09.11.2012 နေ့ဖတ်ရန်သတင်းများ
|
11:42 PM |
No မှတ်ချက် |
by Myanmar Journal on Thursday, November 8, 2012 at 9:29pm ·
အိုဘားမားရဲ့ မြန်မာ ခရီးစဉ် ဘယ်လောက် ထူးခြားမလဲ
ဒုတိယ သက်တမ်း ထပ်မံ အရွေးခံရပြီး မကြာခင် သမ္မတ အိုဘားမား မြန်မာ နိုင်ငံ သွားမယ်
သမ္မတ ဒုတိယ သက်တမ်း အတွက် ပြန်လည် ရွေးကောက် ခံရတဲ့ အမေရိကန် သမ္မတ ဘရက် အိုဘားမားဟာ လာမယ့် နိုဝင်ဘာ ၁၉ ရက်နေ့မှာ မြန်မာ နိုင်ငံကို လာရောက်မယ်လို့ သတင်းတွေက ဆိုပါတယ်။
ဒီခရီးစဉ်ဟာ အမေရိကန် သမ္မတ တစ်ယောက်ရဲ့ ပထမဆုံး မြန်မာနိုင်ငံ ခရီးစဉ် ဖြစ်ပါ လိမ့်မယ်။
မစ္စတာ အိုဘားမားဟာ မြန်မာ သမ္မတ ဦးသိန်းစိန်၊ အတိုက်အခံ ခေါင်းဆောင် ဒေါ်အောင်ဆန်း စုကြည် တို့နဲ့ တွေ့ဆုံ မယ်လို့လည်း ပြောနေကြ ပါတယ်။
မြန်မာ နိုင်ငံက သမ္မတရုံး ကို ဆက်သွယ် မေးကြည့်ရာမှာ တစုံ တရာ မှတ်ချက် မပေးနိုင် သေးဘူးလို့ သမ္မတရုံး ညွှန်ကြားရေးမှူး ဦးဇော်ဌေးက ပြော ပါတယ်။
ဒါပေမဲ့ နိုင်ငံရေး သုံးသပ်သူတွေ ကတော့ သမ္မတ အိုဘားမားရဲ့ ခရီးစဉ်ဟာ အလွန် ထူးခြားတဲ့ ခရီးစဉ် ဖြစ်လိမ့် မယ်လို့ ပြောဆိုနေကြပါတယ်။
ဂျပန် နိုင်ငံက သမိုင်း ပညာရှင် ဒေါက်တာ အေးချမ်းက စစ်အေး ကာလ တုန်းက မြန်မာ နိုင်ငံဟာ အမေရိကန် အတွက် မိတ်ဘက် နိုင်ငံ မဟုတ် ခဲ့တဲ့ အပြင် အမေရိကန်ရဲ့ အရှေ့တောင်အာရှ စာချုပ် အဖွဲ့ ဖွဲ့စည်းရေးကို ဆန့်ကျင်ခဲ့တဲ့ နိုင်ငံဖြစ်တာ ကြောင့်နဲ့ တရုတ်နဲ့ ရင်းနှီးတဲ့ ဆက်ဆံရေး ရှိခဲ့တာတို့ကြောင့် ခပ်တန်းတန်း ဆက်ဆံရေးမျိုးပဲ ရှိခဲ့တယ်လို့ ပြောပါတယ်။
ဒါပေမဲ့ လွန်ခဲ့တဲ့ နှစ်က စတင်ပြီး အမေရိကန် နိုင်ငံခြားရေး ဝန်ကြီး ဟေလာရီ ကလင်တန်ရဲ့ မြန်မာ ခရီးစဉ် စတင်ခဲ့ ပြီးတဲ့နောက် အံ့သြ လောက်အောင် နှစ်နိုင်ငံ ဆက်ဆံရေး တိုးတက် လာခဲ့တာ တွေ့ရတယ်လို့ လည်း သူက ပြောပါတယ်။
ဒါဟာ အရှေ့တောင် အာရှမှာ တရုတ် နိုင်ငံက သြဇာ ထူထောင် လာမှုက အမေရိကန်နဲ့ သူ့ မဟာမိတ်တွေ အတွက် စိုးရိမ်စရာ ဖြစ်လာခဲ့ချိန်မှာ ပထဝီ အနေအထား အရ အရေးပါတဲ့ မြန်မာ နိုင်ငံမှာ ခိုင်လုံတဲ့ အင်အား ချထားဖို့ လိုအပ် တယ်လို့ ယူဆပြီး ဆက်ဆံရေး တိုးမြှင့် လာတာလို့ ဒေါက်တာ အေးချမ်းက ယူဆ ပါတယ်။
အရင်က တင်းတင်း မာမာ ရှိခဲ့တဲ့ မြန်မာ အစိုးရက အပြုသဘော လုပ်ရပ်တွေ လုပ်ဆောင် လာတာ ကို အသိအမှတ်ပြုပြီး အနာဂတ် မှာ အမေရိကန်နဲ့ ဆက်ဆံရေး ပိုကောင်း လာစေမယ် ဆိုတဲ့ ကြီးမားတဲ့ ဆုကြီး ပေးလိုက်တဲ့ သဘောပဲလို့ သူက ဆိုပါတယ်။
ဒီမို ကရေစီရေး ပြုပြင် ပြောင်းလဲမှုတွေ ပြုလုပ် လာတာ အပေါ် နိုင်ငံ တကာ အသိုင်း အဝိုင်းက အခိုင် အမာ ထောက်ခံတယ် ဆိုတာ မစ္စတာ အိုဘားမား သွားမယ့် ခရီးစဉ်က ထပ်လောင်း ပြဆို လိမ့်မယ် ဆိုတဲ့ သုံးသပ်မှု တွေလည်း ရှိနေ ပါတယ်။
အမေရိကန် သမ္မတရဲ့ ပထမဆုံး မြန်မာခရီး
သမ္မတ အိုဘားမားနဲ့ နိုင်ငံခြားရေး ဝန်ကြီး ကလင်တန်
သမ္မတ အိုဘားမားရဲ့ အရှေ့တောင် အာရှ ခရီးမှာ မြန်မာနိုင်ငံ ပါမယ်လို့ အိမ်ဖြူတော်က ထုတ်ပြန် လိုက်ပါပြီ။
သမ္မတ သက်တမ်း ပူပူနွေးနွေးမှာ အခုလို သွားတာဟာ မြန်မာနဲ့ သံတမန် ဆက်ဆံရေး ပိုကောင်းအောင် လုပ်ဖို့ အရေးကြီးကြောင်း အချက်ပြ တာလို့ ဘီဘီစီ သတင်းထောက် ဒေးဗစ် ဘရမ်းဖို့က ပြောပါတယ်။
နောက်ပြီး ဒေသတွင်း တရုတ်သြဇာ ကြီးထွား လာနေတာကို တစိတ်တဒေသ ချိန်ခွင်ညှာ ညှိဖို့ အမေရိကန်ရဲ့ ဒေသတွင်း ပိုပြီး ပါဝင် ဆောင်ရွက်တဲ့ အခွင့်အရေး တရပ်လည်း ဖြစ်ပါတယ်။
