12.11.2012 နေ့ဖတ်ရန်သတင်းများ

by Myanmar Journal on Monday, November 12, 2012 at 4:26pm ·

နောက်ဆက်တွဲ ငလျင်ဒဏ် စိုးရိမ်ရ

တနင်္ဂနွေနေ့ မနက်ပိုင်းက စစ်ကိုင်းတိုင်း ရွှေဘိုမြို့အနီး ဗဟိုပြုတဲ့ ငလျင်ကြီး လှုပ်ခတ်ခဲ့တဲ့ အတွက် သေဆုံးမှုတွေ ထိခိုက်ဒဏ်ရာရမှုတွေ ရှိနေသလို နောက်ဆက်တွဲ ငလျင်လှုပ်ခတ်မှုတွေ ရှိလာနိုင်တာမို့  သတိရှိကြဖို့  ပညာရှင်တွေက သတိပေးနေပါတယ်။

မြန်မာနိုင်ငံတွင်း ကူညီကယ်ဆယ်ရေးတွေ  လုပ်နေတဲ့  Save the Children  အဖွဲ့က ငလျင်ကြောင့် သေဆုံးသူ ၁၁ ဦး ရှိပြီလို့ ပြောကြားသလို  အစိုးရ ထုတ်ပြန်တဲ့ သတင်းမှာတော့  အခုချိန်အထိ ၄ ဦး ရှိပြီလို့ အတည်ပြုထားပါတယ်။ ဒီငလျင်ဒဏ် ခံခဲ့ရတာနဲ့ ပတ်သက်ပြီး  နောက်ဆုံး အခြေအနေတွေကို တော့ ဒေါ်ခင်မျိုးသက်က တင်ပြထားပါတယ်။

တနင်္ဂနွေနေ့က လှုပ်ခတ်ခဲ့တဲ့ ငလျင်ကြောင့်  သပိတ်ကျင်းမှာ အိမ်ပြိုပြီး သေဆုံးသူ တဦး၊ ကျောက်မြောင်းမှာ အမျိုးသမီးတဦးနဲ့ နွယ်ရုံမှာ အမျိုးသားတဦးအပြင် ဧရာဝတီမြစ်ကူး တံတားသံဘောင် ကျိုးကျတာကြောင့် သေဆုံးရသူ တဦးရှိတယ်လို့  အစိုးရက သတင်းထုတ်ပြန်ပါတယ်။ 

မြန်မာနိုင်ငံထဲမှာ ကူညီကယ်ဆယ်ရေးတွေ လုပ်နေတဲ့ ဗြိတိန်အခြေစိုက် Save the Children အဖွဲ့က ဌာနေ ကိုယ်စားလှယ် Denis De Poerk ကတော့ ငလျင်ကြောင့်သေဆုံးသူ ၁၁ ဦး ရှိကြောင်း ဗွီအိုအေ ကို အတည်ပြုပြောဆိုပါတယ်။

“ငလျင်ဒဏ်ခံခဲ့ရတဲ့  ဒေသထဲမှာနေတဲ့ လူတွေကိုရော၊  ဒေသအာဏာပိုင်တွေအပြင် ဒေသထဲမှာ ကူညီကယ်ဆယ်ရေး လုပ်နေတဲ့ ကျနော်တို့လို အဖွဲ့တွေကိုပါ ဆက်သွယ် စုံစမ်းကြည့်တဲ့အခါမှာ သေဆုံးခဲ့သူက အခုထိ စုစုပေါင်း  ၁၁ ဦးရှိနေပြီး အယောက် ၄၀ လောက် ဒဏ်ရာရခဲ့တယ်လို့ သိရပါတယ်။  ဒါ့ထက်လည်း ပိုလာနိုင်ပါသေးတယ်။ ကျနော်တို့ မန္တလေး ဆေးရုံကြီးကို ပါသွားပြီးမေးပါတယ်။ အဲဒီမှာ ငလျင်ကြောင့် ရောက်လာတဲ့ လူနာ ၁၀ ဦးလောက် ဆေးရုံတင်ထားတယ်လို့ ဆိုပါတယ်။”

ဒီသေဆုံးသူတွေထဲမှာ  စဥ့်ကူက ရွှေတွင်းတွေ ရှိရာဒေသမှာ တွင်းပြိုပြီး သေဆုံးရသူတွေ ရှိနေတယ်လို့ လည်း ပြောပါတယ်။

“ ဒီနေ့ ကျနော်တို့ ရတဲ့ သတင်းအရဆိုရင် ငလျင် ဗဟိုချက်နဲ့ နီးတဲ့ မြို့နယ်တွေထဲက တခုမှာ ၆ ယောက် သေဆုံးပြီး အဲဒီထဲမှာ  ရွှေတွင်းပြိုလို့ သေဆုံးရတဲ့သူက ၂ ဦး ပါနေပါတယ်။”

မြန်မာနိုင်ငံဟာ ငလျင်ရပ်ဝန်းထဲမှာ ကျရောက်နေပြီး အခုလှုပ်ခတ်ခဲ့တဲ့ ငလျင်ဟာ စစ်ကိုင်း ပြတ်ရွေ့ကြောမှာ လှုပ်ခတ်ခဲ့တာပါ။ မြေလွှာပြတ်ရွေ့မှုကြောင့် တနှစ်ကို ၂ စင်တီမီတာလောက် ရွေ့လျားနေတဲ့ စစ်ကိုင်းပြတ်ရွေ့မှာ ပုံမှန် ငလျင် လှုပ်ခတ်လေ့ရှိတယ်လို့ မြန်မာနိုင်ငံ မြေငလျင် ကော်မတီ အတွင်းရေးမှုး ဦးစိုးသူရထွန်းက ပြောပါတယ်။

