```ကျွန်တော် ဖတ်ဖူးသော ဟာသလေးဖြင့် ..... ´´´
|
6:22 PM |
No မှတ်ချက် |
ကွန်ဆူး မား's photo.
မှတ်မှတ်ရရ ဟာသလေးတစ်ပုဒ် ဖတ်ခဲ့ဘူးတယ်...
ဟာသလေးဖတ်ရင်းက ပြုံးလည်း ပြုံးဖြစ်ခဲ့တယ်... နောက်... ရယ်လည်းရယ်ဖြစ်ခဲ့တယ်၊
ကောင်းတယ်လို့လည်း စာရေးသူကို ဘုမသိဘမသိ ချီးကျူးခဲ့ဘူးတယ်၊ ဒီဟာသလေးကို ပြန်စဉ်းစားတိုင်းလည်း တစ်ယောက်ထဲသဘောကျနေတတ်ခဲ့တယ်... သတိရတိုင်းလည်း ရယ်ဖြစ်ခဲ့တယ်... အဲဒီတုန်းက... တစ်ခု သတိမထားခဲ့မိဘူး...
ဒီဟာသလေးကို ရေးဖွဲ့ခဲ့တဲ့စာရေးဆရာဟာ.... သူအဲဒီတုန်းက ရယ်မောနေခဲ့သလား..... ပျော်ရွှင်နေခဲ့သလားလို့.......။
ကျွန်တော်......... ကျွန်တော့်တပြည့်တွေကို တပည့်လို့ မခေါ်ဘူး....... အသံထွက်အရ ဓါးအပဲ့တွေ ဖြစ်နေမှာ စိုးလို့.....၊
ဆရာ့ရဲ့ အတွေ့အကြုံ... ပညာ.... ဗဟုသုတတွေကို ပြည့်ပြည့်၀၀ခံယူရရှိစေချင်လို့.....
ပြည့်စုံသူတွေ ဖြစ်စေချင်လို့....
နောက်ပြီး အမှန်တရားအတွက် အသေခံတိုက်ခိုက်ရဲတဲ့ ဓါးကိုင်သူရဲကောင်းတွေ ဖြစ်စေချင်လို့....... တပြည့်လို့ခေါ် တယ်.....
``တရားကို နတ်စောင့်တယ်တဲ့.....´´ မြန်မာ စကားပုံလေးတစ်ခုရှိခဲ့တယ်...... အမှန်တရားကို နတ်ကောင်း နတ်မြတ်တွေ စောင့်ရှောက်ကြတယ်ဆိုတဲ့ သဘော..... ဘယ်တော့မှ ပျောက်ပျက်မသွားပဲနဲ့ တချိန်ချိန်မှာ အသွင်သဏ္ဍာန် တစ်မျိုးမျိုးနဲ့ ပြန်လည်.. ပေါ်ပေါက်လာတတ်တတဲ့သဘော....
ဒါဟာအမှန်တရားပါပဲ....
ဗုဒ္ဓဘာသာဝင်တွေ ပြောနေကြစကားရှိတယ်...... ``ငရဲကြီးလိမ့်မယ်... ၀ဋ်လိုက်တတ်တယ်´´တဲ့....