မြန်မာအစိုးရက စီးပွားရေး နိုင်ငံရေး ပြုပြင် မှုတွေ လုပ်ပြတဲ့ အတွက် အရင်က စဉ်းစားလို့ မရတဲ့ သမ္မတ အဆင့် ချစ်ကြည်ရေး ခရီး အကောင်အထည် ပေါ်တော့မှာ ဖြစ်ပါတယ်။
အထီးကျန် ဖြစ်ခဲ့တဲ့ မြန်မာနိုင်ငံ အပေါ် အပြောင်းအလဲတွေ လုပ်ဖို့ သမ္မတ အိုဘားမားက ထက်သန်စွာ ထောက်ခံ အားပေးခဲ့ပါတယ်။
ပြီးခဲ့တဲ့ ဒီဇင်ဘာ က အမေရိကန် နိုင်ငံခြားရေး ဝန်ကြီး ဟီလာရီ ကလင်တန် ပထမဆုံး မြန်မာနိုင်ငံကို သွားပြီးနောက် နှစ်နိုင်ငံ ဆက်ဆံရေး ပုံမှန် ပြန်ရောက်ဖို့ ကြိုးစားမှုတွေ အတော် လျင်မြန် လာတယ်လို့ ပြောနိုင်ပါတယ်။
မြန်မာအစိုးရက နိုင်ငံရေး အကျဉ်းသားတွေ လွှတ်ပေးတာ၊ ဒေါ်အောင်ဆန်းစုကြည် ရွေးကောက်ပွဲ ဝင်ခွင့် ရအောင် လုပ်ပေးတာတွေကို ကြိုဆိုတဲ့ အနေနဲ့ အမေရိကန် ဘက်က သံအမတ်ကြီး အဆင့် ပြန်ခန့်ပြီး စီပွားရေး ပိတ်ဆို့ ထားတာတွေ ဆိုင်းငံ့ ခဲ့ပါတယ်။
နောက်ပြီး မြန်မာနိုင်ငံက ပို့ကုန် တင်သွင်းဖို့ တားမြစ်ချက်တွေ ကို ပြန်ခွင့်ပြုဖို့လည်း အမေရိကန်က စီစဉ်နေ ပါတယ်။
ဒါပေမယ့် နိုင်ငံရေးအရ နောက်ထပ် ပြုပြင် ပြောင်းလဲစရာ တွေ ရှိသေးတယ်၊ ပြီးတော့ ရခိုင်မှာ ပဋိပက္ခတွေ ဆက်ဖြစ် နေသေးလို့ သမ္မတ အိုဘားမား ခရီးစဉ် သွားဖို့ အချိန်စော သေးတယ်လို့ လူ့အခွင့်အရေး အဖွဲ့တွေက ဝေဖန် နေပါတယ်။
အကျင့်ပျက်မှု တိုက်ဖျက်ရေး တရုတ်သမ္မတ သတိပေး
အာဏာ အလွဲသုံးစား လုပ်တာ လက်သိပ်ထိုး အခွင့် အရေးပေးတာတွေကို ခွင့်မပြုဘူးလို့ သမ္မတ ဟူက ပြော
တရုတ်နိုင်ငံက ၁၀ နှစ် တကြိမ် ရွေးချယ် လဲလှယ်တဲ့ တရုတ်ခေါင်းဆောင်သစ် အပြောင်းအလဲကို ရှေးရှုတဲ့ တရုတ် ကွန်မြူနစ်ပါတီ ညီလာခံကို နိုဝင်ဘာလ ၈ ရက်နေ့က စတင် ဖွင့်လှစ်လိုက်ခဲ့ပါတယ်။
ဒီညီလာခံကို တရုတ်သမ္မတ ဟူကျင်တောင် တက်ရောက်လို့ မိန့်ခွန်း ပြောကြားခဲ့ပါတယ်။
ကိုယ်စားလှယ် ၂၀၀၀ ကျော် တက်ရောက်တဲ့ ဒီညီလာခံမှာ အကျင့်ပျက် ခြစားတာ တွေကို မတိုက်ဖျက် နိုင်ရင် ပါတီ ကျဆုံးမယ်လို့ သတိ ကြီးကြီး ပေးလိုက်ပြီး၊ မှန်း မရနိုင်အောင် အခွင့် အလမ်းနဲ့ စိန်ခေါ်မှုတွေ များနေတဲ့ တရုတ်ပြည် အတွက် ရည်မှန်းချက် ကြီးကြီးထား ပိုကြိုးစား အလုပ် လုပ်ကြရမယ်လို့ သမ္မတဟူက ပြောပါတယ်။
ဘယ်အဖွဲ့ အစည်းနဲ့ ဘယ်သူ တဦး တယောက်မှ ပါတီ စည်းမျဉ်း စည်းကမ်း အထက်မှာ အခွင့်ထူးခံ အဖြစ် မရှိရဘူး။ အာဏာ အလွဲသုံးစား လုပ်တာ လက်သိပ်ထိုး အခွင့် အရေး ပေးတာ တွေကို ခွင့်မပြုဘူးလို့ သမ္မတ ဟူက ပြောသွားပါတယ်။
တရုတ်ပြည်ဟာ စီးပွားရေး ပြုပြင်ပြောင်းလဲမှုတွေကို အောင်အောင် မြင်မြင် လုပ်ထား နိုင်ခဲ့ပြီမို့ ဒီတချီတော့ နိုင်ငံရေး အရ ပြုပြင် ပြောင်းလဲမှု တွေကို မြင်တွေ နိုင်ဖို့ ကမ္ဘာက စိတ်ဝင်စားနေ ပါတယ်။
ဒါပေမဲ့ တရုတ်ရဲ့ နိုင်ငံရေး ပြုပြင် ပြောင်းလဲမှုဆို တာက တမျိုးအဓိပ္ပာယ်ပါ၊ နိုင်ငံရေး စနစ် ပြုပြင် ပြောင်းလဲမှုနဲ့ ပြည်သူတွေ ဒီမိုကရေစီ အခွင့် အရေးတွေကို ပိုပြီး ပြည့်ပြည့်ဝဝ ခံစားခွင့် ရစေဖို့ လက်တွေ့ ကျပြီး အမြော် အမြင်ရှိရှိ ရှေ့တိုးလုပ်ဆောင်ရမယ်၊ ဒါမှသာ ပြည်သူတွေ အနေနဲ့ ပြုပြင် ပြောင်းလဲတဲ့ အခွင့် အရေးတွေကို ပြည့်ပြည့် ဝဝ ကျယ်ကျယ် ပြန့်ပြန့် ခံစား နိုင်မယ်လို့ သမ္မတ ဟူကျင်တောင်က ပြောပါတယ်။
ဆစ်ဒနီတက္ကသိုလ်က တရုတ် နိုင်ငံရေး ဆိုင်ရာ ပါမောက္ခ ကယ်ရီ ဘရောင်း ကတော့ တရုတ်သမ္မတ ဟူကျင်တောင်ရဲ့ သမ္မတသက်တမ်း ၁၀ နှစ်အတွင်းမှာ ဒါမျိုးစကားတွေကတော့ အမြဲကြားနေကြဖြစ်တယ်လို့ သုံးသပ်ပါတယ်။
