25.01.2013 နေ့ဖတ်ရန်သတင်များ

by Myanmar Journal on Thursday, January 24, 2013 at 2:26pm ·

ဆက်သွယ်ရေးဝန်ကြီးဟောင်းနဲ့ အရာရှိကြီးတချို့ စစ်ဆေးခံနေရ
မြန်မာနိုင်ငံမှာ မကြာသေးခင်ကမှ ရာထူးက အနားယူသွားတယ် လို့ ကြေညာခဲ့တဲ့ ဆက်သွယ်ရေးဝန်ကြီး ဦးသိန်းထွန်းအပါအ၀င် မြန်မာ ဆက်သွယ်ရေးဝန်ကြီးဌာနက အရာရှိကြီးတစ်ချို့ကို စုံစမ်းမှုတွေစတင်နေပြီလို့ နေပြည်တော်မှာရှိတဲ့ သမ္မတရဲ့ပြောရေးဆိုခွင့်ရှိသူ ပြန်ကြားရေး ဒုဝန်ကြီး ဦးရဲထွဋ်က ဘီဘီစီ အတည်ပြုပြောပါတယ်။

စုံစမ်းဆဲဖြစ်လို့ အသေးစိတ်ကို ထုတ်မပြောပါဘူး။
ဒါပေမဲ့ နေပြည်တော်မှာ ၀န်ကြီးဟောင်းဦးသိန်းထွန်းအပါအ၀င် အရာရှိကြီး ၈ ဦး စစ်ဆေးခံနေရတယ်လို့ မြန်မာဆက်သွယ်ရေး ၀န်ထမ်းတစ်ဦးက ပြောပါတယ်။
မြန်မာဆက်သွယ်ရေး အရာရှိ ကြီးတွေဟာ ပြည်တွင်းက ကုမ္ပဏီတချို့ နဲ့ လာဘ်ပေး လာဘ်ယူမှုတွေရှိခဲ့တယ်၊ တရုပ် နိုင်ငံက မိုဘိုင်းဖုန်းအတွက် ဝယ်တဲ ပစ္စည်းတွေ ဟာ တပ်ဆင်လို့အဆင်မပြေတဲ့ ပစ္စည်းတွေ ဖြစ်နေတယ်လို့ ပြည်တွင်းမှာ သတင်းတွေထွက်နေပြီး အင်တာနက် ဆိုရှယ်မီဒီယာတွေမှာလည်း ဆက်သွယ်ရေး အရာရှိကြီး တစ်ဦးက ဘဏ်ကနေ ငွေအမြောက်အမြား အထုတ်အသွင်းလုပ်တာကို စာရွက်စာတမ်းအထောက်အထားတွေနဲ့ တင်ထားတွေ့ရပါတယ်။
ဒါဟာ ဦးသိန်းစိန် အစိုးရရဲ့ Clean Government သန့်ရှင်းတဲ့ အစိုးရ ဖြစ်အောင်ကြိုးစားမယ်လို့ ကြေညာခဲ့ပြီးတဲ့နောက်မှာ ခုလို ၀န်ကြီးအဆင့်တာဝန်ထမ်းဆောင်ခဲ့ဖူးတဲ့ အရာရှိကြီးအပါအ၀င် အဆင့်မြင့်အရာရှိတွေကို စုံစမ်းစစ်ဆေးမှုတွေလုပ်တာ ပထမဆုံးအကြိမ်ဖြစ်ပါတယ်။

ကြီးထွားလာနေတဲ့ ဆီရီးယား ဒုက္ခသည် ပြဿနာ
ဂျော်ဒန်နိုင်ငံမှာရှိတဲ့ ကုလသမဂ္ဂအရာရှိကြီးတဦးက ဆီရီးယားဒုက္ခသည်ပြဿနာ ကြီးမားလာနေတာကို အလေးထား ဖေါ်ပြပြောဆိုခဲ့ပါတယ်။
ဆီရီးယားဒုက္ခသည် တနေ့ကို သုံးထောင်လောက် နယ်စပ်ဖြတ်ကျော်ဝင်ရောက်လာနေပြီး ဆီရီးယားဒုက္ခသည် ခြောက်သောင်းထက်မနည်း နယ်စပ်ကို ဖြတ်ဖို့ စောင့်နေကြတယ်လို့ ဂျော်ဒန်မှာရှိတဲ့ ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းဆောင်ရွက်ရေးအရာရှိ အန်ဒရူး ဟာပါက ဘီဘီစီကို ပြောပါတယ်။
ဂျော်ဒန်ကို အလုံးအရင်းနဲ့ ဝင်ရောက်ခိုလှုံလာကြတဲ့ ဆီရီးယားဒုက္ခသည်တွေကြောင့် သူတို့ကို အထောက်အပံ့ပေးနိုင်ရေးအတွက် ဂျော်ဒန်နဲ့ ကုလသမဂ္ဂမှာ အကြီးအကျယ် ဝန်ထုတ်ဝန်ပိုး ဖြစ်နေတယ်လို့ ဂျော်ဒန်နိုင်ငံက အဓိက ဒုက္ခသည်စခန်းကို ရောက်နေတဲ့ ဘီဘီစီ သတင်းထောက်က ပြောပါတယ်။
အဲဒီ ဇာတာရီ ဒုက္ခသည်စခန်းမှာ ဒုက္ခသည် ခုနှစ်သောင်းနီးပါး ခိုလှုံနေကြတယ်လို့ ဆိုပါတယ်။

