27.10.2012 နေ့ဖတ်ရန်သတင်းများ
|
9:04 PM |
No မှတ်ချက် |
by Myanmar Journal on Friday, October 26, 2012 at 6:56pm ·
အီတလီ ဝန်ကြီးချုပ်ဟောင်း ထောင်ကျ
အီတလီ ဝန်ကြီးချုပ်ဟောင်း ဘာလူးစကိုနီ ထောင်ကျ
အီတလီ ဝန်ကြီးချုပ်ဟောင်း ဆာဗီယို ဘာလူးစကိုနီကို မီလန်တရားရုံးကနေ အခွန်ရှောင်မှုနဲ့ ထောင်ဒဏ် ၄ နှစ် အပြစ်ပေး လိုက်ပါတယ်။
ဒါပေမယ့် အီတလီ ထောင်တွေထဲမှာ အကျဉ်းသား အရေအတွက် နည်းစေဖို့ ရည်ရွယ်ပြီး ၂၀၀၆ က ပြဋ္ဌာန်းခဲ့တဲ့ လွတ်ငြိမ်း ချမ်းသာခွင့် ဥပဒေအရ ထောင် ၃ နှစ် လျှော့ပေါ့ လိုက်လို့ ထောင်တနှစ်ပဲ ကျခံရတော့မှာ ဖြစ်ပါတယ်။
မစ္စတာ ဘာလူးစကိုနီဟာ အဲဒီ ထောင်တနှစ် ကိုတောင် ကျခံချင်မှ ကျခံရလိမ့်မယ်လို့ ရောမက ဘီဘီစီ သတင်းထောက် ဒေးဗစ်ဝီလီက ပြောပါတယ်။
ဘာကြောင့်လဲ ဆိုတော့ အယူခံ တရားရုံး နှစ်ရုံးမှာ အယူခံ ရှုံးမှသာ ထောင်ဒဏ်ကို ကျခံရမှာ ဖြစ်လို့ပါဘဲ။
အယူခံဝင် နေချိန်မှာ အပြင်မှာ လွတ်လွတ်လပ်လပ် နေနိုင်သလို အယူခံ တရားရုံးတွေ တက်တာနဲ့ပဲ နှစ်တွေ ကုန်ဆုံးသွားပြီး ထောင်ဒဏ် ကျခံရမယ့်ပုံ မရှိဘူးလို့ ဘီဘီစီ သတင်းထောက်က သုံးသပ်ပါတယ်။
အခု စီရင်ခဲ့တဲ့ အမှုဟာ ၁၉၉ဝ ပြည့်လွန်နှစ်တွေ တုန်းက မစ္စတာ ဘာလူးစကိုနီရဲ့ ရုပ်မြင်သံကြား လိုင်းတွေ အတွက် အမေရိကန် ရုပ်ရှင်ကားတွေ ပြသခွင့် ဝယ်ရာမှာ ဒေါ်လာ သန်းရာချီ ပေးဝယ်ခဲ့တာနဲ့ ပတ်သက်ပါတယ်။
ဒါဟာ မစ္စတာ ဘာလူးစကိုနီ အခွန်ရှောင်ဖို့ ကြိုးစားတာလို့ ဆိုပြီး တရားစွဲခဲ့တာ ဖြစ်ပါတယ်။
အမှု အတော်များများ ရင်ဆိုင်နေရတဲ့ မစ္စတာ ဘာလူးစကိုနီ အဖို့ ပထမဆုံး အကြိမ် စီးပွားရေး အမှုနဲ့ အပြစ်ပေး ခံခဲ့ရတာပါ။
တရားရုံးက ငွေဒဏ် ယူရို ၁ဝ သန်း ချက်ချင်း ပေးဖို့လည်း အမိန့်ချခဲ့ ပါတယ်။
မစ္စတာ ဘာလူးစကိုနီ ဟာ ၁၉၉၇ တုန်းကလည်း ငွေစာရင်းလိမ်ပြမှုနဲ့ တရားစွဲ ခံခဲ့ရပေမယ့် အယူခံ နိုင်ခဲ့လို့ ပြစ်ဒဏ်ချ မခံခဲ့ရပါဘူး။
လောလောဆယ် ရင်ဆိုင်နေရ တာကတော့ အသက်မပြည့်သေးတဲ့ ပြည့်တန်ဆာ အမျိုးသမီးလေးနဲ့ ပျော်ပါးခဲ့တဲ့ကိစ္စကို အာဏာအလွဲသုံး ဖုံးကွယ်ဖို့ ကြိုးစားခဲ့တဲ့ အမှုပါ။
ဒီနောက် ပြီးခဲ့တဲ့ နိုဝင်ဘာလက သူ ရာထူးကနေ နှုတ်ထွက်ခဲ့ရတာ ဖြစ်ပါတယ်။
မစ္စတာ ဘာလူးစကိုနီ ကတော့ သူပြောနေကျအတိုင်း သူဟာ နိုင်ငံရေး သားကောင် ဖြစ်ခံရတာ အခု တရားရုံး ဆုံးဖြတ်ချက်ဟာ နိုင်ငံရေးရည်ရွယ်ချက်နဲ့ လုပ်တာ လို့ ပြောနေပါတယ်။
အခုတော့ ဒီအမှုကြောင့် သူ့ရဲ့ နိုင်ငံရေးဘဝ နိဂုံးချုပ်ပြီလို့ ယူဆနိုင်ကြောင်း ဘီဘီစီ သတင်းထောက် ဒေးဗစ်ဝီလီက သုံးသပ်ပါတယ်။
ပိုဆိုးလာတဲ့ ရခိုင်အခြေအနေ ကုလ စိုးရိမ်
လှေစောင့်မျှော် နေကြတဲ့ ရခိုင်ပြည်မှ မွတ်ဆလင်များ
ရခိုင် ပြည်နယ် အစိုးရ ပြောခွင့်ရ ပုဂ္ဂိုလ်ရဲ့ ပြောကြား ချက် အရ အသစ် ဖြစ်ပေါ် လာတဲ့ ရခိုင် ပြည်နယ်က ပဋိပက္ခတွေ အတွင်းမှာ နှစ်ဘက်ပေါင်း သေဆုံးသူ အရေ အတွက် ၆၄ ယောက် ရှိသွားပြီ ဖြစ်ပါတယ်။