ငြိမ်းချမ်းစွာ ဖွံ့ဖြိုး တိုးတက်ရေး၊ လှပသော တရုတ်ပြည်ကို ဝိုင်းဝန်း တည်ဆောက် ကြပါစို့၊ တရုတ် အမျိုးသားရေး လက္ခဏာပေါ် အခြေတည်တဲ့ ဆိုရှယ်လစ် လမ်းကြောင်းပေါ်မှာ ခိုင်ခိုင် မြဲမြဲ ချီတက် ကြပါစို့ ဆိုတာမျိုးတွေပေါ့လို့ သူက ဆိုပါတယ်။
တရုတ်ပြည်သူ့ခန်းမကြီးမှာ ကျင်းပတဲ့ ဒီညီလာခံမှာ မစ္စတာဟူက တရုတ်ဟာ ပြည်တွင်းနဲ့ ကမ္ဘာ့ရေးရာ အပြောင်း အလဲ တွေကို ဟန်ချက်ညီ ထိန်းညှိ ဆောင်ရွက်ခဲ့ရ တယ်လို့တော့ ဝန်ခံ ပြောကြားခဲ့ပါတယ်။
ဒီညီလာခံကို တပတ်ကြာ ကျင်းပမှာ ဖြစ်ပေမယ့်လို့ လာမယ့်ရက်တွေဟာ ဘာတွေ ဆက်လက် ဆွေးနွေးကြဖို့ ရှိတယ် ဆိုတာကိုတော့ ထုတ်ပြန် ထားတာမျိုး မရှိသေးပါဘူး။
အခုကျင်းပတဲ့ ညီလာခံကနေ တိုင်းပြည်ကို အုပ်ချုပ်နေတဲ့ တရုတ် ကွန်မြူနစ်ပါတီရဲ့ အမြင့်ဆုံး အာဏာပိုင် အဖွဲ့အစည်းဖြစ်တဲ့ ပေါ်လစ်ဗျူရို ဦးဆောင် ကော်မတီ အသစ်ကို ရွေးချယ် ကြမှာ ဖြစ်ပါတယ်။
လက်ရှိမှာတော့ ဒီကော်မတီအဖွဲ့ဝင် ကိုးဦးရှိပြီး၊ ဒီညီလာခံမှာတော့ သမ္မတ ဟူကျင်တောင်နဲ့ ဝန်ကြီးချုပ် ဝမ်ကျားပေါင်တို့က နှုတ်ထွက် ကြမယ်လို့ ယူဆရ ပါတယ်။
တခြားအဖွဲ့ဝင်နှစ်ဦးဖြစ်တဲ့ ရှီကျင်ပင်းနဲ့ လီကွီကျင်းတို့ ကတော့ ပါတီ ခေါင်းဆောင်နဲ့ ဒုတိယ ခေါင်းဆောင်တွေ ဖြစ်လာပြီး၊ ရှီကျင်ပင်း ကတော့ လာမယ့် ၂၀၁၃ မတ်လမှာ တရုတ် ပြည်ရဲ့ သမ္မတ အသစ် ဖြစ်လာ မယ်လို့ ခန့်မှန်းရ ပါတယ်။
ဘီဘီစီ တရုတ်ဌာနရဲ့ ဌာနမှူး ကတော့ တရုတ်ပြည်က ဆိုရှယ် ဝက်ဘ်ဆိုက်တွေမှာ မနေ့ ကတော့ အမေရိကန် ရွေးကောက်ပွဲ အကြောင်းတွေ ဝေဝေ ဆာဆာ ဆွေးနွေးခဲ့ ကြပေမယ့်လို့ ဒီကနေ့ စတင် လိုက်တဲ့ တရုတ် ကွန်မြူနစ် ပါတီ ညီလာခံ အကြောင်းကိုတော့ နည်းနည်း ပါးပါးပဲ ဆွေးနွေး ကြတာမျိုး တွေ့ရ တယ်လို့ ပြောပါတယ်။
နောက်ပြီး အွန်လိုင်းမှာ ကွန်မြူနစ် ပါတီ ညီလာခံ အကြောင်း ရှာလိုက်ရင် အစိုးရ မီဒီယာတွေက ရေးတဲ့ သတင်းတွေပဲ ထုတ်ပေးတာမျိုး ရှိတာမို့ ဝေဖန် ထားတာတွေကို မဖတ်ရ တော့ဘဲ ဆင်ဆာ လုပ်ထားတယ်လို့ ဆိုပါတယ်။
ဖယ်ဒရယ် ဥပဒေမူကြမ်း ရေးဆွဲရေး တာဝန်ပေး
တိုင်းရင်းသားတွေ လိုလားတဲ့ ဖယ်ဒရယ် စစ်စစ် မဖြစ် ရင်တောင် အခြေခံ အုတ်မြစ် တခု ဖြစ်နိုင်
တိုင်းရင်းသားတွေ လိုလား နေတဲ့ ဖယ်ဒရယ် တန်းတူ ညီမျှမှု ဥပဒေ မူကြမ်း ရေးဆွဲဖို့ တိုင်းရင်းသား လွှတ်တော် အမတ် ၂ ဦးကို ပြည်သူ့ လွှတ်တော် ဥက္ကဌ သူရ ဦးရွှေမန်းက တာဝန် ပေးလိုက်ပါတယ်။
ဖယ်ဒရယ် တန်းတူ ရေတူ စီမံ ခန့်ခွဲခွင့် အခွင့် အရေးကို အတတ်နိုင်ဆုံး ဖြစ်အောင် ရေးဆွဲဖို့ အတွက် ကိုလည်း ပြည်သူ့ လွှတ်တော် ဥက္ကဌ သူရ ဦးရွှေမန်းက ဦးတီခွန်မြတ်နဲ့ ဒေါ်နန်းဝါနုတို့ကို တာဝန်ပေး လိုက်တာ ဖြစ်ပါတယ်။
အခု ရေးဆွဲမယ့် ဥပဒေ မူကြမ်းဟာ တိုင်းရင်းသားတွေ လိုလားတဲ့ ဖယ်ဒရယ် စစ်စစ် မဖြစ် ရင်တောင် အခြေခံ အုတ်မြစ် တခု အဖြစ် ရေးဆွဲ နိုင်မှာ ဖြစ်တယ်လို့ တာဝန်ပေး ခံရတဲ့ ဒေါ်နန်းဝါနုက ပြောပါတယ်။
တိုင်းရင်းသားတွေနဲ့ ငြိမ်းချမ်းရေး ကြိုးပမ်းတဲ့ နေရာမှာ တိုင်းရင်းသားတွေ လိုလားတဲ့ ဖယ်ဒရယ် စနစ်ကို လုပ်ဆောင်နိုင်ဖို့ အတွက် လွှတ်တော်နဲ့ ပူးပေါင်း ဆောင်ရွက် သွားမယ် လို့ အစိုးရပိုင်း ကလည်း ပြောနေတဲ့ အတွက် အလား အလာကောင်း ဖြစ်နိုင် တယ်လို့ ပြောရမှာ ဖြစ်ပါတယ်။
ရခိုင်က ဒုက္ခသည်တွေ နေရင်းပြန်ဖို့ မဖြစ်နိုင်သေး
ဒုက္ခသည်တွေ ထဲမှာ အမျိုးသမီးတွေနဲ့ ကလေးတွေဟာ ဒုက္ခရောက်နေ ကြရ
ရခိုင် ဒေသက ပဋိပက္ခတွေ အတွင်း အိုးအိမ် စွန့်ခွာ ဒုက္ခရောက် ခဲ့ရသူတွေဟာ နေရပ် ကို ပြန်ဖို့ အတွက် မဖြစ်နိုင် သေးကြောင်း အဲဒီ ဒေသကို ကိုယ်တိုင် သွားကြည့်ခဲ့တဲ့ ဘီဘီ သတင်းထောက်က ပြောပါတယ်။
