Tuesday, April 7, 2015

မူလတန်းပညာရေးအတွေးအခေါ် ၁၃


စိတ်လှုပ်ရှားခံစားနိုင်စွမ်း ( emotion )
လွန်ခဲ့တဲ့ ဆယ်စုနှစ်တစ်ခုကျော်လောက် တက္ကသိုလ်ဘုန်းနိုင်က သူ့ရဲ့ စိတ်ပညာဆောင်းပါးတွေမှာ IQ ( intelligent quotient ) နဲ့ EQ ( emotional quotient) အကြောင်းကို ရေးသားခဲ့တယ်။ လူအများ စိတ်ဝင်စား ခံရတဲ့ ဆောင်းပါးဖြစ်ခဲ့သလို စာအုပ်ထုတ်တော့လည်း လူတွေပတ်စပ်ဖျား EQ အကြောင်းပြောစမပ်ဖြစ်ခဲ့တာမှတ်မိတယ်။ ဆောင်းပါးရဲ့ အဓိက အကြောင်းအရာကတော့ IQ လို့ခေါ်တဲ့ အသိပညာပြကိန်းသာလျင်မက စိတ်လှုပ်ရှားမှု ဆိုင်ရာ ပြကိန်း ( EQ )ဟာလည်း အရေးကြီးတယ် ဆိုတာပဲ ။ ဆိုလိုချင်တာ လူတွေရဲ့ ဥာဏ်ရည်တွေကို တိုင်းတာတဲ့ နေရာ မှာ အသိပညာဆိုင်ရာ သာလျင်မဟုတ်ဘဲ စိတ်လှုပ်ရှားမှုပိုင်ဆိုင်ရာကလည်း အရေးကြီးတယ်။ ဒါကြောင့်လည်း မူလတန်း ကလေးငယ်တွေကို စိတ်လှုပ်ရှားခံစားနိုင်စွမ်းကို သင်ကြားပြသပေးနိုင်ဖို့ဆိုတာ အရေးကြီးတဲ့ အခန်းကဏ္ဍတစ်ခုပဲ ။
စိတ်လှုပ်ရှားခံစားမှုသာမရှိရင် ယနေ့ ဒဿနပညာမှာ ဆင်ခြင်မှု ၊ ကြောင်းကျိုးဆင်ခြင်မှု ဆိုတာကို သံသယဖြစ်ငြင်းခုံနေတဲ့ ပညာတွေ အများကြီးပါပဲ ။

အထူးသဖြင့် အဆောက်အအုံလွန်ဝါဒနဲ့ ပို့စ်မော်ဒန်ဝါဒတွေမှာတွေ့ရမယ်။ တစ်ခါတစ်ရံမှာ သာမန်နေ့စဉ် လူနေမှုဘ၀အတွင်း လုပ်နေကြတဲ့ ဆင်ခြင်မှု ၊ ဆင်ခြင်တုံတရား ၊ ကြောင်းကျိုးဆင်ခြင်မှုဆိုတာ သူတို့အပေါ်တည် ဆောက်ထားတဲ့ လူမှု အဆောက်အအုံအတွင်း ချမှတ်ထားတဲ့ အမှန်တရား ၊ ကိုယ်ကျင့်တရားတန်ဖိုးစံတွေ အတွင်းက သာလျင် ပြန်လည်တွေးတောနေကြလို့ပဲ ။ အဲဒီလို လူမှုအဆောက်အအုံအတွင်းက ထွက်လိုက်တဲ့အခါ သူတို့သိမှတ် နားလည်ထားတဲ့ အမှန်တရားနဲ့ တန်ဖိုးစံတွေဟာ အဲဒီလောက်တင်းတင်းကြပ်ကြပ် ခံယူထားရမယ့် အရာတွေ မဟုတ် ဘူးဆိုတာကိုတွေ့ကြရမယ်။ ဒါကို ဂျူးလူမျိုး ဒဿနပညာရှင်က ဂျူလူမျိုးခြောက်သန်းကျော်ကို ရက်ရက်စက်စက် သတ်ဖြတ်ပြစ်ခဲ့တဲ့ အိုက်ခမန်းကို လေ့လာပြပုံမှာ တွေ့ရမယ်။ အိုက်ခမန်းဟာသူ့ရဲ့ နာဇီခေတ်ကာလအတွင်း တည်ဆောက်ထားတဲ့ သိမှုအဆောက်အအုံအတွင်း ဂျူးလူမျိုးခြောက်သန်း အပေါ် သတ်ဖြတ်မှုအပေါ် သူ့ရဲ့ ဆင်ခြင်မှု ၊ ကြောင်းကျိုးဆင်ခြင်မှုဟာ အဲဒီ နာဇီအဆောက်အအုံအတွင်း ချမှတ်ထားတဲ့ အမှန်တရားပုံစံ နဲ့ ကိုယ်ကျင့်တရားပုံစံ တွေအရသာလျင်တွေးခဲ့တယ်။ သူဟာ သူ့တာဝန်ကိုသူကျေပွန်စွာထမ်းဆောင်ခဲ့တဲ့အတွက် မှန်ခဲ့တယ်။ သူဟာ မှားယွင်းနေတဲ့ ကိုယ်ကျင့်တရားပုံစံ ရှိသူမဟုတ်ဘူး ဆိုတာကို သူ့ ဘက်နဲ့သူ ဆင်ခြင်ပြခဲ့တာကိုတွေ့မယ်။ အိုက်ခမန်းကို စီရင်တဲ့ တရားခွင်မှာ အိုက်ခမန်းရဲ့ ပုံစံဟာ ဆင်ခြင်မှု အပြည့်အ၀ရှိနေပြီး ခံစားချက်ကင်းမဲ့နေတဲ့စက်ရုပ်တစ်ကောင် နဲ့ တူနေခဲ့တယ်။ စိတ်လှုပ်ရှားခံစား နိုင်စွမ်းဆိုတာက တကယ်တော့ လူမှုအဆောက်အအုံအတွင်းက ပုံသေချမှတ်ထားတဲ့ အမှန်တရားပုံစံတွေကိုကျော် လွန်တဲ့ လူသားဆန်မှုကို ယူဆောင်ပေးတဲ့ အရာတစ်ခုဖြစ်တယ်။
မြန်မာ့ ပညာရေး
ယနေ့ ကျနော်တို့ဆီမှာ ဘာသာရေးအခြေခံအတွေးခေါ်ကိုက အကြောင်းအကျိုးကို ဦးစားပေးလမ်းခင်း ပေးထားတယ်။ စိတ်လှုပ်ရှားခံစားမှု ဆိုတာကိုလည်း စိတ်ထိခိုက်ခံစားလွယ်ခြင်း ( sensitivity ) ဆိုတာနဲ့ ပြတ်ပြတ်သား သားကွဲပြားပုံမရဘူးကြဘူး။နေ့စဉ်လူနေမှုဘ၀အတွင်းက ဘာသာရေးအခြေခံမှာကို ကြောင်းကျိုးဆင်ခြင်မှု ကို ဦးစားပေးထားပြီး ကျနော်တို့ရဲ့ ပညာရေးဟာ ဘာသာရေးအဓိကလွှမ်းမိုးခံရပြီး လောကီမဆန်တော့ကာ ပညာသင်ကြားမှု အတွင်း ကလေးတွေကို စိတ်လှုပ်ရှားမှုခံစားမှု သင်ကြားပေးဖို့ လစ်လျူရှုထားကြပုံရတယ်။ စိတ်လှုပ်ရှားခံစားမှု ဆိုတာ ဘာသာတရားရဲ့ အဆုံးအမနဲ့ ဆန့်ကျင်ဘက်ဖြစ်ပြီး လူသားကို အားနည်းပျော့ညံ့စေတယ်၊ တွေးဝေစေတယ်၊ အာရုံ ခံစားမှုတွေများပြားပြီးသတိသမာန်ဇဉ် ပျက်ယွင်းစေတယ်လို့ ခံယူထားကြပုံလည်းရတယ်။ အကြောင်းက ပညာရေးမှာ လောကီဆန်မှုကင်းဝေးခြင်း နဲ့ စိတ်လှုပ်ရှားခံစားမှုကို တန်ဖိုးထားခြင်းဆိုတာကို လုံးဝ ပျောက်ကွယ်နေရတဲ့ အတွက်ပဲ ။ ကလေးတွေကို ရိုက်နှက်ဆုံးမတတ်တဲ့ ပညာရေး ၊ အလွတ်ကျက်မှတ်ပြီး စာမေးပွဲကို ကြောက်ရွှံ့စေတဲ့ ပညာရေး ၊ လွတ်လပ်မှုနဲ့ လှုပ်ရှားဆောင်ရွက်မှုတွေပျောက်ကင်းနေတဲ့ ပညာရေး ၊ အနုပညာနဲ့ ၀ိဇ္ဇာ ပညာရပ်တွေ အရာမ ၀င်တဲ့ ပညာရေးမှာ ကလေးတွေကို စိတ်လှုပ်ရှားမှုပေးမယ်ဆိုရင်လည်း စိတ်ခံစားလွယ်မှုတစ်မျိုးဖြစ်တဲ့ ကြောက်ရွှံ့မှု နဲ့ မ၀ံ့မရဲ ဖြစ်မှုတွေကိုသာလျင် ပေးအပ်မှာဖြစ်မယ်။ အသေအချာလေ့လာစိစစ်ကြည့်ရင် အဲဒီလို ပေးအပ်နေတာကိုလည်း တွေ့ ရမယ်။ ဆရာတွေကြည့်ပြီး ကြောက်နေရတဲ့ ကလေးတွေဟာ ဘယ်လိုလုပ်ဖြင့် စိတ်လှုပ်ရှားခံစားမှု ဆိုင်ရာ အသိပညာ ( emotional intelligence ) ဆိုတာကို ရရှိနိုင်မှာတဲ့လဲ ။
