စတော့ရှယ်ယာတွေ . . .

by Khin Maung Nyo on Monday, November 14, 2011 at 3:03pm

(၁)
(၁၉၉၆)ခုနှစ်မှာ၊ မြန်မာ့စီးပွားရေးဘဏ်နဲ့ ဂျပန်က၊ ဒိုင်ဝါသုတေသနသိပ္ပံတို့ ပူးပေါင်းပြီး၊ မြန်မာငွေချေးသက်သေခံလက်မှတ် ရောင်းဝယ်ရေး ဗဟိုဌာနဆိုတဲ့ ကုမ္ပဏီလီမိတက်ကို တည်ထောင်ခဲ့တယ်။ ကိုယ်ရေးကိုယ်တာဆန်တဲ့ ကိစ္စတစ်ခုကို ထည့်ပြောရရင်၊ အဲဒီ (၁၉၉၆)ခုနှစ်မှာပဲ၊ ကျွန်တော် ပထမဆုံး ပြည်ပကို ထွက်ဖူးပြီး၊ အမေရိကန်နိုင်ငံက ငွေကြေးနဲ့ ဘဏ်လုပ်ငန်းကို တစ်လတာလောက်၊ လေ့လာရေးခရီးထွက်ခဲ့ဘူးတယ်။ စတော့ဒိုင်တွေရောက်တယ်၊ ဝေါလ်စထရိကို ရောက်တယ်။ အပြန်မှာ “ဝေါစထရိကို ဖြတ်လျှောက်ခြင်း” ဆိုပြီး၊ ဆောင်းပါးတွေရေးတယ်။ လုံးချင်းစာအုပ်တစ်အုပ်ထုတ်ဖို့ စီစဉ်တယ်။ စာမူတွေ ပျောက်သွားတယ်။ အခု (၁၅)နှစ် လောက်ကြာပြီ။ အသက်လဲ အတော်ရလာပြီ။ ဒါပေမယ့်၊ စတော့ရှယ်ယာဈေးကွက်ကတော့ . . .

          (၁၉၉၀) ပြည့်လွန်နှစ်တွေတုံးက၊ အများပိုင်ကုမ္ပဏီ (၃၀)လောက် ရှိခဲ့တယ်။ ဖက်စပ်ကုမ္ပဏီ (၉)ခုကိုတော့၊ (၁၉၉၈)ခုနှစ်မှာ ဖျက်သိမ်းပစ်လိုက်တယ်။ အခု အများပိုင်ကုမ္ပဏီနဲ့ ဖက်စပ် (၁၅)ခုလောက်ရှိတယ်။ ကိုယ့်ဖါသာကိုယ် ရှယ်ယာတွေ ထုတ်ရောင်းကြတယ်။ စတော့ဒိုင်မှာ တင်ပြီးရောင်းတာဆိုလို့၊ သစ်တောဖက်စပ်ရယ်၊ မြန်မာနိုင်ငံသားများဘဏ်ရယ်ပဲ ရှိတယ်။ တကယ်တော့၊ ကိုယ့်ဖါသာကိုယ် ရှယ်ယာရောင်းနေတဲ့ အများပိုင်ကုမ္ပဏီတွေဟာ၊ စတော့ဒိုင်ကနေတဆင့်၊ ရှယ်ယာရောင်းမယ်ဆိုရင်၊ ရောင်းနိုင်တယ်။
          ရှယ်ယာဝယ်ထားကြ၊ ကိုင်ထားကြတဲ့သူတွေ အားလုံးလိုလိုက၊ ရင်းနှီးမြှုပ်နှံမှုတခုလို သဘောထားပြီး ၀ယ်ထားကြတာဖြစ်လို့၊ ပြန်ရောင်းတာမျိုး အတော်ရှားပါးပါတယ်။ ဒီတော့၊ ရှယ်ယာထုတ်ရောင်းတာ ကျယ်ကျယ်ပြန့်ပြန့် မရှိသလို၊ ပြန်ရောင်းကြတာလဲ အတော်လေး ခေတ်မစားတာတွေ့ရပါတယ်။ တဘက်မှာ၊ အများပိုင် ကုမ္ပဏီတွေ နည်းပါးတာ၊ စီးပွားရေးလုပ်ငန်းတွေ၊ ကုမ္ပဏီတွေ၊ လောက်လောက်လားလား မဖွံ့ဖြိုးတာ၊ ရေရှည်ရင်းနှီးမြှုပ်နှံမယ့် အဖွဲ့အစည်းတွေ (ပင်စင်ရံပုံငွေလိုမျိုး) မရှိတာ၊ ဘဏ်ချေးငွေတစ်ခုတည်းလောက်ကိုပဲ အားကိုးအားထားပြုနေကြတာ။ (ဒါတောင် အားမကိုးနိုင်တာတွေက အများကြီးကျန်သေးတယ်။)
