03.01.2013 နေ့ဖတ်ရန်သတင်းများ

by Myanmar Journal on Wednesday, January 2, 2013 at 5:27pm ·

KIA နယ်မြေ လေကြောင်းတိုက်ခိုက်မှု မြန်မာအစိုးရဝန်ခံ

တိုက်ပွဲရပ်နားစဉ် မြန်မာစစ်တပ်ရှိရာမှ ၁၃ မိုင်ခန့်အကွာမှာ အနားယူနေကြသော KIA ကချင်လွတ်မြောက်ရေးတပ်သားများ။

မြန်မာအစိုးရဘက်က KIA ကချင်တပ်တွေအပေါ်မှာ ထိုးစစ်ပြင်းထန်နေတာကြောင့် စစ်ရေးကို အာရုံစိုက် နေရလို့ ငြိမ်းချမ်းရေးဆွေးနွေးပွဲဘက်ကို အာရုံမလှည့်နိုင်သေးဘူးလို့ KIA ဘက်က ပြောပါတယ်။

တချိန်တည်းမှာပဲ KIA တပ်တွေကို လေကြောင်းကနေ တိုက်ခိုက်မှုတွေလုပ်တယ်ဆိုတာကိုတော့ မြန်မာအစိုးရ ပြောခွင့်ရသူဘက်က ဝန်ခံပါတယ်။ ကချင်ဘက်က စစ်ရေး၊ နိုင်ငံရေးနောက်ဆုံးအခြေအနေတွေကို ကိုသားညွန့်ဦးက ဆက်သွယ်မေးမြန်းထားပါတယ်။

KIA ကချင်လွတ်မြောက်ရေးတပ်တွေ ရှိတဲ့နေရာတွေကို မြန်မာအစိုးရဘက်က လေကြောင်း ကနေ တိုက်ခိုက်မှုတွေ ဒီကနေ့အထိ ရှိနေတုန်းပဲလို့ သိရပါတယ်။ တဘက်မှာတော့ စစ်ရေး အခြေအနေ တင်းမာနေတာကြောင့် နိုင်ငံရေး ဆွေးနွေးပွဲတွေဘက်ကို မလှည့်နိုင် ဖြစ်နေ ကြပါတယ်။ မြန်မာအစိုးရဘက်ကတော့ ဆွေးနွေးပွဲအတွက် ကမ်းလှမ်းထားပြီး ဖြစ်တယ်၊ KIA ဘက်က အကြောင်းပြန်မှုကို စောင့်နေတယ်လို့ ပြောပါတယ်။ KIA ဌာနချုပ်၊ လိုင်ဇာအနီးမှာ ရှိနေတဲ့ လဂျားယန်စခန်းက မြန်မာတပ်တွေအတွက် ရိက္ခာထောက်ပံ့ဖို့သွားတဲ့ တပ်တွေကို KIA ဘက်က ဖြတ်ပြီးတော့ တိုက်တာကြောင့် တိုက်ပွဲတွေ ဖြစ်လာတာဆိုပြီးတော့ မြန်မာ သမ္မတရုံး ညွှန်ကြားရေးမှူး ဦးဇော်ဌေးက ဗွီအိုအေကို ပြောပါတယ်။

“လဂျားယန်စခန်းမှာ မြန်မာ့တပ်မတော်က တပ်တွေရှိတယ်။ အဲဒီစခန်းကို ရိက္ခာပို့နေတဲ့ လမ်းကြောင်းမှာ KIA တပ်တွေက ပိတ်ဆို့ထားတဲ့အတွက်…”

မေး။ ။ လေကြောင်းတိုက်ခိုက်မှု ရှိတယ်လို့ ပြောပါတယ် ခင်ဗျ။ အဲဒါကော ဟုတ်ပါသလား။

“လေကြောင်း တိုက်ခိုက်မှုတော့ ရှိတယ်။ သို့သော် တကယ့် fighter လေယာဉ်တွေတော့ မဟုတ်ဘူး။ ကျနော်တို့သိရသလောက် K-8 အမောင်းသင်လေယာဉ်တွေလို့ ကျနော်တို့သိရတယ်။”

မေး။ ။ အစိုးရဘက်ကရော လက်ရှိ KIA နဲ့ဆွေးနွေးပွဲနဲ့ ပတ်သက်လို့ ဘယ်လို သဘောထားရှိပါလဲ။ ပြတ်သွားပြီလို့ ယူဆရလား၊ ဆက်လုပ်မှာလား။

“ကျနော်တို့ တောက်လျှောက်မေးနေပါတယ်။ ဝန်ကြီး ဦးအောင်မင်းကလည်း ကချင်ဘက်ကို ကြားက ငြိမ်းချမ်းရေး အကျိုးဆောင်တွေနဲ့ ထပ်ပြီးတော့ လုပ်နေပါတယ်။ ခရစ္စမတ်၊ ဒီဇင်ဘာပြီးရင် - new year ပြီးရင် တွေ့ဖို့၊ အခုအချိန်အထိ KIA ဘက်က အကြောင်းပြန်ကြားခြင်း မရှိသေးပါဘူး။

မေး။ ။ KIA ဘက်က ပြောတာက လိုင်ဇာကို မသိမ်းပေမဲ့ လဂျားယန်က လိုင်ဇာနဲ့ တအားကပ်တဲ့ အခြေအနေဖြစ်နေတဲ့ အခါကျတော့ လဂျားယန်ကို တိုက်လို့ရှိရင် သူတို့အနေနဲ့ စိုးရိမ်တဲ့သဘောမျိုးတော့ ပြောပါတယ်။

“လဂျားယန်က လိုင်ဇာနဲ့ တော်တော် နီးကပ်နေတယ်။ အဲဒီမှာ စခန်းရှိတာကိုး။ အဲဒီသွားတဲ့ လမ်းကြောင်းတလျှောက် မှာက ဟိုဘက် ဒီဘက်တပ်တွေ- KIA လည်းရှိတယ်။ မြန်မာ စစ်တပ်လည်းရှိတယ်။ အခုအချိန်အထိ လဂျားယန်ကို ရိက္ခာ မရောက်သေးဘူး လို့ ပြောတယ်။”

ဒါပေမဲ့လည်း မြန်မာတပ်ဘက်က စစ်ရေးလှုပ်ရှားမှုတွေဟာ KIA ကချင်လွတ်မြောက်ရေး တပ်တွေကို ထိန်းချုပ်နိုင်ဖို့ အတွက် ဆောင်ရွက်ချက်ဖြစ်တယ်လို့ KIA ဘက်က ယူဆပါတယ်။ KIA ဘက်ကတော့ နိုင်ငံရေး ဆွေးနွေးပွဲတွေအတွက် အဆင်သင့်ရှိပေမဲ့ အခုအချိန်မှာတော့ စစ်ရေးကို ပိုပြီးတော့ အာရုံထားနေရတယ်လို့ KIA ပြောခွင့်ရသူ ဦးလနန်က ပြောပါတယ်။

“အခု တိုက်ပွဲဖြစ်တဲ့နေရာမှာတော့ အရပ်သားတွေက မရှိဘူး။ တောင်ကုန်းတွေမှာ ဖြစ်တာ များတယ်။ ဒါကြောင့်မို့ အဓိက- ကတော့ KIA တပ်စခန်းတွေကို ရှင်တဲ့ ပုံစံပါပဲ ခင်ဗျ။ လေယာဉ်ပျံကနေ ပစ်ခတ်ပြီးတာနဲ့ သူတို့ လက်နက်ကြီးတွေနဲ့ ပြန်ပြီးတော့ ဆက်တိုက် ပစ်ခတ်တာမျိုး လုပ်ပါတယ်။ အဲဒါပြီးတဲ့အခါမှ မြေပြင်တပ်တွေ တက်ရှင်း-ရှင်းတဲ့ ပုံစံလုပ်ကြတယ်။ ဒါကြောင့်မို့ ဒီတိုက်ပွဲကတော့ မြန်မာ့တပ်မတော်ကနေပြီးတော့ အပြင်းထန်ဆုံး ထိုးစစ် ဆင်နွဲတယ်လို့ပဲ သတ်မှတ်ရတော့မယ်ခင်ဗျ။”