စိတ်လှုပ်ရှားမှုခံစားမှုဆိုင်ရာ အသိပညာ
ကျနေတို့ တက္ကသိုလ်ဝင်တန်း အင်္ဂလိပ်စာ ဖတ်စာအုပ် Looking Good မှာ အထူးအရေးပါတဲ့ စကား လုံး တစ်လုံးရှိပါတယ်။ ဆရာဆရာမတွေနဲ့ အဲဒီ ဆောင်းပါးရဲ့ အနှစ်သာရကို ထုတ်တတ်တယ်ဆိုရင် ဒီဆောင်းပါးဟာ စိတ်လှုပ်ရှားခံစားမှုဆိုင်ရာ အသိပညာတစ်ခုကို ညွန်းဆိုပြသွားတဲ့ ဆောင်းပါးဆိုတာတွေ့ရမယ်။ ဒီအခါမှာ စိတ်လှုပ်ရှားခံစားမှုနဲ့ အသိပညာဥာဏ် နှစ်ခုစလုံးရဲ့ အရေးပါပုံကို ညွန်းဆို ရှင်းလင်းနိုင်ရပါမယ်။ ဆက်ရရင် ဒီဆောင်းပါးများအဓိကညွန်းဆိုထားတဲ့ စိတ်လှုပ်ရှားခံစားမှုဆိုင်ရာ အသိပညာတစ်ခုကတော့ self-acceptance ကိုယ့်ကိုယ်လက်ခံနိုင်စွမ်း ဆိုတဲ့စကားလုံးပါပဲ ။ ဒီလို လူတစ်ယောက်ဟာ ကိုယ့်ကိုယ်ကိုယ်လက်ခံနိုင်စွမ်းရှိခြင်း လူသားဘ၀ရဲ့ အောင်မြင်မှုလမ်းကြောင်းတစ်ခုကို လျောက်လှမ်းနိုင်စွမ်းရှိဖို့ရာ အရေးအကြီးဆုံးအချက်ပါပဲ။ ဒါဆိုရင် တခြားသော စိတ်လှုပ်ရှားခံစားမှုတွေဖြစ်တဲ့ ကိုယ့်ကိုယ်ကိုယ်နည်းလည်မှု ( self-awareness ) ၊ ကိုယ်ပိုင်းစည်းမျဉ်း စည်းကမ်းရှိခြင်း ( self-discipline ) ၊ စွဲမြဲစွာလုပ်လိုစိတ် ( persisitence ) ၊ စာနာထောက်ထားစိတ် ( empathy) လို အရာပေါင်းများစွာကို ကလေးတွေကို ပြုစုပျိုးထောင်ဖို့ရာ ဘယ်လောက်အရေးကြီးသလဲဆိုတာကို ကျနော်တို့ရဲ့ ပညာရေး က သိတတ်နားလည်ဖို့ လိုအပ်နေပါပြီ ။ မြန်မာ့ ပညာရေးတစ်လျောက် စိတ်လှုပ်ရှားခံစားမှုဆိုင်ရာ အသိပညာကို ပြုစုပျိုးထောင်ပေးဖို့ရာ မေ့ပျောက်ခံထားရတာ၊ မပေါ်မလွင်ဖြစ်နေတာကို ပြန်လည်ထုတ်ဖော်ဖို့လူပြီ ။ စစ်အာဏာရှင်တွေ ကနေ တည်ဆောက်ခဲ့တဲ့ သိမှုအဆောက်အအုံအတွင်းမှာရှိနေတဲ့ အမှန်တရား ၊ကိုယ်ကျင့်တရားတန်ဖိုးစံတွေကို အသေစွဲမှတ်ကိုင်စွဲပြီး ဆင်ခြင်မှုလုပ်နေတဲ့ ပုံစံတွေကို တိုက်စားဖြိုဖျက်ဖို့က စိတ်လှုပ်ရားမှုဆိုင်ရာ အသိပညာက သာလျင် ပိုပြီး စွမ်းဆောင်မှုပေးပါလိမ့်မယ်။
ဆရာနှင့် စိတ်လှုပ်ရှားခံစားမှု ဆိုင်ရာ အသိပညာ
