သူဘာများ ပြောလိမ့်မလဲ
|
11:02 PM |
No မှတ်ချက် |
စိတ်ကူးတွေနဲ့ ရှင်သန်နေကြတဲ့ သူတွေ၊ မျှော်လင့်ချက်လေးနဲ့ ရှင်သန်နေကြတဲ့လူတွေနဲ့ လူတွေအားလုံးကတော့ အတူတူပါပဲ... ပုံစံလေးတွေသာ အနည်းနဲ့ အများကွာတတ်ကြတာပါ။
အဲဒီလိုရှင်သန်ရာမှာ..ဖြတ်သန်းလာတဲ့ လမ်းခရီးတလျှောက် ကိုယ်နဲ့ ပတ်သက်သူတွေကို ဘယ်လောက် အကျိုးပြုခဲ့ပြီ၊ ဘယ်လောက် အန္တရာယ်တွေ၊ ဒုက္ခတွေ ပေးခဲ့ပြီဆိုတာ ကိုယ်တိုင်သာ အသိဆုံးပါ.......။
တစ်ချို့ ကျတော့လည်း အများအတွက် ပေးဆပ်ရင်း၊ တစ်ချို့ ကျတော့လည်း....။
ပြန်ကြည့်မိပါတယ်၊ ဘ၀တစ်လျှောက်လုံး ဖြတ်သန်းလာတဲ့လမ်းကြောင်းကိုပေါ့.....။ ကျွန်တော့်ကြောင့် သောကရောက်ခဲ့ရတဲ့သူတွေလည်း မနည်းခဲ့ဘူး။
ကျွန်တော် သောကတွေ တနင့်တပိုးနဲ့ ဖြတ်သန်းလာခဲ့တဲ့ လမ်းကလေးက အ၀ါရောင်လွင်ပြင်တစ်ခုလို..၊ ဒါမှ မဟုတ်ရင်လည်း ခရောင်းလမ်းတစ်ခုလို့ ပြောလိုက်ချင်မိပါတယ်။
မိန်းကလေး သူငယ်ချင်းတစ်ယောက်ရှိတယ်၊ တကယ်တော့သူက အမှည့်လွန်နေတဲ့ သစ်သီးတစ်လုံးလို့ပဲ ဆိုရမှာပေါ့။
မိန်းကလေးတစ်ယောက်အနေနဲ့လေ၊ အသက်(၃၀)ကျော် ဆိုတော့ ရောင်းအားကျနေတဲ့ ကုန်စည်လို အပျိုဟိုင်းကြီးတောင် ဖြစ်နေပြီပဲ... ဒါပေမယ့် စွန့်ပစ် ပစ္စည်းတော့ မဖြစ်သေးပါဘူး။
ဟိုတစ်နေ့က သူ ဖုန်းဆက်တယ်၊ အားရင် ဖုန်းပြန်ခေါ်ပေးပါတဲ့..၊ ကျွန်တော် ပြန်မဆက်တော့ဘူး။ သွားတွေ့လိုက်တယ် အရေးကြီးတယ်ထင်လို့ပါ....။
`` ပြော....ဟေးရောင်၊ ဘာပြုတုံး´´ နည်းနည်း ထူးဆန်းလား ကျွန်တော်တို့က သူငယ်ချင်းတွေ အချင်းချင်း အားလုံး ဟေးရောင်လို့ ဘဲခေါ်ကြတာ။
`` အဟီး.......´´ တဲ့၊ ကျွန်တော့်ကို ကြည့်ရင်း သူရယ်နေတယ်၊ မလုံမလဲနဲ့ ကိုယ့်ကိုယ်ကိုယ်ပြန်ကြည့်ရင်းက
`` ဟာ မင်း ယောက်ျား လိုချင်နေပြီလား ´´ ဆိုတော့ သူရယ်ပြီးတော့
`` အေးကွာ သူငယ်ချင်း နေရတာ ခြောက်သွေ့လာတယ်၊ တကယ်ပြောတာပါ´´ တဲ့။
မျက်နှာလည်း ညှိုးသွားတယ်၊ ဘာကို ရည်ရွယ်တာလဲ ဆိုတာ သိတော့ သိနေခဲ့ပါတယ်၊ သူငယ်ချင်းက ကျွန်တော့်ကြောင့် ရက်ပေါင်းများစွာ ကြိတ်ပြီး ငိုကြွေးခဲ့ရဘူးတယ်ဆိုတာ ကျွန်တော်သိနေခဲ့တာဘဲ။