မေး။ ။ အခုကတော့ မြန်မာသမ္မတရုံးကတော့ ပြောနေပါတယ်။ သမ္မတအမိန့် ကတော့ လိုင်ဇာကို သိမ်းဖို့ မဟုတ်ပါဘူး၊ လိုင်ဇာကို သိမ်းဖို့ မရှိပါဘူးလို့ ပြောနေ ပါတယ်။

“သိမ်းတယ်ဆိုတဲ့နေရာမှာ အဲဒီ လိုင်ဇာမြေပေါ်မှာ တပ်မတော်သားတွေ ခြေလာချတာ- အဲဒါကိုပဲ သိမ်းတာလို့ ခေါ်တာ မဟုတ်ဘူး ခင်ဗျ။ ဗဟိုဌာနချုပ်အတွက် အချက်အခြာကျတဲ့ ကင်းစခန်းကို သူတို့ မရ ရအောင်တက်ရှင်းတယ်၊ စခန်းသိမ်းတယ်ဆိုတာလည်း ဒါက ဗဟိုဌာနချုပ်ကို ထိန်းချုပ်မှု လုပ်တာပဲ၊ ထိန်းချုပ်မှုဆိုတာ သိမ်းပိုက်တာနဲ့ အတူတူပါပဲ။ ဒါကတော့ သူတို့ စကားကို ဟိုရှောင် ဒီရှောင်ပြောဆိုမှုပဲလို့ ပြောရမယ် ခင်ဗျ။”

မေး။ ။ နောက်တချက်ကတော့ ကျနော် ငြိမ်းချမ်းရေး ဆွေးနွေးပွဲ အခြေအနေ မေး ချင်ပါတယ်။ မြန်မာအစိုးရဘက်က ပြောတာက KIA ကို ခရစ္စမတ်အပြီး ဒီနှစ် ဆန်းပိုင်းလောက်မှာ ဆွေးနွေးဖို့ ကမ်းလှမ်းထားတယ်လို့ ပြောပါတယ်ခင်ဗျ။  KIA ဘက်က မတုံ့ပြန်သေးဘူးလို့ ပြောနေတယ်။ အဲဒါကရော။

“ ဒီဇင်ဘာ ၁၃ ရက်မှာ ဦးအောင်မင်းက စာတစ်စောင် ပို့တာရှိတယ်။ ဒီဇင်ဘာလ အတော အတွင်းမှာ ခင်ဗျားတို့  KIA အဖွဲ့တွေကတော့ အလုပ်တွေ များပါလိမ့်မယ်။ သူဘာကို ဆိုလိုတယ်ဆိုတဲ့ ကိစ္စကတော့ အဲဒီတုန်းက နားမလည်ခဲ့ဘူး။ ဒါကြောင့်မို့လို့ ဇန်နဝါရီလ ဆန်းမှာ ပြန်ပြီးတော့ တွေ့ရအောင်၊ ပြည်တွင်း တစ်နေရာမှာ တွေ့ရအောင်ဆိုပြီးတော့ စာရေးထားတာ ရှိတယ်။ အဲဒီဟာနဲ့တချိန်တည်းပဲ ဒီ ၁၄ ရက်နေ့ မနက်ကစပြီးတော့ တပ်ရင်း၊ တပ်ဖွဲ့တွေ အလုံးအရင်းဝင်လာတယ်၊ အဲဒီအချိန်ကစပြီး ကျနော်တို့ တကယ်ပဲ အလုပ်တွေများသွားတယ် ခင်ဗျ။

ဒါကြောင့်မို့ အလုပ်တွေ များနေတဲ့အတွက်ကြောင့်မို့ ဦးအောင်မင်းရဲ့ စာအပေါ်မှာတော့ အခုအချိန်အထိ ကျနော်တို့က ဘယ်လိုမှ တုံ့ပြန်နိုင်တာမျိုး၊ ပြန်ကြားနိုင်တာမျိုးတော့ မရှိသေးဘူး ခင်ဗျ။ ဒါပေမဲ့ ဒီပြဿနာတွေက နိုင်ငံရေးပြဿနာ ဖြစ်တဲ့ အတွက်ကြောင့် စစ်ရေးနည်းနဲ့ ဘယ်လိုမှ ဖြေရှင်းလို့ အဆုံးသတ်နိုင်မှာ မဟုတ်ဘူးခင်ဗျ။”

မေး။ ။ ဆိုလိုတာကတော့- လက်ရှိထိုးစစ်ကို သူတို့ဘက်က ရပ်တော့မှပဲ စကားပြောလို့ရမယ့် အခြေအနေမျိုး ပေါ်လာမှာပေါ့။

“အဲလိုလည်း ကျနော်တို့က ပြောလိုတာမျိုး မဟုတ်ဘူး ခင်ဗျ။ ထိုးစစ်ကတော့ အခုမှ လုပ်တာ မဟုတ်ပါဘူး။ သူတို့ အမြဲတမ်းလုပ်နေတဲ့ကိစ္စက ထိုးစစ်ပါ။ သူတို့ ပြောတဲ့နေရာ မှာတော့ ထိုးစစ်မဟုတ်ဘူး၊ တပ်စခန်းတွေကို ရိက္ခာပို့တယ်၊ အုပ်ချုပ်မှုပိုင်းဆိုင်ရာ ကိစ္စနဲ့သွားတယ်၊ စားနပ်ရိက္ခာတွေ သွားပို့ပေးတယ်လို့ အဲလိုပဲ ပြောတယ်။ ဒါပေမဲ့ ကျနော်တို့ရတဲ့ သက်သေ အထောက်အထားတွေ အားလုံးမှာ ဆန်အိတ်ထဲမှာ လက်နက် ကျည်တွေ ဖွက်ပြီးမှ ယူသွား တာမျိုး၊ ဒါတွေ အများကြီးရှိပါတယ်။ နောက်ပြီး သွားရင်း လာရင်းနဲ့ အင်အားဖြည့်တင်းတာမျိုး၊ နီးရာ KIA တပ်စခန်းတွေကို ဝင်ရောက် ပစ်ခတ်သွားတာမျိုး သူတို့ အမြဲတမ်းလုပ်တဲ့ကိစ္စပါ။ လိုင်ဇာကို လာထိုးတဲ့ဟာမှ ထိုးစစ်လုပ်တာမဟုတ်ဘူး။ နဂိုရ်ကတည်းက အဲလို ပြုမူခဲ့တာပါ။"

မြန်မာတပ်ဘက်က လေကြောင်းက တိုက်တဲ့နေရာမှာ နယ်စပ်ဖြစ်နေ တာကြောင့် မြန်မာလေယာဉ်တွေဟာ တရုတ်ဘက်က လေပိုင်နက်ကိုပါ ဝင်ရောက်တာမျိုး ရှိတယ်လို့ KIA ဘက်က ပြောပါတယ်။ တရုတ်ဘက်က ဒါကို တစုံတရာ တုံ့ပြန်တာမျိုး မရှိပေမဲ့ နယ်စပ်တလျှောက်မှာတော့ တရုတ်ဘက်ကနေပြီးတော့ မြေပြင်တပ် လုံခြုံရေးတွေ တိုးမြှင့်ချထားတယ်လို့ သိရပါတယ်။

