သူ့စည်း ကိုယ့်စည်း

Aung Lat

ကျွန်မအိမ်အနီးက မီးပွိုင့်ကလေးမှာ တနေ့တုန်းက ယာဉ်တိုက်မှု တခုဖြစ်ပါတယ်။ အလုပ်က အပြန်မှာ ကားလမ်းပိတ်ထားတာကြောင့် ဘာများဖြစ်လဲလို့ အနီးအနားက လူတွေကို မေးမြန်းကြည့်တော့မှ ယာဉ်တိုက်မှုဆိုတာ သိရတာပါ။ ဆိုင်ကယ်နဲ့ လူက ပွဲချင်းပြီး သေဆုံးသွားပြီး၊ ကားမောင်းသူကတော့ ဆေးရုံကို အရေးပေါ်ကားနဲ့ ခေါ်သွားခဲ့ရပါတယ်။ မီးပွိုင့်မှာ ဆိုင်ကယ်က မရပ်တာလား၊ ကားက မရပ်တာလား၊ တဘက်ရဲ့ အမှားလား၊ နှစ်ဘက်စလုံးရဲ့ အမှားလားဆိုတာကို တာဝန်ရှိသူတွေက ပြန်လည်စုံစမ်းနေကြဆဲပါပဲ။ သို့ပေမယ့် သေချာတာကတော့ လူတယောက်ရဲ့ အသက်ဆုံးရှုံး သွားခဲ့ပါပြီ။ လူတယောက် ဆေးရုံရောက်သွားခဲ့ပါပြီ။

ဒီအဖြစ်လေးက ကျွန်မရဲ့ လူငယ်ဘ၀ကို ပြန်ပြီး အမှတ်တရ ဖြစ်စေပါတယ်။ ကျွန်မ ဆယ်ကျော်သက် လူငယ်ဘ၀တုန်းကလဲ အတော်ကားမောင်းကြမ်းတာကလား။ တောင်ကြီး- ဟဲဟိုးကားလမ်းမှာ ရှေ့က ကျော်တက်သွားတဲ့ ကားကို နောက်ကနေ အတင်းလိုက်ပြန်ကျော်တက်တာ ကံကောင်းလို့ ကားရော၊ လူပါ ချောက်ထဲ မကျခဲ့တာပါ။ တခါ ဟန်မြင့်မိုရ်- ရွာငံလမ်းမှာလဲ ဘေးမှာပါလာတဲ့ ကားဒရိုင်ဘာ ဦးလေးကြီးက Handbrake ဆွဲတာ မြန်ပေလို့။ အဲဒါလဲ ဖြစ်ပြီးရော၊ အဲဒီ ကားဆရာကြီးလဲ အလုပ်က ထွက်သွားပါလေရော။ သူ့ကို မမောင်းခိုင်းပဲ ကျွန်မက ယူမောင်းနေတော့ တခုခုဖြစ်ရင် သူ့တာဝန် မကင်းဖြစ်မှာ ကြောက်တယ် ထင်ပါရဲ့။

အဲလို ဟိုင်းဝေး မဟုတ်တဲ့ မြို့တွင်းလမ်းတွေမှာလဲ ဟိုထိ၊ ဒီထိ၊ ဟိုချိတ်မိ၊ ဒီချိတ်မိတွေ ရှိသေးရဲ့။ ရှိဆို၊ တခုခုဖြစ်ရင်လဲ မေမေ့မိတ်ဆွေ ဆရာဝန်တွေဆီ အလွယ်တကူ ခေါ်သွားလို့ ရတာက တကြောင်း၊ ကားဝပ်ရှော့တွေဆီ အချိန်မရွေး ကားသွားထိုးလိုက်လို့ ရတာက တကြောင်း၊ ပြန်ပြင်လိုက်တို့လိုက် လုပ်ပြီးရင် အမြန်ရောင်းထွက်အောင် လုပ်ပေးနိုင်မယ့် ကားပွဲစားတွေကလဲ များတာကတကြောင်း၊ ဖွားဖွားနဲ့ မေမေတို့က နာရီမဆိုင်းပဲ အလျော်အစား လိုက်လုပ်ပေးတာက တကြောင်းကြောင့် ကျွန်မမှာလဲ လူငယ်စိတ်နဲ့ ကိုယ်မှန်တယ်ထင်ရင် ဘယ်သူ့မှ လှည့်မကြည့်ပဲ ရမ်းနေတော့တာပါပဲ။ နောက်ဆုံးမတော့ အသက်ရှစ်ဆယ်ကျော် ဖွားအေကြီးကို ကားနောက်ခန်းမှာတင်ပြီး၊ အရှိန်နည်းနည်း လွန်သွားတဲ့အဆုံး မေမေက ရန်ကုန်ခဏပို့ထားလိုက်မှ အရှိန်ပြန်သေသွားပါတယ်။ ရန်ကုန်မှာကျတော့ ကိုယ့်နယ်မြို့လေးလို အလွယ်တကူ resource mobilization လုပ်လို့ မရတာကြောင့်ပါ။