မြန်မာနိုင်ငံမှာ နျူကလီးယား စွမ်းအင်လုပ်ငန်း ပြန်စတော့မလား
မြန်မာအစိုးရအနေနဲ့ နျူကလီးယားကနေ လျှပ်စစ်စွမ်းအင် ထုတ်လုပ်ဖို့ အဆိုကို ဆွေးနွေးဖို့ အမျိုးသားလွှတ်တော်မှာ မနေ့တုန်းက လက်ခံလိုက်ပါတယ်။
နျူကလီးယားကနေ လျှပ်စစ်ထုတ်လုပ်ဖို့အပါအဝင် ကျန်းမာရေးအတွက်ကို အသုံးပြုဖို့အဆိုကို ရန်ကုန်တိုင်း မဲဆန္ဒနယ် အမျိုးသားလွှတ်တော်အမတ် ဒေါက်တာမြင့်ကြည်က တင်သွင်းခဲ့တာဖြစ်ပါတယ်။
မြန်မာနိုင်ငံဟာ အိုင်အေ အီးအေ နိုင်ငံတကာ အဏုမြူစွမ်းအင်ဆိုင်ရာ အဖွဲ့ရဲ့ အဖွဲ့ဝင် ဖြစ်တဲ့အတွက် အိုင်အေအီးအေရဲ့ ထိန်းကြောင်းအောက်ကနေ အနာဂတ်အတွက် ပြင်ဆင် လုပ်ဆောင်ဖို့ တိုက်တွန်းခဲ့တာလို့ အမျိုးသားလွှတ်တော်အမတ် ဒေါက်တာမြင့်ကြည်က ပြောပါတယ်။
နောင်အနာဂတ်မှာ စီးပွားရေးတိုးတက်လာတာနဲ့အမျှ စွမ်းအင်လိုအပ်ချက်တွေ ပိုများလာမှာ ဖြစ်တဲ့အတွက် ကြိုတင်ပြင်ဆင်ဖို့ လိုတယ်လို့ ဆိုပါတယ်။
ပြီးခဲ့တဲ့ စစ်အစိုးရလက်ထက်တုန်းကတော့ တပ်မတော်သားတချို့ ရုရှားနဲ့မြောက်ကိုးရီးယား နိုင်ငံမှာ နျူကလီးယား ပညာတော်သင်တွေလွှတ်ခဲ့တာတွေ ရှိခဲ့ပါတယ်။
ပြီးတော့ ရုရှားနိုင်ငံရဲ့ ကူညီမှုနဲ့ နျူကလီးယား လျှပ်စစ်ဓါတ်ပေါင်းဖို လုပ်ဖို့ ကြိုးစားခဲ့ဘူးပါတယ်။
နောက်ပိုင်းမှာ နိုင်ငံရေးဖိအားပေးခံရမှုများလာတာကြောင့် အစိုးရက နျူကလီးယား စီမံကိန်းကို ရပ်ဆိုင်းထားလိုက်ပြီးလို့ ပြောကြားခဲ့ပါတယ်။

