07.01.2013 နေ့ဖတ်ရန်သတင်းများ
|
8:33 PM |
No မှတ်ချက် |
by Myanmar Journal on Sunday, January 6, 2013 at 4:26pm
ဘဲလ်ဖတ်စ် အလံ အဓိကရုဏ်း
ကားတွေလဲ မီးတင်ရှို့ ခံရ
မြောက်ပိုင်း အိုင်ယာလန် က ဘဲလ်ဖတ်စ် မြို့တော် ခန်းမမှာ ယူနီယံ ဂျက်အလံ နေ့တိုင်း မလွှင့်ဖို့ ဆုံးဖြတ်ချက်ကို ကန့်ကွက်တဲ့ လူအုပ်နဲ့ ရဲအကြား တတိယ နေ့ ဆက်လက် အဓိကရုဏ်း ဖြစ်ခဲ့ပါတယ်။
ဆန္ဒပြသူတွေက ပုလင်းတွေ အုတ်ခဲတွေ မီးပန်းတွေနဲ့ ပစ်ပေါက်ကြလို့ ရဲက ရေပိုက်နဲ့ ထိုးပြီး လူစုခွဲ ခဲ့ရပါတယ်။ ကားတွေလဲ မီးတင်ရှို့ ခံရပါတယ်။
သေနတ်ပစ်မှုတွေ ဖြစ်ပွားတယ်လို့ သတင်းရရှိပြီးနောက် လူသတ်ရန် ကြံစည်မှုနဲ့ လူတယောက်ကို ဖမ်းထားပါတယ်။
ဘဲလ်ဖတ်စ် မြို့ အရှေ့ပိုင်း မှာ ဖြစ်ပွားတဲ့ အဓိကရုဏ်းနဲ့ ပတ်သက်ပြီး လူ အတော်များများကို ဖမ်းထားပါတယ်။
တရုတ် မြန်မာ အမေရိကန် ဆက်ဆံရေး
တရုတ်၊ အမေရိကန်၊ အိန္ဒိယ သုံးနိုင်ငံ စလုံးက မြန်မာ နိုင်ငံကို ဝိုင်းပြီး လူပျိုလှည့် နေတဲ့ အချိန် ဖြစ်လို့ သတိထားရမယ်
မျက်မှောက် မြန်မာ့ နိုင်ငံရေး အပြောင်း အလဲတွေနဲ့ ကမ္ဘာ့ ရေးရာနဲ့ ဒေသတွင်း ပြဿနာ တွေကို မြန်မာ နိုင်ငံနဲ့ ချိတ်ဆက် ရေးသားနေတဲ့ နာမည်ကျော် စာရေး ဆရာ ကျော်ဝင်းက အာရှပစိဖိတ် အကျပ် အတည်းနဲ့ တရုတ် မြန်မာ အမေရိကန် သုံးပွင့်ဆိုင် သံခင်း တမန်ခင်း ဆက်ဆံရေး အကြောင်းကို အစိုးရရော လူထု ကပါ စဉ်စား သင့်တဲ့ အကြောင်းတွေကို မနေ့က ရန်ကုန်မှာ ဟောပြောခဲ့ပါတယ်။
ပစိဖိတ်ရဲ့ ကုန်သွယ်ရေး လမ်းကြောင်းတွေကို ကြည့်ရင် တရုတ်အတွက် အရေးကြီးတဲ့ သွင်းကုန် လမ်းကြောင်းရော၊ ပို့ကုန် လမ်းကြောင်းရောက ပစိဖိတ် ဒေသမှာ ရှိနေတယ်လို့ ဆရာ ကျော်ဝင်းက ဘီဘီစီကို ပြောပါတယ်။
ဒါပေမယ့်လည်း ပစိဖိတ် ဒေသကို အမေရိကန် ရေတပ်က ချုပ်ကိုင် ထားတာ ဖြစ်တာကြောင့် တရုတ်ပြည် အတွက် မကောင်းတဲ့ အလားအလာ ဖြစ်တယ်လို့ ဆိုပါတယ်။
ဒီအတွက် တရုတ်က ဒုတိယ ပင်လယ် ထွက်ပေါက် ရှာတဲ့အခါ မြန်မာပြည်က ပထဝီ အနေ အထား အရ အရေးပါလာတာ ဖြစ်ပါတယ်။
အခု လောလောဆယ် အနေ အထားမှာ တရုတ်၊ အမေရိကန်၊ အိန္ဒိယ သုံးနိုင်ငံ စလုံးက မြန်မာ နိုင်ငံကို ဝိုင်းပြီး လူပျိုလှည့် နေတဲ့ အချိန် ဖြစ်တာ ကြောင့် မြန်မာ နိုင်ငံ အနေနဲ့ တခု အားကိုးနဲ့ တခုကို ကန်လိုက် မယ်ဆိုရင် ရှုပ်ထွေး သွားလိမ့် မယ်လို့ ဆရာ ကျော်ဝင်းက သုံးသပ် ပါတယ်။
ဒါကြောင့်မို့ ဝံပုလွေကြီး သုံးကောင် ကြားမှာ လိမ်လိမ် မာမာ ပါးပါး နပ်နပ် သွားနိုင်မှ မြန်မာပြည် ကောင်းလိမ့်မယ်လို့ သူက ဆိုပါတယ်။
မြန်မာ ပြည်က တရုတ် စီမံကိန်း တွေကို ကြည့်တဲ့ အခါမှာလည်း တိုင်းပြည် တိုးတက်ရေးနဲ့ သဘာဝ ပတ်ဝန်းကျင်၊ လူမှုဘဝ အကြား မထိ ခိုက်အောင် ချိန်ခွင်သျှာ မျှဖို့ လိုမယ်လို့ လည်း သူက ပြောပါတယ်။
ကိုယ့်ရဲ့ နိုင်ငံ အကျိုး စီးပွား အတွက် တရုတ်ကို သတိ ကြီးကြီးထား ဆက်ဆံ ရမယ့် အိမ်နီးချင်း ဖြစ်ကြောင်း ကိုလည်း သူက ပြောကြား သွားပါတယ်။
ဗင်နီဇွဲလား သမ္မတ အရံ ရွေးဖို့ပြင်
ချာဗက်ဇ် လက်ရုံး ကာဘယ်လီယိုက ဆက်ခံမလား
ကျူးဘားမှာ ကင်ဆာရောဂါနဲ့ စစ်ခင်း နေရတဲ့ ဗင်နီဇွဲလား သမ္မတ ဟူးဂိုး ချာဗက်ဇ် နေရာ အတွက် အရံလူ ရွေးဖို့ ဗင်နီဇွဲလား အမျိုးသား လွှတ်တော်မှာ စတင် ဆွေးနွေး နေကြပြီ ဖြစ်ပါတယ်။
