15.11.2012 နေ့ဖတ်ရန်သတင်းများ

by Myanmar Journal on Thursday, November 15, 2012 at 4:29am ·

ဟားမက် စစ်ခေါင်းဆောင် ကျဆုံး

ကလေးငယ် တွေပါ ပစ်ခတ်ခံရ

ဟားမက် အဖွဲ့ စစ်ခေါင်းဆောင် အာမက် ဂျဘာရီ အစ္စရေး လေကြောင်း တိုက်ခိုက်မှုမှာ ကျဆုံး သွားပါတယ်။

ဂါဇာမှာ သူလိုက်ပါတဲ့ ကားကို ပစ်ခတ် လုပ်ကြံခံရတာ ဖြစ်ပြီး အဆင့်မြင့်ဆုံး သတ်ဖြတ် ခံရတဲ့ ဟားမက် ခေါင်းဆောင် ဖြစ်ပါတယ်။

အရပ်သား ၁ဝ ယောက် အစ္စရေး တိုက်ခိုက်မှုကြောင့် သေဆုံးခဲ့ရတဲ့ အတွက် ပါလက်စတိုင်း ဘက်က အစ္စရေး နယ်ထဲ ပစ်ခတ် တုံ့ပြန် ပါတယ်။

အစ္စရေး ဝန်ကြီးချုပ် ကတော့ ဟားမက် ပစ်မှတ်တွေကို ဆက်တိုက်မယ်လို့ ဆိုပါတယ်။

ပါလက်စတိုင်း တွေကို အစ္စရေးက သတ်ဖြတ် နေတာကို သည်းခံမှာ မဟုတ်ဘူးလို့ အီဂျစ် က အစ္စရေး သံအမတ် ကို သတိပေးခဲ့ သလို ဟားမက် အကြမ်းဖက်မှု တွေ အတွက် အစ္စရေးရဲ့ ခုခံခွင့်ကို ထောက်ခံတယ်လို့ အမေရိကန်က ဆိုပါတယ်။

လုံခြုံရေး ကောင်စီ အရေးပေါ် အစည်းအဝေး လုပ်နေသလို အာရပ် အဖွဲ့ချုပ် ကလဲ စနေနေ့မှာ တွေ့ဆုံဖို့ ရှိပါတယ်။

ကျားဖြူနဲ့ ဖလုံစဝေါ် ဒီမိုမဟာမိတ် ကထွက်

ကျားဖြူက PR စနစ် မလိုလား (ဓာတ်ပုံ-ကျားဖြူ သတင်းလွှာ)

တိုင်းရင်းသား ပါတီ ၅ ခုနဲ့ ပြည်မ ပါတီ ၅ ခု ပေါင်းထားတဲ့ ဒီမိုကရေစီ မိတ်ဆွေ ၁ဝ ပါတီမှာ သဘော ကွဲလွဲလို့ တိုင်းရင်းသားပါတီ တချို့ ဆက်လက် ပူးပေါင်းဖို့ ရပ်စဲလိုက်တယ်လို့ သိရပါတယ်။

ပူးပေါင်းဖို့ ရပ်စဲလိုက်တဲ့ ပါတီတွေကတော့ ကျားဖြူပါတီ ခေါ် ရှမ်းတိုင်းရင်းသားများ ဒီမိုကရက်တစ် ပါတီ (SNDP) နဲ့ ဖလုံ- စဝေါ် ဒီမိုကရက်တစ် ပါတီ (PSDP) တို့ပဲ ဖြစ်ပါတယ်။

အခုလို ရပ်စဲလိုက်တာက မကြာခင်က ဒီမိုကရေစီ မိတ်ဆွေ ၁ဝ ပါတီက နောက်ရွေးကောက်ပွဲမှာ မဲပေးသူ ဦးရေ အလိုက် အချိုးကျ အမတ် သတ်မှတ်တဲ့ PR ရွေးကောက်ပွဲ စနစ် ကျင့်သုံးဖို့ သမ္မတဆီ ရွေးကောက်ပွဲ ကော်မရှင်ဆီ တင်ပြမှုမှာ ကျားဖြူ နဲ့ ဖလုံ စဝေါ်တို့ သဘောတူညီမှု မယူဘဲ လုပ်သွားလို့လို့ ကျားဖြူ ဗဟို အလုပ်အမှုဆောင် စိုင်းဘိုးအောင် က ဘီဘီစီကို ပြောပါတယ်။

မိတ်ဆွေ ၁ဝ ပါတီ အဖွဲ့ဝင် NDF ပါတီက ဦးခင်မောင်ဆွေ ကတော့ အားလုံးဆန္ဒ မပါဘဲ လုပ်သွားတာ ဘာမှ မရှိဘူးလို့ တုံ့ပြန်ပါတယ်။

သမ္မတဆီ စာတမ်း တင်တဲ့ကိစ္စ သူတို့ မပါဘူးလို့ ဖလုံ-စဝေါ် ဒုတိယ ဥက္ကဋ္ဌ မန်းအောင်ပြည်စိုး က ပြောဆိုပါတယ်။

နောက်နောင်မှာ ၁၀ ပါတီက လုပ်မယ့် စည်းဝေးပွဲတွေ အခမ်းအနား တွေမှာ ကျားဖြူပါတီနဲ့ ဖလုံ-စဝေါ်ပါတီတို့ လုံးဝ မတက်တော့ဘဲ မိတ်ဆွေ ၁ဝ ပါတီက သဘောထား ထုတ်ပြန်ရင်လဲ သူတို့ ပါတီနာမည်တွေ ထည့်သွင်းရေးသားခွင့် မပြုတော့ဘူးလို့ နှစ်ပါတီ လုံးက ပြောဆို ပါတယ်။

