Monday, June 27, 2016

မက္ခရာတိုင်းပြည်၊လက်မရွံ့လူမိုက်များနှင့် အသည်းငယ်တတ်သောကျွန်ုပ် (မင်းဒင်)



(တစ်)
“ဒေါက်”
“ဒေါက်၊ဒေါက်”
“ဒေါက်ဒေါက်ဒေါက်”
ကျယ်လောင်သောတံခါးခေါက်သံသည်ကျွန်ုပ်အားလိပ်ပြာလွင့်
မတတ်ခြောက်ခြားသွားစေ၏။
“ဣတိပိ”“ဣတိပိ”“ဣတိပိ”
ဘုရားမှတပါးအားကိုးရာမမြင်လေသဖြင့်ဂုဏ်တော်ကိုးပါးကို၊
အလန့်တကြားရွတ်ဆိုမိသော်ငြား၊ကြောက်စိတ်ကြောင့် “ဣတိပိ” ချည်းသာအပ်ကြောင်းထပ်နေ၏။ရှေ့ ဆက်၍မရွတ်နိုင်တော့။ ရွတ်သည်ဆို သော်ငြား၊ ကိုယ့်နား ကိုယ်ကြားရုံမျှသာဖြစ်၏။
အသံ ကျယ်ကျယ်မထွက်ရဲချေ။

နေရာကားရန်ကုန်မြို့ကြီးနှင့်ခဲတပစ်မဝေးသော၊လူနေထူထပ်သည့်
မြို့နယ်တခုမှ၊ခြောက်ထပ်တိုက်တလုံး၏ နှစ်လွှာမြောက်အခန်းတွင်
ဖြစ်၍အချိန်ကားနံနက်ကိုးနာရီခန့်ဖြစ်၏။ယင်းအခန်းငယ်ကား၊
ကျွန်ုပ်နှင့်တပည့်ကျော်သို့ပြည်တော်ပြန်နိုင်ခဲ့သည်ရှိသော်၊
ဇရပ်နှင့်ကားမှတ်တိုင်တို့တွင်၊ခြေသလုံးအိမ်တိုင်ဘဝ၊ခိုကိုးရာမဲ့
မဖြစ်စေရန်၊ရှိစုမဲ့ချွေးနည်းစာဖြင့်ဝယ်ယူထားခဲ့ခြင်းဖြစ်၏။
လွန်ခဲ့သောညကကျွန်ုပ်နှင့်တပည့်ကျော်သုံးဦးတို့၊ဖူးခက်၊ရနောင်း
၊ကော့သောင်း၊ထားဝယ်၊ရန်ကုန်ခရီးရှည်ကြီးကို၊ရှပ်တိုက်ယာဉ်
အပါအဝင်၊မော်တော်ကားအဆင့်ဆင့်စီးလျက်၊တပင်တပန်း
ခရီးနှင်လျက်ရောက်ရှိခဲ့ကြခြင်းဖြစ်လေရာ၊ခရီးရောက်မဆိုက်ပင်၊
တပည့်ကျော်တို့တချိုးတည်းသိုးနေအောင်၊ထိုးအိပ်လိုက်ကြသည်မှာ
၊မော်တော်ဘုတ်သံနှင့်တူလှသောဟောက်သံ တခေါခေါသည်၊ အခန်းငယ်တခုလုံးကိုတညဥ့်လုံးစိုးမိုးထားခဲ့လေသည်။
ကျွနု ပ်မူကားစိုးရိမ်သောကဗျာဒဖြင့်၊တမှေးမျှပင်အိပ်၍မပျော်လေ။
မိုးလင်းသည်နှင့်၊တပည့်ကျော်သုံးဦးသား၊ကျွန်ုပ်အားယင်းအခန်းငယ်တွင်၊
တစ်ယောက်တည်းချန်ထားရစ်ကာ၊ ကိုယ်စီအကြောင်းပြချက်ဖြင့်၊ ရန်ကုန်မြို့ထဲသို့အသီးသီးအဿက၊အဿက။မသိမသာလစ်ထွက် သွားခဲ့ကြလေရာ၊ကျွန်ုပ်အထီးတည်းအားငယ်စွာကျန်ရစ်ခဲ့ခြင်းဖြစ်လေသည်။
