08.04.2012 နေ့ဖတ်ရန်သတင်းများ
|
3:55 PM |
No မှတ်ချက် |
တွားရက်ဂ် သူပုန်တွေကို လက်ခံကြောင်း လူငယ်တွေ ဆန္ဒပြမာလီ စစ်အာဏာရှင် အရပ်သားဆီ အာဏာလွှဲပေးဖို့ သဘောတူ
အနောက် အာရိက နိုင်ငံများ အဖွဲ့ ECOWAS ရဲ့ ကြားဝင် ညှိနှိုင်းပေးမှုကြောင့် မာလီ နိုင်ငံမှာ အာဏာသိမ်း စစ်ခေါင်းဆောင်တွေက အရပ်သား အုပ်ချုပ်ရေး အဖွဲ့လက်ထဲ အာဏာလွှဲပေးဖို့ သဘောတူလိုက်ပါပြီ။
အမျိုးသား လွှတ်တော် ဥက္ကဌ က ကြားဖြတ် အစိုးရ အဖွဲ့ကို ဉီးဆောင်ပါလိမ့်မယ်လို့ အာဏာသိမ်း စစ်ခေါင်းဆောင် ဗိုလ်မှူး Amadou Sanogo က ပြောပါတယ်။
မာလီအပေါ် ပိတ်ဆို့ အရေးယူမှုတွေ ရုတ်သိမ်းပေးဖို့ အိမ်နီးချင်း နိုင်ငံတွေက သဘောတူခဲ့ ကြပါတယ်လို့ အီကိုဝက်စ် အဖွဲ့ရဲ့ ညှိနှိုင်းရေးမှူး ၊ ဘာကီနာဖာဆို နိုင်ငံခြားရေး ဝန်ကြီး ဒါဂျီဘရေးလ် ဘက်ဆိုးလ်က ပြောပါတယ်။
တချိန်တည်းမှာ မာလီနိုင်ငံ မြောက်ပိုင်းက တွားရက် သူပုန်တွေ သိမ်းပိုက်ထားတဲ့ နေရာကို သူတို့ပိုင် လွတ်မြောက်နယ်မြေ အဖြစ် သူပုန်တွေက ကြေညာခဲ့တဲ့ အပေါ် နိုင်ငံတကာက ရှုတ်ချလိုက်ပါတယ်။
အစိုးရက လက်နက်ကြီးသုံး နှိမ်နင်းနေတူရကီထဲ ထွက်ပြေးလာတဲ့ ဆီးရီးယား ဒုက္ခသည် နှစ်ဆတိုး
ဆီးရီးယား နိုင်ငံကနေ သူတို့ဆီ ထွက်ပြေး ဝင်ရောက်လာသူ အရေအတွက် တိုးလာတာကြောင့် ကုလသမဂ္ဂရဲ့ အကူအညီ လိုကောင်း လိုလိမ့်မယ်လို့ တူရကီက ပြောကြားလိုက်ပါတယ်။
လာမယ့် အင်္ဂါနေ့မှာ လူထုအပေါ် ထိုးစစ်ဆင် တိုက်ခိုက် နေမှုတွေကို အဆုံးသတ်ပါ့မယ် ဆိုပြီး ငြိမ်းချမ်းရေး အစီအစဉ်ကို ဆီးရီးယား အစိုးရက လက်ခံ သဘောတူခဲ့ချိန်ကစလို့ သူတို့ဆီ ထွက်ပြေးခိုလှုံသူ အရေအတွက် နှစ်ဆ တိုးလာကြောင်း တူရကီက ဆိုပါတယ်။
အစိုးရတပ်တွေက အပြင်းအထန် လက်နက်ကြီးတွေနဲ့ ဗုံးကြဲ တိုက်ခိုက်နေတယ်လို့ ပြေးလာတဲ့ ဒုက္ခသည်တွေက ပြောပါတယ်။
ဆီးရီးယား နိုင်ငံတွင်း ဖြစ်ပျက်နေမှုတွေက တကယ့်ကို စိုးရိမ်စရာကောင်းတယ်လို့ တူရကီ နိုင်ငံခြားရေး ဝန်ကြီး Ahmet Davutoglu က ပြောပါတယ်။
လူပေါင်း ၂၇ ဦး ထက်မနည်း သေဆုံးသွား တယ်လို့ ဆိုပါတယ်ဆီးရီးယားမှာ သတ်ဖြတ်မှုတွေ ဆက်လက်ဖြစ်ပွား
ဆီးရီးယား အစိုးရတပ်ဖွဲ့ဝင်တွေဟာ အရပ်သား တွေ အပေါ် တိုက်ခိုက်မှုတွေ ဆက်တိုက် ဆိုသလို ပြုလုပ်နေပြီး၊ စနေနေ့ နေ့လည်ပိုင်းမှာလည်း အကြမ်းဖက်မှုတွေ ဆက်လက်ဖြစ်ပွားနေတယ်လို့ ဆီးရီးယား အရေး တက်ကြွလှုပ်ရှားသူတွေက ပြောပါ တယ်။
လူပေါင်း ၂၇ ဦး ထက်မနည်း လည်း သေဆုံး သွားတယ်လို့ ဆိုပါတယ်။
ဟာမာ ပြည်နယ်က လက်တမ်နာမြို့ကို အစိုးရ စစ်သားတွေဟာ အမြောက်တွေနဲ့ ပစ်ခတ်ခဲ့ပြီး ဝင်စီးဖို့ ကြိုးစားခဲ့တဲ့ တယ်ဆိုတဲ့ သတင်းတွေ ရရှိပါတယ်။
ဟုမ်းစ်မြို့က ရပ်ကွက်အတော်များများကိုလည်း တင်ကားက အမြောက်တွေ၊ လက်နက်ကြီး တွေနဲ့ တဒိန်းဒိန်း လှမ်းပစ်နေတယ်လို့ ဆိုပါတယ်။
အတည်ပြုလို့မရတဲ့ ဗီဒီယို မှတ်တမ်းတခုမှာတော့ လူသေအလောင်းတွေ အစုလိုက် အပြုံလိုက် ဖြစ်နေတာကို တွေ့ရပါတယ်။ ဒါဟာ လက်လွတ်စပယ် အစုလိုက် အပြုံလိုက် သတ်ဖြတ်မှု ပြုလုပ်ခဲ့တဲ့ ပုံမျိုး ဖြစ်နေပါတယ်။
ဆီးရီးယားအစိုးရ အနေနဲ့ ဆန္ဒပြသူတွေကို ဆက်လက် တိုက်ခိုက်နေတဲ့အပေါ် ကုလသမဂ္ဂ အတွင်းရေးမှူးချုပ် ဘန်ကီမွန်းက ရှုတ်ချပြောဆိုပေမဲ့လည်း အခုလို တိုက်ခိုက်မှုတွေ ဆက်ပြီး ဖြစ်ပွားခဲ့တာပါ။
