အမေ့နံနက်ခင်းလေးဆီသို့

by သစ်နေ မိုး on Thursday, January 19, 2012 at 3:10pm ·

      

    အသက်အရွယ်များ ငယ်ရာမှကြီးလာသည်နှင့်အတူ အမေ့အိပ်ရာတွင် အိပ်စက်ခဲ့ရသည့် ညချမ်းများနှင့် ကျွန်တော်တို့တစ်တွေဝေးပြီးရင်းဝေးခဲ့ကြရသည်။ ငယ်ငယ်ကအိပ်ယာဝင်ချိန်များတွင် အမေ့ရင်ခွင်ခေါင်းဝှေ့၍ အိပ်ပျော်ခဲ့ရသည့် အချိန်များကို လူတိုင်းဆိုသလို အမှတ်တရဖြစ်မိသည့်အခါ များရှိတတ်ပါလိမ့်မည်။ အမေ့အိပ်ယာ အမေ့ရင်ခွင်နှင့် ကာလများစွာကင်းကွာဖြတ်သန်းရင်း အမေ့ရင်ခွင်ကို ခေါင်းဝှေ့အိပ်မောကြရသည့်အချိန်ပိုင်းတို့ကိုပြန်လည်ကြုံကြိုက်ရသောအခါတွင်ကား ဘ၀၏ အေးချမ်းဆုံးအချိန်တို့ကိုဖြတ်သန်းရသည့်နှယ်ဟု ဆိုချင်ပါသည်။ ဤအချိန်ပိုင်းတို့သည် လုံးဝမေ့၍မရနိုင်သော ကြည်နူးမှုတို့ကို ထပ်ခါထပ်ခါဖြစ်ပေါ်စေ၏။

ထပ်ခါထပ်ခါလည်းသတိရမိစေ ပါသည်။ ယခုလည်း ကျွန်တော်သည် ထိုအချိန်ပိုင်းတို့ကို ပြန်လည်လွမ်းဆွတ်တမ်းတနေမိလျှက် ရှိသည်။ ထိုသို့ကျွန်တော် လွမ်းဆွတ်တမ်းတမှုတို့နှင့်အတူ ကျွန်တော့်အာရုံတို့တွင် အမေ့အိပ်ယာ အမေ့ရင်ခွင်နှင့် မေ့မရနိုင်သော အတိတ်ပုံရိပ်တို့က ၀ိုးတစ်ဝါးနှင့် ပေါ်လာခဲ့ပါတော့သည်။ ထိုသို့ဖြင့်ပင် ထိုအတိတ် ထိုအရိပ်များနှင့် အမေ့ရင်ခွင်တွင် အိပ်ခဲ့ရသည့်ကျွန်တော့ဘ၀ညတစ်ည အကြောင်းရေးဖြစ်လိုက်ပါသည်။

          အိမ်တွင်အမြဲလိုလို မရှိတတ်သော သားများ အိမ်ပြန်ရောက်လာသည့်ရက်များတွင် အမေ သည် သူနှင့်အတူတူ ကျွန်တော်တို့ကို အိပ်စေချင်သည်။ သားတွေအိပ်ယာဝင် နှိပ်နယ်ပေးသည်ကို ခံရင်းစကားတွေတစ်ဝကြီးပြောတတ်သည်မှာ အမေ့၏ဗီဇလည်းဖြစ်သည်။ အခြားအမေများ ထိုသို့ ဟုတ်မဟုတ် မပြောနိုင်သော်လည်း ကျွန်တော်တို့အမေမှာ ထိုအတိုင်းဖြစ်သည်။ သားအမိတွေဆုံ၍ အမေ့အိပ်ရာတွင် အိပ်ရသည့်ညဆိုလျှင် မင်းတို့အဖေက ဘယ်လိုဆိုပြီး အဖေ့အကြောင်းက စ၍ အမေရင်ဖွင့်တတ်သည်။ သားသမီးတွေအဝေးရောက်နေသော အချိန်များတွင် ဖိုးကြီးအို ဖွားကြီးအို သူတို့နှစ်ဦး၏ အထီးကျန်မှု၊ အဖေက ကျွန်တော်တို့သားများအပေါ်တွင် ထားရှိသည့် ယုံကြည်မှု၊ ရည်မှန်းမှုတွေကစလို့ အဖေ့အသက်အရွယ်ကြီးလာ၍ သူဟင်းချက်ကျွေးသည်ကိုတောင် ဂျီးများတတ် လာသည့်အကြောင်းများအထိ အမေရင်ဖွင့်သည့်အထဲတွင် ပါလေ့ရှိသည်။

