မရှိခဲ့သလိုမျိုး

by Mar Ga Luelin on Tuesday, November 20, 2012 at 11:50pm ·

သေဆုံးသွားတဲ့အခါ အကျိုးအပြစ်တွေ စစ်ဖို့

ဘုရားသခင် , ငရဲ မင်းကြီး , သိကြားမင်း

အမည်မဖော်နိုင်သူ ဘယ်သူနဲ့ပဲတွေ့တွေ့

ဘာ ကုသိုလ်တွေလုပ်ခဲ့

ဘာ အကုသိုလ်တွေလုပ်ခဲ့သလဲမေးရင်

ဘာမှ ဖြေနိုင်မယ်မထင်ဘူး

လွန်ခဲ့သောတပါတ်က ဘာဟင်းနဲ့စားခဲ့သလဲတောင်

အခု အချိန်မှာမေးရင် ပြန်သတိမရ . . .

နှင်းမိုးတွေ ရွာချတဲ့အခါ

နေပူပူ အောက်မှာ

ခံစားတတ်တဲ့ မှတ်ညဏ်

သတိရစေတတ်တဲ့ နှလုံးသား လုံးပါးပါးလာ

ညီမလေးရဲ့ မြေပုံကို မမြင်ဖူး

အဖွားရဲ့ မြေပုံ ကို မရောက်တော့ဘူး

တနေ့တော့ပြန် တွေ့ရမယ် . . . တဲ့

တယောက်ပြီးတယောက် လက်ပြသွားကြတာလဲ များပြီ . . .

စား  ၀တ်  နေ   ရေး . . . လုံးထွေး

တခါတလေ သူတို့မရှိခဲ့သလိုမျိုး

တခါတလေ သူတို့ ပျောက်သွားသလိုမျိုး

ဇာနည်ရေ . . . မင်းနဲ့ငါ ပြောခဲ့သလို

လက်ဖ၀ါးက အသက်လမ်းကြောင်းတိုနေလို့ ပြတ်နေလို့

သေဆုံးရကြေးဆိုရင် ငါလည်း သက်တမ်းတ၀က်ပါပဲကွာ . . . ညီလေး

အေးအေး . . . မင်းကတော့ ဆိုင်ကယ်တစီးနဲ့သက်သေပြသွားခဲ့ပြီ

ငါကရော ဘယ်လိုသက်သေပြဦးမလဲ မသိရသေး . . .

အခု လက်ရှိ မိတ်ဆွေတွေ

အခု လက်ရှိ ရန်သူတွေ

အခု လက်ရှိ စကားပြောနေတဲ့ လူတွေ

အခု လက်ရှိ လှုပ်ရှားသွားလာနေတဲ့လူတွေ

နောင်နှစ်ပေါင်းတရာကျော်မှာ ရပ် တန့် သွား ကြ မှာ ပါ . . .

သူတို့မရှိခဲ့သလိုမျိုး

သူတို့  မ   ရှိ   ခဲ့    သ    လို     မျိုး . . .

 မာဃသစ္စာ