🔪👺 ဒေါသ 👺🔪

LIFE with Zephyr Cho and 25 others

ဒေါသဖြစ်တာနည်းလာရင် ကိုယ်လည်း စိတ်ပိုချမ်းသာမယ်။ ကိုယ့်မိသားစုလည်း စိတ်ပိုချမ်းသာမယ်။ ကိုယ့်လုပ်ဖော်ကိုင်ဖက်တွေလည်း စိတ် ပိုချမ်းသာမယ်။ ဒေါသနည်းရင် စိတ်မငြိမ်မှု နည်းသွားတယ်။ အရင်စလို လုပ်တာ၊ ပြောတာ နည်းသွားတယ်။ဒေါသ ဖြစ်တာကို သိတာ များလာလေလေ ဒေါသ နည်းသွားလေလေပဲ။ ကြောက်တာ၊ စိုးရိမ်တာကို သိလေလေ ကြောက်တာ စိုးရိမ်တာ နည်းသွားလေလေပဲ။ အဲဒါ တကယ်လက်တွေ့ လုပ်ကြည့်မှပဲ သိမယ်။

ဒေါသနဲ့ပေါက်ကွဲတာလည်း မကောင်းဘူး။ အရှုံးပေးပြီး ကျိတ်ပြီး ဒေါသဖြစ်တာ၊ ကိုယ့်ကိုယ်ကို အပြစ်တင်နေတာလည်း မကောင်းဘူး။ ဒါကြောင့် ဒီဒေါသ အကြောင်းကို သေသေချာချာ လေ့လာသင့်တယ်။ အဆင်မပြေတာ၊ မကြိုက်တာ၊ မတရားတာနဲ့ ကြုံရရင် ဒေါသ ဖြစ်တတ်တာ လူ့သဘာဝပါပဲ။ ဒါပေမဲ့ ဒေါသဖြစ်တာ မကျေမနပ်ဖြစ်တာ များလွန်းနေရင်တော့ ကိုယ့်သဘောထား ကိုယ့်ခံယူချက် မှားနေတယ်လို့ နားလည်သင့်တယ်။

တချို့ကိစ္စတွေမှာ ကိုယ်က ဒေါသ မဖြစ်ပဲနေရင် ကိုယ့်ကို သတ္တိမရှိဘူး၊ ညံ့တယ်၊ ပျော့တယ်၊ အတယ်လို့ အထင်ခံရမှာ ကြောက်လို့ ဒေါသဖြစ်တာ။ ဒေါသမဖြစ်ပဲနေရင် ဂုဏ်သိက္ခာကျမယ်လို့ ထင်တယ်။ ဒါကြောင့် ကိုယ့်ကို လေးစားမှုပိုရှိအောင် ဒေါသ ဖြစ်လိုက်ရတယ်။ ဒါမျိုးကို ငါလက်မခံဘူး၊ ငါ့ကို ဒါမျိုး လာလုပ်လို့မရဘူး၊ နဂါးမှန်းသိအောင် အမောက် ထောင်ပြမှဖြစ်မယ်။ လူတွေက ရေမြွေလို့ထင်ရင် ရိုက်ချင်တယ်။ အဲဒီလို သူများကလည်း ကိုယ့်ကို လေးစားမှု ပိုရှိအောင် ဒေါသ ဖြစ်ပြကြတယ်။ ဒါကြောင့် တယောက်ကို တယောက် လေးလေးစားစား ပြောရင် ဒေါသဖြစ်တာ နဲသွားမယ်။

ကိုယ့်ကို မလေးစားဘူးထင်လို့ လေးစားလာအောင် ဒေါသကြီးကြီးနဲ့ ပြောမယ်၊ ဆိုမယ်၊ လုပ်မယ် ဆိုရင် ကိုယ့်ဂုဏ်သိက္ခာ တကယ် တက်လာသလား။ ကိုယ့်ကို ကြောက်ရင်တော့ ကြောက်သွားမယ်၊ ကိုယ့်ကို တကယ်လေးစားမှာမဟုတ်ဘူး။ ကိုယ့်ဂုဏ်သိက္ခာ တကယ်တက်မလာဘူး။ ဒေါသ ကြီးကြီးနဲ့ အော်ရင်၊ ငေါက်ရင်၊ ရိုက်ရင် အပြစ်ဒဏ် ပေးရင် ရွံကြောက် ဖြစ်သွားမယ်။ ချစ်ခင်လေးစားမှုတော့ ရမှာ မဟုတ်ဘူး။