“ငလျင်က မန္တလေးမြို့ရဲ့ မြောက်ဘက် ရွှေဘိုမြို့ရဲ့ အရှေ့မြောက်ဘက်မှာ သူက စစ်ကိုင်းပြတ်ရွေ့ပေါ်မှာ လှုပ်ခဲ့တယ်ဆိုတာ သိရတယ်။ စစ်ကိုင်းပြတ်ရွေ့က အလျားလိုက်ပြတ်ရွေ့ဆိုတော့ သူက ဖြစ်လေ့ဖြစ်ထရှိတဲ့ အတိုင်းပဲ။ အကြမ်းဖျင်းဆိုရင် သူက အနက် ဆယ်ကီလိုမီတာ တနည်းပြောရရင် ၆ မိုင်လောက်ပဲ ရှိတယ်ဆိုတော့ တိမ်တဲ့အထဲမှာ ပါပါတယ်။”

တိမ်တဲ့ငလျင် လှုပ်ခတ်ခဲ့တဲ့ နောက်ဆက်တွဲ ဆိုးကျိုးတွေက ဘာတွေပါလဲ။ - 

“ငလျင်တိမ်ရင် လူတွေမှာ အရမ်းကို ခံစားရပါတယ်။ တော်လဲ သံကြားရတာတို့ သဲတွေ ပန်းထွက်တာတို့ ဖြစ်တတ်ပါတယ်။ ပမာဏမကြီးပေမဲ့ လူတွေအတွက် အတော်သိသာပါတယ်။”

ဒီငလျင်ကြောင့် ဖြစ်ခဲ့ရတဲ့ အပျက်အစီးတွေကိုလည်း အခုလို ပြောပြပါတယ်။

“အပျက်အစီးတွေထဲမှာ သိရသလောက် အကြီးဆုံးကတော့ ဧရာဝတီမြစ်ကို ဖြတ်ဖို့လုပ်နေတဲ့ တံတား ဆောက်လုပ်ဆဲမှာ ပြိုကျသွားခဲ့တာပါ။ ကျန်တာကတော့  ငလျင်နဲ့ အနီးဆုံးဖြစ်တဲ့ ကျောက်မြောင်း တို့ မလယ်တို့ ဆိုတဲ့ ရွာတွေ မြို့လေးတွေမှာ အပြိုအပျက်တွေ ရှိတယ်။ အိမ်တွေလည်း ပြိုတယ်။ တော်တော်လေး ရှေးဟောင်းဖြစ်နေတဲ့ အဆောက်အအုံတွေ ဘုရားတွေ ပြိုတာလည်း များပါတယ်။”

နောက်ဆက်တွဲ ငလျင်တွေ လှုပ်တဲ့ အနေအထားကို ရှင်းပြပေးပါလား။ - 

“နောက်ဆက်တွဲ ငလျင်တွေက ပထမဦးဆုံး အကြီးဆုံးငလျင် ဗဟိုချက်ရဲ့ တောင်ဘက် ကို ရောက်နေတာ တွေ့တယ်ပေါ့။ ကျနော်တို့ ရှုထောင့်ကတော့ ငလျင်ဗဟိုချက်တွေ၊ ဒီလို နောက်ဆက်တွဲ ငလျင်တွေကို ကြည့်ပြီးတော့ ဘယ်လောက်ထိ ရွေ့ ပြတ်သွားတဲ့ မြေသား ပမာဏ ရှိတယ် ဆိုတာကို ခန့်မှန်းတာပေါ့လေ။ မနက်ပိုင်း ငလျင်ကြီး လှုပ်ပြီးတဲ့အချိန်မှာ နောက်ထပ် နှစ်ကြိမ်လောက်ကို ဆက်တိုက်လှုပ်တယ်။ နောက် ညနေပိုင်းလောက်မှာ တကြိမ် နည်းနည်း ပိုအားကြီးတဲ့ ပမာဏ ၅.၈ လောက်ရှိတဲ့ ငလျင် လှုပ်တာ တွေ့ရပါတယ်။ ဆိုတော့ နောက်ထပ် နှစ်ရက် သုံးရက်၊ ဒါမှမဟုတ် တပတ်လောက် အထိလည်း ရှိနေတတ်တဲ့ သဘောတော့ ရှိပါတယ်။”

ဘယ်ဒေသတွေမှာ နေထိုင်တဲ့သူတွေ အတွက် နောက်ထပ် လှုပ်တဲ့ ငလျင်တွေကို သတိထားဖို့ လိုပါလဲ။ ဒေသလေး နည်းနည်း ပိုင်းပြီးတော့ ပြောပြပေးပါလား။ - 

“ဟုတ်ကဲ့။ ဒေသအနေနဲ့ကတော့ အလွယ်ဆုံး ပြောရင်တော့ ပထမဆုံး ငလျင်ကြီးကို ခံစားရတဲ့ လူတွေ အားလုံးနဲ့ ဆိုင်တယ်လို့ ပြောရမှာပေါ့။ အခု ကျနော် သိရသလောက်ကတော့ မန္တလေး၊ စစ်ကိုင်း၊ မုံရွာပေါ့ ၀န်းကျင်ဒေသတွေမှာ ခံစားရတယ်။ နောက်ပြီးတော့ နည်းနည်း အလှမ်း ဝေးပေမဲ့ သိသာခံစားရတာက တောင်ကြီးနဲ့ အင်းလေး ဒေသတို့၊ နောက်တခါ အပေါ်က မူဆည်၊ ရွှေလီ၊ နန်းခမ်း ဒေသတို့ အဲဒီလောက်အထိတောင်မှ ခံရတာတွေ ရှိတယ်ပေါ့။ ဆိုတော့ သူတို့ ဒေသတွေ အားလုံးမှာလည်း နောက်ဆက်တွဲ ငလျင်ကို သတိထားသင့်ပါတယ်။ ကနဦးငလျင်ကြောင့် အက်ကြောင်းတွေ ရှိခဲ့ရင် ပြိုပျက်ဖို့အတွက် လမ်းကြောင်းတွေ ရှိခဲ့ရင် နောက်ဆက်တွဲ ငလျင်ငယ်တွေ ကနေပြီးတော့ ဖြိုဖျက်နိုင်တဲ့ အားမျိုး ဖြစ်သွားစေတယ်ပေါ့။ ဆိုတော့ အန္တရာယ် ရှိနေတယ်လို့ ပြောရမှာပေါ့။ အဓိက ကတော့ အဆောက်အဦး ပြိုပျက်တဲ့ အန္တရာယ်ပေါ့။ ကိုယ်နေတဲ့ အဆောက်အဦးတွေ ပြိုပျက်နေတဲ့ အခြေအနေတွေ ရှိ မရှိကို အရင်ဆုံး လေ့လာသင့်ပါတယ်။”

