ဗမာ့နိုင်ငံရေး သမိုင်းဖြစ်စဉ်အကျဉ်းနှင့် စစ်အာဏာရှင်စနစ် ပေါ်ပေါက်လာပုံ- အပိုင်း (၁) မျိုးသန့်
|
8:05 PM |
No မှတ်ချက် |
သမိုင်း သင်တာ ''မအ'' အောင်သင်တာ။ သမိုင်း မသိလျှင် လူအ၊ လူပြိန်း ဖြစ်သွားတတ်တယ်။ လူအ၊ လူပြိန်း မဖြစ်စေရန် သမိုင်း သင်ကြဖို့ အလွန်အရေးကြီးတယ် လို့ ဆရာကြီး ပါမောက္ခ ဒေါက်တာ သန်းထွန်း က ပြော ခဲ့ဖူးတယ်။ စာရေးသူအနေဖြင့်လည်း မိမိနိုင်ငံ၏ သမိုင်းတွေကို အခြေခံပြီး၊ သုတေသနပြု လေ့လာပြီး၊ အဓိကအချက်တွေကို ပြန်လည် သုံးသပ်၍ ဆင်ခြင်နိုင်ရန် ဆန္ဒ ဖြစ် ခဲ့တယ်။
စစ်အာဏာရှင်စနစ်၏ ဆိုးဝါးမှုဒဏ်တွေကို ပြည်သူတွေက လက်တွေ့ ထိတွေ့ ခံစားနေရ၍ သိရှိနေကြတယ်။ ဒါပေမယ့် စစ်အာဏာရှင်စနစ်ဟာ ဘာကြောင့် ဘယ်လို ဖြစ်ပြီး ပေါ်ပေါက်လာ ခဲ့တယ်။ ဘာ အကြောင်းတွေ အခြေခံ ခဲ့ပြီး၊ ဘယ်လို အခွင့်အရေးတွေက စစ်အာဏာရှင်စနစ်ပေါ်ပေါက်လာရေးကို အားပေး ခဲ့တယ် စသည့်တို့ကို သိရှိ နားလည်ရန် လိုအပ်သလို၊ သိရှိနားလည်ပြီးလျင်- "အနာ" သိလျင် "ဆေး" ရှိမယ် ဆို စကားအတိုင် စစ်အာဏာစနစ်ချုပ်ငြိမ်ရေးအတွက် နည်းလမ်းများကို ရှာ ဖွေရာမှာ အထောက်အပံ့ဖြစ်မယ်လို့ ယူဆမိတယ်။
သမိုင်းအမှန်ကို သိရှိဖို့ကြတော့၊ နိုင်ငံ၏ သမိုင်းဖြစ်စဉ်တွေကို အစွဲမပါ ဘက်လိုက်မှု ကင်းပြီး အရှိ အရှိ အတိုင်း၊ ဖြစ်ခဲ့ ပျက်ခဲ့သည့် အတိုင်း သေချာစွာ လေ့လာကြ သူများသာလျင် သေချာနားလည် သိရှိနိုင်မှာ ဖြစ်တယ် လို့ နားလည်ပါတယ်။
ထို့ကြောင့် စာရေးသူအနေဖြင့် ပထ၀ီနိုင်ငံရေးနှင့် ဗမာ့နိုင်ငံရေး ဖြစ်စဉ်သမိုင်းတို့ကို စိတ်ပါဝင်စားစွာ လေ့လာနေလျှက် ရှိပြီး၊ ယင်းတို့လေ့လာတွေ့ရှိ ခဲ့ရသော အချက်တွေ အထဲမှ အဓိက အကြောင်းအရင်းများ၊ ၎င်းအကြောင်းများနှင့် ဖြစ်ပေါ်လာသော အကျိုးဆက်များကို ဆက်စပ် ဆင်ခြင်လေ့လာနိုင်ရန် ရည်ရွယ်တယ်။
သို့ပါ၍ မိမိ၏ စာဖတ် ပရိတ်သတ်တို့ကိုလည်း မိမိလေ့လာမှုများထဲမှ အချက် အချိူ့တို့ကို ပြန်ဖေါက်သည် ချလိုက်ပါတယ်။ တချို့အချက်အလက်များက အငြင်းပွားစရာများ ရှိနိုင်ပါတယ်။ သို့သော် ဘက်နှစ်ဘက် ရှိနေလျင် ၎င်းဘက်နှစ်ဘက် စလုံး၏ အမြင်ယူဆချက်များကို အလေးထား လက်ခံလေ့လာ သင့်ပေတယ်။
အရှေ့ပိုင်းမှာ မြန်မာနိုင်ငံကို ပထ၀ီအနေအထားမှ စိန်ခေါ်မှု <https://www.facebook.com/notes/myo-thantမြန်မာနိုင်ငံကို-ပထ၀ီအနေအထားမှ-စိန်ခေါ်မှု-မျိုးသန့်/10151511012582593?pnref=story> ခေါင်းစဉ်ဖြင့် ကျွန်တော်၏ သုတေသနပြု ချက်များကို စာပြန် ရေးသားပြီး၊ မိမိနိုင်ငံကို ပြန်ခွင့်ရ ခဲ့တဲ့ (၈,၈,၈၈) ရှစ်လေးလုံး (၂၅) နှစ်မြောက်က မိမိ မွေးရပ်၏ မြို့နယ် အဖွဲ့ချုပ်ရုံးမှာ ဟောပြောပွဲ လုပ်နိုင် ခဲ့တယ်။