မစ္စတာ ချာဗက်ဇ်ရဲ့ လက်ရုံး မဟာမိတ် ဒီရော့စဒါဒို ကာဘယ်လီယို (Diosdado Cabello) ကို လွှတ်တော် ဥက္ကဋ္ဌ အဖြစ် ပြန်လည် တင်မြှောက် လိုက်ကြပါတယ်။
တော်လှန်ရေးကို ဆက်ပြီး ခေါင်းဆောင် သွားဖို့ မစ္စတာ ချာဗက်ရဲ့ နောက်ထပ် ၆ နှစ် သမ္မတ သက်တမ်း ပြည်သူက ရွေးချယ်ထား ခဲ့ပြီးမို့ ဖယ်ရှားလို့ မရဘူးလို့ မစ္စတာ ကာဘယ်လီယို ပြောကြား သွားခဲ့ပါတယ်။
ကြာသပတေး နေ့ ကျင်းပဖို့ ရှိတဲ့ သမ္မတ ကျမ်းသစ္စာ ကျိန်ပွဲကို သမ္မတ ကိုယ်တိုင် တက်နိုင်မှာ မဟုတ်ဘူးလို့လဲ ခန့်မှန်း နေကြပါတယ်။
လိုအပ်လာရင် မစ္စတာ ကာဘယ်လီယို ယာယီ အုပ်ချုပ် ရဖို့ ရှိတယ်လို့ ကရားကက်စ် မြို့တော်က ဘီဘီစီ သတင်းထောက်က ပြောကြား ပါတယ်။
အိန္ဒိယနဲ့ ပါကစ္စတန် တပ်ဖွဲ့တွေ ပစ်ခတ်
ပါကစ္စတန် စခန်းကို အိန္ဒိယက တိုက်ခိုက် ခဲ့ တာလို့ စွပ်စွဲတဲ့ အပေါ် အိန္ဒိယ စစ်တပ်က ပယ်ချ
အိန္ဒိယနဲ့ ပါကစ္စတန် အကြား ငြင်းပွားဖွယ် ဖြစ်နေတဲ့ ကက်ရ်ှမီးယား ဒေသ နယ်ခြားကို ဖြတ်ကျော်ပြီး နှစ်ဖက် တပ်ဖွဲ့ဝင်တွေ တဘက်နဲ့ တဘက် ပစ်ခတ် မှုတွေ ဖြစ်ပွားခဲ့ရာ ပါကစ္စတန် စစ်သား တဦး သေဆုံးသွားပါတယ်။
Line of Control လို့ခေါ်တဲ့ နယ်ခြားကို အိန္ဒိယ တပ်ဖွဲ့တွေက ဖြတ်ကျော် ဝင်ရောက် ခဲ့ပြီး ဟက်ဂျီ ပီရာ အပိုင်းက ပါကစ္စတန် စခန်း တခုကို တိုက်ခိုက် ခဲ့တာ ဖြစ်တယ်လို့ ပါကစ္စတန် ဘက်က စွပ်စွဲ လိုက်တဲ့ အပေါ် အိန္ဒိယ စစ်တပ်က ပယ်ချလိုက် ပါတယ်။
အိန္ဒိယ ဘက်က ပြောတာ ကတော့ ပါကစ္စတန် တပ်ဖွဲ့တွေဟာ လက်ရှိ အပစ်အခတ် ရပ်စဲ ထားတာကို ချိုးဖေါက် ခဲ့တဲ့ အတွက် အိန္ဒိယ ဘက်က ပြန်ပစ် ခဲ့ရတာ ဖြစ်ကြောင်း ပြောပါတယ်။
ကက်ရ်ှမီးယား ဒေသကို အိန္ဒိယနဲ့ ပါကစ္စတန် နိုင်ငံ စလုံးက ပိုင်ဆိုင် တယ်လို့ ကြေညာထား ကြတာ ဖြစ်ပြီး၊ ဒီနယ်မြေ အတွက် နှစ်ကြိမ် တိုင်တိုင် စစ်မက် ဖြစ်ပွားခဲ့ဖူး ပါတယ်။
ကချင်အရေးကို ဘယ်သူမဆို ကြားဝင် ဆောင်ရွက်သင့်တယ်လို့ KIOပြော
ကချင်ဒေသမှာ အစိုးရနဲ့ KIA အကြား မြေပြင် တိုက်ပွဲတွေ ဆက်ဖြစ်နေဆဲ
ကချင်ဒေသမှာ ကချင်လွတ်လပ်ရေး တပ်မတော် KIA နဲ့ အစိုးရ စစ်တပ်အကြား မြေပြင်တိုက်ပွဲတွေ ဆက်လက် ဖြစ်ပွားနေ ချိန်မှာပဲ ကချင်ဒေသအရေးမှာ ကြားဝင် စေ့စပ်ပေးဖို့ နိုဘဲလ် ငြိမ်းချမ်းရေးဆုရှင် ဒေါ်အောင်ဆန်းစုကြည်ကို မေတ္တာ ရပ်ခံသံတွေ ထွက်ပေါ်လာပါတယ်။
ဒေါ်အောင်ဆန်းစုကြည်ကတော့ ဒီကိစ္စနဲ့ ပတ်သက်လို့ အစိုးရထံက တရားဝင် ကမ်းလှမ်းလာတာမျိုး မရှိသေးဘူးလို့ ဆိုပါတယ်။
ကချင်ဒေသ အရေးမှာ ဒေါ်အောင်ဆန်းစုကြည် ကြားဝင် ဆောင်ရွက်ရေးနဲ့ ပတ်သက်လို့ KIO ကို ဘီဘီစီက ဆက်သွယ် မေးခဲ့ရာမှာတော့ ကချင်အရေးဟာ တိုင်းရင်းသားအရေး၊ ပြည်တွင်းရေး ဖြစ်တာကြောင့် စိတ်ကောင်း စေတနာကောင်း ရှိသူ ဘယ်သူမဆို အားလုံး ပါဝင် ဆောင်ရွက်သင့်တယ်လို့ ယူဆကြောင်း KIO ပြောခွင့်ရ ပုဂ္ဂိုလ် ဦးလာနန်း က ဘီဘီစီကို ပြောပါတယ်။
ကချင်ဒေသအရေးကို ပြည်ပ နိုင်ငံတကာ ပုဂ္ဂိုလ် အဖွဲ့အစည်းတွေက ဝိုင်းဝန်း ပြောဆိုတာတွေ ရှိနေချိန်မှာ ပြည်တွင်းမှာ ရှိတဲ့ လူပုဂ္ဂိုလ် အဖွဲ့အစည်းတွေ အားလုံးအနေနဲ့လည်း နိုင်ငံရေး ဆွေးနွေးမှုတွေ အကောင်အထည် ပေါ်လာရေးအတွက် အာရုံစူးစိုက်ပြီး တွန်းအားပေးသင့်တယ်လို့ ဆိုပါတယ်။
တိုက်ပွဲတွေ ရှိနေပေမယ့် စစ်အရှိန် လျော့သွားဖို့ နိုင်ငံရေး ဆွေးနွေးမှုတွေ အရင်လုပ်ဖို့ လိုတယ်လို့ ဦးလာနန်းက ပြောပါတယ်။