အခု အားပြင်းငလျင်ကြီး လှုပ်ခတ်ခဲ့တဲ့နောက်ပိုင်းမှာ နောက်ဆက်တွဲ ငလျင်တွေရဲ့ အန္တရာယ်ကို သတိထားဖို့ လိုအပ်တယ်လို့လည်း ဦးစိုးသူရထွန်းက ပြောပါတယ်။

ငလျင်ဘေး အကူအညီပေးမှုတွေ စတင်

 

ရွှေဘိုငလျင်ဘေးသင့်ပြည်သူများ ယာယီနားခို စခန်းတွေမှာ နေထိုင်နေကြစဉ်။ (နိုဝင်ဘာ၁၂၊ ၂၀၁၂။)

လူအသေအပျောက်တွေ ရှိတဲ့အထိ ဖြစ်ခဲ့တဲ့ ငလျင်ဒဏ်ကြောင့် ဒုက္ခရောက်ကြရသူတွေ ကို   နိုင်ငံရေးပါတီတွေနဲ့ လူမှုရေးအသင်းအဖွဲ့တွေက အကူအညီတွေ စပေးနေကြပြီ ဖြစ်ပါတယ်။ NLD အမျိုးသားဒီမိုကရေစီအဖွဲ့ချုပ်က ငလျင်ဒဏ် ခံခဲ့ရတဲ့ ဒေသတွေအတွက် ဒီကနေ့ ကျပ် သိန်း ၁၀၀ လှုခဲ့ပြီး ဦးကျော်သူ ဦးဆောင်တဲ့ နာရေးကူညီမှုအသင်း ကလည်း ဆေးဝါး အကူအညီတွေ ပေးပို့ဖို့ စီစဉ်နေပြီ ဖြစ်ပါတယ်။ ဒီအကြောင်း အပြည့်အစုံကိုတော့ ဆက်သွယ်စုံစမ်းထားတဲ့ ကိုဇော်ဝင်းလှိုင်က တင်ပြပေးမှာပါ။

ဒေါ်အောင်ဆန်းစုကြည်က ဒီကနေ့ သူ့ရဲ့ အိန္ဒိယခရီးစဉ်မထွက်ခွာခင် ညွန်ကြားခဲ့တာကြောင့် စစ်ကိုင်းတိုင်းနဲ့ မန္တလေးတိုင်းဒေသတွေမှာ ငလျင်ဒဏ်ခံရပြီး ဒုက္ခရောက်နေကြသူတွေအတွက် NLD အမျိုးသားဒီမိုကရေစီအဖွဲ့ချုပ်က တိုင်းတစ်တိုင်းကို ကျပ် သိန်း ၅၀ စီ လှုဒါန်းလိုက်တယ်လို့ မန္တလေးတိုင်း၊ မဟာအောင်မြေမဲဆန္ဒနယ် ကိုယ်စားပြု လွှတ်တော်အမတ်လည်းဖြစ်၊ NLD ပြောခွင့်ရပုဂ္ဂိုလ်လည်းဖြစ်တဲ့ ဦးအုန်းကြိုင်က ပြောပါတယ်။ 

“ဒီကနေ့မနက်ပိုင်းက ကျနော်တို့ အမျိုးသားဒီမိုကရေစီအဖွဲ့ချုပ်ဥက္ကဌ ဒေါ်အောင်ဆန်းစုကြည်က မန္တလေးတိုင်းနဲ့ စစ်ကိုင်းတိုင်းက ငလျင်ဘေးသင့်မြို့နယ်များက သေဆုံးသူတွေ၊ နောက် ထိခိုက်ဒဏ်ရာရသူတွေ၊ နောက်အိုးအိမ်ပျက်စီးပြီးတော့ အတိဒုက္ခရောက်သူတွေအတွက် တိုင်းတစ်တိုင်းကို မန္တလေးတိုင်းအတွက် သိန်းငါးဆယ်၊ စစ်ကိုင်းတိုင်းအတွက် သိန်းငါးဆယ်၊ မတည်ရင်းနှီးငွေအဖြစ် ကျနော်တို့ ပေးပို့လှူဒါန်းပါတယ်။ ကျနော်တို့ တိုင်းကော်မရှင်တွေဆီကို ပို့တာပါ။ မန်းတိုင်းဆိုရင် မန်းတိုင်းကော်မရှင်အတွင်းရေးမှူး ဦးမျိုးနိုင်ဆီကို၊ ဗဟိုက အတွင်းရေးမှူး ဦးဟံသာမြင့် စစ်ကိုင်းတိုင်း ကော်မရှင်က ဒေါ်ခင်သန်းဆီကို အမြန်ဆုံး သိန်းငါးဆယ်စီ ပို့လိုက်တာဖြစ်ပါတယ်။ ငွေသားကြီးပဲပို့လိုက်တာပါ။ ဘဏ်ကနေ ပို့လိုက်တာပါ။ ခရီးမထွက်ခင်မှာ စီစဉ်ပေးသွားတာပါ။ မနေ့ကထဲက မနေ့ကညက ညွန်ကြားလိုက်ပြီးတော့ ဒီနေ့ မနက် ကျနော်တို့ ချက်ခြင်းအကောင်အထည်ဖော်လိုက်တာဖြစ်ပါတယ်။”