မူလက ၁၁၂ ယောက်ရှိပြီလို့ ပြောဆိုခဲ့ပေမဲ့ အဲဒီ ပြောရေးဆိုခွင့်ရှိပုဂ္ဂိုလ်ကပဲ အမှား ပြင်ဆင် ချက် ပြန်လည် ထုတ်ပြန် ပြောဆို ခဲ့တာ ဖြစ်ပါတယ်။
ရခိုင် ပြည်နယ်မှာ ဖြစ်နေတဲ့ ပဋိပက္ခတွေမှာ သတ်ဖြတ်မှုတွေ တိုးပွား နေတာဟာ မြန်မာပြုပြင်ပြောင်းလဲရေးကို ခြိမ်းခြောက်နေတယ်လို့ ကုလသမဂ္ဂက သတိပေးလိုက်ပါတယ်။
ဥပဒေမဲ့ လက်စားချေသတ်ဖြတ်မှု ပစ်မှတ်ထားခြိမ်းခြောက်တိုက်ခိုက်မှု အစွန်းရောက် ပြောဆိုရေးသားမှုတွေကို ချက်ချင်း ရပ်ဖို့ အတွင်းရေးမှူးချုပ် မစ္စတာ ဘန်ကီမွန်း က ပြောပါတယ်။
တကယ်လို့ အဲသလို ချက်ချင်း မဆောင်ရွက်နိုင်ရင် မြန်မာနိုင်ငံ တံခါးဖွင့်ရေး အစိုးရရဲ့ ဆောင်ရွက်ချက်တွေကို ထိခိုက်နစ်နာစေနိုင်တယ်လို့ ဆိုပါတယ်။
ဒီသတင်းပတ်အတွင်းမှာ ထောင်ဂဏန်းများစွာသော အိုးအိမ်တွေ မီးလောင်ပျက်စီးခဲ့ရသလို ရိုဟင်ဂျာလို့ မိမိတို့ကိုယ်ကိုယ် ခေါ်ဝေါ် ကြတဲ့ ရခိုင်ပြည်နယ်ရှိ မွတ်ဆလင်တချို့ လှေတွေနဲ့ ထွက်ပြေးတဲ့ ဖြစ်စဉ်တွေ ဒီသတင်းပတ်တွေအတွင်း ဖြစ်ပွားခဲ့ပါတယ်။
ဒီနေ့တော့ နေရာတော်တော်များများမှာ တိုက်ခိုက်မှုတွေငြိမ်သက်နေပေမဲ့ ရမ်းဗြဲနဲ့ ကျောက်ဖြူတို့မှာ မီးရှို့တိုက်ခိုက်မှု တချို့ရှိတယ်လို့ သိရပါတယ်။
ရခိုင်လူမျိုး တယောက် ကတော့ မွတ်ဆလင်တွေဟာ ကိုယ့်အိမ်ကိုယ် မီးရှို့ထွက်ပြေး ကြတာလို့ စွပ်စွဲပြောဆိုပါတယ်။
မွတ်ဆလင် အမျိုးသားတွေ ကတော့ တောင်ပေါ်တက်ပြေး ကြပြီး၊ အမျိုးသမီးတွေ ကတော့ မြို့နယ် အုပ်ချုပ် ရေးမှူး ရုံးမှာ ခိုလှုံ ကြတယ်လို့ ဆိုပါတယ်။
ပြီးခဲ့တဲ့ ရက်တွေအတွင်း ပဋိပက္ခ ပြင်းထန်ခဲ့တဲ့ ကျောက်ဖြူ မြို့မှာတော့ မွတ်ဆလင် ၈၀၀ ကျော်ကို မြို့ပြင် ထုတ်ထားပါတယ်။ မြို့အပြင်ဘက် စစ်တပ် တပ်ရင်း နှစ်ရင်း အကြားမှာ ထားတယ်လို့ ဆိုပါတယ်။
ကျောက်ဖြူကနေ စက်လှေ အစီး ၄၀ နဲ့ ထွက်ပြေးသွားကြ သူတွေကိုတော့ ပင်လယ်ပြင်မှာ မြန်မာ့ ရေတပ်က စောင့်ရှောက်ထား တယ်လို့ ဆိုပါတယ်။
ရခိုင်မှာ လုံခြုံရေး အားနည်း
စစ်တွေ ဆေးရုံမှာ ဒဏ်ရာရ ရခိုင် တိုင်းရင်း သားများ ဆေးကုသ ခံယူနေကြ
ရခိုင်ပြည်နယ် အတွင်းက လက်ရှိ အခြေ အနေဟာ အချိန်မရွေး ပေါက်ကွဲ သွားနိုင်ပြီး ပထမ အကြိမ် ဇွန်လက ဖြစ်ခဲ့တဲ့ အခြေ အနေထက် အများကြီး ပိုဆိုး သွားနိုင်တယ်လို့ ဒေသတွင်းကို ရောက်ခဲ့တဲ့ သတင်းထောက်က ပြောပါတယ်။
လုံခြုံရေး ချထားမှု အားနည်းတာ တွေ့ခဲ့ရတယ်လို့ စစ်တွေ၊ ကျောက်တော်နဲ့ အနီး တဝိုက်ကို ကိုယ်တိုင် သွားရောက်ခဲ့တဲ့ သတင်းထောက်က ဘီဘီစီကို ပြန်ပြော ပါတယ်။
လုံခြုံရေး တာဝန်ရှိတဲ့ တပ်တွေကလည်း မွတ်ဆလင်တွေ ဘက်ကို ဘက်လိုက်မှု ရှိနေတယ်လို့ သူက ဆိုပါတယ်။
မွတ်ဆလင် ရွာတွေကို စောင့်တဲ့ လုံခြုံရေး တပ်တွေက ရခိုင် လူမျိုး တွေကိုပဲ ပစ်ခတ် နှိမ်နင်း ခဲ့ရာမှာ သေဆုံးသူ တွေကို တွေ့ခဲ့ရတယ်လို့ အဲဒီ သတင်းထောက်က ပြောပါတယ်။
ကျောက်တော် ဆေးရုံမှာ ကုသ ခံနေရာက သေဆုံးသွားသူ ဟာလည်း သေနတ် ဒဏ်ရာ ကြောင့် ဆိုတာ ဆေးရုံက အတည်ပြုတယ်လို့ သူက ပြောပါတယ်။