တဆက်တည်းမှာ ယခုအခါမှာတော့- ဗမာ့နိုင်ငံရေး သမိုင်းဖြစ်စဉ်အကျဉ်းနှင့် စစ်အာဏာရှင်စနစ် ပေါ်ပေါက်လာပုံ ခေါင်းစဉ်လေးဖြင့် ရေးဖို့ဖြစ်လာ ခဲ့ရပါတယ်။ ကျွန်တော်က ဒီတခါ မြန်မာအစား ဗမာလိုသာ သုံးထားပါတယ်။ အကြောင်းက နိုင်ငံ၏ သမိုင်းကြောင်းများ ဖြစ်နေသောကြောင့် မြန်မာလို့ မသုံးထားပါ။ ဗမာလို့ သုံးလျှင် ပို ဆီလျော်မယ်လို့ ယူသောကြောင့် ဖြစ်ပါတယ်။
ကျွန်တော် သုတေသနပြု ရေးသားထားမှုတွေ ထဲမှ အဓိကကျသော အကြောင်းအကျိုးသက်ရောက်မှုတွေကို လေ့လာပြီး၊ မိမိ၏ စာဖတ် ပရိသတ်တို့ကို မျှဝေပေးခြင်း ဖြစ်တယ်။ အထူးသဖြင့် လူငယ်တွေအတွက် ရည်ရွယ်ပါတယ်။ ဖတ်သည့်အတွက် အထူးကျေးဇူးတင်ရှိပါတယ်။ မျိုးသန့်
~~~~~~~~~~~~~~~~~
နောက်ခံ
ဗြိတိသျှတွေက ဗမာပြည်ကို စစ် (၃) ကြိမ်ဆင်နွဲ့၍ ၎င်းတို့၏ အင်ပါယာအတွင်း သွတ်သွင်း ခဲ့ပြီးနောက်မှာ-အိန္ဒိယပြည်ကဲသို့ ဗြိတိသျှအစိုးရက ဗမာပြည်ကို တိုက်ရိုက်အုပ်ချုပ်ခဲ့တာ မဟုတ်ဘဲ၊ အိန္ဒိယပြည်၏အစိတ်အပိုင်းအဖြစ် ထည့်သွင်း ခဲ့ပေတယ်။
ထို့ကြောင့် ဗမာပြည်သူပြည်သားများမှာ ဗြိတိသျှတွေရဲ့ ကျွန်၏ ကျွန်အဖြစ်- ကျွန်သားပေါက်ဘ၀အဖြစ်ရောက်ရှိ ခဲ့လေတယ်။ ထို ကျွန်သားပေါက်အဖြစ်မှ လွတ်မြောက်ရေး အတွက် ဗမာပြည်ရှိတိုင်းရင်းသားများက နည်းမျိုးစုံဖြင့် တော်လှန်ပုန်ကန် ခဲ့ကြရာ- ဗြိတိသျှတွေကအိန္ဒိယလူမျိုးနှင့် ဂေါ်လခါးတပ်တွေကို သုံး၍ နှိမ်နင်း ခဲ့လေတယ်။
ဗြိတိသျှတို့၏ ကိုလိုနီအုပ်ချုပ်ရေးက ဗမာပြည်အတွက် အပြောင်းအလဲများစွာ ဖြစ်ပေါ်လာစေ ခဲ့တယ်။ ဘုရင်အုပ်ချုပ်တဲ့ စနစ်ကိုဖျက်သိမ်းလိုက်ပြီး၊ သီပေါဘုရင်ကို အဝေးသို့ ပို့ ခဲ့တယ်။ အစိုးရနှင့် ဘာသာရေးကို ခွဲခြားသော အုပ်ချုပ်ရေးအဖြစ် ပြောင်းလဲ ခဲ့တော့၊ ဗုဒ္ဓဘာသာ ဘုန်းတော်ကြီးများအတွက် များစွာမှ ထိခိုက်စေ ခဲ့တယ်။ အကြောင်းက ဗုဒ္ဓဘာသာဘုန်းတော်ကြီးများက ဘုရင်၏ အလျူဒါနကို မှီခိုအားထားနေ ခဲ့ရတာဖြစ်တယ်။
ဗမာပြည်၏ နောက်ဆုံးဘုရင် သီပေါမင်းနှင့် မိဖုရား စုဖုရားလတ်နှင့် စုဖုရားကြီးဗြိတိသျှတို့ကဗမာပြည်အတွင်း နယ်မြေစိုးမိုးရေးအတွက် ၎င်းတို့ကို တော်လှန် ပုန်ကန်သူများကို လိုက်လှံရှာဖွေ ခဲ့ပြီး၊ မသင်္ကာဖွယ်ရာ ရှိသည့် ရွာများကို မီးရွံ့ ဖျက်ဆီး ခဲ့တယ်။ နောက်ပြီး အခြားရွာများနှင့် အဆက်အသွယ် ပျက်သွားစေရန် ထို့ရွာသူရွာသားများကို သူတို့၏ ခေါင်းဆောင်များနှင့်အတူ အောက်ဗမာပြည်သို့ ပြောင်းရွေ့စေ ခဲ့တယ်။