ကလီးယား စမ်းသပ်မှု ထပ်လုပ်မယ်လို့ မြောက်ကိုးရီးယားပြော
ဒီဇင်ဘာလ ၁၂ ရက်နေ့က ရော့ကက်ဒုံးကျည် ပစ်လွှတ်ခဲ့ပြီး လုံခြုံရေးကောင်စီက ထပ်ပိတ်ဆို့ အရေးယူ
ကုလသမဂ္ဂရဲ့ တင်းတင်းကြပ်ကြပ် ပိတ်ဆို့အရေးယူမှုတွေ လုပ်လာတဲ့အပေါ် တုန့်ပြန်တဲ့အနေနဲ့ မြောက်ကိုးရီးယားက တတိယအကြိမ် နျူကလီးယား စမ်းသပ်မှုနဲ့ နောက်ထပ် တာဝေးပစ် ရော့ကက်ဒုံးကျည် စမ်းသပ်ပစ်လွှတ်မှုတွေ လုပ်မယ်လို့ ပြောဆိုလိုက်ပါတယ်။
သူတို့ရဲ့ စမ်းသပ်မှုတွေကို ပြုလုပ်ရာမှာ အမေရိကန်ပြည်ထောင်စုကို စိတ်မှန်းနဲ့ ရည်ရွယ်ပြီး လုပ်ခဲ့တာ ဖြစ်တယ်လို့ မြောက်ကိုးရီးယား အမျိုးသား ကာကွယ်ရေး ကော်မရှင်က ပြောပါတယ်။
ပြီးခဲ့တဲ့လ မြောက်ကိုးရီးယားတို့က တာဝေးပစ် ရော့ကက်ဒုံးကျည် ပစ်လွှတ်စမ်းသပ်ခဲ့တာကို တုန့်ပြန်တဲ့အနေနဲ့ မြောက်ကိုးရီးယား ကုမ္ပဏီတွေနဲ့ အေဂျင်စီတွေအပေါ် ကုလသမဂ္ဂ လုံခြုံရေးကောင်စီက နောက်ထပ် ပိတ်ဆို့ အရေးယူမှုတွေ လုပ်ခဲ့တာ ဖြစ်ပါတယ်။
နျူးကလီးယားစမ်းသပ်မှုလုပ်ရင် မှားလိမ့်မယ်လို့ အမေရိကန်ပြည်ထောင်စုကပြောခဲ့ပြီး တရုတ်တို့ကတော့ အားလုံးကို သည်းခံထိန်းချုပ်ကြဖို့ တင်းမာမှုတိုးပွားစေမယ့် အပြုအမူတွေ မလုပ်ကြဖို့ တိုက်တွန်းလိုက်ပါတယ်။