KIA တပ်ဖွဲ့တွေအနေနဲ့ ရထားလမ်းတွေ မိုင်းခွဲ၊ ဒေသခံ အမျိုးသမီးတွေကို ဖမ်းဆီး ခေါ်ဆောင်တာတွေ လုပ်နေတယ်လို့ တနင်္ဂနွေနေ့ထုတ် အစိုးရ သတင်းစာတွေ ထဲမှာ စွပ်စွဲ ဖေါ်ပြထားတာဟာ လုပ်ရိုးလုပ်စဉ် ဖြစ်ကြောင်း တဘက်နဲ့ တဘက် အပြန်အလှန် စွပ်စွဲ ပြောဆိုနေခြင်းအားဖြင့် နိုင်ငံရေး ဆွေးနွေးပွဲ လုပ်ဖို့ လက်လှမ်း မှီနိုင်မှာ မဟုတ်ကြောင်း KIO ပြောခွင့်ရ ပုဂ္ဂိုလ် ဦးလာနန်းက ဘီဘီစီကို ပြောပါတယ်။
ဆီးရီးယား သမ္မတ နိုင်ငံတော်ကို မိန့်ခွန်းပြော
စေ့စပ်ဆွေးနွေးရေးကို ကမ်းလှမ်းလိုက်ပေမယ့် အနောက် နိုင်ငံတွေက ဖန်တီးထားတဲ့ ရုပ်သေးတွေနဲ့ မဆွေးနွေး ဘူးလို့ ပြောပါတယ်
ဆီးရီးယား သမ္မတ အာဆတ်ရဲ့ ၆ လ အတွင်း ပထမဆုံး ပြောတဲ့ မိန့်ခွန်းမှာ၊ သူ့အစိုးရ အဖွဲ့ကို အတိုက် အခံ တွေက စစ်ပွဲ ဆင်နွှဲ နေတဲ့ အပေါ် ရှုတ်ချ လိုက် ပါတယ်။
ဒမတ်စကတ်စ် မြို့တော်ရှိ အော်ပရာ ကပွဲရုံမှာ သမ္မတ အာဆတ်က တနာရီ နီးပါးသူ့ကို ထောက်ခံသူ လူတထောင်ကျော် ရှေ့မှာ မိန့်ခွန်း ပြောကြား ခဲ့တာ ဖြစ်ပါ တယ်။
သူ့ပြောကြားချက် တိုင်းကို ထောက်ခံ နေကြတဲ့ ပရိသတ်ကို အကြမ်းဖက်မှု ဆက်တိုက် သွားမယ်လို့ သမ္မတက ပြောပါတယ်။ ပရိသတ်က သမ္မတ အတွက် အသက်နဲ့သွေး စွန့်မယ်လို့ ကြွေးကြော်ကြ ပါတယ်။
သမ္မတက သူ့ကို တိုက်ခိုက် နေသူတွေဟာ သူ့အပြောအရ ဆိုရင် အယ်လ်ကိုင်းဒါးက ဖွဲ့ပေးထားတဲ့ နိုင်ငံခြား အကြမ်းဖက် အုပ်စုတွေက ဦးဆောင်တာလို့ အခိုင်အမာ အထပ်အထပ် အခါခါ ပြောပါတယ်။
ရန်သူတွေက တော်လှန်ရေးလို့ ကြွေးကြော် နေပေမယ့် ဒါမဟုတ်တဲ့ အကြောင်းနဲ့ အဲဒီသူတွေရဲ့ ခေါင်းဆောင်တွေက ဘယ်သူလဲ ဆိုပြီး မစ္စတာ အာဆတ်က မေးခွန်း ထုတ်လိုက်ပါတယ်။
နောက်ပြီး သူလက်ခံ နိုင်တဲ့ အတိုက်အခံတွေနဲ့ စကားပြောဖို့ ကမ်းလှမ်းလိုက်ပြီး၊ သူ့အဆို အနောက် နိုင်ငံတွေက ဖန်တီးထားတဲ့ ရုပ်သေးတွေနဲ့ မဆွေးနွေး ဘူးလို့ ပြောပါတယ်။
အခြေခံ ဥပဒေသစ် ရေးဖို့ ညီလာခံ ခေါ်ရေး ကိုလည်း သူက တောင်းဆို သွားပါတယ်။
ကေအန်ယူနဲ့ ဒုဗိုလ်ချုပ်မှူးကြီး မင်းအောင်လှိုင် တွေ့ဆုံ
ကေအန်ယူ ကိုယ်စားလှယ်အဖွဲ့က သမ္မတ ဦးသိန်းစိန်နဲ့ အရင် တွေ့ဆုံခဲ့တာ ဖြစ်ပါတယ်
ကရင်အမျိုးသား အစည်းအရုံး ကေအန်ယူ ဥက္ကဌနဲ့ အဖွဲ့ဟာ တပ်မတော် ကာကွယ်ရေး ဦးစီးချုပ် ဒုတိယဗိုလ်ချုပ်မှူးကြီး မင်းအောင်လှိုင် နဲ့ တနင်္ဂနွေ နေ့က တွေ့ဆုံခဲ့ပါတယ်။
ဒီတွေ့ဆုံ ပွဲဟာ အလွတ် သဘော တွေ့ဆုံ ခဲ့ကြတာ ဖြစ်လို့ သဘောထား ဆုံးဖြတ်ချက်တွေ ချမှတ်တာ မျိုးတော့ မရှိခဲ့ကြောင်း ကေအန်ယူ တွဲဖက် အတွင်း ရေးမှူး ၂ စောမန်းမန်းက ဘီဘီစီကို ပြောပါတယ်။
အပစ်အခတ် ရပ်စဲရေးနဲ့ ပတ်သက်ပြီး နှစ်ဘက် လိုက်နာရမယ့် အချက်တွေနဲ့ ပတ်သက်လို့ အသေးစိတ် ဆွေးနွေးဖို့ အတွက် အစိုးရ ဘက်က အဆင်သင့် ဖြစ်နေ ပြီလို့ သိရကြောင်း စောမန်းမန်းက ပြောပါတယ်။
ကေအန်ယူ နဲ့ အစိုးရက အကြား အပစ်အခတ် ရပ်စဲရေးဟာ ပဏာမ အဆင့်ပဲ ရှိသေးကြောင်းနဲ့ ရှေ့ဆက် ဆောင်ရွက်ဖို့ ကိစ္စရပ်တွေ အများကြီး ရှိသေးတယ်လို့ သူက ပြောပါတယ်။
ငြိမ်ချမ်းရေး အဆင့် ရောက်ဖို့ အတွက် ကတော့ နိုင်ငံရေး ဆွေးနွေးမှုတွေ လုပ်ပြီး မှသာ ဖြစ်နိုင်မယ်လို့ ဆိုပါတယ်။ အဲဒီလို ဆွေးနွေးဖို့ ကျတော့ တိုင်းရင်းသား လူမျိုးများ ဖဒရယ် ကောင်စီ UNFC နဲ့ ဆွေးနွေးရမှာ ဖြစ်တယ်လို့ စောမန်းမန်းက ပြောပါတယ်။