အဲဒီ အကူအညီတွေကို လိုအပ်တဲ့နေရာတွေ အမြန်ဆုံးရောက်နိုင်အောင် နေ့တွင်းချင်းပဲ စီစဉ်နေကြပြီလို့ ဦးအုန်းကြိုင်က ဆက်ပြောပါတယ်။

“အဲ့ဒီ့ငွေတွေကို မတည်ပြီးတော့ ချက်ခြင်းပဲ သက်ဆိုင်ရာဒေသမှာရှိတဲ့ စေတနာရှင်များရဲ့ ပံ့ပိုးကူညီမှုတွေနဲ့ ထပ်ပေါင်းပြီးတော့ပေါ့လေ ဒီနေ့ပဲ သူတို့မြို့နယ်တွေကို ဆက်သွယ်ပြီးတော့ အမြန်ဆုံး ပံ့ပိုးကူညီနိုင်အောင် စီစဉ်နေပြီဖြစ်ပါတယ်ခင်ဗျ။ ကျနော်တို့တိုင်းက ကော်မရှင်တွေကတော့ ဒီကနေ့ပဲ သပိတ်ကျင်းတို့ ဘာတို့ ချက်ခြင်းပဲ သူတို့ သက်ဆိုင်ရာ ကော်မရှင်တွေနဲ့ဆက်သွယ်နေတယ်။ လိုအပ်ရင် သူတို့ကွင်းဆင်းပြီး ဆောင်ရွက်ကြလိမ့်မယ်။ အဲ့တာလုပ်နေပါတယ်ခင်ဗျ။ ”

NLD ပြောခွင့်ရပုဂ္ဂိုလ် ဦးအုန်းကြိုင် ပြောပြခဲ့တာပါ။

အလားတူပဲ ငလျင်ဒဏ်ခံခဲ့ရတဲ့ ဒေသတွေက လူမှုရေးအသင်းတွေက ဒဏ်ရာရနေကြတဲ့သူတွေကို ဆေးကုသတဲ့နေရာမှာ ဆေးဝါး အကူအညီတွေ လိုအပ်တဲ့အကြောင်း အကူအညီတောင်းလာတဲ့အတွက် မကြာခင် သူတို့လိုအပ်နေတဲ့ ဆေးဝါးတွေ ပို့ပေးနိုင်ဖို့ အမြန်ဆုံး စီစဉ်နေတယ်လို့လည်း နာရေးကူညီမှုအသင်း အကြီးအကဲ ဦးကျော်သူက ပြောပါတယ်။

“ဒီနေ့ ကျနော်တို့ကို လာပြီး ကမ်းလှမ်းတယ်။ ကမ်းလှမ်းတယ်ဆိုတာက ရွှေဘိုနားမှာပေါ့လေ။ ဆေးရုံမှာ ဆေးဝါးလိုအပ်တယ်။ အဲ့တာဆေးကူဖို့တော့ ကျနော်တို့ လုပ်နေပါတယ်။ မနက်ဖန်၊ သဘက်ခါလောက် ပို့ဖို့ရှိတယ်။ ရန်ကုန်ကနေ ပို့ပါမယ်။”

မေး။  ။ ဆိုတော့ ဘယ်လောက်အတိုင်းအတာအထိ သူတို့လိုအပ်သလဲခင်ဗျာ။ ဦးကျော်သူတို့ ဘယ်လောက်အထိ အကူအညီပေးမလဲဆိုတာရော စီစဉ်ပေးနေပါသလဲ။

“ ကျနော်တို့ အဲ့ဒီ့ဆေးရုံက ဆရာဝန်တွေနဲ့ အဆက်အသွယ်မရသေးဘူး။ ဆရာဝန်ကြီးတွေကို အဆက်အသွယ်လုပ်ခိုင်းထားတယ်။ လိုအပ်တဲ့ဆေး၊ ဟိုဘက်မှာ အခက်အခဲဖြစ်နေတဲ့ဆေးဝါးကို ကျနော်တို့ ဒီကနေ ပံ့ပိုးဖို့၊  အစီအစဉ်ရှိပါတယ်။

မေး။  ။ ဆေးဝါးပဲလား၊ တခြား ပစ္စည်းတွေရော ပါသေးလားခင်ဗျာ။

“ လောလောဆယ်ကတော့  ဆေးရုံရောက်နေတဲ့ လူနာတွေအတွက်က ဆေးဝါးက အဓိကလိုတယ်။ ဒါကြောင့် ကျနော်တို့ ဆေးဝါး အဓိက လုပ်နေတယ်။”

မေး။  ။ သူတို့ဘက်က လူနာဘယ်လောက်ရှိတယ်ဆိုတာကို ပြောတာမျိုးရော ရှိပါသလားခင်ဗျာ။

“ အဲ့တာ အတိအကျမသိသေးဘူး။ ကျနော်တို့ နယ်ခံတယောက်ကနေပြီးတော့ လူမှုရေးအဖွဲ့တဖွဲ့ကနေပြီးတော့  ကျနော်တို့ဆီ ဆက်တာပါ။ ဆက်တော့ ကျနော်တို့ ဆရာဝန်နဲ့တွေ့ဖို့တော့ ချိတ်ထားတယ်။ ဆရာဝန်တွေ ကျနော်တို့ဆီတော့ အဆက်အသွယ်မလုပ်သေးဘူး။  မနက်ဖြန်လောက်မှ ဆက်မယ်ထင်တယ်။ ဒီညနေမှ ကျနော်တို့ဆီကို အကြောင်းကြားတာ။ ”