လက်ရှိအားဖြင့်တော့ မြန်မာအစိုးရဘက်ကနေပြီးတော့ တပ်မ (၈၈)၊ တပ်မ (၁၀၁) နဲ့ မိုးကောင်းအခြေစိုက်တပ်တွေ စုစုပေါင်း တပ်ရင်း (၈) ရင်းလောက်နဲ့ KIA ကို ထိုးစစ် ဆင်နေတာဖြစ်တယ်လို့ KIA ဘက်က ပြောပါတယ်ခင်ဗျာ။

အမေရိကန်ဘဏ္ဍာရေး ညှိနှိုင်းမှု လွှတ်တော်နှစ်ရပ် အတည်ပြု

 

အမေရိကန်ပြည်ထောင်စုမှာ ဘဏ္ဍာရေးဆိုင်ရာ အကျပ်အတည်းကြီး ဆိုက်မယ့်အရေးကို ရှောင်ရှားနိုင်မယ့်အစီအစဉ်တခုကို အမေရိကန်အောက်လွှတ်တော်က အတည်ပြုလိုက်ပါတယ်။

ဒါဟာဖြင့် အမေရိကန်စီးပွားရေးကို ပိုအားကောင်းစေမယ့် ကျယ်ပြန်တဲ့ ကြိုးပမ်းမှု တခုရဲ့ ခြေလှမ်းတဆင့်ဖြစ်တယ်လို့ သမ္မတ ဘရာ့ခ်အိုဘားမားက ပြောပါတယ်။

အထက်လွှတ်တော်က အစောပိုင်းမှာ အတည်ပြုထားတဲ့ အစီအစဉ်ကို ရီပတ်ဘလီကန်ပါတီ ကြီးစိုးထားတဲ့ အောက်လွှတ်တော်ကနေ အင်္ဂါနေ့နှောင်းပိုင်းမှာ အတည်ပြုခဲ့တာပါ။ အဲဒီအစီအစဉ်ထဲမှာ အစိုးရအသုံးစရိတ်ကို ပိုပြီး လျှော့ချဖြတ်တောက်တာတွေ ထည့်သွင်းဖို့ ရီပတ်ဘလီကန် လွှတ်တော် အမတ်တချို့က ကြိုးစားခဲ့သေးပေမဲ့ တခြားလွှတ်တော် ကိုယ်စားလှယ်တွေရဲ့ ထောက်ခံမဲ အလုံအလောက်မရတာကြောင့် မအောင်မြင်ခဲ့ပါဘူး။

အခွန်နှုန်းထား၊ အစိုးရအသုံးစရိတ်ပမာဏ၊ ကာလရှည်ကြာ ဆိုးရွားနေတဲ့ လိုငွေပြမှုနဲ့ နိုင်ငံပေါ်တင်ရှိနေတဲ့ ကြွေးမြီကိစ္စတွေနဲ့ ပတ်သက်ပြီး သမ္မတအိုဘားမားနဲ့ ကွန်ဂရက် လွှတ်တော်က ရီပတ်ဘလီကန်တွေအကြား လွန်ခဲ့တဲ့ တစ်နှစ်ကျော်ကတည်းက အငြင်းပွားနေခဲ့တာပါ။ အင်္ဂါနေ့ကရခဲ့တဲ့ သဘောတူညီချက်ဟာ မပြည့်စုံဘူးဆိုပေမဲ့ အမေရိကန်လူထုအတွက် အကောင်းဆုံးဖြစ်တယ်လို့ လွှတ်တော် ခေါင်းဆောင်တွေက ပြောကြပါတယ်။

အမေရိကန်ပြည်ထောင်စုမှာ ဘဏ္ဍာရေး အကျပ်အတည်းပြေလည်အောင် ညှိနှိုင်းနိုင်ခဲ့ တာကြောင့် ကမ္ဘာတ၀န်းက အစု ရှယ်ယာဈေးကွက်တွေမှာ ဈေးနှုန်းတွေ တက်သွားခဲ့ပါတယ်။

အစိုးရက KIA ကို အမြစ်ဖြုတ်ချင်နေ

တပ်မတော် ရဟတ်ယာဉ်တွေ ကေအိုင်အေ စခန်းတွေကို တိုက်ခိုက် (Photo:Free Burma Rangers)

မြန်မာအစိုးရတပ်တွေက ပြီးခဲ့တဲ့ လကုန်ပိုင်းက စပြီး ကချင်လွတ်လပ်ရေး တပ်မတော် ကေအိုင်အေ ရဲ့ ဌာနချုပ်ရှိရာ လိုင်ဇာစခန်း တဝိုက်ကို တိုက်လေယာဉ်တွေ၊ တိုက်ခိုက်ရေး ရဟတ်ယာဉ်တွေ သုံးပြီး တိုက်စစ်ဆင်နေခဲ့ တာဟာ ကေအိုင်အေကို အပြီးသတ် ချေမှုန်းချင်လို့ ဖြစ်တယ်လို့ ကေအိုင်အေရဲ့ သုတေသနနဲ့ လေ့လာရေးဌာန ဌာနမှူး ဗိုလ်မှူးကြီး ဇော်တောင်က ဘီဘီစီကို ပြောပါတယ်။

အစိုးရတပ်တွေက ပြီးခဲ့တဲ့ ဒီဇင်ဘာ ၃၀ ရက်နေ့က လိုင်ဇာဌာနချုပ်နဲ့ ၁၀ မိုင်လောက်ပဲ ဝေးတဲ့ လဂျားယန် ဒေသက အရေးပါတဲ့ ကေအိုင်အေ ရှေ့တန်း စခန်းကုန်းတခုကို သိမ်းပိုက်ခဲ့ပါတယ်။ အဲဒီလို သိမ်းပိုက်ရာမှာ လေကြောင်း အကူအညီ ယူပြီးတိုက်ခဲ့တယ်လို့လဲ ပြန်ကြားရေးဝန်ကြီးဌာနရဲ့ ဇန်နဝါရီလ ၂ ရက်နေ့ သတင်းထုတ်ပြန်ချက်မှာ ဖော်ပြခဲ့ပါတယ်။

အစိုးရထုတ်ပြန်ချက်မှာတော့ တပ်မတော်ရဲ့ တပ်စခန်းတွေရှိရာကို ထောက်ပံ့ရေး ရိက္ခာ မပို့ဆောင်နိုင်အောင် ကေအိုင်အေဘက်က ပိတ်ဆို့တားဆီးမှုတွေလုပ်တဲ့ အတွက် လမ်းကြောင်းရှင်းလင်းနိုင်ဖို့ အခုလို တိုက်ခိုက်မှုတွေ လုပ်ခဲ့ရတာလို့ ဆိုပါတယ်။

ဗိုလ်မှူးကြီး ဇော်တောင်ကတော့ အစိုးရတပ်တွေက အင်အားတွေ ကြီးကြီးမားမား စုဆောင်းပြီး လက်နက်ကြီးတွေနဲ့ တိုက်ခိုက်တာ၊ တိုက်လေယာဉ်တွေ သုံးတာကို ကြည့်ရင် လမ်းကြောင်း ရှင်းလင်းရုံသက်သက် ရည်ရွယ်တာ လို့ မယူဆနိုင်ကြောင်း ပြောပါတယ်။

လိုင်ဇာဒေသဟာ တရုတ်နိုင်ငံနဲ့ နယ်စပ်ချင်းထိစပ်ပြီး ရှိပေမယ့် အခုနောက်ဆုံး တိုက်ခိုက်မှုတွေ လုပ်လာတာကို တရုတ်ဘက်က တရားဝင် ဘာမှ ထုတ်ပြောတာ မကြားရသေးပါဘူး။

