20.10.2012 နေ့ဖတ်ရန်သတင်းများ

by Myanmar Journal on Friday, October 19, 2012 at 1:38pm ·

မြန်မာတိုင်းရင်းသားဒေသအတွက် နိပွန်ဖောင်ဒေးရှင်းကူမည်

ဂျပန်နိုင်ငံ နိပွန်ဖောင်ဒေးရှင်း ကနေ မြန်မာနိုင်ငံတိုင်းရင်းသားဒေသက စစ်ပြေး ဒုက္ခသည်တွေ နဲ့ အိုးအိမ်ရွှေ့ ပြောင်းခံပြည်သူတွေ အတွက် လူသားချင်း စာနာမှုဆိုင်ရာ အကူအညီပေးမယ်လို့ ဂျပန်နိုင်ငံ၊ တိုကျိုမြို့မှာ ကျင်းပတဲ့ နှီးနှောဖလှယ်ပွဲကို တက်ရောက်ခဲ့တဲ့ UNFC ခေါင်းဆောင်တွေ က ပြောပါတယ်။

ဒီကူညီရေး အစီအစဉ်တွေကို နိပွန်ဖေါင်ဒေးရှင်းရဲ့ ကြီးကြပ်မှု နဲ့ အရေးပေါ်အခြေအနေနဲ့ ရင်ဆိုင်နေရတဲ့ ဒေသတွေကို ဦးစားပေး ကူညီပေးသွားမယ်လို့လဲ ဆိုပါတယ်။ နိပွန်ဖောင်ဒေးရှင်းအနေနဲ့ မြန်မာပြည်ငြိမ်းချမ်းရေး အတွက် အကူအညီပေးသွားမှာ ဖြစ်သလို ရေရှည်အတွက် ထောက်ပံ့သွားမှာက်ို မျှော်လင့်နေတယ်လို့လဲ ပြောဆိုမှုတွေရှိနေပါတယ်။ ဒီအခြေအနေတွေကိုတော့ ထိုင်းအခြေစိုက်သတင်းထောက် နိုင်ကွန်းအိန်ကနေ ဆက်သွယ်မေးမြန်းထားပြီး အခုလိုသတင်းပေးပို့ထားပါတယ်။

လူသားချင်းစာနာမှုဆိုင်ရာ အကူညီပေးရေး အစီအစဉ်အတွက် ဂျပန်နိုင်ငံ နိပွန်ဖေါင်ဒေးရှင်းကနေ UNFC ခေါ် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီအဖွဲ့ဝင်တွေကို ဖိတ်ခေါ်ခဲ့ပြီး ဒီကနေ့နံက် ဂျပန်နိုင်ငံ၊ တိုကျိုမြို့မှာ တွေ့ဆုံဆွေးနွေးခဲ့ပါတယ်။ ဒီဆွေးနွေးပွဲမှာ ဂျပန်နိုင်ငံ နိပွန်ဖေါင်ဒေးရှင်းကနေ မြန်မာပြည်တွင်းက စစ်မက်ဖြစ်ပွားနေတဲ့ ဒေသက ပြည်သူတွေအတွက် လူသားချင်းစာနာမှုဆိုင်ရာ အကူညီပေးမယ်လို့ အစည်းအဝေး တက်ရောက်ခဲ့သူ UNFC အဖွဲ့ဝင် ပအိုဝ် အမျိုးသားလွတ်မြောက်ရေး အဖွဲ့ အတွင်းရေးမှူး ကိုခွန်မြင့်ထွန်းကပြောပါတယ်။

“အဲ့ဒီ့အကူအညီပေးမှုကတော့ ပထမဦးဆုံးအနေနဲ့ ကတော့ အရေးပေါ်လူသားချင်းစာနာမှုဆိုင်ရာ အကူအညီတွေကို အမြန်ဆုံးပေးပါတယ်။ အခုကျွန်တော်တို့ လောလောဆယ် အားဖြင့်ကတော့ ဒေါ်လာသုံးသန်း ဖိုးကို ကနဦးထောက်ပံ့မှုနဲ့ နိပွန်ဖောင်ဒေးရှင်း က ပေးမှာဖြစ်ပါတယ်။

ဒီအကူအညီပေးဆောင်တာဟာ နိပွန်ဖောင်ဒေးရှင်းရဲ့ ကြီးကြပ်မှုနဲ့ အရေးပေါ်အခြေအနေနဲ့ ရင်ဆိုင်နေရတဲ့တိုင်းရင်းသားဒေသတွေကို ဦးစားပေးကူညီသွားမယ်လို့ ကိုခွန်မြင့်ထွန်းကပြောပါတယ်။

“နိပွန်ဖေါင်ဒေးရှင်းကနေ ကျွန်တော်တို့ကို ပေးတဲ့အခါမှာ ငွေသားပိုက်ဆံကို ကျနော်တို့ကို ပေးတာမဟုတ်ဘဲနဲ့ အဓိကအားဖြင့် ပထမဦးဆုံးမှာ အရေးပေါ် လိုအပ်ချက် ဖြစ်တဲ့အတွက်ကြောင့်မို့ ဆန်နဲ့ ဆေးဝါးကို ပေး မှာ ဖြစ်ပါတယ်။ အဲဒီလို ဆန်နဲ့ ဆေးဝါးကို ပေးတဲ့အခါမှာ နိပွန်ဖေါင်ဒေးရှင်းက သူတို့ကိုယ်တိုင် ကြီးကြပ်မှု နဲ့ ပေးမှာဖြစ်ပါတယ်။ အရေးပေါ် လို့ ပြောတဲ့နေရာမှာ ဒုက္ခအရောက်ဆုံးဖြစ်နေတဲ့သူတွေ ဦးစားပေး ပေးမှာဖြစ်ပါတယ်။

ဥပမာ ကျနော်တို့ဆီမှာ UNFCရဲ့ အဖွဲ့အစည်းက ကေအိုင်အိုက အခု ကျနော်တို့ ပဋိပက္ခ အပြင်းထန်ဆုံး ဖြစ်နေတဲ့ ဒေသဖြစ်ပါတယ်။ အဲဒီမှာ ဒုက္ခရောက်နေတဲ့ ပြည်သူတွေအတွက် အဓိကထားပြီးတော့ ပေးမှာဖြစ်ပါတယ်။ အဲဒီလိုပေးတဲ့အခါမှာ ကျွန်တော်တို့ UNFCအဖွဲ့တွေ နဲ့ ဆက်စပ်တဲ့ IDP ပေါ့လေ။ ဒုက္ခရောက်နေတဲ့ လူထုတွေကို ကူညီတဲ့ကိစ္စမှာ အချိုးကျခွဲတမ်းစံနစ်နဲ့ ကူညီဆောင်ရွက်မှာ ဖြစ်ပါတယ်။ အထူးအားဖြင့် ကချင်ဒေသကို ဦးစားပေးပြီး ဆောင်ရွက် သွားမှာဖြစ်ပါတယ်။”

ဟုတ်ကဲ့။ နိပွန်ဖေါင်ဒေးရှင်းအနေနဲ့ မြန်မာပြည်က စစ်မက်ဖြစ်ပွါးရာဒေသက ပြည်သူတွေ အိုးအိမ် ရွှေ့ ပြောင်းခံ ပြည်သူတွေကို ဘယ်ကာလအထိ ကူညီထောက်ပံ့ပေးဖို့ အစီအစဉ်ရှိပါသလဲခင်ဗျာ။