ကျားဖြူပါတီ နဲ့ ဖလုံ-စဝေါ်ပါတီဟာ တခြား တိုင်းရင်းသား ပါတီတွေဖြစ်တဲ့ ချင်းအမျိုးသားပါတီ၊ မွန်ဒေသလုံးဆိုင်ရာ ဒီမိုကရေစီ ပါတီ၊ ရခိုင် အမျိုးသားများ တိုးတက်ရေး ပါတီ၊ ကယန်း အမျိုးသား ပါတီတို့နဲ့ ပြီးခဲ့တဲ့ တနင်္ဂနွေနေ့ မှာပဲ ညီနောင် တိုင်းရင်းသားများ ပါတီ ဖက်ဒရေးရှင်း (Nationalities Brotherhood Federation) အဖြစ် ပြန်ဖွဲ့လိုက်ပြီး အားလုံးက PR ရွေးကောက်ပွဲ စနစ် လက်မခံကြောင်းနဲ့ ပြည်နယ် အမည်တွေကို ဒေသ အခြေခံ နာမည်ပြောင်းမယ့် အယူအဆ ကိုလည်း ပြင်းပြင်းထန်ထန် ကန့်ကွက်ကြောင်း ကြေညာချက် ထုတ်ပါတယ်။

တရုတ် ကွန်မြူနစ် ပါတီ ညီလာခံ ပြီးဆုံး

တရုတ် သမ္မတ ဟူဂျင်တောင်းက လာမယ့် နှစ်ဆန်း အထိ ရာထူးမှာ ဆက်ရှိမယ်

တရုတ်နိုင်ငံရဲ့ ကွန်မြူနစ်ပါတီရဲ့ သီတင်း တပါတ်ကြာ ကွန်ဂရက်စ် အစည်းအဝေး ဗုဒ္ဓဟူးနေ့က ကျင်းပ ပြီးစီး သွားပါပြီ။

ဘေဂျင်း မြို့တော်မှာ ပြုလုပ်ခဲ့တဲ့ အဲဒီ ကွန်မြူနစ် ပါတီ ကွန်ဂရက်စ် မှာ မျိုးဆက်သစ် ခေါင်းဆောင် တွေကို အာဏာ လက်ဆင့်ကမ်း ပေးမှု စတင် ပြုလုပ်ခဲ့ ပါတယ်။

ကွန်ဂရက်စ် လွှတ်တော်အနေနဲ့ ခေါင်းဆောင်ဟောင်းတွေ နေရာမှာ ငယ်ရွယ်သူ ခေါင်းဆောင်ပိုင်းသစ်ကို အစားထိုး ခန့်အပ်လိုက်ကြောင်းနဲ့ သမိုင်းဝင်လောက်အောင် ထူးခြားတဲ့ ဆုံးဖြတ်ချက်တွေ ချမှတ်ခဲ့ကြောင်း သမ္မတ ဟူဂျင်တောင်းက လွှတ်တော် အစည်းအဝေး အပြီးသတ် ကြေညာချက်ထဲမှာ ဖေါ်ပြခဲ့ပါတယ်။

လွှတ်တော် ကိုယ်စားလှယ် နှစ်ထောင့် နှစ်ရာကျော် တက်ရောက်ခဲ့တဲ့ ဒီအစည်းအဝေးမှာ တရုတ်ဗဟို ကော်မီတီ သစ်ကို ရွေးချယ် ခဲ့ကြ ပါတယ်။

ကြာသပတေးနေ့မှာ ဗဟို ကော်မီတီသစ် ကနေ တရုတ်နိုင်ငံရဲ့ အရေးပါတဲ့ ဆုံးဖြတ်ချက်တွေ ချမှတ်နိုင်မယ့် ပေါ်လစ်ဗြူရို အမြဲတမ်း ကော်မီတီ ကို အတည်ပြု ခန့်အပ်ဖို့ ရှိပါတယ်။

တရုတ်နိုင်ငံရဲ့ အနာဂါတ် စီးပွားရေးနဲ့ နိုင်ငံရေး လမ်းကြောင်း ဘယ်ကို ဦးတည် နေသလဲ ဆိုတာနဲ့ ပတ်သက်လို့ အခု အသစ် ခန့်အပ်မယ့် ခေါင်းဆောင်ပိုင်းတွေအပေါ် အာရုံထား စောင့်ကြည့်နေကြမှာ ဖြစ်ပါတယ်။

ရှီ ကျင်ပင်းနဲ့ လီ ကီဂျန်းတို့ ကို တရုတ်ကွန်မြူနစ်ပါတီ ခေါင်းဆောင်နဲ့ လက်ထောက် ခေါင်းဆောင်အဖြစ် ခန့်အပ်ဖို့ ရှိတယ်လို့ ယူဆရပါတယ်။

ဒါ့အပြင် ၂၀၁၃ ခုနှစ် မတ်လမှာ လက်ရှိ သမ္မတ ဟူဂျင်တောင်းရဲ့ နေရာမှာ ရှီ ကျင်ပင်း တာဝန်လွှဲပြောင်းယူမယ်လို့လည်း မျှော်လင့်ရပါတယ်။

ရှီ ကျင်ပင်းရော၊ လီ ကီဂျန်း ပါ နှစ်ဦးစလုံးကို တရုတ်ကွန်မြူနစ် ပါတီ ဗဟို ကော်မီတီဝင်တွေအဖြစ် ခန့်အပ်ထားပြီးဖြစ်တယ်လို့ ရှင်ဝါ အစိုးရ သတင်းအေဂျင်စီက အတည်ပြုထားပြီး ဖြစ်သလို ပေါလစ် ဗြူရို အမြဲတမ်း ကော်မီတီထဲမှာလည်း ရှေ့ဆုံးက ပါဖို့ သေချာနေပါတယ်။

ဒုတိယ ဝန်ကြီးချုပ် ဝဲန် ကီရှဲန်း၊ ပါတီ ဝါဒစည်းရုံးရေးမှူး လီယူ ယွန်ရှန်း၊ ပါတီရုံး အဖွဲ့မှူး လီ ယွန်ချောင်း၊ တီယန်ဂျင်း ပါတီ အကြီးအကဲ ဇန် ဂေါင်လီနဲ့ ဒုတိယ ဝန်ကြီးချုပ် ဇန် ဒီဂျန်း တို့လည်း ပေါလစ် ဗြူရို အမြဲတမ်း ကော်မီတီထဲမှာ ပါဖို့ တစ်ပြေးနေပါတယ်။