လိုင်ဇာအထိ တိုက်ပွဲတွေ ဖြစ်လာလို့ ဒုက္ခသည်တွေ ထွက်ပြေးလာရရင် နေစရာ ပေးဖို့တော့ တရုတ်ဘက်မှာ စီစဉ်မှုတချို့ ရှိနေတယ်လို့ ကြားရကြောင်း ဗိုလ်မှူးကြီး ဇော်တောင်က ပြောပါတယ်။

အစိုးရကတော့ လိုင်ဇာဌာနချုပ်ကို ဝင်တိုက်ဖို့ အစီအစဉ်မရှိပါဘူးလို့ ပြောနေ ပါတယ်။

အစိုးရရဲ့ ငြိမ်းချမ်းရေးအဖွဲ့က အပစ်ရပ်ရေး ဆွေးနွေးဖို့ တဖက်က ပြောနေချိန်မှာ တပ်ဖက်ကတော့ တိုက်စစ်တွေ ဆင်နေတဲ့အတွက် အစိုးရနဲ့ တပ်အကြား သဘောချင်းမညီဘူးလို့ ယူဆမှုတွေ ရှိနေပေမယ့် ဗိုလ်မှူးကြီး ဇော်တောင်ကတော့ တိုင်းရင်းသားအဖွဲ့တွေ အပေါ် တပ်နဲ့ အစိုးရရဲ့ သဘောထား အတူတူပဲ ဖြစ်တယ်လို့ သူတို့ ယုံကြည်တယ်လို့ ပြောပါတယ်။

အခုလောက် ပြင်းပြင်းထန်ထန် တိုက်ပွဲတွေ ဆင်နေတဲ့ အချိန်မျိုးမှာ အစိုးရက ကမ်းလှမ်းလာရင်လည်း ငြိမ်းချမ်းရေး ဆွေးနွေးပွဲတွေကို ကေအိုင်အေဖက်က ပါဝင်ဖို့ ပြန်သုံးသပ်ရလိမ့်မယ်လို့ ဗိုလ်မှူးကြီးဇော်တောင်က ပြောပါတယ်။

ထိုင်းက မြန်မာ အလုပ်သမားတွေ သတ်မှတ်အနိမ့်ဆုံးလစာ ရနိုင်ခြေနည်း

ထိုင်းနိုင်ငံ၊ ကမ္ဘာလှည့်ခရီးသည်တွေလာလေ့ရှိရာ ပန်ငခရိုင်က ဈေးချိုချိုနှင့်ခိုင်းနိုင်သော မြန်မာ ဆောက်လုပ်ရေးအလုပ်သမားများ။

၂၀၁၃ ခု၊ ဇန်နဝါရီလ တစ်ရက်နေ့ကစလို့ ထိုင်းနိုင်ငံတဝှမ်းလုံးက အလုပ်သမားတွေရဲ့ အနိမ့်ဆုံး လစာ တစ်ရက်ကို ဘတ်ငွေ ၃၀၀ ရရှိရမယ်လို့ ထိုင်းအစိုးရသတ်မှတ်ထားတဲ့အတိုင်း မြန်မာ ရွှေ့ပြောင်း အလုပ်သမားတွေရဖို့ အခြေအနေနည်းတယ်လို့ မဟီဒေါတက္ကသိုလ်က ရွှေ့ပြောင်း အလုပ်သမားအရေး ကျွမ်းကျင်သူက ပြောလိုက်ပါတယ်။ အထူးသဖြင့် မြန်မာနိုင်ငံက ရွှေ့ပြောင်း အလုပ်သမား သောင်းချီရှိနေတဲ့ မဲဆောက်မြို့က အလုပ်သမားတွေ ရသင့်တဲ့ ရပိုင်ခွင့်ကို ခံစားနိုင်ကြဖို့ အခွင့်အလမ်း နည်းတယ်လို့ ဆိုပါတယ်။ ဘာကြောင့်ပါလဲ -ဆက်သွယ်စုံစမ်းထားတဲ့ ဘန်ကောက်ရုံးက မစုမြတ်မွန်က တင်ပြပါမယ်။

ထိုင်းနိုင်ငံတဝန်းလုံးက အလုပ်သမားတွေအနေနဲ့ အမေရိကန်ဒေါ်လာ ၁၀ ဒေါ်လာလောက်နဲ့ ညီမျှတဲ့ တရက် အနိမ့်ဆုံးလုပ်ခ ဘတ် ၃၀၀ ကို ဇန်နဝါရီလ ၁ ရက်နေ့ကတည်းက စတင်ရရှိကြမှာ ဖြစ်ပါတယ်။ ဒါပေမဲ့ ထိုင်းနိုင်ငံမှာ သန်းနဲ့ချီ ရှိနေကြတဲ့ မြန်မာနိုင်ငံက ရွှေ့ပြောင်းအလုပ်သမားတွေ အနေနဲ့ ရသင့်တဲ့ အနိမ့်ဆုံးလစာ ရနိုင်တဲ့အခြေအနေ နည်းတယ်လို့ ဘန်ကောက်မြို့၊ မဟီဒေါ တက္ကသိုလ်က ရွှေ့ပြောင်းအလုပ်သမားအရေးကျွမ်းကျင်သူ Adndy Hall ကပြောပါတယ်။ အထူးသဖြင့် ထိုင်းမြန်မာနယ်စပ်က စက်ရုံအလုပ်ရုံတွေများတဲ့ မဲဆောက်မြို့မှာ အလုပ်လုပ်နေကြတဲ့ ရွှေ့ပြောင်းအလုပ်သမားတွေ တနေ့ ဘတ် ၃၀၀ ရကြမှာ မဟုတ်ဘူးလို့ ပြောပါတယ်။

“အလုပ်ရှင်တွေပေးမှာ မဟုတ်ပါဘူး။ ထိုင်းနိုင်ငံမှာ ရွှေ့ပြောင်းအလုပ်သမားတွေကို ပေးသင့်တဲ့ အနိမ့်ဆုံးလစာ မပေးကြတဲ့ အလုပ်ရှင်တွေ အများကြီး ရှိပါတယ်။ အလုပ်ရှင်တွေက ရဲကိုပေးရတယ်။ တာဝန်ရှိသူတွေကို ပေးရတယ်ဆိုပြီး အလုပ်သမားတွေရဲ့ လုပ်အားခကို အမြတ်ထုတ်နေကြတာပါ၊ ကောင်းဆုံး သာဓကကတော့ မဲဆောက်မှာပါ၊ မဲဆောက်က အလုပ်ရှင်တွေက အလုပ်သမားတွေကို တနေ့ ဘတ် ၃၀၀ ပေးမှာကို မဟုတ်ပါဘူး”-လို့ ပြောသွားတာဖြစ်ပါတယ်။

ယာယီနိုင်ငံကူးလက်မှတ် တနည်းအားဖြင့် ထိုင်းနိုင်ငံမှာ တရားဝင်နေထိုင်ခွင့်ရှိထားတဲ့ အလုပ်သမားတွေကတော့ သတ်မှတ် အနိမ့်ဆုံး လစာကို ခံစားရနိုင်ဖို့များပေမဲ့ ဘာလက်မှတ် အထောက်အထားမှ မရှိကြတဲ့ ရွှေ့ပြောင်းအလုပ်သမား ၂ သန်းလောက်အတွက်ကတော့ ထိုင်းအစိုးရ သတ်မှတ်ချက်အတိုင်း ရနိုင်မှာ မဟုတ်ဘူးလို့ ဆိုပါတယ်။ တကယ်လို့ ဥပဒေအရ ပေးတယ်ဆိုရင်လဲ တခြားနည်းလမ်းတွေနဲ့ ပြန်ပြီး လစာ အနှိမ်ခံရနိုင်တယ်လို့လည်း Andy Hall ကပြောပါတယ်။