လာမယ့် အင်္ဂါနေ့ကို နောက်ဆုံးထားပြီး ပစ်ခတ်မှုတွေ ရပ်စဲမယ်လို့ သမ္မတအာဆတ်က ကတိပေးထားတာ ဖြစ်တဲ့အတွက် အခုအချိန်မှာတော့ သတ်ဖြတ်မှုတွေ ဆက်လက် ဖြစ်နေတာဆိုပြီး ဆင်ခြေ ပေးစရာ ဘာအကြောင်းမှ မရှိဘူးလို့ မစ္စတာ ဘန်ကီမွန်းက ပြောပါတယ်။
ကမ္ဘာပေါ်မှာ အမြင့်ဆုံး စစ်မျက်မှာပြင် တခု အဖြစ် သတ်မှတ်ထားတဲ့ နေရာ ဖြစ်ပါတယ်ပါကစ္စတန်မှာ နှင်းတောင်ပြိုလို့ စစ်သားတွေသေဆုံး
ပါကစ္စတန် နိုင်ငံ ကက်ရ်ှမီးယား အငြင်းပွား ဒေသဘက်က စစ်အခြေစိုက် စခန်းတခုမှာ နှင်းတောင်ပြိုတဲ့အတွက် နှင်းတွေဖုံးအုပ် သွားတဲ့ စစ်သား ၁၀၀ ကျော်ထဲက တချို့အလောင်း တွေကို ရှာတွေ့ခဲ့ပြီလို့ ပါကစ္စတန် စစ်တပ်က ပြောပါတယ်။
ဒါပမယ့်လည်း ဘယ်လောက်များများ အသက်ရှင် ကျန်နေတယ် ဆိုတာကို မပြောနိုင်သေးဘူးလို့ ပါကစ္စတန် စစ်တပ်က ပြောပါတယ်။
အခု နှင်းတောင်ပိတဲ့ တပ်ရင်းဌာနချုပ်ဟာ ပင်လယ်ရေ မျက်နှာပြင်အမြင့် မီတာ ခြောက်ထောင် အထက်မှာရှိတဲ့ ဆီရန်ချန် ရေခဲတောင်ပေါ်မှာ ဖြစ်ပြီး၊ ဝေးလံခေါင်သီလှတဲ့ အတွက် ကယ်ဆယ်ရေး အဖွဲ့တွေနဲ့ အနံ့ခံ ခွေးတွေ ချထားရာမှာ ရဟတ်ယာဉ်တွေနဲ့ သွားရောက် ချထားခဲ့ရတယ်လို့ စစ်တပ်က ပြောပါတယ်။
ပါကစ္စတန် စစ်တပ် ပြောခွင့်ရသူ ဗိုလ်ချုပ် အက်တာ အာဘတ်စ်က အဲဒီတပ်စခန်းအပေါ် ပြိုကျခဲ့တဲ့ ဆီနှင်းထုကြီး ဟာ အလွန်ကြီးမားတဲ့အတွက် ထိခိုက်ပျက်စီးမှု အတိုင်းအတာဟာ မျှော်မှန်းမထားတဲ့ ပမာဏ ဖြစ်တယ်လို့ ပြောခဲ့ပါတယ်။
ဒါကြောင့် ကယ်ဆယ်ရေးလုပ်ငန်းတွေကို ပြည့်ပြည့်ဝဝ လုပ်ကိုင်နိုင်ဖို့ ရက်အတော်ကြာ အချိန် ယူရနိုင်တယ်လို့ ဆိုပါတယ်။
ဒီဒေသဟာ ပါကစ္စတန်ဘက်ကရော အိန္ဒိယဘက်ကပါ သူပိုင်ငါပိုင် အငြင်းပွားပြီး၊ နှစ်ဘက် စစ်တပ်က တပ်ဖွဲ့ဝင် ထောင်ပေါင်းများစွာကို ချထားတဲ့နေရာ ဖြစ်တာကြောင့် ကမ္ဘာ့ အမြင့်ဆုံး စစ်မျက်နှာပြင် တခုလို့ လူသိများပါတယ်။
၂၀၁၀ ခုနှစ်တွေတုန်းကလည်း ဆီးနှင်းပြိုကျမှုကြောင့် ပါကစ္စတန် စစ်သား ၂၄ ဦး သေဆုံးခဲ့ဖူး ပါတယ်။
ပါကစ္စတန်ရေခဲတောင်ပြိုမှု စစ်သား ၁၀၀ သေဆုံး
By ဗွီအိုအေ (မြန်မာဌာန)
- ပါကစ္စတန်နိုင်ငံ မှာ ရေခဲတောင် ရုတ်တရက် ပြိုဆင်းလာတဲ့အတွက် စစ်အခြေစိုက်စခန်း တခု ထိခိုက်ပျက်စီး သွားပြီး စစ်သား ၁၀၀ လောက် ရေခဲပြင်အောက်မှာ နစ်မြှုပ် သေဆုံးသွားတယ်လို့ ပါကစ္စတန် အစိုးရ တာဝန်ရှိသူတွေက ပြောဆိုပါတယ်။ ကမ္ဘာ့ တောင်ထူထပ် မြင့်မားဆုံး စစ်မြေပြင်လို့ ထင်ရှားတဲ့ Siachen ရေခဲလွှာ ဒေသထဲက စစ်အခြေစိုက်စခန်းဟာ ပြိုကျလာတဲ့ ရေခဲတောင်ကြောင့် ပျက်စီးသွားပြီး စစ်သားတွေ သေဆုံးခဲ့ရတယ်လို့ စစ်ဘက် အရာရှိတွေက အတည်ပြု ပြောဆိုပါတယ်။
အိန္ဒိယနိုင်ငံ အနီး၊ ဟိမ၀န္တာဒေသ ထဲက ဝေးလံခေါင်သီတဲ့ စစ်စခန်းကို ကယ်ဆယ်ရေး အဖွဲ့တွေ သွားနေကြပြီလို့ တာဝန်ရှိသူတွေက ပြောပါတယ်။ စခန်းမှာ ရှိတဲ့ စစ်သည်တွေရဲ့ ကံကြမ္မာကို ရှင်းရှင်းလင်းလင်း မပြောနိုင်သေးဘူးလို့ ပါကစ္စတန် စစ်တပ်တာဝန်ရှိသူတွေက ပြောဆိုပါတယ်။
Siachan ဒေသရဲ့ ဆိုးဝါးတဲ့ ရာသီဥတု အခြေအနေနဲ့ ရေခဲတောင်ပြိုတဲ့ အန္တရာယ်ကြောင့် သေဆုံးရသူဦးရေက သေနတ်မှန် သေဆုံးသူ ဦးရေ ထက်များတယ်လို့ စစ်ရေး ကျွမ်းကျင်သူတွေက ပြောဆို သုံးသပ်ကြပါတယ်။
အာဏာသိမ်း မာလီစစ်တပ် ရက်ပိုင်းအတွင်း အာဏာလွှဲနိုင်
By ဗွီအိုအေ (မြန်မာဌာန)
- မာလီနိုင်ငံမှာ အာဏာသိမ်း စစ်ခေါင်းဆောင်က သူ့ရဲ့ စစ်အုပ်ချုပ်ရေး အဖွဲ့အနေနဲ့ မကြာခင်ရက်ပိုင်းအတွင်း နိုင်ငံတော်အာဏာကို အရပ်သား ကြားဖြတ်အစိုးရလက်ကို လွှဲပြောင်းပေးမှာဖြစ်ကြောင်း ပြောဆိုလိုက်ပါတယ်။ ဒါဟာဆိုရင် အနောက်အာဖရိကရဲ့ ဒေသတွင်း စီးပွားရေး အသိုင်းအ၀ိုင်း အဖွဲ့အစည်းဖြစ်တဲ့ ECOWAS နဲ့ သဘောတူညီထားချက်ထဲက အဓိက အစိတ်အပိုင်းလည်း ဖြစ်ပါတယ်။