ပြဿနာလုပ်သူများနှင့် ဗြိတိသျှတို့ကို သစ္စာမခံ သူများကို အဓမ္မနည်းဖြင့် ရွာတွေမှ ဖယ်ရှားစေ ခဲ့ပြီး၊ ဗြိတိသျှတို့ ထောက်ခံချက်ဖြင့် လူစိမ်းများကို နေရာချပြောင်းရွေ့လာစေ ခဲ့တယ်။
မည်သည့် ရာဇာဝတ်မှုများ ပြုလုပ် ခဲ့သူမှန်သမျှ- တရားစီရင် ခဲ့ရာတွင် လူစိမ်းများကို တရားသူကြီးနှင့် တရားရေးဆိုင်ရာတို့ကို စီရင်ဆုံးဖြတ်စေ ခဲ့ပြီး၊ ပြစ်မှုကျူးလွန်ကြောင်း စွပ်စွဲခံ ခဲ့ရသူ မှန်သမျှကို တရားစီရင်ရာတွင် တရားမျှတသော တရားစီရင်မှုများ မရရှိ ခဲ့ကြပေ။
ဗြိတိသျှအိန္ဒိယအစိုးရ၏ အုပ်ချုပ်မှုအောက်တွင် ဗမာပြည်ကို အောက်ပိုင်းတွင် တိုင်း (၄) တိုင်းအဖြစ် ခွဲခြား ခဲ့ပြီး၊ (၁) တနင်္လာရီတိုင်း (တောင်ငူ၊ သထုံ၊ ကျိုက်ခမီ၊ သံလွင်၊ ထားဝယ်နှင့် မြိတ်)၊ (၂) ရခိုင်တိုင်း (စစ်တွေ၊ ရခိုင်မြောက်ပိုင်း၊ ရခိုင်တောင်တန်းဒေသ၊ ကျောက်ဖြူနှင့် သံတွဲ)၊ (၃) ပဲခူးတိုင်း (ရန်ကုန်မြို့၊ ဟံသာဝတီ၊ ပဲခူး၊သာယာဝတီနှင့် ပြည်)၊ (၄) ဧရာဝတီတိုင်း (ပုသိမ်၊ ဟင်္သာတ၊ သရက်၊ မအူပင်၊မြောင်းမြနှင့် ဖျားပုံ) အထိဖြစ် ခဲ့ပြီး၊ အထက်ပိုင်းတွင် (မန္တာလေး၊စစ်ကိုင်းနှင့် မကွေဒေသများ) ပါဝင် ခဲ့တယ်။
နယ်စပ်ဒေသများကို (၃) ပိုင်း ခွဲပြီး၊ (၁) ရှမ်းပြည်များ (စော်ဘွားအလိုက် အုပ်ချုပ်သော နယ်မြေများ)(၂) ချင်းတောင်တန်းများ၊ (၃) ကချင်နယ်ဒေသများအဖြစ် ပိုင်းခြား၍ အုပ်ချုပ်သော ဖွဲ့စည်းပုံစနစ်ဖြင့် ထားရှိ ခဲ့တယ်။
ကိုလိုနီခေတ် အစောဆုံး လှုပ်ရှားမှုများ
ဗုဒ္ဓဘာသာ ကလျာဏ ယုဝအသင်း (၀ိုင်အမ်ဘီအေ)
ကိုလိုနီအုပ်ချုပ်ရေးက ဗမာပြည်၏ ဗုဒ္ဓဘာသာ ဘုန်းကြီးကျောင်းပညာရေးကနေ လောကီရေးရာ အတတ်ပညာရေးများကိုပါ သင်ကြားပေးသော ကျောင်းတွေပေါ်ပေါက်လာ ခဲ့ပြီး၊ ထိုကျောင်းတွေတွင် အင်္ဂလိပ်နှင့် ဗမာ(၂) ဘာသာဖြင့် သင်ကြားပေးသည့် ကျောင်းများကို ဖွင့်လှစ်လာ ခဲ့တယ်။ ထိုနည်းတူ ခရစ်ယာန် သာသနာပြု များကိုလည်း ဗမာပြည်သို့ လာရောက်၍ မစ်ရှင်ကျောင်းများကို ဖွင့်လှစ်လာစေရန် အားပေး ခဲ့တယ်။
(၁၉၀၆) ခုနှစ် မှာ (၀ိုင်အမ်စီအေ) (ခ) ခရစ်ယန်လူငယ်အသင်းကို နမူနာယူ ခဲ့ပြီး၊ (၀ိုင်အမ်ဘီအေ) (ခ) ဗုဒ္ဓဘာသာ ကလျာဏယုဝ လူငယ်အသင်းကို အနောက်နိုင်ငံ ပညာတတ် ဗမာလူငယ်တွေက စတင်ဖွဲ့စည်း ခဲ့ကြတယ်။ ဤအဖွဲ့၏ ရည်ချက်က ကိုလိုနီစနစ်အောက်မှာ ဗမာ့ယဉ်ကျေးမှုနှင့် အမျိုးသားရေး ဂုဏ်အင်္ဂါရပ်များ ဆက်လက် ရှင်သန်စွာ တည်ရှိနေစေရေးအတွက် ကြိုးပမ်းရန်ဖြစ် ခဲ့တယ်။