ဒါပေမဲ့ ပေါလစ် ဗြူရို အမြဲတမ်း ကော်မီတီဝင် အရေအတွက်ကို ၉ယောက်ကနေ ၇ ယောက် အထိ လျှော့ချပစ်နိုင်ဘွယ် ရှိနေပြီး တရားဝင် ထုတ်ဖေါ် ကြေညာတဲ့ အချိန်အထိ ဘယ်သူတွေ ပါမလဲ။ ဘယ်နှစ်ယောက် ထားမလဲဆိုတာ အသေအချာ မသိရသေးပါဘူး။

ဒါ့အပြင် အဖွဲ့ဝင် သုံးရာ နီးပါး ပါတဲ့ ဗဟို ကော်မီတီရဲ့ အဖွဲ့ဝင် ဘယ်သူတွေလဲ ဆိုတာကိုလည်း လောလောဆယ် ထုတ်ဖေါ် ကြေညာမှု မရှိသေး ပါဘူး။ ပုံမှန် အားဖြင့်တော့ ပါတီ ၊အစိုးရနဲ့ စစ်တပ်က ထိပ်တန်း ခေါင်းဆောင်တွေကို ဗဟိုကော်မီတီ အဖွဲ့ဝင်တွေအဖြစ် ခန့်အပ်လေ့ ရှိပါတယ်။

လက်ရှိ အဖွဲ့ဝင် အတော်များများဟာ အငြိမ်းစားယူရမယ့် အရွယ်ထက် ကျော်လွန် နေပြီ ဖြစ်တာမို့ အခု ဖွဲ့စည်းမယ့် ကော်မီတီသစ်ရဲ့ အဖွဲ့ဝင် အနည်းဆုံး တဝက်လောက်ဟာ မျက်နှာသစ်တွေ ဖြစ်မယ်လို့ အများက ယူဆနေကြတယ်လို့ ဘီဘီစီ တရုတ်ဌာနမှူး ရေမွန်လီက Ranond Li က ပြောပါတယ်။

ဝန်ကြီးဌာန ၁၅ ခု ငွေကြေးနဲ့ လုပ်ပိုင်ခွင့် အလွဲသုံးစားမှုရှိ

လွှတ်တော်ရုံးကို စာရင်းစစ်ချုပ်ရဲ့ စစ်ဆေး တွေ့ ရှိချက် ပေးပို့

မြန်မာ နိုင်ငံက ဝန်ကြီးဌာန ထက်ဝက် နီးပါး မှာ ငွေကြေးနဲ့ လုပ်ပိုင်ခွင့် အလွဲ သုံးစားမှု တွေ ရှိနေတယ်လို့ စာရင်းစစ်ချုပ်က လွှတ်တော်မှာ တင်ပြခဲ့ ပါတယ်။

ဒီလို တွေ့ရှိချက် မျိုးကို စာရင်း စစ်ချုပ်က နိုင်ငံတော် သမ္မတ ဆီကိုသာ တိုက်ရိုက် တင်သွင်းတာ ဖြစ်ပြီး အခုတော့ သမ္မတဆီ တင်သွင်းပြီးတာနဲ့ လွှတ်တော်ရုံးကို ပေးပို့ခဲ့တယ်လို့ ပြည်သူ့လွှတ်တော် ငွေစာရင်း ကော်မတီ အဖွဲ့ဝင် စိုင်းသီဟကျော် ကပြော ပါတယ်။

ဝန်ကြီးဌာန ၁၅ ခုမှာ ငွေကြေး ဆိုင်ရာ အလွဲသုံးစာလုပ်မှု၊ မသမာမှုနဲ့ မှားယွင်း လုပ်ဆောင်မှု တွေကြောင့် နိုင်ငံတော် အနေနဲ့ ကျပ်ငွေ သန်းပေါင်း ၆ သောင်း နီးပါးနဲ့ အမေရိကန်ဒေါ်လာ ၂ သိန်းကျော် နစ်နာ ခဲ့တယ်လို့ ပြည်ထောင်စု စာရင်း စစ်ချုပ် ဦးသိန်းထိုက်က ပြည်ထောင်စု လွှတ်တော်မှာ ဗုဒ္ဓဟူးနေ့က တင်သွင်းခဲ့တဲ့ အစီရင် ခံစာမှာ ဖော်ပြ ထားတာ ဖြစ်ပါတယ်။

အစိုးရ ဌာန အဖွဲ့ အစည်း တွေရဲ့ ၂၀၁၁ ကနေ ၂၀၁၂ ဘဏ္ဍာနှစ် အတွက် သုံးငွေတွေကို စစ်ဆေးရာမှာ ကျပ်ငွေ သန်းပေါင်း သောင်းနဲ့ ချီပြီး အလွဲသုံးစား လုပ်သည့် ဝန်ကြီး ဌာန တွေကတော့(၁) လျှပ်စစ် စွမ်းအား ဝန်ကြီးဌာန၊ (၂)ကျန်းမာရေး ဝန်ကြီးဌာန၊ (၃) သိပ္ပံနဲ့ နည်းပညာ ဝန်ကြီး ဌာန၊(၄) မွေးမြူရေး နှင့် ရေလုပ်ငန်း ဝန်ကြီး ဌာန၊(၅) ပြန်ကြားရေး ဝန်ကြီးဌာန၊(၆) စက်မှု ဝန်ကြီးဌာန၊ (၇) စီးပွားရေးနှင့် ကူးသန်း ရောင်းဝယ် ရေး ဝန်ကြီးဌာန၊ (၈) သစ်တော ရေးရာ ဝန်ကြီး ဌာန၊ (၉) သမ ဝါယမ ဝန်ကြီးဌာန၊ သမ ဝါယမ ဝန်ကြီးဌာန၊ (၁၀) လယ်ယာစိုက်ပျိုးရေးနှင့် ဆည်မြောင်း ဝန်ကြီး ဌာန၊ (၁၁)ပညာရေး ဝန်ကြီးဌာန၊ (၁၂)ဘဏ္ဍာရေးနှင့် အခွန် ဝန်ကြီး ဌာန၊ (၁၃)ဟိုတယ်နှင့်ခရီး သွားလာရေး ဝန်ကြီး ဌာန၊ (၁၄) မီးရထား ဝန်ကြီးဌာန (၁၅)ဆက်သွယ်ရေး ဝန်ကြီးဌာန တို့ ဖြစ်တယ်လို့ တွေ့ရှိရကြောင်း ပြည်သူ့လွှတ်တော် ငွေစာရင်း ပူးပေါင်း ကော်မီတီရဲ့ အစီရင်ခံစာမှာ တွေ့ရပါတယ်။