အာဏာသိမ်းမှုမှာ ပါဝင်ပတ်သက်သူတွေရဲ့ ဆန္ဒသဘောထားအမှန် ဖြစ်ပါတယ်။ အမျိုးသား စည်းလုံးညီညွတ်ရေး ကြားဖြတ်အစိုးရ ပေါ်ထွက်လာဖို့ အမြန်ဆုံး အကောင်ထည်ဖော်မှာ ဖြစ်ပါတယ်။ သူတို့ရဲ့ ကုန်းတွင်းပိတ် နိုင်ငံအပေါ် ECOWAS အဖွဲ့က ကန့်သတ်တားမြစ် ထားမှုတွေကို ရုပ်သိမ်းအောင် ကြိုးပမ်းမှုလည်း ဖြစ်ပါတယ်လို့ အာဏာသိမ်းအဖွဲ့ခေါင်းဆောင် ကက်ပတိန် အမာဒူ ဆန်နိုဂိုး က ရိုက်တာသတင်းဌာနနဲ့ ဥရောပသတင်းဌာနတွေက သတင်းထောက်တွေကို ပြောဆိုခဲ့ပါတယ်။
စစ်အုပ်ချုပ်ရေးအဖွဲ့ အနေနဲ့ ဘယ်တော့ အာဏာလွှဲပြောင်းပေးမယ် ဆိုတာကိုတော့ သူကမပြောပါဘူး။ သောကြာနေ့ နှောင်းပိုင်း မာလီနိုင်ငံပိုင် ရုပ်သံဌာနကနေ ထုတ်ပြန်ကြေညာတဲ့ ဆန်နိုဂိုရဲ့ အဖွဲ့နဲ့ ECOWAS တို့အကြား သဘောတူညီမှုမှာလည်း နေ့ရက်နဲ့ အချိန်ကာလ သတ်မှတ်ချက်တွေ ဖော်ပြထားခြင်း မရှိပါဘူး။
မတ်လ ၂၂ ရက်နေ့မှာ ဖြစ်ပွားခဲ့တဲ့ အာဏာသိမ်းမှုကြောင့် မာလီနိုင်ငံမှာ ရှုတ်ရှုတ်ထွေးထွေး အခြေအနေတွေ ဖြစ်ပွားခဲ့ပြီး နိုင်ငံမြောက်ပိုင်းမှာ မာလီစစ်တပ်နဲ့ တိုက်ခိုက်နေတဲ့ တွားရက် သူပုန်တွေကို အောင်မြင်မှုတွေ ကြီးကြီးမားမား ရရှိစေခဲ့ပါတယ်။ အရင်အစိုးရက တွားရတ် သူပုန်တွေကို နှိမ်နင်းတဲ့နေရာမှာ ဘာမှ ထိထိရောက်ရောက် မဆောင်ရွက် နိုင်ခဲ့တဲ့အတွက် အာဏာသိမ်းရတာ ဖြစ်တယ်လို့ အာဏာသိမ်း စစ်ခေါင်းဆောင်တွေက သူတို့ရဲ့ လုပ်ရပ်ကို တရားဝင် အကြောင်းပြကြပါတယ်။
ငြိမ်းချမ်း ညီညွတ်ရေး မလာဝီသမ္မတသစ် တောင်းဆို
By ဗွီအိုအေ (မြန်မာဌာန)
- မလာဝီနိုင်ငံရဲ့ ပထမဦးဆုံး အမျိုးသမီး သမ္မတ ဂျိုက်စ် ဘန်ဒါ (Joyce Banda) ဟာ နိုင်ငံသားတွေကို ငြိမ်းငြိမ်းချမ်းချမ်းနဲ့ ညီညွတ်မှုရှိကြဖို့ ပြောဆိုလိုက်ပါတယ်။ ပြီးခဲ့တဲ့ ကြာသပတေးနေ့က ရှောင်တခင် ကွယ်လွန်သွားခဲ့တဲ့ သမ္မတကြီး Bingu wa Mutharika ရဲ့ ၀မ်းနည်းပူဆွေးမှု ကာလာမှာ အခုလို ပြောလိုက်တာ ဖြစ်ပါတယ်။ မစ္စ ဘန်ဒါ ဟာ စနေနေ့မှာ ပထမဦးဆုံး မလာဝီနိုင်ငံရဲ့ အမျိုးသမီး သမ္မတအဖြစ် ကျမ်းသစ္စာ ကျိန်ဆိုခဲ့ပါတယ်။
ကမ္ဘာကျော် Forbes မဂ္ဂဇင်းထဲမှာ ကမ္ဘာ့ တတိယမြောက် အာဏာအရှိဆုံး အမျိုးသမီးအဖြစ် သတ်မှတ်ခံခဲ့ရတဲ့ မစ္စ ဘန်ဒါ ဟာ ဒီသမ္မတ ကျမ်းကျိန်ပွဲ မိန့်ခွန်း ပြောဆိုရာမှာ တိုင်းပြည်အတွက် ညီညီညွတ်ညွတ် ရှိကြဖို့ တောင်းဆိုလိုက်ပြီး ကလဲစားချေမှုတွေလုပ်ဖို့ အချိန်မဟုတ်ဘူးလို့လည်း ပြောဆိုခဲ့ပါတယ်။
အမေရိကန်ရေတပ် အမောင်းသင် တိုက်လေယာဉ် ပျက်ကျ
By ဗွီအိုအေ (မြန်မာဌာန)
- အမေရိကန်နိုင်ငံ အရှေ့ခြမ်းက ဗာဂျီးနီးယား ပြည်နယ်အတွင်း အမေရိကန်ရေတပ်က အမောင်းသင် တိုက်လေယာဉ်တစင်း လူနေ တိုက်ခန်း တခုပေါ်ကို မနေ့က ပျက်ကျသွားပြီးနောက် ကယ်ဆယ်ရေး ၀န်ထမ်းတွေဟာ ပျောက်ဆုံးနေသူ ၃ ဦးကို လိုက်လံ ရှာဖွေနေကြပါတယ်။ အဲဒီ တိုက်လေယာဉ် ပျက်ကျမှုကြောင့် လေယာဉ်ပေါ် ပါလာတဲ့ လေသူရဲ ၂ ဦးအပါအ၀င် လူ ၇ ဦး ထိခိုက် ဒဏ်ရာရသွားခဲ့တာပါ။
လေယာဉ် ပျက်မကျခင်မှာ လေသူရဲ ၂ ဦးဟာ လေယာဉ်ပေါ်က ခလုတ်နှိပ်ပြီး ခုန်ထွက် လွှတ်မြောက် သွားကြတယ်လို့ သက်ဆိုင်ရာ အရာရှိတွေက ပြောပါတယ်။ လေသူရဲတဦးကလွဲလို့ ဒဏ်ရာရသူ အားလုံးဟာ ဆေးကုသမှုခံယူပြီး ဆေးရုံက ပြန်ဆင်းသွားကြပြီ ဖြစ်ပါတယ်။