“အလုပ်သမားတွေ အနိမ့်ဆုံးရသင့်တဲ့ လစာရပါလိမ့်မယ်၊ ဒါပေမဲ့ သူတို့ရဲ့ တခြားရပိုင်ခွင့်တွေ ဖြတ်တာကို ခံရနိုင်ပါတယ်။ အချိန်ပို အလုပ်ချိန်လဲ ဖြတ်ခံရနိုင်ပါတယ်။ အချိန်ပိုလုပ်ချိန် နည်းတယ် ဆိုရင် လကုန်လို့ လခထုတ်ချိန်မှာ လစာနည်းနည်းပဲ ရကြပါလိမ့်မယ်၊ အချိန်ပိုခက တနာရီကို ၁ ဆခွဲလောက် ရကြတာပါ၊ အလုပ်ရှင်တွေဖက်က တနေ့ပေးရတဲ့ ဘတ် ၃၀၀ ပြန်ကာမိအောင် အလုပ်သမားတွေဆီက ဖြတ်ကြမှာပါ၊ နောက်အလုပ်သမားတွေ အပြင်ထွက်ချိန်တွေ လျှော့ပြစ်တာ မျိုးလို အလုပ်သမားတွေအပေါ်မှာ ဖိအားတွေ များလာနိုင်ပါတယ်”- လို့ ရွှေ့ပြောင်းအလုပ်သမားအရေးကျွမ်းကျင်သူ Andy Hall က သူ့အမြင်ကို ပြောသွားပါတယ်။ဇန်နဝါရီလ ၁ ရက်နေ့ မတိုင်ခင်က မဲဆောက်ခရိုင်မှာ အနိမ့်ဆုံး တရက်လုပ်အားခ ၂၂၆ ဘတ် ပေးရမယ်လို့ ထိုင်းအစိုးရက သတ်မှတ်ထားတာတောင် မြန်မာနိုင်ငံက ရွှေ့ပြောင်း အလုပ်သမား တချို့ဆိုရင် ဘတ် ၁၀၀ တောင် မရကြပါဘူး။ မဲဆောက်မြို့က မီးလုံးစက်ရုံတခုမှာ အလုပ်လုပ်နေတဲ့ ရွှေ့ပြောင်းအလုပ်သမားတယောက်က ပြောပြတာက-“သတ်မှတ်ထားတဲ့နှုန်း မရပါဘူး။ ရနေတာက တချို့ လက်ရှိအလုပ်သမားတွေကျတော့ ၆၅ ဘတ်ရတယ်။ တချို့ကျတော့ ၇၅ ဘတ် ရတယ်။ တချို့ကျတော့ ၈၀ ရပါတယ်ခင်ဗျာ။ ကျနော်တို့ ကြားတော့ ကြားထားတယ်။ တနေ့ကို ၃၀၀ ရမယ်လို့၊ ဒါပေမဲ့ OT (အချိန်ပို) က တနေ့ကို ဘယ်လောက်ပေးမလဲဆိုတာ ကျနော်တို့ မသိဘူး ခင်ဗျ။ ဘယ်နှစ်နာရီကနေ ဘယ်နှစ်နာရီအထိကို ၃၀၀ ရမှာလဲ၊ မနက် ၈ နာရီကနေ ညနေ ၅ နာရီအထိကို ၃၀၀ လား၊ ကျန်တဲ့ အချိန်တွေကျတော့ ကျနော်တို့ကို ဘယ်လို ပေးမှာလဲ။ အဲဒါမျိုးပေါ့နော်။”အလုပ်သမားအများစုအနေနဲ့ သူတို့အခွင့်အရေးကို တောင်းဆိုနိုင်တဲ့ အခြေအနေ မရှိကြတာကို ရွှေ့ပြောင်းအလုပ်သမားအရေးဆောင်ရွက်နေတဲ့ ရောင်ခြည်ဦးအဖွဲ့က ဥပဒေရေးရာတာဝန်ခံ ကိုထွေးနိုင်က VOA ကို ခုလို ပြောပြပါတယ်။

“အများစုကတော့ တိုင်ဖို့အတွက် အခြေအနေ မရှိဘူး။ ဘာလို့လဲဆိုတော့ သူတို့အတွက် အန္တရာယ်ရှိပါတယ်။ အလုပ်ရှင်က အလုပ်ဖြုတ်တာတို့၊ အလုပ်ဖြုတ်လိုက်ပြီဆိုရင် အလုပ်သမား တစ်ယောက်က အလုပ်ပြန်ရှာဖို့ အရမ်းခက်ခဲတာလေ။ အလုပ်ဖြုတ်တာတို့၊ လုပ်အားခ မထုတ်ပေးတာတို့၊ အဲလိုတွေ ရှိတယ်။ နောက် သူတို့ကဒ်တွေကို ဖြတ်သိမ်းလိုက်တာတို့၊ အလုပ်သမားလက်မှတ်တွေ ဖြတ်သိမ်းလိုက်တာတွေ ရှိတဲ့အတွက်ကြောင့် အလုပ်သမား အတော်များများက ကြောက်ကြတယ်။ နောက်တခုက ဘာလဲဆိုတော့ သူများနိုင်ငံမှာ အလုပ် လုပ်ကြရတာ၊ အဲဒီလိုမျိုး လုပ်မယ်ဆိုရင် ငါတို့အတွက် အခွင့်အရေး ရှိပါ့မလား၊ ငါတို့အတွက် ရပါ့မလားဆိုတဲ့ စိတ်တွေက အလုပ်သမားတိုင်းမှာ ဖြစ်နေတာပေါ့နော်။”

ရွှေ့ပြောင်းအလုပ်သမားအရေး ကျွမ်းကျင်သူ Andy Hall ရဲ့ အပြောအရဆိုရင် မဟာချိုင်ခရိုင်ထဲက နိုင်ငံတကာ စက်ရုံကြီးတွေမှာတော့ ရွှေ့ပြောင်းအလုပ်သမားတွေကို ဥပဒေနဲ့အညီ လုပ်ခလစာ ပေးကြတာတွေ့ရတယ်လို့ ပြောပါတယ်။ ထိုင်းအစိုးရဘက်ကလည်း မြန်မာနိုင်ငံက ရွှေ့ပြောင်း အလုပ်သမားတွေ သတ်မှတ်ချက်အတိုင်း တနေ့ ဘတ် ၃၀၀ ရစေပါမယ်လို့ အာမခံထားတာကို သူက အခုလိုပြောပါတယ်။

“သေချာတာကတော့ ဝန်ကြီးချုပ် Yinluck နဲ့ သမ္မတ ဦးသိန်းစိန်တို့တွေ့ကြတုန်းက မြန်မာနိုင်ငံက ရွှေ့ပြောင်းအလုပ်သမားတွေ ဘတ် ၃၀၀ ရဖို့ကိစ္စကိုလည်း သဘောတူခဲ့ကြပါတယ်။ ဝန်ကြီးချုပ် ကိုယ်တိုင်က မြန်မာရွှေ့ပြောင်းအလုပ်သမားတွေ တနေ့အနည်းဆုံးလုပ်အားခ ဘတ် ၃၀၀ ရစေရပါမယ်လို့ အာမခံခဲ့ပါတယ်။ အလားတူ ထိုင်း အလုပ်သမားဝန်ကြီးကလည်း အာမခံခဲ့တာပါ။ ထိုင်းအစိုးရထိပ်ပိုင်းကတော့ မြန်မာရွှေ့ပြောင်းအလုပ်သမားတွေ ထိုင်းအလုပ်သမားတွေနဲ့ တန်းတူရစေပါမယ်ဆိုတာကို အသေအချာပြောထားကြပါတယ်”လို့ မဟီဒေါတက္ကသိုလ်က ရွှေ့ပြောင်းအလုပ်သမားရေးရာ ကျွမ်းကျင်သူ Andy Hall က VOA မြန်မာပိုင်းကို ပြောပြပါတယ်။