အိမ်ခြေ နည်းတဲ့ ရခိုင်ရွာ တွေထက် အိမ်ခြေ များတဲ့ မွတ်ဆလင် ရွာတွေ ကိုသာ လုံခြုံရေးအရ ပိုပြီး အကာ အကွယ် ပေးကြတာ မြင်ခဲ့ ရတယ် လို့လည်း ပြန်ပြောပြ ပါတယ်။
အသိုင်းအဝိုင်း နှစ်ဘက် ကြားမှာ အလွန် တင်းတင်း မာမာ ဖြစ်နေပြီး လုံခြုံရေး အရ လက်လှမ်း မမီနိုင်တဲ့ နေရာတွေမှာ မွတ်ဆလင် အများစု နေထိုင်ပြီး ရခိုင်က နည်းတယ်လို့ ဆိုပါတယ်။
လောလောဆယ် နေဝင် မီးငြိမ်း အမိန့် ထုတ်ပြန် ထားတဲ့ အတွက် နဲ့ ဓါး၊ တုတ် စတဲ့ လက်နက်တွေကိုလည်း အာဏာပိုင်တွေက သိမ်းယူထားတဲ့ အတွက် နှစ်ဘက် အုပ်စုတွေ အနေနဲ့ ကိုယ့်ရပ်ရွာ ကိုကိုယ် ကာကွယ်ဖို့ အခြေ အနေ မရှိဘူးလို့ ရခိုင် ပြည်နယ်ရောက် သတင်းထောက်က ပြောပါတယ်။
တရုတ် ဝန်ကြီးချုပ် ပိုင်ဆိုင်မှု သန်း ၂၇၀၀ ဟုဆို
သူ့မိသားစု ဒေါ်လာ သန်း ၂၇၀၀ ချမ်းသာဟုဆို
တရုတ် အစိုးရ မီဒီယာ တွေက မကြာခဏ ဆိုသလို ဖိုးဖိုးဝမ်လို့ ညွှန်းဆို ပြောဆို ရေးသား ကြတဲ့၊ တခါ ငလျင်တို့၊ ရေကြီး တာတို့ သဘာဝ ဘေးအန္တရာယ် ကျရောက်တဲ့ အခါ လူထုဆီ ချက်ချင်း ဆိုသလို ရောက်သွား တတ်လို့ လူစာနာ ခေါင်းဆောင်ကြီး လို့ ပုံဖော် ထားတဲ့ တရုတ် ဝန်ကြီးချုပ်ကို အမေရိကန် သတင်းစာ တစောင်ဖြစ်တဲ့ နယူးယောက် တိုင်းမ်က အခုလို ထုတ်ဖော် ရေးလိုက် တဲ့အတွက် တရုတ် အစိုးရက တော့ တကယ့်ကို ဆတ်ဆတ်ခါ သွားပါတယ်။
သတင်းစာက ဝန်ကြီးချုပ် ဝမ်ကျားပေါင်ရဲ့ မိသားစုဝင်တွေနဲ့ ဆွေမျိုးတွေရဲ့ ပိုင်ဆိုင်မှုဟာ အမေရိကန်ဒေါ်လာ သန်း ၂၇၀၀ လောက်ရှိနေပြီး၊ မစ္စတာဝမ် ဝန်ကြီးချုပ် တာဝန် ၁၀ နှစ်ကြာ ထမ်းဆောင် နေချိန် အတွင်းမှာ ဒီလိုတွေ မတရား ချမ်းသာ လာခဲ့တာ လို့ ရေးပါတယ်။
၂၀၀၃ က ဝန်ကြီးချုပ် စဖြစ်ပြီး သူက အစိုးရ အဖွဲ့မှာ စီးပွားရေး ပိုင်းကို တာဝန်ခံလို့ တိုးတက်အောင် ဆောင်ရွက်ရင်း သူ့သား၊ သမီး၊ ညီ၊ ယောက်ဖတွေ ချမ်းသာလာတာလို့ သတင်းစာက ဖော်ပြပါတယ်။ အကျိုးဆက်ကတော့ တရုတ်က နယူးယောက် တိုင်းမ် သတင်းစာ ဝက်ဘ်ဆိုက်ကို တရုတ် ပြည်မှာ ဖတ်မရအောင် ပိတ်ပင်လိုက်သလို သတင်းစာ ဆောင်းပါးကို တရုတ်လို ပြန်ရေးတဲ့ တရုတ် ဝက်ဘ်ဆိုက်တွေ၊ ဘလော့ဂ်တွေ မှာလည်း လိုက်ပိတ် ပါတယ်။
တရုတ် နိုင်ငံခြား ရေးဌာန ပြောခွင့် ရပုဂ္ဂိုလ် ကတော့ တချို့သတင်း တွေဟာ တရုတ်ကို အိုးမည်းသုတ်တဲ့လုပ်ရပ်ဖြစ်ပြီး၊ ဒီသတင်းဟာလည်း နောက်ကွယ်မှာ အကြောင်းရင်းတွေ ရှိနေတယ်လို့လည်း ပြောပါတယ်။
တရုတ်ပြည်မှာ ခေါင်းဆောင်တွေအကြောင်း ရေးရင်၊ အထူးသဖြင့် သူတို့တွေရဲ့ ပိုင်ဆိုင်မှုတွေကို ထုတ်ဖော်ရေးသားတာမျိုးက အလွန်အကဲဆတ်ပါတယ်။
ပြီးခဲ့တဲ့ ဇွန်လကလည်း နောက်ဖြစ်မယ့် သမ္မတလို့ နာမည်ထွက်နေတဲ့ လက်ရှိ ဒုတိယသမ္မတ ရှီကျင်ပင်း မိသားစုပိုင်ဆိုင်မှုတွေအကြောင်း ထုတ်ဖော်ရေးသားခဲ့လို့ ဘလွန်းဘတ်ဝက်ဘ်ဆိုက်လည်း တရုတ်ပြည်မှာ အပိတ်ခံလိုက်ရပြီး အခုထက်ထိလည်း ပိတ်ထားတုန်း ဖြစ်ပါတယ်။