ဒီငလျင်ဒဏ်ကြောင့် သေဆုံး အနဲဆုံး ၁၂ ဦးလောက်ရှိပြီး ဒဏ်ရာရသူတွေလည်း အများအပြားရှိတယ်လို့ ဒေသခံတွေက ပြောပါတယ်။ ဒါပေမယ့် နောက်ဆက်တွဲ ငလျင်ငယ်တွေလည်း ဆက်လှုပ်နေသေးတဲ့အတွက် ပျက်ဆီး ဆုံးရှုံးမှုနဲ့ အသေအပျောက်စာရင်း အတိအကျ သိနိုင်ဖို့ ခက်နေပါသေးတယ်။

ငလျင်ကြောင့် အဖိုးမဖြတ်နိုင်တဲ့ သမိုင်းဝင် ရှေးဟောင်းစေတီပုထိုးတွေ အများအပြား ပျက်ဆီး ဆုံးရှုံးခဲ့ရသလို လူနေအိမ်တွေလည်း အတော်များများ ပျက်ဆီးခဲ့ရတာဖြစ်ပါတယ်။ မနေ့က ငလျင်လှုပ်ပြီးပြီးချင်းဆိုသလိုပဲ ဒုသမ္မတ စိုင်းမောက်ခမ်းကိုယ်တိုင် အဲဒီဒေသကို သွားရောက် ကြည့်ရှုစစ်ဆေးခဲ့ပြီး တခြား စေတနာရှင်တွေကလည်း ငလျင်ဒဏ်ခံခဲ့ရသူတွေအတွက် ငွေကြေးနဲ့ တခြား ရုပ်ဝတ္ထုပစ္စည်းတွေ လှုဒါန်းခဲ့ကြတယ်လို့သိရပါတယ်။

ဆီးရီးယားအတိုက်အခံ ညွန့်ပေါင်းအဖွဲ့ အသိအမှတ်ပြုခံရဖို့ ကြိုးပမ်း

ဆီးရီးယားအတိုက်အခံဖွဲ့

ဆီးရီးယား သမ္မတ ဘက်ရှာအယ်လ်အာဆက် ကို ဖြုတ်ချဖို့အတွက် အတိုက်အခံအဖွဲ့အစည်းတွေ စုစည်းပြီး ညွန့်ပေါင်းအဖွဲ့ ဖွဲ့စည်းပြီးတဲ့နောက် ဆီးရီးယားနိုင်ငံအရေးနဲ့ပတ်သက်ပြီး ဆွေးနွေးဖို့ အာရပ်အဖွဲ့ချုပ် တာဝန်ရှိသူတွေက စီစဉ်လိုက်ကြပါတယ်။ တနင်္လာနေ့မှာ အဖွဲ့ချုပ်အဖွဲ့ဝင် နိုင်ငံတွေက နိုင်ငံခြားရေးဝန်ကြီးတွေ ကိုင်ရိုမြို့မှာ အစည်းအဝေးမပြုလုပ်ခင် ဆီးရီးယားအရေး နိုင်ငံတကာ ငြိမ်းချမ်းရေး သံတမန် လာသီဘရာဟီမီးနဲ့ အာရပ်အဖွဲ့ချုပ် ခေါင်းဆောင် နဗေးအီအရဗီ တို့ တွေ့ဆုံခဲ့ကြပါတယ်။ တနင်္ဂနွေနေ့တုန်းကတော့ ဆီးရီးယားသမ္မတ အာဆပ်ကို တိုက်ခိုက်နေတဲ့ အတိုက်အခံတွေအဖွဲ့တွေ စုစည်းပြီးတော့ ဖွဲ့လိုက်တဲ့ ညွန့်ပေါင်းအဖွဲ့ရဲ့ခေါင်းဆောင်အဖြစ် အလယ်အလတ် အယူအဆရှိတဲ့ ဘာသာရေးဆရာတစ်ဦးဖြစ်တဲ့ Maath al-Khatib ကို ခေါင်းဆောင်အဖြစ် ရွေးချယ်လိုက်ကြပါတယ်။

တနင်္လာနေ့ ဒိုဟာမြို့မှာပြုလုပ်တဲ့ ဆီးရီးယားအတိုက်အခံ အဖွဲ့အစည်းရဲ့ အစည်းအဝေးအတွင်း စီးပွါးရေးသမား Riad Seif နဲ့ လူသိများထင်ရှားတဲ့ အမျိုးသမီး အရေးလှုပ်ရှားသူ Suhair al-Atassi တို့ ကို ညွန့်ပေါင်းအဖွဲ့ ရဲ့ ဒုတိယ ဥက္ကဌတွေအဖြစ် ရွေးချယ်လိုက်ကြပါတယ်။ အသစ်ဖွဲ့စည်းလိုက်တဲ့ အတိုက်အခံအင်အားစုအဖွဲ့အပေါ်  ထောက်ခံအားပေးမှုလုပ်ဆောင်ဖို့ မျှော်လင့်ထားတဲ့အကြောင်း တနင်္ဂနွေနေ့ နှောင်းပိုင်းမှာ သတင်းထုတ်ပြန်ပါတယ်။ ဆီးရီးယားနိုင်ငံမှာ ဒီမိုကရေစီနဲ့ ငြိမ်းချမ်းရေးရဖို့အတွက် နိုင်ငံကို သွေးထွက်သံယို အုပ်ချုပ်နေတဲ့ အာဆပ်အုပ်ချုပ်ရေး အဆုံးသတ်ဖို့အတွက် အတိုက်အခံ ညွန့်ပေါင်းအဖွဲ့ရဲ့ လုပ်ဆောင်မှုတွေကိုထောက်ခံအားပေးသွားမယ်လို့ ကြေညာချက်မှာ ဖော်ပြထားပါတယ်။ အတိုက်အခံညွန့်ပေါင်းအဖွဲ့ကတော့ သမ္မတအာဆပ်နဲ့ သူ့ရဲ့အစိုးရအဖွဲ့ဝင်တွေနဲ့ တွေ့ဆုံစကားပြောမှာမဟုတ်ဘူးလို့ပြောပါတယ်။