KIA ဌာနချုပ် လိုင်ဇာကို မြန်မာတပ် လက်နက်ကြီးနဲ့ ပစ်ခတ်
ကချင်လွတ်မြောက်ရေးတပ် ကေအိုင်အေ ကချင်တပ်သား တစ်ဦးကို ရှေ့ တန်းစစ်မျက်နှာတွင် တွေ့ရစဉ်။
ရက်ပိုင်းလောက် ငြိမ်သက်နေခဲ့တဲ့ ကချင်ပြည်နယ်က တိုက်ပွဲတွေ ဒီနေ့မှာ ပြင်းပြင်းထန်ထန် ပြန်ဖြစ် လာပါတယ်။ ဒီကနေ့ မနက်ပိုင်းမှာပဲ မြန်မာတပ်ဘက်ကနေ လက်နက်ကြီးနဲ့ စတင်ပစ်ခတ်ပြီး၊ ညနေပိုင်းအထိ မြေပြင်တိုက်ပွဲတွေ ပြင်းပြင်းထန်ထန် ဖြစ်ပွားခဲ့တယ်လို့ တာဝန်ရှိသူတွေ နဲ့ ဒေသခံတွေက ပြောပါတယ်။ စုံစမ်းမေးမြန်းထားတဲ့ ကိုသားညွန့်ဦးက တင်ပြထားပါတယ်။ ဒီကနေ့ မနက်ပိုင်းကတည်းက စတင်ခဲ့တဲ့ တိုက်ပွဲတွေဟာ ပြင်းထန် လာတာကြောင့် လိုင်ဇာမြို့ခံတွေကပါ စိုးရိမ်လာကြပါတယ်။ အထူးသဖြင့်တော့ မြန်မာအစိုးရ သမ္မတဦးသိန်းစိန် ကတော့ သူတို့အနေနဲ့ လိုင်ဇာမြို့ ကချင်လွတ်မြောက်ရေးတပ်ဖွဲ့ ကေအိုင်အေ ဌာနချုပ်ကို သိမ်းယူဖို့ အစီအစဉ် မရှိပါဘူးလို့ ပြောထားပေမဲ့ အခုတော့ လိုင်ဇာမြို့အထိကို လက်နက်ကြီးကျည်တွေ ကျလာတာကြောင့်ပါ။ ပြီးခဲ့တဲ့ သီတင်းပတ်က မြန်မာတပ်ဘက်က သိမ်းယူခဲ့တဲ့ တောင်ကုန်းကနေ လက်နက်ကြီး ပစ်ကူပေးပြီး၊ အနီးအနား ကေအိုင်အေ ဘက်က စစ်စခန်းတွေကို ပြင်းပြင်းထန်ထန် ထိုးစစ်ဆင်လာတာဖြစ်တယ်လို့ ကေအိုင်အေနဲ့အတူ တွဲဘက်တိုက်နေတဲ့ ABSDF မြောက်ပိုင်း ပြန်ကြားရေးတာဝန်ခံ ဗိုလ်မှုးမင်းဌေးက ဗွီအိုအေကို ပြောပါတယ်။ “ဒီနေ့က မနက်ကနေ စပြီးတော့ ရွှေဘုန်းယန် အမြှောက်တပ် ကနေပြီးတော့ အမြှောက် ၃ လက်လောက်နဲ့ လှမ်းပစ်တယ်။ နောက်ပြီးတော့ ဟိုနေ့က ၃၀ ရက်နေ့က ထိုးပြီး ယူသွားတဲ့ (၇၇၁) တောင်ကုန်းကနေပြီးမှလည်း လှမ်းပစ်တယ်။ ပစ်တာက လိုင်ဇာကို လှမ်းပစ်တာ။ လိုင်ဇာကို လှမ်းပစ်တာက ၈ လုံး။ ပြီးတော့ ညနေပိုင်းမှာ တိုက်ပွဲတွေ တောက်လျှောက် ဖြစ်နေတယ်။ ဒီ လွယ်မောက်ယန် ဘက်ကနေ တက်လာတဲ့ အဖွဲ့တွေနဲ့။” အခုဟာက မြေပြင် တိုက်ပွဲ ဖြစ်နေတဲ့သဘောပေါ့။ - “ဟုတ်တယ်။ မြေပြင် တိုက်ပွဲဖြစ်တော့ လက်နက်ကြီးတွေက ဒီဘက် လဂျားယန် နဲ့ လ၀ါယန် ဘက်ကို ပစ်နေတာ။ လဂျားယန် ကျနော်တို့ ကျောင်းသားစခန်း ရှိတဲ့နေရာကို။” လိုင်ဇာမြို့ပေါ်ရော ပစ်တာခတ်တာ ရှိလား။ - “လိုင်ဇာမြို့ကို မနက်က ပစ်တယ်။ ၈ လုံး ပစ်တယ်။” အထိအခိုက်တွေရော ဘယ်လိုရှိပါလဲခင်ဗျ။ - “လိုင်ဇာမြို့ကို ပစ်တာတော့ အထိအခိုက် မရှိဘူး။ လိုင်ဇာမြို့ထဲကိုတော့ ၂ လုံး ကျသွားတယ်။ လူကို ထိခိုက်တာတော့ မရှိဘူး။” လေယာဉ်ပျံ သုံးတာတွေ ဘာတွေရော ရှိပါလား။ ဒီနေ့။ - “လေယာဉ်ပျံသုံးတာတော့ ဒီနေ့ မရှိဘူးခင်ဗျ။” ပြီးခဲ့တဲ့ ရက်တွေက ၂ ရက်လောက် ငြိမ်သွားပြီးမှ အခု ထိုးစစ် ဆင်လာတဲ့ သဘောလား။ ဘာကြောင့်လဲ။ ဘာကြောင့်လို့ ယူဆလဲ။ - “ပြီးခဲ့တဲ့ ၂ ရက်က ခဏ ငြိမ်နေတာတော့ ကျနော် ထင်တယ်၊ သူတို့ စစ်ပမ်းသွားတာလည်း ဖြစ်နိုင် တယ်။ အခုထပ်ပြီးမှ ပြန် ထပ် တက်ဖို့ သူတို့ အမိန့် ပေးထားတယ်လို့လည်း ကျနော်တို့ ကြားရတယ်။ ကြားရတော့ အခု သူတို့ အင်အား ထပ်ဖြည့်ပြီးတော့ တက်လာတယ်။ တက်လာတဲ့အင်အားတွေက အခုဟာက ဆန်တွေ ဘာတွေ သယ်လာတာ မဟုတ်ဘူး။ လက်နက် ခဲယမ်း ကျည်တွေကို သယ်လာပြီးမှ တက်လာတာ။” ကိုမင်းဌေးတို့ ABSDF စခန်းနဲ့ ကေအိုင်အေ စခန်းတွေ အခြေအနေက ဘယ်လိုရှိလဲ။ အခုအနေအထားက တိုက်ပွဲ ပြင်းထန်တော့။ - “တိုက်ပွဲ ပြင်းထန်တော့ သူတို့ကတော့ ကျနော်တို့ကို လက်နက်ကြီးတွေကို မိုးရွာသလိုရွာအောင် ပစ်ပြီးတော့မှ ပစ်တာပေါ့နော်။ ဒါပေမဲ့ ကျနော်တို့ကလည်း လက်နက်ကြီးဒဏ် ခံနိုင်အောင်တော့၊ ကျနော်တို့ မထိအောင်တော့ နေကြရတာပေါ့။” အလားအလာက ဟိုဘက်က တအား ထိုးလာလို့ရှိရင် ဆုတ်ပေးရမယ့် အလားအလာရှိလား။ ဒါမှမဟုတ် ခံတိုက်နိုင်တဲ့ အနေအထား ရှိလား။ - “အဲဒါကတော့ ဒီ စစ်ပွဲပေါ် အခြေအနေပေါ်မှာ မူတည်မယ်လေ။ ကျနော်တို့က လောလောဆည်မှာ ခုခံနေတဲ့ အနေအထား ကနေပြီးမှ အဲဒီ စစ်ပွဲကာလမှာပဲ ကျနော်တို့က ပြန်ထိုးတာ လည်း ဖြစ်ကောင်း ဖြစ်နိုင်တယ်။ ဒီအခြေအနေမှာ ဆုတ်နိုင်သလား၊ ဆက်ပြီး တောင့်ထားနိုင်မလား ဆိုတာကတော့ စစ်ပွဲရဲ့ အခြေအနေအပေါ်မှာ မူတည်ပြီးမှ ကျနော်တို့က အပြောင်းအလဲ လုပ်သွားရမှာ ဆိုတော့ အခုချိန်မှာ ကျနော်တို့က ပြောလို့ကို မရသေးဘူးခင်ဗျ။” တိုက်ပွဲက တနေရာတည်းမှာပဲ ဖြစ်နေတာလား၊ ပျံ့ပြီး ဖြစ်နေတာလား။ ဘယ်နေရာမှာ အဓိက ဖြစ်နေတာလဲ။ - “တိုက်ပွဲတွေက နေရာ အနှံ့ပါပဲ။ နေရာ အနှံ့ ဖြစ်တယ်ဆိုတာက ဒီ နမ်ဆမ်ယန် ဘက်ပေါ့။ နမ်ဆမ်ယန် ဘက်မှာလည်း သူတို့ တက်လာတယ်။ အဲဒီ သူတို့ တက်လာတဲ့ စစ်ကြောင်းတွေ၊ ရိက္ခာတွေ ကျည်တွေ မပို့နိုင်အောင်၊ အဓိက ကျည်တွေပေါ့နော်၊ သူတို့က တက်သွားတဲ့ကုန်းပေါ်ကို ကျည်တွေ ထပ်ဖြည့်ဖို့ လုပ်နေတယ်။ အဲဒါတွေ ထပ်မဖြည့်နိုင်အောင် ကျနော်တို့က ဟန့်ထားတဲ့ အနေနဲ့ ဖြတ်ပြီးတော့မှ ဟန့်တားနေတာ။” ခုလို တိုက်ပွဲတွေ ရှိနေတယ်ဆိုပေမဲ့ မြန်မာအစိုးရဘက်ကတော့ အပစ်အခတ်ရပ်စဲရေး နဲ့ ငြိမ်းချမ်းရေး ရဖို့အတွက် ကြိုးစားနေတယ်လို့ မြန်မာ ငြိမ်းချမ်းရေးဗဟိုဌာန တာဝန်ရှိသူတွေက ပြောပါတယ်။
ပြည်ပ နိုင်ကျဉ်းအဖွဲ့ ကိုယ်စားလှယ်များ မြန်မာနိုင်ငံရောက်ရှိ
နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့ (AAPP) တွဲဘက်အတွင်းရေးမှူး ဦးဘိုကြည်။
မြန်မာနိုင်ငံကို ရောက်နေစဉ်အတွင်း နိုင်ငံရေးအကျဉ်းသားဆိုတဲ့ အမည်နာမကို အားလုံးက လက်ခံနိုင်အောင် အဓိပ္ပာယ်ဖွင့်ဆိုဖို့ ကြိုးစားသွားမှာဖြစ်သလို မြန်မာနိုင်ငံ အကျဉ်းထောင်တွေထဲမှာ ကျန်နေသေးတဲ့ နိုင်ငံရေးအကျဉ်းသားတွေ အမြန်ဆုံး ပြန်လွှတ်ပေးဖို့ တာဝန်ရှိသူတွေ နဲ့ တွေ့ဆုံတဲ့အခါ ဆွေးနွေးသွားမယ်လို့ နိုင်ငံရေး အကျဉ်းသားများ စောင့်ရှောက်ရေးအဖွဲ့ AAPP က ပြောပါတယ်။ အစိုးရက သူတို့ကို အမည်မည်းစာရင်းကနေ ပယ်ဖျက်ပေးလိုက်တဲ့အတွက် ထိုင်းအခြေစိုက် AAPP ရဲ့ အတွင်းရေးမှူးနဲ့ တွဲဘက်အတွင်းရေးမှူးတို့ မြန်မာနိုင်ငံကို ပထမဆုံးအကြိမ် တရားဝင် သွားရောက်ခွင့် ရစဉ်အတွင်း ပြောဆိုလိုက်တာ ဖြစ်ပါတယ်။ ဒီအကြောင်း အသေးစိတ်ကို ဆက်သွယ်စုံစမ်းထားတဲ့ မဆုမွန်က တင်ပြထားပါတယ်။
အစိုးရကနေ အမည်မည်းစာရင်း ပယ်ဖျက်ပေးလိုက်တဲ့အတွက် ထိုင်းနိုင်ငံအခြေစိုက် နိုင်ငံရေး အကျဉ်းသားများ ကူညီစောင့်ရှောက်ရေးအဖွဲ့ မြန်မာနိုင်ငံရဲ့ အတွင်းရေးမှူးနဲ့ တွဲဘက်အတွင်းရေးမှူး တို့ မြန်မာနိုင်ငံ ရန်ကုန်မြို့ကို အခုဆိုရင် ပထမဆုံးအကြိမ် ဇန်နဝါရီလ ၅ ရက်နေ့က တရားဝင် ပြန်လည် ရောက်လာနေပြီ ဖြစ်ပါတယ်။ ပထမဆုံးအကြိမ် မြန်မာပြည် ခရီးစဉ်အတွင်း သက်ဆိုင်ရာ တာဝန်ရှိသူတွေနဲ့ တွေ့ဆုံခွင့်ရတဲ့အခါမှာ အကျဉ်းထောင်အသီးသီးမှာ ကျန်ရှိနေတဲ့ နိုင်ငံရေး အကျဉ်းသားတွေကို အမြန်ဆုံး ပြန်လွှတ်ပေးဖို့ တောင်းဆိုမှာဖြစ် သလို ပြန်လွှတ်ဖို့မှာ အခက်အခဲတွေ ရှိနေရင်လည်း ပူးပေါင်း ဖြေရှင်းသွားဖို့ အဆင်သင့်ပါပဲလို့ AAPP တွဲဘက်အတွင်းရေးမှူး ကိုဘိုကြည်က ဗွီအိုအေ မြန်မာပိုင်းကို ပြောပါတယ်။