          ငွေချေးစာချုပ်ဈေးကွက်မှာလဲ၊ ဒီလိုပါပဲ။ (၁၉၉၇) ခုနှစ်ကနေ (၂၀၁၀) အတွင်း၊ ဗဟိုဘဏ်ကငွေချေး စာချုပ်တွေ ထုတ်ရောင်းချခဲ့ရာမှာ၊ ဒုတိယအဆင့် ပြန်လည်အရောင်းအ၀ယ်လုပ်ခဲ့ကြတဲ့ ငွေချေးစာချုပ်က (၉၄၂)ခု၊ တန်ဖိုးအားဖြင့် ကျပ် (၁၃၁)သန်းဖိုးသာ ရှိတာကို တွေ့ရတယ်။ လူတွေလက်ထဲမှာရှိနေတဲ့၊ အစိုးရငွေချေးစာချုပ်ရဲ့ (၀.၀၀၆)% သာရှိခဲ့ပါတယ်။ (၂၀၁၁) ဇန်န၀ါရီမှာ၊ ဗဟိုဘဏ်က (၁၀.၅)% အတိုးပေးတဲ့၊ (၂)နှစ်သက်တမ်းရှိ၊ ငွေချေးစာချုပ်တွေ ရောင်းခဲ့ပါတယ်။ ပြီးတော့ (၂၀၁၁) စက်တင်ဘာလမှာ ဗဟိုဘဏ်က အတိုးနှုန်းကို  (၁၂)% ကနေ (၁၀)% အထိ ချပေးလိုက်တော့၊ အစိုးရငွေချေးစာချုပ်တွေရဲ့ အတိုးနှုန်းက ပိုမြင့်နေတော့၊ အရောင်းသွက်လာခဲ့ပါတယ်။ (စက်တင်ဘာလ (၁)လထဲမှာကိုပဲ (၃) ဘီလီယံ (ကျပ်) ကျော်ကျော် ရောင်းခဲ့ရတာ တွေ့ရပါတယ်။
          မြန်မာစတော့ရှယ်ယာဒိုင်ဟာ၊ အစကောင်းခဲ့တယ်လို့ ဆိုနိုင်ပါတယ်။ ဒါပေမယ့်၊ အများပိုင်ကုမ္ပဏီတွေက ဖြစ်မလာ၊ (၁၉၉၇) ခုနှစ်လေက်မှာ အာရှအကြပ်အတည်းဖြစ်၊ (၂၀၀၃) ခုနှစ်မှာ မြန်မာဘဏ်အကြပ်အတည်းတွေနဲ့ ကြုံပြီး၊ အုတ်မြစ်ကနေ အပေါ်ကို တက်မလာနိုင်ခဲ့ပါဘူး။ ဥပဒေလဲ ခုထိ မပြဋ္ဌာန်းနိုင်သေးပါဘူး။ နိုင်ငံပိုင် လုပ်ငန်းတွေ၊ ပုဂ္ဂလိကလက်ထဲကို ရောင်းချမှုဟာလဲ၊ ငွေကြေးဈေးကွက်တွေ၊ စတော့ရှယ်ယာဈေးကွက်တွေနဲ့ ချိတ်ဆက်မှု မရှိခဲ့ပါဘူး။
          တကယ်တော့၊ အရင်းအနှီးဈေးကွက် ပေါ်ပေါက်ရေးဟာ အရေးကြီးတာမှန်ပေမယ့်၊ ပိုပြီးအရေးကြီးတာက၊ ဘဏ္ဍာရေး (ငွေရေးကြေးရေး) ကဏ္ဍကြီးတစ်ခုလုံးရဲ့ ဖွံ့ဖြိုးတိုးတက်မှုပါ။
(၂)
          ငွေကြေး၊ ဘဏ္ဍာရေးကဏ္ဍ ဖွံ့ဖြိုးတိုးတက်ရေး ဆွေးနွေးပွဲမှာ၊ မြန်မာဘက်က စာတမ်းတွေရယ်၊ ဥရောပသမဂ္ဂနဲ့ ဧည့်သည်ပညာရှင်တွေရဲ့၊ တင်ပြချက်တွေကိုပါ၊ ကြားသိရပါတယ်။ ဖြစ်နေတာတွေရယ်၊ ဖြစ်သင့်တာနဲ့၊ ဖြစ်ချင်တာတွေရယ်၊ သိရကြားရပါတယ်။