`` အခု ဘာဖြစ်လဲပြော.... ´´
`` ဘာမှ မဟုတ်ဘူး.. စကားလေး ဘာလေး ပြောချင်လို့ပါ မဆုံရတာလည်း ကြာပြီလေ... သတိရနေလို့.. ´´
`` အော်.....´´ ဒီအော်လေးရဲ့ နောက်မှာ တိတ်ဆိတ်ငြိမ်သက်စွာ ကာရံမညီတဲ့ ဘ၀သရုပ်ဖော် ကဗျာလေးတစ်ပုဒ်ကို မျက်လုံးထဲမှာ ပြန်မြင်လာမိတယ်... သူနဲ့ ကျွန်တော့်ရဲ့ ကဗျာလေးပေါ့....။
ကျွန်တော် ကောင်မလေးတစ်ယောက်ကို ရွေးချယ်ခဲ့တုံးက... သူ ငိုထားတဲ့ မျက်လုံးတွေနဲ့ ပြုံးပြခဲ့ဘူးတယ်၊
ရှင်းပြရ ခက်တဲ့ အသိတွေနဲ့ အကြည့်တွေက တဆင့် သူ့သဘောထားတွေကို ကျွန်တော်သိခဲ့ပါတယ်၊
ဒါပေမဲ့လည်း ဒီအသိတွေက ကျွန်တော့်ကို မစည်းရုံးနိုင်ခဲ့ဘူး၊ အဲဒီတုံးက ကျွန်တော် သူ့ကို သနားခဲ့မိပါတယ်၊
အကြာကြီးတော့မဟုတ်ပါဘူး၊
ကျွန်တော့်နားမှာ ကောင်မလေးရှိနေတယ်လေ......မေ့သွားတာပါပဲ။
သိပ်မကြာခင်မှာဘဲ ကျွန်တော် ကောင်မလေးနဲ့ လမ်းခွဲခဲ့ရတယ်၊ မချစ်လို့တော့ မဟုတ်ပါဘူး။ ကံကြမ္မာ ရက်စက်လို့လေ၊ ရက်စက်မှုတွေက ကျွန်တော့်ကောင်မလေးကို ခေါ်ဆောင်သွားခဲ့တာကိုး၊
အဲဒီတုံးကလည်း ဒီသူငယ်ချင်းက အရမ်းကို ဖေးမခဲ့ဘူးတယ်၊ အလုပ်မရှိ အလုပ်ရှာပြီး စကားတွေပြော... စိတ်ရွှင်လန်းစေမယ့် လည်စရာ ပတ်စရာ နေရာလေးတွေကို ခေါ်ခေါ်သွားတတ်ခဲ့တယ်၊
သူငယ်ချင်းကို အဲဒီတုံးက ကျွန်တော့်အပေါ်မှာ အရမ်းကောင်းပြီး အရမ်းစာနာနားလည်တတ်တဲ့ သူငယ်ချင်းလို့ တွေးခဲ့မိပေမယ့် ကျန်နေတာတွေကိုတော့ သတိမထားတတ်ခဲ့ဘူး။
အတွေးလေး စီးမျောရင်းက သူလည်း အခုထိ အိမ်ထောင်မပြုသေးတာကို စဉ်းစားမိသွားတယ်၊
နောက်တော့ သူနဲ့ ပတ်သက်ခဲ့သမျှကို စဉ်းစားမိတယ်၊ သတိထားမိတာကတော့.. သူ ကျွန်တော့်ကို စေတနာထားတယ် ဆိုတာထက် ပိုနေခဲ့တယ်ဆိုတာပါပဲ။
ကျွန်တော်ကတော့ နှစ်ရှည်လများ အနားမှာ မရှိနိုင်တော့တဲ့ ကောင်မလေးကို မမေ့သေးတာရော၊ အားနာတာရော......နောက်ပြီး ကိုယ့်ရဲ့ အချစ်ကို တန်ဘိုးထားခဲ့တာရောပေါ့၊ ဒီအကြောင်းတွေက ကျွန်တော့်ကို ဒီအတိုင်း ချုပ်နှောင်ထားရစ်ခဲ့တယ်၊
ဒါဆိုရင် သူငယ်ချင်းကရောလို့.....
