03.10.2012 နေ့ဖတ်ရန်သတင်းများ

by Myanmar Journal on Tuesday, October 2, 2012 at 5:04pm ·

ဆီးရီးယား နိုင်ငံခြားရေးဝန်ကြီး စွပ်စွဲပြောကြား

သူတို့ နိုင်ငံက အကြမ်းဖက်မှု တွေကို အမေရိကန် ပြည်ထောင်စုနဲ့ လေးနိုင်ငံက အားပေး ထောက်ပံ့ နေတယ်လို့ ဆီးရီးယား နိုင်ငံခြားရေး ၀န်ကြီး Walid al-Moualemက စွပ်စွဲ ပြောကြား လိုက်ပါတယ်။

အမေရိကန် ၊ ပြင်သစ် ၊ ကာတာ ၊ ဆော်ဒီ အာရေဗျ နဲ့ တူရကီ တို့က သမ္မတ အာဆက်ကို ဖြုတ်ချဖို့ ဆီးရီးယား သူပုန်တွေကို လက်နက်နဲ့ ငွေကြေး ထောက်ပံ့ပေးနေတယ်လို့ နယူးယောက် မြို့က ကုလသမဂ္ဂ အထွေထွေ ညီလာခံမှာ ဆီးရီးယား နိုင်ငံခြားရေး ၀န်ကြီးက ပြောသွားပါတယ်။

ဆီးရီးယား အစိုးရ အနေနဲ့ ကိုယ့်လူထုကို သနားညှာတာဖို့နဲ့ သူပုန်တွေကို ထိုးစစ်ဆင်နေတာကို လျော့ဖို့ ပန်ကြားခဲ့တဲ့ ကုလသမဂ္ဂ အတွင်းရေးမှူးချုပ် ဘန်ကီမွန်းနဲ့လည်း မစ္စတာ မူလန် သွားရောက် တွေ့ဆုံ ခဲ့တယ်လို့ သိရပါတယ်။

ဆီးရီးယား နိုင်ငံက မြို့ရွာတွေမှာလည်း မနေ့က အစိုးရနဲ့ သူပုန်တပ်တွေကြား တိုက်ခိုက်မှုတွေ ဆက်ဖြစ်နေခဲ့ပြီး လူ၁၀၀လောက် သေဆုံးခဲ့တယ်လို့ သတင်းရရှိပါတယ်။

ပြီးခဲ့တဲ့ သီတင်းပတ် တုန်းက သူပုန်တွေ ဖက်က ထပ်မံ ထိုးစစ်ဆင်ခဲ့တဲ့ နိုင်ငံရဲ့ ဒုတိယ အကြီးဆုံးမြို့ ဖြစ်တဲ့ အလက်ပို မြို့မှာ အဆိုးရွားဆုံး တိုက်ခိုက်မှုတွေ ဖြစ်ခဲ့တယ်လို့ ဆိုပါတယ်။

နိုင်ငံခြားသား ခရီးသည်တွေကို ရခိုင် သွားခွင့်ပြုပြီ

နိုင်ငံခြားသား ခရီးသွားတွေကို စောင့်ကြိုနေတဲ့ ကမ်းခြေ အလှ

ရခိုင်ပြည်နယ်က အခင်းဖြစ်ပွားပြီးနောက် ၃လလောက် ပိတ်ထားရာက နိုင်ငံခြားသား ခရီးသည်တွေကို အခုအခါ ပြန် သွားလည်ခွင့်ပြုပြီလို့ သိရပါတယ်။

နိုင်ငံခြားသား ခရီးသည်တွေကို အရင်ကလို လွတ်လွတ်လပ်လပ် သွားလာခွင့်ပြုတာ မဟုတ်သေးဘဲ ကြိုတင်ခွင့်ပြုချက်နဲ့မှ သွားလို့ရတာ ဖြစ်ပါတယ်။

ဘာဘဲဖြစ်ဖြစ် ခရီးသွား ရာသီချိန် ရောက်လာပြီဖြစ်လို့ အစိုးရပိုင်းက အခုလို ခွင့်ပြုလာတာဟာ ကောင်းတယ်လို့ မြန်မာနိုင်ငံ ခရီးသွား လုပ်ငန်းရှင်များ အသင်း အတွင်းရေးမှူး ဦးတင်ထွန်းအောင်က ပြောပါတယ်။

အုပ်စုလိုက် လာတဲ့ ခရီးသွား အဖွဲ့တွေ သွားရောက် လည်ပတ် နိုင်ဖို့ ဟိုတယ်နဲ့ ခရီးသွား ၀န်ကြီး ဌာန ခွင့်ပြုချက် အရင် ယူရပြီး ခွင့်ပြုချက် တောင်းခံချိန် ငါးရက်လောက် ကြာတယ်လို့ ဦးတင်ထွန်းအောင် က ဆိုပါတယ်။

နိုင်ငံခြားသား ခရီးသွားတွေဟာ မြောက်ဦးမြို့ကို အများဆုံး သွားလေ့ ရှိကြပြီး စစ်တွေမြို့မှာ တရက်နား ၊ မြောက်ဦးမြိုမှာ ခြောက်ရက်လောက် အိပ်ကာ လည်ပတ်လေ့ ရှိတယ်လို့ ပြောပါတယ်။

အဲဒီလို သွားလာလေ့ ရှိတဲ့ ခရီးသွားတွေ အများဆုံး လာတဲ့ ရာသီက နိုဝင်ဘာလ ကနေ နောက်သုံးလလောက်ထိ ဖြစ်ပြီး တနေ့ကို အယောက် ၂၀၀ ကနေ ၃၀၀ လောက်ထိ ရှိတယ်လို့ သိရပါတယ်။

ဒါ့အပြင် အခုနှစ်အတွင်း မြန်မာနိုင်ငံကို လာရောက်တဲ့ ခရီးသည် အခြေအနေကို ကြည့်မယ်ဆိုရင် ပြီးခဲ့တဲ့ နှစ်ထက် စာရင် ထက်ဝက်လောက် များလာတယ်လို့ ဦးတင်ထွန်းအောင်ကပြောပါတယ်။