“ကျနော်တို့ အခုနားလည်ထားချက်ကတော့ နိပွန်ဖေါင်ဒေးရှင်းကတော့ ဂျပန်နိုင်ငံမှာ အကြီးဆုံးသောက NGO အဖွဲ့အစည်းဖြစ်ပါတယ်။ ဂျပန်ပြည်သူလူထုရဲ့ ငွေတွေနဲ့ သူတို့တာဝန်ခံပြီး ဆောင်ရွက်နေတဲ့ အကြီးဆုံးသော အဖွဲ့အစည်းဖြစ်ပါတယ်။ ငြိမ်းချမ်းရေးဖြစ်စဉ်မှာ ဂျပန်ပြည်သူလူထုအနေနဲ့ ပါဝင် ဆောင်ရွက်လိုတယ်။ ဒါကြောင့်မို့လို့ ကျနော်တို့ တိုင်းပြည်ရဲ့ ငြိမ်းချမ်းရေးဖြစ်စဉ် ပြီးဆုံးတဲ့အထိကို သူတို့ ကူညီဆောင်ရွက်သွားမယ်လို့ ကျနော်တို့ အဲဒီလိုမျှော်လင့်ထားပါတယ်။

ကျနော်တို့ နိပွန် ဖေါင်ဒေးရှင်းက ဥက္ကဌ Yohei Sasakawa ကပြောတာကတော့ ကမ္ဘာကြီးမှာ ကျနော်တို့က မိသားစုတခုထဲပါဘဲ။ ဒါကြောင့် ကျွန်တော်တို့ မိသားစုအချင်းချင်းမှာ ဒုက္ခရောက်တဲ့ အချိန်မှာ ကျွန်တော်တို့ ကူညီဆောင်ရွက်ပေးပါ့မယ် ဆိုတာကို သူအာမခံပြီး ပြောပါတယ်။

ပြီးခဲ့တဲ့စက်တင်ဘာလက နိပွန်ဖေါင်ဒေးရှင်းကိုယ်စားလှယ်တွေ ထိုင်းနိုင်ငံကို ရောက်စဉ်အတွင်း UNFC အဖွဲ့ဝင်တွေကို လာရောက်တွေ့ဆုံခဲ့ပါတယ်။ အဲဒီတွေ့ဆုံစဉ်မှာ တိုင်းရင်းသားအဖွဲ့တွေ အနေနဲ့ မြန်မာ အစိုးရနဲ့တွေ့ဆုံဆွေးနွေးပြီး မြန်မာနိုင်ငံအရေးအတွက် အဖြေရှာကြဖို့ တိုက်တွန်းခဲ့သလို နိပွန်ဖေါင်ဒေးရှင်း အနေနဲ့ အားပေး အားမြှောက် ပြုသွားမယ်လို့ လဲပြောဆိုခဲ့ပါတယ်။

လက်ရှိအနေအထားမှာတော့ မြန်မာအစိုးရအနေနဲ့ တိုင်းရင်းသား လက်နက်ကိုင် အဖွဲ့အစည်းတွေအပေါ် ငြိမ်းချမ်းရေးအရ တွေ့ဆုံဆွေးနွေးနေသလို တဘက်မှာလဲ ထိုးစစ်ဆင်နေတဲ့ အနေအထားမှာ ရှိနေပါတယ်။ တကယ်လို့ ငြိမ်းချမ်းရေး ပျက်ပြယ်သွားရင် နိပွန်ဖေါင်ဒေးရှင်းအနေနဲ့ လူသားချင်းစာနာမှုဆိုင်ရာ အကူညီ ပေးရေး အစီအစဉ် ပေးနိုင်ပါ့မလား ဆိုတဲ့မေးခွန်းအပေါ် ညီညွတ်သော တိုင်းရင်းသားများ ဖက်ဒရယ်ကောင်စီရဲ့ အတွင်းရေးမှူး နိုင်ဟံသာက အခုလိုပြောပါတယ်။

“ဟိုမှာထိုးစစ်တွေရှိနေသေးတယ်။ တိုက်ပွဲတွေဖြစ်နေသေးတယ်ဆိုတဲ့အပိုင်းကလဲ ကေအိုင်အိုနဲ့ အစိုးရနဲ့ ဆွေးနွေးနေကြတယ်လို့ ကျွန်တော်တို့ သိရတယ်လေ။ အဲတာလဲ ဘယ်လို အဖြေထွက်လာမလဲလို့ ကျွန်တော် တို့ အတိအကျ မပြောတတ်သေးဘူးဗျ။ တိုက်ပွဲကတော့ ကနေ့လဲ ဖြစ်နေတာဘဲလေ။ အဲဒီလိုဖြစ်နေတဲ့ အခြေအနေမှာလဲ သူတို့ပေးမှာပါ။ ကချင်ဘက်လဲ ပါတာဘဲ။ ကချင်ဘက်က ဒုက္ခသည်တွေ တခြားဒေသထက် ပိုများနေပါသေးတယ်။ အဲတာတွေလဲပေးမှာပါ။”

လူသားချင်းစာနာမှုဆိုင်ရာ အကူအညီတွေပေးအပ်နိုင်ရေး နှီးနှောဖလှယ်ပွဲကို တက်ရောက်ဖို့ ဂျပန်နိုင်ငံ နိပွန် ဖေါင်ဒေးရှင်းကနေ UNFC ခေါ် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီကို ဖိတ်ကြားခဲ့ ပါတယ်။ဒီနှီးနှောဖလှယ်ပွဲကို ဗိုလ်မှူးကြီး ခွန်ဥက္ကာ ဦးဆောင်ခဲ့ပြီး UNFCအဖွဲ့ဝင်တွေဖြစ်တဲ့ ကေအိုင်အိုခေါ် ကချင် လွတ် လပ်ရေး အဖွဲ့၊ ကေအန်ယူခေါ် ကရင်အမျိုးသားအစည်းအရုံး ၊KNPPခေါ် ကရင်နီအမျိုးသား တိုးတက်ရေး ပါတီ၊  မွန်ပြည်သစ်ပါတီ၊ ပအိုဝ်အမျိုးသားလွတ်မြောက်ရေးအဖွဲ့၊ ရှမ်းပြည်တိုးတက်ရေး ပါတီအပါအ၀င် အဖွဲ့(၁၀)ဖွဲ့ တက်ရောက်ခဲ့ပါတယ်။

ပြီးခဲ့တဲ့ ဇူလိုင်လ(၂၄)ရက်နေ့တုန်းက နိပွန်ဖေါင်ဒေးရှင်းဥက္ကဌYohei Sasakawa ဟာ မြန်မာနိုင်ငံကို ရောက် လာပြီး သမ္မတဦးသိန်းစိန်ရယ် အမျိုးသားဒီမိုကရေစီအဖွဲ့ချုပ်ဥက္ကဌ ဒေါ်အောင်ဆန်းစုကြည် နဲ့ လဲတွေ့ဆုံခဲ့ ပါသေးတယ်။ နိပွန်ဖေါင်ဒေးရှင်း ကို (၁၉၆၂)ခုနှစ်မှာ စတင် တည်ထောင်ခဲ့ပါတယ်။

အမေရိကန် သံအမတ်ရဲ့ သတင်းစာရှင်းလင်းပွဲ

ပြီးခဲ့တဲ့ ရက်ပိုင်း မြန်မာနိုင်ငံ နေပြည်တော်မှာ ကျင်းပခဲ့တဲ့ အမေရိကန်ပြည်ထောင်စု နဲ့ မြန်မာနိုင်ငံကြား လူ့အခွင့်အရေးဆွေးနွေးပွဲမှာ အရပ်သား အုပ်ချုပ်ရေး နဲ့ လွတ်လပ်တဲ့ လူ့အဖွဲ့အစည်းတွေအတွင်းက စစ်တပ်ရဲ့ အခန်းကဏ္ဍကို အမေရိကန် စစ်တပ်အရာရှိတွေ ဆွေးနွေးခဲ့ကြပြီး ထူးခြားတဲ့ သမိုင်းဝင်ဆွေးနွေးပွဲဖြစ်တဲ့ အကြောင်း မြန်မာနိုင်ငံဆိုင်ရာ အမေရိကန်သံအမတ်ကြီး Derek Mitchell က ပြောပါတယ်။