တကယ်က ပညာရေးမှာ သင်ကြားပေးရမယ့် အသိပညာ ပုံစံ ၇နှစ်မျိုးရှိပါတယ်။ ဒီအသိပညာခုနှစ်မျိုးမှာမှ မြန်မာ့ ပညာရေးမှာ လစ်လျူရှုခံစားရဆုံးဟာ စိတ်လှုပ်ရှားခံစားမှုဆိုင်ရာ အသိပညာဆိုတာကိုတွေ့ရမယ်။ အသိပညာဆိုင်ရာ ခုနှစ်မျိုးကိုလေ့လာကြည့်ရင် - ၁။ ဘာသာဗေဒဆိုင်ရာအသိပညာ ၂။ လောဂျစ်နဲ့ သင်္ချာဆိုင်ရာ အသိပညာ ၃။ ဂီတ ဆိုင်ရာ အသိပညာ (သရုပ်ပြမှု ၊ စာစီကုံးမှု ၊ သီချင်တည်ဆိုမှု တွေ ပါဝင်တယ် ) ၄။ ခန္ဓာကိုယ်ကို အသုံးချပြီး ပြဿနာတွေကို ဖြေရှင်းနိုင်တဲ့ အ သိပညာ ( bodily-kinaesthetic intelligence ) ။ ၅။ နေရာနဲ့ကျယ်ပြန့် ဧရိယာတွေ အပေါ် မှတ်မိအသုံးပြုနိုင်တဲ့အသိပညာ ။ ၆နဲ့၇ကတော့ စိတ်လှုပ်ရှားဆိုင်ရာ အသိပညာရဲ့ အမျိုးအစားခွဲနှစ်ခု ဖြစ်တဲ့ လူလူချင်းကြား ဆက်ဆံရေးအသိပညာ နဲ့ ကိုယ်တွင်းစိတ်ခံစားချက်ကို နားလည်ခြင်း အသိပညာပဲ။ လူလူချင်းကြား ဆက်ဆံရေးအသိပညာဆိုတာ တခြားသောလူတွေရဲ့စိတ်ခံစား ၊ စိတ်ဆန္ဒ ၊ ရည်ရွယ်ချက် စတာတွေကို နားလည် ခံစားပေးနိုင်တဲ့ စိတ်ပညာပဲ။ ကိုယ်တွင်းစိတ်ခံစားချက်ကို နားလည်ခြင်းကတော့ ကိုယ့်ကိုယ်ကိုယ်လက်ခံနိုင်ခြင် ၊ ကိုယ့်ကိုယ်ကိုယ် နားလည်ခြင်း ၊ ကိုယ့်ရဲ့ငါဖြစ်မှု ( self) ကိုယ် သဘောပေါက်ခြင်းလို့ အရာမျိုးသာလျင်ဖြစ်တယ်။ သင်ရိုးညွန်တမ်း၊ ပြင်ပသင်ရိုးညွန်းတမ်း ၊ ကျောင်းရဲ့ဖွဲ့စည်းတည်ဆောက်ပုံတွေထဲမှာ အဲဒီလို အသိပညာ တွေဖြစ်ပေါ်လာအောင် အသုံးချနိုင်ဖို့လိုတယ်။ ဒါ့အမြင်ဆရာတွေမှာလည်း စိတ်လှုပ်ရှားခံစားနိုင်စွမ်း မြင့်မားနေဖို့ လိုတယ်။ ဒါမှ ကျောင်းသားက ကြောက်နေတာလား ၊ စဉ်းစားနေတာလားဆိုတဲ့ စိတ်ခံစားချက်ကို နားလည်ပြီး ပြုပြင် စီရင်နိုင်မှာ ဖြစ်တယ်။ ထိရောက်တဲ့ သင်ကြားခြင်းဆိုတာ ကျောင်းသားကို ခြိမ်းခြောက်နေတာ မဟုတ်ဘူး။ အတင်း အဓမ္မရိုက်သွင်းနေတာမဟုတ်ဘူး။ ထိရောက်တဲ့ သင်ကြားခြင်းဆိုတာထဲမှာ ကျောင်းသားရဲ့စိတ်လှုပ်ရှားခံစားချက် ကို နားလည်နိုင်လောက်တဲ့ စိတ်လှုပ်ရှားခံစားနိုင်စွမ်း အသိပညာတစ်ရပ် ဆရာဆရာမတွေမှာလည်း ဖြစ်ထွန်းနေဖို့လို တယ်။
မင်းခက်ရဲ

0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့ စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အခြားကဏ္ဍများကို လေ့လာရန်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...