ဝန်ကြီးချုပ် မိသားစုဝင်တွေရဲ့ ပိုင်ဆိုင်မှုပမာဏကို အခုလို ထုတ်ပြန်တာကို ဝန်ကြီးချုပ် မစ္စတာဝမ်အနေနဲ့ အံ့သြမှာ မဟုတ်ဘူး။ ဘာလို့လဲ ဆိုတော့ ၂၀၀၇ ခုနှစ်က တခါ ပေါက်ထွက်ခဲ့တဲ့ ဝီကီလိခ်တုန်းကလည်း သတင်း ရင်းမြစ်တခုကို ကိုးကားပြီး ထွက်ခဲ့တဲ့ သတင်းမှာ မိသားစုဝင်တွေရဲ့ လုပ်ဆောင် ချက်တွေကြောင့် ဝန်ကြီးချုပ်ဟာ မနှစ်မြို့စရာ ဖြစ်တယ်လို့ ပြောခံခဲ့ရဖူးပါတယ်လို့ ရှန်ဟိုင်းက ဘီဘီစီသတင်းထောက်က သုံးသပ်ပါတယ်။
နယူးယောက်တိုင်းမ် သတင်းမှာတော့ စီးပွားရေးလုပ်ငန်းတွေကို ဝန်ကြီးချုပ်ဝမ် နာမည်နဲ့ ရှိနေတာမျိုး မဟုတ်ဘူးလို့ ရေးပါတယ်။ ဝန်ကြီးချုပ် ဝမ်ကျားပေါင်ဟာ လာမယ့် နိုဝင်ဘာ ၈ ရက်မှာ တရုတ်နိုင်ငံ ခေါင်းဆောင် အပြောင်းအလဲမှာ လက်ရှိ တာဝန်ကနေ အနားယူတော့မှာဖြစ်လို့ အနားမယူခင်လည်း မီဒီယာရဲ့ ထုတ်ဖော် ထိုးနှက်ချက် ထိသွားတယ်လို့တော့ ဆိုနိုင်ပါတယ်။
အာဖဂန်နစ္စတန် အသေခံဗုံးဖောက်ခွဲမှု လူ ၄၀ သေဆုံး
အာဖဂန်နစ္စတန် မေမနာမြို့ ပေါက်ကွဲမှု
အာဖဂန်နစ္စတန် အနောက်မြောက်ပိုင်း မြို့တမြို့မှာ အသေခံဗုံးဖောက်ခွဲမှုကြောင့် လူပေါင်း ၄၀ ကျော်သေဆုံးခဲ့ပြီး နောက်ထပ် ငါးဆယ်လောက် ဒဏ်ရာရခဲ့ပါတယ်။ သေဆုံးသူ ဒဏ်ရာရသူ အများစုဟာ ရဲအရာရှိတွေ ဖြစ်ကြပါတယ်။
မေမနာမြို့က ပလီတခုမှာ ဖောက်ခွဲပစ္စည်းတွေကို စနက်တံဖြုတ်ခဲ့တဲ့ အသေခံဗုံးဖောက်ခွဲသူဟာ ရဲယူနီဖောင်းဝတ်ပြီးရောက်ရှိလာခဲ့တယ်လို့ ယူဆရပါတယ်။
ဖောက်ခွဲမှု ဖြစ်ပွားစဉ်မှာ ခရိုင်အုပ်ချုပ်ရေးမှုးနဲ့ ထိပ်တန်းအရာရှိတွေလည်း အဲဒီဧရိယာအတွင်းမှာ ရှိနေပါတယ်။ သူတို့အားလုံးကတော့ လွတ်မြောက်သွားပုံရပါတယ်။
ဒီဖောက်ခွဲမှုဟာ ဒေသတွင်းမှာ ဖြစ်ပွားနေတဲ့ တိုက်ခိုက်မှုဖြစ်စဉ်အများအပြားအနက် တခုဖြစ်ပါတယ်။
ဆီးရီးယား အစိုးရ ယာယီ အပစ်ရပ်
အလက်ပို မြို့ လယ်ခေါင် သူပုန် တပ်သားတွေ ဝင်
မွတ်ဆလင် တို့ရဲ့ အိဒ် ပွဲတော် အခါတွင်းမှာ သူပုန် တွေနဲ့ အပစ်အခတ် ယာယီ ရပ်စဲထားဖို့ ဆီးရီးယား အစိုးရက သဘော တူလိုက်ပြီ ဖြစ်ပါတယ်။
သူပုန် တွေနဲ့ အတိုက်အခံ တပ်တွေ အနေအထား ပြောင်းတာ တိုက်ခိုက်တာ တွေ မလုပ်ရင် သောကြာ နေ့ မနက်ကနေ တနင်္လာ နေ့ ထိ ဆီးရီးယား တပ်က ထိုးစစ် တွေ ရပ်ဆိုင်း ထားမယ်လို့ အစိုးရ ရုပ်သံက ကြေညာ ပါတယ်။
အပစ်ရပ်စဲဖို့ ဆီးရီးယား အရေး ကုလ သမဂ္ဂ ငြိမ်းချမ်းရေး ကိုယ်စားလှယ် လက်ခဒါး ဘရာဟီမီ က စီစဉ် ပေးခဲ့ပြီး သူပုန် အုပ်စု အများစုက စစ်ရပ်စဲဖို့ သဘောတူတယ်လို့ မစ္စတာ ဘရာဟီမီက ဆိုပါတယ်။
ဒီအချိန်မှာပဲ သီတင်းပတ် တွေနဲ့ချီပြီး စစ်မြေပြင် ဖြစ်ခဲ့တဲ့ ဒုတိယ မြို့တော် အလက်ပို မြို့ လယ်ခေါင်ကို သူပုန် တပ်သားတွေ ဝင်လာတယ်လို့ သတင်း ရရှိ ပါတယ်။
ဒါဟာ သူပုန်တပ် တွေ ကျွံဝင်လာအောင် အကွက်ဆင်တာလဲ ဖြစ်နိုင် ပါတယ်။
မြို့လယ်ကို ရိက္ခာပို့တဲ့ လမ်းကြောင်းကို သူပုန် ဘက်က ဖြတ်တောက် နေလို့ ဆုတ်ရတာလဲ ဖြစ်နိုင်ပါတယ်။
ခရစ်ယာန် ရပ်ကွက် ၂ ခုနဲ့ ကဒ် လူမျိုး တွေ နေထိုင်ရာ အနီး ဝန်းကျင်က နေ အစိုးရ တပ်တွေ ဆုတ်ခွာ သွားပြီး သူပုန် တပ်သားတွေ ဝင်ခွင့် ပေးလိုက်တယ်လို့ မျက်မြင် တွေနဲ့ အတိုက်အခံ လှုပ်ရှား သူတွေက ဆိုပါတယ်။
