ဆည်းဆာရိပ်မှာ ချွေးသိပ်ခြင်း

by Thenanda Tun on Sunday, November 25, 2012 at 8:56pm 

ဒေါ်စိန်ကြည်

နေဝင်ချိန်နီးပါပြီ။ နီးဆို အသက်ကတောင် ၉၃နှစ် ရှိနေပြီပဲ။ ကိုယ့်ဘဝကြီးမှာ ဒီလိုနေထိုင်ရလိမ့်မယ်လို့ ဘယ်တုန်းကမှ မတွေးခဲ့ဖူးဘူး။ ကိုယ်ကလည်း ကိုယ့်ခေတ် ကိုယ့်အခါက ကိုယ့်လောက်ပဲပေါ့။ ကတော်ဆယ်ပါးမှာ တစ်ပါးအပါအဝင်ဆိုပါတော့……..။ ဘဝတလျှောက်လုံး အဆင်ပြေပြေ နေခဲ့ရပါရဲ့။

အဆင်မပြေတာဆိုလို့ သားသမီး မထွန်းကားတာ တစ်ခုပဲ ပြောစရာရှိတယ်။ အဖိုးကြီးက ကိုယ့်ကို အရင်ထားသွားလေတော့ ကိုယ့်မှာ တစ်ယောက်တည်း အဖော်မဲ့လို့ပေါ့။ ဒါပေမယ့် ပင်စင်လစာလေးကတော့ အခုချိန်ထိ ရနေဆဲပါပဲ။ တူ တူမတွေကလည်း ကြည့်ရှုကြပါရဲ့။ သူတို့မှာလည်း သူတို့ ကိစ္စ သူတို့ အိမ်ထောင်နဲ့ဆိုတော့ ကိုယ့်ကို အမြဲတမ်းတော့ ဘယ်ကြည့်ရှုနိုင်မှာလဲ။ နောက်ဆုံးတော့ အားလုံး စုပေါင်း တိုင်ပင် ဆုံးဖြတ်ပြီး ကိုယ် ဒီနေရာလေးကို ရောက်လာခဲ့တယ်။ တရားလေး မှတ်ရင်း ပုတီးလေး စိပ်ရင်း နဲ့ အဆင်ကို ပြေလို့……………။

---------------------------------------------------------------------------

ဦးဘခင်

ကျုပ် နာမည် ဘခင်။ ကျုပ်အသက်က ဒီပြာသိုလဆိုရင် ၉၁ နှစ် ပြည့်မှာဆိုတော့ မကြာခင် ကျုပ်က ၉၂ နှစ်ကို ရောက်တော့မယ်။ ကျုပ် စိတ်နာတယ်။

နွားးးးးးးးးးးးးးးးးးးးးးးးးးးးးးး ဒီနွား။

ကျုပ်မှာ နွားတစ်ကောင်ရှိပါရဲ့။ အဲဒီ နွားဟာ ကျုပ်အိမ်ကို ရောင်း ပိုက်ဆံတွေ ယူပြီး ကျုပ်ကို ဒီလာပို့လိုက်တာပဲ။ အခုတော့ ဘယ်ရောက်နေတယ် မသိဘူး။ သူ့မိန်းမရဲ့ ဇာတိ မန္တလေးမှာပဲလား ဘယ်ပေါက်လို့ ဘယ်ရောက်နေလဲဆိုတာ လုံးလုံးကို မသိတော့ဘူး။ တစ်ခါမှလည်း ပေါ်မလာတော့ဘူး။ အရင်တုန်းကများဆို ကျုပ်က သားယောက်ျားလေးမှ သားယောက်ျားလေး သိပ်လိုချင်တာ။ သမီးမိန်းကလေးဆိုရင် စိတ်ကူးထဲတောင် မထည့်ကြည့်ဖူးဘူး။ အခုတော့ အချိန်နှောင်းမှ သိပြီ။ သမီးမိန်းကလေးသာဆို ကျုပ်ကို ဒီလို လာပစ်ထားမလား။ ငပိ နဲ့ ဖြစ်ဖြစ် ဆားနဲ့ ဖြစ်ဖြစ် အဖေကြီးကိုတော့ ကျွေးမှာပဲ။ ကိုယ့်အဖေကို ရင်ခွင်ထဲ ထည့်ထားမှာပဲ။ ကျုပ်ဆုတောင်းတယ်။ နောင်ဘဝ အဆက်ဆက် ဘယ်တော့မှ သားယောက်ျားလေးမမွေးစေနဲ့လို့။ ကျုပ် စိတ်နာလွန်းလို့ပါဗျာ။

ကျုပ်က နား နည်းနည်းလေးတာကလွဲပြီး ကိုယ့်ဘာသာကိုယ် သွားနိုင်လာနိုင်သေးတယ်။ ဒီလိုဆိုတော့လည်း ကျုပ်ကံကောင်းတယ်လို့ တွေးမိပြန်ရော……………။