သူလည်း ကျွန်တော့်ကို မမေ့သေးတာရော၊ အားနာတာရော၊ သူ့ အချစ်ကိုတန်ဘိုးထားတာရော.....ကြောင့် ဒီအတိုင်းများ ဖြစ်နေခဲ့တယ်နဲ့ တူပါတယ်....
ဒီလိုတွေးဖြစ်တော့ သူငယ်ချင်းရဲ့ မျက်ဝန်းတွေက ရင်ထဲမှာ ဆန်းသစ်လာတယ်...။ နူးညံ့စွာ တောက်ပနေခဲ့တယ်လေ...
သတိဝင်လာပြီး သူ့မျက်နှာကို ကြည့်မိတယ်။
သူကျွန်တော့်ကို ကြည့်နေတယ်၊ စိတ်ဝင်စားစရာကောင်းတာက သူ့ မျက်ဝန်းတွေထဲမှာ ကြင်နာတတ်တဲ့ အရည်ကြည်လေးတွေ လဲ့နေတယ်လို့ မြင်လိုက်မိတာပါပဲ။
ကျွန်တော် အခု သူငယ်ချင်းရဲ့ မျက်ဝန်းကောင်းကောင်း ကြည့်တတ်သွားပြီ၊ မျက်ဝန်းကတဆင့် နှလုံးသားကိုလည်း ထွင်းဖောက် မြင်တတ်သွားခဲ့ပြီလေ... သူ့သဘောထားလေးကိုလည်း ဘာသာပြန်တတ်သွားပြီ။
ကျွန်တော် တစ်ခုခုကို ပြောချင်လို့ ဟန်ပြင်လိုက်တယ်... ပြောလို့ မရတာနဲ့ တံတွေးမြိုချလိုက်တယ် လည်ချောင်းဆန့်ပြီးတော့ပေါ့။
နောက်တော့ကျွန်တော် မျက်နှာလွှဲပြီး တစ်ခုပြောလိုက်တယ်။
တကယ် ပြောချင်တဲ့ စကားက ထွက်မလာဘဲနဲ့ `` အေးပေါ့သူငယ်ချင်းရာ... မင်းလည်း အချိန်တောင် နှောင်းနေပြီ၊ အဆင်ပြေတဲ့လူရှိရင် ယူလိုက်ဟာ ´´ တဲ့.. ဘာမှ မဆိုင်ဘူး၊
သူ ကျွန်တော့်ကို ကြည့်ရင်း ဟက်ဟက်ပက်ပက်ရယ်နေတယ်၊
ပြီးတော့`` ငါသဘောကျတဲ့လူက ငါ့ကို မသိဘူးဟ´´တဲ့ ကျွန်တော်လည်း သူ့မျက်နှာကို မော့ကြည့်လိုက်တယ်၊
သူကျွန်တော့်ကို ရွှန်းရွှန်းစားစားကြည့်နေလေရဲ့....၊ ကျွန်တော် မျက်နှာပြန်ငုံ့ပြီးတော့...
`` ဟုတ်လား၊ ငါပြောပေးမယ်လေ´´ လို့ ကယောင်ကတန်းပြောလိုက်မိတယ်။
ကျွန်တော်ကလည်း ရယ်စရာဖြစ်နေပြီထင်ပါတယ်၊ သိနေတာကို ပြောမထွက် လို့လေ၊ သူက ဆက်ပြီးတော့...