(နှစ်)
“ဒေါက်”“ဒေါက်”“ဒေါက်ဒေါက်ဒေါက်”
တံခါးခေါက်သံသည်အဆက်မပြတ်ထွက်ပေါ်လာနေမြဲဖြစ်၏။
အသက်ပင်မရှူရဲလောက်အောင်၊ကြောက်လန့်နေသည့်ကြားမှပင်၊
တံခါးရှိရာသို့၊ခြေလှမ်းဖွဖွလှမ်းရင်း၊သော့တံပေါက်မှနေ၍
တံခါးအပြင်ဖက်သို့၊ကျွန်ုပ်အသာချောင်း၍ကြည့်မိ၏။
ညှင်းသိုးသိုးပုံစံနှင့်ဦးထုတ်ပျော့တလုံးကိုခပ်ငိုက်ငိုက်ဆောင်းထားသည့်
လူရွယ်တဦး၊အထုပ်တထုပ်လက်တွင်ကိုင်လျက်ရပ်နေသည်ကို
မြင်ရသည့်အခါ၊ကျွန်ုပ်သည်နှလုံးသွေးရပ်လုခမန်းထိတ်လန့်
တုန်လှုပ်ရလေပြီ။
ဘုရား၊ဘုရား။ငါစောစောကဖတ်ခဲ့တဲ့ဂျာနယ်မှာ..၊ရန်ကုန်တွင်
အသက်(၅၀)ကျော်အရွယ်ရှိအမျိုးသမီးတစ်ဦးလည်ပင်းဓားဖြင့်
လှီးဖြတ်အသတ်ခံခဲ့ရသတဲ့။ကျွန်ုပ်အသံမထွက်ရဲပဲ၊
တံခါးကိုနောက်ကျောဖြင့်မှီရင်း၊ရင်ဘတ်ကိုလက်အစုံဖြင့်အသာဖိ၊
ဘုရားကိုအကြိမ်ကြိမ်တမိ၏။
စစ်စစ်ဤအကြောက်တရားသည်၊ရန်ကုန်သို့အလာခရီးတထောက်
ဖြစ်သည့်ကော့သောင်းမြို့မှစတင်ခဲ့၏။ထိုမြို့၌၊ကျွန်ုပ်တို့ရောက်သည့်နေ့
မှာပင်၊စားသောက်ဆိုင်ပိုင်ရှင်တစ်ဦး၊နေအိမ်အိပ်ယာတွင်
အိပ်ပျော်နေစဉ်၊အမည်မသိလူသတ်သမားက၊
ဝင်ရောက်သတ်ဖြတ်သွားခဲ့၏။
သည်မနက်ပိုင်းကြည့်နေမိသည့်တပတ်အတွင်းမှုခင်းသတင်းများ
တွင်လည်း၊ရန်ကုန်မြို့ကဲ့သို့မြို့ကြီးများအပါအဝင်နယ်မြို့များပါမကျန်၊
ရက်ရက်စက်စက်ကျူးလွန်သောလူသတ်မှုများကို၊သတင်းဓာတ်ပုံ
များနှင့်တကွမြင်တွေ့လိုက်ရ၏။နေ့ခင်းကြောင်တောင်လမ်းမှာရိုက်လု၏။
ခုခံမိသူမှာဓားဖြင့်အထိုးခံရ၏။
သမီးရည်းစားစုံတွဲဆိုင်ကယ်စီးရင်း၊ဆိုင်ကယ်၊လက်ကိုင်ဖုန်းနှင့်
ပါသမျှငွေယူပြီးသတ်၏။လူသေအလောင်းကိုအိတ်တွင်ထည့်၍၊
လမ်းဘေးရေမြောင်းတွင်စွန့်ပစ်သည့်သတင်းနှင့်ခေါင်းမပါပဲ
ကိုယ်ချည်းသက်သက်စွန့်ပစ်ထားသည့်၊အမည်မဖော်နိုင်သော
အလောင်းသတင်းတို့ကိုလည်းအမှတ်ရမိ၏။