ဒါကလည်း တကယ်တော့ အမှန်တရားအတိုင်း ညီမျှတဲ့ အခွင့်အရေးနဲ့ ညီမျှတဲ့ ကောင်းကျိုးဆိုးကျိုး ပြန်လည်ရရှိခြင်းကိုဆိုလိုခဲ့တာပါ........။
မကောင်းတာလုပ်ထားရင် တစ်ချိန်ချိန်မှာတော့ မကောင်းမှုတွေ ပြန်လည်ရောက်ရှိလာမယ်လို့ ပြောချင်တာပါ။
မြတ်စွာဘုရား တရားတော်ထဲမှာလည်း မကောင်းမှုကိုပြုတဲ့အခါ သူတစ်ပါး မသိသော်မှ မိမိကိုယ်တိုင် သိတယ်လို့ ဟောကြားထားခဲ့တယ်လေ........ ဘယ်တော့မှ မမှားတဲ့ တရားတွေပေါ့.....။
ဥပဒေသမား၊ တရားရေး ၀န်ထမ်းတွေ ဆိုတာ သိပ်ကို အန္တရာယ်များတဲ့ သူတွေပါ..... ကတိလေးပါး ကင်းစင်ပြီး.... သမာဓိရှိမှ..... မေတ္တာစိတ်ကို အခြေခံနိုင်မှ.... တစ်ဘက်နှင့်တစ်ဘက်ကို မျှမျှတတ တွေးတောနိုင်မှ မှန်ကန်တဲ့ တရားစီရင်ရေးကို လုပ်နိုင်မှာပေါ့......
တရားရေးဝန်ထမ်းတစ်ဦး အစွမ်းထက်လာတဲ့ အခါ..... သမာသမတ်ကျလာတဲ့အခါမှာ ``ရွှေချိန်ခွင်....´´ သို့မဟုတ်``သမာဓိခုံမင်း´´လို့ လူတွေ တင်စားကြတယ်...... နောက်ပြီး အားကိုးလာတယ်.... ယုံကြည်လာတယ်.... လူတွေ အားကိုးယုံကြည်လာရင် မျက်နှာပွင့်လန်းလာကြတာပေါ့...
လူချစ်လူခင်များလာရင်..... လာဘ်ပွင့်လာတာပေါ့..... ဒါက တရားကို နတ်စောင့်တာပါပဲ..... တရားဥပဒေဆိုတာ လူကောင်းတွေအတွက် အရံအတား မဟာတံတိုင်းကြီးဖြစ်သလို..... လူဆိုးတွေအတွက်လည်း လည်လှီးဓါးဖြစ်တယ်လို့.. သက်သေပြပေးနေရတာက ဥပဒေ၀န်ထမ်းတွေပါပဲ......။
ဒီအကြောင်းတွေကိုလည်း တပြည့်တွေကို မှာကြားထားတယ်... နောက်ပြီး အမှားမခံနိုင်ဆုံး ပုဂ္ဂိုလ်တွေဖြစ်ပြီး တန်ဘိုးရှိတဲ့ သူတွေ ဖြစ်တယ်လို့..... အသိပေးထားရတယ်.....
ကိုယ့်ရဲ့ အတွေးအခေါ် အယူအဆနဲ့.... ဆုံးဖြတ်ချက်က လူတစ်ဦးတစ်ယောက်ချင်းကိုသာမက မိသားစုဘ၀၊ မိသားစုတွေရဲ့ ဂုဏ်သိက္ခာအပြင်..... အစိုးရရဲ့ အာဏာခိုင်မာမှုနဲ့လည်း တိုက်ရိုက်ပတ်သက်နေကြောင်းတွေကိုလည်း ပြောပြထားခဲ့တယ်......
ကျွန်တော်က ကျောင်းမှာ တပြည့်တွေကို သင်ခန်းစာတွေ သင်တိုင်း ရယ်စရာဟာသလေးတွေ ရောရောပြီး ပြောပြသင်ကြားခဲ့တယ်၊
တပြည့်တွေကို ကလေးတွေလို့ပဲ မြင်လို့.... နောက်ပြီးတော့လည်း.... ကလေးတွေဆိုတာ ရယ်စရာလေးတွေ၊ အလွယ်သိနိုင်တာလေးတွေနဲ့ တွဲပြီး မှတ်ထားနိုင်ရင် ပိုပြီး မှတ်မိတယ်လို့ ထင်မိလို့လေ.....။
အခုတော့..... အချိန်များစွာ သင်ကြားခဲ့ရတဲ့ တပြည့်တွေလည်း ဘွဲ့လက်မှတ်တွေ ရကုန်ပြီ...... လက်တွေ့ဆင်းပြီးရင်.. သူတို့ ရှေ့နေတွေ ဖြစ်ကြတော့မယ်.....
