ခသုံးလုံး
|
7:20 PM |
No မှတ်ချက် |
ကောသမ္ဘီပြည်မှာ ရောက်လေရာအရပ် ဗုဒ္ဓ အဆဲခံရတယ်။ သူ့သမီးမယူတာကို စိတ်နာနေတဲ့ ပုဏ္ဏားက.. လူငှားပြီး ဆဲခိုင်းထားလို့ ဗုဒ္ဓအဲသလို အဆဲခံရတာပဲ။
ဟိုနေရာရောက်လဲ အဆဲခံရ၊ ဒီနေရာရောက်လဲ အဆဲခံရဆိုတော့ .. နောက်တော်က ပါလာတဲ့ ညီတော်အာနန္ဒာက.. ဗုဒ္ဓကို လျှောက်ထားတယ်။
'' အရှင်ဘုရား ဒီအရပ်က မနေသင့်ပါဘူး.. ဒီလောက် ဆဲဆိုနေကြမှတော့ တခြား အရပ် သွားကြရအောင် ပါ '' တဲ့..။
ဗုဒ္ဓက..
'' တခြားအရပ်မှာလဲ ဆဲနေရင် ဘာထူးမှာလဲ '' တဲ့..။
-------------------------------------------------------------------------------------------------------
ဘရဒွါဇ ပုဏ္ဏားအိုကြီး အမြင်မှာ သက်တော် (၃၅) အရွယ် ဗုဒ္ဓကို ချာတိတ်လို့ပဲ မြင်နေတယ်။ အသက်အရွယ်အရ သူ့ကို ဗုဒ္ဓက နေရာပေးစေချင်တယ်။ လေးစားစေချင်တယ်။ ခရီးဦးကြိုပြုစေချင်တယ်..။ အဲဒါတွေ တစ်ခုမှ ဗုဒ္ဓက မလုပ်တော့.. ဒေါသထွက်ပြီး.. ဗုဒ္ဓကို ငြိုငြိုငြင်ငြင်ပြောတယ်။ အပြစ်တင်တယ်။ နောက်ဆုံး မကြားဝံ့မနာသာ ဆဲဆိုတဲ့အထိ ပေါက်ကွဲတယ်။
အဲဒီအချိန် ဗုဒ္ဓပြောတဲ့စကား အင်မတန်မှတ်သားဖွယ်ရာ ကောင်းတယ်။
ပုဏ္ဏားကြီး.. မိတ်ဆွေအပေါင်းအသင်း (သို့) မြင့်မြတ်သူတွေထံပါး လက်ဆောင်ပဏ္ဏာတွေ ပေးဖူးသလားတဲ့။ ပေးဖူးတယ်လို့ ဘရဒွါဇက ပြန်ဖြေတော့.. ပုဏ္ဏားကြီးပေးတဲ့ လက်ဆောင်.. တဖက်က မယူရင်.. အဲဒီလက်ဆောင် ဘယ်ရောက်သွားသလဲ တဲ့..။ ကိုယ်ကပေးပေမယ့် သူက မယူမှတော့.. ကိုယ့်ပစ္စည်းကိုယ်ပဲ ပြန်ယူသွားရမှာပေါ့ လို့ ပုဏ္ဏားကြီးက ဖြေတယ်။
အဲဒီ သဘောတရားကို ကျွန်တော်တို့ သင်ယူကြရမယ်..။ လာဆဲနေသမျှကို သူတစ်ခွန်းကိုယ်တစ်ခွန်း ပြန်ဆဲ နေစရာလဲ မလိုဘူး..။ ဒီကောင်တော့ နေနှင့်အုံး.. အခွင့်သာရင် ပြန်တွယ်ပစ်လိုက်မယ်လို့လဲ.. တေးမှတ်နေစရာမလိုဘူး..။ သူဘယ်လောက်ဆဲဆဲ.. ကိုယ်မယူရင်
ကိုယ်မရတာ အသေအချာပဲ..။
--------------------------------------------------------------------------------------------------------------------------
ပုရိတ်သတ်လူပုံအလယ် မှာ စိဉ္စမာဏ က ဗိုက်အတုနဲ့ရောက်လာပြီး ဗုဒ္ဓကို လက်ညှိုးငေါက်ငေါက်ထိုး စွပ်စွဲတယ်..။ '' ရှင်က တော့ ဒီမှာဇိမ်ကျလို့ ကျမမှာတော့ ရှင်နဲ့ရတဲ့ ကိုယ်ဝန်ကြီးနဲ့ ဒုက္ခတွေရောက်လို့ '' တဲ့..။
ဟိုက.. ငါ့ယောက်ျားဆိုတဲ့ အထာနဲ့ လာရန်တွေ့တာကို ဗုဒ္ဓက အင်မတန်မှ အေးဆေးတည်ငြိမ်တဲ့ လေသံနဲ့..