ကျွန်ုပ်အဘယ်မှာလျှင်တံခါးဖွင့်ပေးရဲပါအံ့နည်း။ဆယ်မိနစ်ခန့်အကြာ
၊ခြေသံတဖျတ်ဖျတ်နှင့်လှေခါးဆီမှသကောင့်သားဆင်းသွားမှသာလျှင်၊
ကျွန်ုပ်ဟင်းကနဲနေအောင်သက်ပြင်းချနိုင်တော့သည်။
(သုံး)
“ဒေါက်”“ဒေါက်”“ဒေါက်ဒေါက်ဒေါက်”
တံခါးခေါက်သံပေါ်လာပြန်လေပြီ။
ကော့သောင်းမှသည်ရန်ကုန်မြို့ရောက်သည့်တိုင်အသက်အိုးအိမ်စည်းစိမ်
မလုံခြုံဟုခံစားရသဖြင့်၊တညဥ့်လုံးအိပ်မပျော်ခဲ့သောကျွန်ုပ်မှေးကနဲ
ငိုက်မြည်းသွားခဲ့ခြင်းဖြစ်၏။သော့တံပေါက်မှချောင်း၍ကြည့်ရပြန်သည်။
ခွေးမသားတပည့်ကျော်ကပ္ပလီဖြစ်၏။
“မအေပေး၊အသံလေးဘာလေးပြုပါဟ။ဒီမှာကြောက်လို့သေတော့မယ်။
မိုးလင်းကတည်းကထွက်သွားလိုက်တာ၊ငါ့မှာခုချိန်ထိဘာမှမစားရသေးတော့
ဗိုက်ထဲကအူတွေရက်ပ်တို့ပေါ့ပ်တို့ကကုန်ပြီဟ။ခွေးမသားရ”
“ဟင်။စောစောက၊မုန့်ဟင်းခါးအကြော်စုံနဲ့နှစ်ပွဲလမ်းထိပ်ကနေဝယ်ပြီး၊
ဆိုက်ကားဆရာတယောက်နဲ့ပို့ခိုင်းလိုက်လေဆြာရယ်”
သေဟဲ့နန္ဒိယဟူသောအာမေဋိတ်ပြုရင်းကျွန်ုပ်၏နဖူးကိုလက်ဝါးဖြင့်
ဗြန်းကနဲနေအောင်ရိုက်လိုက်မိ၏။
“နေပါဦးဆြာရဲ့။ဆြာပြောတော့ဆြာဟာတခေတ်တခါက၊
ရန်ကုန်မှာမိုက်ပေ့ဆိုတဲ့လူမိုက်တွေရဲ့ဂေါ့ဒ်ဖားသားကြီးဆို
။အေးလေ။အသက်ကထောက်လာပြီဆိုတော့ကြောက်ချေးပါပြီပေါ့”
“ဟကောင်။နင့်ပါးစပ်ပိတ်။ကြောက်တယ်လို့ပြောချင်ပြော။
ဘုမသိဘမသိမာလကီးယားမဲ့အဖြစ်ဆိုးမျိုးကိုတော့လန့်တာ
အမှန်ပဲမောင်။ဘယ့်နှယ်ကွာ။နိုင်ငံတကာမှကော၊ဖူးခက်မှာပါ
သတ်တာဖြတ်တာတွေရှိပါရဲ့။ဒါပေသိတို့တိုင်းပြည်မှာက အသက်တွေပေါပြီးသေရတာသိပ်လွယ်လွန်းနေကြသလားလို့ကွာ”
“ဒီလောက်လဲကြောက်မနေပါနဲ့ဆြာရယ်။တပည့်တို့အခန်းကရဲစခန်းနဲ့
ကပ်လျက်လေ”
“တော်ပါတော့မောင်ရာ။ရာဇဝင်လူသတ်သမားလက်စွမ်းပြလို့၊
ရဲနှစ်ယောက်ပွဲချင်းပြီးခဲ့ဖူးတာမကြာလှသေးဘူးနော်”
“ဆြာ့အကဲကိုဖမ်းရတာ၊ရန်ကုန်တိုင်းဝန်ကြီးချုပ်ရဲ့ဒုစရိုက်မှုတွေ