အဲဒီ တိုက်လေယာဉ် ပျက်ကျသွားခဲ့တဲ့ အတ္တလန္တိတ် သမုဒ္ဒရာအနီး ဗာဂျီးနီးယား ပြည်နယ် အပန်းဖြေ ကမ်းခြေက ပျက်စီးသွားတဲ့ လူနေတိုက်ခန်း တွေအကြား ရှာဖွေမှုတွေ ပြီးစီးသွားပြီးအထဲမှာ လူတွေ ကျန်နေတယ် ဆိုရင်လည်း အသက်ရှင်နိုင်စရာ အခွင့်အလမ်း သိပ်မရှိဘူးလို့ ရဲတပ်ဖွဲ့ အကြီးအကဲက သောကြာနေ့ ညနေပိုင်းမှာ ပြောပါတယ်။
အဲဒီ လေယာဉ် ပျက်ကျခဲ့တဲ့နေရာက တိုက်ခန်းတွေဟာ သက်ကြီးရွယ်အိုတွေ အများစု နေထိုင်တဲ့ နေရာဖြစ်ပြီး တိုက်ခန်းအတော်များများ ပျက်စီးသွားတယ်လို့ ဆိုပါတယ်။ အဲဒီတိုက်လေယာဉ်ဟာ လေဆိပ်က ထွက်လာပြီး သိပ်မကြာခင်မှာပဲ ပျက်ကျသွားခဲ့တာကြောင့် မီးခိုးလုံးတွေ မိုးပေါ်ကို ထောင်တက်သွားခဲ့တာပါ။
တိုင်းရင်းသားတွေနဲ့ တန်းတူဆက်ဆံရေးမူ ဦးသိန်းစိန်လက်တွေ့ကျင့်သုံး
မနန္ဒာချမ်း
ဓာတ်ပုံ Reuters
သမ္မတဦးသိန်းစိန် KNU ငြိမ်းချမ်းရေး ကိုယ်စားလှယ်အဖွဲ့နဲ့ တွေ့ဆုံနုတ်ဆက်စဉ်။ နေပြည်တော်၊ ဧပြီလ ၇ ရက်၊ ၂၀၁၂ ။
လက်ရှိ မြန်မာအစိုးရဟာ တိုင်းရင်းသားတွေနဲ့ တန်းတူရည်တူ ဆက်ဆံရမယ် ဆိုတဲ့အချက်အပေါ် အခြေခံပြီး ငြိမ်းချမ်းရေး ဖော်ဆောင်နေ တာကို တွေ့ရှိရတယ်လို့ KNU ကရင်အမျိုးသားအစည်းအရုံး က ဒီကနေ့ ပြောလိုက်ပါတယ်။ နေပြည်တော်မှာ သမ္မတ ဦးသိန်းစိန် နဲ့ KNU ငြိမ်းချမ်းရေး ကိုယ်စားလှယ် အဖွဲ့တို့ တွေ့ဆုံခဲ့ကြပြီးတဲ့နောက်ပိုင်းမှာ KNU တာဝန်ရှိသူတစ်ဦးက ပြောလိုက်တာပါ။ ဒါ့အပြင် တိုင်းရင်း သားလက်နက်ကိုင်တွေနဲ့ ငြိမ်းချမ်းရေးရဖို့ သမ္မတ ဦးသိန်းစိန်အစိုးရရဲ့ ပြောဆိုချက်တွေနဲ့ ဆောင်ရွက်ချက် တွေဟာ တထပ်တည်းကျ တာကို တွေ့ရှိရတယ်လို့လည်း ပြောဆိုခဲ့ပါတယ်။
မြန်မာနိုင်ငံမှာ အရပ်သားအစိုးရ တက်လာခဲ့ပြီး ၁ နှစ်အကြာမှာ ပထမဆုံးအကြိမ် ပြည်ထောင်စုအဆင့် ငြိမ်းချမ်းရေး လက်မှတ်ထိုးနိုင်တဲ့ KNU ငြိမ်းချမ်းရေး ကိုယ်စားလှယ်အဖွဲ့တွေနဲ့ သမ္မတ ဦးသိန်းစိန် တို့ စနေနေ့ မနက်က နေပြည်တော်မှာ တွေဆုံခဲ့ကြတာပါ။ ဒီတွေ့ဆုံမှုအတွင်း သမ္မတ ဦးသိန်းစိန် က ပြည်ထောင်စုအဆင့် ငြိမ်းချမ်းရေးဆွေးနွေးပွဲ အောင်မြင်မှုအပေါ် ကြိုဆိုတဲ့အကြောင်းနဲ့ တိုင်းရင်းသားတွေနဲ့ တန်းတူရည်တူ ဆက်ဆံပြီး ထာဝရငြိမ်းချမ်းရေး ရရှိဖို့ ကြိုးပမ်းနေတဲ့အကြောင်းကို KNU ငြိမ်းချမ်းရေး ကိုယ်စားလှယ် အဖွဲ့ကို ရှင်းပြခဲ့တယ်လို့ KNU ကိုယ်စားလှယ်အဖွဲ့ဝင် တစ်ဦးဖြစ်တဲ့ စောသာဒိုမူး က ပြောပြပါတယ်။
“ဆွေးနွေးသွားတဲ့အထဲမှာ ကျနော်တို့ နာလည်လိုက်တာက သူက တိုင်းရင်းသားတွေရဲ့ အပေါ်မှာ တန်းတူရည်တူ ဆက်ဆံရမယ်ဆိုတဲ့ အခြေခံပေါ်မှာ မူတည်ပြီးတော့ ငြိမ်းချမ်းရေး ဆွေးနွေးပွဲကို ဖြစ်စေချင်တယ် ဆိုတဲ့ဟာကို ကျနော်တို့ တွေ့ရပါတယ်။ နောက်ပြီးတော့ ဒီ ငြိမ်းချမ်းရေး မရဘူးဆိုရင် ကျနော်တို့နိုင်ငံက ဘယ်လိုနည်းနဲ့မှ တိုးတက်ဖို့ဆိုတာ အများကြီးကို နှောင့်နှေးပြီးတော့ အခက်အခဲတွေ အများကြီး ကြုံရမယ်ဆိုတာလည်း သူ သဘောပေါက်ပါတယ်။ အဲဒါကြောင့် ဒီ ငြိမ်းချမ်းရေး ဆွေးနွေးပွဲကို အပစ်အခတ် ရပ်စဲရေးကနေပြီးတော့ တခါတည်း ငြိမ်းချမ်းရေး ရတဲ့အထိ သွားဖို့ဆိုတဲ့ဟာကိုလည်း သူ သံန္နိဌာန်ချပြီး လုပ်သွားမယ်ဆိုတာကို သိရတဲ့အတွက် ကျနော်တို့ဘက်ကလည်း အလားတူပဲ တုံ့ပြန်ခဲ့ပါတယ်ခင်ဗျ။”
သမ္မတကြီး ဦးသိန်းစိန်ရဲ့ ရှင်းလင်းချက်တွေနဲ့ပတ်သက်ပြီးတော့ သမ္မတကြီးဟာ တိုင်းပြည်အကျိုးကို လိုလားတယ်ဆိုတာ လက်ခံလို့ရပြီး သူ့ရဲ့ ပြောဆိုချက်တွေနဲ့ လက်တွေ့ ဆောင်ရွက်ချက်တွေဟာ ကိုက်ညီမှု ရှိတာကိုလည်း တွေ့ရတယ်လို့ KNU က အခုလို မှတ်ချက်ချခဲ့ပါတယ်။