ရခိုင် တိုင်းရင်းသား တွေနဲ့ မွတ်ဆလင် နှစ်ဘက် စလုံးမှာ အာဃာတ ကြီးကြီး မားမား ရှိနေကြ သေးတဲ့ အတွက် လောလောဆယ် နေရပ် ပြန်ဖို့ မလွယ် သေးတာ ဖြစ်ကြောင်း ဘီဘီစီ သတင်းထောက် ကိုတင်အောင်ကျော်က ပြောပါတယ်။
အတူ ယှဉ်တွဲ နေဖို့ ဆိုတာ မဖြစ်နိုင် ဘူးလို့ နှစ်ဘက်စလုံးက ပြောဆို ကြပြီး၊ ရေရှည်မှာ လုံခြုံရေးတွေ ရုပ်သိမ်း သွားမှာကိုလည်း နှစ်ဘက် စလုံးက စိုးရိမ်နေကြတယ်လို့ ဆိုပါတယ်။
ဒုက္ခသည်တွေရဲ့ အခြေအနေ ကတော့ စစ်တွေက မူဆလင် ဒုက္ခသည် စခန်းတွေမှာ လူဦးရေ ပိုများပြီး၊ ကုလသမဂ္ဂ ကမ္ဘာ့ စားနပ် ရိက္ခာ အစီအစဉ် WFP၊ ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံး UNHCR နဲ့ တခြား အန်ဂျီအို အဖွဲ့တွေ အပြင် ရခိုင် အဖွဲ့ အစည်းတွေက လှူဒါန်းတာတွေ ရှိပါတယ်။
မြောက်ဦး မှာတော့ ဘုန်းကြီးကျောင်းတွေမှာ ရခိုင် ဒုက္ခသည်တွေ ရှိကြပြီး၊ အဲဒီမှာ ရန်ကုန် နာရေး ကူညီမှုအသင်းနဲ့ တခြား အဖွဲ့ အစည်း တွေက လွဲလို့ နိုင်ငံ တကာ အဖွဲ့ အစည်းတွေ မတွေ့ရဘူးလို့ ဆိုပါတယ်။
ကျောက်တော် မှာတော့ ဒုက္ခသည် စခန်း ဖွင့်ထားတာ မရှိဘူးလို့ သတင်းထောက်က ပြောပါတယ်။
ဒုက္ခသည်တွေ ထဲမှာ အမျိုးသမီးတွေနဲ့ ကလေးတွေဟာ ဒုက္ခရောက်နေ ကြရပြီး၊ ဒုက္ခသည် သောင်းချီ ရှိတဲ့ ဘောဒူပ စခန်း၊ သက်ကယ်ချောင်း စခန်းနဲ့ သယ်ချောင်းလို စခန်းတွေမှာ လူတွေဟာ ရောဂါတွေ ခံစားနေကြရပါတယ်။
တချို့ဆို ဝမ်းလျှော ဝမ်းပျက်ကြောင့် အသေအပျောက်တောင်ရှိတယ်လို့ သိရ ပါတယ်။
စိန်ခေါ်နေတဲ့ အမေရိကန် စီးပွားရေး ပြဿနာ
သမ္မတ အိုဘားမား ဒုတိယ သက်တမ်းမှာ အရေးကြီးဆုံး စိန်ခေါ်မှုကြီး ကတော့ နိုင်ငံရဲ့ စီးပွားရေး ကျဆင်းမသွားအောင် အတိုက်အခံ ရီပတ်ဘလစ်ကင်နဲ့ ဘယ်လိုပူးပေါင်း အဖြေရှာမလဲ ဆိုတဲ့ကိစ္စ ဖြစ်ပါတယ်။
တကယ်လို့ အခု လာမယ့် နှစ်ဆန်းပိုင်းမှာ နဂိုက စီစဉ်ထားတဲ့ အတိုင်း အခွန် တိုးကောက်ပြီး ဘတ်ဂျက်တွေ လျှော့ပစ်မယ် ဆိုရင် အလုပ်လက်မဲ့နှုန်း လာမယ့် နှစ်ကုန်ပိုင်းမှာ ၉ ရာနှုန်း အထိ ပြန်ဖြစ်သွားနိုင်တယ်လို့ သီးခြား လွတ်လပ်တဲ့ ကွန်ဂရက် ဘတ်ဂျက်ရုံးက သတိပေး လိုက်ပါတယ်။
အခွန်နှုန်း တိုးကောက်ရင် ရိုက်ခတ်မှု အများဆုံး ဖြစ်နိုင်ပါတယ်။
ဒီလို ဆောင်ရွက်တာကြောင့် ဝင်ငွေလျော့သွားပြီး ဒီဇင်ဘာလည်း အခု ကောက်နေတဲ့ အခွန်နှုန်းတွေ ပြီးဆုံးတော့မှာ ဖြစ်ပါတယ်။
ပြီးတော့ အစိုးရ ဘတ်ဂျက်တွေလည်း အတော်များများ အလိုအလျောက် အဖြတ်အတောက် ခံရမှာ ဖြစ်ပါတယ်။
ဖက်ဒရယ် ဘတ်ဂျက်နဲ့ ပတ်သက်လို့ သမ္မတနဲ့ ကွန်ဂရက်က ရီပတ်ဘလစ်ကန် အမတ်တွေကြား ထိပ်တိုက် ဖြစ်ရာကနေ ဒီလို ဆုံးဖြတ်ချက်တခု ထွက်လာခဲ့တာ ဖြစ်ပါတယ်။
ဒီအပြောင်းအလဲတွေရဲ့ ရိုက်ခတ်မှုကြောင့် လာမယ့်နှစ်မှာ အမေရိကန် ဒေါ်လာ ထရီလျံ တဝက်လောက် ထိခိုက်နိုင် ပါတယ်။
ဒါကြောင့် စီးပွားရေး ဆုတ်ယုတ်ဖို့ အတော် ဖြစ်နိုင်ချေ ရှိပါတယ်။
ပါတီကြီး နှစ်ခုလုံးက အမေရိကန်စီးပွားရေးကို ချောက်ထဲ မကျစေချင် ပါဘူး။
နှစ်ဖက် စလုံးက ရေရှည်မှာ အစိုးရက ငွေချေးသုံးစွဲတာ တဖြည်းဖြည်း လျှော့ချဖို့ သဘောတူကြပါတယ်။
ဝင်ငွေ များသူတွေကို အခွန် တိုးကောက်ဖို့ သမ္မတ အိုဘားမားက ပြောပေမယ့် အောက်လွှတ်တော်မှာ အများစု ဖြစ်တဲ့ ရီပတ်ဘလစ်ကန်တွေက သဘောမတူပါဘူး။
ဒီလို ရှေ့မတိုး နောက်မဆုတ် ဖြစ်နေတဲ့ စီးပွားရေး ပြဿနာကို အိုဘားမားက ဦးစားပေး ဖြေရှင်းရ ပါလိမ့်မယ်။