 --------------------------------------------------------------------

ဒေါ်မြမှီ

၈၃နှစ်တာ ကာလ၊ ဘဝအကြောင်းများ ပြောရရင် တစ်ထောင့်တစ်ညထက်တောင် များသွားမယ်။

အပျိုကြီးဆိုတော့ ငယ်စဉ်တုန်းကလည်း ကိုယ့်ဘာသာကိုယ် ရှာဖွေစားသောက်တာပါပဲ။

ကံဇာတ်ဆရာက ဇာတ်နာအောင် ဖန်လေတော့ ရုတ်ခြည်းကောက်ခါငင်ခါ နဲ့ သတင်းစာဖတ်နေရင်းကနေ အမြင်တွေ ဝါးဝါးလာပြီး မျက်လုံး နှစ်ဖက်လုံး လုံးလုံး ကွယ်သွားတော့တာပါပဲ။ မျက်လုံးက ကွယ်သွားလေတော့ ဘာမှလည်း လုပ်ကိုင်စားသောက်လို့ မရတော့…။ အရပ်ကတော့ ကောင်းရှာပါတယ်။ ထမင်းဟင်းချက်ဖို့ ၁၅၀၀၀ နဲ့ လူငှားပေးတယ်။ နောက် သုံးဖို့ စွဲဖို့ ၅၀၀၀ ရှာပေးတယ်။ ဒါပေမယ့် ရက်ကနေ လ၊ လကနေ နှစ်ကူးလို့ တစ်နွေကနေ နှစ်နွေ သုံးနွေ ပြောင်းသွားတဲ့ အခါမှာတော့ သူတို့လည်း မတတ်နိုင်တော့ဘူးပေါ့။ ဒါနဲ့ ဒီနေရာလေးကို ရောက်လာခဲ့တော့တာ။ နောက်တော့ ကုသိုလ်ရှင်တွေရဲ့ ကျေးဇူး နဲ့ မျက်စိနှစ်ကွင်း အလင်းပြန်ရခဲ့တယ်။ အမှောင်ဘဝမှာ ၇ နှစ်တာ ဖြတ်သန်းခဲ့ရပေမယ့် အခုတော့ နေ သာ တာကိုလည်း တွေ့နေရပြီ။ ရောက်နေတဲ့ ဘဝမှာ အကောင်းဆုံးနေရင်း တရားလေး နှလုံးသွင်းရင်း နေဝင်ချိန်ကို ကြိုလင့်နေဆဲ……………။

------------------------------------------------------------------------

ဒေါ်ငွေရင်

ကျုပ်ဘဝကိုက ကံဆိုးလွန်းပါတယ်လေ……..။

တွေးလိုက်တိုင်း မျက်ရည်ကျတယ်။ စကားစပ်မိတိုင်းလည်း မျက်ရည်ကျတယ်။ သားလေးတစ်ယောက်နဲ့ ဒေါင်ကျကျ ပြားကျကျ ဖြတ်သန်းနေတဲ့ ဘဝမှာမှ ………..ကြမ္မာဆင်ဆိုးက ရက်ရက် စက်စက် ဝင်တိုးခဲ့တာ…။

သားက အလုပ်ထဲ လုပ်ရင်းကိုင်ရင်း ဘယ်ကနေ ဘယ်လိုဖြစ်တယ် မသိ …..စိတ်ကယောက်ကယက် ဖြစ်ရာကနေ သူ့ကိုယ်သူတောင် သူမမှတ်မိတော့….။ ဒီကြားထဲ ကျုပ်က လေတခြမ်းဖြတ်သွား….။ အိပ်ယာထဲ ဘုံးဘုံးလဲရတဲ့ အဖြစ်။ အနီးအပါးက လူတွေက ကြည့်ရှုကြပေမယ့် နိစ္စဓူဝ ပြုစုဖို့ကြတော့ သိပ်မလွယ်…..။

တူ တူမ တွေဆိုတာကလည်း တနယ်တကျေးမှာ…။ အနီးအပါးမှာ ရှိဦးတော့ …။ ဘယ်သူကမှ ကျုပ်ကို အချိန်ပြည့် ပြုစုနိုင်မှာ မဟုတ်။ အိပ်ယာထဲ အညစ်အကြေးတွေ နဲ့ တလူးလူး ဖြစ်တဲ့ အခါဖြစ်….။ အစာရေစာ ပြတ်လပ်တဲ့ အခါ လပ်ရင်း…..။ အိမ်နီးချင်းတွေက ရံဖန်ရံခါ သန့်ရှင်းရေး လုပ်ပေးတဲ့ အခါ လုပ်ပေးရဲ့။ အိပ်ယာထဲ လဲနေတာ နှစ်ပေါက်လာတော့ ရပ်မိ ရပ်ဖ တွေ တိုင်ပင်ရင်း နောက်ဆုံး ကျုပ်ဒီရောက်လာတယ်။