“ကျနော်တို့ ဒီ အစိုးရဘက်ပိုင်းကိုလည်း ကျနော်တို့က မေးခွန်းထုတ်ချင်တာပေါ့။ ဒီ ကျန်ရှိနေတဲ့ နိုင်ငံရေးအကျဉ်းသားတွေ လွှတ်ဖို့ သူတို့မှာ ဘာတွေများ အခက်အခဲ ဖြစ်နေသလဲပေါ့။ တကယ်လို့ အခက်အခဲတွေ ရှိတယ် ဆိုရင်လည်း ကျနော်တို့ အဲဒီအခက်အခဲတွေကို ဘယ်လို ပူပေါင်း ဖြေရှင်းလို့ ရမလဲ။ ကျနော်တို့ အဓိက လိုချင်တာကတော့ နိုင်ငံရေး အကျဉ်းသားတွေကို ချွင်းချက်မရှိ လွှတ်ပေးဖို့ လိုတယ်။ နောက်ပြီးလို့ရှိရင် ဆက်ပြီးတော့လည်း မတရားသဖြင့် ဖမ်းဆီးတာတွေ မလုပ်ဖို့။ အဲဒါကိုတော့ ကျနော်တို့ ထိပ်ဆုံး ဆွေးနွေးသွားမှာပါ။”
နိုင်ငံရေးအရ ပြုပြင်ပြောင်းလဲရေး လုပ်ငန်းစဉ်တွေ ဖော်ဆောင်နေတဲ့ မြန်မာနိုင်ငံ မှာ နိုင်ငံရေးအကျဉ်းသား ဆိုတဲ့ အမည်နာမကို အားလုံးက သဘောတူလက်ခံနိုင်တဲ့ အဓိပ္ပာယ် ဖွင့်ဆိုချက် ဖော်ဆောင်နိုင်အောင် ကြိုးပမ်းမှုတွေ လုပ်ဆောင်ဖို့ ရှိသလိုပဲ နိုင်ငံရေး အကျဉ်းသားဟောင်းတွေရဲ့ လူနေမှုဘဝ ထူထောင်ရေး အခက်အခဲတွေကို ဝိုင်းဝန်းကူညီ ဖြေရှင်းပေးဖို့ ပြည်တွင်းက နိုင်ငံရေးလုပ်ဖော်ကိုင်ဖက်တွေနဲ့ ဆွေးနွေးကြမှာဖြစ်တယ်လို့လည်း အေအေပီပီ တွဲဘက်အတွင်းရေးမှူး ကိုဘိုကြည်က ဆိုပါတယ်။
“နံပါတ် (၁) ကတော့ နိုင်ငံရေးအကျဉ်းသား ဆိုတဲ့ အဓိပ္ပာယ်ဖွင့်ဆိုချက်ပေါ့။ အဲဒီ အဓိပ္ပာယ် ဖွင့်ဆိုချက်ကို အားလုံး လက်ခံနိုင်တဲ့၊ နိုင်ငံရေးအကျဉ်းသား အဓိပ္ပာယ် ဖွင့်ဆိုချက်မျိုး ဖြစ်လာအောင်တော့ ကျနော်တို့ တိုက်တွန်း ဆွေးနွေးမှာတွေတော့ ရှိပါတယ်။ နိုင်ငံရေး အကျဉ်းသားတွေက ဘယ်လို အခက်အခဲမျိုးတွေ ရှိနေလဲ။ အဲဒါကို ဘယ်လို ကူညီဖြေရှင်း ပေးလို့ရမလဲ ဆိုတာကို ၀ိုင်းဝန်း ဆွေးနွေးကြမှာပါ။ ဆွေးနွေးပြီးတဲ့အခါကျတော့မှ အကုန်လုံးကို ပူးပေါင်း လုပ်ဆောင်နိုင်မယ့် နည်းလမ်းတွေ ထွက်လာမှာပါ။ အဲဒီအချိန်မှပဲ ကျနော်တို့ ပြောလို့ရပါမယ်။”
အခုလို လာရောက်ခွင့်ရတဲ့ ပထမဆုံးအကြိမ် ပြည်တွင်းခရီးစဉ်မှာ AAPP အဖွဲ့ တာဝန်ရှိသူတွေ အနေနဲ့ သူတို့ရဲ့ မြန်မာပြည်ခရီးစဉ်အတွင်းမှာပဲ ၈၈ မျိုးဆက်ကျောင်းသားတွေ၊ နိုင်ငံရေးပါတီ အဖွဲ့အစည်းတွေ၊ နိုင်ငံရေး အကျဉ်းဟောင်းတွေနဲ့ တွေ့ဆုံဖို့ စီစဉ်ထားတယ်လို့ ကိုဘိုကြည်က ပြောပါတယ်။
“ကျနော်တို့နဲ့ ကွဲကွာနေကြရတဲ့ ကျနော်တို့ရဲ့ ခေါင်းဆောင်တွေ၊ ရဲဘော် သူငယ်ချင်းတွေနဲ့ ကျနော်တို့ အတွေ့အကြုံချင်း ဖလှယ်မယ်။ ကျနော်တို့ ရှေ့ဆက်ပြီးတော့ ဘယ်လို ပူးပေါင်း လုပ်ဆောင်လို့ ရမလဲ ဆိုတဲ့ ကိစ္စတွေကို ဆွေးနွေးမယ်။ အဲဒီလိုပဲ တခြား နိုင်ငံရေး ပါတီတွေနဲ့ ကျနော်တို့ တွေ့ဆုံပြီးတော့ နိုင်ငံရေးအကျဉ်းသား အဓိပ္ပာယ် ဖွင့်ဆိုချက်တခု ထွက်လာဖို့ကို ကျနော်တို့ ကြိုးစားမယ်ပေါ့။ အဲဒီလိုပဲ ဒီ နိုင်ငံရေးအကျဉ်းသားတွေ ပြုစုပြိုးထောင်ရေး အတွက် ဘယ်လို ပူးပေါင်း လုပ်ဆောင်ကြမလဲ၊ ဘယ်လိုလုပ်ရင် အကောင်းဆုံး ဖြစ်မလဲ ဆိုတာတွေကို ကျနော်တို့ ဆွေးနွေးမယ်။”