ခရိုနီတွေ ကျောက်မျက် လုပ်ငန်းမှာ မရှိရင် ပိတ်ဆို့မှုတွေ လျော့မလား
အမေရိကန်က မြန်မာ့ ကျောက်မျက် တင်သွင်းခွင့် ပိတ် ဆို့ ထား
မြန်မာ နိုင်ငံရဲ့ အကြီးဆုံး စီးပွားရေး လုပ်ငန်းရှင်ကြီးတွေ ထဲက တစ်ယောက် ဖြစ်တဲ့ ဦးတေဇ ဟာ မြန်မာ နိုင်ငံ ကျောက်မျက် ရတနာ လုပ်ငန်းရှင်များ အသင်း ဥက္ကဌ အဖြစ် ကနေ နှုတ်ထွက်လွှာ တင်သွင်း လိုက်တဲ့ အတွက် မြန်မာ့ ကျောက်မျက် ရတနာတွေ အပေါ် အမေရိကန်ရဲ့ ပိတ်ဆို့ အရေးယူမှုတွေ ဖြေလျှော့ ပေးဖို့ နောက်တဆင့် နီးလာပြီလို့ ကျောက်မျက် လောကသားတွေ မျှော်လင့် နေကြ ပါတယ်။
အမေရိကန် အစိုးရ ဘက်က ပိတ်ပင်ထား မှု ဖြေလျှော့ ဖို့ရာ မြန်မာ နိုင်ငံ ကျောက်မျက် ရတနာ အသင်းမှာ အဓိက တာဝန် ယူထား ကြတဲ့ ခရိုနီတွေ၊ တနည်းအားဖြင့် အရင် အစိုးရကို အကြောင်းပြုပြီး ချမ်းသာ လာသူတွေ နှုတ်ထွက် သင့်တယ်လို့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေး ပါတီက အမျိုးသား လွှတ်တော် ကိုယ်စားလှယ် ဦးလှဆွေ က အဆို တင်သွင်းပြီး ရက်ပိုင်း အကြာမှာ အသင်း ဥက္ကဌ ဦးတေဇ နှုတ်ထွက် ခဲ့တာဖြစ်ပါတယ်။
အမျိုးသား လွှတ်တော်မှာ အဆို တင်သွင်းခဲ့တဲ့ သတ္တုနဲ့ သယံဇာတ ရေးရာ ကော်မီတီ အတွင်းရေးမှူး ဦးလှဆွေ ကတော့ ဦးတေဇ တစ်ယောက်တည်း နှုတ်ထွက်ရုံနဲ့ မလုံလောက်ဘဲ နောက်ထပ် သူ့လိုလူတွေ နှုတ်ထွက်ဖို့ လိုသေးတယ်လို့ ပြောပါတယ်။
လောလောဆယ် ကျောက်တွင်း လုပ်ငန်း လုပ်နေ ကြသူ တွေဟာ ကိုယ်တိုင် လုပ်ခွင့် ရထားကြသူ တွေမဟုတ်ဘဲ တဆင့် လုပ်ကိုင်ခွင့် ဝယ်ထားပြီး လုပ်ကိုင် သူတွေ ဖြစ်နေတယ်၊ လုပ်ခွင့် လိုင်စင် ရထားကြသူတွေ ထဲမှာ မူးယစ် ဆေးဝါးမှုနဲ့ နာမည်ပျက် နေသူ တွေလည်း ပါတယ် လို့ ဦးလှဆွေက ပြောပါတယ်။
ဒါကြောင့် ငွေကြေး ခဝါချလို့ အလွယ်ဆုံး ဖြစ်တဲ့ ကျောက်စိမ်း တူးဖော်ခွင့် လုပ်ငန်းကို အဲဒီ လူတွေ လုပ်ခွင့် ချမပေး သင့်ဘူးလို့ လွှတ်တော်မှာ သူ အဆို တင်ခဲ့ ကြောင်းလည်း ဦးလှဆွေက ပြောပါတယ်။
ဦးတေဇ ဟာဧက ၄၀၀ လောက်ကျယ်တဲ့ ကျောက်စိမ်းတွင်းကို ပိုင်ဆိုင် ထားသူ ဖြစ်ပါတယ်။ မြန်မာ နိုင်ငံမှာ ဧက ထောင်နဲ့ ချီတဲ့ ကျောက်စိမ်းတွင်းတွေ အပါ အဝင် တွင်းပေါင်း ၇၀၀ လောက် ရှိတယ်လို့ လည်း ဦးလှဆွေက ပြောပါတယ်။
ဒါကြောင့် ဦးတေဇ ကျောက်မျက် အသင်း ဥက္ကဌ အဖြစ်က နှုတ်ထွက် ယုံနဲ့ အမေရိကန် အရေးယူမှုက အဆုံး သတ်မယ့်ပုံ မရှိ ပေမဲ့ အဲဒီလို အဆုံးသတ်ဖို့ လမ်းတော့ ပွင့်သွား နိုင်တယ်လို့ ကျောက်မျက် လုပ်ငန်းရှင်တွေက မျှော်လင့် နေကြ ပါတယ်။
ကျောက်မျက် ရတနာ လုပ်ကွက် တွေကို အစိုးရနဲ့ ငြိမ်းချမ်းရေး ယူထားတဲ့ အဖွဲ့တွေ၊ တရုတ် လူမျိုးတွေကို လုပ်ခွင့်ပေးထားတဲ့ အတွက် လုပ်ငန်းရှင် အသေးစား တွေ နစ်နာ နေကြရတယ်လို့ လုပ်ငန်းရှင် တစ်ယောက်က ပြော ပါတယ်။
ဦးတေဇ အသင်း ဥက္ကဌဖြစ်လာပြီး ကတည်းက ကျောက်မျက် လုပ်ငန်းရှင်တိုင်း အသင်းဝင်ကြေး တသိန်း၊ နှစ်စဉ်ကြေး သုံးသောင်း ပေးပြီး မဖြစ်မနေ အသင်း ဝင်ရတာ တွေလည်း ရှိပါတယ်၊ အခုတော့ ဒါတွေ ပြောင်းလဲ သွားမယ်လို့ မျှော်လင့်ကြောင်း အဲဒီ လုပ်ငန်းရှင်က ဆိုပါတယ်။

ပြည်ခိုင်ဖြိုးနဲ့ တပ်ကိုယ်စားလှယ်တွေ ကချင်အရေး အင်အားသုံးဖို့ လိုလား

ပြည်သူ့လွှတ်တော် အစည်းအဝေးခမ်းမအတွင်း တပ်မတော်သား ကိုယ်စားလှယ်များ တက်ရောက်နေစဉ်။ (ဇူလိုင် ၁၇၊ ၂၀၁၂)
မြန်မာနိုင်ငံမြောက်ပိုင်း ကချင်ပြည်နယ်မှာ လက်နက်ကိုင် ပဋိပက္ခတွေ ဖြစ်ပွားနေတာတွေ အဆုံးသတ်စေရေး ရည်ရွယ်ပြီးတော့ နေပြည်တော်မှာ ကျင်းပတဲ့ လွှတ်တော်တွင်း ဒီကနေ့ ဆွေးနွေးကြပါတယ်။ တိုင်းရင်းသား ကိုယ်စားလှယ်တွေကတော့ မြန်မာအစိုးရတပ်တွေနဲ့ ကချင်တိုင်းရင်းသား လက်နက်ကိုင်တွေကြားမှာ တိုက်ခိုက်မှုတွေကို နိုင်ငံရေးအရ အဖြေရှာကြဖို့ အကြံပြုဆွေးနွေးခဲ့ကြပေမဲ့ အာဏာရပါတီနဲ့ စစ်တပ်ကိုယ်စားလှယ်တွေကတော့ အင်အားသုံး နှိမ်နင်းဖို့ လိုလားနေကြတယ်လို့ လွှတ်တော်ကိုယ်စားလှယ်တွေက ပြောပါတယ်။ ဒီကနေ့ လွှတ်တော်ထဲမှာ အချေအတင် ဆွေးနွေးခဲ့တာတွေကိုတော့ ကိုအောင်လွင်ဦး က ပြောပြပေးမှာပါ။