ထိုင်းနိုင်ငံရဲ့ ရွှေ့ပြောင်းအလုပ်သမားဆိုင်ရာ မူဝါဒသစ်ကြောင့် မြန်မာနိုင်ငံက တရားဝင် အလုပ်လာလုပ်ကြတဲ့ ရွှေ့ပြောင်းအလုပ်သမားတွေအနေနဲ့ ထိုင်းအလုပ်သမားတွေနဲ့ တန်းတူ အလုပ်သမား ခံစားခွင့်တွေပေးထားပေမဲ့ ဘယ်လို ရပိုင်ခွင့် ခံစားခွင့်ရှိတယ်ဆိုတာကို မြန်မာနိုင်ငံက ရွှေ့ပြောင်းအလုပ်သမားအများစုက မသိကြပါဘူးရှင်။

လှေစီးပြေးရိုဟင်ဂျာ ဒုက္ခသည်တွေ ထိုင်း အစိုးရ နေရပ်ရင်း ပြန်ပို့မည်

၂၀၁၃၊ ဇန်နဝါရီလ ၁ ရက်နေ့က ထိုင်းအစိုးရက ဖမ်းဆီးထားသော ရိုဟင်ဂျာ လှေစီးပြေး ဒုက္ခသည်များ။

မြန်မာနိုင်ငံ၊ ရခိုင်ပြည်နယ်မှာ ဖြစ်ပွားခဲ့တဲ့ လူမျိုးရေးပဋိပက္ခတွေကနေ ထွက်ပြေးပြီး ရောက် လာကြတဲ့ ရိုဟင်ဂျာ လှေစီးဒုက္ခသည်တွေကို နေရပ်ပြန်ပို့မယ်လို့ ထိုင်းအာဏာ ပိုင်တွေက ပြောပါတယ်။ အမျိုးသမီးနဲ့ ကလေးငယ်တွေအပါအ၀င် စုစုပေါင်း ၇၁ ဦးပါလာတဲ့ အဲဒီလှေဟာ မလေးရှားနိုင်ငံဘက်ကို ဦးတည်သွားနေတယ်လို့ ယူဆရပြီး ထိုင်းနိုင်ငံ၊ ဖူးခက် ကမ်းခြေမြို့ကို ရောက်သွားကြတာ ဖြစ်ပါတယ်။ ဒီအကြောင်း ဗွီအိုအေ သတင်းဆောင်းပါးနဲ့ ပူးတွဲပြီး ကိုဇော်ဝင်းလှိုင်က တင်ပြပေးထားပါတယ်။

ပင်လယ်ထဲ ၁၃ ရက်လောက်မျောနေတယ်လို့ ယူဆရတဲ့ အဲဒီ လှေစီးပြေး ဒုက္ခသည်တွေကို ထိုင်းအာဏာပိုင်တွေက ကြားဖြတ် ဖမ်းဆီးလိုက်ပြီး လိုအပ်တဲ့ စားနပ်ရိက္ခာတွေ အင်္ဂါနေ့ က ပေးအပ်ခဲ့တယ်လို့ ဆိုပါတယ်။ ဒါပေမယ့် ဒေသခံ သတင်းမီဒီယာတွေကတော့ သူတို့ကို ဖမ်းဆီးပြီး မြန်မာပြည်ဘက်ကို ကုန်းလမ်းက ပြန်ပို့ဖို့ အမိန့်ထုတ်ထားတယ်လို့ ဗုဒ္ဓဟူးနေ့မှာ ရေးသား ဖော်ပြကြပါတယ်။

ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR က သူတို့ဟာ တကယ့် ဒုက္ခသည်တွေ ဟုတ်မဟုတ် အသေအချာ စစ်ဆေးခွင့်မရမချင်း ဒီဒုက္ခသည်တွေကို ထိုင်းအစိုးရအနေနဲ့  ပြန်မပို့သင့်ဘူးလို့ လူ့အခွင့်အရေး စောင့်ကြည့်ရေးအဖွဲ့က အကြီးတန်း သုတေသီ Sunai Phasuk က ဗွီအိုအေကို ပြောပါတယ်။

အိမ်နီးချင်းနိုင်ငံတွေက ဒုက္ခသည်တွေကို လက်ခံလိုစိတ်မရှိတဲ့ ထိုင်းအစိုးရအနေနဲ့ ပိုမို ကောင်းမွန်တဲ့ ပေါ်လစီတွေ ချမှတ် ကျင့်သုံးဖို့လိုမယ်လို့ သူက ပြောပါတယ်။

“မလေးရှားကိုသွားအလုပ်လုပ်ကြမယ့် ရိုဟင်ဂျာလူငယ်တွေချည်း မဟုတ်ဘဲ ကလေးငယ်တွေ၊ အမျိုးသမီးတွေပါ ပါလာတဲ့ သင်္ဘောကို ထိုင်းအာဏာပိုင်တွေ ပထမဆုံးအကြိမ်အဖြစ် ကြားဖြတ် ဖမ်းမိလိုက်တာပါ။ ဒီလူတွေရဲ့ အဆိုအရကတော့ သူတို့ဟာ ဖိနှိပ် ညှဉ်းပန်းမှုတွေ၊ လူအခွင့်အရေးချိုးဖောက်ခံရမှုတွေနဲ့ အကြမ်းဖက်မှုတွေက လွတ်ကင်းရာကို ထွက်ပြေးလာကြတာလို့ ဆိုတယ်။”

ထိုင်းအာဏာပိုင်တွေက အခုလို လှေစီးပြေးဒုက္ခသည်တွေကို လက်ခံလေ့မရှိတာကြောင့် ဒီလူတွေဟာ သူတို့သွားလိုရာကို ခရီးဆက်ကြလေ့ ရှိပါတယ်။ ၂၀၀၈ ခုနှစ်နဲ့ ၂၀၀၉ ခုနှစ်တွေအတွင်း ထိုင်းနိုင်ငံက လက်မခံဘဲ နှင်ထုတ်လိုက်တဲ့အတွက် ရိုဟင်ဂျာ ဒုက္ခသည်ပေါင်း ရာနဲ့ချီပြီး သေဆုံးခဲ့တယ်လို့ ဆိုပါတယ်။

ရခိုင်ပြည်နယ်အတွင်း ဖြစ်ပွားခဲ့တဲ့ ပဋိပက္ခတွေနောက်ပိုင်း မလေးရှားနိုင်ငံ ကို ရောက်လာကြတဲ့ ရိုဟင်ဂျာ ဒုက္ခသည်စာရင်းဟာ တရားဝင်အားဖြင့် ၆၀၀ ကျော်သွားပြီလို့ မလေးရှားအခြေစိုက် ရိုဟင်ဂျာဒုက္ခသည်များကော်မီတီက ပြောခွင့်ရ မိုဟာမက် ဆာဒီးက ပြောပါတယ်။

“ရခိုင်ပြည်နယ် ပဋိပက္ခ နောက်ပိုင်းမှာဆိုရင် ------ ပထမဆုံးအသုတ်က အားလုံးပေါင်းတော့ အနည်းဆုံး ၃၀ ကျော်မယ်ဆိုတာကိုတော့ ကျနော်တို့ သိရှိပါတယ်။ နောက်ဆုံးကတော့ စင်ကာပူကို တသုတ်လာတယ်။ မလေးရှားကိုတော့ ပြီးခဲ့တဲ့ သုံး-လေးရက်ကြာက အားလုံး ၄၅၀ ကျော်ကျော်၊ ၅၀၀ နီးပါး ရောက်လာတယ်။ နောက်ဆုံးအသုတ်က အယောက် ၇၀ ရောက်လာတယ်။ အဲလိုပဲ၊ သုံးသုတ်ပဲ - အတိအကျ သတင်းစာမှာ အစိုးရ အာဏာ ပိုင်တွေ ပေါ်တင် ပြောနေတာ ရှိတယ်။ လူဦးရေအားဖြင့်ကတော့ ၆၀၀ ကျော်ကျော် ရှိတယ်လို့ ကျနော်ထင်ပါတယ်။”