ဒီအချက်တွေဟာ အမေရိကန် စီးပွားရေး အပေါ် အရေးကြီးတဲ့ အကျိုး သက်ရောက်မှုတွေ ဖြစ်နိုင်တဲ့အတွက် အဲဒီက တဆင့် ကမ္ဘာ့စီးပွားရေး အပေါ် ရိုက်ခတ် လာနိုင်တယ်လို့ ဘီဘီစီ စီးပွားရေး သတင်းထောက် အင်ဒရူး ဝေါ်ကာက ပြောသွားပါတယ်။
အနောက်ဒီမိုကရေစီကို တရုတ်ပုံတူကူးမည်မဟုတ်
တရုတ်သမ္မတ ဟူဂျင်တောင်းက အဂတိလိုက်စားမှု တိုက်ဖျက်ဖို့၊ အုပ်ချုပ်ရေး စနစ်ကောင်းမွန်အောင် ပြုပြင်ဖို့ ၊ တိုင်းပြည်မပြိုကွဲအောင် ထိန်းသိမ်းဖို့ စီးပွားရေးတိုးတက်အောင် ဆက်လက်ဆောင်ရွက်ဖို့ တိုက်တွန်းသွားပါတယ်။ မစ္စတာ ဟူဟာ ခေါင်းဆောင်သစ်တွေရွေးချယ်မယ့် ပါတီကွန်ဂရက်မှာ ကြာသာပတေးနေ့က လမ်းညွှန်မိန့်ခွန်းတရပ်ပြောကြားခဲ့တာပါ။ နိုင်ငံတနံတလျှားက ကိုယ်စားလှယ်တွေကို မိန့်ခွန်းပြောကြားရမှာ ၊ တရုတ်နိုင်ငံရဲ့ ကာကွယ်ရေးစနစ် ခေတ်မှီရေးကြိုးပမ်းဖို့ ၊ တရုတ်နိုင်ငံကို ရေတပ်အင်အားကြီးနိုင်ငံတခုအဖြစ် တည်ဆောက်ဖို့ သမ္မတက ပြောကြားသွားပါတယ်။
ဒါပေမယ့် သူတို့နိုင်ငံဟာ ငြိမ်းချမ်းတဲ့နိုင်ငံခြားရေးဝါဒကိုသာ ဆက်လက်ဖော်ဆောင်သွားမယ်ဆိုတာကို အခိုင်အမာပြောကြားသွားပါတယ်။ တရုတ်ပြည်မကြီး နဲ့ ထိုင်ဝမ်တို့ဟာ စစ်ဘက်လုံခြုံရေး ယုံကြည်မှုတည်ဆောက်ဖို့ နဲ့ ငြိမ်းချမ်းရေးသဘောတူညီမှုတရပ်ရရှိအောင် ဆွေးနွေးဖို့ ထိုင်ဝမ်ကျွန်း လွတ်လပ်ရေးလှုပ်ရှားမှု ဟူသမျှကို ဆန့်ကျင်ဖို့လည်း ပြောကြားသွားပါတယ်။
ထိုင်ဝမ်ကျွန်းဟာ နှစ်ပေါင်း ၆၀ ကျော် သီးခြားတည်ရှိနေခဲ့တာဖြစ်ပေမယ့်၊ တရုတ်နိုင်ငံရဲ့ ကိုယ်ပိုင်အုပ်ချုပ်ရေးရ ဒေသတခုသာဖြစ်တယ်လို့ ယူဆထားတာပါ။ ကွန်မြူနစ်ပါတီရဲ့ အနာဂတ်ရေးနဲ့ ပတ်သက်ပြီးတော့ တရုတ်နိုင်ငံရေးစနစ်ကို လူတိုင်းပါဝင်နိုင်တဲ့ ဒီမိုကရေစီပုံစံမျိုးဖော်ဆောင်မှာဖြစ်ပေမယ့် ၊ အနောက်တိုင်းပုံစံတွေကိုတော့ ပုံတူကူးချလိမ့်မယ်မဟုတ်ဘူးလို့ ဆိုပါတယ်။ ရက်သတ္တ တပတ်ကြာပြုလုပ်တဲ့ ဒီညီလာခံမှာ ရာထူးက နှုတ်ထွက်မယ့် ဟူဂျင်တောင်းနေရာမှာ ဒုသမ္မတ ရှီကျင်းပင်းက ဆက်ခံပြီး မတ်လမှာ စတင်တာဝန်ထမ်းဆောင်မယ်လို့ မျှော်လင့်ရပါတယ်။
အိုဘားမားခရီးစဉ်နဲ့ မြန်မာ့အခွင့်အလမ်း
အမေရိကန်ကွန်ဂရက်လွှတ်တော်အမတ် Joseph Crowley
အမေရိကန်ကွန်ဂရက်လွှတ်တော်အမတ် Joseph Crowleyက - သမ္မတအိုဘားမား မြန်မာနိုင်ငံကို သွားရောက်မယ့် ကိစ္စနဲ့ ပတ်သက်ပြီး ကြေငြာချက်တစောင် ထုတ်ပြန်လိုက်ပါတယ်။ သမ္မတရဲ့ ဒီခရီးစဉ်ဟာ - မြန်မာနိုင်ငံရဲ့ လူ့အခွင့်အရေးနဲ့ ဒီမိုကရေစီ တည်ဆောက်ရေး အထောက်အပံ့အတွက် ၊ အရေးကြီးဆုံး ခြေလှမ်းတလှမ်းဖြစ်တယ်လို့ ဆိုပါတယ်။ မြန်မာနိုင်ငံမှာ သိသာထင်ရှားတဲ့ တိုးတက်ပြောင်းလဲမှုတွေ ရှိခဲ့ပေမယ့် ၊ ဆက်လက်လုပ်ဆောင်စရာတွေလည်း အများကြီးရှိနေပါသေးတယ်၊ နိုင်ငံရေးအကျဉ်းသား အများအပြားကျန်ရှိနေသေးပြီး၊ တိုင်းရင်းသားဒေသတွင်း အကြမ်းဖက်ဆူပူမှုတွေကို ရပ်ဆိုင်းဖို့လိုအပ်နေပါတယ်။
လိုအပ်တဲ့ နိုင်ငံရေးပြုပြင်ပြောင်းလဲမှု အားလုံး ဖြစ်ထွန်းနေတာ မဟုတ်သေးဘူးလို့ ဆိုပါတယ်။ အခု သမ္မတရဲ့ ခရီးစဉ်ဟာ ဒီလိုအရေးကြီးတဲ့ ပြဿနာတွေကို ဆက်လက်ဖြေရှင်းဖို့ မြန်မာနိုင်ငံ အစိုးရအတွက် အခွင့်အရေးတရပ်ဖြစ်တယ်လို့ ဖော်ပြထားပါတယ်။ မစ္စတာ ခရိုလီဟာ လွန်ခဲ့တဲ့ ၁၂ နှစ်တာကာလအတွင်း မြန်မာနိုင်ငံကို ပထမဦးဆုံး တရားဝင် သွားရောက်ခဲ့တဲ့ အောက်လွှတ်တော်အမတ်တဦးဖြစ်ပါတယ်။
အိုဘားမား ဒုတိယ သက်တမ်း မြန်မာကိစ္စ အရေးကြီး