(၁၉၁၆) ခုနှစ်တွင် (၀ိုင်အမ်ဘီအေ) ကနေ ဗုဒ္ဓသာသနိက အဆောက်အအုံများအပါအ၀င် ဘုရားကျောင်းကန်တွေမှာ ဥရောပတိုက်သားတွေက ဖိနပ်စီးပြီး၊ ၀င်ထွက်နေတာတွေဟာ စော်ကားမှုတွေအဖြစ် သတ်မှတ် ခဲ့ကာ ဗြိတိသျှအစိုးရကို တားဆီးပေးရေး ပြင်းထန်စွာကန့်ကွက် အရေးဆို ခဲ့ရာ အောင်မြင်မှုတွေ ရရှိ ခဲ့တယ်။
(၁၉၁၉) ခုနှစ်မှာ ဗမာပြည်ကို ချန်လှပ်ထား ခဲ့ပြီး၊ အိန္ဒိယပြည်ကို ဒိုင်အာခီ (ခ) တ၀က်တပျက် ကိုယ်ပိုင်အုပ်ချုပ်ရေးပေး ခဲ့တာကို ပြင်းထန်စွာ ကန့်ကွက်မှုတွေ ပြုလုပ် ခဲ့တယ်။ (၁၉၂၀) ခုနှစ်တွင် ဗြိတိသျှအစိုးရက ဗမာပြည်ကိုလည်း ဒိုင်အာခီအုပ်ချုပ်ရေးပေး ခဲ့တယ်။
ဒိုင်အာခီအုပ်ချုပ်ရေးသည် ဗြိတိသျှ၏ ဘုရင်ခံအစိုးရနှင့် အတိုင်ပင်ခံ ကိုယ်စားလှယ်၏ (၁၀၃) ဦးမှ (၇၉) ယောက်ကို ပြည်သူတွေက ရွေးချယ်ပိုင်ခွင့်ရသော အုပ်ချုပ်ရေး ဖြစ် ခဲ့တယ်။
နောက်ပိုင်းတွင် (၀ိုင်အမ်ဘီအေ) ကို (ဂျီစီဘီအေ) အဖြစ် နိုင်ငံလုံးဆိုင်ရာ မြန်မာ့အသင်းချုပ်ကြီးအဖြစ် ပြောင်းလဲ ဖွဲ့စည်း ခဲ့ပြီး၊ လုံးဝ ကိုယ်ပိုင်အုပ်ချုပ်ရေးကို ဆက်လက် တောင်းဆို တိုက်ပွဲဝင် ခဲ့ကြတယ်။
ဗမာပြည် ကာကွယ်ရေး
ဗမာပြည်ဟာ ဗြိတိသျှအိန္ဒိယပြည်၏ အစိတ်အပိုင်း ဖြစ်လာကတည်းက- ဗမာ့ ဘုရင့် တပ်မတော်ကိုလည်း အပြီးအတိုင် ဖျက်သိမ်း ခဲ့ပြီး- ဗမာပြည်၏ ကာကွယ်ရေးကို ဗြိတိသျှတို့က အစပိုင်းတွင် အိန္ဒိယနှင့် (နီပေါ) ဂေါ်လခါးတပ်များဖြင့် ထားရှိ ခဲ့ကြတယ်။
နောက်တော့ ဗြိတိသျှတွေက ဗမာပြည်ကာကွယ်ရေးအတွက် စစ်တပ်ကို စတင်ဖွဲ့စည်းချိန်တွင်- အိန္ဒိယလူမျိုးများနှင့် ဂေါ်လခါးလူမျိုးများ အပြင် ဒေသခံလူနည်းစုဝင်များ ဖြစ်ကြသော ကရင်၊ ကချင်နှင့် ချင်းလူမျိုးများဖြင့်သာ စတင်ဖွဲ့စည်း ခဲ့တယ်။ ဗမာလူမျိုးတွေကိုတော့ ဗြိတိသျှတွေက မယုံကြည် ခဲ့သောကြောင့် ဗြိတိသျှစစ်တပ်ထဲတွင် ထည့်သွင်းဖွဲ့စည်း ခဲ့ခြင်းမရှိဘဲ ပိတ်ပင်ထား ခဲ့တယ်။
အရေးပေါ်အခြေအနေဖြစ်လာ ခဲ့သော (၁၉၁၄) ခုနှစ်- ပထမကမ္ဘာစစ်ကြီး အစပိုင်းလောက်တွင် ဗြိတိသျှအိန္ဒိယ တပ်မတခု၏ အမှတ် (၇၀) ဗမာ့ရိုင်ဖယ်ကို တပ်ရင်း (၃) ရင်းဖြင့် ဖွဲ့စည်း ခဲ့ရာ ကရင်၊ ကချင်နှင့် ချင်းလူမျိုးများဖြင့်သာ ဖွဲ့စည်းထား ခဲ့ပြီး၊ စစ်ကြီးတကယ် ဖြစ်ပွားလာချိန်လောက်မှ ဗမာတွေအပေါ် ကန့်သတ်ထားချက်တွေ လျော့ချပေး ခဲ့တယ်။