မြန်မာအစိုးရတပ်ဖွဲ့တွေနဲ့ ကချင်လွတ်လပ်ရေးအဖွဲ့ (KIO) တို့ကြား တိုက်ခိုက်မှုတွေ နေ့စဉ်ရက်ဆက် ဆိုသလို ဖြစ်ပွားနေတာတွေ အဆုံးသတ်စေရေး ရည်ရွယ်ပြီး အမျိုးသားလွှတ်တော်မှာ တင်သွင်းတဲ့ အဆိုတရပ်ကို ဆွေးနွေးကြတာပါ။ ကချင်တိုင်းရင်းသား ကိုယ်စားလှယ် ဦးခက်ထိန်နန် တင်သွင်းလာတဲ့ အဆိုကို တိုင်းရင်းသား လွှတ်တော် ကိုယ်စားလှယ်တွေ ဆွေးနွေးကြ ရာမှာတော့ မြန်မာနိုင်ငံမှာ လွတ်လပ်ရေးရပြီးနောက် ကြုံခဲ့ရတဲ့ လက်နက်ကိုင် ပဋိပက္ခတွေဟာ အစိုးရ အဆက်ဆက် လက်ထက် ပြေလည်အောင် မဖြေရှင်းနိုင်ခဲ့တဲ့ နိုင်ငံရေး အကျိုးဆက်အဖြစ် ဆွေးနွေးခဲ့ကြတာပါ။ ကချင်ပြည်နယ်က အခုနောက်ဆုံး ပဋိပက္ခတွေ အဆုံးသတ်ဖို့ ဆိုရင်လည်း တွေ့ဆုံဆွေးနွေးတဲ့ နည်းလမ်းကသာ အဖြေရနိုင်မယ်လို့ တိုင်းရင်းသား ကိုယ်စားလှယ်တွေက ယုံကြည်ကြတဲ့အကြောင်း ကိုယ်တိုင် ၀င်ရောက် ဆွေးနွေးခဲ့တဲ့ ရခိုင်တိုင်းရင်းသားများ တိုးတက်ရေးပါတီ ဥက္ကဌ ဒေါက်တာအေးမောင် က ပြောပါတယ်။

“အဓိကကတော့ ပြည်တွင်းစစ်ကို ရပ်စေချင်တာပေါ့၊ ဒီပြဿနာကို ဖြေရှင်းဖို့ တစ်ခုတည်းသော နည်းလမ်းဟာ တွေ့ဆုံညှိနှိုင်းဖြေရှင်းနည်းပဲ ဆိုတဲ့သဘောကို ဆွေးနွေးကြပါတယ်။ ဒါကျနော်တို့ တိုင်းရင်းသားလွှတ်တော်ကိုယ်စားလှယ်တွေက ဆွေးနွေးကြတယ်။ တော်တော်များများ အဲ့ဒီ့အမြင်နဲ့ပါ။ နောက်တော့ ပြည်ခိုင်ဖြိုးပါတီဘက်က တချို့၊ တပ်မတော် အငြိမ်းစားပုဂ္ဂိုလ်တွေကတော့ဖြင့် အပြုတ်ချေမှုန်းရေးဆိုတဲ့ ဦးတည်ချက်ဘက်ကို သွားတယ်လို့ယူဆပါတယ်။ ကျနော်တို့ဆွေးနွေးတဲ့အခါမှာကျတော့ ဒီနယ်မြေကို ခဏတာ အောင်လံစိုက်ပြီးခါမှ သိမ်းရုံနဲ့ ထာဝရ ငြိမ်းချမ်းရေးကို မရနိုင်ဘူး။ နယ်မြေစိုးမိုးရေးကို မရနိုင်ဘူး ဆိုတာ ကျနော်တို့ ဆွေးနွေးခဲ့ပါတယ်။ ထာဝရ ငြိမ်းချမ်းရေးကို ရဖို့အတွက် ကျနော်တို့ နိုင်ငံရေးအားဖြင့် တွေ့ဆုံဆွေးနွေးရေးဆိုတဲ့ ဒေါ်အောင်ဆန်းစုကြည်ပြောတဲ့ တွေ့ဆုံဆွေးနွေး အဖြေရှာတဲ့ ယဉ်ကျေးမှု တည်ဆောက်ဖို့ လိုတယ်ဆိုတဲ့ အဲ့တာလေးနဲ့ ကျနော်တို့ ဆွေးနွေးပါတယ်။”