ခရစ်ယာန် နဲ့ ကဒ် တွေက သူပုန်နဲ့ မပေါင်းသေး ပေမယ့် သူတို့နေရာကို အစိုးရ ပြန်ခြေကုပ်ယူဖို့ ဗုံးကြဲ မယ်ဆိုရင် အလက်ပိုကို အစိုးရ ဘက်က လက်လွှတ် ဆုံးရှုံးရ နိုင်ပါတယ်။
ဒမတ်စကပ်က လာတဲ့ သတင်းတွေ အရတော့ အစိုးရ ဘက်က အပစ်အခတ် ရပ်စဲရေး သဘောတူ ပြီးပြီးချင်း မှာတင်ပဲ မြို့ တော် တောင်ပိုင်း ရပ်ကွက် တခုကို အစိုးရ တပ်က အမြောက်နဲ့ ဒလစပ် ပစ်ခတ် ခဲ့တယ်လို့ သိရပါတယ်။
အိုဘားမား ကြိုတင် မဲပေး
ကြိုတင် မဲပေး တာ ကောင်းကြောင်း သိစေချင်
နောက်လ ကျင်းပတော့မယ့် အမေရိကန် သမ္မတ ရွေးကောက်ပွဲ မတိုင်ခင်မှာပဲ သမ္မတ အိုဘားမားက သူ့ဇာတိ ချီကာဂို မြို့မှာ ကြိုတင် မဲပေး ခဲ့ပါတယ်။
သူဟာ ပထမဆုံး ကိုယ်တိုင် ကြိုတင်မဲ ပေးတဲ့ အမေရိကန် သမ္မတ ဖြစ်ပါတယ်။
အိုဘားမားက ပြည်သူ တွေကို ကြိုတင် မဲပေး တာ ကောင်းကြောင်း သိစေချင်လို့ ပေးခဲ့တာလို့ သတင်းထောက် တွေကို သူက ပြောပြီး ကြိုတင်မဲ ပေးကြသူ တွေကို ကျေးဇူးတင် ကြောင်း ပြောကြား ခဲ့ပါတယ်။
ရွေးကောက်ပွဲ ကို နိုဝင်ဘာလ ၆ ရက် နေ့မှာ ကျင်းပ မှာ ဖြစ်ပေမယ့် အမေရိကန် နိုင်ငံသား အများအပြား ကြိုတင်မဲ ပေးနေကြပါပြီ။
ကြိုတင် စစ်တမ်းကောက်ခံ ချက်တွေအရ အကြိတ်အနယ် ပြိုင်ရမယ့် ရွေးကောက်ပွဲ ဖြစ်တာမို့ သမ္မတ လောင်း နှစ်ယောက်လုံးက မဲများများစားစား ရဖို့ အလျင် လိုနေကြတယ်လို့ ဘီဘီစီ သတင်းထောက်က ပြောပါတယ်။
Eid နေ့ မကျင်းပဖို့ အစ္စလာမ်အဖွဲ့တွေ ဆုံးဖြတ်
မြန်မာနိုင်ငံက ရခိုင်ပြည်နယ်တွင်းမှာ ဖြစ်ပွားနေတဲ့ ပဋိပက္ခတွေကြောင့် ဒီနှစ်ကျရောက်တဲ့ မူဆလင်တွေ အထွတ်အမြတ်ထားရာ ဘာသာရေး အစ်ဒ် ပွဲတော်ကို မကျင်းပတော့ဘူးလို့ အစ္စလာမ်အဖွဲ့က ဆုံးဖြတ်ခဲ့တာနဲ့ပတ်သက်ပြီး ဒီလိုမြန်မာနိုင်ငံမှာအစ္စလာမ်ဘာသာဝင်တွေရဲ့ ကုရ်ဘာရီမပြုလုပ်ဖြစ်တာဟာ နိုင်ငံတော်က တစုံတရာ တားဆီး ထားတာကြောင့်မဟုတ်ဘူး လို့ နိုင်ငံတော်သမ္မတရုံးက ပြောဆိုလိုက်ပါတယ်။ မနက်ဖြန်ကျရောက်မယ့် အစ်ဒ်နေ့ကို လုံခြုံရေးအခြေအနေတွေအရ မလုပ်ဖို့ မူဆလင်အဖွဲ့အစည်းတွေက ကိုယ်ပိုင်လွတ်လပ်စွာ ဆုံးဖြတ်ခဲ့တာဖြစ်တယ်လို့ သိရပါတယ်။ ဒီအကြောင်းအပြည့်အစုံကိုတော့ ရန်ကုန်မြို့က VOA သတင်းထောက် ကိုအောင်ရဲမောင်မောင် က ပြောပြပေးထားပါတယ်။
မြန်မာနိုင်ငံမှာ နေထိုင်ကြတဲ့ လူမျိုးပေါင်းစုံဟာ ဘာသာရေး လွတ်လပ်စွာ ကိုးကွယ်ပိုင်ခွင့်ရှိတယ်ဆိုတဲ့ အခွင့်အရေး ရှိတဲ့အတိုင်း စနေနေ့မှာ ကျရောက်မဲ့ အစ္စလာမ် ဘာသာဝင်တွေရဲ့ ကုရ်ဘာရီ ပွဲတော် ကို သမ္မတက ပိတ်ပင်ထားတာ မရှိတဲ့အကြောင်း နိုင်ငံတော် သမ္မတရုံး ညွန်ကြားရေးမှူး ဦးဇော်ဌေးက VOA ကို ပြောပါတယ်။
“ဖွဲ့စည်းပုံအခြေခံဥပဒေကလည်း အတိအလင်းပြဌာန်းထားတယ်။ ကျနော်တို့လွတ်လပ်စွာ ကိုးကွယ်ခွင့် ပေးထားတယ်။ နောက်တချက်က အောက်တိုဘာ ၁၉ရက်နေ့မှာ ပြည်ထောင်စုအစိုးရအဖွဲ့ကလည်း ဒီ၂၇ရက်နေ့ကို အများပြည်သူ ရုံးပိတ်ရက်၊ နောက် လွှဲပြောင်းနိုင်သော စာချုပ်စာတမ်းများ၊ အက်ဥပဒေပေါ့နော်။ အဲ့ဒီ့ပုဒ်မအရလည်း ကျနော်တို့ကလည်း ရုံးပိတ်ရက်အဖြစ် ကြေညာထားပြီးပြီ။