ပြီးခဲ့တဲ့နှစ်တုန်းက လေဆိပ်တွေကနေ လာတဲ့ ခရီးသည်ဟာ ၄ သိန်းကျော်ရှိပြီး အခုနှစ်မှာ တလခြင်း အလိုက် တဝက်လောက် တိုးများ လာတာကြောင့် အခုနှစ်မှာ ၆ သိန်းကျော်တော့ ရှိနိုင်မယ်လို့ ဦးတင်ထွန်းအောင်က ခန့်မှန်း ပြောကြားပါတယ်။ 

မြန်မာ တရုတ် ဓါတ်ငွေ့ ပိုက်လိုင်း ယာယီ ရပ်ဖို့ တောင်းဆို

မြန်မာ နိုင်ငံ မြောက်ပိုင်းက သဘာဝ ဓါတ်ငွေ့ ပိုက်လိုင်း

မြန်မာ နိုင်ငံ တဝန်း မြို့နယ်ပေါင်း ၂၁ မြို့နယ်ကို ဖြတ်သန်း ဖောက်လုပ်နေတဲ့ မြန်မာ တရုတ် သဘာဝ ဓါတ်ငွေ့ ပိုက်လိုင်း စီမံကိန်းကို ယာယီ ရပ်ဆိုင်းဖို့ ပြည်တွင်းက သဘာဝ ပတ်ဝန်းကျင် ထိန်းသိမ်းရေး အဖွဲ့ ၁၂ ဖွဲ့ စုပေါင်းပြီး တောင်းဆို လိုက်ကြ ပါတယ်။

အဲဒီ ၁၂ ဖွဲ့ ထဲမှာ ရခိုင် ပြည်နယ်၊ ဧရာ ဝတီမြစ် အနောက် ဘက်ခြမ်းနဲ့ မြန်မာ နိုင်ငံ အလယ်ပိုင်း ဒေသက ပတ်ဝန်းကျင် ထိန်းသိမ်းရေး အဖွဲ့တွေ ပါဝင် ပါတယ်။

စီမံကိန်း ရပ်ဆိုင်းဖို့ တောင်းဆို ရတဲ့ အကြောင်းတွေ ထဲမှာ ဒီစီမံကိန်း လုပ်ဆောင်ဖို့ တရုတ် ကုမ္ပဏီနဲ့ ဘာတွေ သဘောတူ လက်မှတ် ရေးထိုး ခဲ့တယ်ဆိုတာ ပြည်သူတွေ သိအောင် မထုတ်ပြန်တဲ့ ကိစ္စ၊ ပိုက်လိုင်း တွေဟာ ဘေး အန္တရာယ် ကင်းဝေး တယ်လို့ စိတ်ချရမှု မရှိတဲ့ ကိစ္စတို့ အပါအဝင် ပြည်သူ လူထု နစ်နာ နေတဲ့ အချက် ၇ ချက်ကို ထောက်ပြ ထားပါတယ်။

မြန်မာ အစိုးရ အနေနဲ့ စီမံကိန်း မစတင် ခင် အချိန်မှာ သဘာဝ ပတ်ဝန်းကျင်ကို ထိခိုက် နိုင်ခြင်း ရှိမရှိ ဆိုတဲ့ စစ်ဆေးမှုတွေ မလုပ်ခဲ့တာကို ကြေညာချက် ထဲမှာ ဝေဖန် ထားပါတယ်။

ဒီစီမံကိန်းကြောင့် အမျိုးသမီးတွေနဲ့ ကလေးငယ်တွေ အပေါ် လူ့ အခွင့် အရေး ချိုးဖောက်မှုတွေ ရှိခဲ့တဲ့ အပြင် ပြည်တွင်းစစ် ဖြစ်အောင် တွန်းအား ပေးမှုနဲ့ ဒေသခံ ပြည်သူတွေရဲ့ လူမှု ဘဝတွေကို အနှောင့် အယှက်တွေ ရှိလာတယ် လို့လည်း ကြေညာချက်က ဆိုပါတယ်။

ဒါ့အပြင် ကိုယ့်နိုင်ငံရဲ့ မြေပေါ်မှာ ဖြတ်သန်း ဆောက်လုပ်တဲ့ ပိုက်လိုင်း စီမံကိန်းနဲ့ ပတ်သက်တဲ့ စီမံ ခန့်ခွဲမှုကို မြန်မာ နိုင်ငံက မရရှိတာ ကလည်း နိုင်ငံရဲ့ လုံခြုံရေးနဲ့ အချုပ် အခြာ အာဏာ ကို စိုးရိမ်စရာ ဖြစ်တယ်လို့ ပြောပါတယ်။

ဒါကြောင့် သူတို့ ထောက်ပြတဲ့ အချက် ၇ ချက်ကို လိုက်နာ ဆောင်ရွက်လို့ မပြီး မချင်း လက်ရှိ စီမံကိန်းကို ရပ်ဆိုင်း ထားဖို့ တရုတ် ကုမ္ပဏီ ဘက်ကိုရော မြန်မာ အစိုးရ ဘက်ကိုပါ တောင်းဆိုတယ်လို့ ၁၂ ဖွဲ့ ထဲမှာ ပါတဲ့ Thazin Development Foundation ( ရခိုင် ပြည်နယ်) က ဦးအောင်ကျော်စိုးက ပြော ပါတယ်။

လောလောဆယ်မှာ စီမံကိန်း လုပ်နေတဲ့ အနေအထားက ခရီး ရောက် နေပြီ ဖြစ်လို့ အခု ချိန်မှ ရပ်တန့် ဖို့ ဆိုတာ လွယ်နိုင်ပါ့ မလား ဆိုတာနဲ့ ပတ်သက်လို့တော့ သူတို့ အနေနဲ့ ပြည်သူတွေ နစ်နာမှု အပေါ် အခြေခံပြီး တောင်းဆိုတာ ဖြစ်တယ်၊ မလိုက်လျောရင် နောက် တစ်ဆင့် ဆက်လုပ်ဖို့ ပြင်ဆင် ထားတယ်လို့ သူက ပြောပါတယ်။

ဟောင်ကောင်မှာ လှေနှစ်စီး တိုက်လို့ လူ ၃၇ ဦး သေဆုံး

ဟောင်ကောင် တောင်ဘက်ပိုင်း အသွား အလာ များလှတဲ့ ပင်လယ်ပြင်မှာ လှေနှစ်စီး တိုက်မိခဲ့ တာပါ

