများနေလို့ ထပ်တူ ခံစား ရသူတွေက ဒါဟာ မြန်မာ နိုင်ငံရဲ့ အရေးဆိုပြီး သူတို့ ရင်ထဲက ဆန္ဒအတိုင်း ဘယ်သူမှ မလှုံ့ဆော်ဘဲ ဆန္ဒပြကြတာ ဖြစ်ကြောင်းလည်း ပြောကြားခဲ့ပါတယ်။

ဒီလို လက်ပံတောင်းတောင် အရေးတွေ ပိုပြီး ကျယ်ပြန့်လာသလို ဖြစ်လာနေချိန်မှာ ပြည်သူ့ လွှတ်တော် မှာလည်း အမျိုးသား ဒီမိုကရေစီ အဖွဲ့ချုပ်က လွှတ်တော် ကိုယ်စားလှယ် ဒေါ်ခင်စန်းလှိုင်က လက်ပံတောင်းတောင် စီမံကိန်းနဲ့ ပတ်သက်ပြီး အရေးတကြီး အဆို တင်သွင်းခဲ့ရာမှာ လွှတ်တော်က အတည်ပြုပေး ခဲ့ပါတယ်။

အဲဒီ အဆိုအရ ပြည်သူလူထုက ယုံကြည် ကိုးစားတဲ့ ပုဂ္ဂိုလ်၊ အဖွဲ့အစည်းနဲ့ ပြည်တွင်း ပြည်ပက ပညာရှင်တွေ၊ အဖွဲ့အစည်း တွေပါဝင်တဲ့ လွတ်လပ်တဲ့ နိုင်ငံတော် အဆင့် ကော်မရှင် တရပ် ဖွဲ့စည်း ပြီးရင် ဒီစီမံကိန်းနဲ့ ပတ်သက်လို့ စစ်ဆေး တွေ့ရှိချက်တွေကို ပြန်လည် တင်ပြလို့ ဒေသခံတွေရဲ့ နစ်နာချက်တွေကို ကျေနပ်အောင် ညှိနှိုင်းသွား မှာဖြစ်တယ်လို့ သိရပါတယ်။

ပုဂ္ဂလိက လုပ်ငန်းတွေ နိုင်ငံခြားငွေ လွှဲနိုင်တော့မယ်

မြန်မာ နိုင်ငံမှာ နိုင်ငံခြားငွေ လွယ်လွယ်ကူကူ လဲနိုင်တော့မယ်။

မြန်မာနိုင်ငံမှာဘဏ်လုပ်ငန်း လုပ်ကိုင်တဲ့ကုမ္မဏီ ကိုသာခွင့်ပြုထားတဲ့ နိုင်ငံခြားငွေလှဲလုပ်ငန်းတွေ ကိုမည် သည့် ပုဂ္ဂလိက ကုမ္မဏီကို မဆိုခွင့်ပြု တော့မယ် လို သိရပါတယ်။

ဒီလိုလုပ်ကိုင်ဖို့အတွက်ကုမ္ဓဏီတွေ လုပ်ကိုင်ရ မဲ့စည်းမျဉ်းစည်းကမ်း တွေ ဗဟိုဘဏ်ကမကြာမှီ ထုတ်ပြန် သွားဖို့ ရှိတယ်လို့ ဘဏ္ဏာရေးနှင့်အခွန် ဝန်ကြီးဌာန မှ ပြန်ကြားရေး တာဝန်ခံ ဦးမင်းထွဋ်က မကြာခင်မှာ ခွင့်ပြုချက် တွေ ထွက်တော့မှာ ဖြစ်ကြောင်း၊ ဘဏ္ဍာရေး နဲ့ သက်ဆိုင်တဲ့ လုပ်ငန်း ကုမ္ပဏီ တွေတင် သာမက ရိုးရိုး ကုမ္ပဏီ တွေကိုပါ လုပ်ခွင့်တွေ ပေးသွားမှာ ဖြစ်ကြောင်းနဲ့ အများဆုံး ကြာရင် တလလောက်ပဲ ရှိမယ်လို့ ပြောကြားသွား ပါတယ်။

မှောင်ခို ဈေးကွက် ပျောက်အောင် အခုလို ကြိုးစားပေမယ့် ဘဏ်တွေက ဖွင့်တဲ့ ငွေလှဲကောင်တာ တွေဟာ ဟောင်းနွမ်းငွေ လက်မခံ တာတို့ စနေ တနင်္ဂနွေ ပိတ်တာ တို့ကြောင့် မှောင်ခို ဈေးကွတ်ဟာ ပျောက်ကွယ်ဖို့ မလွယ် ဘူးလို့ ရန်ကုန်မြို့ခံ စီးပွါးရေး လုပ်ငန်းရှင် တစ်ဦးက ထောက်ပြ ပြောဆိုပါတယ်။