အပြတ်ရှင်းတော့မယ်ဆိုတဲ့သတင်းမကြားမိသေးဘူးထင်ပါရဲ့”
“ခက်ပါဘိတပည့်ရာ။မင်းတို့ဆြာကအဲဒီဝန်ကြီးချုပ်ရဲ့
လုံခြုံရေးကိုပါတွေးပူနေတာလဟ။ဗိုလ်ချုပ်အောင်ဆန်းလုပ်ကြံခံရ
တာတောင်၊သတ်တာမှန်သဗျဆိုတဲ့၊စာတွေကို၊ငါ့တပည့်မဖတ်ရသေးဘူး
ထင်ပါရဲ့။ဒါတင်ဘယ်ကပါ့မတုန်း။မကွေးဝန်ကြီးချုပ်ကိုလည်း
ရန်ရှာမယ်ဆိုပြီးခြိမ်းခြောက်နေသတဲ့မောင်”
“အဟက်၊အဟက်။ဒါနဲ့များသူ့ကိုယ်သူယာကူဇာဂိုဏ်းခေါင်းဆောင်ကြီး
လေသံဖမ်းခဲ့တာအံ့ပါရဲ့။ကြံဖန်ပြီးကြောက်နေလို့ကတော့ လှည်းအောက်တောင်မအိပ်လေနဲ့ဆြာ”
ဆြာ့ကိုပြက်ရယ်ပြုရင်းစေ့ထားသောတံခါးမှကုပ်ချောင်းချောင်း
ဝင်လာသူကား၊ဖေကြည်ပေတည်း။သင်းတို့မည်သို့ပင်ခနိုးခနဲ့ဆိုစေကာမူ၊
ကျွန်ုပ်အနေဖြင့်စိုးစဉ်းမျှမတုန်လှုပ်ချေ။သတ္တိဆိုသည်မှာရှိသင့်သည့်နေရာ
တွင်ရှိသင့်သည်မဟုတ်လော။
တောင်တွေးမြောက်တွေးနှင့်ထိုညကလည်း၊ကျွန်ုပ်တမှေးမှအိပ်၍မပျော်ခဲ့လေ။
(လေး)
“ဆြာ။ထတော့လေဗျာ။ဖူးခက်ကနေပုသိမ်ကိုပြန်ရောက်နေတဲ့၊
ဟိုတယ်မန်နေဂျာလေးကိုရွှေသီးခေါ်ကျော်ကျော်ခိုင်ကိုသွားတွေ့ချင်
တယ်ဆို။သွားကြစို့ဆြာ”
ညကဘယ်ချိန်မှပြန်ရောက်မှန်းမသိသောလေမင်းသား၏အသံကြောင့်
ကျွန်ုပ်မျက်လုံးဖွင့်လိုက်ရသည်။မျက်စိ မှိတ်ထားသော်ငြား၊ အိပ်မပျော်ခဲ့သောကျွန်ုပ်မျက်တွင်းဟောက်ပက်နှင့်ထထိုင်ရင်း၊
သင်းကိုစိုးရိမ်တကြီးမေးရပြန်သည်။
“နေပါဦးကွ။ရန်ကုန်ကနေပုသိမ်ကိုသွားရင်၊စစ်တပ်ဂိတ်တွေ
ဘာတွေဖြတ်ရသေးလားကွာ”
“ဖြတ်ချင်လည်းဖြတ်ရမှာပေါ့ဆြာ။ဘာအရေးတုန်း။ဆြာ့တပည့်တွေက
လူကောင်းတွေပဲဥစ္စာ”
“အင်း၊ဒါဆိုလဲမသွားတော့ပါဘူးကွာ။စစ်တပ်ဂိတ်မှာကျည်ပေါက်ပြီး
ငါ့လာမှန်နေရင်ဒုက္ခ။ပြီးတော့၊ငတို့က၊အငှားကားနဲ့သွားမှာဆိုတော့၊
ယာဉ်မောင်းကရိုက်လုမဲ့အန္တရာယ်လည်းရှိသေးတယ်လေ”
“ကဲပါဆြာရယ်။ဒါဆိုရင်လည်းမြို့ထဲကိုလိုင်းကားလေးစီးပြီး၊
ရန်ကုန်ရောက်နေတဲ့ဆြာ့မိတ်ဆွေ၊ဘန်ကောက်ကထမင်းဆိုင်ပိုင်ရှင်လေး