ဟောင်ကောင်က လမ်မာ ကျွန်းအနီး လှေနှစ်စီး ဝင်တိုက်မိလို့ လူ ၃၇ ဦး သေဆုံး သွားခဲ့တဲ့ ကိစ္စနဲ့ ပတ်သက်ပြီး သင်္ဘောဝန်ထမ်း ၆ ဦးကို ဟောင်ကောင်ရဲက ဖမ်းဆီး လိုက်ပါ တယ်။

ခရီးသည်တင် လှေတစီးနဲ့ အပန်းဖြေ လှေတစီး ပင်လယ်ပြင်မှာ ဝင်တိုက်မိခဲ့တာ ဖြစ်ပြီး၊ လူတွေရဲ့ အသက်ပါ သေဆုံးခဲ့တဲ့ ဒီဖြစ်ရပ်ကို အာဏာပိုင် တွေက စုံစမ်း စစ်ဆေးမှုတွေ ပြုလုပ်နေ ပါတယ်။

ဟောင်ကောင် တောင်ဘက်ပိုင်း အသွား အလာများလှတဲ့ ပင်လယ်ပြင်မှာ လှေနှစ်စီး တိုက်မိခဲ့တာပါ။

အပန်းဖြေစီး လှေ နှစ်မြုပ်သွားတဲ့ အချိန်မှာတော့ လူတွေ အများအပြားဟာ ပင်လယ်ထဲ မြုပ်သွားခဲ့ကြတာ ဖြစ်ပါတယ်။

တရုတ် အမျိုးသားနေ့ အထိမ်းအမှတ် မီးရှူးမီးပန်း ဖေါက်ပွဲကို သွားကြည့်ဖို့ အတွက် အဲဒီလှေပေါ်မှာ ဟောင်ကောင် လျှပ်စစ် ကုမ္ပဏီက အလုပ်သမားတွေနဲ့ သူတို့ရဲ့ မိသားစုတွေကို တင်ဆောင် လာတာ ဖြစ်ပါတယ်။

ဘုန်းကြီးကျောင်းတွေကို တိုက်ခိုက်မှု၊ ဒါကားမှာ ကန့်ကွက်ဆန္ဒပြ

လုံခြုံရေး တွေကိုလည်း တိုးချထားပါတယ်

ဘင်္ဂလားဒေ့ရ်ှနိုင်ငံမှာ ဗုဒ္ဓဘာသာ ဘုန်းတော်ကြီး ကျောင်းတွေ မီးရှို့ တိုက်ခိုက် ခံခဲ့ရတဲ့ အပေါ် ဗုဒ္ဓဘာသာ၊ ခရစ်ယာန်၊ အစ္စလာမ် ဘာသာပေါင်းစုံ အဖွဲ့တွေနဲ့ တက္ကသိုလ် ပေါင်းစုံက ကျောင်းသားတွေ စုပေါင်းပြီး ဒါကားမြို့ အမျိုးသား ပြတိုက်ရှေ့မှာ ကန့်ကွက် ဆန္ဒပြခဲ့ကြ ပါတယ်။

ဘင်္ဂလားဒေ့ရှ် အစိုးရက လုံခြုံရေး တွေ တင်းတင်း ကျပ်ကျပ် ချထားပြီး မတည်ငြိမ်မှု တွေ ဆက် မဖြစ်အောင် ထိန်းသိမ်း နေချိန်မှာပဲ အဖွဲ့ အစည်း ပေါင်းစုံက လူပေါင်း ၅၀၀ လောက်က အခုလို ကန့်ကွက် ဆန္ဒပြခဲ့ကြတာပါ။

မီးရှို့ တိုက်ခိုက် ခံခဲ့ရတဲ့ ဘုန်းတော်ကြီးကျောင်း ၂၂ ကျောင်း ထဲမှာ တချို့ ကျောင်းတော် တွေဟာ နှစ်ပေါင်း ၂၅၀ ကျော် ၃၀၀ ခန့်က တည်ရှိခဲ့တဲ့ ကျောင်းတွေ ဖြစ်ကြပါတယ်။

ရှေးခေတ် ရွှေဆင်းတုတော်တွေ ပျောက်ဆုံးတာ၊ ပိဋကတ်တော်တွေ မီးလောင် ပျက်ဆီးသွားတာတွေနဲ့ ရှေးဟောင်း စာပေတွေ ပျက်ဆီး သွားတာတွေ ရှိခဲ့တယ်လို့ ဆိုပါတယ်။

ရှေးခေတ် ယဉ်ကျေးမှု အမွေ အနှစ်တွေ လုယက် ဖျက်ဆီး ခံခဲ့ရတာ ဖြစ်လို့ ဘင်္ဂလားက ဗုဒ္ဓဘာသာဝင်တွေ အတွက် အကြီးမားဆုံး ဆုံးရှုံးမှုကြီး ဖြစ်ပါတယ်။

ဗုဒ္ဓဘာသာဝင် အမျိုးသား တစ်ယောက်ရဲ့ ဖေ့စ်ဘွတ်ခ် ပေါ်မှာ အစ္စလာမ် ဘာသာကို စော်ကားတယ် ဆိုတဲ့ ဓာတ်ပုံ တင်ခဲ့တယ် ဆိုတဲ့ စွပ်စွဲ ချက် ပေါ်ထွက်လာပြီး နောက် ရာမူးနဲ့ ကော့ဆက် ဘဇား မြို့တို့မှာ ဗုဒ္ဓဘာသာ ဝင်တွေရဲ့ ဘုန်းကြီးကျောင်းတွေ၊ ဆင်းတုတော် တွေကို မွတ်ဆလင် တွေက တိုက်ခိုက်ခဲ့ ကြတာပါ။

ထိုင်းနိုင်ငံ ဘန်ကောက်မြို့ မှာလည်း သံဃာ အပါး ၁၀၀ လောက်က ဘင်္ဂလားဒေ့ရှ် သံရုံး ရှေ့မှာ ဆန္ဒပြခဲ့ကြ တယ်လို့ သိရပါတယ်။