စစ်မှုထမ်းဟောင်းတွေကို သမ္မတ ဂုဏ်ပြု

 အမေရိကန်သမ္မတ Arlington National Cemetery ဂူဗိမာန်မှာ ဂုဏ်ပြုပန်းခွေ ချဂုဏ်ပြုစဉ်။

အမေရိကန်ပြည်ထောင်စုရဲ့ စစ်ပြန်စစ်မှုထမ်းဟောင်းများနေ့ ဖြစ်တဲ့ နိုဝင်ဘာလ ၁၁ ရက်နေ့မှာ သမ္မတ ဘားရက်အိုဘားမားဟာ ကမ္ဘာအနှံ့မှာ နိုင်ငံ့တာဝန် ထမ်းဆောင်နေကြတဲ့ အမေရိကန် စစ်သည်တော်တွေကို ကျေးဇူးတင် ဂုဏ်ပြုချီးမွမ်းလိုက်ပါတယ်။ 

စစ်ပြန်စစ်မှုထမ်းဟောင်းတွေအတွက် ပညာရေးနဲ့ ကျန်းမာရေးစောင့်ရှောက်မှုတွေ ပိုမိုကောင်းမွန်အောင် ပြုလုပ်ပေးမယ်လို့လည်းပြောလိုက်ပါတယ်။  စစ်ပြန်စစ်မှုထမ်းဟောင်းများနေ့မှာ အမေရိကန်သမ္မတက အာလင်တန်အမျိုးသား စစ်သင်္ချိုင်းမှာ အမည်မသိကျဆုံးသူတွေအတွက် အထိမ်းအမှတ်အုတ်ဂူမှာ ပန်းခွေချပြီးတဲ့နောက် အခုလိုပြောလိုက်တာဖြစ်ပါတယ်။

နှစ်စဉ်ကျင်းပနေကျ   စစ်ပြန်စစ်မှုထမ်းဟောင်းများနေ့ အစိုးရရုံးပိတ်ရက်မှာ သမ္မတ ဘားရက်အိုဘားမားက အမေရိကန်တပ်မတော်မှာ တာဝန်ထမ်းဆောင်ခဲ့ကြတဲ့ စစ်သည်တော်တွေကို ဂုဏ်ပြုစကားပြောဆိုတာ ဖြစ်ပါတယ်။

ဒီလိုနေ့မျိုးမှာ ကျနော်တို့ဟာ အမေရိကန်ပြည်ထောင်စုကြီးက ဆင်နွှဲသမျှ စစ်ပွဲတွေမှာ တာဝန်ထမ်းဆောင်ခဲ့ကြတဲ့ စစ်မှုထမ်းဟောင်းတွေ အားလုံးကို ကျေးဇူးတင် ဂုဏ်ယူခဲ့ကြရပါတယ်။ ဒါဟာ ကျနော်တို့ တိုင်းပြည်အတွက် တာဝန်ထမ်းဆောင်ခဲ့လို့သာ မဟုတ်ဘဲ အမေရိကားရယ်လို့ ဘာကြောင့်ဖြစ်တည်လာခဲ့ရသလဲ ဆိုတာကို ဟောဒီကမ္ဘာ့မြေပေါ်မှာ အမြဲတမ်း အကြီးမြတ်ဆုံးနိုင်ငံအဖြစ် တည်ရှိဖို့အတွက် စွမ်းစွမ်းတမံ ဆောင်ရွက်ပေးကြတဲ့အတွက် ဂုဏ်ပြုစကား ပြောကြားရတာဖြစ်တယ်လို့ အမေရိကန်သမ္မတ အိုဘားမားကပြောဆိုလိုက်ပါတယ်။

နောက်ဆက်တွဲ ငလျင်လှုပ်ခတ်မှုကြောင့် ဒေသခံတွေ စိုးရိမ်

 ရွှေဘိုငလျင်ဘေးသင့်ပြည်သူများ ယာယီဒုက္ခသည်စခန်းတွေမှာ ခိုလှုံနေကြစဉ် (နိုဝင်ဘာ ၁၂၊ ၂၀၁၂။)

မြန်မာပြည်အလယ်ပိုင်းဒေသမှာ တနင်္ဂနွေနေ့ မနက်ပိုင်းက ပြင်းအား ၆ဒသမ၈ အဆင့်ရှိ ငလျင်ကြီး ပြင်းပြင်းထန်ထန်လှုပ်ခတ် ပြီးတဲ့နောက် ပြင်းအားအတန်အသင့်ရှိတဲ့ ငလျင်ငယ်တွေဟာ ဒီမနက်ထိ ဆက်လက် လှုပ်ခတ် နေဆဲဖြစ်ပါတယ်။ ဒီလို ငလျင်ငယ်တွေ ဆက်တိုက် လှုပ်ခတ်နေတာကြောင့် ဒေသခံ ပြည်သူတွေဟာ အထိတ်တလန့်ဖြစ်နေကြပြီး မိုးဇလဌာန ငလျင်ဌာနခွဲက တာဝန်ရှိသူတဦးက ငလျင်ဒဏ်ခံခဲ့ရတဲ့ အဆောက်အဦးတွေရဲ့ ကြံခိုင်မှုကို သေချာ စစ်ဆေးမှုမလုပ်ဘဲ ဆက်လက် မနေထိုင်ဖို့အတွက် သတိပေးပြောကြားပါတယ်။ သတင်းအပြည့်အစုံကို ထိုင်းအခြေစိုက်သတင်းထောက် ကိုမိုးဇော်က တင်ပြပါမယ်။