အမေရိကန်သမ္မတ Barack Obama က သူ့ရဲ့ အရှေ့တောင်အာရှ ခရီးစဉ် အတွင်း မြန်မာနိုင်ငံကိုပါ သွားဖို့ စီစဉ်တာဟာ မြန်မာနိုင်ငံနဲ့ အိမ်နီးချင်း အရှေ့တောင်အာရှနိုင်ငံတွေဟာ သူ့ရဲ့ သမ္မတ ဒုတိယသက်တမ်းအတွင်း အရေးပါတဲ့ အခန်းကဏ္ဍမှာ ရှိနေတဲ့အတွက် ဖြစ်တယ်လို့ Rutgers တက္ကသိုလ်က ဂုဏ်ထူးဆောင် ပါမောက္ခ Joseph Silverstein က သုံးသပ်ပါတယ်။ သမ္မတအနေနဲ့ မြန်မာနိုင်ငံကို သွားဖို့ အခုလို စီစဉ်တာဟာ မြန်မာနိုင်ငံ အတွက် ကောင်းတဲ့ လက္ခဏာဖြစ်တယ်လို့ ဆိုပါတယ်။ အပြည့်အစုံကိုတော့ ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြပေးပါမယ်။
သမ္မတ အိုဘားမားအနေနဲ့ လာမယ့် နိုဝင်ဘာ ၁၇ ရက်နေ့ကနေ ၂၀ ရက်နေ့အထိ ထိုင်း၊ မြန်မာနဲ့ ကမ္ဘောဒီးယားနိုင်ငံတွေကို တရားဝင် သွားရောက် လည်ပတ်မှာ ဖြစ်တဲ့အကြောင်း သမ္မတ အိမ်ဖြူတော်က ကြာသပတေးနေ့မှာပဲ ကြေငြာချက် ထုတ်ပြန်လိုက်တာပါ။
နိုဝင်ဘာလ ၆ ရက်နေ့မှာ ကျင်းပခဲ့တဲ့ သမ္မတရွေးကောက်ပွဲမှာ ပူပူနွေးနွေး အနိုင်ရပြီး မကြာခင် ရက်ပိုင်းအတွင်း အခုလို မြန်မာနိုင်ငံအပါအ၀င် အရှေ့တောင်အာရှနိုင်ငံတွေကို သွားရောက် လည်ပတ်တာဟာ သူ့အစိုးရ ဒုတိယသက်တမ်းအတွင်း ဒီဒေသဟာ ဘယ်လောက်အရေးပါတယ် ဆိုတာကို ပြသလိုက်တာပဲလို့ မြန်မာ့အရေး ကျွမ်းကျင်သူလည်းဖြစ်၊ Rutgers တက္ကသိုလ်က ဂုဏ်ထူးဆောင် ပါမောက္ခလည်းဖြစ်တဲ့ Joseph Silverstein က ပြောပါတယ်။
“ ဒါက မြန်မာနိုင်ငံနဲ့ အိမ်နီးချင်း အရှေ့တောင်အာရှနိုင်ငံတွေဟာ သူ့အတွက် အရေးပါတဲ့ အခန်းကဏ္ဍမှာ ရှိနေတယ်ဆိုတာကို ပြသလိုက်တာပါပဲ။ မြန်မာနိုင်ငံအပါအ၀င် ဒီဒေသတွင်းမှာ ဖြစ်ပျက်နေတဲ့ အခြေအနေတွေအပေါ် သူ့အနေနဲ့ စိုးရိမ်ပူပန်မိတယ်၊ သူ့ရဲ့ ဒုတိယသမ္မတ သက်တမ်းအတွင်း ဒီဒေသအတွက် ဘယ်လို မူဝါဒတွေ ချမှတ် လုပ်ဆောင်သင့် တယ်ဆိုတဲ့ ဆုံးဖြတ်ချက်မချခင် အခြေအနေတွေကို သူကိုယ်တိုင် မြင်တွေ့လိုတဲ့ သဘောကို ပြသလိုက်တာလဲ ဖြစ်ပါတယ်။”
ဒါဟာ မြန်မာနိုင်ငံနဲ့ မြန်မာလူမျိုးတွေအတွက် အကျိုးဖြစ်ထွန်းစေမယ့် ခရီးစဉ်အဖြစ်လည်း ပါမောက္ခ Silverstein က သုံးသပ်ပါတယ်။
“အမေရိကန်သမ္မတယောက်အနေနဲ့ မြန်မာနိုင်ငံကိုသွားပြီး ခေါင်းဆောင်တွေအပါအ၀င် မြန်မာနိုင်ငံသားတွေနဲ့ တွေ့မယ်၊ ဆွေးနွေးမယ်၊ အခြေအနေတွေကို ကိုယ်တိုင်ကိုယ်ကျ သွားရောက် လေ့လာမယ်ဆိုတာ မြန်မာလူမျိုးတွေအတွက် အင်မတန် ကောင်းပါတယ်။”
တချိန်တည်းမှာပဲ အာရှတိုက်အတွင်းမှာ ပြဿနာတွေ အများအပြား ဖြစ်နေတာကြောင့် အမေရိကန်သမ္မတအနေနဲ့ အခုလို မြန်မာနိုင်ငံကို သွားလည်လိုက်တာကြောင့် ဒေသတွင်းက တရုတ်-အမေရိကန်ဆက်ဆံရေး၊ အိန္ဒိယ-အမေရိကန်တွေ ဘယ်လို ဖြစ်လာမလဲ၊ သမ္မတ အိုဘားမားအနေနဲ့ မြန်မာနိုင်ငံကိုသွားတယ်ဆိုတာ အနာဂတ်မှာ ဘယ်လို မူဝါဒတွေ ချမှတ်သင့်တယ်ဆိုတာကို လေ့လာဖို့အတွက် သွားတယ်ဆိုတာကို သူတို့ သဘောပေါက်ကြပါ့မလား၊ ဒါမှမဟုတ် မြန်မာနိုင်ငံကိုသွားတဲ့အစီအစဉ်ထဲမှာ သူတို့ မသိနိုင်တဲ့ တခြား အကြောင်း အချက်တွေများ ရှိနေသလားဆိုတာ မေးခွန်းထုတ်စရာ ဖြစ်လာနိုင်တယ်လို့ ဆိုပါတယ်။
အမေရိကန်သမ္မတ တယောက်က တနေရာရာကိုသွားပြီဆိုရင် အဲဒီဒေသအတွက်ရော အမေရိကန်အတွက်ပါ အင်မတန် အရေးကြီးပါတယ်လို့ ပါမောက္ခ Silverstein က သုံးသပ်ပါတယ်။