ဂျော်ဂျီရာ ရွေးကောက်ပွဲ အတိုက်အခံ အနိုင်ရ

လက်ရှိသမ္မတ Mikheil Saakashvili ဟာ ၂၀၀၃ ခုနှစ် ကတည်းက တိုင်းပြည်ကို ဦးဆောင်နေတာ ဖြစ်ပါတယ်

ဂျော်ဂျီရာ သမ္မတ Mikheil Saakashvili က ပါလီမန် ရွေးကောက်ပွဲမှာ သူ့ပါတီ အရေးနိမ့် ခဲ့ပြီ ဆိုတာကို ဝန်ခံ ပြောကြား လိုက်ပြီ ဖြစ်ပါတယ်။

Bidzina Ivanishvili ဦးဆောင်တဲ့ အတိုက်အခံ ဂျော်ဂျီရာ Dream ပါတီ က ပါလီမန် အမတ်နေရာ အများစုနဲ့ အနိုင်ရသွားပြီ ဆိုတာ ရှင်းရှင်းလင်းလင်း ဖြစ်သွားပြီလို့ မစ္စတာ Saakashvili က ပြောပါတယ်။

အစိုးရသစ် ဖွဲ့စည်းရေး၊ ပါလီမန် ဥက္ကဌ ရွေးချယ်ရေးတွေကို အခြေခံ ဥပဒေအတိုင်း အကူအညီ ပေးသွားမယ်လို့လည်း သမ္မတက ရုပ်သံကနေ ပြောကြားသွားပါတယ်။

ဂျော်ဂျီရာ အိပ်မက်လို့ ခေါ်ဆိုနိုင်မယ့် ဂျော်ဂျီရာ Dream ပါတီကို ဦးဆောင်သူ မစ္စတာ Ivanishvili ဟာ နိုင်ငံမှာ အချမ်းသာဆုံး ပုဂ္ဂိုလ်ဖြစ်ပြီး၊ သူ့ပါတီ ကနေ ပါလီမန်မှာ အမတ် နေရာ ၁၅၀ ရှိတဲ့ အနက် အမတ်နေရာ ၇၇ နေရာနဲ့ အနိုင် ရရှိခဲ့တာပါ။

ဆိုဗီယက်ပြည်ထောင်စု ကာလ နောက်ပိုင်း ဂျောဂျီရာ နိုင်ငံမှာ ၂၀၀၃ ခုနှစ်က ဖြစ်ပွားခဲ့တဲ့ Rose Revolution နှင်းဆီ တော်လှန်ရေးကို ဦးဆောင်ခဲ့တဲ့ Mikheil Saakashvili ဟာ ၂၀၀၄ ခုနှစ်မှာ သမ္မတ အဖြစ် ရွေးကောက်ခံခဲ့ရပြီး၊ သမ္မတ သက်တန်း ၂ ကြိမ် ဆက်တာဝန်ယူခဲ့သူ ဖြစ်ပါတယ်။

ရွေးကောက်ပွဲ မဲဆွယ်ကာလက တဘက်နဲ့ တဘက် အပြန်အလှန် စွပ်စွဲချက်တွေနဲ့ အတော်လေး အရုပ်ဆိုးခဲ့တာ ကြောင့် မဲရလဒ် ထွက်လာချိန်မှာ အငြင်းပွားမှုတွေ ရှိနိုင်တယ်ဆိုပြီး တွက်ဆခဲ့ကြတာပါ။

ဒါပေမယ့် အခုလို လက်ရှိ သမ္မတက သူရှုံးကြောင်း ကြေညာခဲ့တာဟာ အေးအေး ဆေးဆေး အာဏာ အလွှဲ အပြောင်း ဖြစ်မယ့် သဘောလို့ ရှုမြင်ရပါတယ်။

သမ္မတ Mikheil Saakashvili ဟာ ရှေ့နှစ် သူ့သက်တန်း ကုန်သည် အထိ အာဏာ ဆက်ရှိ နေဦးမှာ ဖြစ်ပါတယ်။

ဘင်္ဂလားဒေ့ရှ် အစိုးရစွပ်စွဲချက် ရိုဟင်ဂျာငြင်းဆို

ဘင်္ဂလားဒေ့ရှ် မြန်မာနယ်စပ်အနီးက Ramu နဲ့ Cox’s Bazaar မြို့တွေမှာ ဖြစ်ပွားခဲ့တဲ့ အကြမ်းဖက် ဆူပူမှုတွေမှာ ပါဝင်ပတ်သက်သူတွေကို အာဏာပိုင်တွေအနေနဲ့ အမြန်ဆုံး အရေးယူပေးဖို့နဲ့ လူနည်းစု ရခိုင် ဗုဒ္ဓဘာသာဝင်တွေကို အကာကွယ်ပေးဖို့တို့အတွက် ရာနဲ့ချီတဲ့ ဒါကာတက္ကသိုလ် ကျောင်း သားတွေ ဒီကနေ့ ချီတက် ဆန္ဒပြခဲ့ကြပါတယ်။ ဒီအကြမ်းဖက်မှုတွေအတွက် ဘင်္ဂလားဒေ့ရှ် အစိုးရက ရိုဟင်ဂျာတွေလက်ချက်ဖြစ်တယ်လို့ ပြောဆိုထားပေမဲ့ ပြည်ပရောက် ရိုဟင်ဂျာတွေကတော့ ဒီ စွပ်စွဲမှုတွေနဲ့ပတ်သက်ပြီး မဟုတ်မှန်ကြောင်း ငြင်းဆိုခဲ့ပါတယ်။ အပြည့်အစုံကို ဘန်ကောက် ဗွီအိုအေ ရုံးခွဲကနေ ဆက်သွယ် စုံစမ်းထားတဲ့ ၀ိုင်းတော်သား ကိုဇော်ဝင်းလှိုင်က တင်ပြပေးပါမယ်။