ဗမာလူမျိုးများဖြင့် ဖွဲ့ထားသော တပ်ရင်းတခုကို အမှတ် (၇၀) ဗမာရိုင်ဖယ်အတွင်းမှာ လည်းကောင်း၊ နောက်ထပ် တပ်ခွဲတခုကို အမှတ် (၈၅) ဗမာရိုင်ဖယ်အတွင်းမှာ လည်းကောင်း၊ စစ်ယန္တရား ပို့ဆောင်ရေးတပ် (၇) ခုအတွင်းတို့တွင် ဗမာလူမျိုးများ ပါဝင်ခွင့် ရရှိလာ ခဲ့တယ်။ ၎င်းတပ်ရင်းတွေကို (၁၉၁၇) ခုနှစ်လောက်မှ တာဝန်များကို စထမ်းဆောင်ခွင့် ရရှိလာ ခဲ့သော်လည်း၊ ဗမာပြည်အတွင်းမှာ မဟုတ်ဘဲ၊ ဥရောပနှင့် အရှေ့အလယ်ပိုင်းတို့မှာဘဲ တာဝန်ထမ်းဆောင်ခွင့် ရရှိ ခဲ့ကြတယ်။
(၁၉၁၈) ခုနှစ် ပထမကမ္ဘာစစ်ကြီး ပြီးဆုံးသွားတော့- ဗြိတိသျှတွေက စစ်သားသစ်အဖြစ် ဗမာလူမျိုးတွေကို တပ်ထဲ ၀င်ခွင့်များကို ရပ်ဆိုင်း ခဲ့ပြီး၊ ဗမာလူမျိုးတွေနဲ့ ဖွဲ့စည်းခဲ့သော တပ်ရင်းများကိုလည်း (၁၉၂၅) ခုနှစ်နှင့် (၁၉၂၉) ခုနှစ်လောက်မှာ အားလုံးကို ဖျက်သိမ်း ခဲ့တော့တယ်။
ဗြိတိသျှစစ်တပ် ဗမာ ရိုင်ဖယ်တပ်ရင်း၏ တံဆိပ်(၁၉၃၆) ခုနှစ် ဧပြီလ (၁) ရက်နေ့တွင် ဗမာပြည်ကို အိန္ဒိယပြည်မှ ခွဲထုတ်နိုင် ခဲ့ပြီး၊ ဗြိတိသျှဗမာဖြစ်လာမှ ဗမာလူမျိုးတွေ ဗြိတိသျှဗမာ စစ်တပ်ထဲမှာ ပါဝင်ခွင့် ရရှိလာ ခဲ့တယ်။ ဒါပေမယ့် ဗမာလူမျိုး အနည်းငယ်လောက်တာ စစ်ထဲဝင် ခဲ့ကြတယ်။ ထို့ကြောင့်ဗြိတိသျှဗမာ စစ်တပ်ထဲတွင် ကရင် (၂၇.၈%)၊ ကချင် (၂၂.၉%)၊ ချင်း (၂၂.၆%) နှင့် ဗမာ (၁၂.၃%) စသည်တို့ဖြင့်တာရှိ ခဲ့တယ်။
ဗြိတိသျှတွေက အိန္ဒိယလူမျိုး၊ ဂေါ်လခါးနှင့် ဗမာပြည်ရှိ တိုင်းရင်းသားလူနည်းစုများဖြင့် စစ်တပ်အတွင်းမှာ ဆက်လက်ထားရှိစေ ခဲ့ပြီး၊ ၎င်းစစ်တပ်တွေကို သုံး၍ (၁၉၃၀) ခုနှစ်တွင် ပေါ်ပေါက်ခဲ့သော ဆရာစံတော်လှန်ရေးမျိုးလို လူများစု ဗမာလူမျိုးတွေ၏ လွတ်လပ်ရေးလှုပ်ရှားမှု များကို ရက်စက်စွာ နှိပ်ကွပ် ခဲ့တယ်။ ဗြိတိသျှတို့၏ ၎င်းမူဝါဒတွေက နောင်အနာဂတ်မှာ ဗမာပြည်အတွက် အနုတ်လက္ခဏာဆောင်သော တင်းမာမှုတွေ ဖြစ်ပေါ်လာစေ ခဲ့တယ်။
တောင်တန်းဒေသ ခရစ်ယာန်သာသနာပြု
ဗမာပြည် ခရစ်ယာန်သမိုင်းကို ပြန်ကြည့်လျှင် အစောကာလ တောင်ငူခေတ်က အောက်ဗမာပြည်ရှိ ရန်ကုန်အနားက သံလျှင်ကို ပေါ်တူဂီတွေ ထိန်းချုပ်နိုင် ခဲ့ပြီး၊ ငဇင်ကာ (ခေါ်) ဒီဗရစ်တိုက (၁၅၉၉) ခုနှစ်မှာ ဘုရင်ခံဖြစ်လာ ခဲ့တယ်။ ထို့နောက်မှာ- ရိုမင်ကက်သလစ်ဘုန်းတော်ကြီးများနှင့် ဘုရားကျောင်းများကို တည်ဆောက်၍ သံလျှင်နယ်မြေမှာ မစ်ရှင်စတင် ခဲ့တဲ့ သမိုင်းများရှိ ခဲ့ပေမယ့်- ပရိုစတက်တင့် (ဘက်ပတစ်) ခရစ်ယာန်သာသနာပြု စတင်လုပ်လာ ခဲ့သည့် သမိုင်းက အင်္ဂလိပ်မြန်မာပထမစစ်ပွဲ အပြီးလောက်မှာ ဖြစ် ခဲ့တယ်။