ဒီနေ့ကတော့ နှုတ်ဆက်ပွဲပေါ့...... ဆရာကြီးက ကျွန်တော့်ကို သြ၀ါဒချွေခိုင်းတယ်...... ထုံးစံအတိုင်း..... ဟာသလေးနဲ့ ပြောပြရမှာပေါ့......။
`` တပြည့်တို့ ..... ဒီနေ့ မင်းတို့ကို ဆရာ ရှေ့နေတွေနဲ့ ပါတ်သက်တဲ့ ဟာသ ပုံပြင်လေးတစ်ပုဒ် ပြောပြမယ်၊ တစ်ခါက ရှေ့နေပေါက်စတွေ လက်တွေ့ သင်တန်းပြီးလို့..... အမှတ်တရ ပျော်စားထွက်ကြတယ်တဲ့..... မြို့အစွန် လယ်ကွင်းတစ်ခုကို ဖြတ်တဲ့အခါမှာ..... သူတို့စီးလာတဲ့ ကားဟာ မတော်တဆမှောက်သွားတယ် ပြောတယ်... ရှေ့နေပေါက်စတွေဟာလည်း နာကျင်လွန်းလို့ ကယ်ပါ.... ယူပါလို့ တစာစာ အော်နေကြတယ်တဲ့..... သူတို့အသံတွေကိုလည်း ဘယ်သူမှ မကြားနိုင်လောက်အောင် အလှမ်းကွာနေတော့ ဘယ်သူမှလည်းမလာကြဘူးတဲ့.....
ဒါပေမယ့် မလှမ်းမကမ်းမှာတော့... မြေတူးနေတဲ့ လယ်သမား အဖိုးအိုကြီး တစ်ယောက်ရှိတယ်တဲ့... သူလည်း ရှေ့နေလေးတွေရဲ့ အော်သံကိုကြားတော့ အနားကိုရောက်လာတယ်တဲ့ ဒဏ်ရာရနေသူတွေကို ကြည့်ပြီး `` မင်းတို့က ဘာအလုပ်လုပ်ကြတာတုန်း´´လို့မေးတယ်တဲ့..... မေးပြီးတော့ စကားတွေ ပြောကြတယ်တဲ့.... နောက်ဆုံးတော့ သူလဲ လုပ်စရာရှိတာတွေကို ဆက်လုပ်ပြီး ထွက်သွားတယ်တဲ့.....´´ တပြည့်တွေကတော့ စိတ်ဝင်တစား နဲ့ နားထောင်နေကြလေရဲ့.......
`` ခဏကြာတော့.... ကားမှောက်တဲ့ သတင်းကြောင့် ရဲတွေ ရောက်လာပြီး ရှေ့နေ ပေါက်စလေးတွေကို မတွေ့တဲ့ အခါမှာ.... ဟိုဟိုသည်သည် ကြည့်ရင်း အဘိုးအိုကို မြင်တော့ `` အဘ ခုဏက ဒီနားမှာ ကားမှောက်တဲ့ လူနာတွေ မတွေ့ဘူးလားလို့..´´ မေးတယ်တဲ့...... အဘိုးအိုကလည်း `` တွေ့ပါ့ကွာ..... အားလုံးကို ငါမြေမြှုပ်ပေးထားပါတယ်.´´လို့ ပြောရင်း မြေပုံ အသစ်ကြီး တစ်ပုံကိုပြတယ်တဲ့ ရဲတွေလည်း ကပြာကယာ မြေပုံကြီး ရှိရာကို ပြေးလွှားသွားရင်း ရှေ့နေပေါက်စတွေကို ပြန်ဆွဲတင်ရတယ်တဲ့.....