အလွဲသုံးစားမှု တွေ့ရှိချက်တွေ အရ ဝန်ကြီး ဌာနအလိုက် အောက်ခြေ အဆင့် တွေကို အရေးယူ တာတွေ ရှိပေမဲ့ အရေးယူမှု တွေက မပြင်းထန် သလို သက်ဆိုင်ရာ ဝန်ကြီးတွေရဲ့ တာဝန်ယူမှု လည်း မရှိဘူးလို့ စိုင်းသီဟကျော် ကပြော ပါတယ်။

နောင်ကို ဒီလို မဖြစ်အောင် ကြပ်ကြပ် မတ်မတ်ဆောင်ရွက်ဖို့ လွှတ်တော်က တိုက်တွန်းသွားမယ့် အစီ အစဉ် တွေလည်း ရှိတယ်လို့ သူက ပြော ပါတယ်။

ရုရွားရဲ့ နိုင်ငံတော် သစ္စာဖောက္မှု ဆိုင်ရာ ဥပေဒ ပြောင်းလဲ

ရုရှား သမ္မတ ဗလာဒီမီယာပူတင်

ပိုမို ကျယ်ပြန်တဲ့ အဓိပ္ပါယ် ဖွင့်ဆိုမှုတွေ ပေးနိုင်တဲ့ ရုရှား နိုင်ငံရဲ့ နိုင်ငံတော် သစ္စာဖောက်မှု ဆိုင်ရာ ဥပဒေကို ရုရှား ဗလာဒီမီယာ ပူတင်က လက်မှတ် ရေးထိုးလိုက် ပါတယ်။

ထောက်လှမ်းရေး အရာရှိတွေ သာမက ရုရှ နိုင်သား ဘယ်သူ မဆို ရုရှား နိုင်ငံရဲ့ လုံခြုံရေးကို ထိပါး စေနိုင်မယ့် လျှို့ဝှက်ချက် တွေကို ရယူမယ်၊ ဒါမှ မဟုတ် တခြား နိုင်ငံတကာ အဖွဲ့ အစည်း တွေကို နိုင်ငံရဲ့ လုံခြုံရေးကို ထိပါး စေနိုင်မယ့် ဘယ်လို အကူအညီ မျိုးကို မဆို ပေးမယ် ဆိုရင် နိုင်ငံကို သစ္စာ ဖောက်တဲ့ ပြစ်မှု ဖြစ် ပါတယ်။

လူ့အခွင့် အရေး လှုပ်ရှားသူတွေ ကတော့ အခု ဥပဒေဟာ ရုရှား နိုင်ငံသားတွေကို အနောက်နိုင်ငံ တွေက အစိုးရ မဟုတ်တဲ့ အဖွဲ့ အစည်းတွေနဲ့ ဆက်သွယ်မှု မလုပ်အောင် ခြိမ်းခြောက်ဖို့ ရည်ရွယ်တာလို့ ပြောကြ ပါတယ်။

နိုင်ငံကို သစ္စာဖောက်မှုနဲ့ ပြစ်မှု ထင်ရှား ရှိသူဟာ အမြင့်ဆုံး ပြစ်ဒဏ် အနှစ် ၂၀ အထိ ချခံ ရမှာ ဖြစ်ပါတယ်။

အာရှ-ပစိဖိတ်ဒေသ အမေရိကန်ဆက်ဦးဆောင်ဖို့ ကြိုးစား

လာမယ့်သီတင်းပတ်ထဲ အမေရိကန်သမ္မတ Barack Obama ရဲ့ မြန်မာခရီးစဉ်မစခင်မှာ အာရှပစိဖိတ်ဒေသထဲမှာ အမေရိကန်ပြည်ထောင်စုအနေနဲ့ အဓိကကျတဲ့ အခန်းကဆက်ပြီး ပါဝင်သွားမယ်လို့ အမေရိကန်နိုင်ငံခြားရေးဝန်ကြီး Clinton ကပြောဆိုလိုက်ပါတယ်။

အင်္ဂါနေ့က Australia နိုင်ငံ Perth မြို့မှာ ၀န်ကြီးချုပ် Julia Gillard နဲ့ ဒေသတွင်း အကြောင်းအရာတွေ ကို ဆွေးနွေးကြစဉ်မှာ ခုလိုပြောဆိုခဲ့တာ ဖြစ်ပါတယ်။  အာရှ-ပစိဖိတ်ရေပြင်ဟာ ကမ္ဘာ့စီးပွားရေးရဲ့ အဓိက ဗဟိုအချက်အခြာဖြစ်လာပြီး ဒီဒေသအတွက် အမေရိကန်ရဲ့ ထိတွေ့ဆက်ဆံမှုတွေ တိုးချဲ့ရာမှာ အဓိကကျတဲ့ အချက်လည်း ဖြစ်တယ်လို့ ၀န်ကြီး Clinton ကပြောဆိုလိုက်ပါတယ်။