အမေရိကန်ပြည်ထောင်စုအနေနဲ့ ရခိုင်ပြည်နယ်တွင်းက ဒုက္ခသည်တွေ ကူညီရေးအတွက် အမေရိကန် ဒေါ်လာ ၂သန်းနဲ့ ၇သိန်း တိုးပြီးတော့ ကူညီသွားမယ်လို့  ဒီနေ့ နေ့ခင်းပိုင်း အမေရိကန်သံရုံးမှာ ကျင်းပတဲ့ သတင်းစာရှင်းလင်းပွဲမှာ ပြောဆိုသွားပါတယ်။ အပြည့်အစုံကို သတင်းစာရှင်းလင်းပွဲတက်ရောက်ခဲ့တဲ့ ကိုအောင်ရဲမောင်မောင်က သတင်းပေးပို့ထားပါတယ်။

နေပြည်တော်မှာ ဒီတပတ်တွင်း ကျင်းပခဲ့တဲ့ အမေရိကန်အရာရှိတွေ နဲ့ မြန်မာအစိုးရ အဖွဲ့ခေါင်းဆောင်တွေကြား လူ့အခွင့်အရေးဆွေးနွေးပွဲတွေအကြောင်း သံအမတ်ကြီး Derek Mitchellက သတင်းစာရှင်းလင်းပွဲမှာ အဓိက ပြောဆိုသွားပါတယ်။ ဒီလိုလူ့အခွင့်အရေး ဆိုင်ရာ ဆွေးနွေးပွဲမျိုးကို ပြီးခဲ့တဲ့နှစ်တွေတုန်းကဆိုရင် ဖြစ်နိုင်မယ်လို့ မမျှော်လင့်တဲ့အကြောင်း သံအမတ်ကြီး ပြောဆိုသွားခဲ့ပါတယ်။

ဆွေးနွေးပွဲမှာ အမေရိကန်သမ္မတအိမ်ဖြူတော်၊ အမျိုးသားလုံခြုံရေးဌာန၊ ဒုသမ္မတရုံး အမိမြေလုံခြုံရေး၊ ကာကွယ်ရေးဝန်ကြီးဌာနနဲ့ နိုင်ငံတကာ ဖွံ့ဖြိုးရေး အထောက်အကူပေးမှု ဆိုင်ရာအဖွဲ့ဝင်တွေ စစ်ဘက်ဆိုင်ရာအရာရှိတွေ မြန်မာအစိုးရဝန်ကြီးတွေ အရာရှိတွေ တက်ရောက်ခဲ့ပါတယ်။

ဆွေးနွေးခဲ့တဲ့ အကြောင်းအရာတွေထဲမှာ အလုပ်သမားအခွင့်အရေးကိစ္စ၊ ဘာသာရေးလွတ်လပ်ခွင့်၊ ဥပဒေစိုးမိုးရေး၊ တရားရေးစနစ်နဲ့ အတည်ပြုပြီး ပြဌာန်းတဲ့ ဥပဒေတွေကို လေးစားလိုက်နာ အကောင်အထည်ဖော်ရေး ကိစ္စတွေကို ဆွေးနွေးကြပါတယ်။ လုံခြုံရေးနဲ့ လူ့အခွင့်အရေးအကြား ချိန်ခွင်လျှာ ထိန်းသိမ်းရေးကိစ္စတွေကို ကျယ်ကျယ်ပြန့်ပြန့် ဆွေးနွေးခဲ့တယ်လို့လည်း သံအမတ်ကြီး Derek Mitchellက ပြောဆိုသွားခဲ့တာပါ။

အမေရိကန်စစ်ဘက်ဆိုင်ရာအရာရှိတွေနဲ့ အရပ်သားအုပ်ချုပ်ရေးနဲ့ လွတ်လပ်တဲ့ လူ့အဖွဲ့အစည်းတွေအတွင်းက စစ်တပ်ရဲ့ အခန်းကဏ္ဍနဲ့ အမေရိကန်စစ်တပ်ရဲ့ ရပ်တည်မှုနဲ့ တန်ဖိုးထားမှုတွေအကြောင်းကိုလည်း အဓိကပြောဆိုခဲ့တယ်လို့ သူက ဆိုပါတယ်။ ဒီသတင်းစာရှင်းလင်းပွဲ မကျင်းပခင်မှာပဲ အမေရိကန်ပြည်ထောင်စုနဲ့ မြန်မာနိုင်ငံအကြား စစ်ရေးအရ ပူးပေါင်းဆောင်ရွက်ရေးတွေ တိုးမြှင့်ဆောင်ရွက်မယ်ဆိုတဲ့သတင်းတွေ နဲ့ ထိုင်းနိုင်ငံမှာ ကျင်းပတဲ့ Copra Gold စစ်ရေးလေ့ကျင့်မှုမှာ မြန်မာစစ်တပ်ကို ဖိတ်ကြားမယ် ဆိုတဲ့သတင်းတွေ ထွက်ပေါ်ခဲ့ပါတယ်။

ဒီကိစ္စတွေနဲ့ပတ်သတ်လို့ သံအမတ်ကြီး Derek Mitchellက အတည်ပြုဖို့ ငြင်းဆိုခဲ့သလို အသေးစိတ်ဖြေကြားဖို့ကိုလည်း ငြင်းဆိုခဲ့ပါတယ်။ မြန်မာနိုင်ငံကို ရောက်လာတဲ့ အမေရိကန် ဒု နိုင်ငံခြားရေးဝန်ကြီး William Burns ရဲ့ ခရီးစဉ် အဓိက ရည်ရွယ်ချက်ဟာ လက်ရှိ မြန်မာနိုင်ငံမှာ ဖြစ်ပေါ်နေတဲ့ အပြောင်းအလဲတွေရဲ့ အရှိန်အဟုန်ကို ဆက်ပြီး ထိန်းသိမ်းနိုင်ဖို့ ဖြစ်တယ်လို့လည်း သံအမတ်ကြီး Derek Mitchellကပြောပါတယ်။

ဒုနိုင်ငံခြားရေးဝန်ကြီးနဲ့ မြန်မာအစိုးရခေါင်းဆောင်တွေအကြား ရင်းရင်းနှီးနှီး၊ ပွင့်ပွင့်လင်းလင်း ဆွေးနွေးခဲ့ကြ တာဖြစ်သလို ဖြစ်ပျက်နေတဲ့ အခြေအနေတွေ၊ မြင်နေရတဲ့အနေအထားတွေအပေါ် မစ္စတာ William Burnsအနေနဲ့ ကျေနပ်အားရမှုရှိတယ်လို့လည်း သူကပြောပါတယ်။

မြန်မာနိုင်ငံမှာ အတည်ပြုမယ့် နိုင်ငံခြားရင်းနှီးမြုတ်နှံမှု ဥပဒေကို အနီးကပ်စောင့်ကြည့်လေ့လာနေသလို ရင်းနှီးမြုတ်နှံမယ့် အထူးသဖြင့် မြန်မာနိုင်ငံတွင်းက သယံဇာတတွေကို တူးဖော်ထုတ်လုပ်မယ့် ရင်းနှီးမြုတ်နှံရေးလုပ်ငန်းတွေ လုပ်ကိုင်မယ့် အမေရိကန်ကုမ္မဏီတွေအနေနဲ့ ထင်သာမြင်သာရှိဖို့ ၊ မြန်မာပြည်သူတွေရဲ့ အကျိုးစီးပွားကို အဓိက ထားဖို့နဲ့ တာဝန်ယူမှုရှိတဲ့ ရင်းနှီးမြုတ်နှံမှုတွေ ဖြစ်စေရေး စတဲ့ အမေရိကန်အစိုးရရဲ့ မူဝါဒတွေကိုလည်း သံအမတ်ကြီး Derek Mitchellက သတင်းစာရှင်းလင်းပွဲမှာ ပြောဆိုရှင်းလင်းသွားခဲ့ပါတယ်။