“သမ္မတကြီးရဲ့ ပြောဆိုချက်တွေ၊ သူ့ရဲ့ ရှင်းလင်းချက်တွေက တကယ်ပဲ ဘာခေါ်မလဲ စစ်မှန် ရိုးသားတယ်၊ တကယ့်ကို လိုလိုလားလားနဲ့ တိုင်းပြည်အပေါ်မှာ စေတနာကောင်း ထားတယ်ဆိုတာကောင်း ထားတယ်ဆိုတာ ပေါ်လွင်ပါတယ်။ ကျနော်တို့ လက်ခံပါတယ်၊ သူပြောထားတဲ့အဆင့်နဲ့ ဒီနေ့ ကြုံတွေ့နေရတဲ့ ငြိမ်းချမ်းရေး ဖြစ်စဉ်အနေအထားအရ ကတော့ သူပြောတာနဲ့ကတော့ တထက်တည်း ဖြစ်နေပါတယ်။ မနေ့ကလည်း ကျနော်တို့ရဲ့ ဆွေးနွေးပွဲတွေဟာ အများကြီးကို ပွင့်လင်းတယ်၊ မြင်သာတယ်၊ နောက်ပြီးတော့ တန်းတူရှိတယ်ဆိုတာကိုလည်း သမ္မတကြီးကို ကျနော် တင်ပြခဲ့ပါတယ်။ ဒါတွေက လုံးဝ တန်းတူဖြစ်တယ် ဆိုတဲ့အကြောင်းပေါ့နော်။”
KNU အထွေထွေ အတွင်းရေးမှူး နော်စီဖိုးရာစိန် နဲ့ KNLA စစ်ဦးစီးချုပ် ဗိုလ်ချုပ်ကြီး မူတူးစေးဖိုး တို့ ဦးဆောင်တဲ့ ကိုယ်စားလှယ်အဖွဲ့ဟာ ဧပြီလ ၆ ရက် သောကြာနေ့က မြန်မာအစိုးရရဲ့ ပြည်ထောင်စုအဆင့် ငြိမ်းချမ်းရေး ကိုယ်စားလှယ်အဖွဲ့တွေနဲ့ ရန်ကုန်မှာ တွေ့ဆုံဆွေးနွေး ခဲ့ကြပြီး ငြိမ်းချမ်းရေးမှာ အဓိက ကျတဲ့ အချက် ၆ ချက်နဲ့ပတ်သက်ပြီး မှတ်တမ်းတင် လက်မှတ်ရေးထိုးနိုင်ခဲ့ကြပါတယ်။ ဒီအချက်တွေထဲမှာ ကြောက်ရွံ့ မှုကင်းတဲ့ ပြည်သူလူထုရဲ့ ဘ၀ကို ဖန်တီးပေးဖို့နဲ့ လူထုကို အကျိုးရှိစေမယ့် ငြိမ်းချမ်းရေးမျိုးကို ဆက်လက် အကောင်အထည် ဖော်သွားဖို့တွေ ပါဝင်ပါတယ်။
အခုလို မြန်မာအစိုးရရဲ့ ငြိမ်းချမ်းရေး ကိုယ်စားလှယ်အဖွဲ့တွေနဲ့ KNU အကြား ငြိမ်းချမ်းရေး ဆွေးနွေးမှုတွေအပေါ် KNU အနေနဲ့ အားရကျေနပ်မှု ရှိပြီး နှစ်ပေါင်း ၆၀ ကျော်ကာလအတွင်းမှာ ပထမဆုံးအကြိမ် တန်းတူရည်တူ ဆွေးနွေးပြောဆိုတာမျိုးကို တွေ့ခဲ့ရတယ်လို့လည်း သူက ပြောပါတယ်။ ဒါပေမဲ့လည်း စစ်မှန်တဲ့ ထာဝရငြိမ်းချမ်းရေး ရဖို့ကတော့ အဆင့်တွေ ကျန်သေးတယ်လို့ KNU ငြိမ်းချမ်းရေး ကိုယ်စားလှယ်အဖွဲ့ဝင် စောသာဒိုမူး က ပြောပါတယ်။
“ငြိမ်းချမ်းရေး လို့တော့ ကျနော်တို့ မပြောချင်ပါဘူး။ ငြိမ်းချမ်းရေး ဆိုတာ အဆင့်တိုင်း တဆင့်စီ လှမ်းသွားဖို့လိုပါတယ်။ ကျနော်တို့ ငြိမ်းချမ်းတယ် ဆိုတာကတော့ အဓိပ္ပါယ် ဖွင့်ဆိုချက်တွေ ကွာလိမ့်မယ်ပေါ့။ ဒါပေမဲ့ ကျနော်တို့ကတော့ တဆင့်ချင်းတဆင့်ချင်းနဲ့ လူထုတွေရဲ့ ပြဿနာတွေ ဖြေရှင်းရမယ်၊ တဘက်နဲ့တဘက် ရန်လိုတဲ့ အပြုအမူတွေ လျော့ပါးသွားမယ်။ နောက်ဆုံး တိုက်ခိုက်မှုတွေ လုံးဝ ရပ်သွားမယ်။ အဲဒါတွေကို တဆင့်စီ ကျနော်တို့ သွားဖို့ရှိပါတယ်။ ကျနော်တို့ ဒီလိုအဆင့်မျိုး တခါမှ မရောက်ဖူးတော့လည်း ကျနော်တို့ ဘယ်အဆင့်မှန်းတော့ ခန့်မှန်းလို့ မတတ်ဘူးပေါ့နော်။ တန်းတူရည်တူနဲ့ ဆွေးနွေးပိုင်ခွင့်သာ ကျနော်တို့ ၆၃ နှစ်မှာ ဒီတခါပဲ ရဖူးသေးတာကိုး။”
KNU ငြိမ်းချမ်းရေးကိုယ်စားလှယ် အဖွဲ့ဝင် စောသာဒိုမူး ဖြစ်ပါတယ်။ KNU ငြိမ်းချမ်းရေး ကိုယ်စားလှယ် အဖွဲ့ဟာ သမ္မတ ဦးသိန်းစိန်နဲ့ တွေ့ဆုံခဲ့ပြီးနောက် ညနေပိုင်းမှာ ရန်ကုန်ကို ပြန်လည် ထွက်ခွာခဲ့ကြပြီး တနင်္ဂနွေနေ့မှာတော့ မြန်မာ့ဒီမိုကရေစီခေါင်းဆောင် ဒေါ်အောင်ဆန်း စုကြည်နဲ့လည်း တွေ့ဆုံဖို့ စီစဉ်ထား သလို ရန်ကုန်မှာရှိတဲ့ ကရင်အသိုင်းအ၀ိုင်း ခေါင်းဆောင်တွေနဲ့လည်း တွေ့ဆုံဖို့ ရှိပါတယ်။ ဒါ့အပြင် တနင်္လာနေ့မှာတော့ ပဲခူးတိုင်း ကျောက်ကြီးမြို့နယ်မှာရှိတဲ့ IDP ကရင်ဒုက္ခသည် ၂ ထောင်ကျော်ရဲ့ အခြေအနေတွေကိုလည်း သွားရောက် လေ့လာကြမှာ ဖြစ်ပါတယ်။ အဲ့ဒီနောက် ပဲခူးတိုင်းဒေသကြီး ၀န်ကြီးချုပ် အပါအ၀င် တောင်ပိုင်းတိုင်း စစ်ဌာနချုပ်က အရာရှိတွေနဲ့ အင်္ဂါနေ့မနက်ပိုင်းမှာ ဆက်လက် တွေ့ဆုံဖို့ရှိပြီး အဲ့ဒီဒေသတွင်းမှာရှိတဲ့ အစိုးရတပ်တွေနဲ့ KNLA တပ်တွေရဲ့ လှုပ်ရှားမှု အခြေအနေတွေ အကြောင်း ဆွေးနွေး ပြောဆိုကြဖို့ရှိတယ်လို့ KNU ငြိမ်းချမ်းရေး ကိုယ်စားလှယ်အဖွဲ့ဝင် စောသာဒိုမူး က ရှင်းပြခဲ့ပါတယ်။
KNU အဖွဲ့ဟာ မြန်မာအစိုးရ အဆက်ဆက်ကို ၆၃ နှစ်ကြာ တော်လှန်လာခဲ့တဲ့ အဖွဲ့ဖြစ်ပါတယ်။ ပြီးခဲ့တဲ့ ဇန်န၀ါရီလ ၁၂ ရက်နေ့ကပဲ ကရင်ပြည်နယ် ဘားအံမြို့မှာ KNU ငြိမ်းချမ်းရေးကိုယ်စားလှယ်အဖွဲ့နဲ့ မြန်မာအစိုးရ ငြိမ်းချမ်းရေးကိုယ်စားလှယ်အဖွဲ့ဟာ ပြည်နယ်အဆင့်နဲ့ တခါ - ပြည်ထောင်စုအဆင့် ဆက်လက်ဆွေးနွေးဖို့အတွက် တခါ ၂ ပိုင်းခွဲ လက်မှတ်ရေးထိုးခဲ့ကြတာဖြစ်ပါတယ်။
ယခင် KNU ခေါင်းဆောင်ကြီး ဗိုလ်ချုပ်မြနဲ့ အဲဒီအချိန်က မြန်မာဝန်ကြီးချုပ်အဖြစ် တာဝန်ယူထားတဲ့ ဗိုလ်ချုပ်ကြီး ခင်ညွန်တို့ဟာ ၂၀၀၄ ခုနှစ် ဇန်န၀ါရီလဆန်းမှာ ငြိမ်းချမ်းရေးဆွေးနွေးဖို့အတွက် ရန်ကုန်မှာ တွေ့ဆုံတဲ့အထိ သမိုင်းဝင်ဖြစ်ခဲ့ဖူးပါတယ်။ ဒါပေမဲ့လည်း ၂ ဘက်အကြား အပစ်အခတ် ရပ်စဲထားဖို့သာ ယာယီအားဖြင့် သဘောတူညီနိုင်ခဲ့ပြီး အခုလို လက်မှတ်ရေးထိုးနိုင်တဲ့အဆင့်အထိတော့ အောင်မြင်မှု မရှိခဲ့ပါဘူး။
လက်ရှိ သမ္မတ ဦးသိန်းစိန်အစိုးရ လက်ထက်မှာ KNU နဲ့ ငြိမ်းချမ်းရေးဆွေးနွေးမှုတွေမှာ လက်မှတ်ရေးထိုးနိုင်ခဲ့တာကတော့ နှစ်ပေါင်း ၆၀ ကျော်ကာလအတွင်း ပထမဆုံးလည်းဖြစ်ခဲ့ပါတယ်ရှင်။
Derek Mitchell သံအမတ်ဖြစ်လာနိုင်မှုအပေါ် HRW ထောက်ခံ
By ဝင်းမင်း
- အမေရိကန်ရဲ့အထူးအာဏာကုန်လွှဲအပ်ခံရတဲ့ မြန်မာနိုင်ငံဆိုင်ရာ သံအမတ်ကြီးအဖြစ်နဲ့ လက်ရှိ အမေရိကန်ဆိုင်ရာ မြန်မာနိုင်ငံအထူး ကိုယ်စားလှယ် ဒဲရက်၊ မစ်ချဲလ်ကို ခန့်အပ်ဖို့ အိမ်ဖြူတော်က အဆိုပြုထားတယ်လို့ အမေရိကန်အသိုင်းအဝိုင်းထဲမှာ သတင်းထွက်နေပါတယ်။ ဒီလိုသတင်းထွက်နေတဲ့အချိန်မှာပဲ တကယ်လို့ မစ္စတာ ဒဲရက်မစ်ချဲလ်သာ သံအမတ်ကြီးဖြစ်လာခဲ့မယ် ဆိုရင် အမေရိကန် အစိုးရနဲ့ မြန်မာအစိုးရတို့ကြားမှာ သာမကဘဲ မြန်မာ့နိုင်ငံရေးအဖွဲ့တွေနဲ့လည်း ပိုပြီးတော့ ထိရောက်ကောင်းမွန်တဲ့ဆက်ဆံရေးမျိုး ရလာနိုင်တယ်လို့ လူ့အခွင့်အရေးကိစ္စဆောင်ရွက်နေတဲ့ HRW အဖွဲ့က ပြောလိုက်ပါတယ်။ ဒီအကြောင်းအပြည့်အစုံကိုတော့ ဆက်သွယ်မေးမြန်းထားတဲ့ ကိုဝင်းမင်းက တင်ပြပေးထားပါတယ်။
အခုလို အိမ်ဖြူတော်နဲ့နီးစပ်တဲ့ အမေရိကန်သံတမန်တွေကြားမှာ မစ္စတာမစ်ချဲလ်ကို အမေရိကန် ဆိုင်ရာ မြန်မာသံအမတ်ကြီးအဖြစ် အဆိုပြုလိုက်ကြောင်း ပြောနေကြတာကို ခိုင်လုံတဲ့သတင်းရပ်ကွက် တစ်ခုဖြစ်တဲ့ Foreign Policy မဂ္ဂဇင်းရဲ့ အင်တာနက်စာမျက်နှာ ပေါ်မှာ ကြာသာပတေးနေ့က ဖော်ပြလိုက် တာပါ။ အမေရိကန်နိုင်ငံရဲ့ မြန်မာနိုင်ငံအထူးကိုယ်စားလှယ် အဖြစ် ဧပြီလမှာ အခန့်မခံရခင် ကာကွယ်ရေး ဆိုင်ရာ ဒုလက်ထောက် နိုင်ငံခြားရေးဝန်ကြီးဖြစ်ခဲ့တဲ့ အာရှရေးရာ ကျွမ်းကျင်သူ ဒဲရက် မစ်ချဲလ်ကို ခန့်အပ်ဖို့ အဆိုပြုတယ်လို့ ဖြစ်လာတဲ့သတင်းဟာ ကောင်းမွန်တဲ့သတင်းဖြစ်တယ်လို့ Human Rights Watch လူ့အခွင့်အရေး လေ့လာစောင့်ကြည့်ရေးအဖွဲ့က ဝါရှင်တန်ဆိုင်ရာ ဒါရိုက်တာ Tom Malinowski က ဆိုလိုက်ပါတယ်။