သူတို့တွေ မလေးရှားကို ရောက်လာပေမယ့်လည်း မလေးရှားအစိုးရက တရားဝင် နေထိုင် ခွင့် ပြုထားတာတော့မဟုတ်ပါဘူး။ သူတို့ကို မလေးရှားနိုင်ငံရဲ့ လူဝင်မှုကြီးကြပ်ရေးဆိုင်ရာ တည်ဆဲဥပဒေတွေနဲ့ ထိန်းချုပ်ထားပြီး နောက်ပိုင်းကျမှ UNHCR အစရှိတဲ့ အဖွဲ့အစည်းတွေ က လာရောက် စုံစမ်း စစ်ဆေးမှုတွေ ပြုလုပ်လေ့ရှိတယ်-လို့ ရိုဟင်ဂျာ လူ့အခွင့်အရေး ဆိုင်ရာအဖွဲ့ - မလေးရှားက ဇဖား အာမက်က ပြောပါတယ်။

“မလေးရှားက ထိန်းသိမ်းထားတဲ့သူတွေက UN နဲ့ကိုင်ပြီးတော့ သူတို့ကို ခိုလှုံခွင့်ပေးဖို့ အတွက် အင်တာဗျူးယူပြီးတော့ ခိုလှုံခွင့် အစီအစဉ် သူတို့ လုပ်ပေးတယ်။ UN ဥပဒေနဲ့ သူတို့လိုက်လုပ်နေတယ်။ မလေးရှားအစိုးရကလည်း မလေးရှားအစိုးရဥပဒေနဲ့ သူတို့ တိုင်ပင်ပြီးတော့ UNHCR အရာရှိကြီးတွေကို ခေါ်ပြီးတော့ အင်တာဗျူးယူပြီးတော့ သူတို့ကို ဒုက္ခသည်စခန်းတွေမှာ အခြေပြုဖို့အတွက် လုပ်လာတယ်လို့ ကျနော်တို့တွေ့တယ်။”

မလေးရှားကို ပြီးခဲ့တဲ့ တနင်္ဂနွေနေ့က နောက်ဆုံးရောက်လာတဲ့ ရိုဟင်ဂျာ ဒုက္ခသည် အဖွဲ့ထဲမှာ လူ ၄၅၀ ပါတယ်လို့ ဆိုပါတယ်။ စင်္ကာပူဆိပ်ကမ်းကို ဒီဇင်ဘာလလယ်ပိုင်းမှာ ကပ်လာတဲ့ လူ ၄၀ ပါ ရိုဟင်ဂျာ ဒုက္ခသည်အုပ်စုကိုတော့ စင်္ကာပူအာဏာပိုင်တွေက ကမ်းကပ်ခွင့် မပေးဘဲ ပြန်နှင်ထုတ်လိုက်တဲ့အတွက် အဲဒီ ဒုက္ခသည်တွေဟာ မလေးရှားနိုင်ငံမှာ လောလောဆယ် ထိန်းသိမ်းခံထားရတယ်လို့ သိရပါတယ်။

လိုင်ဇာကို တိုက်ဖို့ မရှိကြောင်း သုံးသပ်

အစိုးရ စစ်တပ်ဆီ ကနေ သိမ်းဆည်း မိတဲ့ လက်နက် တွေကို ကေအိုင်အေ က ပြသထား

မြန်မာ အစိုးရ စစ်တပ်ဟာ ကချင်လွတ်လပ်ရေး အဖွဲ့ ကေအိုင်အို ဌာနချုပ်ဖြစ်တဲ့ လိုင်ဇာကို တိုက်ဖို့ မရှိဘူးလို့ ယူဆ ကြောင်း ရန်ကုန်မြို့ ငြိမ်းချမ်း ရေး စင်တာက အပစ် အခတ် ရပ်စဲရေး အတွက် အဓိက ဆောင်ရွက် နေတဲ့ ဒါရိုက်တာ ဒေါက်တာ မင်းဇော်ဦးက ဘီဘီစီကို ပြောပါတယ်။

အစိုးရ စစ်တပ်ပိုင် မြဝတီ သတင်းဌာနရဲ့ ထုတ်ပြန်ချက် တွေ အရ ဆိုရင်၊ အစိုးရ စစ်တပ် အနေနဲ့ လိုင်ဇာကို သိမ်းမယ် ဆိုပြီး တရားဝင် ပြောနေတာ မရှိဘူးလို့ ဆိုပါတယ်။ လောလော ဆယ် တိုက်ပွဲ ဖြစ်နေ ရတာဟာ အစိုးရက တပ်ဖွဲ့တွေ လဲတဲ့ အခါ ကေအိုင်အေက ပိတ်နေတဲ့ အတွက် တိုက်ရ တာသာ ဖြစ်တယ်လို့ မြဝတီ သတင်းက ဆိုပါ တယ်။

ဆက်စပ်သတင်းနဲ့ အစီအစဉ်များ

သမ္မတ ဦးသိန်းစိန် ကလည်း လိုင်ဇာကို မတိုက်ဘူးလို့ ပြောထားကြောင်း ဦးအောင်မင်း ကလည်း ထုတ်ပြော တာတွေ ရှိတဲ့ အတွက် အစိုးရရဲ့ မူဝါဒ အရ လောလော ဆယ် လိုင်ဇာကို တိုက်ဖို့ မရှိဘူးလို့ ဒေါက်တာ မင်းဇော်ဦးက သုံးသပ်တာ ဖြစ်ပါတယ်။

အစိုးရ တပ်တွေဟာ လက်နက်ကြီးနဲ့ လေကြောင်း ပစ်ကူတွေ သုံးပြီး ကေအိုင်အို အဖွဲ့က ထိမ်းချုပ် ထားတဲ့ လဂျားယန် စခန်း နေရာ တချို့ကို မကြာသေးခင်က ပြန်လည် သိမ်းပိုက်ခဲ့ ပါတယ်။

အရင်တုန်း ကတော့ ဒီ လဂျားယန် ကုန်း နေရာကို အစိုးရ တပ်က ထိုင်ထားတာ ဖြစ်ပြီး၊ ပြီးခဲ့နှစ် ဒီဇင်ဘာ လဆန်းမှာ ကေအိုင်အေ ကနေ အဲဒီ နေရာကို ထိုးစစ် ဆင်ပြီး ဝင်သိမ်း ခဲ့တာလို့ သိရှိ ရကြောင်း ဒါရိုက်တာ ဒေါက်တာ မင်းဇော်ဦးက ဘီဘီစီကို ပြောပါတယ်။

မြောက်ပိုင်းတိုင်း စစ်ဌာနချုပ် တိုင်းမှူးက အဲဒီ နယ်မြေ ထဲမှာ ရှိတဲ့ ကေအိုင်အေ တပ်ဖွဲ့ တွေကို ခရစ္စမတ်နေ့ နောက်ဆုံး ထားပြီး ဖယ်ရှား ပေးဖို့ ဒီဇင်ဘာ၂၃ ရက် နေ့က စာထုတ်ခဲ့ ပြီးနောက် တိုက်ပွဲတွေ ပိုမို ပြင်းထန် လာခဲ့ တာပါ။