Ramu လို့ခေါ်တဲ့ ပန်းဝါမြို့နဲ့ Cox’s Bazaar လို့ ခေါ်တဲ့ ဖလောင်းချိန် ဒေသတွေမှာ ဖြစ်သွားခဲ့တဲ့ အကြမ်းဖက် ဆူပူမှုတွေမှာ တာဝန်ရှိသူတွေကို အမြန်ဆုံး ဖမ်းဆီး အရေးယူပေးဖို့ အစိုးရကို ဖိအားပေးတဲ့အနေနဲ့ ဘင်္ဂလားဒေ့ရ်ှနိုင်ငံက ထိပ်တန်း တက္ကသိုလ်ကြီးဖြစ်တဲ့ ဒါကာ တက္ကသိုလ် က ကျောင်းသား ၃၀၀ လောက် ဒီကနေ့မနက်ပိုင်းက သူတို့ ကျောင်းဝင်းအတွင်းမှာ ချီတက် ဆန္ဒပြခဲ့ကြတာပါ။

အခု ချီတက် ဆန္ဒပြကြတဲ့ ကျောင်းသားအများစုဟာ Ramu နဲ့ Cox’s Bazaar ဒေသတွေက ကျောင်း လာတက်ကြတဲ့ ကျောင်းသားတွေဖြစ်တယ်လို့ ဘင်္ဂလားဒေ့ရ်ှအခြေစိုက် The Daily Star သတင်းဌာနက ၀ါရင့်သတင်းထောက် Abdul Karam Azad က ဗွီအိုအေကို ပြောပြပါတယ်။

“သူပြောသွားတာကတော့ - ဒီမနက်ပဲ Ramu နဲ့ Cox’s Bazaar ဒေသက ကျောင်းသားတွေဟာ တက္ကသိုလ် ကျောင်းဝင်းအတွင်းမှာပဲ ချီတက် ဆန္ဒပြခဲ့ကြတာပါ-တဲ့။ သူတို့က အကြမ်းဖက် တိုက်ခိုက် မှုတွေ ပြုလုပ်ခဲ့သူတွေကို ချက်ချင်း ဖမ်းဆီး အရေးယူဖို့၊ အိုးအိမ်ပျက်စီး ဆုံးရှုံးသွားသူတွေ အတွက် ထိုက်တန်တဲ့ လျော်ကြေးပေးဖို့တွေကို တောင်းဆိုခဲ့ကြပါတယ်-လို့ ပြောသွားတာပါ။”

ဒီဆန္ဒပြပွဲကို သတင်းထောက် ဘာသာရပ်ကို သင်ကြားနေကြတဲ့ တခြား ကျောင်းသား အတော် များများလည်း ပူးပေါင်း ပါဝင်ခဲ့တယ်လို့ ဆိုပါတယ်။

တချိန်တည်းမှာပဲ ဘင်္ဂလားဒေ့ရ်ှနိုင်ငံက လက်ရှိအာဏာရပါတီဖြစ်တဲ့ Awami League ပါတီ ရဲ့ ကျောင်းသားလူငယ်အဖွဲ့ကလည်း အလားတူ တောင်းဆိုချက်တွေနဲ့တူ သီးခြား ချီတက် ဆန္ဒပြခဲ့ကြတယ်လို့ Abdul Karam Azad က ပြောပါတယ်။

အစိုးရအနေနဲ့ ဒီကိစ္စမှာ အဓိက တာဝန်ရှိသူတွေလို့ သံသယ ဖြစ်သူတွေအထဲ ရိုဟင်ဂျာတွေလည်း ပါတယ်လို့ Abdul Karam Azad က ဆက်ပြောပြပါတယ်။

သူပြောသွားတာကတော့- “  ဒီကိစ္စအတွက် စုံစမ်းစစ်ဆေးရေးတွေ ပြုလုပ်နေတဲ့ အစိုးရအရာရှိတွေက ဘင်္ဂလားဒေ့ရ်ှနိုင်ငံထဲမှာ တရားမ၀င် လာရောက် နေထိုင်နေကြတဲ့ ရိုဟင်ဂျာတွေရဲ့ လက်ချက်ဖြစ်နိုင် တယ်ဆိုပြီး သံသယ ရှိနေကြပါတယ်- တဲ့။ အစိုးရအနေနဲ့ မြန်မာနိုင်ငံ၊ ရခိုင်ပြည် နယ်အတွင်းမှာ ဖြစ်ခဲ့ တဲ့ ပဋိပက္ခတွေလို အဖြစ်မခံနိုင်ဘူးဆိုတာကို ပထမဆုံး အကြိမ်ပြသလိုက်တာလည်း ဖြစ်တယ် - လို့ ပြောသွားတာပါ။ ဘင်္ဂလားဒေ့ရ်ှနိုင်ငံအတွင်းမှာ ရှိနေကြတဲ့ ရိုဟင်ဂျာတွေက သူတို့အပေါ်ထားတဲ့ ဘင်္ဂလားဒေ့ရ်ှအစိုးရရဲ့ မူဝါဒတွေကို သဘောမကျတဲ့အတွက် အခုလို အကြမ်းဖက် ဆူပူမှုတွေဖြစ်အောင် ဖန်တီး လုပ်ဆောင်တဖြစ်နိုင်တယ်ဆိုပြီး အစိုးရ အရာရှိတွေက သံသယ ရှိနေကြတာပါ- လို့ ပြောသွားတာပါ။ ”

ဒါပေမယ့် ဘင်္ဂလားဒေ့ရ်ှအစိုးရဘက်က အခုလို တဘက်သတ် ပြောဆိုနေတာတွေဟာ မဟုတ် မှန်ကြောင်းနဲ့ သူတို့ ရိုဟင်ဂျာတွေအနေနဲ့ သူတပါး နိုင်ငံအတွင်းမှာ ခိုလှုံနေထိုင်တဲ့သူတွေဖြစ်တဲ့ အတွက် ဒီလိုကိစ္စမျိုးတွေကို လုပ်ဆောင်ခြင်း မရှိဘူးလို့ မလေးရှားအခြေစိုက် ရိုဟင်ဂျာ လူ့အခွင့် အရေးအဖွဲ့က ဥက္ကဋ္ဌ Zafar Ahmad bin Abdul Ghani က ပြောပါတယ်။

