၂၀၁၄ ဟောကိန်း

7Day News Journal's photo.

 

 

 ကုန်လွန်ခဲ့ပြီဖြစ်သည့် ၂၀၁၃ တွင် တိုင်းပြည်၏ကံကြမ္မာကို နက္ခတ်ပညာရှင်များက နိုင်ငံရေး၊ စီးပွားရေး အဓိကနှစ်ပိုင်းခွဲကာ ဟောကိန်းထုတ်ခဲ့ကြသည်။ ရာခိုင်နှုန်းအားဖြင့်ပြောရန် ခက်ခဲသော်လည်း ပြည်တွင်းငြိမ်းချမ်းရေးဆိုင်ရာ ဟောချက်အပါအ၀င် ဟောကိန်းအချို့က တစ်ထပ်တည်းကျခဲ့သည်ဟုဆိုရမည်။ ယခုလည်း ၂၀၁၄ အတွက် ပညာရှင်များက ဟောကိန်းထုတ်ကြပြန်သည်။ ၂၀၁၄ ခုနှစ်တွင် မြန်မာနိုင်ငံ၌ မင်းပြောင်းမင်းလွဲဖြစ်မည့် နှစ်တစ်နှစ်ဖြစ်လာနိုင်သဖြင့် အစွမ်းထက်သောအစီအမံများဖြင့် တိုင်းပြည်၊ နိုင်ငံနှင့် အုပ်ချုပ်သူအစိုးရအဖွဲ့၏ ကံဇာတာကိုမြှင့်တင်ကာကွယ်ပေးရန်လိုကြောင်း မြန်မာနိုင်ငံနက္ခတ်သိပ္ပံအဖွဲ့ အမှုဆောင်အရာရှိချုပ် ဦးဇေယျာကိုက ဟောကိန်းထုတ်လိုက်သည်။ ၂၀၁၄ ခုနှစ်တွင် အစိုးရအဖွဲ့က ဖောင်းပွနေသော ၀န်ကြီး၊ ဒုဝန်ကြီးများကိုဖယ်ရှားလိုက်ပြီး အစိုးရအဖွဲ့ကို ကျစ်လျစ်အောင်ဖွဲ့စည်းရန်ရှိနေသည်။ ယင်းကဲ့သို့လျှော့ချခြင်းဖြင့် အကြီးအကဲခေါင်းဆောင် ဖယ်ရှားရမည့်ဖြစ်စဉ်ကို လျော့နည်းသက်သာစေကြောင်း ဦးဇေယျာကိုကဆိုသည်။ ဖွဲ့စည်းပုံအခြေခံဥပဒေပြင်ဆင်ရေးမှာ ၂၀၁၄ ခုနှစ်တွင် အမှန်တကယ်ဖြစ်လာမည်ဟု နက္ခတ်ဗေဒပညာရှင်များကဆိုသည်။ “ပြင်တာမှာ န၀င်းဓာတ်ပေါ်တဲ့ နံပါတ် ၁၈ က စပြင်မှာပါ”ဟု နက္ခတ်ဗေဒပညာရှင် ဆရာစံဇာဏီဘိုကဆိုသည်။ နိုင်ငံရေးပါတီများလည်း ထပ်တိုးပြီး ဧပြီလနောက်ပိုင်းမှစ၍ ရှိရင်းစွဲပါတီများ၏ စုစည်းမှုမှာ ပိုမိုအားကောင်းလာမည်ဟု ၎င်းကဆိုသည်။ ဒီမိုကရေစီအဖွဲ့အစည်းများပါ စုစည်းပေါင်းစပ်ဆောင်ရွက်မှုများကြောင့် နိုင်ငံရေးမှာ ရှေ့သို့သွက်လက်စွာ တိုးတက်လာမည်ဟုပြောသည်။ လက်နက်ကိုင်အဖွဲ့အစည်းများနှင့် ငြိမ်းချမ်းရေးဆောင်ရွက်မှုမှာလည်း အောင်မြင်မှုရမည်ဟု နက္ခတ်ဗေဒပညာရှင်နှစ်ဦးကဆိုသည်။ သို့သော် ၂၀၁၄ နှစ်စပိုင်းမှာပင် မြန်မာနိုင်ငံအပါအ၀င် အရှေ့တောင်အာရှတွင် ငလျင်လှုပ်၍ ဆူနာမီကဲ့သို့ သဘာဝဘေးအန္တရာယ်များ ကြုံတွေ့နိုင်သည်။ ဘင်္ဂလားပင်လယ်မှလည်း လေဖိအားနည်းရပ်ဝန်းများနှင့် မုန်တိုင်းများ ကြုံတွေ့ရနိုင်သည်။ မြန်မာနိုင်ငံအတွက် အဓိကအားထားရသည့် မိုးဦးကာလ မိုးခေါင်မှုနှင့် သဘာဝပတ်ဝန်းကျင်ထိခိုက်မှုကြောင့် ဆန်စပါးနှင့် ရေရှားပါးမှုများကြုံတွေ့နိုင်ကြောင်း ဦးဇေယျာကိုကပြောကြားသည်။ မန္တလေးသင်္ကြန်စာတွင်လည်း မြန်မာနိုင်ငံတစ်ဝန်းလုံးတွင် အပူချိန်မြင့်တက်လာပြီး မိုးဦးနောက်ကျခြင်း၊ မိုးရာသီကုန်ချိန်တွင် နောက်မိုးကောင်းပြီး အအေးပိုမိုပြင်းထန်မှုများ ကြုံတွေ့ရမည်ဖြစ်သည်။ ၂၀၁၄ နှစ်ဦးပိုင်းတွင် လူမျိုးရေး၊ ဘာသာရေးပဋိပက္ခများ ထပ်မံပေါ်ပေါက်လာနိုင်သဖြင့် အထူးသတိထားရန် လိုအပ်ကြောင်း နက္ခတ်ဗေဒပညာရှင်များကဆိုသည်။ အလုပ်သမား၊ လယ်သမားဆန္ဒပြမှုများနှင့် ကြုံတွေ့နိုင်ပြီး ဆန္ဒပြမှုများမှာ မင်းမဲ့စရိုက်ဖြစ်လာနိုင်ကြောင်းလည်း ပြောဆိုသည်။ ဧပြီလသင်္ကြန်ပွဲ၌လည်း ခိုက်ရန်ဒေါသဖြစ်ပွားမှုများ ပေါ်ပေါက်ပြီး သွေးထွက်သံယိုမှုများရှိလာမည်။ သင်္ကြန်ရေကစားသူနှင့် လုံခြုံရေးတာဝန်ယူသူများကြား ပြဿနာများလည်း ကြီးထွားလာမည်ဟု ဦးဇေယျာကိုကပြောကြားသည်။ တိုင်းပြည်၏စီးပွားရေးမှာ ၂၀၁၄ ခုနှစ်တွင် ထူးခြားစွာကောင်းလာနိုင်စရာမရှိကြောင်း ပညာရှင်နှစ်ဦးကဆိုသည်။ ပြည်ပရင်းနှီးမြှုပ်နှံမှုက ထင်သလောက်ဝင်မလာချိန်တွင် နိုင်ငံတော်အစိုးရ၏ ဘတ်ဂျက်လွန်ကဲစွာသုံးစွဲမှုပြဿနာမျိုးကို ရင်ဆိုင်ရမည်။ စီးပွားရေး၌ စိုးရိမ်စရာများစွာရှိနေသည်။ စီးပွားရေး၌ ဖွံ့ဖြိုးမှုအားနည်းနေသော်လည်း ၂၀၁၄ နှစ်လယ်တွင် ကုန်ဈေးနှုန်းများ သိသိသာသာတက်လာမည်ဟု မန္တလေးမဟာသင်္ကြန်စာကဆိုသည်။ တွင်းထွက်ပစ္စည်းအမျိုးမျိုး၊ ဆန်စပါး၊ ပဲမျိုးစုံနှင့် သီးနှံများမှာ ယခုနှစ်တွင် ဈေးအနည်းငယ်သာ မြင့်တက်မည်ဟုပါရှိသည်။ သို့သော် ပြည်တွင်းစီးပွားရေးလုပ်ငန်းများတွင် အလေးထားသည့် ရွှေဈေးမှာ တဖြည်းဖြည်းမြင့်တက်လာမည်ဟု ပညာရှင်များကပြောကြားသည်။ သို့သော် ၂၀၁၄ နှစ်လယ်ပိုင်းတွင် အတက်အကျမငြိမ်ဘဲ နှစ်ကုန်ပိုင်းတွင် ပြန်မြင့်တက်နိုင်သဖြင့် ခန့်မှန်းရခက်ခဲနေကြသည်။ လာမည့်နှစ်တွင် တိုင်းပြည်၏ ထိပ်ပိုင်းခေါင်းဆောင်များ ကျန်းမာရေးနှင့်ပတ်သက်၍ စိုးရိမ်စရာမရှိကြောင်း စံဇာဏီဘိုကပြောကြားသည်။ နိုင်ငံရေးနယ်ပယ်တွင် လုပ်ကြံသတ်ဖြတ်မှုကြောင့် နှမြောတသဖြစ်စရာ ကြွေလွင့်ခြင်းမျိုးမရှိနိုင်ပေ။ သို့သော် စာပေအနုပညာနယ်ပယ်၌ ဆုံးရှုံးမှုများရှိနိုင်သည်။ ။

 

 ရေးသားသူ- ပြည်သိမ်း