ယင်း စတင်ပြီး ပရိုစတက်တင့် (ဘက်ပတစ်) ခရစ်ယာန်သာသနာပြု ခဲ့ကြသူတွေက တကယ်တမ်းမှာ အမေရိကန်တွေသာဖြစ် ခဲ့တယ်။ အင်္ဂလိပ်တွေ အောက်ဗမာပြည် တခုလုံးကို သိမ်းပိုက် ခဲ့ပြီး၊ (၁၈၃၀) ခုနှစ်လောက်မှာ ဗမာဘုရင်အုပ်ချုပ်သော နယ်မြေတွေရှိ ဗုဒ္ဓဘာသာဝင် လူအများစု အတွင်းမှာထက် အင်္ဂလိပ်အုပ်ချုပ် ခဲ့သော နယ်မြေတွေအတွင်းမှာ ရှိသည့် နတ်ကိုးကွယ် ခဲ့ကြသော လူမျိုးစုတွေအတွင်းမှာ အောင်မြင်စွာ ခရစ်ယာန်သာသနာပြုနိုင် ခဲ့ကြတယ်။
ထို့ကြောင့် ဒေသခံလူမျိုးစုတို့အတွင်းမှာ ခရစ်ယာန်ဘာသာကို ကိုးကွယ်လာမှုများနှင့် ဘုရားရှစ်ခိုးကျောင်းတွေပါ တိုးပွားလာ ခဲ့တယ်။ ထို့အပြင်- ခရစ်ယာန်သာသနာပြုများက ပညာရေးအတွက် ကျောင်းတွေ ဆောက်လုပ် ခဲ့ကြပြီး၊ လောကီ အဆင့်မြင့် ပညာကော်လိပ်နှင့် တက္ကသိုလ်များကိုပါ တည်ထောင်လာ ခဲ့ကြတယ်။
ဗြိတိသျှလက်ထက် ကရင်အမျိုးသားတို့၏ အခန်းကဏ္ဍ
(၁၈၃၀) ခုနှစ် အစပိုင်းလောက်မှာ ပရိုစတက်တင့် (ဘက်ပတစ်) ခရစ်ယာန်မစ်ရှင်တွေသည် ကရင်လူမျိုးတော်တော်များများအတွင်းတွင် အောင်မြင်စွာဖြင့် ခရစ်ယာန် သာသနာပြု နိုင် ခဲ့ကြပြီး၊ ဗြိတိသျှကိုလိုနီ အာဏာပိုင်တွေကလည်း ထိုကရင်အမျိုးသားများကို ဗြိတိသျှဗမာစစ်တပ်အတွက် စစ်သားများ စုဆောင်း ခဲ့ခြင်း၊ ဒေသဆိုင်ရာ အုပ်ချုပ်ရေးတို့တွင် ရာထူးနေရာပေး ခဲ့ခြင်းနှင့် ဥပဒေပြုအဖွဲ့တွင် ကရင်အမျိုးသားကိုယ်စာလှယ်များအဖြစ် ပါဝင်ခွင့်များ ရရှိလာ ခဲ့ခြင်း၊ စသည့် အခွင့်အရေးများဖြင့် မျက်နှာသာ ပေးခံ ခဲ့ရပေမယ့်- လူများစု ဗမာတွေအတွက် ထို့အခွင့်အရေးများကို မရရှိ ခဲ့ကြပေ။
ဗြိတိသျှစစ်တပ် ကရင် ရိုင်ဖယ်တပ်ရင်း၏ တံဆိပ်ဘုရင်ခံ၏ အမှုဆောင်ကောင်စီ၏ (၁၃၀) နေရာနောက်ပိုင်း (၁၃၂) နေရာအတွက် ရွေးကောက်ပွဲတွေမှာ ကရင်အမျိုးသားကိုယ်စားလှယ် (၅) နေရာကနေ (၁၂) နေရာအထိ နိုင် ခဲ့ကြတယ်။ (၁၉၃၈) ခုနှစ်မှာ ကရင်နှစ်သစ်ကူးပွဲကို နိုင်ငံတော်ရုံးပိတ်ရက်အဖြစ် သတ်မှတ်ပေး ခဲ့တယ်။
ပညာတတ် ကရင်များ၏ အမျိုးသားရေး လှုပ်ရှားမှုများ
ဗမာပညာတတ်များ နည်းတူ ပညာတတ်ခရစ်ယာန်ကရင်တွေကလည်း ခရစ်ယာန်မဟုတ်သော အခြားကရင်လူမျိုးများနှင့် စတင်ဝေးကွာလာ ခဲ့ပေမယ့်- တော်တော်များများက ကရင်အမျိုးသား အစည်းအရုံးအပါအ၀င် ကရင်အမျိုးသားရေးကို အခြေခံသော အဖွဲ့အစည်းများမှာ ခေါင်းဆောင်များ ဖြစ်လာ ခဲ့ကြတယ်။