တနင်္ဂနွေနေ့ မနက် ၇နာရီ ၄၂မိနစ်ကျော်မှာ စစ်ကိုင်းတိုင်းဒေကြီး  ရွှေဘိုမြို့ မြောက်ဖက် ၄၅မိုင်အကွာမှာ ဗဟိုပြုလှုပ်ခတ်ခဲ့တဲ ပြင်းအား ၆ဒသမ၈ အဆင့်ရှိ ငလျင်ကြီး လှုပ်ခတ်ပြီးတဲ့နောက်မှာ အဲ့ဒီ့နေ့မှာပဲ ပြင်းအား ရစ်ခ်ျတာ စကေး အဆင့် ၅လောက်ရှိတဲ့ နောက်ဆက်တွဲ ငလျင်ငယ် ၃ခု ဆက်လက်လှုပ်ခတ်ခဲ့ပါတယ်။

ဒီလိုနောက်ဆက်တွဲ ဆက်လက်ဖြစ်ပေါ်နေတဲ့ငလျင်ငယ်တွေဟာ ဒီကနေ့ အထိလည်း ဆက်လက် လှုပ်ခတ် နေဆဲဖြစ်တယ်လို့ ငလျင်ဒဏ်ကို အဆိုးဝါးဆုံး ခံခဲ့ရတဲ့ ရွှေဘိုခရိုင် ကျောက်မြောင်းမြို့နယ်ခွဲက ဒေသခံ တယောက်က ပြောပါတယ်။

“ငလျင်ကလည်းအခုထိ လှုပ်တုံး။ ဒီနေ့ မနက် ၉နာရီကျော်က အထိလှုပ်သွားသေးတယ်ဗျာ။ လူတွေ ထိတ်လန့်ယုံလောက်ပဲ ဖြစ်တယ်ဗျ။”

အခြားထိခိုက်မှုများပြားခဲ့တဲ့ မန္တလေးတိုင်း ဒေသကြီးက စဉ့်ကူးမြို့က ဒေသခံတဦးကတော့ ညကလည်း ငလျင်ငယ်တွေ အဆက်မပြတ်ဆိုသလို လှုပ်ခတ်နေတာကြောင့် လူတွေ အထိတ်တလန့်နဲ့ ဖြစ်ခဲ့ကြတယ်လို့ ပြောပါတယ်။

“ညပိုင်းကတော့ ၃ခါလောက် ၄ခါလောက် ဆက်တိုက်ပေါ့ဗျာ။ မနေ့ညကတော့ မအိပ်ရဘူးပေါ့ဗျာ။ လူတွေကတော့ အပြင်ဖက်ထွက်အိပ်နေကြတာပေါ့။ ဒါပေမဲ့ မအိပ်ရဘူး။ ခဏလေး နာရီ တနာရီ နှစ်နာရီလောက်ခြားပြီးရင် တခါ လှုပ်လိုက်ပေါ့။ သူက လင်းပိုင်းလောက်ထိ ၄နာရီလောက်ထိ လှုပ်တယ်ဗျ။ လှုပ်တာက ကျနော်တို့ ၁၂ခွဲလောက်က တော်တော်လေး လှုပ်လိုက်သေးတယ်ဗျ။ နောက်တခါ ၂နာရီလောက်က တခါ လှုပ်လိုက်သေးတယ်ဗျ။ ညပိုင်းကိုက ၃ခါ ၄ခါလောက်က အတော်လှုပ်တယ်ဗျ။ အရင်နီးပါးလောက် မပြင်းပေမဲ့လည်း အတော်ကို သိသာတယ်ဗျ။”

မိုးလေ၀သနဲ့ ဇလဗေဒညွှန်ကြားမှုဦးစီးဌာနက ဒီနေ့ထုတ်ပြန်တဲ့သတင်းမှာတော့ သန်းခေါင်ကျော် ၁နာရီအချိန်လောက်မှာ ပြင်းအား ၅ဒသမ၇ ရစ်ခ်ျတာစကေးရှိတဲ့ ငလျင်တခု ထပ်မံလှုပ်ခတ်ခဲ့ကြောင်း ဖော်ပြပါတယ်။

မိုးဇလဌာန ငလျင်ဌာနခွဲ၊ ဦးစီးအရာရှိ ဦးကျော်ကျော်လင်းကတော့ ငလျင်ကြီးတခုလှုပ်ပြီးတဲ့နောက် ရက်ပိုင်းကနေ လပိုင်းကြာအောင်အထိ ငလျင်ငယ်တွေ ဆက်တိုက်ဆိုလို ဆက်လက်လှုပ်ခတ်တတ်ကြောင်း ပြောပါတယ်။ တချို့ ပြင်းအား ၃လောက်သာ ရှိတဲ့ ငလျင်ငယ်တွေကိုတော့ သက်ဆိုင်ရာဌာနက တိုင်းထွာဖို့ ခက်ခဲကြောင်း ပြောပါတယ်။ 

“သူတို့ဒေသမှာတော့ အသေးလေးတွေပေါ့ဗျာ။ အသေးလေးတွေဆိုတာက ၃အဆင့်လောက်ပဲ ရှိတဲ့ ဟာမျိုးတွေပေါ့။ ၃ဆင့်လောက်ရှိတဲ့ဟာကျ ကျနော်တို့ တိုင်းထွာရေးစက်တွေနဲ့ နည်းနည်း ဝေးကွာ နေတဲ့အခါကျ တခါတလေ record မရတတ်ဘဲ ရှိတတ်တယ်။ ကျနော်တို့ရဲ့ တိုင်းထွာရေး စခန်းတွေက ဘယ်မှာရှိလဲဆို အဲဒီဖက်နဲ့ အနီးဆုံးဆို မန္တလေးမှာ ရှိတယ်။ မန္တလေးစက်က အဲဒီနားဆိုရင် ၄ အဆင့်၊ ၅အဆင့်လောက်မှ တိုင်းထွာလို့ ရတာ။ ၃အဆင့်လောက်ကျ ဒီစက်တွေက record မ၀င်ဘူး။ ဒါပေမဲ့ ဒေသခံတွေကတော့ ၃လောက်ဆိုရင်ကို ဘာပဲ ပြောပြော ငလျင်လှုပ်တယ်ဆိုပြီးတော့ သတိပြုမိတာပေါ့။”