ရခိုင်ပြည်နယ်အတွင်းက နေရပ်စွန့်ခွာထွက်ပြေးသူတွေအတွက် လူသားချင်းစာနာမှု အကူအညီအဖြစ် အမေရိကန်ပြည်ထောင်စုက ဒေါ်လာ ၂.၇ သန်း ထောက်ပံ့မှာဖြစ်တဲ့ အကြောင်းကိုလည်း သံအမတ်ကြီး Derek Mitchellက ဒီနေ့သတင်းစာရှင်းလင်းပွဲ မှာ ပြောဆိုခဲ့ပါတယ်။

ရခိုင်ပြည်နယ်အတွင်း ဖြစ်ပွားနေတဲ့ အခြေအနေတွေ အပေါ် စောင့်ကြည့်လေ့လာချက်တွေ အရ နောက်ထပ် အကူအညီတွေ ကို ပေးအပ်လိုက်တာဖြစ်ပြီး ပေးအပ်လိုက်တဲ့ အကူအညီတွေကို ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR ကတဆင့် ဒေါ်လာ ၂သန်းနဲ့ ကုလသမဂ္ဂ ကလေးများရံပုံငွေအဖွဲ့ UNICEF ကတဆင့် ဒေါ်လာ ၇သိန်း ၃သောင်း ပေးအပ်လိုက်တဲ့အကြောင်း သံအမတ်ကြီး Derek Mitchellက ပြောဆိုသွားပါတယ်။

ဒီအကူအညီတွေကို ရခိုင်ပြည်နယ်အတွင်းမှာ ရှိတဲ့ ရခိုင်နဲ့ ရိုဟင်ဂျာ လူ့အသိုင်းအဝိုင်းနှစ်ခု စလုံးအတွက် ထောက်ပံ့ပေးမှာဖြစ်ပြီး ပြည်တွင်းနေရပ်စွန့်ခွာထွက်ပြေးသူတွေအပေါ် ခွဲခြားဆက်ဆံမှုမရှိစေရ မူအပါအဝင် လူသားချင်း စာနာထောက်ထားရေး လမ်းညွန်တွေ အတိုင်း ပေးအပ်မှာဖြစ်တယ်လို့လည်း ပြောဆိုသွားပါတယ်။ ဒီအကူအညီတွေဟာ ရခိုင်နဲ့ ရိုဟင်ဂျာ လူ့အသိုင်းအဝိုင်းကြား ယုံကြည်မှု ပြန်လည်တည်ဆောက်နိုင်ရေးအတွက် အထောက်အကူပြုစေမယ်လို့ မျှော်လင့်တဲ့အကြောင်းလည်း သံအမတ်ကြီး Derek Mitchellက ပြောဆိုသွားပါတယ်။

Cobra Gold မှာ မြန်မာ လေ့လာခွင့်ရဖို့ US ထောက်ခံ

နောင်နှစ်ကျင်းပမယ့် ထိုင်း၊ အမေရိကန်အပါအဝင် ဒေသတွင်းနိုင်ငံတွေရဲ့ ကမ္ဘာ့အကြီးဆုံး စစ်ရေးလေ့ကျင့်မှုတခုဖြစ်တဲ့ Cobra Gold စစ်ရေးလေ့ကျင့်မှုမှာ မြန်မာနိုင်ငံကို ဖိတ်ကြားဖို့ အမေရိကန်ပြည်ထောင်စုက ထောက်ခံထားတယ်လို့ အမေရိကန်ကာကွယ်ရေး ဝန်ကြီးဌာန ပြောခွင့်ရသူ George Litte ကပြောပါတယ်။ ဒါပေမယ့် ဒီဖိတ်ကြားချက်ကို အမေရိကန်နိုင်ငံကမဟုတ်ပဲ ထိုင်းနိုင်ငံက ဖိတ်ကြားမှာဖြစ်တယ်လို့လည်း ဆိုပါတယ်။

ဒါပေမယ့်လည်း ဒါနဲ့ပတ်သက်လို့ ထိုင်းနိုင်ငံဘက်က သီးခြားအတည်ပြုချက်တော့ ထွက်မလာသေးပါဘူး။ နှစ်စဉ်ပြုလုပ်တဲ့ ဒီပူးတွဲစစ်ရေးလေ့ကျင့်မှုမှာ အမေရိကန်စစ်သည် ထောင်ပေါင်းများစွာနဲ့အတူ ထိုင်းနဲ့ အာရှနိုင်ငံတချို့က တပ်မတော်တွေ ပူးတွဲပြီးတော့ ဗျူဟာမြောက် စစ်ရေးလေ့ကျင့်မှုတွေ ပြုလုပ်ကြတာဖြစ်ပါတယ်။

အခုလိုဖိတ်ကြားတာဟာ ၁၉၈၈ခုနှစ်နောက်ပိုင်း စစ်ရေးအရ ဖြတ်တောက်မှုပြီးတဲ့နောက်ပိုင်းမှာမှ အမေရိကန် မြန်မာစစ်ရေး အရ ပူးတွဲပြီးတော့ ဆက်ဆံလာတဲ့ ပထမဦးဆုံး ခြေလှမ်းအဆင့်ဖြစ်တယ်လို့လည်း ပြောဆိုကြပါတယ်။

ပြီးခဲ့တဲ့နှစ် Cobra Gold စစ်ရေးလေ့ကျင့်မှု ဆင်နွှဲခဲ့တုန်းက အမေရိကန်တပ်သား တသောင်းခန့်၊ ထိုင်းတပ်သား သုံးရာခန့်၊ အင်ဒိုနီးရှား၊ ဂျပန်၊ မလေးရှား၊ စင်ကာပူနဲ့ တောင်ကိုရီးယားနိုင်ငံက တပ်သားတွေ ပါဝင်ခဲ့ပါတယ်။ တရုတ်အပါအဝင် ၉နိုင်ငံကလည်း ဒီစစ်ရေးလေ့ကျင့်မှုကို လေ့လာသူတွေ စေလွှတ်ခဲ့ပါတယ်။

နောင်နှစ်ကျင်းပမယ့် Cobra Gold စစ်ရေးလေ့ကျင့်မှုမှာတော့ စင်ကာပူ၊ ဂျပန်၊ တောင်ကိုရီးယား ၊ အင်ဒိုနီးရှား၊ မလေးရှားတို့ ပါဝင်မှာဖြစ်ပြီးတော့ လေ့လာသူနိုင်ငံ ၁၃နိုင်ငံ တက်ရောက်မယ်လို့ မျှော်လင့်ရကြောင်း ထိုင်းနိုင်ငံ တာဝန်ရှိသူတွေက ပြောပါတယ်။

ဂျပန်ရှိ အမေရိကန်တပ်တွေ အပေါ် အမေရိကန်တပ်မှူး ညမထွက်ရ အမိန့်ထုတ်

 