ကိုအောင်မြင့်မြတ်ကိုသွားတွေ့ကြစို့ရဲ့”
“မျက်မှန်းတစ္ဆေမကြောက်ဆိုတာတယ်မှန်ပါကလား။အခန့်မသင့်ရင်
ကားစပါယ်ယာရဲ့သံတုတ်စာမိမှာကိုထည့်မ တွက်တော့ဘူးလားငတုံးရ”
“ဒီလောက်တောင်ကြောက်နေမှတော့မထူးပါဘူးဆြာရယ်။
လာမဲ့ဘေးပြေးတွေ့တဲ့။ရန်ကုန်မြို့မှာလူမိုက်တွေဆီ ဆြာကိုယ်တိုင်သွားတွေ့ပြီး၊မဆိုးမမိုက်ကြဖို့၊တရားဟောလိုက်ရင်
ကိစ္စပြတ်ပြီပေါ့”
အရည်မရအဖတ်မရအမြဲအာချောင်လေ့ရှိသောကြောင့်၊လေမင်းသားဟူ၍
အမည်သညာတွင်လေသည့်တပည့်ကျော်၏အကြံပြုချက်သည်
၊လေးညှို့မှပစ်လွှတ်လိုက်သောမြားကဲ့သုို့နှလုံးအိမ်တွင်ဒုတ်ကနဲလာစိုက်၏။
မှန်လေစွ။ကျွန်ုပ်အကျွမ်းဝင်ခဲ့ဖူးသည့်ဒုစရိုက်လောက၏သဘောသဘာဝ
အရ၊လူမိုက်တောမှသာလူမိုက်လက်သစ်တို့ပေါ်ထွက်ကုန်၏။
ဝန်းကျင်အသစ်မှတကိုယ်တော်လူမိုက်အသစ်ပေါ်ထွက်ခဲ၏။
ကျွန်ုပ်၏အသိဥာဏ်ကို၊အရေးပေါ်မော်တာတပ်လျက်လှုပ်နှိုး
ရသည်။
တခေတ်တခါကနာမည်ကြီးလှပါသည်ဆိုသော၊စိုးမြတ်၊ကြိုးသိန်းဝင်း၊
အကြည်လေး၊စသည့်လူမိုက်များကားစုတေမနေသေလွန်ကြလေပြီ။
ဘုန်းကြီးစိုးသန်းကားရဟန်းဝတ်လျက်ရှိ၏။ရေကျော်မောင်အေး၊
သာကေတဗေဒါ၊လှိုင်ကမာရွတ်မှဘားလား၊ကန်တော်ကလေးမှ
မန်းနီးတို့ကား၊အိုလွန်းကြီးမကအိုစနာကျကာ၊အစွယ်ကျိုး ကြလေပြီ။
လက်ရှိကာလလူဆိုးလူမိုက်အများစုကား၊လှိုင်သာယာ၊ဒဂုံတောင်မြောက်
၊ရွှေပြည်သာ၊ကြည့်မြင်တိုင်တဖက်ကမ်း၊အင်းစိန်တဖက်ကမ်းတို့တွင်
ကြီးစိုးကာ၊ရန်ကုန်မြို့ကြီးကိုအကြီးအကျယ်ခြိမ်းခြောက်လျက်ရှိကြ၏။
(ငါး)
သို့ဖြင့်..၊ကျွန်ုပ်နှင့်ငယ်ပေါင်းကြီးဖော်လူမိုက်အိုကြီးများ၏အဆက်
အသွယ်ဖြင့်၊ခေတ်သစ်လူမိုက်နောက်ပေါက်ကလေးများအား
ရန်ကုန်မြို့၏တခုသောစားသောက်ဆိုင်ကြီးတွင်ကျွန်ုပ်ကောင်းမွန်စွာ
တွေ့ဆုံခွင့်ရခဲ့လေသည်။လူမိုက်လောက၏ဝါစဉ်အရ၊ကျွန်ုပ်အား၊