၁၇ နှစ်ကြာ အပစ်အခတ် ရပ်စဲထားတာတွေ ၂၀၁၁ နှစ်လည်ပိုင်းမှာပဲ ပျက်ပြားခဲ့ပြီးတဲ့နောက် လက်နက်ကိုင် ပဋိပက္ခတွေ ပြန်လည် ဖြစ်ပွားနေတာတွေဟာ ဒီနှစ်ဆန်းပိုင်းမှာတော့ တိုက်ပွဲတွေ ပိုမိုပြင်းထန်လာခဲ့တာပါ။ မြန်မာအာဏာပိုင်တွေ ကတော့ အစိုးရရဲ့ စစ်ကြောင်းတွေကို ကချင်လက်နက်ကိုင် တပ်တွေ တိုက်ခိုက်မှုတွေ လုပ်ခဲ့တာကြောင့် တုန့်ပြန်တဲ့ အနေနဲ့ ဒေသတွင်း ရှင်းလင်းတဲ့ စစ်ဆင်ရေးတွေ လုပ်ခဲ့တာလို့ ပြောပါတယ်။ စစ်ရေးရည်မှန်းချက်တွေ ရရှိပြီး ဖြစ်တဲ့အတွက်လည်း ပြီးခဲ့တဲ့ စနေနေ့ကစပြီး ထိုးစစ်တွေ ရပ်မယ်လို့ ကြေညာထားတာပါ။

ဒါပေမဲ့လည်း ကြေညာချက် ထုတ်ပြန်ပြီး နောက်ပိုင်းအထိ ကချင်လက်နက်ကိုင်တွေက အစိုးရ တပ်ဖွဲ့တွေနဲ့ အရပ်သားတွေကို တိုက်ခိုက်မှုတွေ ရှိတယ် ဆိုပြီးတော့လည်း ပြောဆိုနေတာ ဖြစ်ပါတယ်။ ကြာသပတေးနေ့က လွှတ်တော်တွင်း ဆွေးနွေးစဉ်မှာလည်း စစ်တပ် ကိုယ်စားလှယ်တွေနဲ့ စစ်မှုထမ်းဟောင်း ကိုယ်စားလှယ်တွေက အလားတူ စွပ်စွဲချက်တွေနဲ့အတူ ပြဿနာကို အင်အားသုံး ဖြေရှင်းဖို့ ဆွေးနွေးခဲ့ကြတယ်လို့ ဒေါက်တာအေးမောင် ကပြောပါတယ်။

“တပ်မတော်သားတွေဖက်က ဆွေးနွေးတဲ့အခါကျတော့ ပြည်တွင်းဒီစစ်ပွဲနဲ့ပတ်သက်လို့ ကေအိုင်အေ၊ ကေအိုင်အိုတို့ရဲ့ စတင်ပစ်ခတ်မှုတွေ၊ မိုင်းခွဲမှုတွေ၊ အဲ့တာမျိုးတွေကို ချပြပြီးကာမှ ရှင်းတာပေါ့ဗျာ။ တိုင်းရင်းသားတွေဖက်ကတော့ ဟိုဘက်၊ ဒီဘက် အကြောင်းပြနိုင်မှာပဲ စစ်ပွဲဆိုတာ၊ နော် စစ်ပွဲဆိုတာ  အကြောင်းရင်းကို ရှာဖို့လိုတယ်။ အဲ့ဒီ့နည်းဟာ နိုင်ငံရေးအရ ဖြေရှင်းနည်းပဲ။ တကယ်တမ်း ကျနော်တို့ တိုင်းပြည်ကိုသာ စစ်မှန်တဲ့ ပြည်ထောင်စုအဖြစ် တည်ဆောက်မယ်ဆိုရင် နှစ်ပေါင်း ၆၀ကျော် မငြိမ်းချမ်းသေးတာ၊ တိုင်းရင်းသားအချင်းချင်း တိုက်ကြခိုက်ကြ ဖြစ်ကြတာ၊ အမှန်တော့ ကျနော်တို့ပြန်လည်သုံးသပ်ဖို့ လိုပြီ။ ကျနော်တို့ တွေ့ဆုံညှိနှိုင်း အဖြေရှာပြီးကာမှ ပြည်ထောင်စုကို တည်ဆောက်ဖို့ လိုပြီဆိုတာကို ကျနော်တို့ကို ပြန် တပ်လှန့်လိုက်တဲ့ သဘောပါပဲလို့ ဆွေးနွေးကြပါတယ်။ အကုန်လုံး ငြိမ်းချမ်းရေးကို ရစေချင်တယ်။ ဦးခတ်ထိန်နန်အဆိုတင်သွင်းတဲ့ အချက်သုံးချက်လုံးကို တိုင်းရင်းသားလွှတ်တော်အမတ်တွေက ထောက်ခံခဲ့ကြပါတယ်။”