ပြီးတော့ ရဲအရာရှိက စိတ်ဆိုးမာန်ဆိုးနဲ့ အဘိုးအိုဆီကို သွားပြီး`` အဘိုး ဘာလို့ ဒီလူတွေကို မသေသေးပဲနဲ မြေမြှုပ်ပစ်ရတာတုန်း..´´ လို့ မေးတဲ့အခါမှာ အဘိုးအိုက
``ငါလည်း မေးပါတယ် မင်းတို့ ဘာအလုပ်လုပ်သလဲလို့...... သူတို့ကပြောတယ် ရှေ့နေတွေပါတဲ့...... အခုဘာဖြစ်တာတုန်းဆိုတော့.... ကား မှောက်လို့ပါ၊ အဘိုးကယ်ပါ... အဘိုးမကယ်ရင် ကျွန်တော်တို့ သေသွားနိုင်တယ်ပြောတော့ ငါလည်း သေချာ စဉ်းစားသေးတယ်ကွ... ဒါပေမဲ့ရှေ့နေတွေဆိုတော့ စကား အမှန် မပြောဘူးလေ... ကားမှောက်ပြီး သေနေတာကို မသေသေးဘူးလို့  လိမ်တယ်ထင်ပြီး မြေမြှုပ်ပေးလိုက် တာပါ´´ လို့ ပြန်ပြောလိုက်တယ်တဲ့.......
တပြည့်တွေ ၀ါးကနဲ ရယ်ကြတယ်..... တော်တော် ပွဲကျသွားတာပဲ.... ကျွန်တော် သူတို့ မျက်နှာတွေကို သေသေချာချာ ကြည့်ရင်း.....
`` တပြည့်တို့...... ဒီပုံပြင်လေးမှာ သင်ခန်းစာဖော်ထုတ်စရာ အချက်(၃)ချက်ရှိတယ်....
တစ်ချက်က ရှေ့နေတွေကိုလူတွေ မယုံဘူး၊
နောက်တစ်ချက်က တစ်ချို့လူတွေ သေစေချင်လောက်တယ်လို့ ယူဆလို့ရတယ်.....
နောက်တစ်ချက်ကတော့ အောက်ခြေအဆင့်မှာ ဥပဒေ မဏ္ဍိုင်ယိုယွင်းပျက်စီးနေတယ်ဆိုတာ မီးမောင်းထိုးပြနေတယ်..... ဒီဟာသလေးကို တပြည့်တို့ တစ်သက်လုံး သတိရနိုင်ပါစေ..... ဆင်ခြင်နိုင်ပါစေလို့ဆရာ ဆန္ဒပြုပါတယ်...... ပြည်သူတွေကို ကောင်းစွာ စောင့်ရှောက်နိုင်တဲ့ တရားကိုစောင့်တဲ့ နတ်ကောင်းနတ်မြတ်များ၊ လောကပါလ နတ်များ ဖြစ်ကြပါစေ.......´´
`` ပေးတဲ့ ဆုနဲ့ ပြည့်ပါစေ.....ဆရာ.....´´ တပြည့်တွေက ပြိုင်တူ ပြောရင်း လက်အုပ်ချီ ဦးချလိုက်ကြတယ်.... ဆရာကြီးလည်း ကြည့်နေရင်းနဲ့ ကျွန်တော့်ကို ပြုံးပြီး ခေါင်းငြိမ့်ပြတယ်....
ကျွန်တော့်အတွေး ထဲမှာတော့...... ဒီ ရှေ့နေဟာသလေး ရေးခဲ့တဲ့ စာရေးဆရာဟာ.... အဲဒီအချိန်က သူ.... ရယ်မောနေခဲ့သလား..... ပျော်ရွှင်နေခဲ့သလား..... ဒါမှ မဟုတ်ရင်လဲ.....။
(၂၃-၅-၂၀၁၂)ရက်နေ့တွင် ရေးဖြစ်ခဲ့သော ပို့စ်လေးအား ပြန်လည် တင်ပြပါသည်။
(ကွန်ဆူးမား)(၃-၁၂-၂၀၁၃)
0 comments:
Post a Comment