ဒီလိုနဲ့ နိုင်ငံရပ်ခြားရောက်လာချိန်မှာတော့ ကားလုံးဝ မမောင်းဖြစ်တော့ပါဘူး။ ဖွားဖွားက ကတိနှစ်ခု တောင်းခဲ့ပါတယ်။ ပထမ ကတိက နိုင်ငံရေးနဲ့ လုံးဝ မပတ်သက်ပါဘူးဆိုတဲ့ ကတိ၊ ဒုတိယကတိက ကားလုံးဝ မမောင်းပါဘူးဆိုတဲ့ ကတိပါ။ ပထမကတိကိုတော့ ဘာမှ ပြန်မပြောပဲ၊ ဒုတိယကတိကိုတော့ အသက်အန္တရာယ်ဘေးနဲ့ ကြုံတဲ့အချိန် မဟုတ်ဘူးဆိုရင် တည်နိုင်အောင် ကြိုးစားပါမယ်လို့ ပြောခဲ့ဖူးပါတယ်။ ဒါကြောင့် ယူကေ ရောက်လာချိန်မှာ ကားလုံးဝ မမောင်းဖြစ်ခဲ့ပါ။

သို့ပေမယ့် မိတ်ဆွေသူငယ်ချင်းတွေနဲ့တော့ ခရီးရှည်တွေ ထွက်ခဲ့ဖူးပါတယ်။ အဲဒီမှာ တခုသတိထားမိသွားတာက မော်တော်ဝေး (Motorway) ပေါ်မှာ ကားတွေဟာ အမြန်နှုန်းနဲ့ မောင်းတဲ့ကားတွေကလဲ သူ့လမ်းနဲ့သူ၊ သာမန်နှုန်းနဲ့ မောင်းတဲ့ကားတွေကလဲ သူ့လမ်းနဲ့သူ၊ အမြန်နှုန်းကနေ သာမန်နှုန်းပေါ် ပြောင်းတဲ့ ကားတွေကလဲ သူ့စည်းကမ်းနဲ့သူ၊ သာမန်နှုန်းကနေ အမြန်နှုန်းကို ပြောင်းတဲ့ကားတွေကလဲ သူ့စည်းနဲ့သူ ဖြစ်နေတယ်ဆိုတာပါပဲ။ အရှိန်မြန်ချင်တဲ့ကားက အရှိန်နှေးတဲ့ကားကို နှေးရပါမလားလို့ ဟွန်းတီးပြီး အတင်းကျော်တက်နေစရာလဲမလို၊ အရှိန်နှေးတဲ့ ကားကလဲ နောက်ကနေ ဟွန်းတီးနေလိုက်ကြတာ၊ ဘာလို့များ ဒီလောက်မြန်ချင် နေကြပါလိမ့်လို့ စိတ်အနှောင့်အယှက်ဖြစ်စရာလဲ မလိုပဲ သူ့စည်းကမ်းနဲ့သူ လမ်းအပြောင်းအရွှေ့လေးတွေ လုပ်သွားကြရုံပါပဲ။

ဒီလိုပါပဲ။ မြို့တွင်းလမ်းတွေမှာလဲ လမ်းလျှောက်သူတွေက သူ့ဘာသာသူ ပလက်ဖောင်းပေါ်မှာ၊ စက်ဘီးစီးသူကလဲ သူ့ဘာသာသူ စက်ဘီးလမ်းပေါ်မှာ၊ လူသွားလမ်းပေါ်တက်လာရင်လဲ အရှိန်လျှော့ပြီး သတိထားလို့၊ ကားတွေကလဲ သူ့စည်းကမ်းနဲ့သူ ဥဒဟို ဖြတ်သန်းသွားလာကြပါတယ်။ ကားတွေက မီးပွိုင့်ကျော်မောင်းလိုက်တာတို့၊ လူတွေက တောင်ပြေးမြောက်ပြေးလုပ်တာတို့က အတော်ရှားပါတယ်။ လူငယ်တွေသဘာဝ သောက်စားပြီး ယာဉ်အန္တရာယ်ဖြစ်တတ်တာတွေကိုတော့ ဥပဒေနဲ့ ထိန်းချုပ်ထား ပါတယ်။ မူးယစ်သေစာသောက်စားထားမှု သတ်မှတ်ချက်တခုထက် ကျော်တဲ့အခါ ကားမောင်းခွင့် မရှိပါဘူး။ အရက်မူးပြီး ကားမောင်းရင် လူငယ်ပဲဖြစ်ဖြစ်၊ ကုမ္ပဏီ ဒါရိုက်တာပဲဖြစ်ဖြစ် သတ်မှတ်ထားတဲ့ ပြစ်ဒဏ်ကို ခံယူရပါတယ်။ ဥပဒေစည်းကမ်းတွေနဲ့ တင်းတင်းကျပ်ကျပ် ထိန်းချုပ်ထားတာကြောင့် စည်းမဲ့ကမ်းမဲ့ စိတ်တိုင်းကျ ကားမောင်းခွင့် မရှိတော့ပါဘူး။