“ဒီ ရိုဟင်ဂျာတွေဟာ ကျနော်တို့ နိုင်ငံနဲ့ပတ်သက်ပြီးတော့ သူတို့ ထွက်ပြေးခိုလှုံနေတယ်၊ ဒုက္ခသည် အနေနဲ့ နေ နေတယ်။ ဒီ ရိုဟင်ဂျာတွေဟာ တချို့ဘာသာကို သွားပြီးတော့ နှိပ်စက်ဖို့ ရိုဟင်ဂျာတွေ စိတ်ထဲမှာ လုံးဝ မရှိဘူး၊ အခုကိစ္စက ကျနော်တို့လူမျိုးနဲ့ ဘာမှမဆိုင်ဘူး၊ ဒီရိုဟင်ဂျာတွေ မပါဘူး။ ဘင်္ဂလားဒေ့ရှ် အစိုးရနဲ့ဆိုင်တယ်၊ ဘင်္ဂလားဒေ့ရ်ှပြည်သူတွေနဲ့ပဲ ဆိုင်တယ်။ ကျနော်တို့လူတွေကတော့ ဘာမှ မပါဘူး။”

အစ္စလာမ်ဘာသာဝင်တွေ အထွဋ်အမြတ်ထားတဲ့ ကိုရမ်ကျမ်းစာအုပ်ကို မီးရှို့ထားတဲ့ ဓာတ်ပုံကို Facebook အင်တာနက် စာမျက်နှာမှာ ဖော်ပြလိုက်တဲ့အတွက် အခုလို အကြမ်းဖက် တိုက်ခိုက် မှုတွေ ပြုလုပ်ခဲ့တာလို့ ဒီအထဲမှာ ပါတဲ့သူတွေက ပြောတာကို ကိုးကားပြီး ဘင်္ဂလားဒေ့ရှ် သတင်းစာ တချို့မှာ ဖော်ပြခဲ့ကြတာပါ။

လက်ရှိအခြေအနေမှာ အကြမ်းဖက် တိုက်ခိုက်မှုတွေ ဖြစ်ပွားခဲ့တဲ့ ဒေသတွေမှာ ပုဒ်မ ၁၄၄ ညမ ထွက်ရအမိန့်ထုတ်ထားပြီး အခြေအနေတွေဟာ ဒီကနေ့အထိ တည်ငြိမ် အေးချမ်းမှု ရှိနေပေမယ့် Ramu မြို့ ရဲစခန်းက စခန်းမှူး ရာထူးက နှုတ်ထွက်သွားတယ်လို့ Abdul Karam Azad က ပြောပါတယ်။

သူပြောသွားတာကတော့ - “Ramu မြို့က အခြေအနေတွေဟာ တည်ငြိမ် အေးချမ်းနေပြီး အကြမ်းဖက် တိုက်ခိုက်မှုမှာ ပါဝင်ခဲ့သူတွေကို အာဏာပိုင် တွေက ဖမ်းဆီး အရေးယူနိုင်ဖို့ ကြိုးပမ်းနေပါတယ် - တဲ့။ ဒါပေမယ့် Ramu မြို့ ရဲစခန်းကို ကြီးကြပ် ကွပ်ကဲရတဲ့ အရာရှိကတော့ ဒီကနေ့ပဲ ရာထူးကနေ နှုတ်ထွက်သွားပါတယ် - လို့ ပြောသွားတာပါ။”

အခုချိန်ထိတော့ ဒီ အကြမ်းဖက် တိုက်ခိုက်မှုမှာ ပါဝင်တယ်လို့ သံသယရှိသူ ၁၆၆ ဦးကို ဘင်္ဂလာ ရဲအဖွဲ့က ဖမ်းဆီးထားပြီး ဖြစ်တယ်လို့ ပြည်ထဲရေးဝန်ကြီး Muhiuddin Khan Alamgir က တနင်္လာနေ့မှာ ပြောကြားခဲ့ပါတယ်။

Ramu ခေါ် ပန်းဝါမြို့မှာ ပြုလုပ်ခဲ့တဲ့ အကြမ်းဖက် တိုက်ခိုက်မှုတွေကြောင့် နှစ်ပေါင်း ရာနဲ့ချီပြီး တည်ရှိနေခဲ့တဲ့ ဘုန်းတော်ကြီးကျောင်းတွေအပါအ၀င် ကျောင်းပေါင်း ၂၂ ကျောင်းလောက်နဲ့ တန်ဖိုးမဖြတ်နိုင်တဲ့ ဘုရားဆင်းတုတော်တွေလည်း ပျက်စီး ဆုံးရှုံးခဲ့တယ်လို့ ဒေသခံတွေ က ပြောပါတယ်။

ပြီးခဲ့တဲ့ စနေနေ့ညမှာ အကြမ်းဖက် တိုက်ခိုက်မှုတွေ ဖြစ်ပွားပြီး နောက်တနေ့ တနင်္ဂနွေနေ့မနက်မှာ ဘင်္ဂလားဒေ့ရှ် ပြည်ထဲရေးဝန်ကြီးကိုယ်တိုင် အခင်းဖြစ်ပွားရာကို သွားရောက်ခဲ့တာပါ။ ဒီတိုက်ခိုက်မှုကြောင့် အစ္စလာမ်ဘာသာကိုးကွယ်သူ သက်ကြီး ရွယ်အိုနှစ်ဦးလည်း သေဆုံးခဲ့ပြီး လူအတော်များများလည်း ထိခိုက် ဒဏ်ရာရခဲ့ကြတာ ဖြစ်ပါတယ်ခင်ဗျား။

ငြိမ်းချမ်းရေးလှုပ်ရှားသူတွေအပေါ် စွဲချက်တွေ ရုပ်သိမ်းဖို့ HRW တိုက်တွန်း

မြန်မာအစိုးရအနေနဲ့ ပြုပြင်ပြောင်းလဲရေးတွေ လုပ်နေချိန်မှာ မကြာခင်က ငြိမ်းချမ်းရေးအတွက် ချီတက် ဆန္ဒပြသူတွေကို အရေးမယူသင့်ဘူးလို့ နိုင်ငံတကာ လူ့အခွင့်အရေး အဖွဲ့တွေက တိုက်တွန်း လိုက်ပါတယ်။ စက်တင်ဘာလ ၂၆ ရက်နေ့မှာ ကျရောက်ခဲ့တဲ့ နိုင်ငံတကာ ငြိမ်းချမ်းရေးနေ့ ဆန္ဒပြ ပွဲတွေမှာ ပါဝင်ခဲ့သူ ၁၃ ဦးကို မြန်မာအစိုးရကနေ တရားစွဲဆိုထား တာကို ပြန်ရုပ်သိမ်းသင့်တယ်လို့ အမေရိကန်အခြေစိုက် လူ့အခွင့်အရေး စောင့်ကြည့်ရေးအဖွဲ့ဖြစ်တဲ့ Human Rights Watch က တောင်းဆိုလိုက်တာ ဖြစ်ပါတယ်။ အပြည့်အစုံကို ကိုဝင်းမင်းက တင်ပြပေးထားပါတယ်။