“ဒဲရက်အနေနဲ့ အခုလို အဆိုပြုခံရကောင်း ခံရနိုင်တယ်လို့ကြားရလို့ ကျနော်အရမ်းဝမ်းသာပါတယ်။ ကျနော် ထင်ပါတယ်။သူ့ရဲ့နိုင်ငံခြားရေးဝန်ကြီးဌာန လက်ရှိတာဝန်မှာ သူက ထူးထူး ချွန်ချွန် ပြောင်ပြောင် မြောက်မြောက်တာဝန်ထမ်းဆောင်တဲ့သူပါ။ သူ့အနေနဲ့ မြန်မာပြည် အကြောင်းကို ကောင်းကောင်း သိထားပြီးတော့ မြန်မာပြည်အပေါ်မှာလည်း အများကြီးကို ဂရုစိုက်၊ အလေးထားပါတယ်။ သူက ချင့်ချိန် ဆုံးဖြတ်နိုင်စွမ်း တကယ့်ကို ကောင်းမွန်ပြီးတော့ မြန်မာအစိုးရနဲ့ရော NLD အမျိုးသားဒီမိုကရေစီအဖွဲ့ချုပ်နဲ့ပါ အရမ်းကို ကောင်းမွန်တဲ့ ဆက်ဆံရေးကို တည်ဆောက်ထားနိုင်ပါတယ်။”
သံအမတ်ကြီးအဆင့် မြန်မာနိုင်ငံမှာ တိုးမြှင့်ပေးဖို့ကိုတော့ ပြီးခဲ့တဲ့ဇန်နဝါရီလက မြန်မာနိုင်ငံမှာ နိုင်ငံရေး အကျဉ်းသားတွေ လွတ်မြောက်လာ အပြီးမှာ နိုင်ငံခြားရေးဝန်ကြီး ဟီလာရီကလင်တန်က ကြေညာခဲ့တာပါ။ Foreign Policy အင်တာနက်စာမျက်နှာပေါ်မှာ နိုင်ငံခြားရေးဝန်ကြီးကလင်တန်က အခုလောလော ဆယ်တော့ အခုလို ဘယ်သူ့ကို ခန့်မယ်ဆိုတာကို မြန်မာအစိုးရနဲ့အသိပေး ညှိနှိုင်းနေရတဲ့အဆင့်မှာပဲ ရှိနေသေးတယ်လို့ ဆိုပါတယ်။ ဒါပေမယ့် အခုလို ညှိနှိုင်းတာက ထုံးစံအရသာ လုပ်ရတာဖြစ်ပြီး မြန်မာအစိုးရဘက်ကလည်း ဒဲရက် မစ်ချဲလ်ကိုဆိုရင် လက်ခံဖို့များတယ်လို့ Tom Malinowski က သုံးသပ်ပြလိုက်ပြီး အခုလို အကြောင်းပြချက်ပေးပါတယ်။
“ဒဲရက် အနေနဲ့က မြန်မာအစိုးရနဲ့ဆက်ဆံလာတာ လပေါင်းများစွာ ချီလာပါပြီ။ သူတို့ကြားမှာ ကောင်းမွန်တဲ့ဆက်ဆံရေးတစ်ခု တည်ဆောက် ထားနိုင်ပါပြီ။ ဒါ့အပြင် ဒဲရက်ဟာ အမေရိကန်အစိုးရထဲမှာ အလန်အဆင့်မြင့်တဲ့ အရာရှိတစ်ဦးဖြစ်တယ်ဆိုတာ မြန်မာအစိုးရဘက်က သိပါတယ်။ ပြီးတော့ အခုလို သံတမန်ခန့်ဖို့ ဖြစ်လာတာက အမေရိကန်ပြည်ထောင်စု အနေနဲ့ မြန်မာနိုင်ငံနဲ့ ထိတွေ့ဆက်ဆံမှုကို နောက်ထပ် တိုးမြှင့်လုပ်ဆောင်သွားမယ်ဆိုတာ ပြလိုက်တာဖြစ်ပါတယ်။”
အမေရိကန် နိုင်ငံရေးစံနစ်အရ အခုလို အဆိုပြုထားတဲ့အပေါ် လွှတ်တော်ဘက်က အတည်ပြုပေးတာ ကို စောင့်ရအုံးမှာ ဖြစ်ပါတယ်။ ဒီနေရာမှာလည်း မစ္စတာ Malinowski က ဒိအတွက် သူစိတ်မပူဘူး၊ ဘာ့ကြောင့်လဲဆိုတော့ လွှတ်တော်ဘက်ကလည်း ဒဲရက်မစ်ချဲလ် လုပ်နေတာတွေကို အသိအမှတ်ပြု ထောက်ခံထားပြီးသားမို့ ဖြစ်တယ်လို့ ဆိုပါတယ်။ ဒါ့အပြင် မစ္စတာ မာလ်လဲန်နိုးစကီးကပဲ လက်ရှိမြန်မာအထူးကိုယ်စားလှယ်တာဝန်ကို ဝါရှင်တန်ကနေ ထမ်းဆောင်တာနဲ့ နောက်ပိုင်းမှာ မြန်မာနိုင်ငံ ထဲမှာ သံအမတ်ကြီးအဖြစ် တာဝန်ထမ်းဆောင်ရမယ့် ဒီတာဝန်နှစ်ခုလုံးက အရေးကြီးပေမယ့် မြန်မာနိုင်ငံ ထဲမှာ ထိုင်ပြီးသွားလုပ်ရမယ့်တာဝန်က နောက်ပိုင်းမှာ ပိုအရေးပါလာလိမ့်မယ်လို့ ဆိုပါတယ်။ အဲဒီတော့ ဘာ့ကြောင့်အခုလို ပြောနိုင်တာပါလဲလို့ မေးကြည့်ရာ မှာတော့ မစ္စတာ မာလ်လဲန်နိုးစကီးကပဲ အရင် အမေရိကန်အစိုးရကို နားမထောင်ချင်ခဲ့တဲ့ မြန်မာ အစိုးရဟာ အခုတော့ နားထောင်ချင်လာတာအပြင် အခြားအချက်တွေလည်းရှိတယ်လို့ အခုလို ဆက် ရှင်းပြပါတယ်။
“နိုင်ငံခြားရေးဝန်ကြီးဌာနမှာ ဟီလာရီကလင်တန်ကို နားပေါက်အောင်ပြောနိုင်မယ့်သူ၊ နောက် သမ္မတ အိုဘားမားအစိုးရအပေါ်မှာ သြဇာ သက်ရောက်မှုကြီးမားတဲ့သူတစ်ဦး ရန်ကုန်မှာ ရှိလာမှာဖြစ်ပါတယ်။ အခုဖြစ်လာတာက မြန်မာနိုင်ငံအတွက်လည်း ကောင်းပါတယ်။ NLD အတွက်လည်းကောင်းပါလိမ့်မယ်။”