`` နင်ရော ......တစ်ယောက်ထဲ မပျင်းဘူးလားတဲ့ ´´ ကျွန်တော်ဘာပြောလိုက်လဲ သိလာ``အင်း´´ လို့... ကျွန်တော် သတ္တိမွေးပြီး လွှတ်ကနဲ ပြောလိုက်တယ်၊ ဒီခဏလေးတွေက တကယ်တော့ အကြာကြီးပါပဲ။
ပြီးတော့ အရှက်ပြေ...
`` ငါရှာပေးရင် နင်ယူမလား´´ လို့၊ သူကလည်း ``နင်တကယ်ရှာပေးရင် ငါယူမယ်ဟာ၊ နင့်စိတ် တိုင်းကျတော့ဖြစ်ပါစေ´´ တဲ့။
`` အင်းပါ စိတ်ချ၊ ငါရှာပေးမယ်၊ စောင့်နေ၊ ငါပြန်လိုက်ဦးမယ်နော်´´ လို့ပြောပြီးထွက်လာခဲ့တယ်။
ကျွန်တော် အိမ်ရောက်တော့ သူနဲ့ ကျွန်တော့်ပုံပါတဲ့ ငယ်ငယ်က ဓါတ်ပုံလေးတွေ ရှာလိုက်တယ်၊ နောက်... ကျွန်တော့် ပြောချင်တဲ့ စကားလေးရေးပြီး စာအိတ်တစ်အိတ်ထဲမှာ ထည့်လိုက်တယ်၊ ပြီးတော့ ကျွန်တော် သူ့အိမ်ကို သွားပေးထားခဲ့တယ်။
အထဲမှာတော့ သူသိပြီးသား ကျွန်တော့် အကြောင်းတွေထဲက သူမသိသေးတဲ့ ကျွန်တော့် စိတ်ကူး အသစ်လေးတွေကို ရေးထားတယ်၊
နောက်တစ်ခုက ကျွန်တော့်ရဲ့ အားနည်းချက်တစ်ခုကိုလည်း ထည့်ရေးထားသေးတယ်၊ ကျွန်တော် အကင်းမပါးကြောင်းနဲ့ တည့်တည့်ပြောမှ ရိပ်မိကြောင်း..ပေါ့။
ညနေ သူပြန်ရောက်တော့ ဖုန်းဆက်လာတယ်၊
`` အဲဒီစာအိတ်က ဘာလဲတဲ့´´ ကျွန်တော်လည်း ဖုန်းထဲမှာ ဆိုတော့ မျက်နှာပူစရာမလို လို့ထင်တယ်၊ ပြောချင်ရာကို ပြောလိုက်တယ်၊
``အဲဒါ နင့်အတွက် သတို့သားလောင်းလေ၊ ငါရှာထားတာ´´ လို့...
သူလွင် လွင်လေးရယ်တယ်၊ ပြီးတော့ `` နင်အရမ်းတော်တယ်ဟ၊ နင်ပို့ပေးတဲ့ သတို့သားလောင်းက ငါငယ်ငယ်ကတည်းက တစ်ဘက်သတ် ချစ်ခဲ့ရတဲ့ သူဘဲ...´´ တဲ့။
ကျွန်တော်လည်း မအောင့်နိုင် မအီးနိုင်နဲ့ ``အဟီး´´လို့ တစ်ချက်ထဲ ရယ်လိုက်တယ်၊ ပြီးတော့ ဆက်ပြောလိုက်တယ် ``ငါသိသားဘဲ´´လို့...