ပြီးခဲ့တဲ့ နှစ်ပတ်က ကချင်ပြည်နယ်ငြိမ်းချမ်းရေးအတွက် ရန်ကုန်မှာ ငြိမ်းချမ်းစွာ ချီတက် တောင်းဆို ဆန္ဒပြပွဲမှာ ဦးဆောင် စီစဉ်ခဲ့သူနှစ်ဦးကို မြန်မာဒေသခံ အာဏာပိုင်တွေက တရားစွဲဆိုခဲ့တဲ့အပေါ် Human Rights Watch လူ့အခွင့်အရေး စောင့်ကြည့်ရေးအဖွဲ့က ပြန်ရုပ်သိမ်းပေးဖို့ မနေ့က ကြေညာ ချက် ထုတ်ပြီး တောင်းဆိုလိုက်ပါတယ်။ လူ့အခွင့်အရေးအဖွဲ့ရဲ့ မြန်မာနိုင်ငံဆိုင်ရာ သုတေသီ ဒေးဗစ် မက်သီယိုဆန် - က ဒီတရားစွဲဆိုချက်ဟာ တရားမမျှတတဲ့အတွက် အခုလို တောင်းဆိုရတာဖြစ်တယ် လို့ ထောက်ပြလိုက်ပါတယ်။

“ဒီလို တရားစွဲမှုတွေဟာ တရားမျှတမှု တကယ့်ကို ရှိတယ်လို့ ကျနော်တို့ မထင်ပါဘူး။ ဒါကြောင့်မို့ ဒီစွဲဆိုချက်တွေကို ပြန်ပြီးတော့ ရုပ်သိမ်းပေးသင့်ပါတယ်။ ဘာကြောင့်လဲဆိုတော့ ဖြစ်ခဲ့တဲ့ ဆန္ဒပြပွဲက ငြိမ်းငြိမ်းချမ်းချမ်းပဲ ဖြစ်ခဲ့တာပါ။ အခုဖြစ်ရပ်က မြန်မာအစိုးရအနေနဲ့ ငြိမ်းချမ်းတဲ့ ဆန္ဒပြပွဲတွေကို ခွင့်ပြုဖို့ စိတ်ပိုင်းဖြတ်ထားခြင်း ရှိမရှိဆိုတာကို စမ်းသပ်လိုက်တာပါပဲ။”

မစ္စတာ မက်သီယာဆဲန်ကပဲ ဒီ ဆန္ဒပြပွဲမှာပါဝင်ခဲ့သူ နောက်ထပ် ၁၁ ဦးဟာလည်း ထပ်မံ တရားစွဲ ခံရမယ့် အခြေအနေမှာ ရှိနေတယ်၊ အခုလို မြန်မာအစိုးရကို နိုင်ငံတကာက အသိအမှတ်ပြုလာချိန်မှာ အထူးသဖြင့် သမ္မတဦးသိန်းစိန်ရဲ့ အမေရိကန် ခရီးစဉ်အပြီးမှာ ဒီလို တရားစွဲဖို့ လုပ်တာ က ပြုပြင်ပြောင်းလဲရေးတွေအပေါ် သံသယဖြစ်စေနိုင်တယ်လို့ ဆက်ပြီး ထောက်ပြပြောဆိုသွားပါတယ်။

“အစိုးရအနေနဲ့က ပြုပြင်ပြောင်းလဲရေးတွေကို တကယ်တန်းသက်ဝင်ယုံကြည်မှုရှိတယ်ဆိုရင် အခုလို ငြိမ်းငြိမ်းချမ်းချမ်း ဆန္ဒပြမှုမျိုးကို ခွင့်ပြုပေးသင့်ပါတယ်။ တရားစွဲဆိုတာမျိုး မလုပ်သင့်ပါဘူး။”

တကယ်တော့ ပြီးခဲ့တဲ့နှစ်ပတ်၊ စက်တင်ဘာ ၂၀ ရက်နေ့က ဆန္ဒပြပွဲကို ဦးဆောင်ခဲ့သူ ကချင် ငြိမ်း ချမ်းရေး ကွန်ယက် အဖွဲ့က ဂျော်ကွန်းနဲ့ မမြစံပယ်ဖြူတို့ကို ရန်ကုန်မြို့မှာရှိတဲ့ ဒဂုံမြို့နယ် တရားရုံးက ပြီးခဲ့တဲ့အပတ် စက်တင်ဘာ ၂၈ ရက်၊ သောကြာနေ့မှာ ခုံရုံးတင် စစ်ဆေးခဲ့ ပါတယ်။ နောက်တပတ် ရုံးချိန်းအတွက်တော့ ရှေ့တပတ် အောက်တိုဘာဆယ်ရက်၊ ဗုဒ္ဓဟူးနေ့ကို သတ်မှတ်ပေးလိုက်တယ်လို့ လူ့အခွင့်အရေး စောင့်ကြည့်ရေးအဖွဲ့က ဆိုပါတယ်။ ဒီဆန္ဒပြခဲ့တဲ့ အဖွဲ့အနေနဲ့ မြန်မာအစိုးရရဲ့ ငြိမ်းချမ်းစွာ ဆန္ဒပြခွင့် ဥပဒေအရ အခုလို ဆန္ဒပြဖို့ လိုအပ်တဲ့ အချက်အလက် အပြည့်အစုံနဲ့ ဆန္ဒပြဖို့ တင်ပြ တောင်းခံခဲ့ပေမဲ့ အစိုးရဘက်က ယာဉ်စည်းကမ်းချိုးဖောက်တာနဲ့ မတည်မငြိမ်ဖြစ်နိုင်တာတွေ ကို အကြောင်းပြပယ်ချခဲ့အပြီးမှာ အခုလို ငြိမ်းငြိမ်းချမ်းချမ်း ဆန္ဒပြခဲ့ကြတာဖြစ်တယ်လို့လည်း ဒီ လူ့အခွင့်အရေး စောင့်ကြည့်ရေးအဖွဲ့ရဲ့ ကြေညာချက်မှာ ဆက်ပြောပါတယ်။