ဂျပန်နိုင်ငံ အိုကီနာဝါမြို့က အမျိုးသမီးတဦးကို အမေရိကန်ရေတပ် တပ်သားတွေကနေ အဓမ္မပြုကျင့်ခဲ့တယ် ဆိုတဲ့ စွတ်စွဲချက် ထွက်ပေါ်လာပြီးတဲ့နောက် ဂျပန်နိုင်ငံမှာရောက်ရှိနေတဲ့ အမေရိကန်စစ်မှုထမ်းတွေ အားလုံး ညမထွက်ရ ဆိုတဲ့ အမိန့်ကို ဂျပန်နိုင်ငံမှာရှိတဲ့ အမေရိကန် တပ်ဖွဲ့များရဲ့အကြီးအကဲက အမိန့်ထုတ်ပြန်လိုက်ပါတယ်။ ဂျပန်နိုင်ငံမှာ တာဝန် ထမ်းဆောင်နေသူတွေရော ခေတ္တခဏ ရောက်ရှိနေတဲ့ အမေရိကန်တပ်ဖွဲ့ဝင်တွေ အားလုံးဟာ ည ၁၁ နာရီကနေ မနက် ၅ နာရီအတွင်း အပြင်မထွက်ရ ဆိုတဲ့အမိန့်ကို သောကြာနေ့မှာ ဒုတိယ ဗိုလ်ချုပ်ကြီး Salvatore Angelella ကပြောပါတယ်။

ညမထွက်ရ အမိန့်ဟာ ဂျပန်နိုင်ငံမှာ တာဝန်ထမ်းဆောင်နေကြတဲ့ တခြားအမေရိကန်နိုင်ငံသားတွေ သာမန်ပြည်သူတွေနဲ့ မသက်ဆိုင်ဘူးလို့ ဒုတိယ ဗိုလ်ချုပ်ကြီး Angelellaကပြော ပါတယ်။ အိုကီနာဝါကျွန်း တောင်ပိုင်း မှာ အမေရိကန်ရေတပ် တပ်ဖွဲ့ဝင် ၂ ယောက်ကို ရဲတပ်ဖွဲ့က ကြာသာပတေးနေ့မှာ ဖမ်းဆီးခဲ့ပါတယ်။ သူတို့ဟာ အင်္ဂါနေ့စောစောပိုင်းတုံးက ဒေသခံ အမျိုးသမီးတဦးကို လူနေတိုက်ခန်းခြံဝန်း တခုအတွင်းမှာ အဓမ္မ ပြုကျင့်ခဲ့တယ်လို့ စွတ်စွဲခံထားရပါတယ်။

ရခိုင်အရေး အစီရင်ခံစာ အချိန် မမီနိုင်

ရခိုင်ပြည်နယ်မှာ အခြေအနေ တည်ငြိမ်လာလို့ အပြင်မထွက်ရ ကန့်သတ်ချိန် လျှော့ပေးလာ

ပြီးခဲ့တဲ့ ဇွန်လက ရခိုင်ပြည်နယ် မှာ ဖြစ်ခဲ့တဲ့ ပဋိ ပက္ခတွေနဲ့ ပတ်သက်ပြီးလာမယ့်လမှာ တင်သွင်း ရမယ့် အစီရင်ခံစာကို အချိန်မီ ပြီးအောင် လုပ်နိုင်မှာ မဟုတ်ဘူးလို့ ရခိုင်ပဋိပက္ခ စုံစမ်းရေး ကော်မရှင်က ပြောပါတယ်။

အလွှာ ပေါင်းစုံက လူတွေ ပါဝင်တဲ့ စုံစမ်းရေး ကော်မရှင်ရဲ့ တွေ့ရှိချက် တွေကို လာမယ့်လ နိုဝင်ဘာလ ၁၄ ရက်နေ့မှာ သမ္မတဆီ တင်သွင်းဖို့ ဖြစ်ပေမဲ့ စုံစမ်း စစ်ဆေးတဲ့ နေရာမှာ အခက်အခဲတွေ ရှိနေ တယ်လို့ ကော်မရှင် အဖွဲ့ဝင် လည်းဖြစ် ပြန်ကြားရေး တာဝန်ခံ တစ်ယောက်လည်း ဖြစ်တဲ့ ဦးသူရ ခေါ် ဇာဂနာက ဘီဘီစီကို ပြော ပါတယ်။

ကော်မရှင်ရဲ့ တာဝန်က ဖြစ်ခဲ့တဲ့ ပြဿနာရဲ့ ဇစ်မြစ်၊ တရား ဥပဒေ စိုးမိုးရေးနဲ့ ငြိမ်းချမ်းစွာ အတူ ယှဉ်တွဲ နေထိုင်ရေးတို့ အပါအဝင် အချက် ၈ ချက်ကို စုံစမ်း လေ့လာ အဖြေ ရှာကြရမှာ ဖြစ်တယ်လို့ သူက ပြောပါတယ်။

ဒါပေမဲ့ အဲဒီထဲမှာ အရေးကြီးဆုံးလို့ ဆိုနိုင်တဲ့ ငြိမ်းချမ်းစွာ အတူယှဉ်တွဲ နေထိုင်ရေး နဲ့ ပတ်သက်ပြီး နည်းလမ်းရှာဖို့ မေးမြန်း စုံစမ်းမှု တွေမှာ အခက် အခဲတွေ ရှိနေတယ်လို့ လည်း ဆိုပါတယ်။

အခု နောက်ပိုင်းမှာ စုံစမ်းရေး ကော်မရှင် အပေါ် ပြည်သူတွေရဲ့ ယုံကြည်မှု နည်းလာပြီး ပြည်သူတွေက သူတို့ လုံခြုံရေးကို စိုးရိမ် လာကြတဲ့ အတွက် ပူးပေါင်း ဆောင်ရွက်မှု အားနည်း လာတယ်လို့ ဦးသူရက ပြော ပါတယ်။

ဒီလို ဖြစ်လာ ရတာက စုံစမ်းရေး ကော်မရှင်က တွေ့ဆုံ မေးမြန်း စကားပြောခဲ့ သူတိုင်းကို သူတို့ ဘယ်သူ ဘယ်ဝါ ဖြစ်တယ် ဆိုတာ လျှို့ဝှက် ထားပေမဲ့ အဲဒီ မေးမြန်းမှုတွေကို ကြားဖြတ် အသံဖမ်းယူပြီး အများသိအောင် အင်တာနက်တွေ ပေါ်မှာ ဖြန့်တာ၊ ဖေ့စ်ဘွတ်ပေါ်မှာ ဖြန့်တာတွေ ရှိတဲ့ အတွက် ဒါတွေကို ကော်မရှင် အဖွဲ့ဝင် တွေက လုပ်တာလို့ ထင်မြင်ပြီး လူတွေက ကြောက်သွား ကြတယ်လို့ ဆိုပါတယ်။

ပြည်နယ် လွှတ်တော် ကိုယ်စားလှယ် ကိုယ်တိုင်က လုပ်တာဟာ ဖြစ်ရပ်မှန်ကို မပေါ်ပေါက် စေချင်လို့ လား ဆိုပြီး မေးစရာ ဖြစ်လာတယ်လို့ ဦးသူရက ပြော ပါတယ်။

ဒါ့အပြင် သူက လောလောဆယ် အခက်အခဲတွေ ရှိနေပေမဲ့ ငြိမ်းချမ်းစွာ အတူနေထိုင်နိုင်ရေး အတွက်တော့ အဖြေရှာနိုင်လိမ့်မယ် ဆိုတာ သူ့ရဲ့ အတွေ့ အကြုံ အရ ပြောနိုင်တယ်လို့ ဆိုပါတယ်။

ရခိုင်ပြည်နယ် ပြဿနာဟာ အုပ်စုအတွင်း တချို့ရဲ့ ဦးဆောင်မှုတွေကြောင့် မမျှော်လင့်ဘဲ ဖြစ်ခဲ့ရ ပေမဲ့ နှစ်ဘက် အုပ်စုတွေ အချင်းချင်း ပြန်တွေ့ ကြတာကို တွေ့မြင်ရချိန် မှာတော့ အမုန်းတရားတွေ မရှိကြဘဲ နွေးနွေး ထွေးထွေး ဆက်ဆံ ပြောဆိုကြတာကို မြင်ရ တာဟာ အားရ စရာလို့ ဦးသူရ က ပြောပါတယ်။