ကျနော်တို့အစိုးရအနေနဲ့ သမ္မတကြီးက ဒါကို အခြေခံဥပဒေထဲမှာအတိုင်း သူလုပ်နေတာဖြစ်ပါတယ်။ အဲ့တော့ ဒီကုရ်ဘာရီ လုပ်ခြင်း မလုပ်ခြင်းနဲ့ပတ်သက်လို့ ဒီကုရ်ဘာရီနဲ့ပတ်သက်လို့ တနိုင်ငံလုံး ကျနော်တို့ ကန့်သတ်တာဆိုရင် ရှားပါတယ်။ တော်တော်များများ မရှိပါဘူး။ အစဉ်ဆက်ဆက် မရှိခဲ့သလို အခုဒီနှစ်မှာလည်း သမ္မတကြီးအနေနဲ့ ဒီကုရ်ဘာရီ လုပ်တဲ့ဟာကို ပိတ်ပင်တာတွေ၊ တားမြစ်တာတွေ၊ ကန့်သတ်တာတွေ လုံးဝမရှိပါဘူး။”
ကုရ်ဘာရီ ပွဲတော်ပြုလုပ်တဲ့အခါမှာ လုံခြုံရေးပေးနိုင်မှု အခြေအနေတွေဟာ သက်ဆိုင်ရာ တိုင်းဒေသကြီး အစိုးရအဖွဲ့တွေနဲ့ အဓိကသက်ဆိုင်ပြီး နိုင်ငံတော်သမ္မတရုံးအနေနဲ့ သီးခြားညွန်ကြားထားတာမရှိဘူးလို့လည်း ဦးဇော်ဌေးက ပြောပါသေးတယ်။
“လုံခြုံရေးအခြေအနေဆိုတာကတော့ ကျနော်တို့ ကုရ်မာရီလုပ်တာ သတ်မှတ်ထားတဲ့ နေရာတွေရှိပါတယ်။ ဆိုလိုတာက ကျနော်တို့ လူနေအိမ်ခြေတွေကြားထဲမှာ ‘ဟာလာ’ပေါ့နော်။ ‘ဟာလာ’ လုပ်တယ်ဆိုတာ အစဉ်အဆက်လည်း ခွင့်မပြုခဲ့ဘူးပေါ့နော်။ သတ်မှတ်တဲ့နေရာမှာပဲ လုပ်ခွင့်ပေးထားပြီးဖြစ်ပါတယ်။ အဲ့တာကို အဲ့ဒီ့အပေါ်မှာ လုံခြုံရေးယူပေးပါ၊ မယူပေးပါဆိုတာကတော့ ကျနော်တို့ အစဉ်အဆက်လည်း လုပ်လေ့ လုပ်ထမရှိဘူး။ ပေးလေ့ပေးထ လည်းမရှိဘူး။
ဒီတော့ အသေးစိတ်ကတော့ သက်ဆိုင်ရာ တိုင်းဒေသကြီး၊ ပြည်နယ်အစိုးရတွေက ပိုပြီး သိပါလိမ့်မယ်။ ဆိုလိုတာက ဒီအပေါ်မှာ ဒီဟာလုပ်တဲ့အတွက် လုံခြုံရေးယူပေးပါဆိုတဲ့ဟာကတော့ ဒါကတော့ အကြောင်းရင်းများစွာ ရှိနိုင်ပါတယ်။ သို့သော်လည်းပဲ ဒါကတော့ သက်ဆိုင်ရာ တိုင်းဒေသကြီး၊ ပြည်နယ်အစိုးရက ပိုပြီး သိပါလိမ့်မယ်။ ကျနော်တို့ကတော့ အဲ့တာနဲ့ပတ်သက်လို့ ဘာမှ ညွန်ကြားထားတာမရှိဘူး။”
မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးကလည်း ရခိုင်ပြည်နယ် အတွင်းမှာ ဖြစ်ပျက်နေတဲ့ အဖြစ်အပျက်တွေ တည်ငြိမ်မှုမရှိသေးတာကြောင့် စနေနေ့ မှာ ကျရောက်မဲ့ အစ်ဒ်နေ့ မှာ ကုရ်ဘာရီပြုလုပ်ခြင်းတွေ ရပ်ဆိုင်းထားဖို့ ကြေညာချက်လည်း ထုတ်ပြန်ခဲ့ ပါတယ်။
ရန်ကုန်မှာရှိတဲ့ မူဆလင်လူနည်းစုတွေကလည်း မနက်ဖြန်မှာ ကျရောက်မဲ့ အစ္စလာမ် ဘာသာရေးပွဲတော်ကို ကျင်းပမှာမဟုတ်တဲ့အကြောင်းကိုလည်း တခြမ်းပဲ့ ဗလီ ဂေါပက အဖွဲ့ဝင် ဦးသန်းမောင်က VOA ကို အခုလို ပြောပါတယ်။
“ ကျနော်တို့ရန်ကုန်တိုင်းကတော့ဗျာ။ လုံခြုံရေးဝန်ကြီးရော၊ ဝန်ကြီးချုပ်ရော လုံခြုံရေးတွေ ပေးထားပါတယ်။ ဆန္ဒပြတာတွေ ဘာတွေဆိုလည်း တခုခုဆို သူတို့ လုံခြုံရေးတွေ ပေးတယ်။ ကျန်တဲ့ တိုင်းနဲ့ပြည်နယ်တွေမှာ တခုခုဖြစ်ပေါ်လာမလားဆိုတဲ့ စိုးရိမ်စိတ်နဲ့ ဒီအဖွဲ့အစည်းတွေက တားလိုက်တယ်။ တားလိုက်တော့ ကျနော်တို့လည်း သူတို့တားတော့ မလုပ်ဖြစ်သွားတာ။”