`` ဟောတော် ...ဘယ်တုံးကသိတာလဲ´´
``ငယ်ငယ်ထဲကထင်တယ်၊ ငါဒီလောက်ကြီး ခိုင်မြဲမှန်းမသိခဲ့လို့ပါ´´ သူအသံတိတ်သွားတယ်၊
ပြီးတော့... `` ငါယုံကြည်ခဲ့ပါတယ်ဟာ၊ ငါ့ရဲ့ အချစ်စိတ်က တစ်နေ့မှာ...အကျိုးပေးလိမ့်မယ်ဆိုတာကိုလေ..´´
တိမ်ဝင်သွားတဲ့ သူ့စကားလေးနားထောင်ရင်း ကျွန်တော် သနားလိုက်တာ၊
စိတ်ထဲမှာ တော်တော်လေးလည်း ဆို့နစ်သွားမိတယ်၊ သူငယ်ချင်းရယ်လို့လည်း အသံမထွက်ပဲ ရေရွတ်လိုက်မိတယ် ထင်ပါတယ်။
ပြီးတော့ သူက ဆက်ပြောတယ်
``ဟဲ့နင်ရှာပေးတဲ့ သတို့သားက လူပျိုရော ဟုတ်ရဲ့လား၊ မိုက်ကန်းကန်းနဲ့ ကြောက်စရာကြီး´´တဲ့
ကျွန်တော်အားရပါးရ ရယ်လိုက်တယ်.... သူလည်း ဖုန်းထဲမှာ လိုက်ရယ်နေလေရဲ့...
ဖြတ်ကနဲ တစ်စုံတစ်ခုကို သတိရလိုက်မိလို့... သူ့ကို ကျွန်တော်ပြောလိုက်တယ်
`` မနက်ဖြန် မင်းလှလှလေးဝတ်ထားနော်.... ငါတို့နေ့လည်စာသွား စားရအောင်´´ လို့... ``အင်း´´လို့ တိုးတိုးလေး ပြန်ပြောပြီး သူ တိတ်ဆိတ်သွားတယ်၊
သူရင်တွေခုန်နေမလားမသိဘူး... ကျွန်တော်တော့ ရင်တွေခုန်လိုက်တာ. လူပျိုပေါက်စလေးပြန်ဖြစ်သွားသလိုပါဘဲ။
မနက်ဖြန်နေ့လည်ကို စိတ်ကူးလေးနဲ့ မြင်ကြည့်ရတာ...လှလိုက်တာ၊ အခုမှ ပြန်စဉ်းစားမိတယ် သူ့ကို ကျွန်တော် တစ်ခါမှ စိတ်ထဲမှာ မငြိုငြင်ဘူးခဲ့ပါလား..လို့။
အရင်ကတော့ ရိုးရိုးယဉ်ယဉ်လေးနဲ့ သန့်သန့်ရှင်းရှင်းနဲ့ စာနာနားလည်ခြင်းတွေနဲ့ ကျွန်တော်တို့ ခင်မင်ခဲ့ကြတယ်......၊ အခုတော့ ဒါကို ချစ်ခြင်းအဖြစ် ပြောင်းလဲလိုက်တော့မယ်။
ဘာပဲဖြစ်ဖြစ် မနက်ဖြန်မှာ အခွင့်အရေးရခဲ့ရင် ခွင့်မတောင်းပဲနဲ့ တစ်ခါလောက် သူ့ပါးလေးကို အလစ် နမ်းမယ်။
သူ ကြည်နူးပြီး ရှက်သွားတာလေး ကြည့်ချင်လို့.. အဲလိုလုပ်ရင် ဘာများပြောမှာပါလိမ့်. ပြောခဲ့ရင်လည်း ကိုယ့်ရဲ့ လုပ်ပိုင်ခွင့်ပဲလို့ ခပ်တည်တည်နဲ့ ပြန်ချေပရမှာပေါ့...
အင်း စဉ်းစားဖြစ်တော့လည်း ဒီလိုအခြေအနေမျိုး သူတစ်ခါမှ ကြုံဘူးမှာ မဟုတ်ဘူးလို့ ထင်ပါတယ်။ စဉ်းစားရင်းနဲ့ ရင်တွေ ခုန်လိုက်တာ.....
(ကွန်ဆူးမား)
ဒီနေ့ထွက်တဲ့ WW ဂျာနယ်မှာ ပါတဲ့ ကျွန်တော့်စာမူလေးပါ....
0 comments:
Post a Comment