အခုလို တရားစွဲခံထားရသူတွေနဲ့ တရားစွဲခံရနိုင်ခြေရှိသူတွေရဲ့ နောက်ဆုံးအခြေအနေကို သိရဖို့ ဆက်သွယ်ခဲ့ပေမဲ့ ဖုန်းဆက်လို့ မရခဲ့ပါဘူး။ Human Rights Watch အဖွဲ့ရဲ့သုတေသီ မက်သီယာ ဆဲန်ကတော့ ဒီအမှုနဲ့ပတ်သက်ပြီး နိုင်ငံတကာ အသိုင်းအဝိုင်းက ဖိအားပေးဖို့ ဆက်တောင်းဆို သွားမယ်လို့လည်း ဆိုပါတယ်။

“ကျနော်တို့အနေနဲ့ နိုင်ငံတကာအသိုင်းအဝိုင်းကနေ သူတို့ရဲ့အစိုးရတွေနဲ့ အာဏာပိုင်တွေကို ဒီကိစ္စ ဆွေးနွေးရှင်းပြပြီး ဥပဒေတွေကို မျှတအောင်လုပ်ဖို့နဲ့ လွတ်လပ်စွာ စုရုံးခွင့်ကို အခြေခံ လူ့အခွင့်အရေးအဖြစ် သတ်မှတ်ကျင့်သုံးနိုင်ဖို့ မြန်မာ အစိုးရကို တောင်းဆိုပေးရေး တိုက်တွန်း သွားမှာပါ။”

တကယ်တော့ မြန်မာအစိုးရအနေနဲ့ နိုင်ငံရေးအကျဉ်းသားတချို့ ပြန်လွှတ်ပေးတာ အပါအဝင် ပြုပြင်ပြောင်းလဲရေးတွေကို စတင်ဆောင်ရွက်လာချိန်မှာ အမေရိကန်အပါအဝင် အနောက်နိုင်ငံအစိုးရတွေက မြန်မာအစိုးရရဲ့ ပြုပြင် ဆောင်ရွက်မှု တွေကို တစုံတရာ အသိအမှတ်ပြုပြီး ဖိအားပေး ပိတ်ဆို့တာတွေကို တဖြည်းဖြည်း လျှော့ချကာ လူ့အခွင့်အရေး အခြေအနေတွေ ဆက်တိုးတက်လာဖို့အတွက် အပြုသဘော ဆက်ဆံ စွဲဆောင်လာချိန်မှာ ဒီ လူ့အခွင့်အရေးပြဿနာ ကြုံလာရတာ ဖြစ်ပါတယ်ခင်ဗျား။

Obama နဲ့ Romney ဗုဒ္ဓဟူးနေ့ စကားစစ်ထိုးပွဲ အတွက် ပြင်ဆင်

အမေရိကန်သမ္မတ ဘရာ့ခ် အိုဘားမား (Barack Obama) နဲ့ ရီပတ်ဘလီကန်ပါတီ သမ္မတလောင်း မစ်တ် ရွမ်မ်နီ (Mitt Romney) တို့ဟာ ၂၀၁၂ ခုနှစ် သမ္မတရွေးကောက်ပွဲရဲ့ ပထမဆုံးအကြိမ် စကားစစ်ထိုးပွဲအတွက် ဒီကနေ့ အင်္ဂါနေ့မှာ ပြင်ဆင် နေကြပါတယ်။

မစ္စတာရွမ်မ်နီဟာ စကားစစ်ထိုးပွဲအတွက် သူ့ရဲ့မိခင်ပြည်နယ်ဖြစ်တဲ့ မက်ဆာချူးဆက်ပြည်နယ်မှာ ရက်ပေါင်းများစွာ ပြင်ဆင် ခဲ့ပြီးတဲ့နောက် ဗုဒ္ဓဟူးနေ့ စကားစစ်ထိုးပွဲကျင်းပမယ့် ကော်လိုရာဒိုပြည်နယ်၊ ဒန်ဗာမြို့ဆီ တနင်္လာနေ့က ရောက်သွားပါပြီ။ ဒီ စကားစစ်ထိုးပွဲမှာ သူနဲ့ သမ္မတအိုဘားမား ဘယ်သူ အနိုင်ရမလဲဆိုတဲ့ကိစ္စထက် ပိုကြီးမားတဲ့ တစုံတခုရှိပါတယ်လို့ သူ့ကို ထောက်ခံအားပေးသူတွေကို မစ္စတာရွမ်မ်နီက ပြောခဲ့ပါတယ်။

မစ္စတာအိုဘားမားကတော့ တနင်္ဂနွေနေ့ကတည်းက ရောက်နေတဲ့ နီဗားဒါးပြည်နယ်မှာပဲ စကားစစ် ထိုးပွဲအတွက် သူ့ရဲ့ မဲဆွယ် စည်းရုံးရေးဆိုင်ရာ အကြံပေးပုဂ္ဂိုလ်တွေနဲ့ နောက်ထပ်တရက် ဆက်ပြီး ပြင်ဆင်နေပါတယ်။

ဗုဒ္ဓဟူးနေ့ကျရင် ဒန်ဗာတက္ကသိုလ်မှာလုပ်မယ့် စကားစစ်ထိုးပွဲကတော့ စီးပွားရေးနဲ့ ကျန်းမာရေး စောင့်ရှောက်မှုလို ပြည်တွင်း ရေးရာကိစ္စရပ်တွေကို အဓိထားပြီး အခြေအတင် ငြင်းခုန် ပြောဆိုကြမှာပါ။

နိုင်ငံခြားရေးမူဝါဒဆိုင်ရာ ကိစ္စရပ်တွေကတော့ အောက်တိုဘာလ ၁၆ ရက်နဲ့ ၂၂ ရက်နေ့တွေမှာလုပ်မယ့် ဒုတိယနဲ့ တတိယ အကြိမ် စကားစစ်ထိုးပွဲတွေမှာ အခြေအတင် ပြောဆိုကြမှာဖြစ်ပါတယ်။