ဒီကနေ့မှာလည်း ရန်ကုန်မြို့ အထက် ပန်းဆိုးတန်းလမ်းမကြီး မှာ တည်ရှိတဲ့ အစ္စလာမ် ၀တ်ပြု အဆေက်အအုံရှေ့မှာ ဘာသာရေး ပွဲတော် ပြုလုပ်တဲ့ကိစ္စနဲ့ ပတ်သက်ပြီး ဆန္ဒထုတ်ဖော်မယ်ဆိုတဲ့ သတင်းတွေထွက်ရှိခဲ့ပါသေးတယ်။ ထွက်ပေါ်လာတဲ့သတင်းတွေမှာ သူတို့အနေနဲ့ တစုံတရာ သိရှိခြင်းမရှိဘူးလို့ တခြမ်းပဲ့ဗလီဂေါပကအဖွဲ့ဝင်တွေက ငြင်းဆိုခဲ့ပါတယ်။
အာဖဂန်ဗလီဗုံးခွဲ ၄၀ မက သေဆုံး
အာဖဂန်နစ္စတန်နိုင်ငံမြောက်ပိုင်းမှာ မနေ့က သောကြာနေ့မှာ ဗလီကျောင်းတကျောင်းကို အသေခံဗုံးခွဲတိုက်ခိုက်ခဲ့တဲ့အတွက် အနည်းဆုံး လူ ၄၀ လောက် သေဆုံးခဲ့ရပါတယ်။မွတ်ဆလင်တွေရဲ့ ဘာသာရေးပွဲတော်ဖြစ်တဲ့ Eid-al-Ada ပွဲတော်ရက် သုံးရက်အတွင်း Faryab ခရိုင်၊ Maymana မြို့က ဗလီ တိုက်ခိုက်ခံ ရတာဟာ မကြာခင် လတွေအတွင်း အဆိုးဝါးဆုံး တိုက်ခိုက်မှုဖြစ်ပါတယ်။
လူငယ် အသေခံဗုံးခွဲသမားဟာ ဘုရားဝတ်ပြုသူတွေထဲက အဲဒီဒေသရဲ့ ရဲအရာရှိတယောက်ကို လုပ်ကြံဖို့ပစ်မှတ်ထား တိုက်ခိုက်ခဲ့တာပါ။ ပစ်မှတ်ထားခံရတဲ့ ရဲအရာရှိက အသက်ဘေးက လွတ်မြောက်ခဲ့ပေမဲ့ သူ့ရဲ့ လုံခြုံရေး တပ်ဖွဲ့ဝင် ၂၀ ကျော် သေဆုံးခဲ့ရပါတယ်။ အရပ်သားတွေထဲကလည်း ကလေးငါးယောက်အပါအဝင် အတော်များများ သေဆုံးသွားခဲ့တာပါ။
ဒီအကြမ်းဖက်မှု ဘယ်သူ့လက်ချက်ဆိုတာ ဘယ်အဖွဲ့ကမှ ထုတ်ပြန်တာမရှိပေမဲ့ အာဏာပိုင်တွေဘက်ကတော့ တာလီဘန်တွေလက်ချက်လို့ အပြစ်ဖို့ထားပါတယ်။ ဒီသီတင်းပတ်အစောပိုင်းက လုံခြုံရေးတပ်ဖွဲ့တွေနဲ့ ရင်ဆိုင်တိုက်ခိုက်မှုအတွင်း ဖာယပ်ပ် ခရိုင်ရဲ့ တာလီဘန် အုပ်ချုပ်ရေးမှူး သေဆုံးခဲ့တဲ့အပေါ် လက်စားချေ တိုက်ခိုက်တာဖြစ်တယ်လို့ ဖားယပ်-ပ် ရဲ့ ဒုတိယအုပ်ချုပ်ရေးမှူး Aabdul Sattar Bariz က သတင်းထောက်တွေကို ပြောပါတယ်။
အာဖဂန်သမ္မတ ဟာမစ် ခါဇိုင်းက ဒီတိုက်ခိုက်မှုကို ပြင်းပြင်းထန်ထန် ပြစ်တင်ပြောကြားလိုက်ပြီး ဒီတိုက်ခိုက်မှုကို စီစဉ်သူဟာ အစ္စလာမ်လူမှုအသိုင်းအဝိုင်းရဲ့ ရန်သူဖြစ်တယ် လို့လည်း ပြောလိုက်ပါတယ်။ အစ်ပွဲတော်နေ့ အားလပ်ရက်ရဲ့ အစောပိုင်း ကြေညာချက်မှာ တာလီဘန်တွေကို လက်နက်ချဖို့ သမ္မတခါဇိုင်းက တိုက်တွန်းခဲ့ပါတယ်။
န်ာဝေး ဒိန်းမတ် သံရုံးတွေမြန်မာနိုင်ငံမှာဖွင့်မည်
မြန်မာနိုင်ငံက သံရုံးဖွင့်ပွဲတွေကို နော်ဝေး၀န်ကြီးချုပ် Mr. Jens Stoltenberg (ယာ) နဲ့ ဒိန်းမတ်ဝန်ကြီးချုပ် Ms. Helle Thorning Schmidt (ဝဲ)လည်း တက်ရောက်မှာ ဖြစ်ပါတယ်။
နော်ဝေးနဲ့ ဒိန်းမတ်ဝန်ကြီးချုပ်တွေ မကြာခင်မှာ မြန်မာနိုင်ငံကိုသွားရောက်ပြီး သက်ဆိုင်ရာ နိုင်ငံ အသီးသီးအတွက် သံရုံးတွေ ရန်ကုန်မြို့မှာ ဖွင့်လှစ်ကြတော့မှာ ဖြစ်ပါတယ်။ လွန်ခဲ့တဲ့ တနှစ်လောက် အတွင်း မြန်မာနိုင်ငံမှာ ပြုလုပ်ခဲ့တဲ့ ပြုပြင်ပြောင်းလဲမှုတွေ အပေါ် ကျေနပ် အားရမှုရှိတဲ့အတွက် အခုလို သံရုံးဖွင့်ဖို့ ဆုံးဖြတ်လိုက်တာလို့ နော်ဝေးအစိုးရ တာဝန်ရှိသူတွေက ပြောကြားလိုက်ပြီး ၀န်ကြီးချုပ် ၂ ဦးစလုံးဟာ သမ္မတ ဦးသိန်းစိန်နဲ့ မြန်မာ့ ဒီမိုကရေစီ အရေးခေါင်းဆောင် ဒေါ်အောင်ဆန်းစုကြည် တို့နဲ့လည်း နေပြည်တော်မှာ တွေ့ဆုံကြမှာဖြစ်ပါတယ်။ အပြည့်အစုံကိုတော့ ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြပေးပါမယ်။