(၁၈၈၁) ခုနှစ်မှာ ကရင်အမျိုးသားအဖွဲ့အစည်းတရပ်ကို အနောက်နိုင်ငံပညာတတ် ခရစ်ယာန်ကရင်များက ကရင်တမျိုးသားလုံး၏ အကျိုးစီးပွားအတွက် ရည်ရွယ်ပြီး တည်ထောင် ခဲ့ကြတယ်။ ခေါင်းဆောင်ပိုင်းက ခရစ်ယာန်များဖြစ်နေ ခဲ့ကြသော် ကရင်တမျိုးသားလုံး၏ အကျိုး စီးပွားအတွက် ဒေသကွဲပြား၊ ဘာသာခြားနားနေသော ကရင်အားလုံးကို တစု တစည်းတည်း စုစည်းမှုများကို ပြုလုပ် ခဲ့ကြတယ်။ (၁၉၃၉) ခုနှစ်အရောက်မှာ ဗုဒ္ဓဘာသာဝင် ကရင်အများစု၏ အဖွဲ့အစည်းကိုပါ အသိအမှတ်ပြု ခံခဲ့ရတယ်။
ရန်ကုန် တက္ကသိုလ်
ဗမာပြည်၏ ပညာရေးအတွက် ဗြိတိသျှတွေက အောက်ဗမာပြည်ကို သိမ်းပိုက်ထားစဉ်မှာ ဗြိတိသျှကိုလိုနီစနစ်ဖြင့် ဗမာပြည်အတွက် အနောက်နိုင်ငံ ပညာရေးစနစ်ဖြင့် (၁၈၇၈) ခုနှစ်တွင် ရန်ကုန်ကော်လိပ်ကို ကလာကတ္တား တက္ကသိုလ်၏ လက်ခွဲအဖြစ် စတင် တည်ထောင်ပေး ခဲ့တယ်။
(၁၉၀၄) ခုနှစ်မှာ အစိုးရကော်လိပ်နှင့် (၁၉၂၀) ခုနှစ်တွင် တက္ကသိုလ်ကော်လိပ်အဖြစ် ခေါ်ဝေါ်လာ ခဲ့ပြီး၊ ယင်းနှင့်အတူ ဂျက်ဆင်ကော်လိပ် (အမေရိကန်သာသနာပြုကျောင်း) အပါအ၀င် (၁၉၂၀) ခုနှစ်တွင် ရန်ကုန်တက္ကသိုလ်အဖြစ် ပေါ်ပေါက်လာ ခဲ့တော့တယ်။ လူတိုင်းတက်နိုင် ခဲ့တဲ့ ကျောင်းတွေတော့ မဟုတ်ခဲ့ သော်လည်း၊ တက်နိုင် ခဲ့တဲ့ ဗမာပြည်ရှိ လူငယ်တွေအတွက် နိုင်ငံရေးမျက်စေ့များ ပွင့်လာစေ ခဲ့တယ်။
ယနေ့ ရန်ကုန်တက္ကသိုလ်၏ အ၀င်ပေါက်ဝကနေ ဂျက်ဆင် ဘုရားရှစ်ခိုးကျောင်းကို လှမ်းမြင်နိုင်တယ်။၂၀ရာစုဦးပိုင်တို့တွင် ဗမာပညာတတ်လူတန်းစားတရပ်ပေါ်ထွန်းလာခဲ့ပြီး၊ ၎င်းတို့မှ လူငယ်မျိုးဆက်သစ်ခေါင်းဆောင်များပေါ်ထွက်လာ ခဲ့တယ်။ ယင်းတို့သည် အင်္ဂလန်တွင် ဥပဒေဘာသာရပ်တို့ကို သင်ကြားခွင့်များ ရရှိလာ ခဲ့တယ်။ အတွေ့အကြုံရှိလာသော ယင်းလူငယ်များက ဗမာပြည်အခြေအနေများ တိုးတက်အောင် ဆောင်ရွက်လာရေး ဆီသို့ ဦးတည် ခဲ့ကြတယ်။
(၁၉၂၀) နှစ်လွန်ကာလများတွင် တိုးတက်သော အခြေခံဥပဒေဆိုင်ရာ ပြုပြင်ပြောင်းရေးက နောက်ပိုင်းတွင် ဥပဒေပြုအာဏာကို အကန့်အသတ်ဖြင့် လုပ်ပိုင်ခွင့်များ ဥပဒေပြုကောင်စီများမှာ ရရှိလာ ခဲ့တယ်။ ထို့ကြောင့် ဗြိတိသျှအိန္ဒိယကိုလိုနီအုပ်ချုပ်ရေးအတွင်းရှိ တက္ကသိုလ်အမှုဆောင်ကောင်စီတို့တွင် ကိုယ်ပိုင်အုပ်ချုပ်ရေးများ ရရှိလာ ခဲ့တယ်။