အာရှပစိဖိတ် ဒေသအတွက် အမေရိကန် စစ်တပ်ရဲ့ စိတ်ပိုင်းဖြတ်ထားမှုကိုလည်း သူကပြောဆိုခဲ့ ပါတယ်။  အာရှတိုက်မှာ စစ်ရေးချိန်ခွင်လျှာညီမျှဖို့ အမေရိကန်စစ်တပ်က ဆောင်ရွက်မယ်လို့ ပြီးခဲ့တဲ့နှစ်က ပြောဆိုထားခဲ့ပြီးနောက် အခု ထိပ်သီးတွေ့ဆုံမှုဟာ ပထမအကြိမ်ဖြစ်ပြီး ဒီအစီအစဉ်အရ အမေရိကန် မရိမ်းတပ်ဖွဲ့ဝင် ၂,၅၀၀ သြစတြေးလျနိုင်ငံမြောက်ပိုင်းမှာ အခြေစိုက်ဖို့ ရှိပါတယ်။

တရုတ် ကွန်မြူနစ် ပါတီ ခေါင်းဆောင်ပိုင်း အပြောင်းအလဲစတင်

ဒီကနေ့ဗုဒ္ဓဟူးနေ့မှာပဲ တရုတ်ကွန်မြူနစ်ပါတီခေါင်းဆောင် Hu Jintao ဟာ ဥက္ကဋ္ဌ ရာထူးကနေ တရားဝင် အနားယူသွားပြီဖြစ်ပါတယ်။ နိုင်ငံရဲ့ထိပ်သီး ခေါင်းဆောင်နေရာကိုတော့ ဒုသမ္မတ Xi Jinping က လွှဲပြောင်းယူဖို့ စီစဉ်ထားပါတယ်။

ဘေဂျင်းမြို့တော် ပြည်သူ့ခန်းမကြီးမှာ သီတင်းတပတ်ကြာ ကျင်းပတဲ့ ပါတီညီလာခံရဲ့ နောက်ဆုံးနေ့မှာ သမ္မတ Hu က ဆယ်နှစ်တကြိမ် ပြုလုပ်တဲ့ တရုတ် ကွန်မြူနစ်ပါတီ ခေါင်းဆောင်မှု အပြောင်းအလဲ စတင်ချိန်မှာ စည်းလုံး ညီညွတ်ကြဖို့ တက်ရောက်လာတဲ့ ညီလာခံ ကိုယ်စားလှယ်တွေကို တိုက်တွန်းပြောကြားခဲ့ပါတယ်။

မစ္စတာဟူရဲ့ ကွန်မြူနစ်ပါတီ အကြီးအကဲရာထူးကို ဒုသမ္မတ Xi Jinping က ကြာသပတေးနေ့မှာ လက်ခံယူနိုင်ဖို့ မျှော်လင့်ရသလို သမ္မတရာထူးကိုလည်း မတ်လမှာ မစ္စတာ ရှီက လက်ခံယူဖို့ ရှိပါတယ်။ တရုတ်ဝန်ကြီးချုပ် Wen Jiabao နေရာမှာတော့ ဒုဝန်ကြီးချုပ် Li Keqiang ကို အစားထိုးဖို့ ပြင်ဆင်ထားပါတယ်။

မစ္စတာ XI နဲ့ မစ္စတာ Li ဟာ တရုတ်နိုင်ငံရဲ့ သြဇာအာဏာအကြီးမားဆုံး အဆုံးအဖြတ် အပေးတဲ့ အဖွဲ့အစည်း ဖြစ်တဲ့ ကွန်မြူနစ်ပါတီရဲ့ ပေါလစ် ဗျူရို နိုင်ငံ့ဦးဆောင်မှုအဖွဲ့က ထိပ်သီး ခေါင်းဆောင်နေရာ ရာထူးတွေကို ဆက်ခံကြဖို့ သေချာသလောက် ရှိနေပါပြီ။ ဒီ ပေါလစ်ဗျူရို နိုင်ငံဦးဆောင်မှုအဖွဲ့မှာ ဘယ်သူက ဘယ်ရာထူးရမယ်ဆိုတာကို ကြာသာပတေးနေ့မှာ ကျင်းပမယ့် အခမ်းအနားမှာ တရားဝင်ကြေညာမှာဖြစ်ပါတယ်။

အိုဘားမား မြန်မာခရီးစဉ် လူ့အခွင့်အရေးအဖွဲ့တွေ ကန့်ကွက်

အမေရိကန်သမ္မတ တဦးအနေနဲ့ မြန်မာနိုင်ငံကို လာမယ့် ခရီးစဉ်အတွင်း သမ္မတ အိုဘားမား ဟာ နိုင်ငံအကြီးအကဲတွေနဲ့ တွေ့ဆုံမှာဖြစ်သလို မြန်မာလူထုကိုလည်း မိန့်ခွန်းပြောဆိုဖို့ ရှိနေ ပါတယ်။ နာရီပိုင်းပဲ ကြာမယ့် ခရီးစဉ်အတွင်း ရန်ကုန်မှာပဲ တွေ့ဆုံမှုတွေကို ပြုလုပ်မယ်လို့ သိရပါ တယ်။ လူ့အခွင့်အရေးအဖွဲ့တွေကတော့ ဒီခရီးစဉ်ဟာ မဖြစ်သင့်ဘူးလို့ ကန့်ကွက်နေကြတုန်းပါ။ ဒီ ခရီးစဉ်အခြေအနေနဲ့ပတ်သက်လို့ စုံစမ်းမေးမြန်းထားတာတွေကို ကိုသားညွန့်ဦးက တင်ပြပေးထားပါတယ်။

သမ္မတအိုဘားမားခရီးစဉ်နဲ့ ပတ်သက်လို့ ရန်ကုန်အမေရိကန်သံရုံးကနေ သတင်းမီဒီယာတွေကို အသိပေးတဲ့ ထုတ်ပြန်ချက်ထဲ ရန်ကုန်ခရီးစဉ်ကိုပဲ ဖော်ပြထားတာမို့ နေပြည်တော်ကို သွားမသွား ဆိုတာ မသေချာပါဘူး။ ရန်ကုန်မှာပဲ မြန်မာလူထုကို မိန့်ခွန်းပြောဖို့ရှိတယ်လို့ အဲဒီ ထုတ်ပြန်ချက်မှာ ဖော်ပြပါတယ်။ ရန်ကုန်မှာ သတင်းထွက်နေတာကတော့ ရန်ကုန်တက္ကသိုလ် ဘွဲ့နှင်းသဘင်ခန်းမမှာ ဖြစ်ဖို့များတယ်လို့ ယူဆပြောနေပါတယ်။ သံရုံးနဲ့ မြန်မာအာဏာပိုင်တွေဖက်ကတော့ လုံခြုံရေးအရ သမ္မတအိုဘားမားရဲ့ခရီးစဉ်ကို အသေးစိတ် မပြောပါဘူး။