ထိုင်းနိုင်ငံ အခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့ အနေနဲ့ မြန်မာပြည် ခရီးစဉ် အတွင်း အစိုးရတာဝန်ရှိသူတွေနဲ့ တွေ့ဆုံဖို့ကတော့ စီစဉ်နေဆဲဖြစ်တယ်လို့ ဆိုပါတယ်။“ကျနော်တို့ ခုချိန်ထိတော့ ရက် အတိအကျတော့ မသိသေးပါဘူး။ တကယ်လို့ ရက် အတိအကျသိမှပဲ ကျနော်တို့ ပြောလို့ရမယ်။ နောက် ဘယ်သူနဲ့ တွေ့မယ်ဆိုတာလည်း ကျနော်တို့ သေသေချာချာ မသိရသေးဘူး။”
ဆယ်စုနှစ်အတွင်း ပြန်ရောက်လာခွင့်ရှိတဲ့ အခါမှာတော့ မြန်မာနိုင်ငံရဲ့ အခြေအနေ အနေအထားဟာ ပြောင်းလဲမှု ရှိနေတယ်လို့ ဆိုလို့ရပေမဲ့ အခုလို တရားဝင် ပြန်လည် ရောက်လာခွင့် ရှိတဲ့အပေါ် သူ့အနေနဲ့တော့ ဝမ်းသာ၊ ဝမ်းနည်းခံစားရပါတယ်လို့ ကိုဘိုကြည်က ပြောပါတယ်။“၀မ်းသာ ၀မ်းနည်း ဖြစ်ပါတယ်။ ၀မ်းသာတယ်ဆိုတာက ကိုယ့်ရဲ့ မိဘနဲ့ ပြန်တွေ့ရမယ်။ ဆွေမျိုး သားချင်းတွေနဲ့ တွေ့ရတယ်။ နှစ်ပေါင်းများစွာ ခွဲခွာနေရတဲ့ သူငယ်ချင်းများနဲ့ တွေ့ရတယ်ပေါ့။ ဒါကတော့ အင်မတန် ၀မ်းသာစရာ ကောင်းတဲ့ဟာပါ။ ဒါပေမဲ့ ၀မ်းနည်းစရာ ကောင်းတဲ့ဟာကလည်း ဒီ ထောင်ထဲမှာ နိုင်ငံရေးအကျဉ်းသားတွေ ရှိနေသေးတယ်။ နောက်ကချင်ပြည်နယ်ဘက်မှာ အဖမ်းအဆီး ခံထားရတာတွေ ရှိတယ်။ ပြည်တွင်းစစ်တွေ ရှိတယ်။ ဒါတွေက ၀မ်းနည်းစရာတွေပါ။ အရင်ထက်စာရင်တော့ ရန်ကုန်မြို့မှာတော့ တစုံတရာ ပိုပြီးတော့ ပွင့်လင်းလာတာမျိုးတွေ တွေ့ တယ်။ နောက် လူတွေကတော့ နည်းနည်း အကြောက်တရား ပိုပြီးတော့ နည်းပါးလာတာပေါ့လေ။ အဲဒါမျိုးတော့ တွေ့ပါတယ်။ ကချင်ပြည်နယ်မှာတော့ ပြည်တွင်းစစ် ဖြစ်နေတာမျိုးကို ကျနော်တို့ ကြားသိရတယ်။ ဆိုတော့ အဲဒီဘက်တွေကိုတော့ ကျနော်တို့ သွားနိုင်မသွားနိုင်တော့ ကျနော်တို့ အသေအချာ မသိပေးပါဘူး။ ဒါပေမဲ့ အခြေအနေပေးတယ်၊ သွားနိုင်တယ်ဆိုရင်တော့ ကျနော်တို့ အဲဒီဘက်တွေကိုလည်း သွားမှာပါ။”
သူတို့ရဲ့ မြန်မာပြည်ခရီးစဉ်ဟာ နိုင်ငံရေးအကျဉ်းသားတွေအတွက် အကျိုးဖြစ်ထွန်းမှုတွေ လုပ်ဆောင်နိုင်ဖို့ မျှော်လင့်ပါတယ်လို့ ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့ AAPP က ပြောပါတယ်။ နိုင်ငံရေးအကျဉ်းသားများ ကူညီစောင့်ရှောက်ရေး အဖွဲ့ဟာ ၈၈မျိုးဆက် ကျောင်းသားခေါင်းဆောင် မင်းကိုနိုင် အဖမ်းခံရတဲ့ (၁၁) နှစ်မြောက် နှစ်ပတ်လည်နေ့မှာ နိုင်ငံရေးအကျဉ်းသားဟောင်းတွေ စုစည်းပြီး နိုင်ငံရေးအကျဉ်းသားတွေကို ကူညီပေးဖို့ ထိုင်းမြန်မာနယ်စပ်မှာ ဖွဲ့စည်း တည်ထောင်ခဲ့တာ ဖြစ်ပါတယ်။
ကက်ရ်ှမီးယားမှာ အိန္ဒိယနဲ့ပါကစ္စတန် တိုက်ပွဲဖြစ်
အိန္ဒိယနဲ့ ပါကစ္စတန်တို့ကြား အငြင်းပွားနေတဲ့ ကက်ရ်ှမီးယား နယ်ခြားဒေသမှာ တနင်္ဂနွေနေ့က ထိခိုက်သေဆုံးမှုတွေ ကြုံခဲ့ရတဲ့ ပစ်ခတ်မှုအတွက် အပြန်အလှန် အပြစ်ဖို့နေကြပါတယ်။ ပါကစ္စတန် စစ်တပ်ကတော့ ကက်ရ်ှမီးယား ဒေသက စစ်စခန်းတခုကို အိန္ဒိယဘက်က ၀င်ရောက်စီးနင်း တိုက်ခိုက်မှုကြောင့် စစ်သားတဦးသေပြီး နောက်တဦးလည်း အပြင်းအထန် ဒဏ်ရာတွေ ရခဲ့ကြောင်း ပြောဆိုခဲ့တာပါ။ ဒါပေမဲ့လည်း တိုက်ခိုက်မှုကို ခုခံနိုင်ခဲ့ကြောင်းလည်း ပါကစ္စတန်က ပြောပါတယ်။ အိန္ဒိယ အာဏာပိုင်တွေကတော့ သူတို့တပ်တွေ နယ်စပ်ဖြတ်ကျော်တာမျိုး မရှိဖူးလို့ ငြင်းဆန်ခဲ့ကြသလို၊ ပါကစ္စတန်ဘက်က အိန္ဒိယ ရွာတရွာကို မော်တာနဲ့ စတင်ပစ်ခတ်ရာက အပြန်အလှန် တိုက်ခိုက်မှု ဖြစ်ခဲ့တာလို့ ပြောဆိုခဲ့တာပါ။ အိန္ဒိယတပ်တွေဘက်က လက်နက်ငယ်တွေ နဲ့သာ ပြန်လည် တုံ့ပြန်ခဲ့တယ်လို့လည်း ပြောပါတယ်။ ပိုင်ဆိုင်မှုအတွက် အငြင်းပွားနေတဲ့ ကက်ရ်ှမီးယား ဒေသမှာ အိန္ဒိယနဲ့ ပါကစ္စတန်ကြား ခွဲခြားထားတဲ့ နယ်မြေမှာ အပြန်အလှန် ပစ်ခတ်မှု ရှိခဲ့တာကိုတော့ နှစ်ဘက်စလုံးက အသိအမှတ်ပြု ပြောခဲ့ကြတာပါ။ ကက်ရ်ှမီးယား ဒေသဟာဆိုရင် အိန္ဒိယနဲ့ ပါကစ္စတန်တို့ကြား ပဋိပက္ခတွေ ကြုံရလေ့ ရှိတဲ့ နယ်မြေတခုဖြစ်ပြီး၊ ၂၀၀၃ ခုနှစ်တုန်းက အပစ်အခတ်ရပ်စဲဖို့ သဘောတူ ထားပေမဲ့ မကြာခဏဆိုသလို ရင်ဆိုင် တိုက်ပွဲ အငယ်စားတွေ ဖြစ်ပွားလေ့ ရှိတတ်ပါတယ်။ နှစ်နိုင်ငံစလုံး က ဒေသတခုလုံးကို ပိုင်ဆိုင်ကြောင်း ပြောနေကြတဲ့ ကက်ရ်ှမီးယားကို ဟိန္ဒိူဘာသာဝင် အများစုဖြစ်တဲ့ အိန္ဒိယလက်အောက်က လွတ်မြောက်ဖို့၊ ဒါမှမဟုတ် မူစလင်အများစုဖြစ်တဲ့ ပါကစ္စတန်နဲ့ ပေါင်းစည်းဖို့ မူစလင် လက်နက်ကိုင် အုပ်စုတွေကလည်း ၁၉၈၉ ခုနှစ်ကတည်းက ပုန်ကန်နေကြတာ ဖြစ်ပါတယ်။
ပြန်လည်သင့်မြတ်ရေး ညီလာခံခေါ်ဖို့ ဆီးရီးယားသမ္မတ ကြေညာ
ဆီးရီးယားသမ္မတ ဘက်ရှာအယ်လ်အာဆတ် (Bashar al-Assad)။
ဆီးရီးယား သမ္မတ ဘက်ရှာအယ်လ်အာဆတ် (Bashar al-Assad) က တနင်္ဂနွေနေ့မှာ ရှားရှားပါးပါး လူထုကို မိန့်ခွန်းပြောခဲ့ပြီး ပြည်တွင်းစစ် အတွက် နိုင်ငံရေး အဖြေရှာကြဖို့ တောင်းဆိုလိုက်သလို အတိုက်အခံ တပ်ဖွဲ့တွေကို အကြမ်းဖက်သမားတွေလို့ ရှုတ်ချ ပြစ်တင်လိုက်ပါတယ်။ ဒါဟာ ဇွန်လနောက်ပိုင်း နိုင်ငံတော်ကို ပထမဆုံးအကြိမ်အဖြစ် မိန့်ခွန်းပြောကြားတာ ဖြစ်ပါတယ်။ သူဟာ ရွေးကောက်ပွဲတွေနဲ့ ဖွဲ့စည်းပုံ အခြေခံ ဥပဒေမူကြမ်းအသစ် ချမှတ်ရေးကို ဦးတည်တဲ့ နိုင်ငံရေး လုပ်ငန်းစဉ်တွေ လုပ်ဆောင်ရာမှာ တစိတ်တဒေသဖြစ်တဲ့ အမျိုးသား ပြန်လည် သင့်မြတ်ရေး ဆွေးနွေးပွဲတွေ ကျင်းပပေးဖို့ ပြင်ဆင်နေတယ်လို့ ဒမတ်စကက် (Damascus) မြို့က ခန်းမမှာ သူ့ကို သစ္စာစောင့်သိတဲ့ ပရိသတ်ကို ပြောကြားခဲ့ပါတယ်။ ဒါပေမဲ့ ဒီဆွေးနွေးပွဲတွေမှာ ဆီးရီးယား နိုင်ငံကို သစ္စာဖောက်သူ ဘယ်သူမှမပါစေရဘူးလို့ ဆိုပါတယ်။ ဆီးရီးယား နိုင်ငံဟာ သူ့ရန်သူတွေနဲ့ စစ်ဖြစ်နေကြောင်း ပြောခဲ့ပေမဲ့ တော်လှန်ရေးတရပ်နဲ့ ရင်ဆိုင်နေရတာ မဟုတ်ဘူးလို့ ဆိုပါတယ်။ သူပုန်တွေကို အယ်လ်ခိုင်းဒါး အကြမ်းဖက်သမားတွေ အဖြစ် သူပြောနေကျ အတိုင်း မစ္စတာ အာဆတ်က ပြောကြားခဲ့ပြီး သူတို့ဟာ နိုင်ငံကို အစိတ်စိတ်အမွှာမွှာ ကွဲအောင် လုပ်နေတယ်လို့ ဆိုပါတယ်။ ဒါ့အပြင် ပြည်ပရောက် ဆီးရီးယား အတိုက်အခံတွေကိုလည်း အနောက်နိုင်ငံတွေရဲ့ ရုပ်သေးရုပ်တွေလို့ ပြောပါတယ်။ အမေရိကန် နိုင်ငံခြားရေးဌာနပြောခွင့်ရ ဗစ်တိုးရီးယားနျူလန် (Victoria Nuland) ကတော့ မစ္စတာအာဆတ်ရဲ့ ပြန်လည်သွေးစည်းရေး ဆွေးနွေးပွဲဟာ အမှန်နဲ့ ကင်းကွာနေပြီး အာဏာကို ဆက်လက်ဆုပ်ကိုင်ဖို့ နောက်တချီ ကျိုးစားနေတာလို့ ပြောလိုက်သလို ဗြိတိန် နိုင်ငံခြားရေး ၀န်ကြီး ကလည်း ဆီးရီးယားသမ္မတဟာ ပြန်လည် ပြုပြင်ပြောင်းလဲရေး အတွက် အနှစ်မပါတဲ့ ကတိတွေပေးနေပြီး ဒါကိုဘယ်သူကမှ ယုံမှာမဟုတ်ဘူးလို့ ပြောပါတယ်။ ဒါ့အပြင် တူရကီနိုင်ငံခြားရေး ၀န်ကြီး ကလည်း ဆီးရီးယား သမ္မတမှာ အနာဂါတ်အတွက် အစီအစဉ်မရှိဘဲ အတိုက်အခံတွေ ရှိနေတယ် ဆိုတာကို လက်မခံတဲ့အတွက် တိုးတက်မှုတွေ့ရမှာ မဟုတ်ဘူးလို့ ဆိုပါတယ်။ အတိုက်အခံ ညွှန့်ပေါင်းအဖွဲ့ဝင်တွေ ကတော့ ဆွေးနွေးပွဲတွေ ကျင်းပနိုင်မယ့် အခြေအနေတခု အဖြစ် မစ္စတာ အာဆတ် အာဏာစွန့်ဖို့ တောင်းဆိုနေပါတယ်။
0 comments:
Post a Comment