ကချင်ပြည်နယ် ပဋိပက္ခနဲ့ ပတ်သက်လို့ အမျိုးသား လွှတ်တော်မှာ သောကြာနေ့အထိ ဆက်လက် ဆွေးနွေးဦးမှာပါ။ မြန်မာအစိုးရ ကတော့ တိုက်ခိုက်မှုတွေ ရပ်စဲပြီး KIO နဲ့ ဆွေးနွေးဖို့ အသင့်ရှိနေတဲ့ အကြောင်း ကမ်းလှမ်းထားပေမဲ့ တိုက်ပွဲတွေ ဆက်လက် ဖြစ်ပွားနေဆဲမို့ လက်တွေ့မှာ ဆွေးနွေးရေး မဖြစ်နိုင်သလောက် အခြေအနေမျိုးမှာ ရောက်နေတယ်လို့ KIO က ပြောဆိုထားတာပါ။ ဒီလိုပဲ တွေ့ဆုံရမယ် ဆိုရင်လည်း တဖွဲ့ချင်း အနေနဲ့ မဟုတ်ပဲ တိုင်းရင်းသား လက်နက်ကိုင် မဟာမိတ် အဖွဲ့တခုဖြစ်တဲ့ ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ (UNFC) နဲ့အတူ တွေ့ဆုံဖို့ လိုလားကြောင်းလည်း ပြောဆိုထားတာ ဖြစ်ပါတယ်။

အမေရိကန်သံရုံး ထုတ်ပြန်ချက် သမ္မတပြောခွင့်ရချေပ

ကချင်တိုက်ပွဲအတွင်း ကချင်လွတ်မြောက်ရေးတပ်က သိမ်းလိုက်တဲ့ မြန်မာစစ်တပ်ဘက်က စစ်လက်နက် ပစ္စည်းများကို တွေ့ရစဉ်။ (ဇန်နဝါရီ ၇၊ ၂၀၁၃)
ကချင်ပြည်နယ်ထဲမှာ တိုက်ခိုက်မှုတွေ ဆက်ပြီးဖြစ်ပွါးနေတဲ့အတွက် အမေရိကန်ပြည်ထောင်စုက အထူးစိုးရိမ်ပူပန်ကြောင်း အမေရိကန် နိုင်ငံခြားရေးဌာန ရန်ကုန်သံရုံးက ကြာသပတေးနေ့မှာ ကြေညာချက် ထုတ်ပြန်ပြောဆိုလိုက်ပါတယ်။ မြန်မာစစ်တပ်နဲ့ KIA ကချင်လက်နက်ကိုင်တပ်ဖွဲ့တို့ကြား တိုက်ပွဲတွေဟာ အရပ်သားတွေကို ထိခိုက်သေကြေစေပြီး  အမျိုးသားပြန်လည်သင့်မြတ်ရေးကို အားယုတ်စေတဲ့အတွက် ဒါကိုပြင်းပြင်းထန်ထန် ကန့်ကွက်ကြောင်း ပြောဆိုလိုက်တာပါ။

သမ္မတ ဦးသိန်းစိန်ရဲ့ ပြောခွင့်ရပုဂ္ဂိုလ်  ဦးရဲထွတ်ကတော့ အမေရိကန်သံရုံးရဲ့ကြေညာချက်ထဲမှာ KIA တပ်ဖွဲ့တွေရဲ့ အရပ်သားတွေနဲ့ ရဲတွေ အစိုးရတပ်တွေကို တိုက်ခိုက်တာတွေကို ဖေါ်ပြမထားတဲ့အတွက် မျှတမှုမရှိဘူးလို့ ဆိုပါတယ်။

အမေရိကန်အစိုးရရဲ့  ကချင်ပြည်နယ်ထဲက အခြေအနေတွေနဲ့ ပါတ်သက်ပြီး စိုးရိမ်ပူပန်တာကို နားလည်နိုင်ပေမယ့် မျှမျှတတ ရှိအောင်  အခုဖြစ်ပွါးနေတဲ့ တိုက်ပွဲတွေအတွက် နှစ်ဘက်စလုံးရဲ့ လုပ်ဆောင်မှုတွေကို ထုတ်ဖေါ်ပြောဆိုဖို့ လိုအပ်ကြောင်းနဲ့ အခုမြန်မာအစိုးရကိုပဲ အပြစ်တင်နေတာအတွက် တရားမျှတမှု မရှိဘူးလို့ ပြောသွားတာပါ။