“ကျနော်အမြင်အရကတော့ အမေရိကန်သမ္မတက တိုင်းပြည်တခုခုကိုသွားပြီး အဲဒီက ခေါင်းဆောင်တွေ၊ လူထုတွေနဲ့ တွေ့ဆုံတယ်ဆိုတာဟာ အမေရိကန်အတွက်ရော၊ အဲဒီတိုင်းပြည်အတွက်ပါ အင်မတန် အရေးကြီးပါတယ်။ ဒါကြောင့် သူအခုလို သွားမယ်ဆိုတဲ့ အစီအစဉ်ကို ကျနော် အပြည့်အ၀ ထောက်ခံပါတယ်။ အဲဒီလို ခေါင်းဆောင်တွေ နဲ့ တွေ့ဆုံ ဆွေးနွေး လိုက်မှလဲ နှစ်ဖက်စလုံးက ရည်မှန်းချက်တခုတည်းကို အတူတူ ဦးတည်ပြီး လုပ်ဆောင်နိုင်မယ့် မူဝါဒတွေ ချမှတ် ကျင့်သုံးနိုင်မှာပါ။”
အမေရိကန်နိုင်ငံ ၀ါရှင်တန် ဒီစီဒေသအခြေစိုက် မြန်မာ့အရေး တက်ကြွလှုပ်ရှားသူ ဦးတင်မောင်သော်ကတော့ သမ္မတ အိုဘားမား မြန်မာပြည်သွားမယ့် ခရီးစဉ်အပေါ် အားတက်မိသလို တဖက်မှာ စိုးရိမ်ပူပန်မှုတွေလည်း ဖြစ်မိတယ်လို့ ပြောပါတယ်။
“အမေရိကန်သမ္မတအိုဘားမား မြန်မာပြည်ကိုသွားမယ်ဆိုတာဟာ ကျနော်တို့ကြားတော့ အားတက်စရာဖြစ်သလို၊ တချိန်တည်းမှာပဲ စိုးရိမ်စရာတွေရှိပါတယ်။ ဘာကြောင့် အားတက်စရာတွေရှိသလဲဆိုတော့ မြန်မာပြည်က ဘာပဲဖြစ်ဖြစ် စပြီးတော့ ပြောင်းလဲမှုကို ပြတယ်ဆိုပေမယ့် ဒီမိုကရေစီပြည့်ပြည့်ဝဝတော့ မဖြစ်သေးပါဘူး။ အိုဘားမားအနေနဲ့ကလည်း သူ့ရဲ့ နိုင်ငံခြားရေးမူဝါဒ ပေါ်လစီမှာ သူ့ရဲ့အောင်မြင်မှုတခုအနေနဲ့ မြန်မာကို ဂုဏ်ယူပြီး အမြဲပြောလေ့ရှိတဲ့အတွက်ကြောင့်။ ဒါပေမယ့် တချိန်တည်းမှာ ကျနော်တို့ စိုးရိမ်တာကတော့ မြို့တွေမှာ နည်းနည်းသက်သာရာရပေမယ့် နယ်တွေမှာ ကချင်ပြည်နယ်တို့ ဘာတို့ဆိုလည်း ဆက်ပြီးတော့ လူတွေ ဒုက္ခရောက်နေတာရှိတယ်။ နောက်ပြီး ရခိုင်ပြည်နယ်မှာလည်း ဒီအတိုင်းပဲ။”
သမ္မတ အိုဘားမားအနေနဲ့ မြန်မာနဲ့ ထိုင်းနိုင်ငံတွေကို သီးခြား သွားရောက်ပြီးရင် ကမ္ဘောဒီးယားနိုင်ငံမှာ ကျင်းပမယ့် အရှေ့တောင်အာရှနိုင်ငံများအဖွဲ့ အာဆီယံ ထိပ်သီးစည်းဝေးပွဲကို တက်ရောက်ပြီး အာဆီယံ ခေါင်းဆောင်တွေနဲ့ တွေ့ဆုံမှာ ဖြစ်ပါတယ်။
သမ္မတအနေနဲ့ မြန်မာနိုင်ငံကိုသွားတဲ့အခါ ရန်ကုန်မြို့ကို သွားမယ်လို့ အိမ်ဖြူတော်က ထုတ်ပြန်တဲ့ ကြေငြာချက်ထဲမှာ ဖော်ပြထားပေမယ့် နေပြည်တော်ကို သွားမသွား ဆိုတာတော့ အခုချိန်ထိ မသိရသေးပါဘူး။
ဒီခရီးစဉ်အတွင်းမှာ မြန်မာသမ္မတ ဦးသိန်းစိန်၊ အတိုက်အခံခေါင်းဆောင် ဒေါ်အောင်ဆန်းစုကြည် အပါအ၀င် လူထုအခြေပြု လူမှုအဖွဲ့အစည်းတွေနဲ့လည်း တွေ့ဆုံမယ် ဆိုတာကို ကြေငြာချက်ထဲမှာ ဖော်ပြထားပါတယ်။ သမ္မတရဲ့ ဒီခရီးစဉ်နဲ့ဆိုင်တဲ့ အသေးစိတ် အချက်အလက်တွေကို မကြာခင် ထုတ်ပြန်ပေးသွားမယ်လို့ပဲ သမ္မတ အိမ်ဖြူတော်က သတင်းထုတ်ပြန်ထားပါတယ်။
တရားဥပဒေစိုးမိုးရေး သည် မြန်မာအတွက် စိမ်ခေါ်မှု
မြန်မာနိုင်ငံမှာ တရားဥပဒေစိုးမိုးမှု တည်ဆောက်ရေးဟာ အစိုးရအတွက်သာမကလွှတ်တော် အပါအဝင် သက်ဆိုင်ရာ အားလုံးအတွက် စိန်ခေါ်မှုတစ်ရပ်ဖြစ်နေတယ်လို့မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် မစ္စတာသောမတ် ကိုဟေး ကင်တားနားက ပြောပါတယ်။ အကြမ်းဖက်မှုတွေဖြစ်ပွါးခဲ့တဲရခိုင်ပြည်နယ်မှာလည်း တရားဥပဒေစိုးမိုးမှု ကင်းမဲ့နေပြီး အထက်အမိန့်အရလုံခြုံရေးတပ်ဖွဲ့ဝင်တွေက အခြေအနေတွေကို ထိန်းသိမ်းမှုကြိုးပမ်းမှုမျိုး သာရှိတယ်လို့ မစ္စတာ ကင်တားနားက ဗွီအိုအေမြန်မာပိုင်းကို ပြောပါတယ်။ အသေးစိတ်ကိုတော့ ဆက်သွယ်မေးမြန်းထားတဲ့ဦးကျော်ဇံသာက ပြောပြပေးပါမယ်။
တရားဥပဒေစိုးမိုးဆိုတာဟာ ရခိုင်ဒေသက ပဋိပက္ခကို ရေတို ထိန်းသိမ်းရေး အတွက်ရော ရေရှည်ဖြေရှင်းရေးအတွက်ပါ အရေးတစ်ကြီး လိုအပ်နေတယ် ဆိုတာကိုတော့ ဒေါ်အောင်ဆန်းစုကြည် နဲ့ မြန်မာ့ခေါင်းဆောင် များ နှင့်တကွ နိုင်ငံတကာ ကပါ ပြောဆို ထုတ်ပြန် နေကြတာဖြစ်ပါတယ်။ တကယ်တော့ ရခိုင်ပြည်နယ်သာမကပါဘူး။ မြန်မာနိုင်ငံ တစ်နိုင်ငံလုံးမှာပါ တရားဥပဒေ တည်ဆောက်ရေးဟာအခြေခံလိုအပ်ချက်ကြီးတစ်ရပ်ဖြစ်နေပြီး ဒါဟာ ပြည်သူလူထုတစ်ရပ်လုံးကတာဝန်ယူ ဆောင်ရွက်ရမဲ့ ကိစ္စဖြစ်တယ်လို့လည်း မစ္စတာ ကင်တားနားကပြောသွားပါတယ်။