မုန်းတီးမှု မရှိကြတဲ့ မတူညီတဲ့ အုပ်စု နှစ်စုကို မျက်နှာချင်းဆိုင် တွေ့ဆုံစေပြီး ဆွေးနွေး စကားပြောနိုင်အောင် ဖန်တီးပေးမယ်ဆိုရင် ငြိမ်းချမ်းစွာ အတူနေထိုင်ရေး အတွက် အဖြေ ထွက်လာမယ်လို့ ဦးသူရက ယုံကြည် နေပါတယ်။

ဒီလို ဖြစ်လာအောင် ဗုဒ္ဓဘာသာ ဆရာတော် သံဃာတော်တွေကိုရော မွတ်ဆလင် ဘာသာရေးခေါင်းဆောင်တွေကိုပါ အကူအညီတောင်းခံထားတယ်လို့ ကော်မရှင် ပြန်ကြားရေး တာဝန်ခံ တစ်ယောက် ဖြစ်တဲ့ ဦးသူရက ပြောပါတယ်။

လိင်လုပ်ငန်းမှာဥပဒေကင်းမဲ့လို့ HIV ပိုပြန့်

ကုလသမဂ္ဂ က ထုတ်ပြန်တဲ့ အစီရင်ခံစာမှာ အရှေ့အာရှ နဲ့ ပစိဖိတ် ဒေသ အတွင်း၊ မြန်မာနိုင်ငံ အပါအဝင် နိုင်ငံတိုင်းမှာ လိင်လုပ်ငန်းမှာ တရားဝင် ခွင့်ပြုမထားဘဲ ရာဇဝတ်မှု အဖြစ် သတ်မှတ် နိုင်နင်း ကြတဲ့ အတွက် HIV ခုခံ စွမ်းအား ကျဆင်းတဲ့ ရောဂါ ပိုမိုကျယ်ပြန့် လာတယ် လို့ ဖေါ်ပြထားပါတယ်။

ဒီအစီရင်ခံစာ အပေါ် မူတည်ပြီး မြန်မာနိုင်ငံတွင်း က လိင်လုပ်သား အမျိုးသမီးလေး တယောက် ကလည်း ပြည်တွင်းမှာ က ပြည့်တန်ဆာ နှိပ်ကွပ်ရေး ဥပဒေ၊ ပ ပျောက်ရေး ဥပဒေ စတာတွေ အရ ပြည့်တန်ဆာ မှု နဲ့ ကျော်စောမှု စတာတွေနဲ့ ထောင်ဒဏ် ၁ နှစ် မှ ၅ နှစ် အထိ ချမှတ်လေ့ ရှိကြောင်း၊ အကာ အကွယ်ပေး တဲ့ ဥပဒေ ရယ် လို့ မရှိတဲ့ အတွက်၊ မလုံခြုံတဲ့ ဘဝ မှာ နေရတဲ့ အကြောင်း ဘီဘီစီ ကို ရှင်းပြပါတယ်။

သူတို့ အနေနဲ့ လမ်းထွက် သာမန် ဈေးဝယ်ထွက်ရင်တောင်၊ အဖမ်းခံရတာတွေ၊ သွားနေကျ နေရာ ကို သွားတဲ့ အခါမှာလည်း ဥပဒေ စိုးမိုးမှု မရှိတဲ့ အတွက် ပြည့်တန်ဆာ မှု နဲ့ ကျော်စောမှု စတာတွေနဲ့ ဖမ်းဆီးခြင်း ခံရတဲ့ အကြောင်း ပြောပြပါတယ်။

မြန်မာနိုင်ငံသားတိုင်း ကွန်ဒုံး သယ်ဆောင်မှု ရှိတယ်ဆိုတဲ့ ပြဌာန်းချက် ရှိတဲ့ တိုင်အောင် လိင်လုပ်သား တွေ ရဲ့ လက်ထဲ ကွန်ဒုံး မိရုံနဲ့ အလုပ် မလုပ်တဲ့ တိုင်အောင်၊ အဖမ်းခံရတဲ့ အကြောင်း လည်း ပြောပါတယ်။ ရှာဖွေတဲ့ အခါမှာ လည်း ခွင့်ပြုချက် မတောင်းခံ သလို၊ အတင်းအကျပ် အိတ်ဖွင့် ရှာလေ့ ရှိပုံတွေ လည်း ရှင်းပြပါတယ်။ လိင်လုပ်သားတွေ အတွက် ကျန်းမာရေး အရ ကုသ ကာကွယ်ခွင့် ပေးသင့် သလို တိကျတဲ့ ဥပဒေ တွေ ပြဌာန်း ပေးဖို့ လိုတဲ့ အကြောင်း တွေ လိင်လုပ်သား အမျိုးသမီးလေး တယောက် က ဘီဘီစီ ကို ရှင်းပြပါတယ်။

အငြင်းပွားရေပြင်မှာ တရုတ်စစ်ရေး လေ့ကျင့်

တရုတ်က အောက်တိုဘာလ ၁၉ ရက်နေ့မှာ အရှေ့တရုတ်ပင်လယ်မှာ စစ်ရေး လေ့ကျင့်မှုတွေ လုပ်ခဲ့တယ်လို့ တရုတ်ဖက်က ကြေငြာပါတယ်။

ဒါဟာ ကျွန်းတွေပိုင်ဆိုင်မှုနဲ့ စပ်ပြီး တရုတ်-ဂျပန် နှစ်နိုင်ငံ အငြင်းပွားပြီး တင်းမာနေတုန်းမှာ လုပ်လာတာ လည်း ဖြစ်ပါတယ်။

တရုတ်အစိုးရ သတင်းအေဂျင်စီ ဆင်ဟွာရဲ့ အဆိုအရတော့ နိုင်ငံရဲ့ နယ်မြေ နယ်နိမိတ်နဲ့ အချုပ်အခြာကို ကာကွယ်နိုင်ဖို့အတွက် အရေးပေါ် အခြေအနေတွေ ဖြစ်လာခဲ့ရင် မြန်မြန်ဆန်ဆန် တုန့်ပြန်နိုင်အောင် ဒီစစ်ရေးလေ့ကျင့်မှုကို ပြုလုပ်တာလို့ ပြောပါတယ်။

အရှေ့တရုတ်ပင်လယ် စစ်ရေးလေ့ကျင့်မှုမှာ ရေတပ်စစ်သင်္ဘော ၁၁ စင်း၊ လေယာဉ် ရှစ်စင်း၊ ကမ်းခြေစောင့်တပ်နဲ့ ငါးလုပ်ငန်းအေဂျင်စီက သင်္ဘောတွေ လည်း ပါဝင်ပါ တယ်။

အစိုးရရုပ်သံဖြစ်တဲ့ တရုတ်စီစီတီဗီက ပြသွားတဲ့ အထဲမှာတော့ တရုတ် စစ်သားတွေ၊ ရေတပ်သားတွေ၊ တိုက်လေယာဉ်တွေနဲ့ ရဟတ်ယာဉ်တွေကို တွေ့ရပါတယ်။ ဂျပန်က ဆန်ကာကူလို့ ခေါ်ပြီး တရုတ်က ဒီအောယုလို့ ခေါ်တဲ့ ကျွန်းတွေ ပိုင်ဆိုင်မှုနဲ့ပတ်သက်ပြီး တရုတ်၊ ဂျပန်နဲ့ ထိုင်ဝမ် အားလုံးက သူတို့ ပိုင်တယ်လို့ ပြောပါတယ်။

လောလောဆယ်မှာတော့ ထိုင်ဝမ်မြောက်ပိုင်း၊ ဂျပန်အိုကီနာဝါကျွန်း တောင်ပိုင်းမှာရှိတဲ့ ဒီကျွန်းတွေကို ဂျပန်က ပိုင်ဆိုင်ထားပါတယ်။