          အဲဒီထဲက၊ စတော့ရှယ်ယာဈေးကွက်နဲ့ ပတ်သက်တဲ့၊ စာတမ်းတစ်စောင်ကို နားထောင်ရတာ၊ အတော်လေး တန်ဖိုးရှိပါတယ်။ သူက၊ ထိုင်းဘဏ္ဍာရေးဝန်ကြီးဌာန၊ ထိုင်းစတော့ဒိုင်နဲ့ ထိုင်းဘဏ်တွေမှာ အလုပ်လုပ်ခဲ့ပြီး၊ ဒီ့မတိုင်ခင်က၊ ကမ္ဘာ့ဘဏ်မှာလဲ အလုပ်လုပ်ခဲ့ဘူးသူဖြစ်လေတော့၊ ဒေါက်တာ ဆီသာပွတ် ဆူသီဝတ် နာရူပွတ်ဟာ သဘောတရားရော လက်တွေ့ရော၊ အရှေ့တိုင်း၊ အနောက်တိုင်းငွေကြေးနဲ့ ဘဏ်လုပ်ငန်းအတွေ့အကြုံတွေ၊ တော်တော်စုံစုံလင်လင် ပြည့်ပြည့်၀၀ ရှိထားတဲ့သူ ဖြစ်ပါတယ်။
          သူက“ ဒေသတွင်း၊ အရင်းအနှီးဈေးကွက် ဖွံ့ဖြိုးတိုးတက်မှုကနေ ရရှိတဲ့ သင်ခန်းစာ (၅)ရပ်နဲ့၊ မြန်မာနိုင်ငံနဲ့ ပတ်သက်တဲ့ အကြံပြုချက်များ” ဆိုတဲ့ စာတမ်းကို ဖတ်သွားတာပါ။       သူရဲ့ စာတမ်းကို၊ မြန်မာဘာသာပြန်ဆိုပြီး ဖြန့်ဝေပေးထားပါတယ်။
          ပထမဆုံးသင်ခန်းစာကတော့၊ ဘဏ်လုပ်ငန်းတွေကို အထောက်အကူပြုတဲ့အနေနဲ့၊ အရင်းအနှီးဈေးကွက်ကို တည်ထောင်ဖို့ဖြစ်ပါတယ်။ အမေရိကန် ဗဟိုဘဏ်ဥက္ကဋ္ဌဟောင်း ဂရင်းစပန့်က၊ အရင်းအနှီးဈေးကွက်ဆိုတာ (စပယ်ရာဝှီး) တာရာအပိုဆောင်ထားတာနဲ့ တူတယ်။ ဘဏ်တွေကလဲ ခဏခဏ အကြပ်အတည်း ဖြစ်နေကြတာဆိုတော့၊ ဘဏ်တွေ အကြပ်အတည်းဖြစ်တဲ့အချိန်မှာ၊ ထုတ်သုံးစရာ၊ Span Tire က အရေးပါနေတော့ တာပေါ့။
          (၁၉၉၇) ခုနှစ်၊ အာရှဘဏ္ဍာရေးအကြပ်အတည်းနဲ့ ကြုံတွေ့ခဲ့ရစဉ်က၊ ဘဏ်တွေကို အားအကိုးလွန်တာဟာ၊ အန္တရာယ်ကြီးတဲ့အကြောင်း တွေ့ခဲ့ရပါတယ်။ ဘဏ်တွေအကြပ်အတည်းဖြစ်ပြီဆိုရင် ငွေလဲမချေးနိုင်တော့ပါဘူး။ နိုင်ငံရဲ့ စီးပွားရေးအဆောက်အအုံ ခိုင်မာတောင့်တင်းဖို့ဆိုရင်၊ လည်ပတ်မှုမှန်ကန်တဲ့ အရင်းအနှီးဈေးကွက်ရှိရပါမယ်။ ဘဏ်တွေကို အားကိုးလွန်းအားကြီးရင်၊ အစိုးရနဲ့ အခွန်ထမ်းတွေအတွက်လည်း မကောင်းပါဘူး။ ဘဏ်တွေပြိုမှာစိုးလို့၊ သူတို့ကို ကယ်တင်ရ၊ အာမခံရတဲ့ စရိတ်စက အလွန်ကြီးမားပါတယ်။ ဘဏ်မှာအပ်နှံထားသူတွေကို ကယ်တင်လေ့ရှိပေမယ့်၊ အစုရှယ်ယာရှင်တွေ၊ ငွေချေးစာချုပ်ဝယ်ယူထားသူတွေတော့၊ လွှတ်ပေးလိုက်တာများပါတယ်။ အစိုးရဘတ်ဂျက်တွေ၊ အခွန်ထမ်းတွေရဲ့ ငွေတွေနဲ့ အကုန်အကျမခံရပါဘူး။