အခုအချိန်မှာ ဆွေးနွေးရေး စားပွဲပေါ် တက်လာဖို့ လိုအပ် နေပြီး၊ အဲဒီလို မဖြစ်နိုင် သေးဘဲ အခုလို ပစ်ခတ် နေရင်တော့ ငြိမ်းချမ်းရေး စကား ပြောဖို့ ဆိုတာ အင်မတန် ခက်ခဲ လှတယ် လို့လည်း ဒေါက်တာ မင်းဇော်ဦးက ပြောပါတယ်။

ကေအန်ယူ ဥက္ကဌ သမ္မတ ဦးသိန်းစိန်နဲ့ တွေ့ဖို့ရှိ

သမ္မတ ဦးသိန်းစိန်ရဲ့ ဖိတ်ကြားချက် အရ ကေအန်ယူ ဥက္ကဌနဲ့ အဖွဲ့ လာရောက်မှာဖြစ်

ကရင်အမျိုးသား အစည်းအရုံး ကေအန်ယူ ဥက္ကဌသစ် စောမူတူး စေးဖိုးနဲ့ အဖွဲ့ဟာ နေပြည်တော် ကို အခု ရက်ပိုင်း သွားရောက် ပြီး၊ သမ္မတ ဦးသိန်းစိန် နဲ့ တွေ့ဆုံဖို့ ရှိပါတယ်။

သမ္မတ ဦးသိန်းစိန်ရဲ့ ဖိတ်ကြားချက် အရ ကရင် အမျိုးသား အစည်းအရုံး ဥက္ကဌသစ် မူတူးစေးဖိုး ဦးဆောင်တဲ့ အဖွဲ့ လာရောက်မှာ ဖြစ်ပြီး၊ ဇန်နဝါရီ ၃ရက် နေ့ မှာ ရန်ကုန်ကို ရောက်ရှိမှာ ဖြစ်တယ်လို့ သမ္မတ ရုံး ညွှန်ကြားရေးမှူး ဦးဇော်ဌေး က ဘီဘီစီ ကို ပြောပါတယ်။

ကေအန်ယူ ကိုယ်စားလှယ် အဖွဲ့ အနေနဲ့ ဇန်နဝါရီလ ၄ ရက်နေ့ လွတ်လပ်ရေးနေ့ အခမ်းအနား တက်ရောက်ဖို့ ရှိတယ်လို့လည်း ကေအန်ယူ ဗဟို အလုပ်မှုဆောင် အဖွဲ့ဝင် ဖဒို မန်းငြိမ်းမောင်က ပြောပါတယ်။

သမ္မတနဲ့ တွေ့ဆုံမယ့် ရက်နဲ့ ဆွေးနွေးမယ့် အကြောင်း အရာတွေ ကိုတော့ အတိ အကျ မသိရ သေးဘဲ စီစဉ် နေဆဲ ဖြစ်တယ်လို့ ငြိမ်းချမ်းရေး အကျိုးဆောင် တဦး က ပြောပါတယ်။

သမ္မတနဲ့ တွေ့ ဖြစ်မယ် ဆိုရင်တော့ ကေအန်ယူ အနေနဲ့ ဒါဟာ ဒုတိယ အကြိမ် တွေ့ဆုံတာ ဖြစ်ပြီး၊ ငြိမ်းချမ်းရေး အတွက် တိုးတက် မှုတွေ ရှိနိုင် တယ်လို့ မျှော်လင့် စရာ အကြောင်း ရှိပါတယ်။                      

မြောက်ကိုရီးယား ဒုက္ခသည် လျော့နည်းလာ

ခေါင်းဆောင်သစ် ကင်ဂျုံအန်း လက်ထက်မှာ နိုင်ငံ ကနေ ထွက်ပြေးဖို့ သိပ်မလွယ်ပါ

မြောက်ကိုရီးယား ကနေ တောင်ကိုရီးယား ဘက်ကို ထွက်ပြေးလာတဲ့ ဒုက္ခသည် အရေ အတွက်ဟာ သိသိ သာသာ လျော့ကျ သွားတယ်လို့ တောင်ကိုရီးယား ဘက်က ပြောပါတယ်။

ပြီးခဲ့တဲ့နှစ် ၂၀၁၂ က မြောက်ကိုရီးယား ဒုက္ခသည် စုစုပေါင်း ၁၅၀၀ ကျော်ကျော် လောက်သာ ဝင်ရောက် လာတာ ရှိခဲ့ပြီး၊ ၂၀၁၁ ခုနှစ်က ဆိုရင် ၂၇၀၀ ကျော် တောင် ဝင်ရောက် လာခဲ့ကြတာ ဖြစ်ပါတယ်။

ခေါင်းဆောင်သစ် ကင်ဂျုံးအန်း လက်အောက် မြောက်ကိုရီးယား နိုင်ငံမှာ လူတွေ ထွက်ပြေးတာ အတွက် ပိုမို တင်းကျပ်တဲ့ အရေးယူ ဆောင်ရွက် မှုတွေ ရှိနေတယ်လို့ တောင်ကိုရီးယားမှာ ရှိတဲ့ တက်ကြွ လှုပ်ရှား သူတွေက ပြောပါတယ်။

တရုတ် နိုင်ငံကို ထွက်ပြေး ပုန်းအောင်း နေသူ မြောက်ကိုရီးယား တွေကိုလည်း တရုတ် လုံခြုံရေး တပ်ဖွဲ့တွေနဲ့ ပေါင်းပြီး အပြင်း အထန် ရှာဖွေ မှုတွေ ပြုလုပ် နေတယ်လို့ လည်း အဲဒီ တက်ကြွ လှုပ်ရှားသူတွေက ပြောပါတယ်။

ကုလအထွေထွေညီလာခံနဲ့ မြန်မာ့လူ့အခွင့်အရေး

တောမတ်စ် အိုဟေး ကင်တားနား

ကုလသမဂ္ဂ အထွေထွေညီလာခံ တတိယ ကော်မတီ က နောင်လာမယ့် အစည်းအဝေး တွေ မှာ မြန်မာ့ လူ့အခွင့်အရေး ကိစ္စ ကို ထည့်သွင်း ဆွေးနွေးတော့ မှာ မဟုတ်ဘူး လို ထုတ်ပြန် လိုက်ပါတယ်။ မြန်မာနိုင်ငံ ရဲ့ အပြုသဘော ဖြစ်ပေါ်မှုတွေ ကြောင့်လို့ ထောက်ပြထားပါတယ်။

ဒါပေမယ့် တတိယ ကော်မတီ ရဲ့ ဆုံးဖြတ်ချက်မှာ ထောက်ပြစရာ အချက်တွေ ကိုတော့ ချန်မထားတဲ့ အကြောင်း မြန်မာနိုင်ငံ ဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် တောမတ်စ် အိုဟေး ကင်တားနား က ဘီဘီစီ ကို ပြောပါတယ်။

ကချင်ပြည်နယ်မှာ ဖြစ်နေတဲ့ စစ်ပွဲ၊ ပြည်တွင်း ရွှေ့ပြောင်း အခြေပျက်နေတဲ့ သူတွေ ပြဿနာ၊ မလွတ်မြောက်သေး တဲ့ နိုင်ငံရေး အကျဉ်းသား ကိစ္စ တွေ ကိုတော့ တတိယ ကော်မတီ က ထောက်ပြထားကြောင်း မစ္စတာ ကင်တားနား က ပြောပါတယ်။ ဒါပေမယ့် ရိုဟင်ဂျာ ပြဿနာ ကို တတိယ ကော်မတီ က ထောက်ပြရာမှာ တော့ မြန်မာ အစိုးရ က ပယ်ချတယ် လို့ ဆိုပါတယ်။