ဂျပန်ပုဂ္ဂလိကပိုင်ရှင် ပိုင်ဆိုင်ထားတဲ့ ကျွန်းသုံးကျွန်းကို ဂျပန်အစိုးရ လက်လွှဲဝယ်ယူလိုက်တဲ့အခါ တရုတ်ပြည်မှာ သံတမန်ပိုင်းကရော လူထုကြားမှာပါ ဂျပန်ဆန့်ကျင်တဲ့ ဆန္ဒပြမှုတွေ ဆက်တိုက်ဖြစ်ပွား ခဲ့ပါတယ်။ အဲဒီနောက်ပိုင်းကစလို့ တရုတ်နဲ့ ထိုင်ဝမ်သင်္ဘောတွေက အငြင်းပွားနေတဲ့ ကျွန်းတွေနားက ရေပိုင်နက်ထဲကို ဝင်လိုက်ထွက်လိုက် လုပ်နေလို့ ဂျပန်က ချက်ချင်းဆိုသလို ဒီလိုလုပ်နေတဲ့ ပြဿနာတခုခု တက်ရင် အခြေအနေတွေကို ပိုဆိုးကုန်မယ်လို့ သတိတွေပေးပါတယ်။

အခု စစ်ရေးလေ့ကျင့်နေတဲ့ သင်္ဘော ၁၁ စင်းက ဂျပန်ရေပိုင်နက်ထဲကို ဝင်မယ်လို့တော့ မထင်ရပေမယ့် တကယ်လို့များ ဝင်ရောက်ခဲ့ရင်တော့ အကြီးအကျယ် ပြဿနာတက်နိုင်တယ် လို့တော့ ဂျပန်က ဘီဘီစီ သတင်းထောက်က သုံးသပ်ပါတယ်။

အမေရိကန်ကတော့ အားလုံးကို ခေါင်းအေးအေးထားကြဖို့ ပြောဆိုလိုက်ပြီး ပြီးခဲ့တဲ့ရက်ပိုင်းကလည်း အမေရိကန် ဒုတိယ နိုင်ငံခြားရေးဝန်ကြီး ဝီလီယံ ဘန်းစ် က ဂျပန်နဲ့ တရုတ်နိုင်ငံတွေ သွားရောက် ဆွေးနွေးခဲ့တာတွေ ရှိပါတယ်။

နိုင်ငံတကာ အလှမယ် ရွေးပွဲမှာ မြန်မာ အလှမယ် ဝင်ပြိုင်

နှစ်ပေါင်း ၅၀အတွင်း ပထမဆုံးအကြိမ်အဖြစ် နိုင်ငံတကာ အလှမယ်ပြိုင်ပွဲမှာ မြန်မာအလှမယ် ဝင်ပြိုင်

ဂျပန်နိုင်ငံ အိုကီနာဝါကျွန်းမှာ ကျင်းပနေတဲ့ နိုင်ငံတကာ အလှမယ် ပြိုင်ပွဲမှာ မြန်မာ အမျိုးသမီး အလှမယ် တဦး ဝင်ရောက် ယှဉ်ပြိုင်နေပါတယ်။

ဒီပွဲမှာ နိုင်ငံပေါင်း ၆၇နိုင်ငံက အလှမယ်တွေ ဝင်ရောက် ယှဉ်ပြိုင်နေရာမှာ မြန်မာနိုင်ငံက အလှမယ် နန်းခင်ဇေယျာလည်း အပါအဝင် ဖြစ်ပါတယ်။

ဒါဟာ ဆယ်စုနှစ် ၅နှစ်အတွင်း နိုင်ငံတကာ အလှမယ်ပြိုင်ပွဲမှာ ပထမဆုံးအကြိမ်အဖြစ် မြန်မာနိုင်ငံက အလှမယ် တဦး ဝင်ပြိုင်နိုင်တာလို့ သိရပါတယ်။

ဒီပွဲမှာ ပထမ၊ ဒုတိယ၊ တတိယ အပြင် ပေါင်းသင်း ဆက်ဆံရေး၊ အဝတ်အစား၊ ကျက်သရေ ရှိမှု စတဲ့ အချက်တွေအတွက်လည်း သီးခြား အလှမယ် ဆုပေးသလို အင်တာနက်မယ်လည်း သတ်မှတ်ထားရာမှာ အင်တာနက်မဲမှာတော့ နန်းခင်ဇေယျာကို မဲပေးမှု ၁၇ သန်းကျော် ရထားပါတယ်။

ဒီပြိုင်ပွဲကို အောက်တိုဘာလ ၁ရက်နေ့ကနေ ၂၁ရက်နေ့အထိ ကျင်းပနေတာ ဖြစ်ပြီး နောက်ဆုံးစကာတင် ၅ ဦးထဲက အလှမယ်တွေ ကိုတော့ နိုဝင်ဘာလ ၅ ရက်နေ့မှာ ကြေညာမှာဖြစ်ပါတယ်။

လက်ပန်တောင်းတောင် ပြည်သူ့ညီလာခံ ကျင်းပ

နေမျိုး | ကြာသပတေးနေ့၊ အောက်တိုဘာလ ၁၈ ရက် ၂၀၁၂ ခုနှစ် ၁၉ နာရီ ၀၈ မိနစ်

နယူးဒေလီ (မဇ္ဈိမ)။    ။ နှစ်ရက်ကြာ ကျင်းပမည့် ‘လက်ပန်တောင်းတောင် စီမံကိန်း ရပ်စဲရေး ပြည်သူ့ညီလာခံ’ ကို ဆားလင်းကြီးမြို့နယ်၊ ဆည်တည်းကျေးရွာတွင် ကြာသပတေးနေ့ မနက်ပိုင်းက စတင်ကျင်းပခဲ့သည်။

အနယ်နယ် အရပ်ရပ်မှ သံဃာတော်များ၊ ကျောင်းသားများ၊ တိုင်းရင်သားများ၊ ကဗျာဆရာများနှင့် ဒေသခံ ရွာသူ၊ ရွာသားများ ထောင်နှင့်ချီ၍ တက်ရောက်ခဲ့ကြကြောင်း ဆည်တည်း ဘုန်းကြီးကျောင်းမှ ဦးပဉ္ဇင်း ဦးနန္ဒာစာရ က မိန့်ကြားသည်။  

“အဓိကတော့ လက်ပန်တောင်းတောင် စီမံကိန်းရပ်စဲရေး ဆိုပြီး အဆိုတင်ပြီး အားလုံးက ထောက်ခံပြီး ဆုံးဖြတ်ကြ တယ်။ ဒီကိစ္စဟာ သူပိုင်ငါပိုင် အငြင်းပွားမှု ဖြစ်နေတယ်။ နိုင်ငံတော် သီချင်းနဲ့ သာဓက ထောက်ပြ ဆုံးဖြတ်တယ်။ ‘ဒါဒို့ပြေ ဒါဒို့မြေ’ ဆိုပြီး ဆုံးဖြတ်တယ်။ ဒီမြေဟာ ပြည်သူလူထု ပိုင်တယ်ဆိုတဲ့အကြောင်း သံဃာတော်တွေရဲ့ ကိုယ်စား၊ ပြည်သူတွေရဲ့ကိုယ်စား ဆရာတော်တပါးက အဆိုတင်သွင်းတယ်။ လယ်ယာမြေကိစ္စ၊ အလုပ်သမားကိစ္စ၊ ကချင်စစ်ရပ်ဆိုင်းရေး၊ ရခိုင်အရေးကိစ္စတွေ ပါတယ်” ဟု မဇ္ဈိမကို မိန့်ကြားသည်။

