ပါတီမှတ်ပုံတင်ရန်နှင့် ရွေးကောက်ပွဲဝင်ရန် ကန့်ကွက်သူမရှိဆုံးဖြတ်
|
4:34 AM |
No မှတ်ချက် |
by Yangon PressInternational on Friday, November 18, 2011 at 5:05pm
နိုဝင်ဘာ ၁၈၊ ၂၀၁၁ (YPI )
အမျိုးသားဒီမိုကရေစီ
အဖွဲ့ချုပ် (အန်အယ်ဒီ) တွင် ယနေ့ကျင်းပသည့် ပါတီ ပြန်လည်မှတ်ပုံတင်
မတင်နှင့် ရွေးကောက်ပွဲ ၀င်မ၀င် ဆုံးဖြတ်ချက် ချမှတ်သည့် အစည်းအဝေးမှ ပါတီ
မှတ်ပုံပြန်တင်ရန်နှင့် ရွေးကောက်ပွဲ ၀င်ရန် ကန့်ကွက်သူမရှိ
ဆုံးဖြတ်လိုက် သည်။
အန်အယ်ဒီပါတီ ၀င်အများစုက ဒေါ်အောင်ဆန်းစုကြည်၏ ခေါင်းဆောင်မှုအပေါ် ယုံကြည် ထောက်ခံကြောင်း ပြောဆိုကြသည်ကို ကြားသိရသည်။ စည်းဝေးပွဲ အပြီးဆုံးဖြတ်ချက်ကို ဗဟိုအလုပ်အမှုဆောင်အဖွဲ့မှ ကြေညာသည့် အခါ ပါတီဝင်များက “ ဒေါ်စုနောက်ကို လိုက်ကြမယ်” ဟု ကြွေးကြော်ကြသည်။
ယနေ့အစည်းအဝေး သို့တက်ရောက်လာသည့် ဗဟိုဦးစီးအဖွဲ့ဝင်တဦး၈၈ မျိုးဆက်ကျောင်းသား ခေါင်းဆောင် တဦးဖြစ်သည့် ကိုဖြိုးမင်းသိန်းက အန်အယ်ဒီပါတီ မှတ်ပုံတင်ခြင်းနှင့် ရွေးကောက်ပွဲ ၀င်ခြင်းသည် ၂၀၀၈ ခုနှစ် အခြေခံဥပဒေကို ၎င်းတို့ဘာသာ ပြင်ဖို့ တောင်းဆိုခြင်းထက် လွှတ်တော်ထဲ ၀င်ရောက်ကာ ပြင်မည့် နည်းကို ရွေးရခြင်း ဖြစ်သည်ဟု ပြောသည်။
မော်လမြိုင်မြို့မှ ၁၉၉၀ ခုနှစ် ဒီမိုကရေစီနှင့် ငြိမ်းချမ်းရေး အဖွဲ့ဝင်တဦးက “ကျွန်တော်ကတော့ နကိုကတည်းက ရွေးကောက်ပွဲကို လက်ခံတယ်။ အခုဆုံးဖြတ်ချက်မှာ ရွေးကောက်ပွဲ ကြီးကို မ၀င်ပဲ ကြားဖြတ်ရွေးကောက်ပွဲကို ၀င်တာကို တော့နည်းနည်း ဘ၀င်မကျဘူး၊ အခုလိုအခြေအနေမှာ ၂၀၀၈ အခြေခံဥပဒေကိုပြင်ဖို့ တောင်းဆိုပြီးမှ မှတ်ပုံတင်တာ၊ ရွေးကောက်ပွဲဝင်မှာကို ဆုံးဖြတ်သင့်တယ် လို့ထင်တယ် ” ဟု YPI သို့ ပြောသည်။
၎င်းက ဒေါ်အောင်ဆန်းစုကြည် အနေဖြင့် ကြားဖြတ်ရွေးကောက်ပွဲ ၀င်ရောက်ပြီးနောက် လွှတ်တော်ထဲ ရောက်သည့်အခါတွင် ခြစားလျှက်ရှိသည့် အုပ်ချုပ်ရေး ယန္တရားကို ပြင်ဆင်ဖို့ အားပြိုင်ရမည်ဟု သူ့အနေဖြင့် မြင်ကြောင်း၊ အင်အားမမျှသော်လည်း ထောက်ပြနိုင်မည့် အနေအထားတော့ အနည်းဆုံး ရမည်ဟု ထင်မြင်သည်ဟုလည်း ပြောသည်။