သောကတို့၊ ဒေါသတို့က ကိုယ့်ကို အမြင်ကျဉ်းမြောင်းသွားစေတယ်။ ရေရှည်ကို မကြည့်နိုင် မမြင်နိုင်တော့ပဲ လတ်တလော စိတ်သက်သာမှု ရအောင် ပေါက်ကွဲစေတယ်။ ဆုံးဖြတ်ချက်တွေ မှားယွင်းစေတယ်။ အမှားတွေ လုပ်စေတယ်။ ပြီးတော့ အဲဒီအမှားတွေကြောင့် အဆင်မပြေမှုတွေ ပိုများပြီးတော့ ဒေါသတွေ၊ သောကတွေ ထပ်ပွားစေတယ်။ ဒါကြောင့် ဒေါသ ဖြစ်နေတာကို သက်သာအောင် ကိုယ့်စိတ်ကို ကိုယ် သိနေတဲ့အကျင့်ကို လုပ်သင့်တယ်။ အမှား နဲလာလေ သောက နဲလာလေ၊ သောက နဲလာလေ အလုပ်ကို ပိုကောင်းအောင် လုပ်နိုင် လာလေ ဖြစ်လာတော့ ကိုယ့်ကိုယ်ကိုယုံကြည်မှု အများကြီး ရှိလာလေ ဖြစ်လာလို့ အလုပ်ကို ပိုပြီး နိုင်နိုင်နင်းနင်း လုပ်နိုင်လေ ဖြစ်လာတယ်။ တဖြည်းဖြည်း စိတ်အေးချမ်းလာတယ်။ လုပ်စရာရှိတာကို ခေါင်းအေးအေးနဲ့ လုပ်နိုင်လာတယ်။ ပြောစရာ ရှိတာတွေကို အေးအေးဆေးဆေး ပြောနိုင်လာတယ်။

ပျားဟာ မြွေခေါင်းကို မိမိရရ တုတ်ထားပြီး မလွှတ်ဘူး။ အဲဒီအချိန်မှာ လှည်းတစီး လာနေတာ မြင်တော့ မြွှေက စဉ်းစားတယ်၊ ဒီပျားကိုတော့ သေအောင် သတ်မယ်၊ ငါ့အကြောင်းကို သိစေမယ် ဆိုပြီး လှည်းလမ်းကြောင်း တည့်တည့်မှာ ခေါင်းကိုထားလိုက်တယ်။ လှည်းကြီး မောင်းလာတော့ ကျိတ်သွားတယ်။ ပျားဟာစိစိညက်ညက် ကျေသွားတယ်။ မြွှေကကော ဘာဖြစ်သွားသလဲ။ တချို့လူတွေဟာ အဲဒီ မြွှေလိုပဲ။

ကိုယ့်ကိုသူတပါးက ပြိုင်တာ၊ ဆိုင်တာ၊ ရန်လုပ်တာ၊ တနည်းအားဖြင့် ကိုယ့်အယူအဆ မကောင်းဘူး၊ မမှန်ဘူးလို့ ပြောတာ ဆိုတာဟာ ဘုရားတောင် ခံရတယ်တဲ့နော်။ ကျန်တဲ့လူတွေမှာ လွတ်နိုင်ဖို့ရာအကြောင်း ရှိပါ့မလား။ မရှိနိုင်ဘူးနော်။

ဘယ်အလုပ်မျိုးဖြစ်ဖြစ် ပြိုင်ဖက် ရှိပါတယ်။ ရေရှည်မှာ ကိုယ့်လုပ်ငန်း အဆင်ပြေချင်ရင်၊ ပြိုင်ဖက်တွေကြောင့် စိတ်တိုရတာ ဒေါသ ဖြစ်ရတာ နဲချင်ရင် ပြိုင်ဖက်တွေ အပေါ်မှာ သဘောထားကြီးကြီး ထားပါ။ ပြိုင်ဖက်ရှိတာ ကောင်းတယ်လို့ သဘောထားပါ။ ပြိုင်ဖက်တွေကိုလည်း ကိုယ်တတ်နိုင်တဲ့ အကူအညီပေးပါ။