မနေ့တုန်းက အိမ်ဖြူတော်အရာရှိတွေနဲ့ တွေ့ဆုံခဲ့တဲ့ Amnesty International ၀ါရှင်တန်ဒီစီရုံး တာဝန်ခံ T Kumar ကတော့ သမတအိုဘားမားအနေနဲ့ ရန်ကုန်ကိုပဲ သွားရောက်မယ်လို့ သူတို့ သိထားရတဲ့အကြောင်းပြောပါတယ်။ USCB အမေရိကန်အခြေစိုက် မြန်မာ့အရေးလှုပ်ရှားမှုအဖွဲ့ အမှုဆောင် ဒါရိုက်တာဦးအောင်ဒင်ကတော့ ဒါဟာ ခရီးစဉ်မသွားခင် ညှိုနှိုင်းဆွေးနွေး ချက်တွေကြောင့် နေပြည်တော်မသွားဖို့ အခြေအနေဖြစ်လာတာလို့ ပြောပါတယ်။ USCB အဖွဲ့ဟာ သမ္မတ မြန်မာနိုင်ငံသွားမယ့်ခရီးစဉ်ကို ကန့်ကွက်ကြတဲ့ လူ့အခွင့်အရေးအဖွဲ့တွေထဲက တခုပါ။

“မြန်မာနိုင်ငံကို သွားရောက် လည်ပတ်ဖို့ အချိန်မတန်သေးဘူးလို့ ကျနော် ယူဆပါတယ်။ အဲဒီလို ယူဆတဲ့အတွက်ကြောင့် သမ္မတကိုရော၊ သမ္မတရဲ့ တာဝန်ရှိပုဂ္ဂိုလ်တွေကိုရော ကျနော် ကန့်ကွက်ထားပါတယ်။”

ဒါပေမဲ့ အခု ခရီးစဉ်သွားတဲ့အခါမှာ နေပြည်တော်ကိုတော့ မသွားဘူးလို့ သိရပါတယ်။ Protocol အရဆိုရင်တော့ ခရီးစဉ်က တမျိုးတော့ ဖြစ်နေပါတယ်။ ကိုအောင်ဒင် ဒီအပေါ်မှာရော ဘယ်လို ယူဆပါသလဲ။

“ကျနော် နားလည်သလောက်က ဒေါ်အောင်ဆန်းစုကြည် ကိုယ်နှိုက်ကိုက ဒီခရီးစဉ်ကို အစပိုင်း တုန်းက ကန့်ကွက်ခဲ့တယ်ဗျ။ ဒီအချိန်၊ ဒီကာလမှာ အမေရိကန် သမ္မတကိုယ်တိုင် မြန်မာပြည် လာပြီးတော့ ဦးသိန်းစိန်ရဲ့ အပြောင်းအလဲ ကိစ္စတွေကို ထောက်ခံတာမျိုး အချိန်မတန်သေးဘူးလို့ အန်တီ ဒေါ်အောင်ဆန်းစုကြည်က ကိုယ်တိုင်က ယူဆတယ်လို့ ကျနော် ကြားရပါတယ်။ ဒါကြောင့်မို့လို့ ပထမ သူ ကန့်ကွက်ခဲ့တယ်။ ကန့်ကွက်ခဲ့ပြီး နောက်ပိုင်းကျတော့ အမေရိကန် အစိုးရဘက်က အတင်းကို ချဉ်းကပ်တဲ့အခါမှာ အပေးအယူ သဘောအရပေါ့ဗျာ- ကဲ၊ ဒါဆိုရင်တော့ နေပြည်တော် မလာနဲ့၊ ရန်ကုန်မှာဆိုရင်တော့ ဖြစ်နိုင်လောက်တယ် ဆိုတာမျိုးပေါ့ဗျာ။ အဲဒီလို အပေးအယူ လုပ်တဲ့သဘောမျိုး ဖြစ်သွားတယ်လို့ ကျနော်တို့ သိရပါတယ်။”

အမျိုးသားဒီမိုကရေစီအဖွဲ့ချုပ် ပြည်သူ့လွှတ်တော်အမတ်တဦးဖြစ်တဲ့ ဦးဝင်းထိန် ကလည်း နေပြည်တော်ကို မသွားဘူးဆိုရင် ဒါဟာ လက်ရှိ မြန်မာအစိုးရက လုပ်နေတဲ့ ပြုပြင်ပြောင်းလဲမှုတွေ အပေါ်မှာ အမေရိကန်သမ္မတအနေနဲ့ စိတ်ချယုံကြည်မှု အပြည့်မရှိသေးဘူး ဆိုတဲ့သဘော သက်ရောက်မယ်လို့ ယူဆပါတယ်။

“သို့သော်လည်း ရန်ကုန်မှာပဲ တွေ့ပြီးတော့ သမ္မတက လာတွေ့မယ်ဆိုတော့ - ဒါဆိုရင်တော့ မဟုတ် သေးဘူး၊ သို့သော်လည်း ဗမာပြည်မှာ လုပ်နေတဲ့ ပြုပြင်ပြောင်းလဲရေး အခြေအနေတွေဟာ အမေရိကန်နိုင်ငံက စိတ်ချလက်ချ မရှိသေးဘူးဆိုတာကို ပြချင်တာလားဆိုတာ စဉ်းစားစရာ ရှိပါတယ်။"