မြန်မာအစိုးရကတော့ စနေနေ့ကစပြီး မြန်မာတပ်တွေဘက်က အပစ်အခတ်ရပ်စဲမယ်လို့ ကြေညာခဲ့ပါတယ်။ဒါပေမဲ့ ကြိုကြားကြိုကြား ပစ်ခတ်မှုတွေ ဆက်လက်ဖြစ်ပွါးနေပါတယ်။ ကချင်လက်နက်ကိုင်တပ်ဖွဲတွေနဲ့ မျက်မြင်သက်သေတွေက VOA ကိုပြောကြားရာမှာတော့ အစိုးရတပ်တွေဟာ အခုလို တိုက်ခိုက်မှုတွေကို ရပ်ဆိုင်းပြပြီး ကချင်လက်နက်ကိုင်တွေကို ထိုးစစ်ဆင်ဖို့အတွက် နေရာယူလေ့ရှိတယ်လို့ ဆိုပါတယ်။

မြန်မာနိုင်ငံ ကလေးစစ်သား အသုံးပြုဆဲ

မြန်မာစစ်တပ်က အသက်မပြည့်သေးတဲ့ ကလေးစစ်သားတွေကို မိဘထံပြန်လည်အပ်နှံတဲ့အခမ်းအနားတွင် တွေ့ရစဉ်။
မြန်မာနိုင်ငံမှာ နိုင်ငံရေး အပြောင်းအလဲတွေ လုပ်ဆောင် နေပေမဲ့လည်း အရွယ်မရောက်သေးသူတွေကို စစ်သားအဖြစ် စုဆောင်းတာတွေ ရှိနေတုန်းပဲလို့ ကလေးစစ်သား ပပျောက်ရေးလှုပ်ရှားမှု အဖွဲ့တခုရဲ့ နောက်ဆုံး ထုတ်ပြန်လိုက်တဲ့ အစီရင်ခံစာက ဖော်ပြလိုက်ပါတယ်။ အရွယ်မရောက်သေး သူတွေကို လက်နက်ကိုင်တပ်တွေမှာ စုဆောင်း အသုံးပြုတာတွေ ပပျောက်စေရေး မြန်မာအစိုးရနဲ့ ကုလသမဂ္ဂကြား ပြီးခဲ့တဲ့နှစ် ဇွန်လထဲ သဘောတူညီချက် ရထားပေမဲ့ မြန်မာစစ်တပ်၊ နယ်ခြားစောင့်တပ်နဲ့ တိုင်းရင်းသား လက်နက်ကိုင် အုပ်စုတွေမှာ ကလေးစစ်သားတွေ ရှိနေဆဲ ဖြစ်တယ်လို့ လန်ဒန်အခြေစိုက် Child Soldiers International ကပြောဆိုလိုက်တာပါ။

ကုလသမဂ္ဂနဲ့ သဘောတူညီချက်အရ မြန်မာစစ်တပ်ထဲက အရွယ်မရောက်သေးသူ ၄၂ ယောက်ကို တပ်က ထွက်ခွင့်ရခဲ့ပေမဲ့လည်း စစ်တပ်နဲ့ နယ်ခြားစောင့် တပ်တွေမှာ ကလေးစစ်သား စုဆောင်းတာတွေ မရှိအောင် ကျကျနန တားမြစ်နိုင်တာမျိုး မရှိသေးဘူးလို့ “ကလေးစစ်သား စုဆောင်း အသုံးပြုမှု အဆုံးသတ်ပြီး ပြောင်းလဲနိုင်တဲ့ အခွင့်အလမ်း”လို့ အမည်ပေးထားတဲ့ အစီရင်ခံစာက ဖော်ပြခဲ့တာ ဖြစ် ပါတယ်။

တိုင်းရင်းသားလက်နက်ကိုင် အဖွဲ့တွေ ဖြစ်ကြတဲ့ DKBA နဲ့ KNU တို့ရဲ့ လက်နက်ကိုင်တပ်တွေမှာ အရွယ်မရောက်သူတွေကို စစ်သားအဖြစ် စုဆောင်းတာမျိုး မလုပ်ဖို့ ဟန့်တားနိုင်တဲ့ အစီအမံတွေ အားနည်းနေတယ်လို့လည်း ဖော်ပြခဲ့တာပါ။ မြန်မာနိုင်ငံမှာ နိုင်ငံရေးအရ တိုးတက်မှုတချို့ တွေ့ရခဲ့ပေမဲ့ လက်နက်ကိုင် ပဋိပက္ခတွေမှာ ကလေးသူငယ်တွေကို အသုံးမပြုအောင် တားဆီးရေးကို သမ္မတ ဦးသိန်းစိန် အစိုးရ အနေနဲ့ ဦးစားပေးအဖြစ် ဆောင်ရွက်ဖို့ လိုအပ်ကြောင်းလည်း Child Soldiers International အဖွဲ့က တိုက်တွန်းထားပါတယ်။