ဒေါသဟာ ကိုယ့်ကို မတရားတဲ့သူ၊ မမျှတတဲ့သူ ဖြစ်အောင်၊ ကြမ်းကြုတ် ရက်စက်တဲ့သူ ဖြစ်အောင် လုပ်တယ်။ ဒေါသကြီးလာရင် တရားတယ် မတရားဘူး၊ မျှတတယ် မမျှတဘူး၊ လုပ်သင့်တယ် မလုပ်သင့်ဘူး ဆိုတာကို မချင့်ချိန်နိုင်တော့ဘူး။ လွန်လွန်ကျွံကျွံ ပြောမိတတ်တယ်။ အမှားတွေ လုပ်မိတတ်တယ်။ အဲဒီတော့ ပြဿနာတွေက ပိုပြီး တက်သွားတယ်။ အဲဒီ ပြဿနာတွေကို လိုက်ပြီး ဖြေရှင်းရတာ အချိန်ကုန်တယ်၊ ငွေကုန်တယ်၊ လူပင်ပန်းတယ်။ ဒါကြောင့် ဒေါသဟာ တွက်ခြေမကိုက်ဘူး။ ပေးရတာ များပြီးတော့ ပြန်ရတာနဲတယ်။

🔥🔥🔥🔥
သူများအကြောင်းကို အပြစ်ရှာနေတာဟာ ကိုယ့်မှာ တကယ် တန်ဖိုးရှိတဲ့အလုပ် လုပ်စရာမရှိလို့ပဲ။ တန်ဖိုးရှိတဲ့ အလုပ်ကို အချိန်ပြည့် လုပ်နေတဲ့သူမှာ ဘယ်သူ့ကိုမှ တာရှည်စိတ်ဆိုးနေဖို့ အချိန်မရှိဘူး။ သူများကို စိတ်ဆိုးနေတုံးမှာ ကိုယ့်အသိဥာဏ် မထွက်တော့ဘူး။

🔥🔥🔥🔥
နေ့တိုင်း စိတ်ဆိုးနေ၊ စိတ်တိုနေရင် ကြမ်းတမ်းတဲ့သူ ဖြစ်လာတယ်။ ကိုယ့်ဒေါသက ကိုယ့်ကို လွှမ်းမိုးကြီးစိုးပြီးတော့ခိုင်းတာတွေကို မလုပ်မိအောင် သတိထားရမယ်။ ဒေါသကို ဆရာတင်မိရင် မှားမယ်။ နေ့စဉ်ကြုံတွေ့နေရတဲ့ စိတ်တိုစရာ၊ စိတ်ဆိုးစရာ၊ ဒေါသဖြစ်စရာတွေဟာ ကိုယ့်ရဲ့ စိတ်အင်အားနဲ့စိတ်အခြေအနေ စိတ်ကြည်လင်ရွှင်လန်းမှုကို ဖျက်ဆီးနေတဲ့ အရာတွေထဲမှာ အကြီးမားဆုံးပဲ။ ဒါကြောင့် နေ့တိုင်းနေ့တိုင်း ထပ်တလဲလဲ ကြုံတွေ့နေရတဲ့ စိတ်တိုစရာတွေကို သတိထားရမယ်။ ဒီစိတ်တိုစရာတွေဟာ ကိုယ်နဲ့ အမြဲလိုလို ရှိနေတတ်တဲ့ အဖေါ်ပဲ။ (အဖေါ်ကောင်းတော့ မဟုတ်ဘူး။) သူတို့ကို ကိုင်တွယ်တတ်အောင် လေ့လာထားရမယ်။ သူတို့နဲ့ နေတတ်အောင်လည်း လုပ်ထားရမယ်။ လုံးလုံးကြီး ရှောင်လို့က ဖြစ်နိုင်တာမှ မဟုတ်ပဲနော်။