မနေ့ကတော့ ၀ါရှင်တန်အခြေစိုက်တဲ့ လူ့အခွင့်အရေးလှုပ်ရှားသူတွေဟာ သမ္မတအိမ်ဖြူတော်မှာပဲ အိမ်ဖြူတော်အကြီးတန်းအရာရှိတွေနဲ့ တွေ့ဆုံပြီး သမ္မတအိုဘားမားရဲ့ မြန်မာနိုင်ငံနဲ့ ကမ္ဘောဒီး ယားနိုင်ငံ ခရီးစဉ်အပေါ်မှာ ဆွေးနွေးတိုက်တွန်းမှုတွေ လုပ်ခဲ့ပါတယ်။ အဓိကကတော့ လူ့အခွင့် အရေးဆိုင်ရာကိစ္စတွေပါ။ တတ်ရောက်ခဲ့သူတဦးဖြစ်တဲ့ Amnesty International နိုင်ငံတကာ လူ့အခွင့်အရေးအဖွဲ့က T Kumar ကတော အဓိက အချက်သုံးချက်ကို ဆွေးနွေး တင်ပြခဲ့တယ်လို့ ဆိုပါတယ်။

“အဓိက သုံးချက်ရှိပါတယ်။ ပထမအချက်ကတော့ အကျဉ်းထောင်တွေထဲမှာ ကျန်နေသေး တဲ့ နိုင်ငံရေးအကျဉ်းသားတွေ ကိစ္စပါ။  ဒီလူတွေ လွတ်မြောက်လာဖို့ ကိစ္စကို သမ္မတအိုဘားမား အနေနဲ့ အားသွန်ခွန်စိုက် တွန်းအားပေးဖို့လိုပါတယ်။ နောက်တချက်ကတော့ ရိုဟင်ဂျာ လူနည်းစုတွေအနေနဲ့ မြန်မာနိုင်ငံထဲက အခြားလူမျိုးစုတွေနည်းတူ အခွင့်အရည်တန်းတူရဖို့ ကိစ္စဖြစ်ပါတယ်။ နောက် - အမေရိကန် ကုမ္ပဏီတွေ မြန်မာနိုင်ငံထဲ ရင်းနှီးမြုပ်နှံကြတဲ့အခါမှာ လူ့အခွင့်အရေးနဲ့ စီးပွားရေး လုပ်ငန်းဆိုင်ရာမှာ နိုင်ငံတကာစံနှုန်းစံထားတွေအတိုင်း လိုက်နာကြဖို့ သမ္မတအိုဘားမားအနေနဲ့ အမေရိကန် စီးပွားရေးလုပ်ငန်းတွေကို တွန်းအားပေးသင့်ပါတယ်။”

ဒီ ခရီးစဉ်ဟာ စောလွန်းသေးတယ်ဆိုပြီး ကန့်ကွက်တဲ့အထဲမှာ Amnesty International လည်း  ပါဝင်ပါတယ်။ နေပြည်တော်ကို သွားသည်ဖြစ် မသွားသည်ဖြစ်စေ နိုင်ငံတကာအမြင်မှာ သမ္မတ အိုဘားမားရဲ့ ခရီးစဉ်ဟာ မြန်မာအစိုးရကို အပြုသဘော လက္ခဏာပြချက်ပဲဖြစ်တယ်လို့ T kumar က ယူဆပါတယ်။ USCB ဦးအောင်ဒင်ကတော့ မြန်မာအစိုးရရဲ့ ပြုပြင်ပြောင်းလဲမှုတွေဟာ သိသာထင်ရှားတဲ့ တိုးတက်မှုတွေ မတွေ့ရတာကြောင့် သူတို့အနေနဲ့ ဒီခရီးစဉ်ကို ကန့်ကွက်ရတာ ဖြစ်တယ်လို့ ပြောပါတယ်။

“သမ္မတဦးသိန်းစိန်ရဲ့ လုပ်ရပ်တွေအပေါ်မှာ ကျနော်တို့ ဘာမှ သေချာတဲ့၊ စိတ်ချရတဲ့ အာမခံချက် မရှိသေးဘူးပေါ့ဗျာ။ သူကတော့ ပြောနေတာပေါ့။ နောက်ကြောင်းပြန်မလှည့်ပါဘူး၊ ရှေ့ဆက် တိုးပါ့မယ်တို့- ဒါပေမဲ့လည်း လုပ်နေတဲ့အပြောင်းအလဲတွေက တကယ်တန်းကျတော့ တဝက် တပျက်ပဲ ရှိသေးတယ်ဗျ။ ဥပမာဆိုပါတော့- နိုင်ငံရေးအကျဉ်းသားတွေကို လွှတ်ပေးတယ်။ သို့သော်လည်း နောက်ထပ် နိုင်ငံရေးအကျဉ်းသား ၃၀၀ ကျော်လောက်က အခုအချိန်အထိ ဖမ်းဆီး ထိန်းသိမ်းထားဆဲပဲ ဖြစ်တယ်။ နောက် ဘယ်တုန်းကမှလည်း နိုင်ငံရေးအကျဉ်းသား ရှိပါတယ် လို့ ဝန်မခံခဲ့ဘူး။ ဒီလူတွေဟာ ပြစ်မှုကျူးလွန်လို့ ထောင်ကျခဲ့တာလို့ - ဒီမျိုးပဲ သူ အမြဲ ပြောခဲ့တာကိုး။”

သမ္မတအိုဘားမားဟာ ရန်ကုန်ခရီးစဉ်အတွင်း မြန်မာသမ္မတဦးသိန်းစိန်၊ မြန်မာ့ ဒီမိုကရေ စီခေါင်းဆောင် ဒေါ်အောင်ဆန်းစုကြည်တို့အပြင် အခြား လူမှုအဖွဲ့အစည်းက ကိုယ်စားလှယ်တွေနဲ့ လည်း တွေ့ဆုံမယ်လို့ သိရပါတယ်။ ဒီခရီးစဉ်ဟာ အချိန်စောလွန်းသေးတယ်လို့ လူ့အခွင့်အရေး အဖွဲ့အစည်းတွေက ယူဆကြပေမယ့် ဒီခရီးစဉ်ကြောင့် မြန်မာအစိုးရ လုပ်နေ တဲ့ ပြုပြင်ပြောင်းလဲ မှုတွေကို အားပေးရာရောက်ပြီး အခြေအနေတွေ ပိုတိုးတက်ကောင်းမွန်လာနိုင်တယ်လို့လည်း ယူဆမှုတွေ ရှိကြပါတယ်။