'' ချစ်သမီး '' လို့ မဟာကရုဏာနဲ့ ခေါ်တော်မူတယ်။ ငါ့ကို မဟုတ်တန်းတရားစွပ်စွဲရသလား.. မဟုတ်လို့ကတော့ မခံဘူးကွ.. ငါ့ဘာမှတ်နေသလဲ.. စသဖြင့်.. သူ့အမှားကို.. ကိုယ်မှန်နေတာပဲဆိုပြီး ခပ်ကြမ်းကြမ်း မတုန့်ပြန်ဘူး..။
'' ချစ်သမီး.. တခြားလူတွေ မသိရင်သာ ရှိမယ်.. အဲဒီဗိုက်က.. ဘယ်သူ့ဗိုက်ဆိုတာတော့.. မင်းနဲ့ငါနဲ့ကတော့ အသေအချာသိတယ်.. '' တဲ့..။
နဂိုရ်ကမှ ရပ်တည်ချက်မမှန်နေသူကို.. ကိုယ်ကမေတ္တာကရုဏာ အဦးမှုတဲ့ စိတ်နဲ့ တုန့်ပြန်နိုင်ခဲ့ရင်.. အမှန်တရား ဆိုတာ သူ့အလိုလို ပေါ်ပေါက်ဖို့ လုံလောက်ပြီးသားပါ..။ (အဌကထာဆရာပြောတဲ့ ကြွက်ယောင်ဆောင်-ကြိုးကိုက်ဖြတ်တဲ့ ဇာတ်ညွှန်းတော့ ဒီနေရာမှာ.. မကိုးကားပါရစေနဲ့)
---------------------------------------------------------------------------------------------------------------------------
ဆိုတော့..
အဲဒါတွေဟာ ကျွန်တော်တို့အတွက် အတုယူဖွယ်ရာ.. ဗုဒ္ဓဘုရားရဲ့  အင်မတန်လေးစားဖွယ် ရပ်တည်ချက် တစေ့တစောင်းတွေပဲ..။
တဖက်က.. ရန်စလာတိုင်း.. သူဘာလုပ်လုပ် ဒုံးပေကပ်သတ် ငုံ့ခံနေစရာလဲ မလိုပါဘူး..။ ခံစားချက်နောက်လိုက်ပြီး.. သူတစ်ခွန်းကိုယ်တစ်ခွန်း.. သူတစ်ချက်ကိုယ်တစ်ချက် ပြန်တွယ်နေစရာလဲ မလိုပါဘူး..။
သူမှားနေတာကို ကိုယ်က သိနေမှတော့.. သူ့အမှားကို ကိုယ့်အမှားနဲ့ မချေမိဖို့ သိပ်လိုပါတယ်..။ အဆဲအဆို လွတ်အောင်.. ကောသမ္ဘီကနေ တခြားအရပ်ကို ဗုဒ္ဓမသွားခဲ့တာကို သင်ခန်းစာယူနိုင်ရင် ကိုယ့်ရပ်တည်ချက်အတိုင်း.. ခံနိုင်ရည်ရှိရှိနဲ့ ဆက်လက်ရပ်တည်နေသွားဖို့က ပိုအရေးကြီးတယ်ဆိုတာ သဘောပေါက်လာပါလိမ့်မယ်..။
ဆိုလိုတာက လူတိုင်း.. ခသုံးလုံး ကျေဖို့ လိုပါတယ်..။ ခေါ်ရင်လာ-ခိုင်းတာလုပ်-ခံမပြောနဲ့ ဆိုတဲ့ ခသုံးလုံးတော့ မဟုတ်ပါဘူး..။
၁) ခံစားချက်နောက် မလိုက်နဲ့
၂) ခံနိုင်ရည်ရှိအောင် ကြိုးစားပါ
၃) ခွင့်လွှတ်နိုင်ရမယ် ... ဆိုတဲ့ ခသုံးလုံး ပါ..။
ခွင့်လွှတ်တယ်ဆိုတာဟာ.. သူဘာလုပ်လုပ်.. ကိုယ်ကဘာမှ မတုန့်ပြန်တာမျိုးနဲ့ မရောထွေးပါနဲ့..။
ဘရဒွါဇကို ဘယ်လို တုန့်ပြန်ခဲ့တယ်.. စိဉ္စမာဏကို ဘယ်လိုနားချခဲ့တယ်.. ကောသမ္ဘီပြည်မှာ ဘယ်လိုရပ်တည်ခဲ့တယ် ဆိုတာတွေဟာ.. အမှားကျုးလွန်သူတွေအပေါ် ကိုယ့်ရပ်တည်ချက်အတိုင်း.. မေတ္တာ၊ကရုဏာ၊မုဒိတာ၊ဥပက္ခော နဲ့ အလိုအပိုမရှိ.. ကျင့်ကြံနေထိုင်သွားခြင်းကမှ.. ခွင့်လွှတ်ခြင်း အစစ်အမှန်ဖြစ်ပါတယ်..။
အဲဒီစိတ်ဓါတ်ကို မွေးမြူဖို့ လေးသင်္ချေနဲ့ ကမ္ဘာတစ်သိန်း အချိန်ယူရမယ်လို့လဲ.. လွန်လွန်ကျုးကျုး အားမလျော့ပါနဲ့။
အခုကစလို့ ဟောဒီဖေ့ဘွတ်ပေါ်မှာကိုပဲ.. ဆဲဆိုအော်ဟစ်နေသမျှကို အဲဒီိစိတ်ဓါတ်နဲ့ ကျင့်ကြံကျော်လွှားကြည့်ပါ။ ချက်ခြင်းလက်ငင်းကိုပဲ.. ဟောဒီဖေ့ဘွတ်ကြီးက.. ကိုယ့်အတွက် ပျော်ပျော်ရွှင်ရွှင် လွတ်လွတ်လပ်လပ် ပေါ့ပေါ့ပါး
ပါးနဲ့ ပန်းဥယျာဉ်တစ်ခုကြီးလို ရနံ့တွေသင်းပျံ့ နေမှာ အသေအချာပါ..။
ကြိက်သော်ယူပါ.. မကြိုက်ပေမူ..ရှာဖွေပါဦး.. ဤခေတ်ထူး၌ ဆည်းပူးနိုင်မှ.. တန်ကာကျလိမ့်..
အနည်းငယ်များ အတွေးတစ်စရတယ်ဆိုရင်ပဲ.. ကျေနပ်မိကြောင်းပါ..
0 comments:
Post a Comment