၂၀၁၁ ခုနှစ်၊အောက်တိုဘာ လဆန်းက စပြီး ပုဂ္ဂလိက ဘဏ်၆ခုကို နိုင်ငံခြား ငွေလဲ ကောင်တာများ လုပ်ကိုင် ခွင့်ပြုခဲ့ပြီးအခုအခါ တစ်နိုင်ငံလုံးရှိ နိုင်ငံခြားသား ခရီးသည် အဝင်အထွက် များတဲ့မြို တွေမှာ ငွေလဲကောင်တာ (၉၃)ခုနဲ့ လုပ်ကိုင် ဆောင်ရွက်လျက် ရှိတယ် လို့သိရပါတယ်။

ဗဟိုဘဏ်က နေစဥ့် သတ်မှတ်တဲ့ နိုင်ငံခြားငွေ လဲလှယ်နှုန်းကို ၀.၀၈ ရာခိုင်နှုန်း ကွာဟခွင့်ကို လုပ်ကိုင်ခွင့်ရှိတဲ့ အတွက် ဗဟိုဘဏ်က သတ်မှတ်တဲ့ ဈေးနဲ့ ဘဏ်တွေရဲ့ ငွေလဲလှယ် နှုန်းဟာ ၇ ကျပ် ၈ ကျပ်လောက် ကွာဟလျှက် ရှိပါတယ်။ 

ထိုင်းနိုင်ငံမှာ လူထောင်ပေါင်း များစွာ ဆန္ဒပြကြ

ထိုင်းနိုင်ငံက ဘန်ကောက်မြို့တော်မှာတော့ ဝန်ကြီးချုပ် ယင်လပ် ရှင်နာဝတ်ရဲ့ အစိုးရကို မကျေနပ်လို့ ဆန္ဒပြကြသူ ထောင်ပေါင်း များစွာကို လုံခြုံရေး တွေက မျက်ရည်ယို ဗုံးတွေ သုံးပြီး ဖြိုခွဲ ခဲ့ကြပါတယ်။

နောက်ပြီး ဒါဇင်ပေါင်း များစွာ ကိုလည်း ထိန်းသိမ်း လိုက်ကြပါတယ်။

ဒီဆန္ဒပြပွဲ ကိုတော့ ဘုရင်ကို ထောက်ခံ ကြတဲ့သူတွေရဲ့ အဖွဲ့သစ် ပစ်တပ် ဆိုင်ယမ် က ဦးဆောင် ပြုလုပ်ခဲ့တာ ဖြစ်ပါတယ်။

အရင်က ထိုင်းစစ်တပ်က ဗိုလ်ချုပ်ကြီး တဦးက ဒီအဖွဲ့ကို ဦးဆောင် တာဖြစ်ပြီး သူက ထိုင်း နိုင်ငံက ဒီမိုကရေစီ ဟာ အတုအယောင် ဖြစ်တယ်လို့ ဆိုပါတယ်။

အခု ဆန္ဒပြသူ တွေက လက်ရှိ ဝန်ကြီးချုပ် ယင်လတ်ကို အစ်ကို တော်သူ အရင် ဝန်ကြီးချုပ်ဟောင်း သက်ဆင်ရဲ့ ရုပ်သေးရုပ် ဆိုပြီး စွပ်စွဲ နေကြတာ ဖြစ်ပါတယ်။ ဒါပေမယ့် ယင်လတ် ရှင်နာဝတ် ရဲ့ အစိုးရကို အာဏာသိမ်းမယ် ဆိုတာကိုတော့ သူတို့ တွေက ငြင်းဆိုထားပါတယ်။

အခု ညနေစောင်း မှာတော့ ဆန္ဒပြပွဲ တွေကို ပြန်လည် ရုတ်သိမ်း လိုက်ပြီ ဖြစ်ပါတယ်။

ဆန္ဒပြပွဲရုတ်သိမ်းလိုက်တာနဲ့ပတ်သက်ပြီး ဆန္ဒပြပွဲ ခေါင်းဆောင် ဗိုလ်ချုပ်ကြီး ဟောင်း စေအိုင့် က သတင်းထောက် တွေကို ပြောကြား ရာမှာတော့ ဆန္ဒပြပွဲကို ရုတ်သိမ်းဖို့ ဆုံးဖြတ်ရ တာကတော့ မျှော်မှန်းထားတဲ့ အတိုင်း ဆန္ဒပြတဲ့သူ သိန်းချီ-သန်းချီ မလာရောက် ကြဘဲ နည်းနေလို့ ဆန္ဒပြပွဲကို ရပ်လိုက်ကြောင်း၊ နောက် တစ်ချက်က ဆန္ဒပြသူ တွေကို အကြမ်းဖက် မှုဖြစ်ပြီး သေကြေ တာမျိုးကိုလည်း မဖြစ်စေချင်တာကြောင့် ဆန္ဒပြပွဲကို ရုတ်သိမ်း လိုက်တာ ဖြစ်ကြောင်းနဲ့ နောက်ထပ်လည်း ဆန္ဒပြပွဲကို ဦးဆောင် လုပ်မှာ မဟုတ်တော့ဘူးလို့ ပြောကြား သွားခဲ့ ပါတယ်။