ဒါ့အပြင် သံအမတ်ကြီး မစ်ချဲလ်အနေနဲ့ မြန်မာနိုင်ငံထဲက လူထုအဖွဲ့အစည်းတွေနဲ့ ပိုတွေ့ပြီး မြန်မာနိုင်ငံ တဝှမ်းကိုလည်း ခရီးသွားပြီး မြန်မာ နိုင်ငံတခုလုံးမှာ ဖြစ်နေတဲ့ တိုးတက်မှုအခြေအနေတွေ စစ်မှန်မှုရှိမရှိကို လာမယ့် သုံးနှစ်အတွင်းမှာ အနီးကပ်လေ့လာ စောင့်ကြည့်သွား နိုင်မှာဖြစ်တယ်လို့ မစ္စတာ မာလဲန်နိုး စကီးက ဆက်ပြောပါတယ်။ တကယ်တော့ မြန်မာနိုင်ငံအနေနဲ့ တရုတ်နိုင်ငံရဲ့ အင်အားကြီးမားလာမှုကို ထိန်းကျောင်းပေးနိုင်ဖို့ အာရှ-ပစိဖိတ်ဒေသမှာ အာရုံပြန်စိုက်ဖို့ ပြင်ဆင်လာချိန်မှာ မြန်မာနိုင်ငံဘက်က လည်း တရုတ်လွှမ်းမိုးမှုကို လျှော့ချပြီး ပြုပြင်ပြောင်းလဲရေးတွေလုပ်ကာ အနောက်နိုင်ငံတွေနဲ့ ဆက်ဆံရေး ပြန်လည်တည်ဆောက်ဖို့ ကြိုးပမ်းချိန်မှာ အခုလို အမေရိကန်-မြန်မာ ပုံမှန် သံတမန် ဆက်ဆံရေးအတွက် သံအမတ်ကြီးအဆင့်ပြန်ခန့်အပ်ဖို့ ဖြစ်လာတာဖြစ်ပါတယ်။
သမ္မတ ဦးသိန်းစိန်နဲ့ တွေ့ဆုံမှုဟာ နွေးထွေးတဲ့ တွေ့ဆုံမှုလို့ KNU ပြောKNU နဲ့ သမ္မတ ဦးသိန်းစိန် တွေ့ဆုံ
အစိုးရနဲ့ ငြိမ်းချမ်းရေး ဆွေးနွေးဖို့ ရန်ကုန်မြို့မှာ ရောက်ရှိနေတဲ့ KNU ကရင် အမျိုးသား အစည်းအရုံး ငြိမ်းချမ်းရေး ကိုယ်စားလှယ် အဖွဲ့ဟာ စနေနေ့ မနက်က သမ္မတ ဦးသိန်းစိန်နဲ့ နေပြည်တော်မှာ အလွတ်သဘော တနာရီခွဲကျော် လောက် တွေ့ဆုံခဲ့ပါတယ်။
သမ္မတ ဦးသိန်းစိန်က အချိန်မရှိတဲ့ကြားက KNU ကိုယ်စားလှယ်အဖွဲ့ကို တွေ့ချင်လွန်းလို့ တက်သုတ်ရိုက် စီစဉ်လိုက်တာ ဖြစ်တယ်လို့ KNU ငြိမ်းချမ်းရေး ကိုယ်စားလှယ် ပြောခွင့်ရ အမျိုးသမီး နော်မေဦးက ဘီဘီစီကို ပြောပြပါတယ်။
သမ္မတ ဦးသိန်းစိန်ဖက်က နိုင်ငံတော် အစိုးရရဲ့ ငြိမ်းချမ်းရေး အကောင်အထည် ဖေါ်ရေး ဖြစ်စဉ်တွေနဲ့ မြန်မာနိုင်ငံမှာ ဒီမိုကရေစီ ပြောင်းလဲမှုတွေ ရှိလာဖို့ တဆင့်စီ ဘယ်လို ပုံဖေါ် ဆောင်ရွက်နေသလဲ ဆိုတာတွေကို စိတ်ရှည်လက်ရှည် ရှင်းပြခဲ့တယ်လို့ ဆိုပါတယ်။
KNU ဖက်ကလည်း ငြိမ်းချမ်းရေး အကောင်အထည် ဖေါ် ဆောင်ရွက်ဖို့ ချမှတ်ထားတဲ့ အဆင့်ကြီး ၄ဆင့်အတိုင်း လာရောက် ဆွေးနွေးတာ ဖြစ်တဲ့ အကြောင်းနဲ့ ရပ်တည်ချက် သဘောထားတွေကို အနည်းအကျဉ်း ရှင်းပြခဲ့ကြောင်း၊ ဒါပေမယ့် အဓိကအားဖြင့် သမ္မတ ဦးသိန်းစိန်နဲ့ တွေ့ဆုံပြီး နိုင်ငံတော် အစိုးရရဲ့ အစီအစဉ်တွေကို သွားလေ့လာတာ ဖြစ်ကြောင်း နော်မေဦးက ပြောပါတယ်။
ဒါ့အပြင် KNU ဟာ တရားမဝင် အသင်းအဖွဲ့ ဖြစ်နေဆဲ ဖြစ်တာမို့ တရားဝင် နိုင်ငံရေးပါတီ ဖွဲ့ပြီး ဥပဒေရဲ့ လမ်းညွှန်မှု စည်းမျဉ်းအတိုင်း စဉ်းစား လုပ်ဆောင်သွားဖို့ သမ္မတ ဦးသိန်းစိန် က ဆွေးနွေး ပြောဆိုခဲ့တယ်လို့ ဆိုပါတယ်။
KNU အနေနဲ့ကတော့ မြန်မာ့နိုင်ငံရေးမှာ ကရင် အမျိုးသားရေးကို ဦးစားပေး လုပ်ဆောင်ဖို့ အတွက် ချက်ချင်း နိုင်ငံရေး ပါတီ ဖွဲ့ပြီး ရွေးကောက်ပွဲ ဝင်တာမျိုးထက် ဆင့်ကဲ ဆင့်ကဲ အကောင်အထည်ဖေါ် လုပ်ဆောင်သွားဖို့ ရှိတယ်လို့ KNU ငြိမ်းချမ်းရေး ကိုယ်စားလှယ် အဖွဲ့ ပြောခွင့်ရ အမျိုးသမီး နော်မေဦးက ပြောပါတယ်။
KNU ငြိမ်းချမ်းရေး ကိုယ်စားလှယ် အဖွဲ့ဟာ သောကြာနေ့တုန်းက ပြည်ထောင်စု အဆင့် အစိုးရ ငြိမ်းချမ်းရေး ဖော်ဆောင်ရေး အဖွဲ့နဲ့တွေ့ဆုံ ဆွေးနွေးခဲ့ပြီး သဘောတူ ဆုံးဖြတ်ချက် တချို့ ချမှတ် နိုင်ခဲ့ပါတယ်။
စနေနေ့ ညနေပိုင်းမှာတော့ ရန်ကုန်မြို့မှာ ရှိတဲ့ တိုင်းရင်းသား အဖွဲ့တွေနဲ့ KNU ငြိမ်းချမ်းရေး ကိုယ်စားလှယ် အဖွဲ့ တွေ့ဆုံခဲ့ကြရာမှာ တိုင်းရင်းသား ခေါင်းဆောင် ၃၀လောက် တက်ရောက် ခဲ့ကြတယ်လို့ သိရပါတယ်။
0 comments:
Post a Comment