အကျဉ်းသား ၄၅၀ လွှတ်မည်

မြန်မာအစိုးရအနေနဲ့ အကျဉ်းထောင်တွေထဲက အကျဉ်းသား ၄၅၀ ကို အမေရိကန်သမ္မတ အိုဘားမား မလာရောက်ခင် ပြန်လွှတ်ပေးမယ်လို့ မြန်မာ သမ္မတရုံး ညွှန်ကြားရေးမှူး ဦးဇော်ဌေး ကို မြန်မာနိုင်ငံ အခြေစိုက် သတင်းဌာနတွေက ဖော်ပြနေကြပါတယ်။ ဒါပေမဲ့ ဒီအထဲမှာ နိုင်ငံရေး အကျဉ်းသားတွေ ပါမယ်၊ မပါဘူးဆိုတာကတော့ ရှင်းရှင်းလင်းလင်း မသိရသေးဘူးလို့ ဆိုပါတယ်။ ဒီသတင်းနဲ့ ပတ်သက်ပြီး Amnesty International ခေါ် နိုင်ငံတကာ လွတ်ငြိမ်းချမ်းသာခွင့်အဖွဲ့ရဲ့ အာရှရေးရာ တာဝန်ခံ မစ္စတာ T Kumar က အခုလို ပြောကြားလိုက်ပါတယ်။

“အခု လွှတ်ပေးမယ်ဆိုတဲ့ ၄၅၀ ထဲမှာ ရာဇဝတ်သားတွေ ဘယ်လောက် ပါနေသလဲဆိုတာ ကျနော် တို့ မသိပါဘူး၊ ဒါကြောင့် အစိုးရအနေနဲ့ ဘယ်သူတွေကို လွှတ်ပေးမယ်၊ ဘယ်သူတွေကို လွှတ်ပေး တယ် ဆိုတာကို တရားဝင် ထုတ်ပြန်ပေးဖို့ လိုပါတယ်။ ယုံကြည်မှုကြောင့် အကျဉ်းကျနေ သူတွေ ဘယ်လောက်ပါနေတယ်ဆိုတာကို ဒီလို ထုတ်ပြန်တဲ့အခါမှသာ ကျနော်တို့ သိနိုင်တာ ဖြစ်ပါ တယ်။ အခုအချိန်အထိ သူတို့ဟာ ဘာကြောင့် အားလုံးကို မလွှတ်ပေးနိုင်ဘူးလဲဆိုတာကို ကျနော်တို့ သိပ် နားလည်ရ ခက်ပါတယ်။”

သမ္မတအိုဘားမားသွားရောက်မယ့် ခရီးဟာ မြန်မာနိုင်ငံအတွက် အတော် အကျိုးရှိမဲ့ ခရီးစဉ်ဖြစ်တဲ့ အတွက် ဒီခရီးစဉ်မတိုင်ခင် ယုံကြည်မှုကြောင့် အကျဉ်းကျနေသူ အားလုံးကို လွှတ်ပေးသင့်တယ် လို့လည်း မစ္စတာ ကူးမားရ်က ဆက်ပြောပါတယ်။

“သမ္မတအိုဘားမားသွားရောက်မယ့် ခရီးစဉ်ဟာ မြန်မာနိုင်ငံအတွက် သိပ်ကို အရေးပါတဲ့၊ ကြီးမဉ်ားတဲ့ အင်အားပေးမှု တရပ်ဖြစ်ပါတယ်။ ဒီအချိန်မှာ မြန်မာနိုင်ငံအနေနဲ့ ယုံကြည်မှုကြောင့် အကျဉ်းကျနေတဲ့ အကျဉ်းသားတွေ အားလုံးကို လွှတ်ပေးဖို့ လိုအပ်ပါတယ်။ ဒါကို ကျနော်တို့ အမြဲတမ်း တောင်းဆို နေခဲ့တာ ဖြစ်ပါတယ်။ ကျနော်တို့ဆီမှာ မှတ်သားထားတဲ့ စာရင်းဇယားအရ ယုံကြည်မှုကြောင့် အကျဉ်းကျနေတဲ့ လူတွေရဲ့ အရေအတွက်ဟာ အများကြီး ရှိနေပါတယ်။

..ဆိုတော့ အခုလွှတ်ပေးလာတဲ့ စာရင်းအတိုင်း ကျနော်တို့ နှိုင်းယှဉ်စစ်ဆေး ကြည့်ပြီးတဲ့အခါမှ ဘယ်နှစ်ယောက် ကျန်သေးတယ်ဆိုတာကို ကျနော်တို့ ပြောနိုင်မှာဖြစ်ပါတယ်။”

ဒီလို နိုင်ငံရေးအကျဉ်းသားတွေကို လွှတ်ပေးမယ်ဆိုတဲ့သတင်းကိုတော့ နိုဝင်ဘာလ ၁၅ ရက်နေ့ ထုတ် အစိုးရသတင်းတွေမှာ တရားဝင် ကြေညာမယ်လို့ ဦးဇော်ဌေးကို ကိုးကားပြီး မြန်မာ အခြေစိုက် သတင်းဌာနတွေက ဖော်ပြနေကြပါတယ်။ နိုင်ငံတကာ လူ့အခွင့်အရေး အဖွဲ့တွေက မစ္စတာ အိုဘားမား မြန်မာနိုင်ငံကို သွားရောက်တဲ့အခါ တိုင်းရင်းသား ပဋိပက္ခတွေ ဖြေရှင်းရေးနဲ့အတူ အကယုံကြည်မှုကြောင့် အကျဉ်းကျခံနေရသူတွေ အားလုံး လွတ်မြောက်ရေးကိုလည်း တောင်း ဆိုနေကြတာ ဖြစ်ပါတယ်။