          ဒါကြောင့်၊ မြန်မာနိုင်ငံအနေနဲ့လဲ၊ အရင်းအနှီးဈေးကွက်ဟာ အရေးကြီးတာ မှန်ပေမယ့်၊ ဘဏ်တွေကို အထောက်အကူပြုဖို့သာ ဖြစ်တယ်ဆိုတာ၊ သတိထားသင့်ပါတယ်။ ဘဏ်လုပ်ငန်းတွေ ဖွံ့ဖြိုးတိုးတက်ဖို့ ဦးစားပေးဆောင်ရွက်သင့်တဲ့အကြောင်း၊ သူက ထောက်ပြပါတယ်။ ပြီးတော့၊ ဘဏ်တွေဟာ အရင်းအနှီးဈေးကွက် ပေါ်ပေါက်ရေးအတွက်၊ အထောက်အကူ ဖြစ်စေနိုင်ပါတယ်။
          ဒုတိယသင်ခန်းစာကတော့၊ အရင်းအနှီးဈေးကွက်တွေဟာ၊ တိုးတက်မှုကို မြန်ဆန်အောင် လုပ်ပေးနိုင်ပေမယ့်၊ တိုးတက်အောင်တော့ လုပ်မပေးနိုင်ဘူး။ အရင်းအနှီးဈေးကွက်ဖွံ့ဖြိုးတိုးတက်ဖို့ ဆိုတာက၊ စီးပွားရေးလုပ်ငန်းတွေ ဘယ်လောက်ဖွံ့ဖြိုးတိုးတက်သလဲဆိုတဲ့ အပေါ်မှာ မူတည်တယ်။ ဒီတော့၊ စီးပွားရေးလုပ်ငန်းလုပ်ရကိုင်ရတဲ့ ပတ်ဝန်းကျင်ကြီးတစ်ခုလုံးအပေါ်မှာ၊ အရင်းအနှီးဈေးကွက်ရဲ့ တိုးတက်မှု  မူတည်နေတယ်လို့ ဆိုရမှာပါ။ ပါမစ်တွေ ခွင့်ပြုချက်တွေ အထပ်ထပ်ယူနေရသလား? လျှပ်စစ်၊ သယ်ယူပို့ဆောင်ရေးနဲ့ ဆက်သွယ်ရေး ၀န်ဆောင်မှုတွေ အလွယ်တကူ ရနိုင်သလား? ဆိုတဲ့ မေးခွန်းတွေကို၊ ဒီနေရာမှာ၊ မေးရမှာပါ။ အခြေခံကောင်းဖို့ လိုအပ်ပါတယ်။
          ပြီးတော့ ငွေချေးစာချုပ် ဈေးကွက်ပေါ်ပေါက်ဖို့အရေးမှာ၊ တိုးတက်မှုနှုန်းတွေ နှေးကွေးတတ်တာ၊ နိုင်ငံအတော်များများမှာ တွေ့ကြုံရပါတယ်။ ဘာလို့လဲဆိုတော့။ အစိုးရတွေမှာ၊ ပြုပြင်ပြောင်းလဲမှုတွေ ပြုလုပ်ဖို့၊  စီမံခန့်ခွဲမှုစွမ်းအား၊ ငွေအားသိပ်ပြီး မတောင့်တင်းကြလို့ပါ။ ဒါကြောင့် အရေးကြီးတာတွေကိုပဲ ဦးစားပေးဆောင်ရွက်သင့်ပါတယ်။ ကိုယ့်ရဲ့ နိုင်ငံရေးလမ်းကြောင်းနဲ့ ဦးတည်ချက်ကို သေသေချာချာ ရှင်းရှင်းလင်းလင်း သိမှ၊ ဘယ်နယ်ပယ်ကို ဂရုစိုက်လုပ်ရမယ်ဆိုတာ သိနိုင်ပါတယ်။ မဟုတ်ရင် ဟိုဟာလေးလုပ်လိုက်၊ ဒီဟာလေးလုပ်လိုက်၊ လုပ်ပြီးရင် ရပ်သွားလိုက် ဖြစ်နိုင်ပါတယ်။