"ကျနော့်အယူအဆကတော့ တရားဥပဒေစိုးမိုးရေး ဆိုတာဟာမျှော်လင့်ချက် တစ်ရပ်ဖြစ်ပါတယ်။ လက်တွေ့အခြေအနေကတော့ဆယ်စုနှစ်တွေ နဲ့ချီပြီး စစ်အစိုးရအုပ်စိုးခဲ့တဲ့ မြန်မာနိုင်ငမှာတရားဥပဒေ စိုးမိုးရေး မရှိပါဘူး။ ဒါဟာ အစိုးရအတွက်သာမက လွှတ်တော်အပါအဝင်သက်ဆိုင်သူအားလုံး အတွက် စိန်ခေါ်မှုတစ်ရပ်ဖြစ်ပါတယ်။ တရားဥပဒေစိုးမိုးရေးကော်မတီ တစ်ရပ်ကို ဒေါ်အောင်ဆန်းစုကြည် အမှုးပြုပြီး ဖွဲ့စည်း ပေးထားတာလည်း သိရပါတယ်။
ဒီအဖွဲ့အစည်း အပါအဝင် သက်ဆိုင်သူတွေ ဟာ ယုတ်စွ အဆုံး တရားဥပဒေ စိုးမိုးရေးအတွက် အခြေခံဘောင်တစ်ရပ်ကို ဦးစွာချမှတ်သင့်ပါတယ်။ တရားဥပဒေ လုံးဝ ကင်းမဲ့နေတယ်ဆိုတဲ့ နမူနာကိုတော့ ရခိုင်ပြည်နယ်မှာ တွေ့မြင်နေရပါတယ်။ အဲ့ဒီ့ကပြဿနာကို ကိုင်တွယ်တဲ့နေရာမှာ ဥပဒေစိုးမိုးရေးကို အခြေခံချမှတ်ထားတဲ့ မူဝါဒမျိုး မတွေ့ရပါဘူး။ အမိန့်နဲ့ လုံခြုံရေးအဖွဲ့တွေဟာ အခြေအနေကို လိုက်ထိန်းနေတာပဲရှိပါတယ်။”
လုံခြုံရေးတပ်ဖွဲ့တွေအနေနဲ့ အခုလို ရခိုင်က ပဋိပက္ခလိုဟာမျိုးကို ဝင်ရောက်ထိန်းသိမ်းကြတဲ့နေရာမှာလည်းပဲ အင်အားသုံးတဲ့အခါ တခါတခါ ပိုသွားတာ ရှိတယ်။ လူ့အခွင့်အရေးချိုးဖောက်တာတွေလည်း ဖြစ်နေရတယ်လို့ မစ္စတာကင်တာနားက ထောက်ပြပါတယ်။
“ဒေသန္တရအဆင့်မှာလည်း ပြဿနာရှိပါတယ်။ ဒီအဆင့်မှာ လုံခြုံရေးအာဏာပိုင်တွေဟာ တရားဥပဒေစိုးမိုးရေးနဲ့ လူ့အခွင့်အရေးဆိုင်ရာ စံချိန်စံညွှန်းတွေ လိုက်နာခြင်းမရှိဘူးဆိုတဲ့ အချက်အလက်တွေ ကျနော်တို့ရထားပါတယ်။ ဒီလိုမလိုက်နာတဲ့အတွက် လုံခြုံရေးတပ်ဖွဲ့တွေဟာ လူ့အခွင့်အရေးချိုးဖောက်ပြီး အင်အားအလွဲသုံးစား လုပ်တာမျိုးတွေရှိပါတယ်။”
တရားဥပဒေစိုးမိုးမှု တည်ဆောက်ရေးဆိုတဲ့နေရာမှာ ၁၉၈၂ခုနှစ် နိုင်ငံသားဖြစ်မှု ဥပဒေကို ပြန်လည်စစ်ဆေးဖို့ လိုအပ်နေတယ်လို့လည်း မစ္စတာကင်တာနားက ဆိုပါတယ်။ အဲ့ဒီ့ဥပဒေအရ မြန်မာနိုင်ငံမှာ ဝင်ရောက်လာခဲ့သူတွေရဲ့ တတိယမျိုးဆက်ကို နိုင်ငံသားအဖြစ် အသိအမှတ်ပြုမယ်ဆိုတဲ့အချက်ကိုရော ပြင်ဆင်သင့်သလားလို့ ဆိုတော့ ဒီကိစ္စနဲ့ပတ်သက်ပြီး ပြင်ဆင်သင့်တယ်၊ မပြင်ဆင်သင့်ဘူးဆိုတာ သူ့ရဲ့ သဘောထားကို ပြောဖို့ ငြင်းဆန်ပါတယ်။ဒါဟာ တိုင်းရင်းသားတွေ အပါအဝင် မြန်မာပြည်သူလူထုတရပ်လုံးကသာ ဆုံးဖြတ်သင့်တဲ့ကိစ္စလို့ ပြောသွားပါတယ်။
“ဒီပြဌာန်းချက်ဟာ ပြန်ပြီးတော့ သုံးသပ်ရမယ့် အချက်တခုဖြစ်ပါတယ်။ ဒါပေမဲ့ ကျနော့်လို ကုလသမဂ္ဂ ကိုယ်စားလှယ်တယောက်က သုံးသပ်ရမယ့်ကိစ္စမဟုတ်ပါဘူး။ ခင်ဗျားတို့ မြန်မာပြည်သူတွေ၊ အစိုးရသာမက သက်ဆိုင်တဲ့ တိုင်းရင်းသားလူမျိုးစု အားလုံးက ဆုံးဖြတ်ကြရမှာပါ။ လူထုကိုယ်စားလှယ်တွေ စုဝေးရာ လွှတ်တော်ကသာ ဆုံးဖြတ်ရမှာပါ။ ဒေါ်အောင်ဆန်းစုကြည်နဲ့ တိုင်းရင်းသားအမတ်တွေကနေ ဒီဥပဒေကို ပြန်လည်သုံးသပ်ဖို့ ကြေညာချက် ထုတ်ပြန်ထားတာ တွေ့ရပါတယ်။”
ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေးအထူးကိုယ်စားလှယ်မစ္စတာသောမတ်အိုဟေးကင်တာနားဟာ လူအုပ်စုလိုက် အကြမ်းဖက်မှုတွေ၊ သတ်ဖြတ်မှုတွေဖြစ်ပွားခဲ့တဲ့ ရခိုင်ဒေသကို သွားရောက်လေ့လာခဲ့သူဖြစ်ပါတယ်။ မကြာခင်မှာလည်း ကချင်ဒေသနဲ့ အဲ့ဒီ့ရခိုင်ဒေသကို ပြန်လည်သွားရောက်ဖို့ သူစဉ်းစားနေတယ် ပြင်ဆင်နေတယ်လို့ လည်း ပြောကြားသွားပါတယ်။
0 comments:
Post a Comment