ရက်ပိုင်းလေးပဲ ရှိသေးပေမယ့် ကျုပ် သန့်သန့်ရှင်းရှင်းလေး နေရတယ်။ အချိန်မှန် စားသောက်ရတယ်။ ပြုစုပေးမယ့် လူတွေလည်း ရှိတယ်။ ကျုပ် ကံကောင်းတယ်လို့ ဆိုရမလား…..။

ကျုပ် ဘဝကို ကျုပ် တွေးမိတိုင်းတော့ မျက်ရည်ကျမိတုန်းးးးးးးးးးးးးးးးးးးး…………………………။

------------------------------------------------------------------------------

ဆည်းဆာရိပ် ဂိလာန ဘိုးဘွားရိပ်သာ

အချိန်အားဖြင့် မနက် ၁၀ နာရီ

အရင်က ဒီလိုနေရာတွေကို ရောက်ခဲ့ဖူးပေမယ့် အပေါ်ယံ သက်သက်မျှသာ………။

အခုတော့ သူငယ်ချင်းတွေနဲ့ အတူ ဒီမှာရှိတဲ့ အဘိုးအဘွား ၄၅ ယောက်ရဲ့ တစ်နေ့တာအာဟာရကို ဒါန စုပြုကြရင်း ရောက်တုန်းရောက်ခိုက် တဒင်္ဂခဏလေး အဖေါ်ပြုပေးမယ်လို့ စိတ်ဆုံးဖြတ်ပြီး ရောက်လာတာကတော့ ကျွန်မအတွက် ဒါပထမဦးဆုံး အကြိမ်ပါပဲ။

ပထမဆုံး ကျွန်မတို့ အဖွဲ့ အပေါ်ထပ်က လုပ်နိုင်ကိုင်နိုင်သေးတဲ့ အဘွားတွေဆီင်္ကို အရင်တက်သွားလိုက်တယ်။

အပေါ်ထပ်မှာ ကိုယ့်ဘာသာကိုယ် သွားလာနိုင်တဲ့ အဘွားတွေ ကို တွေ့ရတယ်။

တစ်ယောက်အိပ် ကုတင် နဲ့ သပ်သပ်ရပ်ရပ် အိပ်ယာလေးတွေက အစီအရီ။

နာမည်ကပ်ထားတဲ့ ဘီရိုပုလေးတွေက အိပ်ယာဘေးမှာ နေရာယူလို့။

အောက်ထပ်မှာ အဆောင်နှစ်ဆောင်ရှိပြီး တစ်ဆောင်က အဘိုးဆောင်နဲ့ တစ်ဆောင်က အဘွားဆောင်….။ အဲဒီအဆောင်တွေမှာ လေဖြတ်နေတဲ့ အဘိုးအဘွားတွေကိုလည်း တွေ့ရရဲ့။ စေတနာအပြည့်နဲ့ ထမင်းကို သေချာခွံ့ကျွေးတဲ့ ဝန်ထမ်းတွေ၊ အနွံတာခံနိုင်တဲ့ ဝန်ထမ်းတွေ၊ သန့်ရှင်းရေးတွေ၊ သူ့အချိန်နဲ့ သူ သွေးပေါင်ချိန်ပေး….ဆီးချိုတိုင်းပေးတဲ့ ကျန်းမာရေးစောင့်ရှောက်မှုပေးတဲ့ ဝန်ထမ်းတွေ နဲ့ စနစ်တကျရှိလှတယ်။

ဒီကိုရောက်လာတော့ ဒီလို ဘိုးဘွားရိပ်သာတွေနဲ့ အသားမကျတဲ့ ကျွန်မ အရင်ဆုံး ဘာကို စလုပ်ရလဲ၊ ဘာက စပြောရလဲဆိုတာကို မသိသလို ကြောင်အမ်းအမ်းတော့ ဖြစ်နေလိုက်သေးတယ်။

နောက်တော့မှ စိတ်ထဲ ငါ့ အဘိုးအဘွားတွေနဲ့ စကားပြောရင် ငါဘယ်လို စပြောမလဲလို့ တွေးလိုက်ပြီး အနီးဆုံးက အဘွားတစ်ယောက် ကုတင်ပေါ်မှာ ဝင်ထိုင်ရင်း အဘွား နေကောင်းလား လို့ စကားစလိုက်တဲ့ အခါ ကိုယ့်ရင်ထဲက အလိုလိုဖြစ်လာတဲ့ စေတနာကြောင့် ကျွန်မ ခဏလေးအတွင်း အသားကျသွားခဲ့ပါတော့တယ်။