           မြန်မာနိုင်ငံအနေနဲ့၊ ဘဏ်လုပ်ငန်း၊ အခြေခံလမ်းပန်းဆက်သွယ်ရေးနဲ့ ဥပဒေပိုင်း၊ အုပ်ချုပ်စီမံမှုအပိုင်းတွေကို အရင်လုပ်ရပါမယ်။ အရင်းအနှီးဈေးကွက် ဖွံ့ဖြိုးဖို့ အစီအစဉ်ချ၊ ဦးစားပေး ရမယ့်ကိစ္စတွေ ဇောက်ချလုပ်ရမယ်လို့ သူက အကြံပြုပါတယ်။
          ရှိကိုရှိရမယ့် ကိစ္စတွေနဲ့၊ ရှိရင်ကောင်းတာပေါ့ဆိုတဲ့ ကိစ္စတွေက၊ မတူပါဘူး။ သူ ဥပမာပေးတာက၊ မြန်မာနိုင်ငံရဲ့ အခြေခံလမ်းပန်းဆက်သွယ်ရေး ဖွံ့ဖြိုးတိုးတက်မှုအတွက် ပြည်သူပိုင်နဲ့ ပုဂ္ဂလိကပူးပေါင်းဆောင်ရွက်ရေးဟာ မရှိမဖြစ်တဲ့ ကိစ္စဖြစ်ပြီး၊ အာဆီယံအရင်းအနှီးဈေးကွက်နဲ့ ချိတ်ဆက်ရေးဆိုတာကတော့၊ မရှိမဖြစ်မဟုတ်၊ ရှိရင်ကောင်းတာပေါ့ဆိုတဲ့ အထဲကပါလို့ ခွဲပြပါတယ်။
          တတိယသင်ခန်းစာက၊ အရင်းအနှီးဈေးကွက်ဆိုတာလဲ ဈေးကွက်တစ်ခုပါ။ ဒါကြောင့် အရောင်းအ၀ယ် အနည်းအများအပေါ် မူတည်ပြီး၊ ဈေးကွက်ထွန်းကားတယ်၊ ကြီးပွားတယ်လို့ ဖြစ်ရတာပါ။ ဒါကြောင့်၊ ကုမ္ပဏီတွေ ဘယ်လောက်များ၊ အဲဒီကုမ္ပဏီတွေက၊ အရင်းအနှီးဘယ်လောက်များ၊ လူတွေ လက်ထဲမှာ ငွေချေးစာချုပ်လက်ကျန် ဘယ်လောက်ရှိသလဲဆိုတာတွေကို၊ သိပ်အလေးပေးဖို့ မကောင်းဘူး။ ဈေးနှုန်းတွေထိုးကျ၊ ထိုးတက်မှုမရှိပဲ၊ ဘယ်လောက်အရောင်းအ၀ယ် ဖြစ်နေသလဲဆိုတဲ့အပေါ် အလေးပေးသင့်ပါတယ်။ ကုမ္ပဏီတွေတော့ ရှိပါရဲ့၊ သူတို့ရဲ့ အစုရှယ်ယာတွေကို အရောင်းအ၀ယ်သိပ်မလုပ်ကြဘူးဆိုရင်တော့ အကျိုးသိပ်မများပါဘူး။ မြန်မာနိုင်ငံအနေနဲ့၊ အစပိုင်းမှာ အရောင်းအ၀ယ်များများစားစား မရှိနိုင်ဘူး။
          စတုတ္ထသင်ခန်းစာက၊ ကိုယ့်ဟာကိုယ်လုပ်မယ်၊ ကိုယ့်အားကိုယ်ကိုးမယ်ဆိုတာ၊ အရင်းအနှီးဈေးကွက်အတွက်တော့ သိပ်အဆင်မပြေလှဘူး။ အရင်းအနှီးဈေးကွက်ဆိုတာ၊ တခြားဈေးကွက်တွေလိုပါပဲ၊ အချိတ်အဆက်တွေ၊ ကွန်ယက်တွေများလေ၊ အကျိုးရှိလေပါ။ ပြီးတော့ အများကျင့်သုံးတဲ့ စံချိန်စံညွှန်းတွေကို လက်ခံလိုက်နာကျင့်သုံးရင်၊ အများနဲ့ ဆက်ဆံလို့ရမယ်။ ၀ယ်တဲ့သူတွေ၊ ရောင်းတဲ့သူတွေများလာရင်၊ ၀ယ်လို့ရောင်းလို့ ပိုကောင်းမယ်။ မြန်မာနိုင်ငံအနေနဲ့ တဆင့်ချင်းသွားစရာမလိုပဲ၊ တချို့ကိစ္စတွေမှာ၊ နိုင်ငံတကာစံနှုန်းတွေကို လိုက်နာပြီး ခုန်ပျံကျော်လွှားလို့ ရတယ်။ နိုင်ငံတကာစံနှုန်းတွေနဲ့ နိုင်ငံတကာ အရင်းအနှီးတွေကို ဆွဲဆောင်နိုင်မယ်။
          ပဉ္စမသင်ခန်းစာအနေနဲ့ ဘယ်နိုင်ငံမဆို၊ ပြည်တွင်းက စတော့ရှယ်ယာ ၀ယ်ယူသူရောင်းချသူဆိုတာက ခပ်နည်းနည်း။ သူတို့ရဲ့ ၀ယ်အားကလဲ ခပ်နည်းနည်း။ စတော့ရှယ်ယာဈေးကွက်ဆိုတာ၊ လောင်းကစားတဲ့နေရာ၊ ရင်းနှီးမြှုပ်နှံသူတွေရဲ့ နေရာမဟုတ်၊ ဈေးကစားတဲ့သူတွေရဲ့ နေရာလို့ အထင်အမြင်လွဲမှားမှုတွေကလဲ ရှိနေလေတော့၊ စတော့ရှယ်ယာမ၀ယ်ပဲ၊ ဘဏ်တွေထဲထည့်ထားတတ်ကြတယ်။ စုဆောင်းတတ်၊ ရင်းနှီးမြှုပ်နှံတတ်၊ ငွေရေးကြေးရေးအကြောင်း နားလည်အောင်လုပ်ပေးတတ်ဖို့ လိုတယ်။ စတော့ရှယ်ယာ ရောင်းကြ၀ယ်ကြတာကို လူနည်းနည်းလေးကပဲ လုပ်နေရင်လဲ မကောင်းလှဘူး။ ကျောင်းတွေ တက္ကသိုလ်တွေမှာ ငွေကြေးလုပ်ငန်းအကြောင်း ပညာပေးပြီး၊ စုဆောင်းတတ်၊ ရင်းနှီးမြှုပ်နှံတတ်အောင် အားပေးလေ့ကျင့်သင့်တယ်။
          တခြားနိုင်ငံတွေရဲ့ သင်ခန်းစာတွေကို ကြည့်ရင် ဘာလုပ်ရမယ်ဆိုတာ သိသလို၊ ဘာမလုပ်ရဘူးဆိုတာသိရင်လဲ ကောင်းတာပါပဲ တဲ့။
(အခုလုပ်တဲ့၊ ငွေကြေးနဲ့ ဘဏ္ဍာရေးဆွေးနွေးပွဲမှာ၊ ပြည်ပ ပညာရှင်အချို့ရဲ့ စာတမ်းတွေ၊ တင်ပြချက်တွေကို ချက်ချင်း မြန်မာဘာသာပြန်ဆို ထုတ်ဝေပေးနိုင်တာ၊ ဂျာမနီပါမောက္ခတစ်ဦးရဲ့၊ ကျောထောက်နောက်ခံ စာတမ်းတွေကို၊ ဆွေးနွေးပွဲအပြီး၊ စီဒီနဲ့ ထုတ်ပေးနိုင်တာတွေကိုလဲ၊ ချီးကျူးအသိအမှတ်ပြုလိုပါတယ်။ အခုဆိုရင်၊ အရင်က လျှို့လျှို့ဝှက်ဝှက် ရှိလှတဲ့၊ စာတမ်းတွေ၊ တင်ပြချက်တွေကို၊ ဆွေးနွေးပွဲအပြီးမှာ၊ စီဒီနဲ့ ထုတ်ပေးလာတတ်ကြလို့၊ တက်ရောက်ခွင့်မရှိသူတွေ၊ မတက်ရောက်နိုင်သူတွေပါ၊ ကျယ်ကျယ်ပြန့်ပြန့် လေ့လာခွင့်ရနေကြတဲ့အတွက် ကျေးဇူးတင်ပါတယ်။)

ခင်မောင်ညို
(ဘောဂဗေဒ)
(၁၄-၁၁-၂၀၁၁)