          ပြီးခဲ့သည့်တစ်ခေါက် ကျွန်တော်အိမ်ပြန်ရောက်သောရက်များအတွင်း ညတစ်ညအမေနှင့် အတူ အိပ်ဖြစ်သည်။ ညအိပ်ရာဝင်ထုံးစံအတိုင်း အဖေ့အကြောင်း မောင်နှမတွေအကြောင်းပြောရင်း အမေ့ကို နှိပ်နယ်ပေးရင် ကျွန်တော်အိပ်ပျော်သွားခဲ့သည်။ အမြဲတစေ စောစောနိုးလေ့နိုးထမရှိသော ကျွန်တော်မှာ ဘာကြောင့်ရယ်မသိ ထိုနေ့ညက နံနက်အစောကြီးနိုးနေခဲ့သည်။ သို့သော် ဇိမ်ခံရသည် ကို ၀ါသနာထုံသည့် ကျွန်တော့်အကျင့်အတိုင်း အညာဆောင်းတွင်း၏ နံနက်စောစောအချမ်းကို စောင်အတွင်းမှာမှိန်း၍ ခံစားနေမိသည်။ ထိုအချိန်မှာပင် ကျွန်တော့်ဘေးမှ အမေသည်လည်း အိပ်ရာမနိုးသည်။ သူ့ထုံးစံအတိုင်း အိပ်ရာမှ နိုးနိုးခြင်း စောင်များကိုခေါက်သိမ်းနေသည်ထင်ပါ၏။ အသံတွေကျွန်တော်ကြားနေရသည်။ သူ့သားတွေအကျင့်ကို သူအသိဆုံးဟု ခဏခဏပြောတတ်သည့် အတိုင်း ကျွန်တော့်ကိုလည်း အမေက အိပ်ပျော်နေဆဲထင်ပုံရ၏။ ထို့အတွက် အမေက ကျွန်တော့်ကို မနှိုးပါ။ သို့သော် ထိုအချိန်တွင် အမေ့လက်ချောင်းများက ကျွန်တော့်မျက်နှာပေါ်သို့ လာထိ၏။ ကျွန်တော့်နဖူးပြင်ကဆံပင်တို့ကို အမေပွတ်သပ်ကြည့်နေသည်ကို ကျွန်တော်သတိထားမိသည်။ အမေဘာလုပ်နေတာလဲလို့တော့ ကျွန်တော်မမေးဖြစ်ပါ။ မျက်လုံးမဖွင့်ဘဲ ဒီအတိုင်းမှိန်းနေရသည်ကို ကြေနပ်နေမိသည်။ ထိုစဉ်မှာပဲ အမေ့ဆီမှ စကားသံတိုးတိုးသည်လည်း ထွက်၍လာခဲ့ပါသည်။ “သြော်…. ငါ့သားလေး…. ငါ့သားလေး။ အိပ်နေလိုက်တာ…. ကြည့်ပါဦး”တဲ့….။

          ကျွန်တော်တစ်ကိုယ်လုံး ဘယ်လိုဖြစ်သွားသည်ပင် ကျွန်တော့်ကို ကျွန်တော်မသိ။ အမေ့အသံ ဟာကျွန်တော်စာနဲ့ချရေးမပြတတ်တဲ့ အသံမျိုး။ ကြားကြားခဲ့သမျှ အသံများထဲတွင် အချိုဆုံးအသံ တစ်ခုဟု ဆိုလျှင်တောင် လုံလောက်မည်ဟုမထင်ပါ။ အမေကတော့ ကျွန်တော့နဖူးပြင်ကို သူ့လက် ကလေးနဲ့ ပွတ်သပ်နေဆဲ….။ နှုတ်မှလည်း ငါ့သားလေး… ငါ့သားလေးဆိုသည်ကိုဆက်၍ညဉ်း နေသည်ကိုကြား၏။ ကျွန်တော်မျက်လုံးတွေကို ဖွင့်ဖို့မကြိုးစားတော့ပါ။ ပြောမပြနိုင်သော စိတ်အတွင်း ခံစားရသည့် ကြည်နူးမှုအရသာကို တိတ်တိတ်လေးခံစားနေမိသည်။ ထိုစဉ်မှာပဲ အမေ့နှာသီဖျားက ထွက်သက်ငွေ့ငွေ့နွေးနွေးဟာ ကျွန်တော့်နဖူးပြင်သို့ လာ၍ထိသည်ကို ကျွန်တော်သိရသည်။ နောက်တော့ ကျွန်တော့ပါးပြင်ပေါ်တွေကိုထိ၏ အမေက ကျွန်တော့်မျက်နှာတစ်ပြင်လုံးကို နမ်းရှုံ့၏။ အမေ့နှုတ်ကလည်း သူ့သားကို သူခေါ်မ၀ဖြစ်နေရှာ၏။ ခဏကြာမှ အမေ့အနမ်းတို့ရပ်သွားသည်။ ထို့နောက်တွင်တော့ အမေကျွန်တော့ဘေးမှထ၍သွားသည်။ အိပ်ရာထဲတွင် သူ့သားတစ်ယောက် အတွေးတို့ဖြင့် ကြည်နူးစွာ ကျန်ရစ်နေမည်ကို အမေသိလိမ့်မည်မဟုတ်ပါ။ ကျွန်တော်ကတော့ အတွေးတို့ဖြင် ဟိုး… ငယ်ငယ်ကအမေသနပ်ခါးလိမ်းပေးတာခံခဲ့ရသည့် ကလေးဘ၀ဆီကိုတောင် ပြန်ရောက်သွားကြည့်မိသည်။ သနပ်ခါးလိမ်းပေးပြီး ကိုယ့်သားကိုပြန်နမ်း၇ှုံတက်တာလည်းဒီအမေပဲလေ..ထိုအတွေးဖြင့်ကိုယ့်ပါးကိုယ်စမ်းမိတော့ မ၇ှိပါ ..သေနပ်ခါးတို့ ကွှန်တော့်ပါးမှာရှိမနေကြပါ...သိုသော်.. အမေ့အနမ်းပူပူနွေးနွေးကတော့ ရှိနေဆဲပင်ဖြစ်၏။