သင်းတို့ကောင်းမွန်စွာဧည့်ခံခဲ့ပါ၏။၎င်းတို့ထံမှရရှိသည့်လူမိုက်လောက သတင်းစကားတို့မှာလည်း များစွာနာယူမှတ်သားဖွယ်ကောင်းလှပါ၏။
“အခုခေတ်ကအန်ကယ်ဒင်တို့ခေတ်လိုမဟုတ်တော့ဘူးအန်ကယ်။
ကျွန်တော်တို့ဟာ၊အထက်ကညွန်ကြားချက်အတိုင်းလိုက်နာကြရတာခင်ဗျ။
လွန်ခဲ့တဲ့နှစ်နှစ်ကျော်လောက်ကဆို၊ညွန်ကြားချက်တွေကမြို့တော်ခန်းမကနေလာတာခင်ဗျ။လက်ပတ်နီတွေဘာတွေနဲ့ဆိုတော့တရားဝင်မိုက်လို့ရတာပေါ့”
“ဟုတ်တယ်ဦးလေးဒင်။တူတော်မောင်တို့အနေနဲ့၊သူတို့အတွက်
အရေးကြီးတဲ့စစ်ဆင်ရေးတွေကို၊အားကြိုးမာန်တက်လုပ်ပေးရတော့၊
အပြန်အလှန်သဘောအရ၊နယ်မြေခံရဲကလည်း၊ကျွန်တော်တို့ကို
အထာပြန်ထားတာမို့၊ကိုယ့်နယ်နဲ့ကိုယ်အပိုင်စားတွေဖြစ်ကုန်တာပေါ့။
ဒီခေတ်ကြီးမှာအလုပ်အကိုင်ရှားပါးတော့သမာအာဇီဝနည်းနဲ့လုပ်စားလို့
အခွင့်မသာဘူးလေ”
“အခုလတ်တလောကျွန်တော်တို့ကို၊ကာဗာပေးထားတဲ့သူတွေကတော့
သူဌေးကြီးတချို့ဆိုပါတော့။သူဌေးကြီးတွေနဲ့၊အရင်ဟိုလူတွေကလည်း
တအုပ်စုတည်းပဲလေ။ငွေကတော့ဘာပေါသလဲမမေးနဲ့ဦးလေးရေ။အမယ်၊
တခါတခါအမျိုးဘာသာသာသနာအတွက်ဆိုလား။နယ်တကာလှည့်
မိုက်ဂုဏ်ပြရတာတောင်ရှိသေးဗျာ”
“ဒီတော့ဦးလေးရာ။ဒီတိုင်းပြည်မှာလူမိုက်လောကချုပ်ငြိမ်းစေချင်ရင်၊
အဓိကဟာအဓိကပဲခင်ဗျ”
ဂျာအေးကိုသူ့အမေရိုက်နေသည့်လူမိုက်ဇာတ်ရှုပ်ကို
ကျွန်ုပ်ကောင်းကောင်းကြီးသဘောပေါက်လေပြီ။
မြန်မာပြည်တဝှမ်းလူတိုင်းအကြောက်တရားကင်းကင်းနှင့်
လုံခြုံစွာနေနိုင်ရေးအတွက်၊ဘာဆက်လုပ်ရမည်ကိုကျွန်ုပ်သိမြင်ခဲ့လေပြီ။
အဓိကသည်အဓိကဖြစ်လေသည်တကား။
“တွေ့ကြသေးတာပေါ့အဓိကတွေရာ”ဟု၊အသံတိတ်ကြုံးဝါးရင်း
ကျွန်ုပ်ဝပ်ကျင်းသို့ပြန်ခဲ့ပါ၏။
(ခြောက်)
“ယဿာနုဘာဝတော၊ယက္ခာ၊နေ၀ဒဿန္တိဘီသနံ။ယဥှိစေ၀ါနုယုဉ္စန္တော၊
ရတ္တိန္ဒိဝ၊မတန္ဒိတော”
“သုခံ၊သုပတိ၊သုတ္တောစ၊ပါပံ၊ကိဉ္စိ၊နပဿတိ။ဧ၀မာဒိ၊ဂုဏူပေတံ။
ပရိတ္တံ၊တံ၊ဘဏာမဟေ”
“ဆြာသမား၊အိပ်ခါနီးဘာတွေလျှောက်ရွတ်နေတာတုန်း။လူမိုက်တွေနဲ့တွေ့၊