အစည်းအဝေး အပြီး ထုတ်ပြန်ကြေညာသည့် ကြေညာချက်တွင် အမျိုးသား ဒီမိုကရေစီအဖွဲ့ချုပ်သည် အမျိုးသားပြန်လည် သင့်မြတ်ရေးကို အစဉ်တစိုက် ကြိုးပမ်းအားထုတ်လျှက်ရှိပြီး အာဃာတ ကင်းစင်သော အထွေထွေ သဟဇာတဖြစ်ရေး၊ ငြိမ်းချမ်းချောမွေ့သောနည်းကို အသုံးချရေး၊ အပြန်အလှန် ပူးပေါင်းဆောင်ရွက်ရေး တို့ကိုလည်း ကိုင်စွဲလျက်ရှိသည်ဟု အစချီကာ ပြည်သူ လူထုနှင့် တကွ ဒီမိုကရေစီလိုလားသော အင်အားစုများကလည်း အန်အယ်ဒီအား နိုင်ငံရေး ပါတီ တစ်ခုအဖြစ် ဆက်လက်ရှင်သန်လိုသော သဘောထားများ ပေါ်ပေါက်နေကြောင်း ကြားသိရသည်ဟု ဖေါ်ပြထားသည်။
လက်ရှိ နိုင်ငံရေး အခြေအနေနှင့် အန်အယ်ဒီပါတီ၏ မူဝါဒ သဘောထားကိုဖေါ်ပြ အထက်ပါအတိုင်း ဖေါ်ပြပြီးနောက်တွင် ယနေ့ အစည်းဝေးသို့ တက်ရောက်လာသည့် ဗဟိုဦးစီး အဖွဲ့ဝင် ၁၀၆ ဦးက အစည်းအဝေး ဆုံးဖြတ်ချက် ၂ ချက်ဖြစ်သည့် “အမျိုးသားဒီမိုကရေစီ အဖွဲ့ချုပ်ကို နိုင်ငံရေး ပါတီများ မှတ်ပုံတင်ခြင်း ဥပဒေနှင့် အညီ မှတ်ပုံတင်မည်” နှင့် “ နောင်လာမည့် ရွေးကောက်ပွဲများတွင် ၀င်ရောက်ယှဉ်ပြိုင် အရွေးခံမည် ” ဆိုသည် ကို ကန့်ကွက်သူမရှိ ချမှတ်လိုက်ကြောင်း မွန်းလွဲ ၁နာရီ ၄၀ မိနစ်ဝန်းကျင်တွင် ဗဟိုအလုပ်အမှုဆောင် အဖွဲ့၏ အထူးကြေညာချက် ၁/၁၁/ ၁၁ ဖြင့် ကြေညာလိုက် သည်။
နံနက်ပိုင်း ပြည်နယ်တိုင်းများမှ ဗဟိုဦးစီးအဖွဲ့ဝင်များက ဆွေးနွေးကြရာတွင် ကချင်ပြည်နယ် မှ ကိုယ်စားလှယ်ကသာ အဆို ၂ ခုအနက် ၁ခုဖြစ်သည့် ကြားဖြတ် ရွေးကောက်ပွဲဝင်မည့် အဆိုကိုကန့်ကွက် ဆွေးနွေးသွားသည်။ ကျန်ပြည်နယ်နှင့်တိုင်းမှ အဖွဲ့ဝင်အများစုက ပါတီမှတ်ပုံ ပြန်တင်ရေး အဆိုနှင့် ရွေးကောက်ပွဲ ၀င်ရေးအဆိုကို ထောက်ခံဆွေးနွေးကြသည်။
အန်အယ်ဒီပါတီသည် ယမန်နှစ် မတ်လဆန်းတွင် ပါတီမှတ်ပုံတင်ခြင်း ဥပဒေ ထွက်ရှိလာပြီးနောက်တွင် ပါတီ မှတ်ပုံပြန်တင်မတင် နှင့်ပတ်သက်၍ မတ်လ ၂၉ ရက်နေ့တွင်စည်းဝေး ဆုံးဖြတ်ခဲ့သည်။ ယင်းအစည်းအဝေးမှ မှတ်ပုံပြန်မတင်ရန် ဆုံးဖြတ်ခဲ့ကြသည်။ ထိုသို့ ဆုံးဖြတ်ပြီး ၁နှစ်ခွဲကျော်အကြာတွင် ယခုလို ပါတီ မှတ်ပုံပြန်တင်ရန် ဆုံးဖြတ်ပြီး ကြားဖြတ်ရွေးကောက်ပွဲနှင့် အတူ နောင်လာမည့် ရွေးကောက်ပွဲများတွင်လည်း ပါဝင်ရန် ဆုံးဖြတ်ခဲ့ခြင်း ဖြစ်သည်။ ။
0 comments:
Post a Comment