သူတို့ပြောသမျှ နားထောင်ရင်း သူတို့ကို အားပေးရင်း အားပေးသူကျွန်မကိုယ်တိုင် ရင်ထဲမှာ ဆို့နစ်နေခဲ့တယ်။

ကိုယ်ကိုယ်တိုင် ငိုချလိုက်ချင်တဲ့ ခံစားချက်ကို မြိုသိပ်….။ အသံကို မယိုင်အောင် ထိန်းရင်း စကားစကို ဆက်နေခဲ့ရပေမယ့် လည်ချောင်းတစ်ခုလုံး နာကျင် တစ်ဆို့နေခဲ့တယ်။ ကျွန်မ အားတင်းထားတယ်။

ဘယ်လိုနည်းနဲ့မှ ကျွန်မ ငိုချလိုက်လို့ မဖြစ်ဘူး။

ကျွန်မလက်ကို ဆုပ်ကိုင်ထားတဲ့ သူတို့လက်တွေမှာ အားကိုးလိုခြင်းတွေ ပါတယ်။ သူတို့ မျက်ဝန်းတွေမှာ ထွေးပွေ့ခံလိုခြင်းတွေကို တွေ့တယ်။ သူတို့ မျက်နှာပေါ်မှာ ကျေးဇူးတင်ခြင်းတွေကို မြင်ရတယ်။ သူတို့ကို အရေးတယူ စကားပြောပေးတဲ့၊ ဂရုတစိုက် နားထောင်ပေးတဲ့၊ တဒင်္ဂပေမယ့် နွေးထွေးမှုကို ပေးတဲ့သူကို သူတို့ လိုအပ်နေတာပါ။

တစ်ယောက်ကို စကားပြောနေတဲ့ အချိန်မှာ ကျန်တဲ့ အဖိုးအဖွားတွေရဲ့ မျှော်လင့်တကြီးနဲ့ ကြည့်နေတဲ့ မျက်ဝန်းတွေဟာ ကျွန်မ ရင်ကို လှုပ်ခတ်စေခဲ့တယ်။ ကျွန်မ နောက် အဖိုးအဖွားတွေဆီကို သွားရဦးမယ်။ သူပြောချင်တာလေးတွေကို ကျွန်မ နားထောင်ပေးရဦးမယ်။ နားထောင်နေရင်း ကျွန်မ ငိုချင်ပြန်ဦးမယ်။

သူ့နေရာမှာ ငါ သာဆိုရင်လို့ တွေးမိကောင်း တွေးမိဦးမယ်။ အဲဒီအခါ ကျွန်မ နာကျင်မိဦးမယ်။

ဆည်းဆာဆိုတာ အလှဆုံးအချိန်လို့ တင်စားကြပေမယ့် အဲဒီအချိန်မှာ သာသာယာယာ နေဝင်သွားမှာလား…။

မိုးမှောင်ကျလို့ ရုတ်ခြည်း ပိန်းပိတ်အောင် မှောင်သွားမှာလား….။

ဒါကို ဘယ်သူကများ သိနိုင်မှာတဲ့လဲ…။

ကဲ ………………..မိတ်ဆွေ

သင်ကရော သင့်ဆည်းဆာချိန်တွေ လှပနေလိမ့်မယ်လို့ သင်ထင်ထားပါသလား။

ကျွန်ုပ်ကတော့ တထစ်ချ အာမ မခံရဲပါဟုပဲ ဖြေရမည်။

ဘဝအလှည့်အပြောင်း အချိုးအကွေ့ဆိုတာ ကြိုတင်တွက်ချက် ဗေဒင်တွက်ထားလို့မှ မရတာပဲ။

(တိုက်ရိုက်လှူဒါန်းလိုသူများအတွက်…………

ဆည်းဆာရိပ် ဂိလာန ဘိုးဘွားရိပ်သာ

ဖုန်းနံပါတ်...

...၇၃၀၁၈၀၀၇။

လိပ်စာ……… အမှတ် ၈၀၃/ ၈၀၅ မဟော်သဓလမ်း ၁၂ရပ်ကွက်၊ အရှေ့ဒဂုံ... ရန်ကုန်မြို့...။

နိုင်ငံရပ်ခြားမှ လှူဒါန်းလိုသူများကိုယ်စားလည်း အခမဲ့ ကိုယ်တိုင်ကိုယ်ကျ သွားရောက်လှူဒါန်းပေးမည်ဖြစ်ပါကြောင်း …………..အဖိုးအဖွားတို့ အကျိုးမျှော်၍ နှိုးဆော်လိုက်ရပါတယ်။)

  

မှတ်ချက်..........နာမည်များသည် အဘိုးအဘွားများ၏ မူရင်း နာမည်များ မဟုတ်ကြပါ။