တရားရပြီးဘုန်းကြီးဝတ်တော့မလို့များလားဆြာ”
“နင့်အမေကလွှား။မေတ္တာသုတ်ရွတ်နေတာလဟကပ္ပလီရ”
“ဗျာ။လူမိုက်ကိုမေတ္တာပို့လို့ရမတဲ့လားဆြာရယ်”
“နင်နားမလည်ပဲစွတ်ပြောမနေနဲ့။အခုအဓိကထားပြီးမေတ္တာပို့နေတာက
အဓိကတွေကိုလဟ”
“ရှင်းအောင်လင်းပါဦးဆြာရယ်။ဆြာ့စကားကလည်းအဓိကတွေနဲ့ချည်း
ရှုပ်နေလို့ပါ”
“အင်း..၊သဟာဖြင့် တတိုင်းပြည်လုံးလုံခြုံအေးချမ်းဖို့ဘယ်ဝန်ကြီးဌာနက တာဝန်ယူထားပါလိမ့်မောင်ရာ”
“ပြည်ထဲရေးပေါ့ဆြာရယ်။လူတိုင်းသိနေတဲ့ဥစ္စာ”
“ဒါဆိုပြည်ထဲရေးကိုဖွဲ့စည်းပုံဥပဒေအရဘယ်သူတွေကချုပ်ကိုင်ထားသတုန်း။
ဘယ်ကနေလာသတုန်း”
“အဟား။ပေါက်ပါပြီဆြာ။တပည့်ကောင်းကောင်းသဘောပေါက်ပါပြီ”
“အပေါက်မစောနဲ့ဦးငါ့တပည့်။အဲဒီအဓိကကျတဲ့သူတွေနဲ့ချမ်းသာလှပါချည့်ရဲ့
ဆိုတဲ့သူတွေဟာ၊ပုလင်းတူဗူးဆို့၊တစ်အုပ်စုတည်း၊တဂိုဏ်းတည်း
ဆိုတာလည်းသဘောပေါက်ဖို့လိုသေးသကွဲ့”
“ဟုတ်ပါ့ဆြာ။ဟုတ်ပါ့။လက်စသတ်တော့အဓိကဟာအဓိကကိုး။
ဆြာပို့သတဲ့၊မေတ္တာ၊သူတို့ဆီရောက်ရင်တော့ တတိုင်း ပြည်လုံး လုံခြုံအေးချမ်းပြီပေါ့။နာနာကြီးသာမေတ္တာပို့ဆြာ”
တပည့်ကျော်ကပ္ပလီတယောက်၊ကျွန်ုပ်၏အိပ်ယာဘေးမှရွှင်မြူးစွာ
ပြန်လည်ထွက်ခွာသွားပါ၏။ထိုညကမေတ္တာ သုတ်ဘုတ်အုပ်ကို ၊ရှေ့တွင်ချ၍ဆုံးခန်းတိုင်အောင်ကျွန်ုပ်အကြိမ်ကြိမ်ရွတ်ဆိုခဲ့ပါ၏။
တိုက်ဆိုင်မှုပေလော။ထူးဆန်းသည်လော။မေတ္တာဓာတ်၏တန်ခိုးရှိန်စော်
အာနုဘော်ကြောင့်လောတိကျစွာကျွန်ုပ်မဆိုနိုင်သော်ငြား၊အသည်းငယ်
တတ်သောကျွန်ုပ်၊ထိုညကကောင်းစွာအိပ်၍ပျော်ခဲ့ချေသည်တကား။ ။


၂၆ ဇွန် ၂၀၁၆ နေ့ထုတ်၊သည်ဗွိုက်ဒေးလီးနေ့စဉ်သတင်းစာမှ။ ။

0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့ စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အက်ဒမင်

အခြားကဏ္ဍများကို လေ့လာရန်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...