(၁၉၂၀) ခုနှစ်၏ တက္ကသိုလ် အက်ဥပဒေအသစ်ကို ပြဌာန်းလာမှုက အခွင့်ထူးခံ လူတန်းစားနှင့် ကိုလိုနီစနစ်အတွက်တာ ဖြစ်တယ်ဟု- ဗမာကျောင်းသားများက ယူဆ ခဲ့၍ ပထမဆုံးအကြိမ် ကျောင်းသားတွေက သပိတ်မှောက် ကန့်ကွက် ခဲ့တယ်။ နောက်တော့ အမျိုးသားရေးအတွက် အမျိုးသားကျောင်းများကို ဗမာပြည်အနှံ့အပြားမှာ ဖွင့်လှစ် ခဲ့ပြီး၊ ကိုလိုနီပညာရေးကို ဆန်ကျင့် တိုက်ပွဲဝင် ခဲ့တယ်။ ထို့ သပိတ်ကို အကြောင်းပြု၍ တန်းဆောင်မုန်းလပြည့်ကျော် (၁၀) ရက်နေ့ကို ဗမာပြည်၏ အမျိုးသားနေ့ဟု သတ်မှတ် ခဲ့ကြတယ်။
ပိုမိုပြီး၊ အမျိုးသားရေး လှုပ်ရှားမှုတွေဟာ တိုးပွားလာ ခဲု့ပြီး၊ ၀ံသာနုအဖွဲ့အစည်းများအပြင် ရခိုင်အမျိုးသား သံဃာတော် ဦးဥတ္တမနှင့် ဦးဝိစာရတို့လို သံဃာတော်များ ပါဝင်လာ ခဲ့ကြတယ်။
အမျိုးသားကောလိပ်နှင့်အတူ အမျိုးသား ပညာရေးကောင်စီနှင့် အမျိုးသားကျောင်းများ အရှိန်အဝါ ကြီးမားလာ ခဲ့သော်လည်း (၁၉၂၄) ခုနှစ်တွင် အမျိုးသားကောလိပ်များ ဖျက်သိမ်းလိုက် ခဲ့ရတယ်။
ရန်ကုန်တက္ကသိုလ်ဟာ အထူးသဖြင့် (၁၉၃၀ ) ပြည့် လွန်နောက်ပိုင်းတွင် ကိုလိုနီစနစ်ဆန့်ကျင်ရေးနှင့် အမျိုးသားလွတ်မြောက်ရေး လှုပ်ရှားမှုတွေအတွက် ခြေကုတ် ယူရာနေရာ တခု ဖြစ်လာ ခဲ့တယ်။ (၁၉၃၁) ခုနှစ်တွင် ရန်ကုန်တက္ကသိုလ်ကျောင်းသားများသမဂ္ဂကို တည်ထောင်လာနိုင် ခဲ့ပြီး၊ ကျောင်းသပိတ်တွေဟာ အရိုန်အဟုန် ကောင်းလာ ခဲ့တယ်။
သမိုင်းဝင် (၁၉၂၀)၊ (၁၉၃၆) နှင့် (၁၉၃၈) ခုနှစ် ကျောင်းသား သပိတ်များသည် အမျိုးသားလွတ်လပ်ရေးလှုပ်ရှားမှု့သမိုင်းမှာ ထင်ရှားလာ ခဲ့ပြီး၊ ဗိုလ်ချုပ်အောင်ဆန်း၊ ဦးနု၊ ဒေါက်တာဘမော်၊ ဦးကျော်ငြိမ်း၊ ဦးဗဆွေ၊ ဦးသန့်၊ ဦးသိန်းဖေ (မြင့်) အစရှိသော နိုင်ငံရေးခေါင်းဆောင်များကို မွေးထုတ်ပေးနိုင် ခဲ့တယ်။
ဗြိတိသျှကိုလိုနီခေတ်၏ လူငယ်နှင့် နိုင်ငံရေး
(၁၉၁၉) ခုနှစ်တွင် ဒိုင်အာခီအုပ်ချုပ်ရေးနှင့်အတူ- အိန္ဒိယပြည်တွင် မက် (စ်) ၀ါဒနှင့် လက်ဝဲစာပေများကို လေ့လာသူတွေ ပိုမို များပြားလာ ခဲ့ရာ- ဗမာပြည်မှာလည်း အနောက်နိုင်ငံ ပညာရေး စနစ်ကြောင့် နယ်ချဲ့ ဆန့်ကျင်ရေး အမျိုးသားလွတ်မြောက်ရေး လှုပ်ရှားမှုများအတွက် လူငယ်တွေ၊ ကျောင်းသားတွေနှင့် အခြားမျိုးချစ်များသည်- မက် (စ်) ၀ါဒနှင့် ဗုဒ္ဓ၀ါဒအခြေခံသော အယူအဆများ အပါအ၀င် အမျိုးသားရေး၊ ဆိုရှယ်လစ်၊ ကွန်မြူနစ် စာပေတွေကို ပိုမို လေ့လာခွင့် ရရှိလာ ခဲ့ကြတယ်။
နောက်ပိုင်းတွင် ဗမာပြည်လွတ်လပ်ရေးလှုပ်ရှားမှုများတွင် ကိုနီဆန့်ကျင်ရေး အမျိုးသားလွတ်မြောက်ရေးလှုပ်ရှားမှုတွေတွင် လက်ဝဲ၀ါဒအခြေခံသော လူတန်းစား လွတ်မြောက်ရေးတွေပါ ပါဝင်လာ ခဲ့တော့တယ်။
အပိုင်း (၁) ပြီးပါပြီ။
0 comments:
Post a Comment