🔥🔥🔥🔥
ကိုယ့်ငွေတွေနဲ့အချိန်တွေ အကျိုးမဲ့ လေလွင့်မှုဖြစ်နေတာ၊ ကုန်သွားနေတာကို ဘယ်သူမဆို နှမြောတတ်ကြတယ်။ အဲဒီလိုပဲ ကိုယ့် စိတ်အင်အားတွေ၊ စိတ်ကြည်လင်မှုတွေကို မဖြစ်စလောက် ကိစ္စအသေးအမွှားလေးတွေနဲ့ နေ့စဉ် စိတ်တိုရင်းကုန်သွားနေတာကို နှမြောတတ်ဖို့ လိုပါတယ်။ လောကကြီးက ကိုယ့်စိတ်တိုင်းကျ ဖန်တီးထားပြီး ကိုယ့်အလာကို စောင့်မျှော် ကြိုဆိုနေတာမှ မဟုတ်တာ။ သူ့ဟာသူ ဖြစ်ချင်သလိုဖြစ်နေတဲ့ လောကကြီး။ ဒီလောကကြီးထဲမှာ ကိုယ်က မွေးဖွားလာရတာ၊ ဒါကိုနားလည်ပြီး adapt လုပ်ပြီး၊ ညှိနိုင်းပြီး နေသွားရမှာ။

🔥🔥🔥🔥
ဒေါသဖြစ်ရတာ နဲချင်ရင်၊ စိတ်ပျက်ရတာ နဲချင်ရင် အသွားရှိတိုင်း အပြန်မရှိနိုင်ဘူး ဆိုတာကို မမေ့ပါနဲ့။ ကိုယ်တတ်နိုင်တဲ့ အခါ ဘာမှပြန်မမျှော်လင့်ပဲ ကူညီလိုက်ပါ။ အရေးမကြီးတဲ့ ရပိုင်ခွင့်တချို့ကို မရမက ရအောင် မလုပ်ပါနဲ့။ သူ့ထက် အရေးကြီးတဲ့ ကိစ္စတွေကို အချိန်ပေးပါ။ တရာတန်လောက်ကိစ္စကြောင့် ဒေါသဖြစ်နေရင် တသိန်းတန်လောက်ကိစ္စမှာ လစ်ဟင်း သွားနိုင်တယ်။ ကိုယ့်အချိန်နဲ့ အင်အားကို ပိုပြီး အကျိုးများမဲ့နေရာမှာ သုံးပါ။ အသေးအမွှား ရပိုင်ခွင့်ကို အချိန်ကုန်ခံပြီး မရမက ရအောင် လုပ်နေရင် ကိုယ့်စိတ်ထားပါ နိမ့်ကျသွားတယ်။

🔥🔥🔥🔥
သူတပါးရဲ့ ရိုင်းစိုင်းတဲ့ အမူအရာ၊ အဆင့်အတန်းနိမ့်တဲ့ အမူအရာကြောင့် ကိုယ့်မှာ ဒေါသယမ်းအိုး မပေါက်အောင် သတိထားပါ။ ဘယ်သူ့ကိုမှ အလွန်အကျွံ အလိုမလိုက်ပါနဲ့။ အလိုလိုက်တာများလေ ရတာနဲ့ မကျေနပ်လေ ဖြစ်တတ်တယ်။

🔥🔥🔥🔥
“ပရေစ နဝိဇာနန္တိ၊ မယမေတ္ထ၊ယမာမသေ” တဲ့။ ပညာနဲတဲ့ တချို့လူတွေဟာ တို့သေမှာပါလားဆိုတာကို သတိမရဘူး။ မသိဘူး။ မေ့နေတယ်။
“ပရေစ နဝိဇာနန္တိ၊ မယမေတ္ထ ယမာမသေ။ ယေစ တတ္ထ ဝိဇာနန္တိ၊ သတောသမ္မန္တိမေဒဂါ။” တဲ့။ ပညာရှိတချို့ကတော့ တနေ့ တို့သေမှာပါလား ဆိုတာကို သိတဲ့အတွက်ကြောင့် ခိုက်ရန်ဒေါသ မဖြစ်ကြဘူး။ အငြင်းအခုံ မဖြစ်ကြဘူး။ ခိုက်ရန်ဒေါသ တွေဟာ ပြေငြိမ်းပါတယ်တဲ့၊၊💧💧💧

➖➖➖➖➖🌹🌹🌹➖➖➖➖➖

ဆရာတော်ဦးဇောတိက
( မဟာမြိုင်တောရ )
၏
🌟“ တွေးမိတိုင်းပျော်တယ် ”🌟
စာအုပ်မှ ကူးယူ ဖော်ပြပါသည်၊၊

💥အများအတွက် အကျိုးရှိစေမဲ့ စာပေတွေကို Share လုပ် မျှဝေပေးခြင်းဟာ မေတ္တာတမျိုး၊ ကုသိုလ်တမျိုး ဖြစ်ပါတယ်၊၊💥