ဒီလိုနောက်ဆက်တွဲငလျင်ငယ်တွေ ဆက်လက်လှုပ်ခတ်တတ်တာကြောင့် ငလျင်ကြီးလှုပ်စဉ်က ထိခိုက်ပျက်ဆီးခဲ့တဲ့နေအိမ်တွေကို သေချာစစ်ဆေးမှုမရှိဘဲ မနေထိုင်ဖို့ကိုလည်း ဦးကျော်ကျော်လင်းက အကြံပြုထားပါတယ်။

“ငလျင်ကြီးလှုပ်ခဲ့တဲ့အချိန်တုံးက ကိုယ်အိမ်တွေဘာတွေ ပျက်ဆီးသွားတယ်။ တချို့အိမ်တွေ ပြိုကျသွားတယ်ဆို အဲဒီပြိုကျနေတဲ့အဆောက်အဦးတွေ ပျက်ဆီးနေတဲ့ အဆောက်အဦးတွေကိုတော့ သေချာ အင်ဂျင်နီယာတွေနဲ့ စစ်ဆေးပြီးမှပဲ ပြန်လည်နေထိုင်တာတော့ ပိုပြီး သင့်တော်ပါတယ်။ အဲ့လို ပြိုပျက်သွားတဲ့ အဆောက်အဦး တွေက နောက်ထပ် ငလျင်ငယ်လေးတွေ လှုပ်လည်း ပြန်ပြီးတော့ နံရံတွေ ပြိုကျတာတို့ ဘာတို့ စသည့်ဖြင့် ပိုပြီးတော့ ပျက်နိုင်ပါတယ်။ ပျက်နိုင်တဲ့ အတွက်ပေ့ါလေ။ အဲ့လိုအဆောက်အဦး ဆိုရင်တော့ သေချာ ပြုပြင်ပြီးမှ ပြန်နေတာက ပိုသင့်တော်ပါတယ်။ လောလောဆည်တော့ အဲလို ပျက်ဆီးနေတဲ့ နေအိမ်တွေမှာ မနေဘဲနဲ့ တခြား ဆွေမျိုးသားချင်းအိမ်ပေါ့။ သို့မဟုတ် ယာယီအိမ်တွေမှာ သွားပြီး ရွှေ့ပြောင်းနေတာက ပိုပြီး သင့်တော်ပါတယ်။”

အစိုးရပိုင်သတင်းစာတွေမှာလည်း ငလျင်လှုပ်ချိန်နဲ့ လှုပ်ပြီးနောက် လိုက်နာဆောင်ရွက်ရမဲ့ အချက်တွေကို ဖော်ပြပြီး သတိပေးနိုးဆော်ထားပါတယ်။ တနင်္ဂနွေနေ့က လှုပ်ခတ်ခဲ့တဲ့ ငလျင်ကြောင့် ကျောက်မြောင်းနဲ့ စဉ်ကူးမြို့ကို ဆက်သွယ်ဖို့ ဆောက်လုပ်နေတဲ့ ရတနာသိင်္ဃခေါ် ဧရာဝတီ မြစ်ကူးတံတားပျက်ဆီးခဲ့သလို ဘုရားစေတီတွေ၊ ဘုန်းတော်ကြီးကျောင်းတွေနဲ့ အဆောက်အဦးတွေပျက်ဆီးခဲ့ရပြီး အနည်းဆုံး လူ တဒါဇင်လောက် သေဆုံးခဲ့ပါတယ်။ သမ္မတရုံး Website မှာတော့ ခြောက်ဦးသေဆုံးကြောင်း ဖော်ပြပါတယ်။

ငလျင်လှုပ်ခတ်ပြီးနောက်မှာတော့ နိုင်ငံတော် ဒုသမ္မတ ဒေါက်တာစိုင်းမောက်ခမ်းနဲ့အဖွဲ့ဟာ ငလျင်ဘေးသင့်တဲ့ဒေသကို ချက်ချင်းသွားရောက်ပြီး ဆေးဝါး၊ အစားအသောက်နဲ့ ထောက်ပံ့ငွေတွေ ပေးအပ်နေပါတယ်။ လောလောဆယ်မှာ စစ်ကိုင်းနဲ့ မန္တလေးတိုင်းဒေသကြီးက အာဏာပိုင်တွေနဲ့ လူမှုအဖွဲ့အစည်းတွေကလည်း ကူညီကယ်ဆယ်ရေးလုပ်ငန်းတွေကို ဆောင်ရွက်နေပါတယ်။

ပြီးခဲ့တဲ့နှစ် မတ်လအတွင်းကလည်း ရှမ်းပြည်နယ်အရှေ့ပိုင်း လွယ်မွေမြို့အနီးမှာ ဗဟိုပြုပြီး ပြင်းအားအဆင့် ၇ ရှိ ငလျင်လှုပ်ခတ်ခဲ့တာကြောင့် လူ ၇၀ကျော်သေဆုံးကြောင်း အစိုးရက သတင်းထုတ်ပြန်ပါတယ်။ ဒေသခံတွေကတော့ အနည်းဆုံး လူ ၁၃၀ကျော်လောက် သေဆုံးခဲ့တယ်လို့ ခန့်မှန်းပြီး ဒီငလျင်ကြီးလှုပ်ခတ်ပြီးတဲ့နောက်မှာ လနဲ့ချီပြီး ငလျင်ငယ်လေးတွေ မကြာခဏဆိုသလို လှုပ်ခတ်ခဲ့ပါတယ်။