ဆည်းတည်းကျေးရွာ ဘုန်းတော်ကြီးကျောင်း မြောက်ဘက်ရှိ ကွင်ပြင်တွင် ‘လက်ပန်တောင်းတောင် စီမံကိန်း လုံးဝရပ်စဲရေး’ တိုက်ပွဲဝင် အလံများ လွှင့်ထူကာ ပရိတ်သတ်အင်အား ငါးထောင်ကျော် တက်ရောက် အားပေးခဲ့ကြကြောင်း မုံရွာခရိုင် ဗကသ ခေါင်းဆောင်တဦး ဖြစ်သည့် ကိုနွေဦးကို က ဆိုသည်။

“အလံက အောက်ခံ အနီရောင်။ ထောင့်က စက်ဝိုင်းထဲမှာ အင်္ဂလိပ် အက္ခရာ Y ပုံသဏ္ဍာန်က ချင်းတွင်းမြစ်နဲ့ ဧရာဝတီမြစ် ဆုံတဲ့နေရာ။ ချင်းတွင်းမြစ် လတ်တလော ဖြစ်နေတဲ့ ပြဿနာကို ဖြေရှင်းနေရလို့။ Y ရဲ့ ဘယ်ဘက် ထိပ်မှာ ကြယ်အဖြူ တပ်ထားတယ်။ အဝိုင်းကတော့ အမဲရောင်။ လက်ပန်တောင်းတောင် စီမံကိန်း လုံးဝရပ်စဲရေး ကိုယ်စားပြုတဲ့အလံ။ မရပ်မချင်း တိုက်ပွဲဝင်သွားမယ်” ဟု မဇ္ဈိမကို ပြောသည်။

မန္တလေး လေးပြင်လေးရပ် သံဃာ့သမဂ္ဂီအဖွဲ့မှ သံဃာတော်များ၊ ၅ နှစ်ပြည့် ရွှေဝါရောင် ဖြစ်မြောက်ရေး ကော်မတီမှမြဝတီမင်းကြီး ကျောင်းဆရာတော်၊ မစိုးရိမ်ကျောင်းတိုက် ဆရာတော် ဦးဝီရသူနှင့် ရန်ကုန်မှ သံဃာတော်များ ကြွရောက်ခဲ့ကြသလို မုံရွာမြို့ခံ ကဗျာဆရာကြီး (ဦး)အံ့မောင်၊ ဓနထွန်း တို့က ကဗျာများ ရွတ်ဆိုခဲ့ကြသည်။  

စီမံကိန်းကြောင့် နယ်မြေသူ၊ နယ်မြေသားများ လယ်ယာကိုင်းကျွန်း လုပ်ကိုင်ရန် အခက်အခဲများ ဖြစ်ပေါ်နေခြင်း၊ ဓါတုစွန့်ပစ်ပစ္စည်းများကြောင့် နောင်တွင် လက်ပန်တောင်းတောင်၊ ချင်းတွင်းမြစ်၊ ဧရာဝတီမြစ် အပါအဝင် တနိုင်ငံလုံး ထိခိုက်မှာ ဖြစ်ကြောင်း ဦးနန္ဒာစာရ က မိန့်ဆိုသည်။

ထို့ပြင် လယ်တီဆရာတော်ဘုရားကြီး တရားကျင့်ခဲ့ရာ တောရကျောင်း ပရဝုဏ်လည်း အဆိုပါ ကြေးနီစီမံကိန်း အတွင်း ပါဝင်နေပြီး ဖြိုဖျက် ရှင်းလင်းမည်ကို စိုးရိမ် ပူပန်လျက်ရှိကြောင်း “ဖြိုချတော့မယ့် ပုံစံ လှိုဏ်တွေလုပ်ထားပြီ၊ မဖြိုသေးဘူး” ဟု မိန့်ကြားသည်။

သမ္မတ သို့ လိပ်မူကာ ‘ပထမ လယ်တီဆရာတော် ဘုရားကြီး၏ ရှေးဟောင်းသမိုင်းဝင် အဆောက်အဦများ ကွယ်ပျောက် မဆုံးရှုံးစေရေးအတွက် ဆောင်ရွက် ပေးပါရန် မေတ္တာရပ်ခံချက်’ ကို လက်မှတ်ရေးထိုး တောင်းဆိုခဲ့ကြောင်း သိရသည်။

“ပထမ လယ်တီဆရာတော်ဘုရားကြီး၏ ပရမတ္ထသံခိပ်၊ ဓါတုသစ္စဒီပနီ၊ နိရုတ္တိဒီပနီ၊ သမ္မာဒိဌိဒီပနီ၊ ကမ္မဌာနဒီပနီ စသည်စသည်များကို ရေးသားတော်မူခဲ့သော စစ်ကိုင်းတိုင်းဒေသကြီး ဆားလင်းကြီးမြို့နယ်၊ လက်ပန်တောင်းတောင်ခြေရှိ လယ်တီ တောရကျောင်းအား ယခုအခါ မြန်မာဝမ်ပေါင် ကြေးနီသတ္တုတူးဖော်ရေး ကုမ္ပဏီနှင့်မြန်မာ့စီးပွားရေး ဦးပိုင်လီမိတက် တို့က သတ္တုဖော်ရန်အတွက် မြေတူးစက်ဖြင့် ဖြိုချဖျက်ဆီးမည့် အရေးနှင့် ကြုံတွေ့နေရကြောင်း” သံဃာတော်များ၏ မေတ္တာရပ်ခံချက်တွင် ဖော်ပြပါရှိသည်။

အဆိုပါ စီမံကိန်းကြောင့် လက်ပန်တောင်းတောင် ပတ်ဝန်းကျင်ရှိ စံပယ်တောင်နှင့် ကြေးစင်တောင် နှစ်ခုသည် ယခုအခါ တွင်းကျယ်ကြီးများအဖြစ် ကျန်ရှိပြီး လက်ရှိစီမံကိန်း လုပ်ကိုင်လျက်ရှိသည့် ကြေးနီတောင်ကိုလည်း ယင်းတောင်များကဲ့သို့ ကွယ်ပျောက်သွားမည်ကို ပတ်ဝန်းကျင်ရှိ ကျေးရွာသူ/သားများနှင့် ယနေ့အစည်းအဝေး တက်ရောက်လာသူများက စိုးရိမ်လျက် ရှိကြသည်။

၁၉၉၆-၉၈ မျိုးဆက် ကျောင်းသားများကလည်း “လက်ပန်တောင်းတောင် ကြေးနီထုတ်လုပ်ရေး စီမံကိန်းသည် အမှားတခုအဖြစ် သမိုင်းတွင် မကျန်ရစ်စေရန် ပြန်လည်သုံးသပ်ပြင်ဆင်နိုင်ရန်အတွက် ယခုအချိန်သည် အချိန်အခါကောင်းပင် ဖြစ်ပါသည်။ ထိုသို့ဖြစ်နိုင်ရန် ဒေသခံနိုင်ငံသားများနှင့် တရားမျှတသော ဆွေးနွေးပွဲများ အမြန်ဆုံးပြန်လည်စတင်သင့်ပြီး ပြည်သူများ၏အသံကိုပါ နားထောင်သင့်ပါသည်” ဟု သဘောထား ထုတ်ပြန်လိုက်သည်။

ထိုစီမံကိန်းရပ်တန့်ရန် တောင်းဆိုမှုသည် တိုင်းဒေသကြီး အစိုးရအနေဖြင့် လုပ်ဆောင်၍ မရနိုင်ဘဲ ရေရှည်စဉ်းစားဆောင်ရွက်ရမည့် ကိစ္စဖြစ်သည်ဟု စစ်ကိုင်းတိုင်း ဝန်ကြီးချုပ် ဦးသာအေး က ပြောဆိုထားသည်။