နော်ဒစ်လို့ခေါ်တဲ့ မြောက်အတ္တလန္တိတ်ဒေသက နော်ဝေးနဲ့ ဒိန်းမတ် ၂ နိုင်ငံဟာ ပထမဆုံးအကြိမ်အဖြစ် မြန်မာနိုင်ငံမှာ သံရုံးတွေ ဖွင့်လှစ်ကြတော့မှာ ဖြစ်ပါတယ်။ ဒီသံရုံးဖွင့်ပွဲတွေကို နော်ဝေး၀န်ကြီးချုပ် Jens Stoltenberg နဲ့ ဒိန်းမတ်ဝန်ကြီးချုပ် Ms. Helle Thorning Schmidt လည်း တက်ရောက်မှာ ဖြစ်ပါတယ်။
နော်ဝေး၀န်ကြီးချုပ် မစ္စတာ စတိုလ်တန်ဘာ့ခ်ကတော့ မြန်မာနိုင်ငံကို နိုဝင်ဘာလ ၃ ရက်နေ့မှာ ရောက်ရှိမှာဖြစ်ပြီးတော့ နိုဝင်ဘာလ ၄ ရက်နေ့ တနင်္ဂနွေနေ့မှာ သံရုံးဖွင့်လှစ်ပွဲကို တက်ရောက်မှာ ဖြစ်တယ်လို့ ၀န်ကြီးချုပ်ရုံး ပြန်ကြားရေးအရာရှိ Arvid Samland က ပြောပါတယ်။
“ ၀န်ကြီးချုပ်ဟာ စနေနေ့မှာ နေပြည်တော်ကို ရောက်ပါမယ်။ အဲဒီမှာ သမ္မတ ဦးသိန်းစိန်နဲ့ စနေနေ့ ညနေပိုင်းမှာတွေ့ပြီး နောက်တနေ့ မနက်ပိုင်းမှာတော့ ဒေါ်အောင်ဆန်းစုကြည်နဲ့ တွေ့ပါမယ်။ တနင်္ဂနေ့ နေ့လည်ပိုင်းမှာ ရန်ကုန်ကိုသွားပြီး ဒိန်းမတ် ၀န်ကြီးချုပ်နဲ့ အတူ သံရုံးဖွင့်ပွဲကို တက်ရောက်မှာ ဖြစ်ပါတယ်။”
နော်ဝေးနဲ့ ဒိန်းမတ်နိုင်ငံတို့ဟာ အဆောက်အဦးတခုထဲမှာ သံရုံးတွေကို အတူတွဲဖွင့်ကြမှာဖြစ်ပါတယ်။ နောက်ပိုင်းကျမှ မြောက်အတ္တလန္တိတ် နိုင်ငံတွေထဲက သံရုံးဖွင့်လိုတဲ့ နိုင်ငံတွေတိုးလာကောင်း တိုးလာနိုင်သလို့ သူတို့အနေနဲ့လည်း သံရုံးတွေကို သီးခြားစီခွဲဖွင့်သွားကောင်း ဖွင့်သွားမယ်လို့ Arvid Samland က ပြောပါတယ်။
မြန်မာနိုင်ငံအတွင်း ဖြစ်ပေါ်နေတဲ့ နိုင်ငံရေးအရ ပြုပြင်ပြောင်းလဲမှုတွေကို နော်ဝေးနိုင်ငံအနေနဲ့ အနီးကပ် လေ့လာ စောင့်ကြည့်နေခဲ့တဲ့အကြောင်းလည်း Arvid Samland က ပြောပါတယ်။
“ မြန်မာနိုင်ငံအတွင်း ဖြစ်ပေါ် ပြောင်းလဲနေတဲ့ အခြေအနေတွေကို နော်ဝေးနိုင်ငံအနေနဲ့ ကာလအတော်ကြာ စောင့်ကြည့်နေခဲ့ပါတယ်။ လွန်ခဲ့တဲ့ တနှစ်အတွင်း ဖွှံ့ဖြိုးတိုးတက်မှုတွေဟာ အားရ ကျေနပ်စရာ ကောင်းပါတယ်။ ဒါကြောင့်လည်း နော်ဝေးနိုင်ငံအနေနဲ့ မြန်မာနိုင်ငံမှာ သံရုံးဖွင့်ဖို့ ဖြစ်လာတာပါ။”
နော်ဝေးနိုင်ငံဟာ မြန်မာနိုင်ငံနဲ့ သံတမန် အဆက်အသွယ်တွေ ၁၉၅၆ ခုနှစ်မှာ စတင် တည်ထောင်ခဲ့ပေမယ့်လည်း မြန်မာနိုင်ငံမှာ သံရုံး ဖွင့်ခဲ့ခြင်း မရှိပါဘူး။ လက်ရှိအခြေအနေမှာတော့ နော်ဝေးနိုင်ငံရဲ့ သံတမန်ရေးရာ ကိစ္စတွေကို ရန်ကုန်မြို့မှာရှိတဲ့ ဗြိတိသျှသံရုံးက ဘန်ကောက်မှာရှိတဲ့ နော်ဝေးသံရုံးနဲ့အတူ ပူးတွဲ တာဝန်ယူ လုပ်ဆောင်ပေးနေတာ ဖြစ်ပါတယ်။
ဒိန်းမတ်နိုင်ငံဟာလည်း မြန်မာနိုင်ငံနဲ့ သံတမန်အဆက်အသွယ်တွေ ၁၉၅၅ ခုနှစ်မှာ စတင် တည်ထောင်ခဲ့ပေမယ့် နော်ဝေးနိုင်ငံနည်းတူ မြန်မာနိုင်ငံမှာ သံရုံး ဖွင့်ခဲ့ခြင်း မရှိပါဘူး။ ဒိန်းမတ်နိုင်ငံရဲ့ မြန်မာနိုင်ငံဆိုင်ရာ သံတမန်ရေးရာ ကိစ္စတွေကို ထိုင်းနိုင်ငံ ဘန်ကောက်မြို့မှာရှိတဲ့ ဒိန်းမတ်သံရုံးက တာဝန်ယူ ဆောင်ရွက်ပေးနေတာ ဖြစ်ပါတယ်။
0 comments:
Post a Comment