          နံနက်ခင်းသည်လည်း ဆွတ်ပျံ့ဖွယ်ရာအတိဖြင့် ပြီးပြည့်စုံနေသည့်အလား ကြည်နူးမှုတို့ဖြင့် ဝေဆာကုန်၏။ တဆက်တည်းဆိုသလို အမေ့အနမ်းဖြင့် နိုးထရသော နံနက်ခင်းလေးကို ကျွန်တော် နှမျောနေမိပြန်သည်။ ကုန်ဆုံးမသွားစေချင်ပါ။ ဖြစ်နိုင်လျှင် ဒီနံနက်ခင်းလေးကို ဆွဲဆန့်ထားလိုက်ချင် ပါသည်။ သို့သော် အချိန်က ကျွန်တော့ကို မျက်နှာသာမပေးပါ။ ကျွန်တော်ချစ်သော နံနက်ခင်းလေး ကို ဖက်တွယ်ထားခွင့်မရ။ ကျွန်တော်ခွဲခွာခဲ့ပါသည်။ ထိုနံနက်ခင်း ထိုညချမ်းများနှင့် အဝေးဆုံးသော တစ်နေရာသို့ပင် ကျွန်တော်ရောက်နေခဲ့ပြီဖြစ်သည်။ သို့သော် ကျွန်တောက ထပ်ကာထပ်ကာ ပြန်လွမ်းဆွတ်မိ၏။ အမေကျွန်တော့ကို ခုချိန်ထိ နမ်းရှုံ့တုန်းဆိုသည့် အတွေးတစ်ခုနှင့် ထိုနံနက်ခင်း လေးအား လွမ်းဆွတ်ရသည်ကို ကျွန်တော်သဘောကျသည်။ ထိုအတွေးထိုလွမ်းဆွတ်မှုသည်ပင် ဘယ်အရာတို့နှင့်မျှ နှိုင်းယှဉ်၍ မရသော ကျွန်တော့ဘ၀၏ ကြည်နူးမှုကို ဖြစ်ပေါ်စေပါသည်။

          ကျွန်တော့ အိမ်ပြန်ရက်တို့က နီး၍လာခဲ့ပါပြီ။ ဒီတစ်ခေါက် အိမ်ပြန်ရောက်လျှင်လည်း ကျွန်တော်တစ်ယောက် အိပ်ရာအစောကြီး နိုးနေဦးမည်မှာအသေအချာပင်ဖြစ်သည်။ အမေ့အနမ်းကို အိပ်ချင်ယောင်ဆောင်ပြီး ကျွန်တော်ခံယူရပါဦးမည် အမေသည်လည်း မတွေ့တာကြာနေသော သူ့သားများကိုမျှော်နေလောက်ပြီ….။စိတ်ကူးတို့က ကျွန်တော့်ကို ပျော်ရွှင်လာမိစေသည်။ မျက်နှာတွင် အပြုံးပင်လာဟပ်၏။ အမေညဉ်းခဲ့သည့်စကားသံတို့ကို ကျွန်တော့နားထဲတွင် ပြန်လို့ကြားယောင် လာသည်။ “သြော်… ငါ့သားလေး… ငါ့သားလေး။ အိပ်နေလိုက်တာ… ကြည့်ပါဦး” တဲ့………။