နောက်တခုက လျော်ကြေးကိစ္စတွေ၊ ညှိယူတာတွေကလဲ လုပ်ချင်တိုင်းလုပ်လို့ မရပါဘူး။ ဥပဒေနဲ့အညီ ညှိနှိုင်းတာတွေကိုပဲ လုပ်လို့ရတာကြောင့် လျော်ကြေးလိုချင်လို့ ကားတိုက်ခံ ဂွင်ရိုက်တယ်ဆိုတာတွေ၊ ကားတိုက်ပြီးရင်လဲ လျော်ကြေးပေးလိုက်လို့ ရတာပဲ ဆိုတာတွေ မရှိတော့ပါဘူး။ တရားဥပဒေစိုးမိုးမှုရဲ့ အောက်မှာ အတွေးအခေါ်ဆိုးတွေ၊ စိတ်ရိုင်းတွေ ပျောက်ကွယ်သွားပါတယ်။

ကားပေါ်က လူတွေကလဲ လမ်းပေါ်က လူတွေကို လေးစားသလို၊ လမ်းပေါ်က လူတွေကလဲ ကားပေါ်က လူတွေကို အပြန်အလှန်လေးစားမှု ရှိပြီး၊ သူ့စည်းကိုယ့်စည်းနဲ့ နေကြတာကြောင့် ကားပေါ်က လူတွေက လမ်းပေါ်က လူတွေကို မထေမဲ့မြင်လုပ်တယ်၊ လမ်းပေါ်ကလူတွေက ကားပေါ်က လူတွေကို ကားစီးနိုင်တယ်ဆိုပြီး ဘာဖြစ်တယ်၊ ညာဖြစ်တယ် ဆိုတာမျိုးတွေလဲ ယေဘုယျအားဖြင့် မရှိကြတော့ပါဘူး။ စည်းတွေကို ချိုးဖောက်လာသူ အချို့တော့ ရှိကြပါတယ်။ ဒီအခါမှာလဲ ကိုယ့်အသက်တွေ၊ ခြေလက်အဂါင်္တွေ ပေးဆပ်လိုက်ရတာတွေ၊ ဥပဒေရဲ့ တင်းတင်းကြပ်ကြပ် အဆုံးအမကို ခံယူလိုက်ကြရတာတွေ ရှိလာပါတော့တယ်။

ဘယ်လိုပဲဖြစ်ဖြစ် မီးပွိုင့်မှာမီးနီတဲ့အခါ ယာဉ်ရပ်နားရမယ်ဆိုတဲ့အသိ၊ လမ်းဖြတ်ကူးတဲ့အခါ ဘယ်ညာကြည့်ရမယ်ဆိုတဲ့အသိ၊ အမြန်နှုန်းနဲ့ ကိုယ်က မောင်းချင်ရင် အမြန်လမ်းကြောင်းပေါ်ကို ရှေ့က အနှေးနှုန်းတဲ့ မောင်းနေတဲ့ကားကို အနှောင့်အယှက်မဖြစ်စေပဲ အသာတကြည် ကူးပြောင်းသွားရမယ်ဆိုတဲ့အသိ၊ အနှေးနှုန်းနဲ့ မောင်းနေတဲ့ကားကလဲ အမြန်နှုန်းနဲ့လမ်းပေါ်က ပိတ်ပြီး မမောင်းရဘူးဆိုတဲ့အသိ၊ တရားဥပဒေရဲ့အထက်မှာ ဘယ်သူမှ မရှိစေရပဲ ဥပဒေကို လိုက်နာရမယ် ဆိုတဲ့အသိ၊ ကားမောင်းသူတွေ၊ အနှေးယာဉ်မောင်းသူတွေ၊ လမ်းလျှောက်သူတွေကလဲ သူ့စည်းကိုယ့်စည်းထားပြီး အပြန်အလှန်လေးစားရမယ် ဆိုတဲ့ အသိတွေ ကျယ်ပြန့်လာဖို့ လိုအပ်တယ်လို့တော့ ယူဆမိပါတယ်။ သူ့စည်း၊ ကိုယ့်စည်းရှိပြီး၊ သူ့တာကိုယ်တာ လုံကြတဲ့အခါ မဖြစ်သင့်ပဲဖြစ်ရတဲ့ အသက်ဆုံးရှုံးမှုတွေ၊ ဘ၀ဆုံးရှုံးမှုတွေတော့ လျော့နည်းလာတန်ကောင်းပါရဲ့။

ခင်မမမျိုး (၈၊ ၁၂၊ ၂၀၁၁)